Oʻzbekiston Respublikasi temir yoʻl transportida yuk tashish qoidalariga oʻzgartirishlar kiritish toʻgʻrisida (3457-2-son)

28.10.2026

Oʻzbekiston Respublikasi Transport vazirining

buyrugʻi

[Oʻzbekiston Respublikasi Adliya vazirligi tomonidan 2026-yil 28-oktabrda roʻyxatdan oʻtkazildi, roʻyxat raqami 3457-2]

Oʻzbekiston Respublikasi Vazirlar Mahkamasining 2026-yil 5-avgustdagi 433-son “Temir yoʻl orqali ichki qatnovlarda yuk tashish buyurtmanomalarini rasmiylashtirish boʻyicha davlat xizmatini koʻrsatishning maʼmuriy reglamentini tasdiqlash toʻgʻrisida”gi qaroriga muvofiq buyuraman:

1. Oʻzbekiston Respublikasi transport vazirining 2023-yil 5-avgustdagi 22-son buyrugʻi (roʻyxat raqami 3457, 2023-yil 21-sentabr) (Qonunchilik maʼlumotlari milliy bazasi, 23.09.2023-y., 10/23/3457/0724-son) bilan tasdiqlangan Oʻzbekiston Respublikasi temir yoʻl transportida yuk tashish qoidalariga ilovaga muvofiq oʻzgartirishlar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

Vazir I. MAXKAMOV

Toshkent sh.,

2026-yil 28 sentabr,

11-son

Oʻzbekiston Respublikasi transport vazirining 2026-yil 28-sentabrdagi 11-son buyrugʻiga ILOVA

Oʻzbekiston Respublikasi temir yoʻl transportida yuk tashish qoidalariga kiritilayotgan oʻzgartirishlar

1. 6-band va 242-bandning birinchi xatboshisidagi “buyurtmalari” degan soʻz “buyurtmanomalari” degan soʻz bilan almashtirilsin.

2. 2-bobning nomidagi “buyurtmalarni qabul qilish” degan soʻzlar “buyurtmanomalarni rasmiylashtirish” degan soʻzlar bilan almashtirilsin.

3. 7-bandning ikkinchi xatboshisi quyidagi tahrirda bayon etilsin:

“Temir yoʻl orqali ichki qatnovlarda yuk tashish boʻyicha buyurtmanomalar yuk joʻnatuvchilar tomonidan mazkur Qoidalarning 3 va 4-ilovalariga muvofiq yuk tashishga buyurtmanoma hamda dekadalik buyurtmanoma shaklida rasmiylashtiriladi. Bunda yuk joʻnatuvchilar buyurtmanomalarni rasmiylashtirish uchun Davlat xizmatlari markazlariga oʻzi kelib yoki Yagona interaktiv davlat xizmatlari portali (bundan buyon matnda YIDXP deb yuritiladi) orqali elektron shaklda murojaat qiladi.”.

4. 8-bandda:

birinchi xatboshi quyidagi tahrirda bayon etilsin:

“8. Yuk joʻnatuvchilar temir yoʻl orqali ichki qatnovlarda yuk tashish amalga oshirilishi moʻljallanayotgan oy (bundan buyon matnda prognoz oyi deb yuritiladi) boshlanishidan kamida 14 kun oldin buyurtmanomalarni rasmiylashtiradi.”;

ikkinchi xatboshidagi “Buyurtmalar” degan soʻz “Buyurtmanomalar” degan soʻz bilan almashtirilsin;

uchinchi xatboshidagi “Buyurtmaning” degan soʻz “Buyurtmanomaning” degan soʻz bilan almashtirilsin.

5. 9-band quyidagi tahrirda bayon etilsin:

“9. Davlat xizmatlari markaziga yuk joʻnatuvchi oʻzi kelib murojaat qilganda soʻrovnoma Davlat xizmatlari markazi xodimi tomonidan yuk joʻnatuvchi nomidan, YIDXP orqali elektron shaklda murojaat qilinganda esa yuk joʻnatuvchi tomonidan mustaqil ravishda toʻldiriladi.

Soʻrovnoma toʻldirilganidan soʻng yuk joʻnatuvchi maʼlumotlar toʻgʻriligini tekshiradi va uni elektron raqamli imzo, Mobil-ID yoki identifikatsiya qilish vositalari orqali tasdiqlaydi.

Yuk joʻnatuvchi YIDXP orqali murojaat qilganda soʻrovnomani elektron raqamli imzo bilan tasdiqlash talab etilmaydi.

Uchinchi shaxslar manfaati uchun harakat qilayotganda, soʻrovnomaga vakilning vakolatini tasdiqlovchi ishonchnoma ilova qilinadi.

Yuk joʻnatuvchi vagon operatori bilan tuzilgan amaldagi shartnoma nusxasini elektron shaklda ilova qiladi.”.

