Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash tartibini belgilash toʻgʻrisida (550-son)

09.10.2026

Oʻzbekiston Respublikasi Vazirlar Mahkamasining

qarori

Respublikada limonchilikka ixtisoslashgan mahallalarning muhandislik-kommunikatsiya infratuzilmasini yanada yaxshilash orqali limon yetishtirish bilan shugʻullanadigan xonadonlar sonini koʻpaytirish va ularga qulay shart-sharoitlar yaratish maqsadida Vazirlar Mahkamasi qaror qiladi:

1. Quyidagilarni nazarda tutuvchi Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash tartibi toʻgʻrisidagi nizom ilovaga muvofiq tasdiqlansin:

limonchilikka ixtisoslashgan mavjud mahallalarni xatlovdan oʻtkazish va ularning hisobini yuritish tartibi;

muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash uchun limonchilikka ixtisoslashgan mahallalarni tanlab olish tartibi;

limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash tartibi.

2. Kambagʻallikni qisqartirish va bandlik vazirligi Raqamli texnologiyalar vazirligi, Kadastr agentligi hamda “Turonbank” ATB bilan birgalikda uch oy muddatda limon yetishtiruvchi xonadonlar sonini ikki baravarga koʻpaytirgan mahallalarni avtomatik ravishda aniqlash boʻyicha “Online mahalla” elektron platformasida texnik imkoniyatlar yaratilishini taʼminlasin.

3. Iqtisodiyot va moliya vazirligi limon yetishtiruvchi xonadonlar sonini ikki baravarga koʻpaytirgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash ishlari uchun har yili Oʻzbekiston Respublikasi Davlat budjeti parametrlarini shakllantirishda, shuningdek, Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturlari doirasida mablagʻlar ajratilishini nazarda tutsin.

4. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 9-oktabr,

550-son

Vazirlar Mahkamasining 2026-yil 9-oktabrdagi 550-son qaroriga ILOVA

Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash tartibi toʻgʻrisida

NIZOM

1-bob. Umumiy qoidalar

1. Ushbu Nizom limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash tartibini belgilaydi.

Mazkur Nizom talablari Qoraqalpogʻiston Respublikasi, viloyatlar va Toshkent shahri hududida limon yetishtiruvchi xonadonlar sonini ikki baravarga koʻpaytirgan limonchilikka ixtisoslashgan mahallalarga nisbatan tatbiq etiladi.

Limon yetishtiruvchi xonadonlar sonini ikki baravarga koʻpaytirgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash ishlari har yili Oʻzbekiston Respublikasi Davlat budjetidan Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturlarini amalga oshirish uchun ajratilgan mablagʻlar doirasida bajariladi.

Ushbu Nizom talablari mahallalarda ilgari boshqa davlat dasturlari doirasida qurilgan (taʼmirlangan) va texnik holati yaxshi, shuningdek, tasdiqlangan davlat dasturlariga muvofiq qurilishi (taʼmirlanishi) rejalashtirilgan muhandislik-kommunikatsiya infratuzilmasi obyektlariga nisbatan tatbiq etilmaydi.

2. Ushbu Nizomda quyidagi asosiy tushunchalardan foydalaniladi:

limonchilikka ixtisoslashgan mahalla — Qoraqalpogʻiston Respublikasi, viloyatlar va Toshkent shahri hududida joylashgan, ushbu Nizomning 4-bandida belgilangan nisbatlarda limon yetishtiruvchi xonadonlar mavjud boʻlgan mahallalar;

muhandislik-kommunikatsiya infratuzilmasi obyektlari — ichimlik suvi obyektlari, ichki avtomobil yoʻllari, elektr energiyasi taʼminoti obyektlari;

elektron platforma — limon yetishtiruvchi xonadonlarni xatlovdan oʻtkazish va ularning hisobini yuritishda foydalaniladigan “Online mahalla” elektron platformasi.

3. Limonchilikka ixtisoslashgan mahallalarda quyidagi infratuzilma obyektlaridan birini qurish, rekonstruksiya qilish va mukammal taʼmirlash nazarda tutiladi:

ichimlik suvi obyektlari;

ichki yoʻllar;

elektr energiyasi taʼminoti obyektlari.

