“Pravda vostoka” gazetasi tahririyatining ustavi toʻgʻrisida (571-son)

26.12.2003

Oʻzbekiston Respublikasi Vazirlar Mahkamasining

qarori

Oʻzbekiston Respublikasining “Ommaviy axborot vositalari toʻgʻrisida”gi Qonunini amalga oshirishni taʼminlash maqsadida Vazirlar Mahkamasi qaror qiladi:

1. “Pravda Vostoka” gazetasi tahririyatining yangi tahrirdagi Ustavi tasdiqlansin (ilova qilinadi).

2. Oʻzbekiston Respublikasi Bosh vazirining oʻrinbosari A. Azizxoʻjayevga gazeta muassisi hamda tahririyat oʻrtasida shartnoma tuzish topshirilsin.

3. Oʻzbekiston Respublikasi Vazirlar Mahkamasining 1994-yil 15-dekabrdagi 606-son qarori oʻz kuchini yoʻqotgan deb hisoblansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2003-yil 26-dekabr,

571-son

Vazirlar Mahkamasining 2003yil 26-dekabrdagi 571-son qaroriga ILOVA

“Pravda Vostoka” gazetasi tahririyatining

USTAVI

I. UMUMIY QOIDALAR

1. Ushbu Ustav “Pravda Vostoka” gazetasi tahririyatining (bundan keyin matnda “Tahririyat” deb yuritiladi) huquqiy asoslarini belgilaydi.

2. Gazetaning muassisi Oʻzbekiston Respublikasi Vazirlar Mahkamasi (bundan keyin matnda “Muassis” deb yuritiladi) hisoblanadi.

3. “Pravda Vostoka” gazetasi ijtimoiy-siyosiy va ommaviy nashr boʻlib, haftada 5-marta, rus tilida chop etiladi.

4. Tahririyat bilan Muassis oʻrtasidagi oʻzaro munosabatlar mazkur Ustav va qonun hujjatlari asosida yoʻlga qoʻyiladi.

5. Tahririyat Ustavi Tahririyat xodimlarining umumiy yigʻilishida qabul qilinadi va Muassis tomonidan tasdiqlangan vaqtdan boshlab kuchga kiradi. Tahririyat belgilangan tartibda davlat roʻyxatidan oʻtkazilgandan keyin yuridik shaxs huquqiga ega boʻladi.

6. Tahririyat oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisining qarorlariga, Oʻzbekiston Respublikasi Prezidentining farmonlari va farmoyishlariga, Vazirlar Mahkamasining qarorlari va farmoyishlariga, mazkur Ustavga hamda boshqa qonun hujjatlariga amal qiladi.

7. Tahririyat yuridik shaxs sifatida oʻz nomiga, mustaqil balansga, bank muassasalarida hisob-kitob raqamiga, valyuta hisob raqamiga va boshqa xil hisob raqamlariga, alohida mol-mulkka, oʻz nomi yozilgan gerbli muhr, shtamp, ramz, nashr va tovar belgilariga, shuningdek, ish yuritish qogʻozlariga ega boʻladi.

8. Tahririyat manzili: Toshkent shahri, Matbuotchilar koʻchasi, 32-uy.

II. TAHRIRIYAT FAOLIYATINING MAQSADI, ASOSIY VAZIFALARI VA YOʻNALIShLARI

9. Oʻzbekiston Respublikasi Oliy Majlisi, Vazirlar Mahkamasi hamda ijro etuvchi hokimiyat organlari faoliyatini, siyosiy, ijtimoiy-iqtisodiy, maʼnaviy-axloqiy jarayonlarni xolis va begʻaraz yoritish Tahririyatning asosiy vazifasi hisoblanadi.

10. Tahririyat Oʻzbekiston Respublikasi Oliy Majlisi sessiyalari, Vazirlar Mahkamasi majlislari materiallarini, Oʻzbekiston Respublikasi qonunlarini, Oliy Majlis qarorlarini, Oʻzbekiston Respublikasi Prezidenti farmonlari va farmoyishlarini, Vazirlar Mahkamasi qarorlari va farmoyishlarini chop etadi hamda Vazirlar Mahkamasida oʻtkaziladigan boshqa tadbirlarni yoritadi.

Tahririyat Vazirlar Mahkamasi tomonidan belgilangan boshqa rasmiy materiallarning chop etilishini taʼminlaydi.

11. Tahririyat Oʻzbekiston Respublikasida va xorijda roʻy berayotgan voqea-hodisalarni yoritadi, turli nuqtayi nazar va fikr-mulohazalarni izhor etish uchun gazeta sahifalaridan joy beradi.

