Oʻzbekiston Respublikasi viloyatlari, shaharlari va tumanlari hokimliklari apparatlarida ish yuritish boʻyicha yoʻriqnoma toʻgʻrisida (424-son)

18.08.1994

Oʻzbekiston Respublikasi Vazirlar Mahkamasining

qarori

Vazirlar Mahkamasi qaror qiladi:

1. Oʻzbekiston Respublikasi viloyatlari, shaharlari va tumanlari hokimliklari apparatlarida ish yuritish boʻyicha Yoʻriqnoma tasdiqlansin (ilova qilinmoqda).

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ushbu Yoʻriqnomani hokimliklar apparati xodimlarining oʻrganishlarini tashkil etsinlar hamda amaliy ishda ularga qatʼiy rioya qilinishini taʼminlasinlar.

3. Oʻzbekiston Respublikasi Vazirlar Mahkamasi huzuridagi Bosh arxiv boshqarmasi Yoʻriqnomani joriy qilishda Qoraqalpogʻiston Respublikasi Vazirlar Kengashiga, viloyatlar, shaharlar va tumanlar hokimliklariga tegishli tashkiliy uslubiy yordam koʻrsatsin.

4. Mazkur qarorning bajarilishini nazorat qilish Vazirlar Mahkamasining Hududiy-tashkiliy va Umumiy boʻlimlariga yuklansin.

5. Oʻzbekiston SSR Ministrlar Sovetining 1985-yil 27-fevraldagi 110-son qarori oʻz kuchini yoʻqotgan deb hisoblansin.

Oʻzbekiston Respublikasining Bosh vaziri A. MUTALOV

Toshkent sh.,

1994-yil 18-avgust,

424-son

Vazirlar Mahkamasining 1994-yil 18-avgustdagi 424-son qarori bilan TASDIQLANGAN

Oʻzbekiston Respublikasi viloyat, shahar va tumanlar hokimliklari apparatlarida ish yuritish boʻyicha

YOʻRIQNOMA

1. Umumiy qoidalar

1.1. Mazkur Yoʻriqnoma Oʻzbekiston Respublikasi viloyat, shahar va tumanlar hokimliklari apparatlarida hujjatlarni tayyorlash hamda ular bilan ishlash tartibini belgilaydi.

Maxfiy hujjatlar va “Xizmatda foydalanish uchun” ustxatli hujjatlar bilan ishlash tartibi maxsus yoʻriqnomalar bilan belgilanadi.

Fuqarolarning takliflari, arizalari va shikoyatlari boʻyicha ish yuritish umumiy ish yuritishdan alohida holda yuritiladi.

1.2. Hokimlar zimmasiga ish yuritishni kompyuterlashtirish, ratsionalizatsiyalash va mexanizatsiyalash hisobiga boshqaruvchilik mehnatining unumdorligini oshirishga va uni arzonlashtirishga har tomonlama yordam berish vazifasi yuklanadi,

Hokimlikning butun apparati boʻyicha ish yuritishga rahbarlik qilish va bu ishning ahvoli uchun masʼuliyat hokimning birinchi oʻrinbosari zimmasiga yuklanadi.

Apparat boʻlinmalarida ish yuritishni tashkil etish va toʻgʻri yuritilishi uchun javobgarlik hokimlik umumiy boʻlimining mudiri, boʻlinmalarda hujjatlarning saqlanishi va ular bilan ishlash boʻyicha javobgarlik esa tegishli boʻlim hamda xizmatlar rahbarlari zimmasiga yuklanadi.

1.3. Hokimlikning umumiy boʻlimi rahbariyat koʻrsatmasiga binoan hokimlik apparati xodimlarini Qonunlar, Oliy Majlis qarorlari va boshqa hujjatlari, Oʻzbekiston Respublikasi Prezidenti Farmonlari, qarorlari va farmoyishlari, Oʻzbekiston Respublikasi Vazirlar Mahkamasining qarorlari va farmoyishlari hamda kelgan boshqa hujjatlar bilan tanishtiradi, yangi qabul qilingan xodimlarni hokimlik tuzilmasi, Ish yuritish boʻyicha yoʻriqnoma, ichki mehnat tartibi qoidalari va hokimlik faoliyatini tartibga soluvchi boshqa hujjatlar bilan tanishtiradi.

2. Boshqaruvchilik faoliyatini hujjatlashtirish

2.1. Amaldagi qonunchilikka va hokimning vakolatiga muvofiq hokimlik apparatida quyidagi boshqaruvchilik hujjatlari tayyorlanadi: hokimning qaror va farmoyishlari, xalq deputatlari viloyat, shahar va tuman Kengashlarining qarorlari, hokim va uning oʻrinbosarlari topshiriqlari.

2.2. Masalalarni xalq deputatlari Kengashlari sessiyalarida va Kengashlar komissiyalari majlislarida, hokimlik rahbariyati yigʻilishlarida muhokama qilish natijalari bayonnomalarda qayd etiladi.

2.3. Yuqori organlar, ijro etuvchi apparat boʻlimlari va boshqa tashkilotlar bilan xizmat aloqalari xatlar yozish yoʻli bilan amalga oshiriladi. Axborotni shoshilinch yuborish zarur boʻlgan hollarda telefonogrammalar yoki telegrammalar tuziladi.

2.4. Viloyat, shahar, tuman hokimi qaror va farmoyishlarni, xalq deputatlari Kengashi qarorlarini, majlis bayonnomalarini, yuqori tashkilotlarga yuboriladigan xizmat xatlarini imzolaydi. Hokimning qarorlari va farmoyishlari ilovalariga ijro etuvchi tomonidan viza qoʻyiladi hamda tegishli boʻlim va xizmatlar rahbarlari tomonidan imzolanadi.

Xalq deputatlari Kengashi sessiyalarining bayonnomalari hokim va sessiya kotibi tomonidan imzolanadi.

Yozma axborotlarga, maʼlumotnomalarga axborot va maʼlumotnoma tusidagi boshqa hujjatlarga ijro etuvchi tomonidan viza qoʻyiladi hamda ular tegishli boʻlim va xizmatlar rahbarlari tomonidan imzolanadi.

3. Hujjatlarni rasmiylashtirish

3.1. Hujjatning har bir turi (qaror, farmoyish, bayonnoma, xat, yozma axborot, maʼlumotnoma va shu kabilar) qatʼiy belgilangan rekvizitlar majmuiga (tarkibiy qismlarga) hamda ularni joylashtirishning standart tartibiga ega boʻlishi kerak.

3.2. Quyidagilar hujjatlarni tuzish va rasmiylashtirishdagi majburiy talablar hisoblanadi: hokimlik kodini koʻrsatish*”; muallifni koʻrsatish (hokimlik, Kengashning nomi odatda hujjat blankida koʻrsatiladi); hujjat turini koʻrsatish; matn sarlavhasini tuzish; manzilni koʻrsatish va sana qoʻyish; hujjatni indekslash; hujjatning kelishilganligi toʻgʻrisida belgilar — vizalar qoʻyish; hujjatni tasdiqlash (imzolash, tasdiqlash, muhr bosish); hujjatning ijro etilganligi va uning yigʻmajildga qoʻyilganligi toʻgʻrisida belgi.

*Korxona va tashkilotlarning umumiy klassifikatoriga muvofiq hokimlik kodi toʻgʻrisidagi maʼlumotlarni “Oʻzistiqbolstat” davlat qoʻmitasining mahalliy boshqarmalaridan olish mumkin.

3.3. Hujjatlarni tuzishda A4 (210X297 mm) va A5 (148X210 mm) bichimdagi blanklardan foydalaniladi.

Hujjat blankida “Tashkiliy-koʻrsatma hujjatlari tizimi. Hujjatlarni rasmiylashtirishga talablar” 6.38 — 90 raqamli davlat standartiga muvofiq rekvizitlar tarkibi va ularni joylashtirish tartibi boʻlishi kerak.

Blanklarning ikkita turi: xatlar blanki va koʻrsatma hujjatlarni, bayonnomalar va shu kabilarni rasmiylashtirish uchun umumiy blank bosmaxona usulida tayyorlanadi.

Hujjatlarning aniq turlari blanklarini tayyorlashga, agar bunday hujjatlar bir yilda 200 dan koʻproq tuziladigan boʻlsa, yoʻl qoʻyiladi.

Qaror va farmoyishlarning blanklari rekvizitlarni varaqning eniga, boshqa xizmat hujjatlariniki esa burchakda joylashtirilishini hisobga olib tayyorlanadi.

Blanklarda Oʻzbekiston Respublikasining davlat gerbi aks ettiriladi.

Hujjatlar blanklarida chetki boʻsh joylar boʻlishi kerak: chap tomonda — 20 mm; yuqorida — kamida 10 mm; oʻng va pastda kamida — 8 mm.

3.4. Ikki va undan ortiq betlarda rasmiylashtiriladigan hujjatlarda ikkinchi va undan keyingi betlar raqamlanishi kerak. Betlar raqamlari varaqning yuqorigi boʻsh joyi oʻrtasiga “bet” (b) soʻzisiz va tinish belgilarsiz arab raqamlari bilan qoʻyiladi.

