Toshkent xalqaro moliya markazi faoliyatini yoʻlga qoʻyish boʻyicha tashkiliy chora-tadbirlar toʻgʻrisida (PF-188-son)

10.09.2026

OʻZBEKISTON RESPUBLIKASI PREZIDENTINING

FARMONI

Oʻzbekiston Respublikasining “Toshkent xalqaro moliya markazi toʻgʻrisida”gi Konstitutsiyaviy Qonuni 8-moddasiga muvofiq Toshkent xalqaro moliya markazi faoliyatiga oid birinchi navbatdagi zarur chora-tadbirlarni amalga oshirishni tashkil etish maqsadida qaror qilaman:

I. Toshkent xalqaro moliya markazining organlari va mansabdor shaxslari faoliyatini yoʻlga qoʻyish

1. Toshkent xalqaro moliya markazi (keyingi oʻrinlarda — Moliya markazi) boshqaruvchisi uchun davlat fuqarolik xizmati lavozimlarining milliy darajadagi siyosiy guruhi uchun belgilangan mehnat shartlari va imtiyozlar tatbiq etilsin, ish haqi va unga tenglashtirilgan toʻlovlar esa mehnat shartnomasida koʻrsatilishi belgilansin.

2. Quyidagilar Moliya markazi boshqaruvchisining asosiy vazifalari etib belgilansin:

(a) Moliya markazi faoliyatini boshlashga tayyorlash uchun zarur boʻlgan birinchi navbatdagi hujjatlar loyihalarini ishlab chiqishni muvofiqlashtirish;

(b) Moliya markazi maʼmuriyati va Moliyaviy xizmatlar boshqarmasi nizomlari, ularning tashkiliy tuzilmasi va mansabdor shaxslari nomzodlari hamda Bosh sudya nomzodi yuzasidan takliflarni Moliya markazi kengashiga kiritish;

(v) Moliya markazi faoliyatini yoʻlga qoʻyish boʻyicha davlat organlari tomonidan amalga oshirilishi lozim boʻlgan zarur chora-tadbirlar bajarilishini muvofiqlashtirish;

(g) Oʻzbekiston Respublikasining “Toshkent xalqaro moliya markazi toʻgʻrisida”gi Konstitutsiyaviy Qonunida (keyingi oʻrinlarda — Konstitutsiyaviy Qonun) Moliya markazi boshqaruvchisi zimmasiga yuklatilgan boshqa vazifalarni amalga oshirish.

3. Quyidagilar:

(a) Toshkent xalqaro moliya markazi kengashi toʻgʻrisidagi nizom 1-ilovaga muvofiq;

(b) Oʻzbekiston Respublikasi davlat organlari bilan kelishilgan holda qabul qilinadigan Toshkent xalqaro moliya markazi qarorlari roʻyxati 2-ilovaga muvofiq;

(v) Toshkent xalqaro moliya markazi faoliyatining dastlabki bosqichida qabul qilinishi lozim boʻlgan markaz qarorlari roʻyxati 3-ilovaga muvofiq tasdiqlansin.

4. Moliya markazi boshqaruvchisi ushbu Farmon rasmiy eʼlon qilingan kundan eʼtiboran ikki oy ichida Moliya markazi kengashining birinchi majlisini tashkil etsin.

5. Moliya markazi maʼmuriyati:

(a) masʼul vazirlik va idoralar bilan birgalikda ushbu Farmonning 2-ilovasida belgilangan qarorlar 2026-yil 1-dekabrga qadar qabul qilinishini;

(b) ushbu Farmonning 3-ilovasida belgilangan qarorlarning ishlab chiqilishi va Moliya markazi kengashiga kiritilishini taʼminlasin.

