Aholi punktlarining bosh rejasi va boshqa shaharsozlik hujjatlari amalga oshirilishi hamda ularga rioya etilishi ustidan monitoring oʻtkazish tartibi toʻgʻrisidagi nizomni tasdiqlash haqida (3970-son)
05.11.2026
Hujjat hali kuchga kirgan emas
OʻZBEKISTON RESPUBLIKASI URBANIZATSIYA VA UY-JOY BOZORINI BARQAROR RIVOJLANTIRISH MILLIY QOʻMITASINING
QARORI
[Oʻzbekiston Respublikasi Adliya vazirligi tomonidan 2026-yil 5-noyabrda roʻyxatdan oʻtkazildi, roʻyxat raqami 3970]
Oʻzbekiston Respublikasi Prezidentining 2026-yil 24-fevraldagi PQ-73-son “Koʻp kvartirali turar joy majmualarini qurishda kompleks qurilish mexanizmlarini joriy etish va shaffoflikni taʼminlash chora-tadbirlari toʻgʻrisida”gi qaroriga muvofiq Oʻzbekiston Respublikasi Urbanizatsiya va uy-joy bozorini barqaror rivojlantirish milliy qoʻmitasi qaror qiladi:
1. Aholi punktlarining bosh rejasi va boshqa shaharsozlik hujjatlari amalga oshirilishi hamda ularga rioya etilishi ustidan monitoring oʻtkazish tartibi toʻgʻrisidagi nizom ilovaga muvofiq tasdiqlansin.
2. Mazkur qaror Oʻzbekiston Respublikasi Qurilish va uy-joy kommunal xoʻjaligi vazirligi, Transport vazirligi, Oliy taʼlim, fan va innovatsiyalar vazirligi, Sogʻliqni saqlash vazirligi, Energetika vazirligi, Ekologiya va iqlim oʻzgarishi milliy qoʻmitasi, Urbanizatsiya va uy-joy bozorini barqaror rivojlantirish milliy qoʻmitasi huzuridagi Kadastr agentligi, Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspeksiyasi hamda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishilgan.
3. Mazkur qaror 2027-yil 1-yanvardan eʼtiboran kuchga kiradi.
Rais Sh. KUDBIYEV
Toshkent sh.,
2026-yil 12-oktabr,
2-son
Kelishildi:
Energetika vaziri Sh. XODJAYEV
2026-yil 9-oktabr
Qurilish va uy-joy kommunal xoʻjaligi vaziri Sh. XIDOYATOV
2026-yil 22-sentabr
Ekologiya va iqlim oʻzgarishi milliy qoʻmitasi raisining birinchi oʻrinbosari O. QUDRATOV
2026-yil 3-sentabr
Qurilish va uy-joy kommunal xoʻjaligi sohasida nazorat qilish inspeksiyasi rahbari S. ESHQUVVATOV
2026-yil 11-avgust
Transport vaziri I. MAXKAMOV
2026-yil 7-avgust
Oliy taʼlim, fan va innovatsiyalar vaziri K. SHARIPOV
2026-yil 7-avgust
Andijon viloyati hokimi Sh. ABDURAXMANOV
2026-yil 28-iyul
Buxoro viloyati hokimi B. ZARIPOV
2026-yil 23-iyul
Sogʻliqni saqlash vaziri E. ADILOV
2026-yil 21-iyul
Toshkent viloyati hokimi Z. MIRZAYEV
2026-yil 12-iyul
Toshkent shahar hokimi Sh. UMURZAKOV
2026-yil 10-iyul
Kadastr agentligi direktori S. TURDIYEV
2026-yil 8-iyul
Jizzax viloyati hokimi U. MUSTAFOYEV
2026-yil 7-iyul
Navoiy viloyati hokimi N. TURSUNOV
2026-yil 6-iyul
Surxondaryo viloyati hokimi U. QOSIMOV
2026-yil 6-iyul
Sirdaryo viloyati hokimi E. TURDIMOV
2026-yil 6-iyul
Namangan viloyati hokimi Sh. ABDURAZAKOV
2026-yil 6-iyul
Qoraqalpogʻiston Respublikasi Vazirlar Kengashi Raisining birinchi oʻrinbosari A. SHAMURATOV
2026-yil 4-iyul
Fargʻona viloyati hokimi X. BOZAROV
2026-yil 3-iyul
Samarqand viloyati hokimi A. BOBOYEV
2026-yil 2-iyul
Xorazm viloyati hokimi J. RAXIMOV
2026-yil 1-iyul
Qashqadaryo viloyati hokimi M. AZIMOV
2026-yil 29-iyun
Oʻzbekiston Respublikasi Urbanizatsiya va uy-joy bozorini barqaror rivojlantirish milliy qoʻmitasining 2026-yil 12-oktabrdagi 2-son qaroriga ILOVA
Aholi punktlarining bosh rejasi va boshqa shaharsozlik hujjatlari amalga oshirilishi hamda ularga rioya etilishi ustidan monitoring oʻtkazish tartibi toʻgʻrisidagi
NIZOM
Mazkur Nizom aholi punktlarining bosh rejasi va boshqa shaharsozlik hujjatlarining amalga oshirilishi hamda ularga rioya etilishi ustidan monitoring (bundan buyon matnda monitoring deb yuritiladi) oʻtkazish tartibini belgilaydi.
