Mehnat shartnomasi alohida asoslarga koʻra bekor qilinganda, moddiy jihatdan qoʻllab-quvvatlash boʻyicha qoʻshimcha kafolatlardan foydalanishda davlat xizmatlari koʻrsatishning maʼmuriy reglamentlarini tasdiqlash toʻgʻrisida (519-son)
28.09.2026
OʻZBEKISTON RESPUBLIKASI VAZIRLAR MAHKAMASINING
QARORI
Oʻzbekiston Respublikasi Prezidentining “Respublikaning hudud, soha va tarmoqlarida raqamli texnologiyalar joriy etilishini yanada jadallashtirish chora-tadbirlari toʻgʻrisida” 2025-yil 16-sentabrdagi PQ-286-son qaroriga muvofiq, shuningdek, fuqarolarning bandlik sohasidagi davlat xizmatlaridan foydalanish jarayonini yanada soddalashtirish maqsadida Vazirlar Mahkamasi qaror qiladi:
1. Quyidagilar:
Mehnat shartnomasi alohida asoslarga koʻra bekor qilinganda, ishdan boʻshatilgan xodimlarga muddatidan oldin yoshga doir pensiya tayinlash uchun taqdimnoma rasmiylashtirish boʻyicha davlat xizmatini koʻrsatishning maʼmuriy reglamenti 1-ilovaga muvofiq;
Mehnat shartnomasi alohida asoslarga koʻra bekor qilingan xodimlarga ish joyidan uchinchi oyga oʻrtacha oylik ish haqi toʻlash boʻyicha davlat xizmatini koʻrsatishning maʼmuriy reglamenti 2-ilovaga muvofiq tasdiqlansin.
2. Raqamli texnologiyalar vazirligi Kambagʻallikni qisqartirish va bandlik vazirligi hamda Iqtisodiyot va moliya vazirligi huzuridagi budjetdan tashqari Pensiya jamgʻarmasi bilan birgalikda 2026-yil 1-noyabrga qadar ushbu qaror doirasida:
davlat xizmatlarini koʻrsatishda ishtirok etuvchilarning Oʻzbekiston Respublikasi Yagona interaktiv davlat xizmatlari portaliga ulanishini taʼminlasin;
Oʻzbekiston Respublikasi Yagona interaktiv davlat xizmatlari portali orqali davlat xizmatlarini koʻrsatishning har bir bosqichida jismoniy shaxslar murojaatlarining koʻrib chiqilish holatini kuzatib borish imkoniyatini yaratsin.
3. Kambagʻallikni qisqartirish va bandlik vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
4. Ushbu qarorning bajarilishini nazorat qilish Oʻzbekiston Respublikasi kambagʻallikni qisqartirish va bandlik vaziri B.E. Zaxidov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 28-sentabr,
519-son
Vazirlar Mahkamasining 2026-yil 28-sentabrdagi 519-son qaroriga 1-ILOVA
Mehnat shartnomasi alohida asoslarga koʻra bekor qilinganda, ishdan boʻshatilgan xodimlarga muddatidan oldin yoshga doir pensiya tayinlash uchun taqdimnoma rasmiylashtirish boʻyicha davlat xizmatini koʻrsatishning
MAʼMURIY REGLAMENTI
1-bob. Umumiy qoidalar
1. Ushbu Reglament mehnat shartnomasi alohida asoslarga koʻra bekor qilinganda, ishdan boʻshatilgan ayrim toifadagi xodimlarga muddatidan oldin yoshga doir pensiya tayinlash uchun taqdimnoma rasmiylashtirish boʻyicha davlat xizmatini (keyingi oʻrinlarda — davlat xizmati) koʻrsatish tartibini belgilaydi.