3.5. Hujjat turining nomi har bir hujjatda koʻrsatilishi kerak (xatlar bundan mustasno).

3.6. Hujjat sarlavhasi qisqa boʻlishi va matn mazmunini aniq ifodalashi kerak. Sarlavhani hujjat nomi bilan muvofiqlashtirib shakllantirish tavsiya etiladi; masalan: qaror (nima toʻgʻrisida) “Korxonani roʻyxatga olish toʻgʻrisida”; bayonnoma (nimaning) “Kengash komissiyasi majlisining...”

Sarlavha varaqning chap qismiga yoziladi. Farmoyishlar, telegrammalar, xabarnomalarda hamda matni A5 blanklarga yoziladigan hujjatlarda sarlavha qoʻyilmaydi.

3.7. Hujjatlar tashkilotlarga, tarkibiy boʻlinmalarga yoki aniq mansabdor shaxsga yoʻllanadi. Tashkilot va tarkibiy boʻlinma nomi bosh kelishikda koʻrsatiladi, masalan:

Fargʻona neftni qayta ishlash zavodi

Taʼminot va sotish boʻlimi

Katta iqtisodchi E. Y. Ergashevga

Hujjat tashkilot rahbariga yoʻllanganda tashkilot nomi hujjatni oluvchi lavozimi nomining tarkibiga kiradi, masalan:

Toshkent aloqa

politexnikumi direktori

E. I. NURITDINOVGA

Agar hujjat bir necha bir turdagi tashkilotlarga yoʻllansa, u holda ularni umumlashtirib koʻrsatish lozim:

Toshkent shahar Chilonzor tumani korxonalarining direktorlariga va tashkilotlarining rahbarlariga

Hujjatda toʻrttadan ortiq oluvchi koʻrsatilmasligi kerak: ikkinchi, uchinchi, toʻrtinchi oluvchi nomi oldida “Nusxa” soʻzi koʻrsatilmaydi.

Hujjat toʻrttadan ortiq manzilga yuboriladigan hollarda joʻnatish roʻyxati tuziladi va har bir hujjatda faqat bitta oluvchining nomi koʻrsatiladi.

Agar hujjat alohida shaxsga yuborilsa, u holda avval oluvchining pochta manzili, soʻngra ismi va otasi ismining bosh harflari, familiyasi koʻrsatiladi, masalan:

700114, Toshkent, Yunusobod, 19-daha, 6-uy, 3-xonadon. A. A. Yusupovga

Hukumat tashkilotlari va doimiy korrespondentlarga yuboriladigan hujjatlarda pochta manzili yozilmaydi.

3.8. Sanani rasmiylashtirishda arab raqamlaridan foydalaniladi, ular bilan yilning oxirgi ikki raqami, kun, oyning tartib raqami koʻrsatiladi, masalan: 94.09.01.

Moliyaviy tusdagi maʼlumotlarga ega boʻlgan hujjatlar matnlarida sanalarni rasmiylashtirishning soʻzraqamli usulidan foydalanishga yoʻl qoʻyiladi: 1994-yil 15-noyabr.

3.9. Hujjat loyihasini ichki kelishish (tarkibiy boʻlinmalar, mansabdor shaxslar bilan) viza bilan rasmiylashtiriladi. Viza shaxsiy imzoni, uning maʼnosini, yaʼni ismi va otasi ismining bosh harflari hamda familiyani, viza qoʻyilgan sana yozuvlarini oʻz ichiga oladi. Zarur hollarda viza qoʻygan shaxsning lavozimi koʻrsatilishi mumkin.

Hujjatga oid fikrlar va unga qoʻshimchalar alohida varaqda bayon etiladi. Masalan:

Umumiy boʻlim mudiri (shaxsiy imzo) S. M. Mirzayev

Fikrlar ilova qilinadi

94.24.05.

Qarorlar, farmoyishlarning birinchi nusxasiga viza qoʻyiladi, boshqa hujjatlarda vizalar hokimlik apparatida qoladigan nusxalarning old tomoniga qoʻyiladi.

Vizalar “imzo” rekvizitidan pastga yoki hujjat oxirgi varagʻining orqa tomoniga qoʻyiladi.

3.10 Tashqi kelishib olish (boshqa tashkilotlar bilan) kelishuv ustxati, kelishuv maʼlumotnomasi yoki qaror loyihasining kollegial organ yigʻilishidagi muhokamasi bayonnomasini taqdim qilgan holda rasmiylashtiriladi.

Kelishuv ustxati “imzo” rekviziti tagiga yoki hujjat oxirgi varagʻining orqa tomoniga qoʻyiladi va “Kelishilgan” soʻzi, hujjat kelishilgan shaxs lavozimining nomi (tashkilot nomi ham), shaxsiy imzo, uning maʼnosi, sanadan iborat boʻladi, masalan:

Kelishilgan

Fargʻona viloyat hokimligi

moliya boʻlimining mudiri

(shaxsiy imzo, ismi va otasi ismining bosh harflari,

familiyasi)

94.10.05

Agar kelishuv kollegial organ bilan yoki xat orqali amalga oshirilgan boʻlsa, u holda kelishuv ustxati quyidagi shaklda boʻladi:

Kelishilgan

Kasaba uyushmasi qoʻmitasining

94.10.04 dagi yigʻilishining

25-son bayonnomasi

yoki

Kelishilgan

Oʻzbekiston Respublikasi Moliya

vazirligining 94.15.10 dagi

01 — 4/135-son xati

3.11. “Imzo” rekviziti tarkibiga: hujjatni imzolayotgan shaxs lavozimining nomi (agar hujjatlar blankda rasmiylashtirilmayotgan boʻlsa toʻliq va blankda tuzilgan hujjatlarda qisqartirilgan holda) shaxsiy imzo va uning maʼnosi kiradi, masalan:

Toshkent viloyati hokimi (shaxsiy imzo, ismi va otasi ismining bosh harflari va familiyasi)

Hujjat bir necha mansabdor shaxslar tomonidan imzolansa, ularning imzolari egallab turgan lavozimlarga muvofiq izchillikda ketma-ket joylashtiriladi.

Hujjat teng lavozimli bir necha shaxs tomonidan imzolansa, ularning imzolari bir xil darajada joylashtiriladi.

Hokim uzoq vaqt boʻlmagan hollarda hujjatlarni uning birinchi oʻrinbosari yoki hokim vazifasini bajarish zimmasiga yuklangan masʼul xodim imzolaydi. Bunda hujjatni imzolagan shaxsning haqiqiy lavozimi va uning familiyasi albatta koʻrsatiladi. Hujjatni “uchun” koʻmakchisini qoʻllab yoki lavozim nomi oldiga qiya chiziq chizib imzolashga yoʻl qoʻyilmaydi.

3.12. Hokim yoki uning oʻrinbosarlari tomonidan tasdiqlanishi lozim boʻlgan hujjat tasdiqlash ustxatiga ega boʻlishi kerak, u “TASDIQLAYMAN” soʻzi, hujjatni tasdiqlayotgan shaxs lavozimining nomi, shaxsiy imzo, ismi va otasi ismining bosh harflari, familiya va sanadan iborat boʻladi, masalan:

Tasdiqlayman

Toshkent viloyati hokimi —

Imzo (imzoning yoyilmasi

ismi va otasi ismining bosh harflari,

familiyasi)

94.17.05.

Agar hujjat kollegial organ tomonidan imzolansa, u holda tasdiqlash ustxati “TASDIQLANGAN” soʻzi, hujjatning bosh kelishikdagi nomi, uning sanasi va raqamidan iborat boʻladi, masalan:

Chirchiq shahar Kengashi

sessiyasining 94.20.04 dagi 8-son bayonnomasi bilan

TASDIQLANGAN

Tasdiqlash ustxati hujjatning yuqoridagi oʻng burchagiga joylashtiriladi.

3.13. Jismoniy va yuridik shaxslarning huquqlarini tasdiqlaydigan, pul mablagʻlari va moddiy boyliklarni sarflash hollarini qayd etadigan, shuningdek, ilova etilayotgan roʻyxatda (1-ilova) nazarda tutilgan hujjatlarda hokim yoki uning oʻrinbosarlari imzosi gerbli muhr bilan tasdiqlanadi. Muhr izi hujjatni imzolagan shaxs lavozimi nomining bir qismini qamrab olishi kerak. Muhr saqlanadigan joy va uni saqlash uchun masʼul shaxs hokim tomonidan belgilanadi.

3.14. Hujjatni ijro etish boʻyicha topshiriqlar hokim, uning oʻrinbosarlari yoki tarkibiy boʻlinmalar rahbarlarining rezolyutsiyasi (koʻrsatmasi) shaklida beriladi. Rezolyutsiya tarkibiga quyidagi elementlar albatta kiritiladi: ijro etuvchi (yoki ijro etuvchilar) ning familiyasi; topshiriqning mazmuni; ijro etish muddati (zarur boʻlgan hollarda); rahbarning shaxsiy imzosi; rezolyutsiya sanasi. Masalan:

B. M. Mirzaboyevga

94.05.12 gacha tuman budjeti loyihasini

tayyorlashingizni soʻrayman.