1-bob. Umumiy qoidalar
1. Mazkur Nizomda quyidagi asosiy tushunchalar qoʻllaniladi:
aglomeratsiya — bir nechta aholi punktlarining hududiy yaqinlik, shu bilan birga, ijtimoiy-iqtisodiy, sanoat, transport, mehnat, madaniy, maishiy hamda rekreatsion va boshqa aloqalariga koʻra bir joyda jamlanishi va birgalikda rivojlanishi;
aholi punkti — huquqiy maqom, nom va chegara bilan belgilangan Oʻzbekiston Respublikasi maʼmuriy-hududiy birligi (shahar, shaharcha, qishloq, ovul);
aholi punktining bosh rejasi (bundan buyon matnda bosh reja deb yuritiladi) — aholi punktini hududiy rivojlantirishning asosiy yoʻnalishlarini hamda fuqarolarning qulay hayot faoliyati muhitini kompleks shakllantirish shart-sharoitlarini belgilaydigan shaharsozlik hujjati;
master-reja — hududlardagi aniq muammolarni bartaraf etishga yoʻnaltirilgan, oʻzida shaharsozlik, ijtimoiy-iqtisodiy, ekologik va boshqa loyiha yechimlarini mujassamlashtirgan, shuningdek hududlarning qismlarini iqtisodiy rivojlantirishni yaqin, oʻrta va uzoq muddatlarga rejalashtirish hamda ularning iqtisodiy salohiyatini roʻyobga chiqarish maqsadida mavjud muammolarning aniq yechimlarini va mazkur yechimlarni amalga oshirish mexanizmlarini oʻzida aks ettirgan shaharsozlik hujjati;
monitoring — bosh reja va boshqa shaharsozlik hujjatlarida belgilangan yechimlar hamda koʻrsatkichlarning amalga oshirilishini, shuningdek davlat organlari va tashkilotlarining shaharsozlik hujjatlari ijrosi yuzasidan qabul qilingan qarorlari va harakatlarining mazkur hujjatlar hamda shaharsozlik toʻgʻrisidagi qonunchilik talablariga muvofiqligini oʻrganish va aniqlangan chetga chiqishlar (nomuvofiqliklar)ni qayd etish hamda ular boʻyicha qonunchilikda belgilangan tartibda vakolatli organlarga takliflar yoki materiallar kiritishga qaratilgan tashkiliy va tahliliy tadbirlar majmui;
shaharsozlik hujjatlari — hududlarni va aholi punktlarini rivojlantirishni shaharsozlik jihatidan rejalashtirish toʻgʻrisidagi hamda ularni qurish haqidagi tasdiqlangan hujjatlar.