6. Raqamli texnologiyalar vazirligi Adliya vazirligi, Iqtisodiyot va moliya vazirligi, Ichki ishlar vazirligi hamda boshqa manfaatdor vazirlik va idoralar bilan birgalikda uch oy muddatda Moliya markazi organlarini davlat axborot tizimlariga ulash, shuningdek, ular tomonidan beriladigan elektron hujjatlarni axborot tizimlarida qabul qilish va tan olish tartibini belgilovchi idoraviy hujjatlarni qabul qilsin.

7. Tashqi ishlar vazirligi Ichki ishlar vazirligi, Davlat xavfsizlik xizmati hamda Moliya markazi maʼmuriyati bilan birgalikda uch oy muddatda Moliya markazi organlari va ishtirokchilari xodimlari, investitsiyaviy soliq rezidentlari hamda ularning oila aʼzolari uchun kirish vizalarini rasmiylashtirish, Oʻzbekiston Respublikasiga kirish va undan chiqish, shuningdek, soddalashtirilgan migratsiya hisobini yuritish tartibini oʻrnatishga qaratilgan normativ-huquqiy hujjatlar loyihalarini Vazirlar Mahkamasiga kiritsin.

II. Farmon ijrosini tashkil etish, taʼminlash va nazorat

8. Mazkur Farmon ijrosini samarali tashkil etishga masʼul va shaxsan javobgar etib Bosh vazir oʻrinbosarlari J.A. Qoʻchqorov va J.A. Xodjayev hamda Markaziy bank raisi T.A. Ishmetov belgilansin.

9. Farmon ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Prezidenti Administratsiyasi Rahbari S.Sh. Mirziyoyeva zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 10-sentabr,

PF-188-son

Oʻzbekiston Respublikasi Prezidentining 2026-yil 10-sentabrdagi PF-188-son Farmoniga 1-ILOVA

Toshkent xalqaro moliya markazi kengashi toʻgʻrisida

NIZOM

1-bob. Umumiy qoidalar

1. Mazkur Nizom Oʻzbekiston Respublikasining “Toshkent xalqaro moliya markazi toʻgʻrisida”gi Konstitutsiyaviy Qonuni (keyingi oʻrinlarda — Konstitutsiyaviy Qonun) 25-moddasining yettinchi qismiga muvofiq, Toshkent xalqaro moliya markazi kengashining (keyingi oʻrinlarda — Kengash) huquqiy maqomi, tarkibi, vakolatlari va funksiyalarini, uning aʼzolarini lavozimga tayinlash va ularning vakolatlarini tugatish tartibini, majlislar oʻtkazish va qarorlar qabul qilish qoidalarini, shuningdek, uning faoliyatini tashkiliy, axborot, tahliliy va boshqa jihatdan taʼminlash tartibini belgilaydi.

2. Mazkur Nizomda qoʻllanilgan atamalar Konstitutsiyaviy Qonunda belgilangan maʼnolarda qoʻllaniladi.

3. Kengash oʻz faoliyatida Oʻzbekiston Respublikasi Konstitutsiyasiga, Konstitutsiyaviy Qonunga, mazkur Nizomga va Toshkent xalqaro moliya markazining (keyingi oʻrinlarda — Moliya markazi) qarorlariga, shuningdek, toʻgʻridan-toʻgʻri qoʻllaniladigan hollarda Oʻzbekiston Respublikasining boshqa qonunchilik hujjatlariga amal qiladi.

4. Kengash va uning aʼzolari samaradorlik, shaffoflik, halollik, professionallik, huquqiy aniqlik, tartibga solishni oldindan koʻra bilish, sud mustaqilligi prinsiplari asosida faoliyat yuritadi.

5. Kengashda ish yuritish ingliz tilida tashkil etiladi, Kengash majlislari zaruratga koʻra oʻzbek tiliga tarjima qilgan holda oʻtkaziladi. Kengash koʻrib chiqishi uchun kiritiladigan hujjatlar, bayonnomalar, qarorlar, koʻrsatmalar va Kengashning boshqa hujjatlari ingliz tilida rasmiylashtiriladi. Zarur hollarda Kengash hujjatlarining davlat tili yoki boshqa tillardagi tarjimalari tayyorlanishi mumkin.