2. Ushbu Reglamentda quyidagi asosiy tushunchalardan foydalaniladi:
mehnat shartnomasini alohida asoslarga koʻra bekor qilish — Oʻzbekiston Respublikasi Mehnat kodeksining 161-moddasi ikkinchi qismining 1 va 2-bandlari boʻyicha tashkilot (uning alohida boʻlinmasi) oʻz muassislarining (ishtirokchilarining) yoki taʼsis hujjatlari bilan bunga vakolat berilgan yuridik shaxs organining qarori asosida tugatilgani yoxud yakka tartibdagi tadbirkor tomonidan faoliyatning tugatilgani hamda texnologiyaning, ishlab chiqarish va mehnatni tashkil etishning oʻzgarishi, ishlar (mahsulot, xizmatlar) hajmining qisqarishi bilan bogʻliq boʻlgan tashkilot (uning alohida boʻlinmasi), yakka tartibdagi tadbirkor xodimlari sonining yoki shtatining oʻzgargani sababli mehnat shartnomasini ish beruvchining tashabbusiga koʻra bekor qilish;
ariza beruvchi — mehnat shartnomasi alohida asoslarga koʻra bekor qilingan, umumiy mehnat staji yigirma besh yildan kam boʻlmagan 58 yoshdan 60 yoshgacha erkaklar va umumiy mehnat staji yigirma yildan kam boʻlmagan 53 yoshdan 55 yoshgacha ayollar;
mahalliy mehnat organlari — Oʻzbekiston Respublikasi Kambagʻallikni qisqartirish va bandlik vazirligining tuman (shahar) kambagʻallikni qisqartirish va bandlikka koʻmaklashish boʻlimlari;
muddatidan oldin yoshga doir pensiya — mehnat shartnomasi alohida asoslarga koʻra bekor qilingan va mahalliy mehnat organlari tomonidan belgilangan tartibda ishsiz deb eʼtirof etilgan, pensiya taʼminoti toʻgʻrisidagi qonunchilik hujjatlariga muvofiq pensiyaga chiqish uchun talab etiladigan umumiy mehnat stajiga ega boʻlgan shaxslarga umumiy asoslarga koʻra muddatidan ikki yil oldin tayinlanadigan pensiya.
3. Davlat xizmati ushbu Reglamentga 1-ilovaga muvofiq sxema asosida koʻrsatiladi.
2-bob. Davlat xizmatini koʻrsatish tartibi
4. Ariza beruvchi davlat xizmatidan foydalanish uchun mehnat shartnomasi alohida asoslarga koʻra bekor qilingandan soʻng Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali roʻyxatdan oʻtadi.
5. Ariza beruvchi davlat xizmatidan foydalanish uchun ushbu Reglamentga 2-ilovaga muvofiq shakldagi soʻrovnomani toʻldiradi.
Soʻrovnomalar YIDXP orqali dam olish va bayram kunlaridan qatʼi nazar, har kuni 24 soat davomida yuborilishi mumkin.
Bunda soʻrovnomalar ish vaqtidan keyin yoki dam olish va bayram kunlari kelib tushganda, navbatdagi ish kuni soʻrovnomalarning mahalliy mehnat organiga kelib tushgan va mahalliy mehnat organi tomonidan qabul qilingan kun hisoblanadi.
Ariza beruvchidan soʻrovnomada koʻrsatilmagan maʼlumotlar va hujjatlarni talab qilish taqiqlanadi.
6. Soʻrovnomani toʻldirish jarayonida:
ariza beruvchi toʻgʻrisidagi maʼlumotlar “Raqamli hukumat” tizimi idoralararo integrasiyalashuv platformasida avtomatik tarzda shakllanadi;
mehnat shartnomasi alohida asoslarga koʻra bekor qilingani toʻgʻrisidagi buyruq nusxasi (PDF, PNG yoki JPEG formatda) ilova qilinadi.
Agar ariza beruvchining mehnat staji toʻgʻrisidagi maʼlumotlar toʻliq raqamlashmagan boʻlsa, mehnat daftarchasining nusxasi (PDF, PNG yoki JPEG formatda) ilova qilinadi.
7. Soʻrovnoma toʻldirilgandan soʻng ariza beruvchi maʼlumotlarning toʻgʻriligini tekshiradi. Bunda soʻrovnomani elektron raqamli imzo bilan tasdiqlash talab etilmaydi.