2. Monitoringning asosiy maqsadlari quyidagilardan iborat:
bosh reja va boshqa shaharsozlik hujjatlarida belgilangan yechimlar, koʻrsatkichlar va tadbirlarning amalga oshirilish holatini oʻrganish;
yer uchastkalaridan foydalanish holatining shaharsozlik hujjatlarida belgilangan yechimlarga muvofiqligini oʻrganish;
bosh reja va boshqa shaharsozlik hujjatlarida belgilangan yechimlardan chetga chiqish hamda oʻzboshimchalik bilan qurish alomatlarini aniqlash;
bosh reja va boshqa shaharsozlik hujjatlarini amalga oshirishdagi muammo va kamchiliklarni aniqlash hamda ularni bartaraf etish yuzasidan vakolatli organlarga takliflar kiritish.
2-bob. Monitoringning obyektlari va shakllari
3. Monitoring obyektlari quyidagilardan iborat:
aholi punktlarining bosh rejalari;
batafsil rejalashtirish loyihasi;
qurish loyihasi;
aholi punktlarining hududlarini shaharsozlik jihatidan rivojlantirish tarhlari va Oʻzbekiston Respublikasi hududini rivojlantirishning tarmoq tarhlari;
master-rejalar;
shaharsozlik hujjatlarini roʻyobga chiqarish boʻyicha kompleks dasturlar;
davlat organlari va tashkilotlarining, mahalliy ijro etuvchi hokimiyat organlarining bosh reja va boshqa shaharsozlik hujjatlarining amalga oshirilishiga taʼsir etuvchi qarorlari, hujjatlari, harakatlari yoki harakatsizligi;
hududning amaldagi rivojlanishi, obyektlarning joylashuvi, transport, muhandislik, ijtimoiy, ekologik va boshqa infratuzilmalarning holati.
4. Monitoring doirasida quyidagilar oʻrganiladi:
funksional zonalashtirish, qurilish parametrlari, aholi zichligi, qurilish zichligi, qavatlar soni va hududni bosqichma-bosqich oʻzlashtirish boʻyicha shaharsozlik hujjatlarida belgilangan yechimlarning amalga oshirilish holati;
transport qulayligi, muhandislik va ijtimoiy infratuzilma bilan taʼminlanganlik, koʻkalamzorlashtirish, sanitariya va muhofaza talablari hamda boshqa shaharsozlik cheklovlariga rioya etilishi;
shaharsozlik hujjatlari tasdiqlanganidan keyin ularni amalga oshirish uchun qabul qilingan qarorlar, shaharsozlik hujjatlarini roʻyobga chiqarish boʻyicha kompleks dasturlar va boshqa hujjatlarning ishlab chiqilishi, tasdiqlanishi va ijrosi;
yer toifalarini oʻzgartirish, yer uchastkalarini ajratish yoki elektron onlayn-auksionga chiqarish toʻgʻrisidagi qarorlarning shaharsozlik hujjatlarida belgilangan yechimlarga muvofiqligi.
5. Aglomeratsiya hududlari monitoring qilinganda hududlararo transport va muhandislik aloqalari, ijtimoiy va transport yuklamasining taqsimlanishi, shuningdek shahar va unga tutash hududlar rivojlanishining oʻzaro uygʻunligi qoʻshimcha ravishda oʻrganiladi.
6. Monitoring rejali va rejadan tashqari shakllarda oʻtkaziladi. Rejali monitoring yillik va choraklik rejalar asosida amalga oshiriladi.
Rejadan tashqari monitoring Oʻzbekiston Respublikasi Prezidentining yoki Oʻzbekiston Respublikasi Prezidenti Administratsiyasining topshiriqlari, shuningdek davlat organlari va tashkilotlari, jismoniy va yuridik shaxslarning murojaatlari asosida oʻtkazilishi mumkin.
3-bob. Monitoringni tashkil etish va oʻtkazish
7. Monitoring Oʻzbekiston Respublikasi Urbanizatsiya va uy-joy bozorini barqaror rivojlantirish milliy qoʻmitasi (bundan buyon matnda Milliy qoʻmita deb yuritiladi) hamda Oʻzbekiston Respublikasi Qurilish va uy-joy kommunal xoʻjaligi vazirligi (bundan buyon matnda Vazirlik deb yuritiladi) tomonidan oʻz vakolatlari doirasida birgalikda oʻtkaziladi.
