# Budjet tizimi budjetlari daromadlarining kassa ijrosi toʻgʻrisidagi yoʻriqnomaga oʻzgartirish va qoʻshimchalar kiritish haqida (2771-7-son)

- URL: https://neolex.uz/uz/laws/law-8591897
- lex.uz dagi asl nusxa: https://lex.uz/docs/8589329
- Sana: 13.11.2026
- Amalda
- Language: uz

> Matn manbasi: O'zbekiston Respublikasi qonunchilik ma'lumotlari milliy bazasi (lex.uz). Qonunchilik ma'lumotlari milliy bazasidan (lex.uz) hujjatning rasmiy matni, so'zma-so'z, avtomatik yangilanadi. Yuridik kuchga lex.uz dagi nashr ega: sud, shartnoma va rasmiy javoblar uchun u yerdagi amaldagi tahrirni tekshiring.

---

Oʻzbekiston Respublikasi Iqtisodiyot va moliya vazirligi Oʻzbekiston Respublikasi Soliq qoʻmitasining

Qarori

[Oʻzbekiston Respublikasi Adliya vazirligi tomonidan 2026-yil 13-noyabrda roʻyxatdan oʻtkazildi, roʻyxat raqami 2771-7]

Oʻzbekiston Respublikasining Soliq kodeksiga muvofiq Oʻzbekiston Respublikasi Iqtisodiyot va moliya vazirligi hamda Soliq qoʻmitasi qaror qiladi:

1. Oʻzbekiston Respublikasi Moliya vazirligi, Davlat soliq qoʻmitasi va Davlat bojxona qoʻmitasining 2016-yil 24-martdagi 20, 2016-14, 01-02/8-10-son qarori (roʻyxat raqami 2771, 2016-yil 30-mart) (Oʻzbekiston Respublikasi qonun hujjatlari toʻplami, 2016-y., 13-son, 124-modda) bilan tasdiqlangan Budjet tizimi budjetlari daromadlarining kassa ijrosi toʻgʻrisidagi yoʻriqnomaga ilovaga muvofiq oʻzgartirish va qoʻshimchalar kiritilsin.

2. Ushbu qaror Oʻzbekiston Respublikasi Markaziy banki bilan kelishilgan.

3. Mazkur qaror rasmiy eʼlon qilingan kundan eʼtiboran kuchga kiradi.

Iqtisodiyot va moliya vaziri J. KUCHKAROV

Toshkent sh.,

2026-yil 27-oktabr,

405-son

Soliq qoʻmitasi raisi F. PULATOV

Toshkent sh.,

2026-yil 22-oktabr,

2026-27-son

Kelishildi:

Markaziy bank raisi T. ISHMETOV

2026-yil 22-oktabr

Oʻzbekiston Respublikasi Iqtisodiyot va moliya vazirligining 2026-yil 27-oktabrdagi 405-son hamda Soliq qoʻmitasining 2026-yil 22-oktabrdagi 2026-27-son qaroriga ILOVA

Budjet tizimi budjetlari daromadlarining kassa ijrosi toʻgʻrisidagi yoʻriqnomaga kiritilayotgan oʻzgartirish va qoʻshimchalar

1. 331-band oʻz kuchini yoʻqotgan deb topilsin.

2. 332-bandning ikkinchi xatboshisi quyidagi tahrirda bayon etilsin:

“Ortiqcha toʻlangan (ortiqcha undirilgan) yoki xatolik bilan toʻlangan soliq (penya, jarima) summalarini soliqlarning toʻlov muddatlarini inobatga olgan holda hisobga olish summasi bazaviy hisoblash miqdorining 500 barobaridan oshmagan hollarda elektron topshiriqnomalar davlat soliq xizmati organlarining axborot tizimi orqali avtomatik shakllantirilishi va elektron raqamli imzo bilan tasdiqlanmasdan “OʻRIMV” ATga elektron tarzda yuborilishi mumkin. Ushbu topshiriqnomalar “OʻRIMV” ATda inson omilisiz avtomatik ravishda maʼqullanadi va ijroga qabul qilinadi.”.

3. 35-band quyidagi mazmundagi xatboshi bilan toʻldirilsin:

“Bunda davlat soliq xizmati organlari tomonidan yuborilgan topshiriqnomalar mazkur Yoʻriqnomaning 37-bandiga muvofiq bajariladi.”.

4. 37-bandda:

birinchi xatboshi quyidagi tahrirda bayon etilsin:

“37. Agar joriy tushumlar yetarli boʻlmagan yoki mavjud boʻlmagan hollarda ortiqcha toʻlangan yoki undirilgan mablagʻlarni 3 ish kuni mobaynida qaytarish imkoni boʻlmasa, ushbu mablagʻlar tegishli budjetning shaxsiy gʻazna hisobvaragʻidan qaytariladi.”;

quyidagi mazmundagi uchinchi xatboshi bilan toʻldirilsin:

“Agar joriy tushumlar yetarli boʻlmagan yoki mavjud boʻlmagan hollarda ortiqcha toʻlangan yoki undirilgan mablagʻlarni 1 ish kuni mobaynida hisobga olish imkoni boʻlmasa, ushbu mablagʻlarni hisobga olish tegishli budjetning shaxsiy gʻazna hisobvaragʻidan amalga oshiriladi.”;

uchinchi xatboshi toʻrtinchi xatboshi deb hisoblansin.

5. 376-bandning birinchi xatboshisidagi “5 ish kuni” degan soʻzlar “3 ish kuni” degan soʻzlar bilan almashtirilsin.
