Kiberxavfsizlik sohasida kadrlar malakasini oshirish va qayta tayyorlash tizimini joriy etish chora-tadbirlari toʻgʻrisida (594-son)

28.10.2026

Oʻzbekiston Respublikasi Vazirlar Mahkamasining

qarori

Oʻzbekiston Respublikasining “Kiberxavfsizlik toʻgʻrisida”gi Qonuniga muvofiq davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan yuridik shaxslarda kiberxavfsizlikka masʼul boʻlgan mutaxassislarning kibertahdidlarga qarshi bilim va koʻnikmalarini shakllantirish, malakasini oshirish va ularni qayta tayyorlash maqsadida Vazirlar Mahkamasi qaror qiladi:

1. Raqamli texnologiyalar vazirligining 2026-yil 1-noyabrdan boshlab “Cyber university” davlat universiteti tomonidan davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan yuridik shaxslarda (keyingi oʻrinlarda — tashkilotlar) kiberxavfsizlikka masʼul boʻlgan mutaxassislarning malakasini oshirish va kiberxavfsizlik sohasida kadrlarni qayta tayyorlash tizimini joriy etish toʻgʻrisidagi taklifiga rozilik berilsin.

2. Davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan yuridik shaxslarning kiberxavfsizlikka masʼul mutaxassislarining malakasini oshirish va kiberxavfsizlik sohasida kadrlarni qayta tayyorlash tartibi toʻgʻrisidagi nizom ilovaga muvofiq tasdiqlansin.

3. Belgilansinki:

tashkilotlarning kiberxavfsizlikka masʼul mutaxassislarining kiberxavfsizlik sohasidagi malakasi har ikki yilda kamida bir marotaba oshiriladi;

kiberxavfsizlik boʻyicha xorijiy sertifikatga ega mutaxassislar sertifikatning amal qilish muddati davomida malaka oshirishga jalb etilmaydi. Bunda respublikada tan olinadigan kiberxavfsizlik boʻyicha xorijiy sertifikatlar roʻyxati va ularning amal qilish muddati Raqamli texnologiyalar vazirligi tomonidan tasdiqlanadi;

tashkilotlar rahbarlarining raqamlashtirish va sunʼiy intellekt masalalari boʻyicha masʼul oʻrinbosarlari oʻz tashkilotining markaziy apparati, hududiy va quyi tizimlaridagi kiberxavfsizlikka masʼul barcha mutaxassislarning malakasini oshirish ishlarini tashkil etishga masʼul hisoblanadi;

kiberxavfsizlikka masʼul xodimlarning malakasini oshirish va kiberxavfsizlik sohasida kadrlarni qayta tayyorlash bilan bogʻliq xarajatlar ularni yuborgan tashkilot yoki yuqori turuvchi organning budjetdan tashqari mablagʻlari hamda qonunchilik hujjatlari bilan taqiqlanmagan boshqa manbalar hisobidan qoplanadi.

4. Raqamli texnologiyalar vazirligi manfaatdor vazirlik va idoralar bilan birgalikda 2026-yil 1-noyabrga qadar:

oʻzlari qabul qilgan normativ-huquqiy hujjatlarni ushbu qarorga muvofiqlashtirsin;

kiberxavfsizlik sohasida kadrlar malakasini oshirish va ularni qayta tayyorlashga qoʻyiladigan davlat taʼlim talablarini ishlab chiqsin hamda ularning belgilangan tartibda tasdiqlanishini taʼminlasin.

5. Ushbu qarorning bajarilishini nazorat qilish Oʻzbekiston Respublikasi raqamli texnologiyalar vaziri Sh.X. Shermatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 28-oktabr,

594-son

Vazirlar Mahkamasining 2026-yil 28-oktabrdagi 594-son qaroriga ILOVA

Davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan yuridik shaxslarning kiberxavfsizlikka masʼul mutaxassislari malakasini oshirish va kiberxavfsizlik sohasida kadrlarni qayta tayyorlash tartibi toʻgʻrisida

NIZOM

1-bob. Umumiy qoidalar

1. Ushbu Nizom “Cyber university” davlat universitetida (keyingi oʻrinlarda — Universitet) davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan yuridik shaxslarning kiberxavfsizlikka masʼul mutaxassislari malakasini oshirish va kiberxavfsizlik sohasida kadrlarni qayta tayyorlash tartibini belgilaydi.