4. Qoraqalpogʻiston Respublikasi, viloyatlar va Toshkent shahri hududida joylashgan mahallalardagi limon yetishtiruvchi xonadonlar sonidan kelib chiqqan holda, ularning limonchilikka ixtisoslashgani quyidagi nisbatlarda aniqlanadi:

a) 1 000 xonadongacha boʻlgan mahallada limon yetishtiruvchi xonadonlar kamida 20 foizni;

b) 1 000 — 2 000 xonadongacha boʻlgan mahallada limon yetishtiruvchi xonadonlar kamida 15 foizni;

v) 2 000 va undan koʻp xonadonli mahallada limon yetishtiruvchi xonadonlar kamida 10 foizni tashkil etishi kerak.

5. Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash ishlari ushbu Nizomga 1-ilovaga muvofiq sxemada amalga oshiriladi.

2-bob. Limonchilikka ixtisoslashgan mahallalarni xatlovdan oʻtkazish va ularning hisobini yuritish

6. Tuman (shahar) hokimining tegishli qaroriga asosan ushbu Nizomga 2-ilovaga muvofiq namunaviy tarkibda Limonchilikka ixtisoslashgan mahallalar va limon yetishtiruvchi xonadonlarni xatlovdan oʻtkazish va ularning hisobini yuritish boʻyicha doimiy faoliyat yurituvchi ishchi guruh (keyingi oʻrinlarda — ishchi guruh) tuziladi.

Bunda limon yetishtiruvchilarni qoʻllab-quvvatlash va ularning hisobini yuritish maqsadida ishchi guruhga “Turonbank” ATB roziligi bilan uning vakili jalb etiladi.

7. Quyidagilar ishchi guruhning asosiy vazifalari hisoblanadi:

limonchilikka ixtisoslashgan mahallalarni hamda limon yetishtiruvchi xonadonlarni ushbu Nizomda belgilangan talablar asosida xatlovdan oʻtkazish va ularning hisobini yuritish;

“Online mahalla” elektron platformasiga xatlov natijalari yuzasidan tegishli maʼlumotlarni kiritib borish;

limon yetishtiruvchi xonadonlar sonini ikki baravarga koʻpaytirgan mahallalar toʻgʻrisidagi maʼlumotlarni koʻrib chiqish va tegishli dalolatnomani (keyingi oʻrinlarda — dalolatnoma) rasmiylashtirish;

“Online mahalla” elektron platformasiga kiritiladigan maʼlumotlarning toʻgʻri va haqqoniyligini taʼminlash.

8. Ishchi guruh limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash maqsadida kalendar yilning 1-fevraliga qadar mahallalarda limon yetishtiruvchi xonadonlarni xatlovdan oʻtkazadi va ularning doimiy hisobini “Online mahalla” elektron platformasida yuritib boradi.

9. Ishchi guruh limonchilikka ixtisoslashgan mahallalar va limon yetishtiruvchi xonadonlarni quyidagi talablar asosida oʻrganadi:

mahalladagi xonadonlar sonidan kelib chiqqan holda, ushbu Nizomning 4-bandida belgilangan nisbatlarda xonadonlarning limon yetishtirish bilan shugʻullanishi;

limon yetishtirilayotgan maydonga boʻlgan huquqning davlat roʻyxatidan oʻtkazilgani;

har bir xonadonda limon yetishtirish maydoni kamida 0,01 gektarni tashkil etishi;

har 0,01 gektar maydonga toʻgʻri keladigan koʻchatlar soni kamida 8 tani (kamida 2 yoshni) tashkil etishi.

10. Xatlov natijalariga asosan limonchilikka ixtisoslashgan mahallalar va limon yetishtiruvchi xonadonlar toʻgʻrisidagi maʼlumotlar kalendar yilning 1-martiga qadar “Online mahalla” elektron platformasiga kiritiladi.

“Online mahalla” elektron platformasiga limonchilikka ixtisoslashgan mahallalar va limon yetishtiruvchi xonadonlarni xatlovdan oʻtkazish boʻyicha maʼlumotlar ishchi guruhning ishchi organi boʻlgan tuman (shahar) iqtisodiyot va moliya boʻlimi hamda “Turonbank” ATB tomonidan kiritiladi.

3-bob. Limonchilikka ixtisoslashgan mahallalarni tanlab olish

11. Limonchilikka ixtisoslashgan (limon yetishtiruvchi xonadonlar sonini ikki baravarga koʻpaytirgan) mahallalar xatlov natijalari asosida “Online mahalla” elektron platformasi orqali ushbu Nizomning 9-bandida keltirilgan talablarga koʻra inson omilisiz avtomatik ravishda tanlab olinadi.

Tanlab olingan mahallalar ishchi guruh tomonidan kalendar yilning 15-martiga qadar koʻrib chiqiladi va dalolatnoma rasmiylashtiriladi.