Toʻldirilgan soʻrovnoma YIDXP orqali avtomatik ravishda ariza beruvchining yashash joyidagi mahalliy mehnat organiga yuboriladi.
8. Mahalliy mehnat organi soʻrovnoma kelib tushgan kundan eʼtiboran ikki ish kuni ichida:
muddatidan oldin pensiya tayinlash uchun talab etiladigan hujjatlar mavjudligini hamda ish beruvchi tomonidan ariza bergan shaxs bilan mehnat shartnomasi alohida asoslarga koʻra bekor qilingani toʻgʻrisidagi maʼlumotlar “Yagona milliy mehnat tizimi” idoralararo dasturiy-apparat kompleksiga (keyingi oʻrinlarda — “YAMMT” IDAK) kiritilganini tekshiradi;
soʻrovnoma boʻyicha asoslovchi hujjatlar va maʼlumotlar mavjud boʻlgan taqdirda, ariza beruvchini qonunchilik hujjatlarida belgilangan tartibda ish qidirayotgan shaxs sifatida roʻyxatga oladi va oʻn kun ichida mahalliy mehnat organiga maqbul keladigan ish yuzasidan taklif olish uchun kelishi lozimligi toʻgʻrisida YIDXP yoki soʻrovnomada koʻrsatilgan telefon raqami (elektron pochta manzili) orqali xabardor qiladi.
9. Ariza beruvchi tomonidan davlat xizmatidan foydalanish uchun maʼlumotlar va hujjatlar toʻliq taqdim etilmaganda, shuningdek, hujjatlarda notoʻgʻri yoki buzib koʻrsatilgan maʼlumotlar aniqlanganda, kamchiliklarni toʻliq koʻrsatgan holda ularni bartaraf etish uchun besh ish kunidan iborat muddat beriladi va bu haqida ariza beruvchi shu kunning oʻzida YIDXP yoki soʻrovnomada koʻrsatilgan telefon raqami (elektron pochta manzili) orqali xabardor qilinadi.
10. Ariza beruvchi ish qidirayotgan shaxs sifatida roʻyxatga olingan kundan eʼtiboran oʻn kun ichida mahalliy mehnat organiga maqbul keladigan ish (fuqaro bajarishga qodir boʻlgan, fuqaroning olgan maʼlumoti yoʻnalishi va ixtisosligiga, malakasiga, kasbiy tayyorgarligiga, ish tajribasiga, sogʻligʻining holatiga koʻra mos keladigan, yashash joyini oʻzgartirishini nazarda tutmaydigan, uning doimiy yashash joyidan unchalik uzoq boʻlmagan hamda mehnatga haq toʻlashning belgilangan eng kam miqdoridan kam boʻlmagan ish haqini kafolatlaydigan ish) toʻgʻrisida taklif olish uchun borishi lozim.
Bunda mahalliy mehnat organi ariza beruvchiga maqbul keladigan ishni taklif etadi va Oʻzbekiston Respublikasining “Aholi bandligi toʻgʻrisida”gi Qonunining 49-moddasi toʻrtinchi qismiga muvofiq ariza beruvchini u bilan mehnat shartnomasi bekor qilingan kundan boshlab uch oy davomida maqbul keladigan ishga joylashtirish choralarini koʻradi.
11. Quyidagi holatlarda ariza beruvchi ishsiz deb eʼtirof etilmaydi va davlat xizmatini koʻrsatish yakuniga yetkaziladi:
taklif etilgan maqbul keladigan ishni ish qidirayotgan shaxs sifatida roʻyxatga olingan kundan eʼtiboran oʻn kun ichida uzrli sababsiz ikki marta rad etsa;
mahalliy mehnat organi xodimi huzuriga maqbul keladigan ish yuzasidan taklif olish uchun ish qidirayotgan shaxs sifatida roʻyxatga olingan kundan eʼtiboran oʻn kun ichida uzrli sababsiz kelmasa;
ishga joylashtirish uchun yuborilgan tashkilotdan rad javobi olinmagan boʻlsa.