2. Ushbu Nizomda quyidagi asosiy tushunchalardan foydalaniladi:

buyurtmachi — qayta tayyorlash va malaka oshirish kurslarida mutaxassislarning taʼlim olishini tashkil etish uchun murojaat qilgan yuridik shaxs;

malaka oshirish — sohada zamon talabiga javob beradigan bilim va koʻnikmalarni yoritishga qaratilgan tegishli oʻquv dasturlarining talablaridan kelib chiqqan holda, mutaxassislarning malaka va koʻnikmalarini muntazam ravishda yangilab borish orqali ularning kasbiy bilim va mahorati oshirilishini taʼminlashga qaratilgan oʻqitish shakli;

masofaviy taʼlim shaklida oʻqish — oʻquv dasturlarini ishlab chiqarishdan ajralmagan holda, onlayn (real vaqt rejimida) hamda oflayn (videomaʼruzalar, mavzuga doir maʼruzalar matni, amaliyot materiallari tahlili, kichik nazorat ishini bajarish orqali tegishli oʻquv-metodik resurslarni mustaqil ravishda oʻzlashtirish) tarzda oʻzlashtirish;

qayta tayyorlash — kiberxavfsizlik va raqamli texnologiyalar sohalarida xalqaro standartlar va talablarni hisobga olgan holda ishlab chiqilgan oʻquv dasturlari asosida zarur nazariy bilimlar, amaliy koʻnikma va malakalarni oʻzlashtirish orqali mutaxassislarni yangi kasbiy faoliyatga yoʻnaltirishga qaratilgan oʻqitish shakli;

tinglovchi — malaka oshirish yoki qayta tayyorlash kurslariga qabul qilingan jismoniy shaxs;

oʻquv dasturi — oʻquv kursining taʼlim mazmunini, uning tinglovchilar tomonidan oʻzlashtirilishining maqsadga muvofiq usullarini tashkil etishni nazarda tutadigan, axborot manbai boʻlgan, kiberxavfsizlik va raqamli texnologiyalar yoʻnalishlaridagi mutaxassisliklar boʻyicha malaka talablari, oʻquv kursining asosiy mazmuni va metodik tuzilishini aniqlab beruvchi asosiy meʼyoriy hujjat;

oʻquv rejasi — bloklar va oʻquv fanlari (kurslar)ning nomlarini, ularni oʻzlashtirish uchun ajratilgan soatlar hajmini hamda tinglovchilarning bilimlarini nazorat qilish shakllarini belgilab beruvchi asosiy hujjat.

3. Malaka oshirish va qayta tayyorlash kurslarining malaka talablari, oʻquv rejasi va dasturlari tegishli kasbiy standartlar hamda xorijiy tajriba asosida Universitet tomonidan ishlab chiqiladi va tasdiqlanadi. Taʼlim jarayoni tasdiqlangan oʻquv rejasi va dasturlari asosida olib boriladi.

4. Malaka oshirish va qayta tayyorlash kurslari quyidagi muddatlarda belgilangan tartibda oʻtkaziladi:

malaka oshirish kurslarining davomiyligi — 144 soat;

qayta tayyorlash kurslarining davomiyligi — 576 soatdan kam boʻlmagan hajmda.

5. Universitetda tashkil etiladigan kurslarda auditoriya oʻquv yuklamasining eng koʻp hajmi, qoida tariqasida, haftasiga 36 soat etib belgilanadi.

6. Malaka oshirish va qayta tayyorlash kurslari tinglovchining asosiy ish joyidan ajralgan yoki ajralmagan (masofaviy) holda tashkil etiladi.