2-bob. Kengashning huquqiy maqomi va vazifasi

6. Kengash Moliya markazining oliy boshqaruv organi hisoblanadi. Kengash doimiy faoliyat yurituvchi kollegial organ boʻlib, kamida besh nafar aʼzodan iborat boʻladi.

7. Kengash Moliya markazining umumiy strategiyasi, yoʻnalishi va boshqaruvini belgilash hamda Konstitutsiyaviy Qonunda belgilangan Moliya markazining maqsadlari, vazifalari va prinsiplari amalga oshirilishini taʼminlash uchun masʼuldir.

8. Kengash oʻziga yuklatilgan vazifalar va funksiyalarni amalga oshirishda mustaqil faoliyat yuritadi. Davlat organi, mansabdor shaxs, Moliya markazining ishtirokchisi yoki boshqa shaxs Kengash faoliyatiga aralashishi mumkin emas, bundan Konstitutsiyaviy Qonunda bevosita nazarda tutilgan hollar mustasno.

9. Kengash oʻz vakolatlarini Moliya markazining boshqa organlari mustaqilligi va lozim darajada faoliyat yuritishini taʼminlagan holda amalga oshiradi. Kengashning hech bir qarori, buyrugʻi, koʻrsatmasi Moliyaviy xizmatlar boshqarmasining litsenziyalash, tartibga solish, nazorat, tekshiruv, huquqni qoʻllash va kundalik tartibga solish faoliyatidagi operatsion mustaqilligiga yoki Toshkent xalqaro tijorat sudining odil sudlovni amalga oshirishdagi sud mustaqilligiga zarar yetkazmasligi kerak.

10. Kengash individual tartibda litsenziyalash, nazorat, huquqni qoʻllash, tekshiruv yoki sud masalalari boʻyicha qaror qabul qilmaydi, bundan Konstitutsiyaviy Qonun, mazkur Nizom yoki Moliya markazining qarori bilan Kengashga muayyan vakolat bevosita berilgan hollar mustasno.

11. Oʻzbekiston Respublikasi Kengashning qarzlari, majburiyatlari, harakatlari yoki harakatsizligi uchun javobgar boʻlmaydi, Kengash esa Moliya markazining ishtirokchilari yoki boshqa har qanday shaxsning qarzlari, majburiyatlari, harakatlari yoki harakatsizligi uchun javobgar boʻlmaydi, bundan qoʻllaniladigan qonunchilikda javobgarlik bevosita nazarda tutilgan hollar mustasno.

3-bob. Kengashning funksiyalari va vakolatlari

12. Kengash Moliya markazini boshqarish, strategik rivojlantirish, institutsional jihatdan mustahkamlash, samarali faoliyat yuritishini va xalqaro maydondagi mavqeyini taʼminlash uchun zarur umumiy vakolatlarga ega.

13. Kengash Moliya markazini rivojlantirishning umumiy yoʻnalishi va strategiyasini belgilaydi, oʻrta muddatli va yillik strategik rejalarni, asosiy samaradorlik koʻrsatkichlarini, ularni amalga oshirish “yoʻl xarita”larini hamda muayyan sektorlar, faoliyat turlari, xizmatlar, institutlar, huquqiy rejimlar yoki tartibga solish asoslarini ishga tushirish boʻyicha reja-jadvallarni tasdiqlaydi.

14. Kengash Moliya markazi va Moliya markazi organlarining yillik budjetlarini, jamlanma budjetlarini, auditorlik xulosalarini, yillik faoliyat hisobotlarini, auditdan oʻtkazilgan moliyaviy hisobotlarini va boshqa hisobotlarini tasdiqlaydi.

15. Agar tegishli vakolat Moliya markazining boshqa organiga bevosita berilmagan boʻlsa, Kengash tegishli masala yuzasidan Moliya markazining qarorlarini qabul qiladi.