12. Ariza beruvchiga uch oylik davr tugagach, maqbul keladigan ish topib berilmagan taqdirda, u ishsiz shaxs deb eʼtirof etiladi va ushbu Reglamentga 3-ilovaga muvofiq taqdimnoma rasmiylashtiriladi hamda ushbu taqdimnomani bir ish kunida Oʻzbekiston Respublikasi Iqtisodiyot va moliya vazirligi huzuridagi budjetdan tashqari Pensiya jamgʻarmasiga (keyingi oʻrinlarda — Pensiya jamgʻarmasi) YIDXP orqali yuboradi.
13. Mahalliy mehnat organi tomonidan rasmiylashtirilgan taqdimnoma muddatidan oldin yoshga doir pensiya tayinlash uchun asos hisoblanadi.
14. Pensiya jamgʻarmasi:
mahalliy mehnat organi tomonidan yuborilgan taqdimnoma asosida ariza beruvchiga Vazirlar Mahkamasining 2022-yil 13-oktabrdagi 592-son qarori bilan tasdiqlangan Davlat pensiyalarini tayinlash va toʻlash tartibi toʻgʻrisidagi Nizomning (keyingi oʻrinlarida — Nizom) 116-bandiga muvofiq muddatidan oldin yoshga doir pensiya tayinlaydi;
“YAMMT” IDAKda mavjud mehnat staji maʼlumotlarini AT “Xalq banki”ning jamgʻarib boriladigan pensiya tizimidan, Soliq qoʻmitasining markazlashtirilgan elektron reyestridan olingan maʼlumotlar asosida tekshiradi hamda Oʻzbekiston Respublikasining “Fuqarolarning davlat pensiya taʼminoti toʻgʻrisida”gi Qonuni (keyingi oʻrinlarda — Qonun) 14-moddasiga muvofiq talab etiladigan ish staji tasdiqlanmagan taqdirda, muddatidan oldin yoshga doir pensiya tayinlashni rad etadi;
muddatidan oldin yoshga doir pensiya tayinlangani yoki rad etilgani toʻgʻrisida shu kunning oʻzida ariza beruvchini va tegishli mahalliy mehnat organini YIDXP orqali xabardor qiladi.
15. Ariza beruvchiga muddatidan oldin yoshga doir pensiya tayinlangan taqdirda, unga tayinlangan ishsizlik nafaqasini toʻlash keyingi oydan boshlab toʻxtatiladi.
16. Muddatidan oldin yoshga doir pensiya miqdori Qonun hamda Nizomda belgilangan tartib asosida hisoblab chiqariladi.
17. Ariza beruvchi davlat xizmatidan foydalanishni xizmat koʻrsatishning har qanday bosqichida rad etish huquqiga ega.
18. Davlat xizmati koʻrsatilgani uchun toʻlov undirilmaydi.
3-bob. Yakunlovchi qoidalar
19. Mahalliy mehnat organlari va Pensiya jamgʻarmasi davlat xizmatini koʻrsatish jarayonida ariza beruvchi toʻgʻrisidagi maʼlumotlarning maxfiyligini taʼminlaydi.
20. Ariza beruvchilar mahalliy mehnat organlari va Pensiya jamgʻarmasining xatti-harakatlari yoxud harakatsizligi yuzasidan yuqori turuvchi tashkilotlarga yoki sudga shikoyat qilishga haqli.