(imzo) R. OBIDOV

94.03.11.

3.15. Hokimlikda hujjatning oʻtishi unga tegishli belgilarni qoʻygan holda amalga oshiriladi.

Hujjatning kelib tushganligi toʻgʻrisidagi belgi (roʻyxatga olish) belgisi hujjat birinchi varagʻining quyidagi oʻng qismiga qoʻyiladi.

Hujjatning nazoratga olinganligi toʻgʻrisidagi belgi hujjat birinchi varagʻining chap tomonidagi boʻsh joyga qoʻyiladi va “Nazorat” soʻzi yoki “N” harfi bilan belgilanadi.

Hujjatlarning ijro etilganligi va uning yigʻmajildga qoʻyilganligi toʻgʻrisidagi belgida quyidagi maʼlumotlar boʻlishi kerak: agar ijro etilganligini tasdiqlovchi hujjat yoʻq boʻlsa, ijro etilganligi toʻgʻrisida qisqacha maʼlumot, bunday hujjat bor boʻlsa, uning sanasi va raqami; “Yigʻmajildga” soʻzi, yigʻmajildlar nomenklaturasi boʻyicha mazkur hujjat saqlanadigan yigʻmajild raqami; hujjat yigʻmajildga qoʻyish uchun yoʻllangan sana; ijro etuvchining imzosi.

“Yigʻmajildga” belgisi hujjat boʻyicha ishning yakunlanganligidan dalolat beradi.

Har bir hujjatda bevosita ijro etuvchi toʻgʻrisida belgi boʻlishi kerak. Belgi hujjatni ijro etuvchi (tuzuvchi) ning hujjatning barcha nusxalari oxirgi varagʻining old tomonidagi pastki chap burchakka yoki agar joy qolmagan boʻlsa, uning orqa tomoniga yozilgan familiyasi va xizmat telefoni raqami kabi maʼlumotlarni qamrab olishi kerak, masalan:

Hoshimov 77 11 68.

Maʼlumotlarning mashinaga oʻtkazilganligi toʻgʻrisidagi belgi quyidagi yozuv orqali ifodalanadi:

“Axborot mashinaga koʻchirildi”, maʼlumotlarni mashinaga oʻtkazish uchun masʼul shaxs imzosi va oʻtkazish sanasi.

3.16 Agar hujjatlarning ilovalari boʻlsa, u holda ilovalarning borligi toʻgʻrisidagi belgilar quyidagicha ifodalanadi.

Qarorlar, farmoyishlarda ilovalarning borligi toʻgʻrisidagi maʼlumotlar matnda koʻrsatiladi, masalan: “Viloyat budjetining loyihasi 1-ilovada koʻrsatilgan shaklda ishlab chiqilsin va tasdiqlash uchun taqdim etilsin”.

Koʻrsatma beruvchi hujjatlarning ilovalari hujjatning birinchi varagʻi yuqoridagi oʻng burchagida quyidagi shakldagi belgiga ega boʻlishi kerak:

Xalq deputatlari Toshkent viloyati Kengashi sessiyasining

94.12.04 dagi 8/2-son qaroriga ilova

Qarorga bir nechta ilova boʻlsa, ularga “son” soʻzini yozmasdan tartib raqamlari qoʻyiladi (1-ilova, 2-ilova va shu kabilar).

Rejalar, hisobotlar, bayonnomalar, xatlar va shu kabilarga ilovalarning borligi toʻgʻrisidagi maʼlumot hujjat matnidan keyin imzodan oldin koʻrsatiladi.

Agar hujjat toʻliq nomi matnda qayd etilgan ilovaga ega boʻlsa, ilovaning borligi toʻgʻrisidagi belgi quyidagicha shaklda beriladi:

Ilova: 8 bet, 1 nusxada.

Agar hujjat nomi matnda koʻrsatilmagan ilovalarga ega boʻlsa, ularning nomi har bir ilovadagi betlar soni va necha nusxadaligini koʻrsatib, sanab oʻtilishi kerak, masalan:

Ilovalar: 1. 1995-yilda foydalanishga topshirilishi lozim boʻlgan obyektlar roʻyxati, 2 varaq, 1 nusxa.

2. Etishmayotgan uskunalar roʻyxati, 3 varaq, 1 nusxa.

Agar hujjatga ilovasi bor boʻlgan boshqa hujjat ilova qilinsa, ilovaning borligi quyidagi shaklda rasmiylashtiriladi:

Ilova: Toshkent viloyat hokimligi moliya boʻlimining 94.15.03 dagi 4 — 1/202-son xati va unga ilova, jami 16 varaq, 1 nusxada.

Agar ilova hujjatda koʻrsatilgan barcha manzillarga yuborilmaydigan boʻlsa, ilova borligi toʻgʻrisidagi belgi quyidagi shaklda beriladi.

Ilova: 5 varaq, 1 nusxada, birinchi manzilga.

Agar ilova broshyuralangan boʻlsa varaqlar soni koʻrsatilmaydi.

3.17. Hujjatning nusxasi hujjat barcha rekvizitlarining qayta aks ettirilishi, koʻchirma esa hujjat bir qismining nusxasidir.

Hujjatlarning nusxalari (koʻchirmalari) umumiy boʻlim mudirining ruxsati bilan tayyorlanadi va beriladi. Umumiy boʻlim faqat hokimlik apparatida tayyorlanadigan hujjatlarning nusxalarinigina berishi mumkin.

Xodimlarning shaxsiy hujjatlar yigʻmajildlarini tuzishda boshqa tashkilotlar tomonidan berilgan hujjatlar hamda tegishli masalalarni hal qilishda zarur boʻlgan hujjatlar (diplomlar, tugʻilganlik haqidagi guvohnomalar va shu kabilar) dan nusxalar va koʻchirmalar tayyorlashga ruxsat etiladi.

Hujjatning nusxasi (koʻchirmasi) hokimlikning umumiy blankida qayta aks ettiriladi va ularning asl nusxaga muvofiqligini tasdiqlovchi mansabdor shaxsning imzosi bilan tasdiqlanadi.

Agar nusxa blankda emas, balki hujjatning blankda tayyorlangan asl nusxasidan koʻchirilayotgan boʻlsa, undan nusxa olishda asl nusxa blankidagi matn toʻliq qayta ifodalanadi. Hujjat nusxasi birinchi varagʻining yuqoridagi oʻng burchagiga “Nusxa” belgisi qoʻyiladi.

Tasdiqlovchi imzo quyidagi shaklda boʻladi:

Toʻgʻri

Umumiy boʻlim inspektori Imzo E. M. Musayeva.

94.25.11.

Tasdiqlovchi yozuv “imzo” rekvizitidan pastroqqa qoʻyiladi.

Hujjat nusxasi (koʻchirmasi) boshqa tashkilotlarga yuborilganda yoki alohida shaxslar qoʻliga berilganda tasdiqlovchi yozuv muhr bilan tasdiqlanadi.

3.18. Hokimliklarda blanklarning saqlanishi hamda hisobini taʼminlash maqsadida har bir tur (qaror, farmoyish, xat) boʻyicha barcha blanklarga tartib raqamlari qoʻyilgan boʻlishi kerak. Raqam blankning orqa tomoniga, yuqoridagi oʻng burchakka qoʻyiladi.

4. Xalq deputatlari Kengashlari sessiyalari, ularning doimiy va vaqtinchalik komissiyalari majlislari bayonnomalarini rasmiylashtirish

4.1. Sessiyalar, doimiy va vaqtinchalik komissiyalar majlislarining hujjatlari hokimlik apparatining tegishli boʻlim va xizmatlari tomonidan tuziladi, soʻngra chiqarish va keyinchalik saqlash maqsadida bayonnomalarni rasmiylashtirish uchun hokimlikning umumiy boʻlimiga topshiriladi.

4.2. Xalq deputatlari Kengashi sessiyasi bayonnomasini rasmiylashtirish

4.2.1. Sessiya ish boshlangan sana bayonnoma sanasi hisoblanadi. Sessiyaning tartib raqami va chaqiriq raqami bayonnoma tartib raqamidir, masalan: 12/13. “Kengash sessiyasi” bayonnoma sarlavhasi hisoblanadi.

4.2.2. Bayonnoma matni kirish va asosiy qismlardan iborat boʻladi. Bayonnomaning kirish qismida Kengash deputatlarining umumiy soni va sessiya ishida ishtirok etayotgan deputatlar soni, taklif etilgan mansabdor shaxslarning umumiy soni koʻrsatiladi. Bayonnomaga deputatlarning familiyalari yozilgan saylov okrugining nomi va raqami koʻrsatilgan roʻyxatlari, shuningdek, taklif etilgan shaxslar roʻyxati ular vakili boʻlib kelgan muassasalarda egallab turgan lavozimlari koʻrsatilgan holda ilova qilinadi.