6. 10-band quyidagi tahrirda bayon etilsin:

“10. Temir yoʻl transporti (tashuvchi) soʻrovnoma kelib tushgan kundan boshlab yetti ish kuni ichida, kamchiliklarni bartaraf etish uchun berilgan muddatni hisobga olmagan holda, uni koʻrib chiqadi hamda buyurtmanomani QR-kod (matrik shtrixli kod) bilan rasmiylashtiradi va uni oʻz elektron raqamli imzosi bilan tasdiqlab, Davlat xizmatlari markaziga (oʻzi kelib murojaat etganda) yoki yuk joʻnatuvchiga YIDXP orqali (elektron tarzda murojaat etganda) yuboradi.”.

7. 11-band quyidagi tahrirda bayon etilsin:

“11. Temir yoʻl transporti (tashuvchi) yuk tashish uchun buyurtmanomalarni quyidagi hollarda rad etish huquqiga ega:

Temir yoʻl ustaviga muvofiq muayyan yoʻnalishlarda yuk ortishga taʼqiq joriy etilgan boʻlsa;

vagonning mansubligi notoʻgʻri koʻrsatilgan boʻlsa (xususiy yoki ijaraga olingan yoki temir yoʻl inventar vagoni);

vagon operatori (“Temiryoʻlkargo” AJ, “Oʻztemiryoʻlkonteyner” AJ, “Yoʻlreftrans” AJ va boshqalar) bilan shartnoma tuzilmagan boʻlsa;

yukni tashish qonunchilik hujjatlariga muvofiq taqiqlangan boʻlsa;

nostandart, katta oʻlchamli yoki ogʻir vaznli yuklarni joylashtirish va mahkamlash sxemasi vakolatli organ bilan kelishilmagan boʻlsa;

yuk tashish buyurtmanomasida koʻzda tutilgan yuk hajmi yoki boshqa koʻrsatkichlar temir yoʻl uchastkasining oʻtkazuvchanlik qobiliyati yoki temir yoʻl stansiyalarining yuklarga ishlov berish quvvatidan ortiq boʻlsa;

tashishni amalga oshirish uchun zarur boʻlgan harakatdagi temir yoʻl tarkibi yoki konteynerlar mavjud boʻlmasa;

temir yoʻl transporti xizmatlari uchun yuk joʻnatuvchining qarzdorligi mavjud boʻlsa;

texnik imkoniyatlar mavjud boʻlmasa (yuk qabul qiluvchi shoxobcha yoʻllarining bandligi).

Davlat xizmatini koʻrsatishni boshqa asoslarga, shu jumladan, maqsadga muvofiq emasligi sabablariga koʻra rad etishga yoʻl qoʻyilmaydi.

Yuk tashish uchun buyurtmanoma rad etilgan taqdirda, temir yoʻl transporti (tashuvchi) shu vaqtning oʻzida rad etish sabablarini koʻrsatgan holda buyurtmanomani rasmiylashtirishni rad etish toʻgʻrisidagi qarorni yuk joʻnatuvchiga elektron shaklda yuboradi.”.

8. 12-band quyidagi tahrirda bayon etilsin:

“12. Soʻrovnomada yoki unga ilova qilingan hujjatlarda kamchiliklar aniqlanganda, temir yoʻl transporti (tashuvchi) yuk joʻnatuvchiga ularni besh ish kuni ichida bartaraf etish zarurligi toʻgʻrisida xabar beradi. Kamchiliklar belgilangan muddatda bartaraf etilmaganda, davlat xizmatini koʻrsatish rad etiladi.”.

9. 13-banddagi “buyurtmalari” degan soʻz “buyurtmanomalari” degan soʻzlar bilan almashtirilsin.

10. 20-band quyidagi tahrirda bayon etilsin:

“20. Yuklarni prognozdan ortiq ortish (boʻsh xususiy (shaxsiy), ijaradagi vagonlar va konteynerlarni joʻnatish) uchun yuk joʻnatuvchi ortish kunidan kamida besh kun oldin mazkur Qoidalarning 7-bandiga asosan qoʻshimcha buyurtmanomani rasmiylashtiradi.”.

11. 21-band quyidagi tahrirda bayon etilsin:

“21. Rejadan ortiq yuk ortish imkoni boʻlmagan taqdirda, buyurtmanomani rasmiylashtirishni rad etish ushbu Qoidalarning 11-bandiga asosan amalga oshiriladi.”.

12. 30-bandning ikkinchi xatboshisi va 32-banddagi “buyurtmada” degan soʻz “buyurtmanomada” degan soʻz bilan almashtirilsin.

13. 44-bandning 1-kichik bandidagi “buyurtmasining” degan soʻz “buyurtmanomasining” degan soʻz bilan almashtirilsin.