8. Monitoring ushbu Nizomning 1-ilovasida nazarda tutilgan sxemaga muvofiq amalga oshiriladi.
9. Milliy qoʻmita va Vazirlik monitoringni oʻtkazish boʻyicha qoʻshma topshiriqni shakllantiradi, monitoring obyekti va hududini belgilaydi, mavjud maʼlumotlarni yigʻish va tahlil qilishni tashkil etadi hamda bosh reja va boshqa shaharsozlik hujjatlarida belgilangan yechimlarning amalga oshirilishini oʻrganadi.
10. Monitoringni oʻtkazish boʻyicha qoʻshma topshiriqda quyidagilar koʻrsatiladi:
monitoring oʻtkazish asosi, obyekti va hududi;
oʻrganiladigan shaharsozlik hujjatlari va koʻrsatkichlar roʻyxati;
ishchi guruh tarkibi va monitoringni oʻtkazish muddati;
tegishli davlat organlari va tashkilotlari, shu jumladan Ekologiya va iqlim oʻzgarishi milliy qoʻmitasining Davlat ekologik nazorat inspeksiyasi (Ekopolitsiya) ishtirokining zarurati;
joyiga chiqqan holda oʻrganish zarurati va uni oʻtkazish muddati.
11. Monitoringni oʻtkazishda quyidagi maʼlumot manbalaridan foydalaniladi:
tasdiqlangan bosh reja va boshqa shaharsozlik hujjatlari;
davlat organlari va tashkilotlari, mahalliy ijro etuvchi hokimiyat organlarining monitoring obyektiga daxldor qarorlari va boshqa hujjatlari;
loyiha va loyihaoldi hujjatlari, kadastr, kartografiya va yer tuzish materiallari;
obyektlarni qurish va ularni foydalanishga topshirish toʻgʻrisidagi mavjud maʼlumotlar;
shaharsozlik hujjatlarini amalga oshirishga oid dasturlar va boshqa hujjatlar;
transport va muhandislik tarmoqlari, ijtimoiy infratuzilma, obodonlashtirish va koʻkalamzorlashtirish dasturlari hamda ularning ijrosi toʻgʻrisidagi maʼlumotlar;
boshqa maʼlumot manbalari.
12. Monitoring ushbu Nizomning 2-ilovasida belgilangan davriy maʼlumotlar, shuningdek ushbu Nizomning 11-bandida keltirilgan maʼlumot manbalari asosida oʻtkaziladi.
13. Monitoring oʻtkazish uchun zarur qoʻshimcha maʼlumotlar Milliy qoʻmita va Vazirlikning soʻroviga koʻra davlat organlari va tashkilotlari tomonidan soʻrov kelib tushgan kundan eʼtiboran oʻn ish kuni ichida idoralararo elektron hujjat aylanishi tizimi orqali taqdim etiladi.
Soʻrovda taqdim etilishi lozim boʻlgan maʼlumotlar roʻyxati, qamrab olinadigan davr va hudud, shuningdek maʼlumotlarning shakli koʻrsatiladi.
14. Taqdim etilgan maʼlumotlar toʻliq boʻlmaganda yoki texnik nosozliklar tufayli ulardan foydalanish imkoni boʻlmagan taqdirda, Milliy qoʻmita va Vazirlik maʼlumot taqdim etgan davlat organi yoki tashkilotidan maʼlumotlarni aniqlashtirishni yoxud toʻldirishni soʻrashi mumkin. Bunda maʼlumotlarni taqdim etish muddati soʻrovda koʻrsatiladi.
15. Davlat organlari va tashkilotlari taqdim etadigan maʼlumotlarning toʻliqligi, ishonchliligi va oʻz vaqtida taqdim etilishi uchun qonunchilikda belgilangan tartibda javob beradi.
Monitoring uchun olingan maʼlumotlardan faqat ushbu Nizomda belgilangan maqsadlarda foydalaniladi.
Shaxsga doir maʼlumotlar, davlat sirlari va qonun bilan qoʻriqlanadigan boshqa sirlarni muhofaza qilish talablariga rioya etiladi.