Bayonnomada sessiyani ochgan deputatning ismi, otasining ismi, familiyasi, shuningdek, sessiya kotibi deputatlardan qaysi birining taklifiga muvofiq saylanganligi, Kengash sessiyasi kotibining ismi, otasining ismi, familiyasi, saylov okrugi, sessiyada muhokama etilishi lozim boʻlgan masalalar sanab oʻtilgan kun tartibi, asosiy va qoʻshimcha maʼruzachilarning lavozimlari, ismlari, otasining ismlari, familiyalari, reglament koʻrsatiladi.

Bayonnomaning asosiy qismi kun tartibi bandlariga binoan boʻlimlarga ajratiladi. Har bir boʻlim: eshitildi — soʻzga chiqdilar — qaror qilindi sxemasi boʻyicha yoziladi (2-ilova).

Qaror mazmuni bayonnomada yozilmaydi. Agar qaror qabul qilingan boʻlsa, bayonnomaga: “Qaror loyihasi qabul qilindi” deb yoziladi. Agar loyiha puxta ishlashni talab qilsa u holda: “Qaror loyihasi kiritilgan oʻzgartirish va qoʻshimchalar bilan asosan qabul qilindi. Loyihaning yakuniy tahririga topshirilsin yoki “Qaror loyihasini koʻrib chiqishgacha qoldirilsin”, “Qabul qilinmasin”, “Muhokama bilan cheklanilsin” soʻzlari yoziladi.

4.2.3. Ovoz berish jarayoni xatboshidan aks ettiriladi — deputatlardan nechtasi maʼqullaganligi, qarshi chiqqanligi yoki betaraf qolganligi koʻrsatiladi. Agar barcha deputatlar maʼqullagan boʻlsa, bir ovozdan qabul qilinganligi yozib qoʻyiladi.

Agar sessiya jarayoni stenografiya qilingan boʻlsa, bayonnomaga mazmuni yozilgan stenogramma ilova qilinadi.

4.2.4. Sessiya bayonnomasi koʻpi bilan 10 kun muddatda rasmiylishtirilishi va imzolanishi kerak.

4.3. Xalq deputatlari Kengashi doimiy va vaqtincha komissiyalari majlislarining bayonnomalari 3-ilovaga muvofiq rasmiylashtiriladi.

4.3.1. Majlis sanasi bayonnoma sanasi hisoblanadi.

4.3.2. Yil davomida oʻtkazilgan majlislarning tartib raqami bayonnoma raqami hisoblanadi.

4.3.3. Bayonnomaning kirish qismida: Kengash raisi (hokim) ning, komissiya kotibining ismi, otasining ismi, familiyasi, qatnashuvchilar tarkibi, kun tartibi koʻrsatiladi.

4.3.4. Bayonnomaning asosiy qismi: eshitildi — soʻzga chiqdilar — qaror qilindi sxemasi boʻyicha yoziladi.

Qaror bayonnoma matniga yoziladi.

4.3.5. Nutqlar bayonnomaga qisqacha shaklda yozilishi mumkin.

5. Xalq deputatlari Kengashlari qarorlarini, hokimning qaror va farmoyishlarini tuzish hamda rasmiylashtirish (4, 5-ilovalar)

5.1. Qaror va farmoyishlar loyihalari puxta tahrir qilingan hamda toʻgʻrilangan, belgilangan shakldagi blanklarga mashinkada yozilgan boʻlishi kerak. Qarorlarning hajmi, odatda, mashinkada yozilgan 3 betdan, xalq xoʻjaligining muhim masalalari boʻyicha esa 5 betdan oshmasligi kerak.

5.2. Qarorlar sarlavhasi qisqa, asosiy mazmunga mos boʻlishi va “Nima toʻgʻrisida” degan savolga javob berishi kerak.

5.3. Kengashlar qarorlarining va hokim qarorlarining matni qayd etuvchi hamda koʻrsatma beruvchi qismlardan iborat boʻladi.

Qayd etuvchi qismda qarorni qabul qilishdan maqsad yoki unga sabab boʻlgan asoslar bayon qilinadi. Unda koʻrib chiqilayotgan sohada erishilgan muvaffaqiyatlar qayd etiladi va kamchiliklar tanqidiy baholanadi. Qayd etuvchi qism, shuningdek, qarorni qabul qilish uchun asos boʻlgan yuqori organning huquqiy hujjatiga ishoralardan iborat boʻlishi mumkin. Ularda huquqiy hujjatning, uni chiqargan organ (muassasa) ning nomi, sanasi, raqami, sarlavhasi koʻrsatiladi.

Agar berilayotgan koʻrsatmalar tushuntirishlarga muhtoj boʻlmasa, qayd etuvchi qism boʻlmasligi ham mumkin. Bu holda qaror koʻrsatma beruvchi qismdan boshlanadi.

5.4. Qarorning koʻrsatma qismida Kengash nomi koʻrsatiladi va “Qaror qildi” soʻzlari, agar hokimning qarori boʻlsa “Qaror qilaman” soʻzlari yoziladi.

Koʻrsatma beruvchi qism arab raqamlari bilan belgilanadigan band va kichik bandlarga boʻlinishi mumkin.

Agar bandda topshiriq boʻlsa, u quyidagi sxema boʻyicha tuziladi: kimga, nima qilish kerak, bajarish muddati. Tashkilotlar va mansabdor shaxslar bajaruvchilar sifatida koʻrsatilishi mumkin. Agar bandda aniq topshiriq boʻlmasa, uni “tasdiqlansin”, “maʼqullansin”, “maʼlumot uchun qabul qilinsin” va shu kabi soʻzlarni qoʻllagan holda bayon qilish mumkin.

Qarorning koʻrsatma qismida, zarurat boʻlgan hollarda qarorni qabul qilishda asoslanilgan yuqori organlarning huquqiy hujjatlari keltirib oʻtiladi.

Yuqori organ hujjatining mazmuni mustaqil band sifatida bayon qilinadi va “maʼlumot uchun qabul qilinsin”, “Amal qilish uchun qabul qilinsin” deb koʻrsatib oʻtiladi.

Ilgari qabul qilingan qarorlarni yoki uning ayrim bandlarini bekor qilish yoki oʻzgartirish zarur boʻlgan taqdirda qarorning sanasi, tartib raqami, nomi keltirilib, “Oʻz kuchini yoʻqotgan deb hisoblansin” deb yoziladi.

Qaror oxirida qarorning bajarilishini nazorat qilish yuklangan shaxs (hokim, uning oʻrinbosarlari, boshqa mansabdor shaxslar) yoki hokimlik boʻlinmasi, tegishli tashkilot koʻrsatiladi.

5.5. Qaror loyihasiga qaror loyihasini kiritgan xalq deputatlari Kengashi komissiyalarining raislari, deputatlari, tashkilotlar rahbarlari, boshqa mansabdor shaxslar imzolagan, qarorning qabul qilinishi zarurligini asoslovchi koʻpi bilan 2 betdan, muhim xalq xoʻjaligi masalalari boʻyicha esa 4 betdan iborat tushuntirish xati ilova qilinadi.

Takliflar mavjud mehnat, moddiy va moliyaviy resurslarni hisobga olgan holda asoslangan, amaldagi qonunchilikka muvofiq boʻlishi, ularda ishlarning ahvoli obyektiv baholangan boʻlishi, masalani hal qilishga oid maqsad va chora-tadbirlar koʻrsatilgan ijro etuvchilar va ijro etishning asosli muddatlari, manfaatdor tashkilotlarning xulosa va eʼtirozlari keltirilgan boʻlishi kerak.

5.6. Qaror loyihasi mazkur qaror manfaatlariga daxldor boʻlgan tashkilotlar bilan kelishib olinadi.

Qaror loyihasiga quyidagilar viza qoʻyadilar: hokimning mazkur masalaga mutasaddi oʻrinbosari, hokimlikning tegishli tarkibiy boʻlinmasi rahbari, manfaatdor tashkilotlar, ijro etuvchilar, yurist-maslahatchi (bor boʻlgan joylarda).

5.7. Chaqiriq doirasidagi qarorlarning tartib raqami, shuningdek, chaqiriq doirasidagi sessiya va chaqiriq raqami Kengash qarorining tartib raqami hisoblanadi, masalan: 15/6 — 14, bunda 15 — qarorning tartib raqami, 6 — sessiya raqami, 14 — chaqiriq raqamidir.

Hokim qarorlari yil doirasida tartib boʻyicha raqamlanadi.

5.8. Sessiya ishi boshlangan sana Kengash qarori sanasi hisoblanadi.

5.9. Qarorning imzolangan nusxasi umumiy boʻlimga beriladi.

5.10. Qarorga mazkur qaror yuborilishi lozim boʻlgan tashkilotlar, muassasalar, boʻlimlar va mansabdor shaxslar roʻyxati yozilgan joʻnatish koʻrsatkichi ilova qilinadi. Joʻnatishni umumiy boʻlim amalga oshiradi.