16. Kengash Moliya markazining huquqiy va institutsional asoslarini, shu jumladan, Moliya markazi qarorlarini ishlab chiqish va eʼlon qilish, jamoatchilik muhokamalari oʻtkazish, tartibga solish taʼsirini baholash toʻgʻrisidagi qarorlarni, Angliya va Uels huquqini qoʻllashga oid qarorlarni, Moliya markazi qarorlarining rasmiy reyestri, ish yurituv tiliga oid qoidalar, boshqaruv standartlari va umumiy institutsional muvofiqlashtirish masalalariga oid qarorlarni tasdiqlaydi va ularning bajarilishini nazorat qiladi.

17. Kengash shaxslarni Moliya markazining ishtirokchilari deb eʼtirof etish, yuridik shaxslarni taʼsis etish, roʻyxatdan oʻtkazish va ularning tashkiliy-huquqiy shakllari, tartibga solinmaydigan va qoʻshimcha faoliyat turlarini tashkil etish va amalga oshirish, shuningdek, Moliya markazi doirasida biznesni roʻyxatdan oʻtkazish va korporativ boshqaruvning umumiy asoslariga oid Moliya markazining qarorlarini Moliyaviy xizmatlar boshqarmasining tartibga solish vakolatlariga daxl qilmagan holda qabul qiladi, tasdiqlaydi yoki muvofiqlashtiradi.

18. Kengash Moliya markaziga boʻysunuvchi yoki u bilan bogʻliq tuzilmalar, institutlar, qoʻmitalar, komissiyalar, ishchi guruhlar, vakolatxonalar va boshqa organlarni tashkil etadi, ularning tashkiliy shakli, vakolatlari, funksiyalari, hisobdorligi hamda ularni qayta tashkil etish yoki faoliyatini tugatish tartibini belgilaydi.

19. Kengash investorlarni jalb etish, xalqaro hamkorlikni rivojlantirish, Moliya markazini targʻib qilish va Moliya markazi organlari faoliyatini qoʻllab-quvvatlash maqsadida Moliya markazining Oʻzbekiston Respublikasi hududida va undan tashqarida vakolatxonalarini tashkil etishi mumkin.

20. Kengash Moliya markazining boshqaruv asoslarini, Moliya markazi maʼmuriyati toʻgʻrisidagi nizom, Moliyaviy xizmatlar boshqarmasi toʻgʻrisidagi nizom, shuningdek, boshqa organlar yoki institutlarning ichki hujjatlarini tasdiqlaydi.

21. Agar tegishli masalalar Oʻzbekiston Respublikasi Prezidenti yoki boshqa organ vakolatiga kiritilmagan boʻlsa, Kengash Moliya markazi organlarining yuqori lavozimli mansabdor shaxslarini lavozimga tayinlash, ularga haq toʻlash, lavozimidan ozod etish va hisobdorligi haqidagi qarorlarni tasdiqlashi mumkin. Lavozimga tayinlash yoki lavozimdan ozod etish boshqa organ vakolatiga kiritilgan hollarda, Kengash nomzodlar yuzasidan tavsiyalar berishi, fikr bildirishi yoki ular uchun kasbiy va mustaqillik mezonlarini belgilashi mumkin. Oʻzbekiston Respublikasi Prezidenti yoki Prezident Administratsiyasi Rahbari tomonidan lavozimga tayinlangan davlat fuqarolik xizmatchilari Kengash aʼzosi yoki Moliya markazi organi rahbari sifatida faoliyat yuritish huquqi ega hisoblanadi.

22. Kengash Moliya markazi boshqaruvchisining (keyingi oʻrinlarda — Boshqaruvchi) asoslantirilgan tavsiyasiga koʻra Moliyaviy xizmatlar boshqarmasi kengashi raisi va aʼzolarini tayinlash, qayta tayinlash, ularning faoliyat shartlarini belgilash, vakolatlarini toʻxtatib turish yoki tugatish boʻyicha qarorlarni qabul qiladi.