16. Monitoring soʻrovda talab qilingan maʼlumotlar toʻliq olingan kundan eʼtiboran yigirma ish kuni ichida oʻtkaziladi.
Joyiga chiqqan holda oʻrganish yoki idoralararo tahlil zarur boʻlgan hollarda monitoring muddati Milliy qoʻmita va Vazirlik tomonidan koʻpi bilan oʻn ish kuniga qadar uzaytirilishi mumkin. Muddat uzaytirilgani haqida monitoring ishtirokchilariga xabar beriladi.
17. Monitoring quyidagi usullar orqali oʻtkaziladi:
hujjatlarni tahlil qilish, raqamli va geoaxborot maʼlumotlarini oʻzaro taqqoslash, kartografik materiallarni oʻrganish, vakolatli organlardan axborot va xulosalar olish, zarur hollarda hududning amaldagi holatini joyiga chiqqan holda oʻrganish hamda natijalarni umumlashtirish;
bosh reja va boshqa shaharsozlik hujjatlarida belgilangan yechimlar, koʻrsatkichlar va tadbirlarni qabul qilingan qarorlar, obyektlarning joylashuvi, hududdan foydalanish va infratuzilmaning holati toʻgʻrisidagi maʼlumotlar bilan solishtirish;
bosh rejalar va boshqa shaharsozlik hujjatlarini roʻyobga chiqarish boʻyicha kompleks dasturlar va boshqa hujjatlarda nazarda tutilgan yoʻl-transport infratuzilmasi, muhandislik-kommunikatsiya tarmoqlari, ijtimoiy infratuzilma obyektlari, obodonlashtirish va koʻkalamzorlashtirish, ularni sugʻorish tizimlari, ekologik muhofaza choralari, moddiy madaniy meros obyektlarini saqlash va fuqaro muhofazasi tadbirlari hamda birinchi navbatda oʻzlashtirilishi lozim boʻlgan hududlar boʻyicha topshiriqlar ijrosini tahlil qilish.
18. Zarur hollarda monitoringga mahalliy ijro etuvchi hokimiyat organlari, loyiha, ilmiy va ekspert tashkilotlari, transport tashkilotlari, jamoatchilik nazorati subyektlari hamda boshqa manfaatdor davlat organlari va tashkilotlari jalb etilishi mumkin.
Monitoring natijalari boʻyicha Milliy qoʻmita va Vazirlik tomonidan jamoatchilik muhokamasi tashkil etilishi mumkin.
Joyiga chiqqan holda oʻrganish monitoring topshirigʻida uni oʻtkazish zarurati va muddati koʻrsatilgan taqdirda, hudud, qurilish obyekti, transport yoki muhandislik infratuzilmasi, yashil zonalarning amaldagi holati va hududdan foydalanish shartlarini aniqlashtirish maqsadida oʻtkaziladi.
Monitoring oʻtkazish, jumladan joyiga chiqqan holda oʻrganish tadbirkorlik subyektlari faoliyatini tekshirish hisoblanmaydi hamda monitoring oʻtkazishni asos qilib ularni faoliyatiga aralashish taʼqiqlanadi.
4-bob. Monitoring natijalarini rasmiylashtirish va ular boʻyicha choralar
19. Monitoring natijalari boʻyicha monitoring xulosasi tuziladi va monitoringni oʻtkazgan Milliy qoʻmita hamda Vazirlikning vakolatli mansabdor shaxslari tomonidan imzolanadi.
Monitoring xulosasida quyidagilar aks ettiriladi:
monitoring oʻtkazilgan sana va uni oʻtkazish asosi;
monitoring obyekti, hududi va shakli;
oʻrganilgan hujjatlar va boshqa maʼlumotlar manbalari;
monitoring davomida aniqlangan holatlar, ularning bosh reja va boshqa shaharsozlik hujjatlari talablariga muvofiqligi yoki nomuvofiqligi;
aniqlangan shaharsozlik toʻgʻrisidagi qonunchilik buzilishi alomatlari (mavjud boʻlganda);
monitoring natijalari boʻyicha taklif etilayotgan chora-tadbirlar, ularni koʻrib chiqishi lozim boʻlgan vakolatli organlar va boshqa zarur maʼlumotlar.