12. Tahririyat vazirliklar, idoralar, korporatsiyalar, konsernlar, qoʻshma korxonalar, chet el vakolatxonalari va boshqa tashkilotlar, muassasalar bilan kelishuv va shartnomalarga muvofiq, turli faoliyat yoʻnalishlariga oid axborotlarni, shuningdek, davlat, yuridik va jismoniy shaxslarning reklama hamda eʼlonlarini haq olish yoʻli bilan bosib chiqaradi.

13. Tahririyat gazetani matbuotning oʻziga xos xususiyatiga muvofiq belgilangan tartibda va oʻz vaqtida chiqarishni taʼminlaydi.

14. Tahririyat oʻz maqsadlarini amalga oshirish uchun:

chop etilayotgan materiallarning yuksak kasb mahorati darajasida boʻlishini taʼminlaydi;

xodimlar mehnatiga ularning kasb mahoratlari darajasi, ish va ijodiy jihatdan qoʻshgan hissasi, oʻz vazifasiga masʼuliyat bilan yondashishiga muvofiq haq toʻlaydi;

ishlab chiqarish va mehnat intizomini mustahkamlaydi;

jamoada ish jarayonida har bir xodimning kasb salohiyatini toʻla namoyon etishiga imkon beradigan qulay vaziyatni vujudga keltiradi, xizmat vazifalarini bajarish uchun zarur moddiy-texnik shart-sharoitni yaratib beradi;

xodimlarning ijodiy yutuqlarini maʼnaviy va moddiy ragʻbatlantiradi, ularning turmush sharoitlarini yaxshilash haqida gʻamxoʻrlik qiladi;

Oʻzbekiston Respublikasi va xorijiy davlatlardagi davriy nashrlar, ijodiy uyushmalar va jamoat birlashmalari bilan aloqalar oʻrnatadi.

III. MUASSISNING HUQUQLARI VA MAJBURIYATLARI

15. Muassis quyidagi huquqlarga ega:

ustav va qonun hujjatlarida, shuningdek, u bilan tahririyat oʻrtasida tuzilgan shartnomada belgilangan vakolatlari doirasida gazetaning ishlarini boshqarishda ishtirok etish;

tahririyatdan qonun chiqaruvchi va ijro etuvchi hokimiyat organlari faoliyatini xolisona yoritish, Oʻzbekiston Respublikasi qonunlarini, Oʻzbekiston Respublikasi Prezidentining farmonlari va farmoyishlarini, Vazirlar Mahkamasining qarorlari va farmoyishlarini hamda matbuot uchun moʻljallangan materiallarni koʻrsatilgan vaqtda eʼlon qilishni talab qilish;

gazetani muassis yoki u tomonidan koʻrsatilgan uchinchi shaxslar manfaatlarini koʻzlab qonun hujjatlariga muvofiq boshqaruvni amalga oshirishi lozim boʻlgan boshqa shaxsga (ishonchli boshqaruvchiga) mulkiy majmua sifatida ishonchli boshqaruvga topshirish;

tahririyat faoliyatining asosiy yoʻnalishlarini belgilashda qatnashish, Bosh muharrirni lavozimga tayinlash va lavozimdan ozod qilish;

gazeta tugatilgan yoki tahririyat faoliyati tugatilgan taqdirda kreditorlar bilan hisob-kitob qilinganidan keyin qolgan mol-mulkning yoki uning qiymatini qoʻshgan mulkiy ulushiga muvofiq qonun hujjatlarida nazarda tutilgan tartibda olish.

16. Muassis quyidagilarni bajarishi shart:

gazetaning ustavini tasdiqlash;

gazeta tahririyati bilan shartnoma tuzish;

ommaviy axborot vositalari toʻgʻrisidagi qonun hujjatlariga rioya etilishi ustidan nazoratni taʼminlash;

zarur hollarda moddiy, moliyaviy va boshqa xil yordam koʻrsatish;

Tahririyatning moliya-xoʻjalik faoliyati taftish qilinishini taʼminlash.

17. Qonun hujjatlariga muvofiq Muassis boshqa huquqlarga ham ega boʻlishi va zimmasida boshqa majburiyatlar ham boʻlishi mumkin.

IV. TAHRIRIYATNI BOShQARISh

18. Tahririyat faoliyatining joriy va istiqbolga moʻljallangan masalalarini hal etish uchun Bosh muharrir, uning oʻrinbosarlari, masʼul kotib, yetakchi boʻlim muharrirlari, jurnalistlar, Muassis va jamoatchilik vakillaridan iborat tahrir hayʼati tuziladi. Tahrir hayʼatining tarkibi va soni hamda unga kiritiladigan oʻzgartirishlar Bosh muharrir taklifiga binoan Muassis tomonidan tasdiqlanadi.