21. Ushbu Reglament talablarining buzilishida aybdor boʻlgan shaxslar qonunchilik hujjatlariga muvofiq javob beradi.
Mehnat shartnomasi alohida asoslarga koʻra bekor qilinganda, ishdan boʻshatilgan xodimlarga muddatidan oldin yoshga doir pensiya tayinlash uchun taqdimnoma rasmiylashtirish boʻyicha davlat xizmatini koʻrsatishning maʼmuriy reglamentiga 1-ILOVA
Mehnat shartnomasi alohida asoslarga koʻra bekor qilinganda, ishdan boʻshatilgan xodimlarga taqdimnoma rasmiylashtirish va muddatidan oldin yoshga doir pensiya tayinlash boʻyicha davlat xizmatini koʻrsatish
SXEMASI
Mehnat shartnomasi alohida asoslarga koʻra bekor qilinganda, ishdan boʻshatilgan xodimlarga muddatidan oldin yoshga doir pensiya tayinlash uchun taqdimnoma rasmiylashtirish boʻyicha davlat xizmatini koʻrsatishning maʼmuriy reglamentiga 2-ILOVA
Izoh.
* Mehnat staji maʼlumotlari toʻliq raqamlashmagan boʻlsa, mehnat daftarchasining nusxasi (PDF, PNG yoki JPEG formatda) ilova qilinadi.
** Mehnat shartnomasi alohida asoslarga koʻra bekor qilingani toʻgʻrisidagi buyruq nusxasi (PDF, PNG yoki JPEG formatda) ilova qilinadi.
Mehnat shartnomasi alohida asoslarga koʻra bekor qilinganda, ishdan boʻshatilgan xodimlarga muddatidan oldin yoshga doir pensiya tayinlash uchun taqdimnoma rasmiylashtirish boʻyicha davlat xizmatini koʻrsatishning maʼmuriy reglamentiga 3-ILOVA
Vazirlar Mahkamasining 2026-yil 28-sentabrdagi 519-son qaroriga 2-ILOVA
Mehnat shartnomasi alohida asoslarga koʻra bekor qilingan xodimlarga ish joyidan uchinchi oyga oʻrtacha oylik ish haqi toʻlash boʻyicha davlat xizmatini koʻrsatishning
MAʼMURIY REGLAMENTI
1-bob. Umumiy qoidalar
1. Ushbu Reglament Oʻzbekiston Respublikasi Mehnat kodeksining 100-moddasiga muvofiq mehnat shartnomasi alohida asoslarga koʻra bekor qilingan xodimlarga boʻshagan ish joyidan uchinchi oyga oʻrtacha oylik ish haqi toʻlash boʻyicha davlat xizmatini (keyingi oʻrinlarda — davlat xizmati) koʻrsatish tartibini belgilaydi.
2. Ushbu Reglamentda quyidagi asosiy tushunchalardan foydalaniladi:
mehnat shartnomasini alohida asoslarga koʻra bekor qilish — Oʻzbekiston Respublikasining Mehnat kodeksi 100-moddasida koʻrsatilgan asoslarga koʻra ishdan boʻshatish;
ariza beruvchi — mehnat shartnomasi Oʻzbekiston Respublikasi Mehnat kodeksining 100-moddasiga koʻrsatilgan asoslarga koʻra bekor qilingan shaxs;
mahalliy mehnat organlari — Oʻzbekiston Respublikasi Kambagʻallikni qisqartirish va bandlik vazirligining tuman (shahar) kambagʻallikni qisqartirish va bandlikka koʻmaklashish boʻlimlari.
3. Davlat xizmati Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali mahalliy mehnat organlari tomonidan ushbu Reglamentga 1-ilovadagi sxemaga muvofiq koʻrsatiladi.
4. Davlat xizmatidan faqat mehnat shartnomasi quyidagi asoslarga koʻra bekor qilinganlar foydalana oladi:
xodim yangi mehnat shartlari asosida ishlashni davom ettirishni rad etgani;
xodim ish beruvchi bilan birga ishlash uchun boshqa joyga koʻchishni rad etgani;
xodim sogʻligʻining holatiga koʻra tibbiy xulosaga muvofiq sogʻligʻining holati boʻyicha oʻziga qarshi koʻrsatma mavjud boʻlmagan boshqa ishga oʻtishni rad etgani yoki ish beruvchida tegishli ish mavjud emasligi;
texnologiyaning, ishlab chiqarish va mehnatni tashkil etishning oʻzgarishi sababli tashkilot xodimlarining soni yoki shtati oʻzgargani, ishlar (mahsulot, xizmatlar) hajmining qisqargani;
tashkilotning (uning alohida boʻlinmasining) oʻz taʼsischilari (ishtirokchilari) qaroriga koʻra tugatilgani yoxud taʼsis hujjatlari bilan shunga vakolatli boʻlgan yuridik shaxs organining qaroriga koʻra tugatilgani;
bajarayotgan ishiga malakasi yetarli emasligi oqibatida noloyiq ekani;
shu ishni ilgari bajarib kelgan xodimning ishga tiklangani;
sudning tashkilotni tugatish toʻgʻrisidagi qarori qonuniy kuchga kirgani sababli.