Monitoring xulosasi imzolangan kundan eʼtiboran besh ish kuni ichida Milliy qoʻmita hamda Vazirlik oʻz vakolatlari doirasida, mustaqil ravishda yoki zaruratga koʻra birgalikda quyidagi choralardan birini yoki bir nechtasini koʻradi:
bosh reja va boshqa shaharsozlik hujjatlariga nomuvofiq qarorlar, hujjatlar yoki harakatlar aniqlanganda, tegishli organlarga ularni qayta koʻrib chiqish yuzasidan takliflar kiritish;
oʻzboshimchalik bilan qurish yoki shaharsozlik toʻgʻrisidagi qonunchilik buzilishi alomatlari aniqlanganda, monitoring materiallarini qonunchilikda belgilangan choralarni koʻrish uchun vakolatli nazorat organlariga va boshqa tegishli organlarga yuborish;
bosh reja bilan bogʻliq investitsiya dasturlarini ishlab chiquvchi yoki tasdiqlovchi vakolatli organlarga ularni qayta koʻrib chiqish yuzasidan takliflar kiritish;
normativ-huquqiy va normativ-texnik hujjatlarni takomillashtirish boʻyicha takliflar tayyorlash va vakolatli organlarga kiritish.
20. Vakolatli davlat organlari va tashkilotlari mazkur Nizomning 19-bandiga muvofiq yuborilgan takliflar va monitoring materiallarini oʻz vakolatlari doirasida koʻrib chiqadi hamda agar qonunchilikda boshqacha muddat belgilanmagan boʻlsa, ular kelib tushgan kundan eʼtiboran oʻn besh ish kuni ichida koʻrib chiqish natijalari toʻgʻrisida Milliy qoʻmita va Vazirlikka yozma yoki elektron shaklda axborot taqdim etadi.
Axborotda taklifning qabul qilingani, qisman qabul qilingani yoki rad etilgani, qabul qilingan qaror, koʻriladigan choralar, ularni bajarish muddatlari va masʼul ijrochilar koʻrsatiladi.
5-bob. Yakuniy qoida
21. Mazkur Nizomning buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladilar.
Aholi punktlarining bosh rejasi va boshqa shaharsozlik hujjatlari amalga oshirilishi hamda ularga rioya etilishi ustidan monitoring oʻtkazish tartibi toʻgʻrisidagi nizomga 1-ILOVA
Aholi punktlarining bosh rejasi va boshqa shaharsozlik hujjatlari amalga oshirilishi hamda ularga rioya etilishi ustidan monitoring oʻtkazish tartibi
SXEMASI
Bosqichlar Subyektlar Chora-tadbirlar Bajarish muddati 1-bosqich Urbanizatsiya va uy-joy bozorini barqaror rivojlantirish milliy qoʻmitasi (bundan buyon matnda Milliy qoʻmita deb yuritiladi) hamda Qurilish va uy-joy kommunal xoʻjaligi vazirligi (bundan buyon matnda Vazirlik deb yuritiladi) Rejali yoki rejadan tashqari monitoringni oʻtkazish boʻyicha topshiriqni shakllantirish Tasdiqlangan rejaga muvofiq yoki tegishli topshiriq, murojaat kelib tushganda 2-bosqich Davlat organlari va tashkilotlari Milliy qoʻmita va Vazirlikning asoslantirilgan soʻroviga koʻra tegishli maʼlumotlarni taqdim etish Soʻrov kelib tushgan kundan eʼtiboran 10 ish kuni ichida 3-bosqich Milliy qoʻmita hamda Vazirlik Shaharsozlik hujjatlari ijrosini monitoring qilish va xulosa rasmiylashtirish Toʻliq maʼlumotlar olingan kundan eʼtiboran 20 ish kuni ichida 4-bosqich Milliy qoʻmita hamda Vazirlik 1. Monitoring xulosasi boʻyicha tegishli vakolatli organlarga takliflar yoki materiallar kiritish Monitoring xulosasi imzolangan kundan eʼtiboran 5 ish kuni ichida Davlat organlari va tashkilotlari 2. Yuborilgan takliflar va monitoring materiallarini koʻrib chiqish hamda natijasi toʻgʻrisida Milliy qoʻmita va Vazirlikka axborot taqdim etish Takliflar yoki monitoring materiallari kelib tushgan kundan eʼtiboran, qonunchilikda boshqa muddat belgilanmagan boʻlsa, oʻn besh ish kuni ichida