5.11. Hokim qarorlari jamoat tashkilotlari bilan birgalikda qabul qilinishi mumkin.

Bunday hujjatning sarlavha qismida nomidan hujjat qabul qilinayotgan barcha tashkilotlarning toʻliq nomi koʻrsatiladi. Roʻyxatga olish tartib raqamlari mazkur hujjatning indeksi hisoblanadi. Hujjat loyihasini tayyorlagan tashkilot bergan raqam birinchi turishi kerak, masalan: 163/9, 120/5.

5.12. Kundalik, maʼmuriy-xoʻjalik va shaxsiy tarkibga oid masalalarni hal qilish uchun hokimlik apparatida farmoyishlar chiqariladi.

Koʻrsatilgan masalalar boʻyicha farmoyishlar loyihasini tayyorlash qaror loyihasiga oʻxshash holda, ammo sarlavhasiz amalga oshiriladi.

5.13. Zarurat boʻlganda farmoyish matniga “maqsadida”, “munosabati bilan” va shu kabi soʻzlar bilan tugaydigan qayd etuvchi qism qoʻshiladi.

Farmoyish matni bandlarga boʻlinishi mumkin, har bir band ijro etuvchini koʻrsatishdan boshlanadi, soʻngra bajarilishi lozim boʻlgan harakat koʻrsatiladi.

5.14. Oxirgi bandda bajarishni nazorat qilish vazifasi yuklanadigan hokimlik apparatining boʻlimi va zarur boʻlganda — muddat koʻrsatiladi.

Farmoyish imzolangan sana uning sanasi hisoblanadi.

5.15 Farmoyishlar uchun bir yil doirasida alohida raqamlash belgilanadi. Farmoyishning tartib raqamiga “f” harfi qoʻshiladi (masalan: 115-f). Kadrlar masalalari boʻyicha farmoyishlarga “fk” harflari qoʻshilgan raqam qoʻyiladi (masalan: 118-fk),

6. Hujjatlar bilan ishlashni tashkil qilish

6.1. Hujjatlar aylanishini tashkil qilish.

6.1.1. Kelib tushadigan hujjatlarni qabul qilish va ular bilan dastlabki ishlash umumiy boʻlimda markazlashgan holda amalga oshiriladi.

Hujjatli konvertlar, shu jumladan, buyurtmalari ham umumiy boʻlimda ochiladi, bunda yetkazib berishning toʻgʻriligi, hujjatlar oʻramining butunligi tekshiriladi. Shikastlanish, hujjatlar yoki ularga ilovalarning yoʻqligi aniqlanganda yuboruvchiga darhol xabar berish zarur.

Kelib tushgan hujjatlarning konvertlari yoʻq qilinadi, yuboruvchining manzilini yoki hujjatning joʻnatilgan va olingan vaqtini faqat konvertlar boʻyicha aniqlash mumkin boʻlgan hollar bundan mustasno.

“Shaxsan” yozuvli ustxati boʻlgan yoki jamoat tashkilotlariga yoʻllangan konvertlar ochilmaydi va moʻljallangan joyga beriladi.

Kelib tushgan hujjatlar roʻyxatdan oʻtkaziladi (ularga roʻyxatdan oʻtkazish muhri qoʻyiladi — 6-ilova).

Hokimga yuqori organlarning hujjatlari, shuningdek, hokimlik faoliyatining hokimning hal etishini talab qiladigan muhim masalalarga oid axborotga ega boʻlgan xat-xabarlar beriladi.

Qolgan hujjatlar hokim oʻrinbosarlariga va hokimlik boʻlimlariga beriladi.

Hujjatlarning bajarilishiga doir koʻrsatmalar munosabat belgilarida aks ettiriladi. Hujjatlar koʻrib chiqilganidan soʻng munosabat belgisini roʻyxatdan oʻtkazish varaqchalariga kiritish uchun umumiy boʻlimga qaytariladi, soʻngra moʻljallangan joyiga yetkaziladi.

Hujjatlar bilan ishlash va ularni joyiga yetkazish ular kelib tushgan kunda yoki hujjatlar ishdan tashqari vaqtda olingan boʻlsa, birinchi ish kunida amalga oshirilishi kerak.

Agar hujjatni bajarish bilan bir necha xodim band boʻlsa, familiyasi munosabat belgisida birinchi boʻlib yozilgan xodim uning bajarilishi uchun masʼul hisoblanadi.

Hokimlikda hujjatlarning u mumiy boʻlimda roʻyxatdan oʻtkazmay qabul qilinishiga yoʻl qoʻyilmaydi.

6.1.2. Chiquvchi hujjatlar bilan ishlash va ularni joʻnatish umumiy boʻlim tomonidan markazlashgan holda amalga oshiriladi.

Hujjatlarni joylashdan oldin ularning toʻgʻri rasmiylashtirilganligi, ilovalarning borligi, nusxalar sonining oluvchilar soniga muvofiqligi tekshiriladi. Notoʻgʻri rasmiylashtirilgan hujjatlar bajaruvchiga puxtalashtirish uchun qaytariladi.

Buyurtma xat-xabarlar boʻyicha joʻnatish roʻyxati tuziladi, unga umumiy boʻlim xodimi oʻz familiyasini va joʻnatish sanasini yozadi.

Umumiy boʻlimga joʻnatish uchun kelib tushgan hujjatlar oʻsha kuni yoki koʻpi bilan 2 kun muddatda rasmiylashtirilishi va joʻnatilishi kerak.

6.1.3. Hujjatlarni hokimlik apparati boʻlimlari oʻrtasida bir-biriga oʻtkazish umumiy boʻlim orqali amalga oshiriladi.

6.1.4. Umumiy boʻlim keluvchi, chiquvchi va apparat hujjatlari* hisobiga doir maʼlumotlarni har oyda, soʻngra butun yil boʻyicha umumlashtiradi. Fuqarolarning takliflari, arizalari va shikoyatlari alohida hisobga olinadi.

* Hokimlik masʼul xodimlari tomonidan tuzilgan hujjatlar nazarda tutilmoqda.

6.2. Hujjatlarni roʻyxatdan oʻtkazish.

6.2.1. Hujjatlar umumiy boʻlimda markazlashgan holda roʻyxatdan oʻtkaziladi. 7-ilovaga hujjatlar umumiy boʻlimda roʻyxatdan oʻtkazilmaydi.

Hokimlik apparatida hujjatlar faqat bir marta: kelib tushadiganlar — kelib tushgan kunda, chiquvchi va apparat hujjatlari — imzolangan yoki tasdiqlangan kunda, roʻyxatdan oʻtkaziladi.

Yuqori tashkilotlardan kelgan hujjatlar, hisobga olishni, bajarishni va maʼlumotnoma sifatida foydalanishni talab qiladigan (koʻrsatma, reja, hisob-statistika, shu kabi) hokimlikning oʻzida yoziladigan va foydalaniladigan, boshqa tashkilotlarga joʻnatiladigan hujjatlar, shuningdek, fuqarolarning takliflari, arizalari hamda shikoyatlari roʻyxatdan oʻtkazilishi kerak.

6.2.2. Kelgan (yuboriladigan) hujjat indeksi yigʻmajildlar nomenklaturasi boʻyicha yigʻmajild indeksi va roʻyxatdan oʻtkazish raqamlaridan iborat boʻladi.

Qarorlar, farmoyishlar va bayonnomalar indekslari bundan mustasno. Har bir hujjat turi doirasida ularga beriladigan roʻyxatdan oʻtkazish raqamlari ularning indekslari hisoblanadi.

Navbatdagi hujjatga roʻyxatdan oʻtkazish raqamini berishni raqamlangan blanklar yordamida amalga oshirish zarur (8-ilova), ular keladigan, joʻnatiladigan va apparat hujjatlari uchun alohida rasmiylashtiriladi.

6.2.3. Hujjatlar roʻyxatdan oʻtkazish-nazorat varaqchalarida (9-ilova) roʻyxatdan oʻtkaziladi. Varaqcha rekvizitlarining tarkibi “Nazorat belgilari” ustunida qoʻshimchalar (“bajaruvchilar”, “bajaruvchi tilxati”, “bajarilishi” va shu kabilar) bilan toʻldirilishi mumkin.

Hujjatlarni varaqchalarda roʻyxatga olishda mazkur hokimlikda tuzilgan yoki boshqa tashkilotdan yuborilgan tashabbusli hujjatlar (soʻrovlar) gina alohida roʻyxatdan oʻtkazilishi kerak. Javob hujjatlari toʻgʻrisidagi maʼlumotlar shu varaqchada qayd qilinadi.

Varaqchaning kalendar shkalasidan Hujjatlarni bajarish muddatlariga rioya qilinishini tekshirish uchun foydalaniladi. Unda hujjatdagi topshiriq bajarilishi lozim boʻlgan sana koʻrsatiladi.

“Korrespondent” ustunida hujjatni yuborgan yoki u yuborilayotgan tashkilot nomi koʻrsatiladi. Apparat hujjatlarini roʻyxatdan oʻtkazishda bu ustunga hokimlikning oʻzining nomi yoziladi.

“Hujjat kelib tushgan sana va uning indeksi” ustuniga hujjat kelib tushgan sana hamda hokimlikda unga beriladigan indeks yoziladi.