23. Kengash Moliya markazida qoʻllaniladigan yigʻimlar, toʻlovlar, jarimalar, maʼmuriy sanksiyalar va boshqa toʻlovlarni tasdiqlaydi yoki ular vakolatli Moliya markazi organlari tomonidan tasdiqlanishini taʼminlaydi. Bunda Konstitutsiyaviy Qonunning 28-moddasiga muvofiq Moliyaviy xizmatlar boshqarmasining norma ijodkorligi va huquqni qoʻllash vakolatlariga daxl qilinmaydi.

24. Kengash Moliya markazining maxsus huquqiy rejimi doirasida berilgan soliq, bojxona, viza, mehnatga oid yoki boshqa imtiyozlarni kamaytirishi, cheklashi yoki ularga jiddiy taʼsir koʻrsatishi mumkin boʻlgan takliflarni koʻrib chiqadi hamda Kengash roziligi talab etilgan hollarda rozilik berishi yoki rozilik berishni rad etishi mumkin. Kengash Konstitutsiyaviy Qonunning 18-moddasiga muvofiq Moliya markazi maʼmuriyati tomonidan taqdim etiladigan soliq va bojxona imtiyozlari hamda preferensiyalarini davriy qayta koʻrib chiqish haqidagi hisobotlarni koʻrib chiqadi.

25. Kengash Toshkent xalqaro tijorat sudining Bosh sudyasi lavozimiga tayinlash uchun nomzod yuzasidan taklifni Oʻzbekiston Respublikasi Prezidentiga kiritadi, Bosh sudya tomonidan kiritilgan taklif asosida Toshkent xalqaro tijorat sudi sudyalarining mehnatiga haq toʻlash va boshqa xizmat shartlarini qaror bilan belgilaydi, shuningdek, bunday vakolatlar Kengashga berilgan hollarda sud mustaqilligini saqlagan holda boshqa yuqori lavozimlarga nomzodlarni koʻrsatadi yoki tavsiya qiladi. Boshqaruvchi Kengashga koʻrib chiqish va Oʻzbekiston Respublikasi Prezidentiga taklif etish uchun Toshkent xalqaro tijorat sudining Bosh sudyasi lavozimiga nomzodlarni tavsiya qiladi.

26. Kengash Moliya markazini barqaror rivojlantirish, uning organlari va institutlarini moliyalashtirish, uzoq muddatli aktivlarni xarid qilish, salohiyatni oshirish, xalqaro miqyosda targʻib qilish, raqamli transformatsiya va Moliya markazi maqsadlariga muvofiq boshqa maqsadlar uchun jamgʻarmalar, zaxiralar yoki boshqa moliyaviy mexanizmlarni tashkil etish va ulardan foydalanish qoidalarini tasdiqlaydi.

27. Kengash Moliya markazi va Moliya markazi organlarining jamlanma yillik moliyaviy hisobotlarini auditdan oʻtkazish uchun Oʻzbekiston Respublikasida va xalqaro miqyosda tan olingan kasbiy malakaga ega boʻlgan bir yoki bir nechta mustaqil auditorni tayinlaydi, ularni jalb qilish shartlarini belgilaydi va ularning hisobotlarini koʻrib chiqadi.

28. Kengash Oʻzbekiston Respublikasi Hisob palatasi bilan kelishgan holda Moliya markazi organlari faoliyati uchun ajratilgan Oʻzbekiston Respublikasi Davlat budjeti mablagʻlaridan maqsadli va samarali foydalanilishi ustidan nazorat tartibini belgilaydi.

29. Kengash Moliya markazining yetakchi xalqaro moliya markazi sifatida eʼtirof etilishini hamda Oʻzbekiston Respublikasining ilgʻor, samarali, shaffof va ishonchli xalqaro moliyaviy yurisdiksiya sifatida targʻib qilinishini ragʻbatlantiradi.