7. Auditoriya mashgʻulotlari barcha turlarining davomiyligi Universitet tomonidan belgilanadi, lekin u 80 daqiqadan oshmasligi va oʻquv mashgʻulotlari oraligʻidagi tanaffus 10 daqiqadan kam boʻlmasligi lozim.

8. Universitet malaka oshirish va qayta tayyorlash boʻyicha sertifikatlar va diplomlarning elektron hisobini yuritish yuzasidan masʼul hisoblanadi.

2-bob. Malaka oshirish kurslarini tashkil etish

9. Malaka oshirish kurslarida oʻqish muddati Universitet bilan kelishilgan holda, buyurtmachi tomonidan tasdiqlanadigan taʼlim oluvchilarning malaka oshirish kurslari vaqti, shakli va yoʻnalishi koʻrsatilgan taqsimot-rejalarga muvofiq Universitet tomonidan tasdiqlangan oʻquv rejasi va dasturlari asosida tashkil etiladi hamda oʻquv mashgʻulotlari jadvali boʻyicha amalga oshiriladi.

10. Buyurtmachi tomonidan taqsimot-rejalar yarim yil uchun tuziladi hamda har yili iyun va dekabr oyining 15-sanasiga qadar tasdiqlanib, Universitetga taqdim etiladi.

11. Tinglovchilar malaka oshirish kurslarida Universitet bilan tuziladigan shartnomaga muvofiq toʻlov asosida oʻqitiladi.

Malaka oshirish kurslarida oʻqish uchun toʻlov miqdori asoslangan kalkulyatsiyaga muvofiq Universitet tomonidan belgilanadi.

12. Buyurtmachi taqsimot-rejalarga asosan oʻqishi belgilangan xodimlarining malaka oshirish kurslarida qatnashishini taʼminlaydi.

Xodim mehnat taʼtili yoki vaqtincha mehnatga qobiliyatsizligi davrida malaka oshirish kurslariga jalb qilinmaydi.

Malaka oshirish kurslarida ishdan ajralgan holda oʻqish davomida tinglovchilarning asosiy ish joyidagi oʻrtacha ish haqini saqlab qolish masalasi mehnat qonunchiligida belgilangan tartibda hal qilinadi.

13. Malaka oshirish kurslariga tinglovchilar oʻqishga qabul qilingani toʻgʻrisida Universitet rektorining buyrugʻi qabul qilinadi.

Universitet tinglovchilarning malaka oshirish kurslariga oʻz vaqtida kelmagani yoki ularda qatnashmagani haqida buyurtmachiga xabar beradi.

14. Buyurtmachining soʻroviga muvofiq oʻquv mashgʻulotlari xodimlarning ish joyida tashkil etilishi mumkin.

15. Malaka oshirish kurslariga uzrli sabablarga (vaqtincha mehnatga qobiliyatsizligi, davlat yoki jamoat vazifalarini bajargani, respublika va xalqaro musobaqalarda ishtirok etgani, vaqtincha xorijiy safarda boʻlgani, yaqin qarindoshining vafoti) koʻra oʻz vaqtida kelmagan tinglovchilarga oʻqishning tegishli yoʻnalishi boʻyicha navbatdagi malaka oshirish kurslarida oʻqishga ruxsat beriladi.

16. Malaka oshirish kursi tinglovchisi kursning oʻquv rejasida nazarda tutilgan barcha nazorat turlarida ijobiy natija koʻrsatsa, kursning oʻquv dasturi toʻliq oʻzlashtirilgan hisoblanadi.

17. Malaka oshirish kurslari oʻquv dasturiga muvofiq belgilangan mavzular (modullar) boʻyicha yakuniy sinov imtihonini topshirish bilan yakunlanadi.

Malaka oshirish kurslari boʻyicha yakuniy sinov imtihonini oʻtkazish shakli va savollar majmui Universitet tomonidan belgilanadi.

