Din sohasidagi maʼnaviy-maʼrifiy, taʼlim ishlarini va faoliyatni yanada takomillashtirishda ijtimoiy koʻmak va imtiyozlar berish toʻgʻrisida (364-son)

22.08.2003

Oʻzbekiston Respublikasi Vazirlar Mahkamasining

qarori

Oʻzbekiston musulmonlari idorasi Ulamolar kengashining islom dinining asl insonparvarlik mohiyatini asrash, xalqimiz, ayniqsa, yoshlarimizni diniy aqidaparastlik va ekstremizm xatarlaridan himoya qilish boʻyicha murojaati va bir qator jamoat tashkilotlarining takliflarini inobatga olib, mamlakatimizda ijtimoiy-maʼnaviy muhitni yanada sogʻlomlashtirish, muqaddas dinimizni soxtalashtirishga urinayotgan turli mutaassib kuchlarning yovuz harakatlari oldini olishga qaratilgan chora-tadbirlarning hayotiy ahamiyati va taʼsirchanligini oshirish maqsadida Vazirlar Mahkamasi qaror qiladi:

1. Oʻzbekiston musulmonlari idorasi, mutasaddi va daxldor jamoat tashkilotlari tomonidan ishlab chiqilgan Din sohasidagi maʼnaviy-maʼrifiy va taʼlim ishlarini takomillashtirish dasturi (1-ilova*) maʼqullansin. Tegishli davlat idoralari va mahalliy hokimiyatlar tomonidan Dasturni bajarilishiga yetarlicha koʻmak va yordam berilsin.

* 1-ilova berilmaydi.

2. Dasturdagi tadbirlarni muvofiqlashtirish va amalga oshirish maqsadida tashkil etilgan Jamoatchilik kengashining tarkibi 2-ilovaga* muvofiq maʼqullansin.

* 2-ilova berilmaydi.

3. Diniy tashkilotlardan kommunal xizmat (gaz, suv, elektr haqi va boshqa xizmatlar) uchun olinadigan toʻlovlarni ishlab chiqarish korxonasi darajasi oʻrniga jismoniy shaxslardan olinadigan miqdorda belgilash haqidagi Oʻzbekiston musulmonlari idorasining murojaatini qondirish yuzasidan 10 kun muddat ichida Vazirlar Mahkamasining farmoyishi qabul qilinsin.

Buning natijasida hosil boʻlgan va boshqa xayriya mablagʻlarini mazkur jamgʻarma hisobiga oʻtkazish, uni Oʻzbekiston musulmonlari idorasi tizimidagi masjid-madrasalarni taʼmirlash, diniy taʼlim muassasalarining oʻquv va moddiy bazasini mustahkamlash, ularga zamonaviy shart-sharoit yaratish, oʻqituvchi-mudarris va imom-xatiblarning mehnatini ragʻbatlantirish ishlariga sarflanishi nazarda tutilsin.

4. Madaniy meros obyekti sifatida davlat roʻyxatiga olingan diniy obidalar (3-ilova) belgilangan tartibda joylardagi Madaniy yodgorliklarni saqlash va ulardan foydalanish inspeksiyalari bilan tuzilgan Foydalanish va muhofazalash shartnomalari asosida Oʻzbekiston musulmonlari idorasi tasarrufiga foydalanish uchun berilsin hamda toʻplanadigan xayriya mablagʻlarining maqsadli ishlatilishi yuzasidan nazorat oʻrnatilsin.

5. Islom maʼhadi va oʻrta maxsus islom bilim yurtlarida joriy etilgan taʼlim standartlari, oʻquv rejalari hamda talabalarning qabul qilingan davlat meʼyorlariga muvofiq diniy va dunyoviy bilimlar olayotganini inobatga olib, mazkur oʻquv yurtlarining bitiruvchilariga beriladigan diplomlar davlat taʼlim hujjati sifatida eʼtirof etilsin hamda ana shu hujjat (diplom)larga ega boʻlgan shaxslarga davlat oliy taʼlim tizimida oʻqishni davom ettirish huquqi berilsin.

6. Matbuot va axborot agentligi (R. Shogʻulomov), “Oʻzteleradio” kompaniyasi (A. Koʻchimov), Oʻzbekiston Milliy axborot agentligi (M. Hazratqulov), respublika ommaviy axborot vositalariga Din sohasidagi maʼnaviy-maʼrifiy va taʼlim ishlarini takomillashtirish dasturida belgilangan tadbirlarning mohiyati va ijrosini yoritib borish tavsiya etilsin.

7. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi Z. Husniddinov va Bosh vazir oʻrinbosari H.Karomatov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 22-avgust,

364-son

Vazirlar Mahkamasining 2003-yil 22-avgustdagi 364-son qaroriga 3-ILOVA

Madaniy yodgorliklarni saqlash va ulardan foydalanish inspeksiyalari bilan tuzilgan “Foydalanish va muhofazalash shartnomalari” asosida Oʻzbekiston musulmonlari idorasi tasarrufiga foydalanish uchun berilayotgan ziyoratgohlar