19. Tahrir hayʼati oʻz ishini Bosh muharrir tomonidan tasdiqlangan joriy va istiqbolga moʻljallangan rejalar asosida yuritadi.

20. Tahrir hayʼati va mehnat jamoasi ishiga gazeta Bosh muharriri boshchilik qiladi.

21. Bosh muharrir Muassis uni lavozimga tayinlagan vaqtdan boshlab oʻz vazifasini bajarishga kirishadi.

22. Bosh muharrir:

mazkur Ustavning bajarilishi uchun Muassis oldida javob beradi;

Bosh muharrir oʻrinbosarlari lavozimiga nomzodlar toʻgʻrisida Muassisga oʻz takliflarini taqdim etadi;

kreditlarni tasarruf etadi;

qonun hujjatlariga muvofiq, Tahririyatning mansabdor shaxslarini, jurnalistlar jamoasi aʼzolarini, boshqa xodimlarni ishga qabul qilish toʻgʻrisida mehnat shartnomalari tuzadi hamda ular bilan tuzilgan mehnat shartnomalarini bekor qiladi;

oʻz vakolati doirasida mehnat jamoasining har bir aʼzosi tomonidan bajarilishi shart boʻlgan buyruqlar, farmoyishlar chiqaradi;

mehnat jamoasi aʼzolarining oylik ish haqiga qonun hujjatlariga muvofiq ustama haq toʻlashni amalga oshiradi;

daromad va xarajatlar smetasi doirasida shtat jadvaliga oʻzgartirishlar kiritadi;

tahririyat faoliyatiga oid oʻz vakolatiga kiradigan boshqa masalalarni hal etadi.

23. Bosh muharrir vaqtincha ishda boʻlmagan paytlarda uning vazifasini Bosh muharrir oʻrinbosari bajaradi.

24. Jurnalistlar jamoasi tahririyatning butun mehnat jamoasi asosini tashkil etib, u ijodiy xodimlardan: Bosh muharrir, uning oʻrinbosari, masʼul kotib, adabiy kotib, boʻlim muharrirlari, sharhlovchilar, oʻz maxsus muxbirlari va katta muxbirlar, muxbirlar, rassomlar, suratkash-muxbir, tarjimonlardan, reklama boʻlimi xodimlari, texnik kotibdan iborat boʻladi. Bosh muharrir tahririyat tuzilmasidan kelib chiqib, uni oʻzgartirishi mumkin.

V. TAHRIRIYATNING IShLAB ChIQARISh-XOʻJALIK VA MOLIYA FAOLIYATI

25. Tahririyat ishlab chiqarish-xoʻjalik, moliya faoliyatini xoʻjalik hisobi asosida amalga oshiradi, belgilangan shaklda tezkor va buxgalteriya hisob-kitobini yuritadi.

26. Quyidagilar:

gazeta obunasidan va gazetaning chakana savdosidan tushadigan daromad;

qonun hujjatlariga zid boʻlmagan noshirlik, reklama va tadbirkorlik faoliyatidan olinadigan daromad;

banklar va boshqa tashkilotlarning kreditlari;

begʻaraz xayriya, homiylik badallari, Oʻzbekiston Respublikasi korxonalari, muassasalari va tashkilotlari, shuningdek, fuqarolarining xayr-ehsonlari;

zaruriyat tugʻilganda Muassisning moliyaviy yordami;

qonun hujjatlarida taqiqlanmagan boshqa manbalar Tahririyat faoliyatini mablagʻ bilan taʼminlash manbalari hisoblanadi.

27. Tahririyat mulk sifatidagi bino va inshootlarga, uskunalarga, jihozlarga, yuk va yengil avtomobillarga, madaniy-maʼrifiy va sogʻlomlashtirish ishlariga moʻljallangan mol-mulkka, texnika vositalariga, kompyuterlarga, pul mablagʻlari, aksiya va boshqa qimmatli qogʻozlarga hamda oʻz faoliyatini moddiy-texnik taʼminlash uchun boshqa zarur mol-mulkka ega boʻlishi mumkin.

28. Tahririyat qonun hujjatlariga muvofiq, yuridik va jismoniy shaxslar bilan moliya-tijorat bitimlarini tuzadi, kreditlar oladi, mulkiy va shaxsiy nomulkiy huquqlarga ega boʻladi va ular yuzasidan tegishlicha javobgar boʻladi.

