Respublika “Maʼnaviyat va maʼrifat” jamoatchilik markazining faoliyatini tashkil etish toʻgʻrisida (288-son)
08.06.1994
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Respublika “Maʼnaviyat va maʼrifat” jamoatchilik markazini tashkil etish toʻgʻrisida” 1994-yil 23-apreldagi Farmonining bajarilishini taʼminlash maqsadida Vazirlar Mahkamasi qaror qiladi:
1. Belgilab qoʻyilsinki, Respublika Maʼnaviyat targʻibot markazi keng omma bilan hamkorlikda ishlovchi, davlat budjetidan mablagʻlar bilan taʼminlanish bilan bir qatorda xoʻjalik hisobida ham ish yurituvchi ijtimoiy tashkilotdir.
Respublika Maʼnaviyat targʻibot markazining Qoraqalpogʻiston Respublikasi, viloyatlar va Toshkent shahridagi boʻlimlarini moliyaviy taʼminlash va ular tomonidan barcha xildagi tarbiyaviy-maʼrifiy tadbirlar oʻtkazish xarajatlari tegishlicha mahalliy budjetlar va xoʻjalik faoliyatidan tushgan daromadlar hisobidan qoplanishi qayd qilinsin.
2. Respublika Maʼnaviyat targʻibot markazi quyi boʻlimlarining tuzilishi va shtatlar jadvali (texnik xodimlar bundan mustasno) 3-ilovaga muvofiq tasdiqlansin
Markazga Vazirlar Mahkamasi tomonidan tasdiqlanadigan rahbar boshchilik qilishi belgilab qoʻyilsin.
Respublika Maʼnaviyat targʻibot markazining xodimlari moddiy-maishiy, tibbiy taʼminot jihatidan respublika vazirliklarining tegishli toifadagi xodimlariga tenglashtirilsin.
4. Oʻzbekiston ziyolilari ilmiy-maʼrifiy uyushmasi II navbatdan tashqari qurultoyining mazkur uyushmani tugatilgan deb hisoblash, uyushma hamda uning tarkibidagi tashkilotlar, korxonalar va muassasalar ixtiyoridagi pul mablagʻlari, koʻchmas mulklarni Markaz ixtiyoriga berish va Markazni uyushma mol-mulkining qonuniy vorisi deb eʼlon qilish haqidagi qarori maʼlumot uchun qabul qilinsin.
5. Moliya vazirligi (B. Hamidov):
1994-yilning iyun oyidan boshlab Markazni hamda “Tafakkur” jurnali tahririyatini ularning asosiy faoliyati uchun zarur boʻlgan mablagʻ bilan taʼminlasin va har yili budjetni shakllantirishda tegishli mablagʻ ajratilishini nazarda tutsin;
Markaz joylashgan Otaturk koʻchasidagi 24-binoni taʼmirlash xarajatlarini taqdim qilingan haqiqiy hisob-kitoblar asosida qoplasin;
Markazga va uning jurnali tahririyatiga xizmat koʻrsatish uchun 3 ta yengil avtomobil saqlashga limit ajratsin.
6. Moddiy-texnika taʼminot masalalarini zudlik bilan hal qilish hamda Markaz va uning joylardagi boʻlinmalarining normal faoliyati uchun zarur shart-sharoit yaratish maqsadida:
Markaz huzurida oʻzbek xalqi madaniy merosi namunalarini toʻplash, ilmiy tahlil qilish va ommalashtirish bilan shugʻullanadigan xoʻjalik hisobida ishlovchi video-fotostudiya tuzilsin. Toʻplangan video-audio, foto materiallar asosida madaniy meros fondi tashkil etilsin;
Fan va texnika davlat qoʻmitasi 1995-yildan boshlab “Maʼnaviyat va maʼrifat” markazining sotsiologik tadqiqotlar tematikasini tanlov orqali mablagʻ bilan taʼminlanuvchi ishlar roʻyxatiga kiritsin;
Oliy va oʻrta maxsus taʼlim vazirligi, Xalq taʼlimi vazirligi va Fanlar akademiyasi oʻquv yurtlari professor-oʻqituvchilarining va olimlarning Markaz oʻtkazadigan maʼnaviy-maʼrifiy tadbirlarda keng ishtirok etishini taʼminlasinlar;
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ikki oy muddat ichida markazning joylardagi boʻlimlariga belgilangan tartibda amaldagi normalarga muvofiq xizmat xonalari, mebel, jihozlar ajratsinlar, telefonlar oʻrnatib bersinlar;
Toshkent shahar hokimligi (A.Fozilbekov) Toshkent shahri, Otaturk koʻchasidagi 24-binoni bir haftalik muddatda Markazga toʻla boʻshatib berib, shuningdek, uni ikki oy muddat ichida taʼmirlashni taʼminlasin;
Madaniyat ishlari vazirligi Markaz huzurida shahar kutubxonasining boʻlimini tashkil etsin;
Davlat matbuot qoʻmitasi Respublika “Maʼnaviyat va maʼrifat” jamoatchilik markazini nashr nusxalari majburiy yuboriladigan tashkilotlar roʻyxatiga kiritsin. Har yili Markaz xodimlari tayyorlagan ilmiy-tadqiqot ishlari, tavsiyanomalarni nashr etishni nashriyotlarning rejasiga kiritish choralarini koʻrsin;
Oʻzbekiston teleradiokompaniyasi belgilangan koʻrsatuvlar va eshittirishlar soatlari doirasida Markaz uchun alohida efir vaqti ajratishni nazarda tutsin;
“Toshshaharyoʻlovchitrans” uyushmasi ajratilgan limitga muvofiq markazga avtotransport xizmati koʻrsatsin;
Aloqa vazirligi belgilangan tartibda Markaz va “Tafakkur” jurnali uchun xizmat telefonlari, shu jumladan hukumat ATSidan telefon va boshqa aloqa vositalari oʻrnatib bersin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M Qoraboyev zimmasiga yuklatilsin.
Vazirlar Mahkamasining Raisi I. KARIMOV
Toshkent sh.,
1994-yil 8-iyun,
288-son
Vazirlar Mahkamasining 1994-yil 8-iyundagi 288-son qaroriga 3-ILOVA
Respublika Maʼnaviyat targʻibot markazi quyi boʻlimlarining tuzilishi va shtatlar jadvali
(3-ilova matni Oʻzbekiston Respublikasi Vazirlar Mahkamasining 2006-yil 7-noyabrdagi 230-sonli qarori tahririda — OʻR QHT, 2006-y., 45-son, 445-modda)