18. Malaka oshirish kurslarini tamomlab, yakuniy sinov imtihonlarini muvaffaqiyatli topshirgan tinglovchilarga mazkur Nizomga 1-ilovada belgilangan namunadagi sertifikat beriladi.

Sertifikat elektron generatsiya qilingan va elektron imzo yoki uning muqobil shakldagi hujjatni tasdiqlovchi vositalar (QR-kod) bilan tasdiqlangan hujjat (sertifikat) shaklida ham berilishi mumkin.

19. Yakuniy sinov imtihonidan birinchi marotaba oʻta olmagan tinglovchiga, shuningdek, uzrli sabablarga (vaqtincha mehnatga qobiliyatsizligi, davlat yoki jamoat vazifalarini bajargani, respublika va xalqaro musobaqalarda ishtirok etgani, vaqtincha xorijiy safarda boʻlgani, yaqin qarindoshining vafoti) koʻra yakuniy sinov imtihonini topshirmagan tinglovchiga kelgusi malaka oshirish kursi yakunida, biroq yakuniy sinov imtihoni natijalari eʼlon qilingan kundan boshlab uch oydan kechiktirmagan holda yakuniy sinov imtihonini bir marotaba qayta topshirishga ruxsat beriladi.

Yakuniy sinov imtihonini qayta topshirishda ham oʻta olmagan tinglovchiga sertifikat berilmaydi. Bu holda tinglovchiga malaka oshirish kursida qatnashgani toʻgʻrisida maʼlumotnoma beriladi.

20. Buyurtmachi yakuniy sinov imtihonini qayta topshirishda ham oʻta olmagan tinglovchini, basharti uning vazifasi oʻzgarmagan taqdirda, natijalar eʼlon qilingan kundan boshlab olti oy muddatda malaka oshirish kursida qayta oʻqitishni yoki kiberxavfsizlikka oid vazifalar yuklangan tegishli xodimni yuborishni taʼminlaydi.

Bunda malaka oshirishning navbatdagi ikki yillik muddati tinglovchi malaka oshirish kursini muvaffaqiyatli tamomlab, sertifikat olgan sanadan boshlab hisoblanadi.

3-bob. Qayta tayyorlash kurslarini tashkil etish

21. Davlat organlari va tashkilotlari, ustav fondida (ustav kapitalida) davlat ulushi 50 foiz va undan ortiq boʻlgan yuridik shaxslar oʻz mutaxassislarini kiberxavfsizlik sohasida qoʻshimcha kasbiy bilim, malaka va koʻnikmalarning zarur hajmini egallashi uchun qayta tayyorlash kurslarida oʻqishga yuborishi mumkin.

Qayta tayyorlash kurslarida oʻquv jarayoni Universitet rektori tomonidan tasdiqlangan oʻquv rejasi va dasturlari asosida oʻquv mashgʻulotlari jadvali boʻyicha amalga oshiriladi.

22. Tinglovchilar qayta tayyorlash kursida Universitet va buyurtmachi oʻrtasida tuziladigan shartnomaga muvofiq toʻlov asosida oʻqitiladi.

23. Buyurtmachi toʻlovni toʻlagandan soʻng Universitet rektorining buyrugʻi bilan tinglovchi qayta tayyorlash kursiga qabul qilinadi.

24. Qayta tayyorlash kurslarida ishdan ajralgan holda oʻqish davomida tinglovchilarning asosiy ish joyidagi oʻrtacha ish haqini saqlab qolish masalasi mehnat qonunchiligida belgilangan tartibda hal qilinadi.

25. Oʻquv jarayoni anʼanaviy (oflayn) va masofaviy (onlayn) taʼlim shaklida tashkil etiladi.

Masofaviy taʼlim shaklidagi oʻquv kurslarida oʻquv jarayoni maxsus taʼlim platformalarida onlayn (real vaqt rejimida) va oflayn (tegishli oʻquv-metodik resurslarni mustaqil ravishda oʻzlashtirish) rejimda tashkil qilinadi.