Aholi punktlarining bosh rejasi va boshqa shaharsozlik hujjatlari amalga oshirilishi hamda ularga rioya etilishi ustidan monitoring oʻtkazish tartibi toʻgʻrisidagi nizomga 2-ILOVA
Aholi punktlarining bosh rejasi va boshqa shaharsozlik hujjatlari amalga oshirilishi hamda ularga rioya etilishi ustidan monitoring oʻtkazish doirasida davlat organlari va tashkilotlari tomonidan Oʻzbekiston Respublikasi Urbanizatsiya va uy-joy bozorini barqaror rivojlantirish milliy qoʻmitasi hamda Qurilish va uy-joy kommunal xoʻjaligi vazirligiga taqdim etiladigan maʼlumotlar
ROʻYXATI
T/r Maʼlumot taqdim etuvchi davlat organlari va tashkilotlari Maʼlumotlar nomi Taqdim etish muddati 1. Transport vazirligi Transport va yoʻl-transport infratuzilmasi obyektlari, shaharlararo hamda viloyatlararo transport yoʻnalishlari hamda shahar va shahar aglomeratsiyasi yoʻnalishlari maʼlumotlari Har chorakdan keyingi oyning 10 ish kuniga qadar 2. Sogʻliqni saqlash vazirligi Sogʻliqni saqlash obyektlarining rejali joylashuvi, sanitariya cheklovlari va tibbiy infratuzilmaning rejalashtirilayotgan rivojlanishi toʻgʻrisidagi maʼlumotlar Har chorakdan keyingi oyning 10 ish kuniga qadar 3. Taʼlim va ilm-fan vazirligi Oliy, kasbiy, ilmiy va innovatsion ahamiyatga molik obyektlarning rejali joylashuvi hamda tegishli infratuzilmaning rejalashtirilayotgan rivojlanishi toʻgʻrisidagi maʼlumotlar Har chorakdan keyingi oyning 10 ish kuniga qadar 4. Ekologiya va iqlim oʻzgarishi milliy qoʻmitasi Ekologik cheklovlar, muhofaza etiladigan tabiiy hududlar, yashil hududlar, sanitariya-muhofaza zonalari, foydalanishning alohida shartlariga ega hududlar hamda monitoringda hisobga olinishi lozim boʻlgan ekologik talablar toʻgʻrisidagi maʼlumotlar Har chorakdan keyingi oyning 10 ish kuniga qadar 5. Urbanizatsiya va uy-joy bozorini barqaror rivojlantirish milliy qoʻmitasi huzuridagi Kadastr agentligi Davlat yer kadastriga tegishli yer uchastkalarining chegaralari toʻgʻrisidagi geoaxborot maʼlumotlar Har chorakdan keyingi oyning 10 ish kuniga qadar 6. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari 1. Aholi punktlarining bosh rejasi va boshqa shaharsozlik hujjatlarini amalga oshirish boʻyicha kompleks chora-tadbirlar ijrosi yuzasidan axborot Har chorakdan keyingi oyning 10 ish kuniga qadar 2. Shaharsozlik sohasidagi qonunchilik hujjatlariga muvofiq hududiy rejalashtirish hujjatlari, aholi punktlarining bosh rejalari va boshqa shaharsozlik hujjatlarining amalga oshirilishi, qurilish va rekonstruksiya ishlarining borishi, hududlarni kompleks rivojlantirish, aholi punktlari infratuzilmasini rivojlantirish, aglomeratsiyalarni hamda tutash hududlarni oʻzaro muvofiqlashtirilgan holda rivojlantirish boʻyicha monitoring oʻtkazish uchun zarur boʻlgan maʼlumotlar Har yarim yillikdan keyingi oyning 10 ish kuniga qadar