29. Tahririyat oʻz mol-mulki va qonuniy asosda olingan mol-mulk bilan boshqa xoʻjalik subyekti faoliyatida ishtirok etish, korxonalar barpo etish yoki barpo etishda muassislardan biri boʻlish huquqiga ega boʻladi.

30. Tahririyat mazkur Ustavda nazarda tutilgan oʻz vazifalarini bajarar ekan, quyidagilarga ham haqlidir:

qonun hujjatlari bilan taqiqlanmagan ishlab chiqarish, tijorat, moliya faoliyati bilan shugʻullanish;

axborot, reklama, dizayn, matbaachilik sohalarida xizmat koʻrsatish;

yuridik va jismoniy shaxslarning maslahat xizmatiga oid ehtiyojlarini qondirish;

chet el investitsiyalarining mamlakatimiz iqtisodiyotiga kirib kelishiga koʻmaklashish;

muayyan tartibda va doimiy sarlavhalar ostida ilova nashrlar chiqarish;

Oʻzbekiston Respublikasi qonun hujjatlari bilan taqiqlanmagan boshqa faoliyat turlarini amalga oshirish.

31. Olingan foyda Tahririyat tasarrufida boʻladi va Tahririyat undan oʻz rivoji uchun mustaqil foydalanadi, bu foyda asossiz ravishda olib qoʻyilishi mumkin emas.

32. Tahririyat xodimlari mehnatiga haq toʻlash shakli, tizimi, miqdori, shuningdek, qalam haqi miqdorlari qonun hujjatlariga muvofiq belgilanadi.

33. Tahririyat begʻaraz xayriya, homiylik badallaridan, shu jumladan, Oʻzbekiston Respublikasi korxonalari, muassasalari va tashkilotlarining begʻaraz xayriya, homiylik badallaridan, shuningdek, reklama va tadbirkorlik faoliyatidan tushadigan daromadlardan xodimlarni ragʻbatlantirish va mukofotlash, badal tarzidagi toʻlovlar maqsadlari uchun foydalanish huquqiga ega.

34. Tahririyat gazetaning davriyligini, hajmini, oʻlchamini va narxini, boshqa ishlar va koʻrsatiladigan xizmatlar bahosini belgilangan tartibda oʻzgartirishi mumkin.

35. Tahririyat oʻz ishlab chiqarish faoliyatini vaqtli matbuot nashrlarini yetkazib beruvchi, tarqatuvchi korxonalar, tashkilotlar va boshqa muassasalar bilan shartnomalarga muvofiq rejalashtiradi.

36. Tahririyatning tashqi iqtisodiy faoliyati qonun hujjatlariga muvofiq amalga oshiriladi.

VI. TAHRIRIYAT VA XODIMLAR OʻRTASIDAGI MUNOSABATLAR. TAHRIRIYAT USTAVI

37. Tahririyat jamoasidagi mehnatga oid munosabatlar qonun hujjatlari, ushbu Ustav, jamoa shartnomasi, ichki mehnat tartibi qoidalari, lavozimga oid yoʻriqnomalar hamda Tahririyatning boshqa hujjatlari bilan tartibga solinadi. Xodimlarning lavozimlari roʻyxati Bosh muharrir tomonidan tasdiqlanadi.

38. Tahririyat xodimlariga, shu jumladan, xodimlar roʻyxatidan tashqari ishga qabul qilingan xodimlarga yagona namunadagi guvohnoma beriladi.

39. Tahririyat Ustavi Tahririyat xodimlarining kamida uchdan ikki qismi ishtirok etgan umumiy yigʻilishda koʻpchilik ovoz bilan qabul qilinadi va Muassis tomonidan tasdiqlanadi. Qabul qilingan Ustav qoidalari Tahririyatning barcha xodimlari uchun, egallab turgan lavozimidan qatʼi nazar, majburiydir.

40. Ustavga oʻzgartirish va qoʻshimchalar kiritish Ustavni qabul qilish va tasdiqlashdagi singari tartib boʻyicha amalga oshiriladi.

VII. TAHRIRIYAT FAOLIYATINI TOʻXTATISh. TAHRIRIYATNI TUGATISh

41. Tahririyat oʻz faoliyatini:

Muassis qaroriga binoan;

sud qaroriga asosan toʻxtatadi.

42. Muassis taklifiga muvofiq Tahririyatning noshirlik faoliyati vaqtincha toʻxtatib turilishi mumkin.

43. Tahririyatni tugatish Muassis tomonidan belgilangan tartibda amalga oshiriladi.