“Hujjat sanasi va indeksi” ustuniga hujjat sanasi hamda hujjatga hujjatning muallifi — tashkilot bergan indeks yoziladi. Yuboriladigan xat-xabar yoki apparat hujjatini roʻyxatdan oʻtkazishda bu ustunda roʻyxatdan oʻtkazilayotgan hujjat imzolangan sana va uning yuboriladigan indeksi yoki roʻyxatdan oʻtkazish raqami koʻrsatiladi.

“Qisqacha mazmuni” ustuniga hujjatning turi, uning sarlavhasi yoki qisqacha mazmuni yoziladi.

“Munosabat belgisi yoki hujjat kimga yoʻllangan” ustuniga bajarish topshirilayotgan shaxsning familiyasi, masalani hal qilishga doir qisqacha aniq koʻrsatma, bajarish muddati, uning muallifi va sana yoziladi.

“Hujjatning bajarilishi toʻgʻrisidagi belgi” ustuniga masalaning qanday hal etilganligi, javob hujjati sanasi va indeksi yoziladi. Agar yozma javob berish talab qilinmasa, tashabbusli hujjatda qoʻyilgan masala qachon, kim tomonidan va qanday hal etilganligi yoziladi.

“Olganlik toʻgʻrisidagi imzo”, “sana” ustuniga bajaruvchi hujjatni olishda imzo va sana qoʻyadi.

“Nazorat belgilari” ustuniga bajarish muddatlarini nazorat qilish belgilari yoziladi, ularning tarkibida hujjatning bajarilishi tekshirilgan sanalar hamda kechikishning aniq sabablari boʻlishi kerak.

Roʻyxatdan oʻtkazish varaqchasining “-son fond”, “-son roʻyxat”, “-son yigʻmajild” ustunlari arxivda toʻldiriladi.

6.2.4. Roʻyxatdan oʻtkazish varaqchalari kartotekani belgilangan ichki qoidalarga muvofiq yuritish uchun zarur boʻlgan miqdorda tayyorlanadi.

Maʼlumotnoma varaqchasini yuritish majburiy hisoblanadi. Unda varaqchalar roʻyxatdan oʻtkazish raqamlariga koʻra oldingidan keyingi muddatlarga qarab xronologik tartibda joylashtiriladi.

Maʼlumotnoma varaqchasidan tashqari nazorat varaqchalari, shuningdek, bajaruvchilar, hududlar va shu kabilar boʻyicha varaqchalar ham tashkil etilishi mumkin.

Fuqarolarning xatlari, arizalari, shikoyatlari varaqchasi ularning alifbo boʻyicha familiyalari va roʻyxatdan oʻtkazish raqamlari tartibi boʻyicha tuziladi.

7. Hujjatlarning bajarilishini nazorat qilishni tashkil etish

7.1. Hujjatlar tarkibidagi qarorlar va topshiriqlarning bajarilishini tashkil etish hamda bajarish jarayonini tekshirish hokim, vazifalarning taqsimlanishiga binoan hokim oʻrinbosarlari tomonidan amalga oshiriladi.

Hokimning qarorlari va rahbariyat topshiriqlarining bajarilishi ustidan bevosita nazoratni mazkur hujjatlarni tayyorlagan boʻlim (agar qarorlarning oʻzida boshqacha koʻrsatma berilmagan boʻlsa) amalga oshiradi.

Qaror (topshiriq) ning tayyorlanishini taʼminlagan boʻlim uning bajarilishini nazorat qilish shaklini belgilaydi (axborot, tashkiliy ishlar rejasini taqdim etish va shu kabilar).

7.2. Hokimlik apparatida hujjatlarning oʻz vaqtida bajarilishi ustidan nazoratni tashkil etishga oid ishlarni muvofiqlashtirishni umumiy boʻlim, nazorat inspeksiyasi amalga oshiradi.

Oʻzbekiston Respublikasi Prezidentining farmonlari, qarorlari, farmoyishlari, Oʻzbekiston Respublikasi Oliy Kengashining qarorlari va boshqa hujjatlari, Oʻzbekiston Respublikasi Vazirlar Mahkamasining qarorlari, farmoyishlari, topshiriqlari, Kengash sessiyasining qarorlari, yuqori organlarning qaror va topshiriqlari, deputatlarning xatlari, fuqarolarning takliflari, arizalari, shikoyatlari, shuningdek, aniq topshiriq va ularni bajarish muddatlariga ega boʻlgan hujjatlar albatta nazoratga olinishi kerak.

Hokimning, uning oʻrinbosarlarining koʻrsatmasiga koʻra boshqa hujjatlar ham nazoratga olinishi mumkin.

7.3. Hujjatlarni bajarish muddatlari.

7.3.1. Hujjatlarni bajarish muddatlari namunaviy va yakka tartibda boʻlishi mumkin.

Bajarishning namunaviy muddatlari amaldagi qonunchilik va taxminiy roʻyxat (10-ilova) ga muvofiq nazorat qilinishi lozim boʻlgan hujjatlarning muayyan turlariga belgilanadi.

Qolgan holatlarda hujjatlarni bajarish muddatlari odatda 10 kundan oshmasligi kerak.

Bajarishning yakka tartibdagi muddatlari hokimliklar rahbarlari tomonidan eng muhim hujjatlar uchun belgilanadi yoki hujjatning oʻzida koʻrsatiladi. Bajarishning yakka tartibdagi muddatlari hokimliklar rahbarlarning munosabat belgilarida qayd etiladi.

Agar hujjatni bajarishning yakka tartibdagi muddati hujjatlarning mazkur guruhi uchun belgilangan namunaviy muddatdan farq qilsa, yakka tartibdagi muddat bajarish vaqti hisoblanadi.

7.3.2. Bajarish muddati hujjat imzolangan (tasdiqlangan) sanadan boshlab, boshqa tashkilotlardan kelganlari — ular kelib tushgan sanadan boshlab kalendar kunlar boʻyicha hisoblanadi.

7.3.3. Hujjatlarni bajarish muddati uni belgilagan shaxs yoki tashkil ot tomonidangina uzaytirilishi mumkin. Bajarish muddatining uzaytirilishi hujjat bajaruvchi tomonidan olingan zahoti yoki agar bajarish jarayonida belgilangan muddatga rioya qilishning imkoni yoʻqligi aniqlansa, muddat tugashidan kamida 2—3 kun oldin rasmiylashtirilishi kerak. Aks holda hujjat muddatida bajarilmagan hisoblanadi.

7.3.4. Agar hujjat nazoratga olingan boʻlsa, umumiy boʻlim yoki nazorat inspeksiyasida unga roʻyxatga olish — nazorat varaqchasining qoʻshimcha nusxasi toʻldiriladi va u bajarish muddatlari boʻyicha tuzilgan nazorat kartotekasiga joylashtiriladi.

Umumiy boʻlimning yoki nazorat inspeksiyasining nazoratni amalga oshiruvchi xodimi hujjatni bajaruvchiga beradi; unga bajarish muddatini eslatadi; bajarish jarayoni yoki natijasini nazoratdagi hujjat varaqchasiga yozib boradi va hokimlik rahbarlariga bajarishning ahvoli va natijasi toʻgʻrisida muntazam axborot berib turadi.

7.3.5. Hujjatni nazoratdan chiqarishni faqat uni nazoratga qoʻygan mansabdor shaxs amalga oshirishi mumkin.

Direktiv va yuqori organlarning hujjatlari, hokimning qarorlari, xalq deputatlari Kengashining qarorlari nazoratdan tegishli boʻlimlarning ularning bajarilishi toʻgʻrisidagi materiallari boʻyicha hokim tomonidan chiqariladi.

Xalq deputatlari Kengashi qarorlarining nazoratdan chiqarilganligi Kengash sessiyasi majlisi bayonnomasida qayd etiladi.

Hokimning aniq topshiriqlar berilgan va muddatlari belgilangan farmoyishlari nazoratdan hokimning birinchi oʻrinbosari tomonidan boʻlimning hokimning tegishli oʻrinbosari imzolagan maʼlumotnomasi asosida chiqariladi.

Hokim oʻrinbosarlarining topshiriqlari nazoratdan shu topshiriqni bergan oʻrinbosar ruxsati bilan chiqariladi.

Qolgan barcha holatlarda boʻlimlarda koʻrib chiqilayotgan masalalar nazoratdan boʻlim mudirlari tomonidan chiqariladi.

Hujjatning bajarilganligi va nazoratdan chiqarilganligi toʻgʻrisidagi maʼlumotlar nazorat varaqchasiga yoziladi.

7.3.6. Bajarilishi nazorat qilinishi lozim boʻlgan hujjatlar va nazorat materiallari (bajarilishining tekshirilishini tashkil etish rejasi, bajarilish jarayoni va yakunlari toʻgʻrisidagi axborot) bajarish oxiriga yetmagungacha “Nazoratda” deb aytiluvchi alohida papkada saqlanadi.