Ushbu huquq tashkilot rahbari, uning oʻrinbosarlari, bosh buxgalter, shuningdek, tashkilotda bosh buxgalter lavozimi mavjud boʻlmagan hollarda, bosh buxgalter vazifalarini amalga oshiruvchi xodimlarga nisbatan ham tatbiq etiladi.
2-bob. Davlat xizmatini koʻrsatish tartibi
5. Ariza beruvchi davlat xizmatidan foydalanish uchun mehnat shartnomasi alohida asoslarga koʻra bekor qilingan kundan soʻng oʻttiz kalendar kun ichida YIDXP orqali murojaat qilishi lozim.
6. Ariza beruvchi davlat xizmatidan foydalanish uchun ushbu Reglamentga 2-ilovadagi shaklga muvofiq soʻrovnomani toʻldiradi.
Bunda soʻrovnoma toʻldirish jarayonida:
ariza beruvchi toʻgʻrisidagi maʼlumotlar “Raqamli hukumat” tizimi idoralararo integrasiyalashuv platformasida avtomatik tarzda shakllanadi;
mehnat shartnomasi alohida asoslarga koʻra bekor qilingani toʻgʻrisidagi buyruq nusxasi (PDF, PNG yoki JPEG formatda) ilova qilinadi.
7. Ariza beruvchi soʻrovnomani toʻldirgandan soʻng maʼlumotlarning toʻgʻriligini tekshiradi. Bunda soʻrovnomani elektron raqamli imzo bilan tasdiqlash talab etilmaydi.
Toʻldirilgan soʻrovnoma YIDXP orqali avtomatik ravishda ariza beruvchining yashash joyidagi mahalliy mehnat organiga yuboriladi.
8. Mehnat shartnomasi alohida asoslarga koʻra bekor qilingan kundan soʻng oʻttiz kalendar kunlik muddat tugaganidan keyin yuborilgan murojaat koʻrib chiqilmaydi.
9. Mahalliy mehnat organi soʻrovnoma kelib tushgan kundan eʼtiboran bir ish kuni ichida ariza beruvchi bilan mehnat shartnomasi alohida asoslarga koʻra bekor qilingani toʻgʻrisidagi maʼlumotlar ish beruvchi tomonidan “Yagona milliy mehnat tizimi” idoralararo dasturiy-apparat kompleksiga kiritilganini tekshiradi.
Agar mehnat shartnomasi alohida asoslarga koʻra bekor qilingani toʻgʻrisidagi maʼlumotlar ish beruvchi tomonidan “Yagona milliy mehnat tizimi” idoralararo dasturiy-apparat kompleksiga kiritilmagan boʻlsa, mahalliy mehnat organi ish beruvchini Oʻzbekiston Respublikasi Mehnat kodeksining 166-moddasi talablarini bir ish kuni ichida bajarishi lozimligi toʻgʻrisida ogohlantiradi.
Ogohlantirishdan bir ish kuni oʻtgandan soʻng ham ish beruvchi tomonidan ariza beruvchi bilan mehnat shartnomasi alohida asoslarga koʻra bekor qilingani toʻgʻrisidagi maʼlumotlar bir ish kunida “Yagona milliy mehnat tizimi” idoralararo dasturiy-apparat kompleksiga kiritilmasa, Oʻzbekiston Respublikasining Maʼmuriy javobgarlik toʻgʻrisidagi kodeksining 49-moddasiga asosan ish beruvchiga nisbatan maʼmuriy jazo chorasi qoʻllanadi.