12. Dalolatnoma rasmiylashtirilgandan soʻng Vazirlar Mahkamasining 2022-yil 21-apreldagi 206-son qaroriga muvofiq tashkil etiladigan Loyihalar portfeliga kiritiladigan infratuzilma loyihalarining dastlabki roʻyxatini shakllantirish boʻyicha tuman (shahar) ishchi guruhlari (keyingi oʻrinlarda — infratuzilma boʻyicha ishchi guruh) kalendar yilning 15-apreliga qadar limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlashga doir ehtiyojni oʻrganadi hamda ushbu Nizomga 3-ilovaga muvofiq shakldagi loyiha (obyekt) pasportini ishlab chiqadi.

Bunda limonchilikka ixtisoslashgan mahallalarning muhandislik-kommunikatsiya infratuzilmasiga boʻlgan ehtiyoji va ularning texnik holati hamda obyekt xizmat koʻrsatadigan (qamrab olinadigan) aholi sonidan (kelgusida aholisini oʻsishini inobatga olgan holda) kelib chiqib, quyidagi talablar asosida oʻrganiladi:

a) markazlashgan ichimlik suvi obyektlari:

aholining ichimlik suvi bilan taʼminlanganlik darajasi pastligi (50 foizdan past);

ichimlik suvi grafik asosida yetkazilishi yoki taʼminotdagi uzilishlarning mavjudligi;

aholining sanitariya qoidalariga javob bermaydigan suv saqlash inshootlaridan foydalanishi;

tarmoq va inshootlar eskirganlik darajasining (suv sizib chiqishi, avariyaviy holatlar sababli suv yoʻqotishlari) yuqoriligi (60 — 70 foiz);

b) ichki yoʻllar:

ichki yoʻllarga asfalt (sement-beton) qoplamasi yotqizilmagani, qattiq qoplamali yoʻllar darajasining pastligi;

ichki yoʻllar texnik holatining yomonligi (rekonstruksiya va taʼmirtalabligi) yoki talabga javob bermasligi;

v) elektr energiyasi taʼminoti obyektlari:

hududda elektr energiyasi taʼminotida uzilishlarning mavjudligi, elektr tarmogʻida yuklamalarning yuqoriligi;

elektr energiyasini yetkazib berish sifati va quvvatining pastligi, avariyaviy holatlar hamda elektr energiyasi yoʻqotishlarining yuqoriligi;

elektr tarmoqlari, podstansiyalar va transformator punktlarining texnik holati yomonlashgani va eskirgani.

13. Infratuzilma boʻyicha ishchi guruh kalendar yilning 1-mayiga qadar ushbu Nizomga 4-ilovaga muvofiq shaklda limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash boʻyicha loyihalar (obyektlar)ning manzilli roʻyxatini (keyingi oʻrinlarda — manzilli roʻyxat) shakllantirib, koʻrib chiqish uchun Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklariga yuboradi.

14. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari oʻn kun muddatda manzilli roʻyxat toʻgʻri shakllantirilganini hamda loyihalar pasportlarida keltirilgan maʼlumotlarning haqqoniyligini koʻrib chiqib, ichimlik suvi obyektlarining manzilli roʻyxatini “Oʻzsuvtaʼminot” AJ hamda elektr energiyasi taʼminoti obyektlarining manzilli roʻyxatini “Hududiy elektr tarmoqlari” AJga kelishish uchun yuboradi.

Bunda limonchilikka ixtisoslashgan mahallalardagi ichki avtomobil yoʻllarini qurish-taʼmirlash loyihalari (obyektlari) boʻyicha manzilli roʻyxatni Oʻzbekiston Respublikasi Transport vazirligi huzuridagi Avtomobil yoʻllari qoʻmitasining hududiy boshqarmalari koʻrib chiqib, kelishadi.

15. Manzilli roʻyxatlar belgilangan tartibda kelishilganidan soʻng, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari ularni kalendar yilning 20-mayiga qadar Oʻzbekiston Respublikasi Iqtisodiyot va moliya vazirligiga kiritadi.

4-bob. Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash

16. Oʻzbekiston Respublikasi Iqtisodiyot va moliya vazirligi taqdim etilgan manzilli roʻyxatni koʻrib chiqib, uni kalendar yilning 1-iyuniga qadar Vazirlar Mahkamasining Rayosati majlisiga tasdiqlash uchun kiritadi.

17. Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash ishlari:

ichimlik suvi taʼminoti obyektlari Ijtimoiy va ishlab chiqarish infratuzilmasini rivojlantirish dasturi doirasidagi mablagʻlar;

elektr energiyasi tarmoqlarini qurish-taʼmirlash ishlari Oʻzbekiston Respublikasi Prezidentining 2020-yil 18-dekabrdagi PQ-4929-son qarorida belgilangan tartibda ajratiladigan budjet ssudasi mablagʻlari;

ichki avtomobil yoʻllari mahalliy budjet mablagʻlarining orttirib bajarilgan qismi hisobidan moliyalashtiriladi. Bunda Qoraqalpogʻiston Respublikasi budjeti, viloyatlar va Toshkent shahar mahalliy budjetlarining qoʻshimcha manbalarini ushbu Nizomga asosan yoʻnaltirish yuzasidan takliflar Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahri Kengashlari tomonidan koʻrib chiqilib, tasdiqlanadi.

18. Vazirlar Mahkamasi manzilli roʻyxatni Vazirlar Mahkamasining 2022-yil 21-apreldagi 206-son qarori bilan tasdiqlangan Ijtimoiy va ishlab chiqarish infratuzilmasini rivojlantirish dasturini shakllantirish tartibi toʻgʻrisidagi nizomga muvofiq Vazirlar Mahkamasining Rayosati majlisida belgilangan muddatlarda tasdiqlanishini taʼminlaydi.

19. Manzilli roʻyxat Vazirlar Mahkamasining Rayosati majlisida tasdiqlanganidan soʻng limonchilikka ixtisoslashgan mahallalarda ichimlik suvi taʼminoti obyektlari va elektr energiyasi tarmoqlarini qurish-taʼmirlash ishlari boʻyicha loyihalarga (obyektlarga) belgilangan tartibda Oʻzbekiston Respublikasi Iqtisodiyot va moliya vazirligi tomonidan Ijtimoiy va ishlab chiqarish infratuzilmasini rivojlantirish dasturi doirasida mablagʻlar ajratiladi.

Ichki avtomobil yoʻllarini qurish-taʼmirlash loyihalari (obyektlari) boʻyicha manzilli roʻyxat Vazirlar Mahkamasi tomonidan Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklariga ijro uchun yuboriladi.

20. Loyiha-smeta hujjatlariga koʻra ajratilgan mablagʻlar obyektlarni qurish, taʼmirlash va obodonlashtirish ishlari uchun yetarli boʻlmagan taqdirda, qoʻshimcha xarajatlar tegishlicha mahalliy budjetning qoʻshimcha manbalari hisobidan qoplanishi mumkin.

21. Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash ishlari boʻyicha buyurtmachi etib:

ichimlik suvi taʼminoti obyektlari boʻyicha — “Suv taʼminoti va kanalizatsiya obyektlarini qurish boʻyicha injiniring kompaniyasi” DM;

ichki avtomobil yoʻllari boʻyicha — Avtomobil yoʻllari qoʻmitasi huzuridagi “Mintaqaviy yoʻllarga buyurtmachi xizmati” DM;

elektr energiyasi taʼminoti boʻyicha — “Hududiy elektr tarmoqlari” AJ hududiy filiallari belgilanadi.

22. Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash ishlariga bosh loyiha va bosh pudrat tashkilotlari belgilangan tartibda davlat xaridlari tartib-taomillari boʻyicha aniqlanadi.

5-bob. Yakunlovchi qoidalar

23. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

24. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradi.

Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash tartibi toʻgʻrisidagi nizomga 1-ILOVA

Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash ishlarini tashkil etish

SXEMASI

Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash tartibi toʻgʻrisidagi nizomga 2-ILOVA

Limonchilikka ixtisoslashgan mahallalar va limon yetishtiruvchi xonadonlarni xatlovdan oʻtkazish va ularning hisobini yuritish hamda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash ishlarini tashkil etish boʻyicha ishchi guruhining

NAMUNAVIY TARKIBI

Izoh. Ishchi guruh aʼzolari boshqa ishga oʻtganda, uning tarkibiga ushbu lavozimga yangi tayinlangan yoki zimmasiga tegishli funksiyalarni bajarish yuklangan shaxs kiritiladi.

Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash tartibi toʻgʻrisidagi nizomga 3-ILOVA

LOYIHA PASPORTI

Limonchilikka ixtisoslashgan mahallalarda muhandislik-kommunikatsiya infratuzilmasi obyektlarini qurish, rekonstruksiya qilish va mukammal taʼmirlash tartibi toʻgʻrisidagi nizomga 4-ILOVA

MANZILLI ROʻYXAT