Hujjatlar nazoratdan chiqarilgandan soʻng hujjat va materiallar nomenklatura boʻyicha tegishli hujjatlar yigʻmajildlariga solib qoʻyiladi.

8. Nomenklaturalarni tuzish va yigʻmajildlarni shakllantirish

8.1. Hujjatlar yigʻmajildlari nomenklaturalarini tuzish.

8.1.1. Hujjatlar yigʻmajildlari nomenklaturasi — tashkilotda saqlash muddati koʻrsatilib ochiladigan, tegishli tartibda rasmiylashtiriladigan yigʻmajildlar sarlavhalarining tizimga solingan roʻyxatidir. Nomenklatura hujjatlar yigʻmajildlarini toʻgʻri shakllantirish, yigʻmajildlarni izlash va hisobga olishni taʼminlash, hujjatlarni saqlash muddatlarini aniqlash maqsadida tuziladi.

8.1.2. Hokimlikning hujjatlar yigʻmajildlari yigʻma nomenklaturasini umumiy boʻlim tuzadi. Hujjatlar yigʻmajildlari nomenklaturasi hokimlik ekspert komissiyasi va hokimlik arxiv boʻlimining ETKsi bilan oldindan kelishib olinadi, hokim yoki uning oʻrinbosari tomonidan tasdiqlanadi (11-ilova).

Hujjatlar yigʻmajildlari nomenklaturasi hokimlikning vazifasi va tuzilmasi tubdan oʻzgargan taqdirda, ammo besh yilda kamida bir marta qayta tuzilishi va qayta tasdiqlanishi kerak.

8.1.3. Hujjatlar yigʻmajildlari nomenklaturasiga hokimlik faoliyatini aks ettiruvchi barcha hujjatlar yigʻmajildlari, maʼlumotnoma va nazorat kartochkalari, shaxsiy hujjatlar yigʻmajildlari, doimiy va vaqtinchalik komissiyalar hujjatlar yigʻmajildlari kiritiladi.

Hujjatlar yigʻmajildlari nomenklaturasiga bosma nashrlar, Oʻzbekiston Respublikasi Hukumati qarorlarining toʻplamlari, risolalar, maʼlumotnomalar, axborot varaqalari, byulletenlar, koʻrsatkichlar, ekspress axborotlar kiritilmaydi.

8.1.4. Hujjatlar yigʻmajildlari nomenklaturasida boʻlimlar hokimlikning tasdiqlangan tuzilmasiga muvofiq joylashtiriladi. Kasaba uyushmasi qoʻmitasining hujjatlar yigʻmajildlari nomenklaturaning oxiriga joylanadi.

Tarkibiy boʻlinmalar ichida hujjatlar yigʻmajildlari ahamiyatiga koʻra quyidagi sxema boʻyicha joylashtiriladi:

yuqori organlarning tashkiliy-koʻrsatma hujjatlari;

hokimlikning tashkiliy-koʻrsatma hujjatlari;

bayonnomalar va ularning materiallari;

rejalar;

hisobotlar;

maʼruzalar, sharxlar, bildirishnomalar;

yozishmalar;

maʼlumotnomalar, dalolatnomalar, maʼlumotlar;

limitlar, talabnomalar;

maʼlumotnoma kartochkasi.

8.1.5. Nomenklaturadagi hujjatlar yigʻmajildlari sarlavhalari hujjatlar tarkibi va mazmunini aks ettirishi kerak. Nomenklaturadagi hujjatlar yigʻmajildlarining sarlavhalari doimiy va vaqtincha saqlanadigan hujjatlarning yigʻmajildda alohida guruhlanishini hisobga olgan holda shakllantiriladi.

Har bir sarlavhada hujjatning turi, uning mazmuni koʻrsatilishi kerak. Yozishmada — korrespondent (korrespondentlar) koʻrsatiladi.

Koʻrsatma beruvchi hujjatlar yoki bayonnomalarni oʻz ichiga oluvchi hujjatlar yigʻmajildlari sarlavhasida hujjatning asl nusxa yoki nusxasi ekanligi koʻrsatilishi kerak.

Hujjatlar yigʻmajildi bir masalaga taalluqli, ammo ish yuritish izchilligi bilan oʻzaro bogʻlanmagan, har xil turdagi hujjatlardan iborat boʻlgan hollarda sarlavhalarda “hujjatlar” atamasi ishlatiladi. “Hujjatlar” tushunchasi, shuningdek, umumlashtiruvchi hujjatga (masalan, bayonnomaga) ilova hujjatlarni ham anglatadi.

8.1.6. Hujjatlar yigʻmajildi indeksi ikki elementdan: boʻlimning tartib raqami va mazkur tarkibiy qism doirasidagi yigʻmajildning tartib raqamidan iborat boʻladi (0,1 — 1, 01 — 2, 02 — 1 va shu tartibda).

Yil davomida paydo boʻlgan va nazarda tutilmagan yigʻmajildlar nomenklaturaga qoʻshimcha ravishda kiritiladi. Shu maqsadda nomenklaturaning har bir boʻlimida zaxira raqamlar qoldiriladi.

8.1.7. Yil tugallanganda hujjatlar yigʻmajildlari nomenklaturasi oxirida ochilgan yigʻmajildlar soni toʻgʻrisida yakuniy yozuv yoziladi.

8.2. Hujjatlar yigʻmajildlarini shakllantirish.

8.2.1. Hujjatlar yigʻmajildlarini shakllantirish foydalanilgan hujjatlarni yigʻmajildda hujjatlar yigʻmajildlari nomenklaturasiga muvofiq guruhlashdir.

8.2.2. Hujjatlar yigʻmajildlarining toʻgʻri shakllantirilganligi ustidan nazoratni hokimlik apparatining umumiy boʻlimi amalga oshiradi.

8.2.3. Hujjatlar yigʻmajildlarini shakllantirishda quyidagi umumiy qoidalarga rioya qilish kerak: yigʻmajildga faqat bajarilgan, toʻgʻri rasmiylashtirilgan hujjatlarni solish; bitta masalani hal etishga doir barcha hujjatlarni bitta yigʻmajildga solish; ilovalarni asosiy hujjatlar bilan birga joylashtirish, yigʻmajildda bir kalendar yil hujjatlarini guruhlash, keyingi yilga oʻtadigan yigʻmajildlar bundan mustasno; saqlash muddatlari doimiy va vaqtincha boʻlgan hujjatlarni yigʻmajildda alohida guruhlash. Yigʻmajildda qaytarilishi lozim boʻlgan hujjatlar, hujjatlarning ortiqcha nusxalari, qoʻlyozmalar toʻplanmasligi kerak; yigʻmajild 250 varaqdan oshmasligi kerak. Varaqlar soni koʻp boʻlsa, ikkinchi va undan keyingi yigʻmajildlar ochiladi.

8.2.4. Sessiya bayonnomalari, qarorlari va ularning hujjatlari bitta yigʻmajildda toʻplanadi. Hokimning qaror va farmoyishlari alohida yigʻiladi. Hokim farmoyishlari uning kadrlar boʻyicha farmoyishlaridan alohida rasmiylashtiriladi. Hujjatlar koʻrsatma beruvchi hujjatlar va bayonnomalar ichida xronologiyasi va tartib raqamlari boʻyicha joylashtiriladi.

8.2.5. Yozishmalar yigʻmajildda kalendar yil davri uchun aniq masalalar boʻyicha guruhlanadi. Javob hujjati soʻrov hujjatidan keyin joylashtiriladi.

8.2.6. Rejalar, hisobotlar, smetalar ushbu hujjatlarning loyihalaridan alohida guruhlanadi.

8.2.7. Shaxsiy hujjatlar yigʻmajildlariga hujjatlar quyidagi tartibda joylashtiriladi: shaxsiy hujjatlar yigʻmajildida bor boʻlgan hujjatlarning ichki roʻyxati; ishga qabul qilish toʻgʻrisidagi ariza, yoʻllanma yoki taqdimnoma, boʻshash toʻgʻrisidagi ariza, kadrlarni hisobga olish shaxsiy varaqasi, tarjimai hol, maʼlumoti toʻgʻrisidagi hujjatlar; ishga tayinlash, ishdan boʻshatish, ish joyini oʻzgartirish, kadrlarni hisobga olish varaqasiga qoʻshimcha.

8.2.8. Ishchilar va xizmatchilarning shaxsiy schyotlari yil doirasida mustaqil yigʻmajildlarda guruhlanadi va ularda familiyalar alifbo boʻyicha joylashtiriladi.

9. Hokimlik apparatida hujjatlarning saqlanishini taʼminlash

9.1. Hujjatlarning saqlanishini taʼminlash uchun hokimlikda idora arxivi tashkil etiladi va hokimning farmoyishi bilan idora arxivida hujjatlarning saqlanishi uchun masʼul shaxs tayinlanadi.

9.2. Tugallangan hujjatlar yigʻmajildlari maʼlumot olish ishlarida foydalanish uchun ikki yil boʻlimda saqlanadi, soʻngra idora arxiviga topshiriladi.