10. Ariza beruvchi tomonidan davlat xizmatidan foydalanish uchun maʼlumotlar va hujjatlar toʻliq taqdim etilmaganda, shuningdek, hujjatlarda notoʻgʻri yoki buzib koʻrsatilgan maʼlumotlar aniqlanganda, kamchiliklarni toʻliq koʻrsatgan holda ularni bartaraf etishi uchun besh ish kunidan iborat muddat beriladi va bu haqida ariza beruvchi shu kunning oʻzida YIDXP yoki soʻrovnomada koʻrsatilgan telefon raqami (elektron pochta manzili) orqali xabardor qilinadi.
11. Ariza beruvchi tomonidan davlat xizmatidan foydalanish uchun maʼlumotlar va hujjatlar toʻliq taqdim etilgan taqdirda, mahalliy mehnat organi ariza beruvchini ish qidirayotgan shaxs sifatida roʻyxatga oladi.
12. Mahalliy mehnat organi ariza beruvchiga u ish qidiruvchi shaxs sifatida roʻyxatga olingani toʻgʻrisida ushbu Reglamentga 3-ilovaga muvofiq rasmiylashtirilgan maʼlumotnomani YIDXP orqali yuboradi.
13. Ariza beruvchi mahalliy mehnat organi tomonidan berilgan maʼlumotnoma asosida uchinchi oy uchun ham avvalgi ish joyidan oʻrtacha oylik ish haqini olish huquqiga ega boʻladi.
14. Ariza beruvchi davlat xizmatidan foydalanishni xizmat koʻrsatishning har qanday bosqichida rad etish huquqiga ega.
15. Davlat xizmati koʻrsatilgani uchun toʻlov undirilmaydi.
3-bob. Yakunlovchi qoidalar
16. Mahalliy mehnat organlari ariza beruvchilarning elektron hisobini yuritadi va davlat xizmatini koʻrsatish jarayonida ariza beruvchi toʻgʻrisidagi maʼlumotlarning maxfiyligini taʼminlaydi.
17. Ariza beruvchilar mahalliy mehnat organlari xodimlarining xatti-harakatlari yoki harakatsizligi yuzasidan yuqori turuvchi tashkilotlarga yoxud sudga shikoyat qilishga haqli.
18. Ushbu Reglament talablarining buzilishida aybdor boʻlgan shaxslar qonunchilik hujjatlariga muvofiq javob beradi.
Mehnat shartnomasi alohida asoslarga koʻra bekor qilingan xodimlarga ish joyidan uchinchi oyga oʻrtacha oylik ish haqi toʻlash boʻyicha davlat xizmatini koʻrsatishning maʼmuriy reglamentiga 1-ILOVA
Mehnat shartnomasi alohida asoslarga koʻra bekor qilingan xodimlar boʻshagan ish joyidan uchinchi oyga oʻrtacha oylik ish haqi toʻlanishi uchun maʼlumotnoma olish boʻyicha davlat xizmatini koʻrsatish
SXEMASI
Mehnat shartnomasi alohida asoslarga koʻra bekor qilingan xodimlarga ish joyidan uchinchi oyga oʻrtacha oylik ish haqi toʻlash boʻyicha davlat xizmatini koʻrsatishning maʼmuriy reglamentiga 2-ILOVA
Izoh.
* Mehnat shartnomasi alohida asoslarga koʻra bekor qilingani toʻgʻrisidagi buyruq nusxasi (PDF, PNG yoki JPEG formatda) ilova qilinadi.
Mehnat shartnomasi alohida asoslarga koʻra bekor qilingan xodimlarga ish joyidan uchinchi oyga oʻrtacha oylik ish haqi toʻlash boʻyicha davlat xizmatini koʻrsatishning maʼmuriy reglamentiga 3-ILOVA