26. Qayta tayyorlash kursi tinglovchisi kursning oʻquv rejasida koʻzda tutilgan barcha oraliq nazoratlarda ijobiy natija koʻrsatsa, kursning oʻquv dasturi toʻliq oʻzlashtirilgan hisoblanadi.

27. Qayta tayyorlash kursining oraliq nazorat topshiriqlarini muvaffaqiyatli bajargan tinglovchi yakuniy sinov imtihoniga qoʻyiladi.

Masofaviy taʼlim shaklida tashkil etilgan qayta tayyorlash kurslarida yakuniy sinov imtihoni tinglovchining bevosita ishtirokida Universitetda oʻtkaziladi.

28. Qayta tayyorlash kurslari boʻyicha yakuniy sinov imtihonini oʻtkazish shakli va savollar majmui Universitet tomonidan belgilanadi.

29. Qayta tayyorlash kursini tamomlagan va yakuniy sinov imtihonini muvaffaqiyatli topshirgan tinglovchilarga mazkur Nizomga 2-ilovada belgilangan namunadagi diplom beriladi.

Yakuniy sinov imtihonida qoniqarsiz baho olgan tinglovchilarga shartnomada koʻrsatilgan toʻlovni toʻlagandan soʻng faqat bir marta qayta topshirish imkoniyati beriladi.

Yakuniy sinov imtihonini qayta topshirishda ham oʻta olmagan tinglovchiga diplom berilmaydi. Bu holda tinglovchiga qayta tayyorlash kursida qatnashgani toʻgʻrisida maʼlumotnoma beriladi.

4-bob. Tinglovchilarning huquqlari va majburiyatlari

30. Tinglovchilar quyidagi huquqlarga ega:

oʻquv jarayonini yanada yaxshilash, malaka oshirish va qayta tayyorlash tizimini takomillashtirish boʻyicha Universitet rahbariyatiga taklif va tavsiyalar kiritish;

maʼnaviy-maʼrifiy va madaniy tadbirlarda qatnashish;

malaka oshirish va qayta tayyorlash bilan bogʻliq boʻlgan qoʻshimcha maʼlumotlar va maslahatlar olish;

Universitetning axborot-resurs markazi, oʻquv xonalari va kompyuter texnika vositalaridan foydalanish;

konferensiya, seminar va amaliy treninglarda ishtirok etish.

Tinglovchilar qonunchilik hujjatlariga muvofiq boshqa huquqlarga ham ega boʻlishlari mumkin.

31. Tinglovchilar:

belgilangan tartibda rasmiylashtirilgan oʻquv rejasi va dasturlari asosida oʻqishi;

oʻquv mashgʻulotlariga oʻz vaqtida shaxsan oʻzlari ishtirok etishi va onlayn oʻquv mashgʻulotlarida veb-kamera orqali qatnashishi;

oʻquv dasturlarida nazarda tutilgan nazorat turlarini va yakuniy sinov imtihonlarini topshirishi;

oʻz nazariy bilimlarini, kasbiy koʻnikmalari va mahorat darajasini oshirishi;

oʻquv jarayonida berilgan topshiriqlarni oʻz vaqtida bajarishi;

Universitetga tegishli boʻlgan mol-mulkni asrab-avaylashi, Universitet ichki tartib-qoidalariga qatʼiy rioya etishi lozim.

Tinglovchilar oʻz zimmasiga qonunchilik hujjatlariga muvofiq boshqa majburiyatlarni ham olishi mumkin.