9.3. Hujjatlar yigʻmajildlari boʻlimlarda shkaflarda, seyflarda saqlanadi. Hujjatlar yigʻmajildlari muqovasida hokimlikning nomi, boʻlimning nomi, yigʻmajildlarning nomenklatura boʻyicha indeksi, yigʻmajild sarlavhasi, saqlash muddati, yigʻmajild ochilgan sana, yil oxirida yopilgan sana koʻrsatiladi.

9.4. Doimiy va uzoq muddat saqlanadigan (10 yildan ortiq) yigʻmajildlar idora arxiviga topshirish roʻyxati boʻyicha topshiriladi (12-ilova).

Topshirish roʻyxati 2 nusxada tuziladi. Roʻyxatning har bir nusxasi oxirida arxivga haqiqiy berilgan hujjatlar yigʻmajildlari soni raqam va soʻz bilan yoziladi, qabul qilish — topshirish ishlarini amalga oshiruvchi shaxslar imzolari qoʻyiladi va sana koʻrsatiladi.

9.5. Hokimlik apparatida hokim farmoyishi bilan 3—5 kishidan iborat doimiy ishlovchi ekspert komissiyasi (EK) tashkil etilishi kerak. Hokim oʻrinbosarlaridan biri EK raisi, hujjatlarning saqlanishi uchun masʼul shaxs EK kotibi etib tayinlanadi. EK oʻzi toʻgʻrisidagi nizomga muvofiq ish yuritadi va oʻz ishini yillik reja asosida tashkil etadi. EK majlislari zarurat boʻlganda, ammo har yili kamida ikki marta oʻtkaziladi. Majlislar bayonnomada qayd etiladi.

9.6. Ekspert komissiyasi oʻz majlislarida hujjatlar yigʻma jildlari nomenklaturasi, doimiy saqlanadigan va shaxsiy tarkib boʻyicha hujjatlar yigʻmajildlari roʻyxatini, yoʻq qilinadigan hujjatlar dalolatnomalarini, shuningdek, hokimlik apparatida ham, uning boʻlimlarida ham hujjatlarning saqlanishini taʼminlash masalalarini koʻrib chiqish huquqiga ega. EK hujjatlarning ayrim turlarini saqlash muddatlarini oʻzgartish toʻgʻrisidagi takliflarni koʻrib chiqish va hokimlikning arxiv boʻlimiga takliflar kiritish huquqiga ega.

9.7. Doimiy va uzoq muddat (10 yildan ortiq) saqlanadigan, idora arxiviga topshirilgan hujjatlar yigʻmajildlari kamida 3 yilda 1-marta tartibga solinishi kerak. Tartibga solishni davlat arxivlari xodimlari hokimlik bilan tuzilgan shartnomaga muvofiq amalga oshiradilar. Hujjatlar yigʻmajildlari amaldagi tartibga muvofiq tikiladi, rasmiylashtiriladi, ularning roʻyxatlari (doimiy saqlanadigan va shaxsiy tarkib boʻyicha alohida) tuziladi.

Saqlash muddati oʻtgan hujjatlarga ish yuritish boʻyicha masʼul boʻlgan xodimlar EK aʼzolari va hokimlik mutaxassislari ishtirokida hujjatlarni yoʻq qilish dalolatnomalarini belgilangan shaklga muvofiq tuzadilar.

Roʻyxatlar, dalolatnomalar EK majlisida koʻrib chiqiladi. Soʻngra ular hokimlikning ekspert-tekshirish komissiyasiga koʻrib chiqish uchun beriladi. Shundan soʻng roʻyxat va dalolatnomalarni hokim tasdiqlaydi.

Dalolatnomaga kiritilgan yigʻmajildlar va hujjatlarni yoʻq qilish tegishli davrning doimiy saqlanadigan yigʻmajildlari roʻyxatlari hokimlik arxiv boʻlimi ekspert-tekshirish komissiyasi tomonidan tasdiqlangandan soʻng amalga oshiriladi.

9.8. Hokimliklarning davlat arxivida saqlanishi lozim boʻlgan hujjatlari davlat arxivlariga:

umumiy hujjatlar 15 yildan keyin;

shaxsiy tarkib boʻyicha hujjatlar 75 yildan keyin topshiriladi.

1-ILOVA 3.13-bandga

Gerbli muhr bosiladigan hujjatlarning taxminiy roʻyxati

Ishonchnomalar

Shartnomalar

Buyurtmanomalar

Xizmat safari guvohnomalari

Muhrlar izlari va moliyaviy-xoʻjalik ishlarini amalga oshirish huquqiga ega boʻlgan xodimlar imzolarining namunalari

Oʻzbekiston Respublikasi ordenlari, medallari, Faxriy yorligʻi, faxriy unvonlari bilan taqdirlash toʻgʻrisidagi taqdimnomalar va iltimosnomalar

Kafolat xatlari

Budjet, bank, pensiya, toʻlov (bankka jamlovchi) topshiriqlari

Hokimning ijro eguvchi apparatining ish tartibi

Reyestrlar (cheklar, budjet topshiriklari reyestrlari)

Xarajatlar smetasi

Maʼlumotnomalar (limitli, sugʻurta summalarining toʻlanganligi toʻgʻrisida, budjet mablagʻlaridan ish haqi uchun foydalanganlik toʻgʻrisida, hisoblangan va toʻlanadigan ish haqi toʻgʻrisida va shu kabilar)

Guvohnomalar

Ustav (nizom)

Shtat jadvallari va ularga kiritiladigan oʻzgartirishlar

2-ILOVA 4.2.2.-bandga

3-ILOVA 4.3-bandga

4-ILOVA 5-bandga

5-ILOVA 5-bandga

6-ILOVA 6.1.1-bandga

7-ILOVA 6.2.1-bandga

Umumiy boʻlimda roʻyxatdan oʻtkazilmaydigan hujjatlarning

TAXMINIY ROʻYXATI

1. Maʼlumot uchun yuborilgan xatlarning nusxalari.

2. Telegrammalar, xizmat safarlari, mehnat taʼtillariga ruxsat berish toʻgʻrisidagi xatlar.

3. Majlislar, kengashlar, kun tartiblari toʻgʻrisidagi xabarlar.

4. Jadvallar, talabnomalar, taqsimnomalar.

5. Oʻquv rejalari, dasturlari (nusxalari).

6. Reklama bildirishlari, plakatlar, kengashlar, konferensiyalar dasturlari va shu kabilar.

7. Tabrik xatlari va taklifnomalar.

8. Buxgalteriya hujjatlari.

9. Bosma nashrlar (kitoblar, jurnallar, byulletenlar).

10. Oylik, choraklik, yarim yillik hisobotlar.

11. Statistik hisobot shakllari.

4, 6, 8, 9, 10, 11-bandlardan sanab oʻtilgan hujjatlar hokimlikning tegishli xizmatlari (buxgalteriya, taʼminot boʻlimi, kadrlar boʻlimi, kutubxona)da maxsus hisobga olinishi kerak.

8-ILOVA 6.2.2-bandga

Raqamlangan blank shakli

9-ILOVA 6.2.3-bandga

Roʻyxatdan oʻtkazish-nazorat varaqchasi

10-ILOVA 7.3.1-bandga

Hujjatlarni bajarishning namunaviy muddatlari roʻyxati

Fuqarolarning ariza va shikoyatlari — kelib tushgan kundan boshlab 1 oy muddatda, qoʻshimcha oʻrganish va tekshirishlarni talab qilmaydiganlari — zudlik bilan, 15 kundan kechikmay;

Yuqori organlarning topshiriq xatlari va soʻrov xatlari — ularda koʻrsatilgan muddatlarda yoki 10 kun mobaynida;

Korxonalar, birlashmalar, muassasalar, tashkilotlarning xatlari — 10 kun muddatda;

Fuqarolarning takliflari — bir oygacha muddatda, qoʻshimcha oʻrganishni talab qiladiganlardan tashqari;

Xalq deputatlari viloyat, shahar, tuman Kengashi sessiyasida deputatlar tomonidan aytilgan taklif va mulohazalar — 10 kun muddatda koʻrib chiqiladi;

Xalq deputatlari viloyat Kengashining takliflari: koʻrib chiqish natijalari bir oydan kechikmagan muddatda, xalq deputatlari shahar, tuman Kengashining takliflari — 10 kundan kechikmagan muddatda maʼlum qilinadi.

Xalq deputatlari viloyat Kengashi doimiy komissiyalarining tavsiyanomalarini koʻrib chiqish natijalari bir oydan ortiq boʻlmagan muddatda yoki komissiyalar tomonidan belgilangan muddatda maʼlum qilinadi;

Xalq deputatlari viloyat Kengashining qarorlari 10 kun muddatdan kechikmay yetkaziladi;

Xalq deputatlari shahar, tuman Kengashining qarorlari 7 kun muddatdan kechikmay yetkaziladi;

Zudlik bilan hal etishni talab qiluvchi telegrammalar — ikki kungacha muddatda, qolganlari 10 kun mobaynida yetkaziladi.

11-ILOVA 8.1.2-bandga

11-ilovaning davomi

12-ILOVA 9.4-bandga