Iqtisodiy diplomatiya sohasida hamkorlik toʻgʻrisida

08.09.2026

Oʻzbekiston Respublikasi Tashqi ishlar vazirligi bilan Serbiya Respublikasi Tashqi ishlar vazirligi oʻrtasida

Anglashuv memorandumi

Oʻzbekiston Respublikasi Tashqi ishlar vazirligi va Serbiya Respublikasi Tashqi ishlar vazirligi, keyingi oʻrinlarda “Ishtirokchilar” deb ataluvchilar,

oʻz mamlakatlari oʻrtasidagi doʻstona munosabatlarga tayangan holda siyosiy hayrixohlikni amaliy iqtisodiy natijalarga aylantirishni istab,

oʻzlarining tashqi siyosat idoralari chet eldagi vakolatxonalari orqali savdo, investitsiyalar va biznes aloqalarini ragʻbatlantirishga salmoqli hissa qoʻsha olishini eʼtirof etib,

quyidagi oʻzaro anglashuvga erishdilar.

1-paragraf Maqsad

Ishtirokchilar Oʻzbekiston Respublikasi va Serbiya Respublikasi oʻrtasidagi savdo, investitsiya va biznes hamkorligini ragʻbatlantirish hamda oʻz tashqi siyosat idoralarining iqtisodiy yoʻnalishdagi faoliyatini kuchaytirish borasida birgalikda ish olib borish niyatini bildiradilar.

2-paragraf Hamkorlik yoʻnalishlari

Ishtirokchilar, xususan, quyidagi yoʻnalishlarda hamkorlik qilish niyatini bildiradilar:

oʻz mamlakatlarining iqtisodiyoti, investitsiya muhiti va biznes imkoniyatlari toʻgʻrisida axborot almashish;

savdo, investitsiya, transport va turizm aloqalarini ragʻbatlantirish;

biznes-forumlar, koʻrgazmalar, savdo yarmarkalari va biznes-missiyalarni qoʻllab-quvvatlash;

bir mamlakat kompaniyalariga boshqa mamlakatda hamkorlar topishda koʻmaklashish;

iqtisodiy masalalar boʻyicha faoliyat yurituvchi diplomatlarni tayyorlash va ular oʻrtasida tajriba almashish;

Ishtirokchilar kelishib olishlari mumkin boʻlgan har qanday boshqa yoʻnalish.

3-paragraf Ishchi tartiblar

3.1. Har bir Ishtirokchi oʻz vazirligida aloqa uchun masʼul shaxsni belgilaydi va bu haqda boshqa Ishtirokchini diplomatik kanallar orqali xabardor qiladi.

3.2. Aloqa uchun masʼul shaxslar bevosita ishchi aloqada boʻladilar hamda iqtisodiy yoki tijorat xarakteridagi soʻrovlar boʻyicha bir-biriga koʻmaklashadilar.

3.3. Ishtirokchilar iqtisodiy diplomatiya boʻyicha maslahatlashuvlarni yiliga bir marta, navbatma-navbat Toshkent va Belgradda yoki videokonferensaloqa shaklida oʻtkazish niyatidalar. Mazkur maslahatlashuvlar doirasida ular keyingi yil uchun qoʻshma tadbirlarning qisqacha rejasini kelishib olishlari mumkin.

4-paragraf Axborot

4.1. Mazkur Memorandum doirasida uzatilgan va foydalanish cheklangan deb belgilangan axborot uni taqdim etgan Ishtirokchining yozma roziligisiz uchinchi tomonga uzatilmaydi.

4.2. Agar axborotni taqdim etish oʻz milliy qonunchiligiga zid boʻlsa, hech bir Ishtirokchidan uni taqdim etishi kutilmaydi.

5-paragraf Xarajatlar

Mazkur Memorandum doirasidagi tadbirlar har bir Ishtirokchida mavjud boʻlgan mablagʻlarga bogʻliq. Mazkur Memorandum hech qanday moliyaviy majburiyat yuzaga keltirmaydi.

6-paragraf Mazkur Memorandumning maqomi

6.1. Mazkur Memorandum faqat Ishtirokchilarning niyatlarini qayd etadi. U xalqaro shartnoma hisoblanmaydi hamda xalqaro yoki milliy huquqqa muvofiq hech qanday huquq yoki majburiyat yuzaga keltirmaydi.

6.2. Mazkur Memorandum Oʻzbekiston Respublikasi va Serbiya Respublikasining boshqa xalqaro bitimlar boʻyicha huquq va majburiyatlariga taʼsir etmaydi.

7-paragraf Nizolarni hal etish

Mazkur Memorandum doirasida yuzaga keladigan har qanday nizolar Ishtirokchilar oʻrtasidagi maslahatlashuvlar yoʻli bilan hal etiladi va hech qanday sudga, tribunalga yoki uchinchi tomonga oshirilmaydi.

8-band Amal qilishi, oʻzgartirishlar va toʻxtatilishi

8.1. Mazkur Memorandum imzolangan sanadan boshlab amal qila boshlaydi va besh yil davomida amalda boʻladi. Soʻngra u oʻz-oʻzidan navbatdagi besh yillik muddatlarga uzaytiriladi.

8.2. Unga har qanday vaqtda ikkala Ishtirokchining yozma roziligi bilan oʻzgartirish kiritilishi mumkin.

8.3. Har bir Ishtirokchi boshqa Ishtirokchiga diplomatik kanallar orqali yozma xabarnoma yuborish yoʻli bilan mazkur Memorandum amalini toʻxtatishi mumkin. Toʻxtatilish xabarnoma olingandan keyin olti oy oʻtgach amalga oshadi.

Belgrad shahrida, 2026-yil 8-sentabr kuni, ikki nusxada, har biri oʻzbek, serb va ingliz tillarida imzolandi. Talqin qilishda har qanday kelishmovchilik yuzaga kelgan taqdirda, Ishtirokchilar ingliz tilidagi matnga murojaat qiladilar.

(imzolar)