32. Tinglovchi quyidagi holatlarda tinglovchilar safidan chiqarilishi mumkin:

oʻz xohishiga binoan;

oʻquv intizomi va Universitet ichki tartib-qoidalarini muntazam yoki qoʻpol ravishda buzganda;

uzrli sabablarsiz qayta tayyorlash kurslari boʻyicha oʻquv mashgʻulotlarining 15 foizdan va malaka oshirish kurslari boʻyicha oʻquv mashgʻulotlarining 20 foizidan ortiq soat qoldirganda;

tinglovchiga berilgan login va parolni hamda shaxsiy kabinetini boshqa shaxslarga foydalanish uchun bergani aniqlanganda;

shartnoma asosida oʻqitish bilan bogʻliq majburiyatlarni bajarmaganda;

sogʻligʻining holatiga koʻra oʻqishni davom ettirish imkoniyati boʻlmaganda (tibbiy komissiya xulosasi asosida);

sud tomonidan ozodlikdan mahrum etilganda;

vafot etganda.

Tinglovchi ushbu bandda nazarda tutilgan holatlarga koʻra tinglovchilar safidan chiqarilgan taqdirda, ushbu tinglovchi uchun toʻlangan toʻlov qaytarilmaydi.

5-bob. Yakuniy sinov imtihonlari natijalari yuzasidan apellyatsiya berish

33. Yakuniy sinov imtihonlari natijalaridan norozi boʻlgan tinglovchilar natijalar eʼlon qilingan vaqtdan boshlab besh ish kuni mobaynida apellyatsiya komissiyasiga ariza (shikoyat) berishlari mumkin.

34. Apellyatsiya komissiyasi Universitet rektorining buyrugʻi asosida 3 yoki 5 nafar aʼzodan iborat tarkibda tuziladi.

35. Apellyatsiya komissiyasi tarkibiga yakuniy sinov imtihoni jarayonlarini oʻtkazishda ishtirok etgan shaxslar kiritilmaydi.

36. Apellyatsiya komissiyasi yigʻilishida komissiya aʼzolarining uchdan ikki qismi ishtirok etsa, uning qabul qilgan qarori qonuniy kuchga ega boʻladi.

37. Murojaat etuvchi apellyatsiya komissiyasi tomonidan murojaati koʻrib chiqilishi jarayonida bevosita yoki masofadan turib onlayn tarzda ishtirok etishi mumkin.

38. Apellyatsiyani koʻrib chiqish natijasi boʻyicha apellyatsiya komissiyasi quyidagi qarorlardan birini qabul qiladi:

agar yakuniy imtihon jarayonlarida Universitet tomonidan hech qanday qonun buzilish holatlari sodir etilmagan yoki yakuniy imtihon savollarida xatoliklar aniqlanmagan boʻlsa, toʻplangan ballarni oʻzgarishsiz qoldirish;

agar yakuniy imtihon jarayonlarida Universitet tomonidan qonun buzilish holatlari sodir etilgan yoki yakuniy imtihon savollarida xatoliklar aniqlangan boʻlsa, toʻplangan ballarni oʻzgartirish;

agar yakuniy imtihon jarayonlarida Universitetning aybi bilan texnik nosozliklar vujudga kelgan boʻlsa, yakuniy sinov imtihonini qayta oʻtkazish.

39. Apellyatsiya komissiyasi qarori nusxasi ariza (shikoyat) beruvchiga apellyatsiya komissiyasi qarori chiqqan kundan eʼtiboran uch kun muddatda taqdim etiladi.

40. Takroriy apellyatsiyaga yoʻl qoʻyilmaydi.

Tinglovchilar apellyatsiya komissiyasining qarori yuzasidan qonunchilik hujjatlarida belgilangan tartibda sudga shikoyat qilishi mumkin.

6-bob. Yakunlovchi qoidalar

41. Malaka oshirish va qayta tayyorlash kurslari tinglovchilari bilan bogʻliq hujjatlar Universitetda belgilangan tartibda saqlanadi.

42. Mazkur Nizom talablarining buzilishida aybdor shaxslar qonunchilik hujjatlariga muvofiq javobgar boʻladi.

NAMUNA

Malaka oshirish haqida davlat namunasidagi sertifikat

SHAKLI

NAMUNA

Qayta tayyorlash haqida davlat namunasidagi diplom

SHAKLI