30. Kengash Moliya markazi organlariga institutsional muvofiqlashtirish, maʼmuriyatchilik, strategik va idoralararo hamkorlik masalalari boʻyicha muvofiqlashtiruvchi va siyosiy koʻrsatmalar berishi mumkin, bunda bunday koʻrsatmalar individual tartibga solish, nazorat, huquqni qoʻllash yoki sud qarorlarini qabul qilishga taʼsir qilmaydi.

31. Kengash Moliya markazining maqsadlariga muvofiq boʻlgan hamda Konstitutsiyaviy Qonunga, mazkur Nizomga yoki qoʻllaniladigan qonunchilikka zid boʻlmagan boshqa vakolatlarni ham amalga oshirishi mumkin.

4-bob. Kengash tarkibi

32. Kengash Rais va Kengashning boshqa aʼzolaridan iborat boʻlib, aʼzolarning umumiy soni besh nafardan kam boʻlmasligi kerak.

33. Oʻzbekiston Respublikasi Prezidenti lavozimiga koʻra Kengash raisi hisoblanadi.

34. Kengash aʼzolari Oʻzbekiston Respublikasi Prezidenti tomonidan lavozimga tayinlanadi va lavozimidan ozod etiladi.

35. Kengash aʼzolarining kamida uchdan biri Oʻzbekiston Respublikasi Hukumati tizimida ilgari yoki hozirgi paytda hech qanday lavozimni egallamagan, xalqaro moliya, tijorat huquqi sohasidagi mutaxassislardan iborat boʻlishi kerak. Moliya markazi kengashining raisidan tashqari Moliya markazi kengashining aʼzolari qayta tayinlanish huquqi bilan besh yil muddatga tayinlanadi. Mazkur tartibda tayinlangan Moliya markazi kengashi aʼzosining vakolatlari besh yillik muddat tugaguniga qadar faqat asoslar mavjud boʻlganda Moliya markazi kengashi aʼzolari koʻpchiligining yozma qarori bilan tugatilishi mumkin, bunda ushbu qarorning sabablari Oʻzbekiston Respublikasi Prezidentiga yozma ravishda taqdim etiladi. Kengash aʼzoligiga nomzodlarni aniqlashda kasbiy obroʻ-eʼtibor, halollik, malaka hamda xalqaro moliya, kapital bozorlari, moliyaviy tartibga solish, bank ishi, sugʻurta, raqamli aktivlar, fintex, tijorat huquqi, nizolarni hal etish, korporativ boshqaruv, davlat boshqaruvi, infratuzilma, texnologiyalar yoki investitsiyalarni targʻib qilish sohasidagi tajriba inobatga olinadi.

36. Kengash aʼzoligi shaxsan amalga oshiriladigan lavozim hisoblanadi. Kengash aʼzosi oʻz aʼzoligini, majlisda ishtirok etishini yoki ovoz berish huquqini boshqa shaxsga oʻtkazishi mumkin emas.

5-bob. Kengash raisi vakolatlari

37. Rais Kengashga umumiy rahbarlik qiladi, majlislarni chaqiradi va ularga raislik qiladi, kun tartibini tasdiqlaydi, oʻzi raislik qilgan majlislarning qarorlarini imzolaydi, Kengashning strategik yoʻnalishini taʼminlaydi hamda raisga berilgan boshqa vakolatlarni amalga oshiradi.

38. Kengash majlisida ovozlar teng boʻlgan taqdirda, raisning ovozi hal qiluvchi hisoblanadi.

39. Rais Kengash majlisida ishtirok etmagan taqdirda, majlisga Boshqaruvchi raislik qiladi. Boshqaruvchi raislik qilganda Kengash raisining protsessual vakolatlarini amalga oshiradi, biroq ovozlar teng boʻlgan taqdirda hal qiluvchi ovozga ega boʻlmaydi va bunda masala qabul qilinmagan deb hisoblanadi.

6-bob. Kengashga aʼzolikni tugatish

40. Kengash aʼzosini lavozimidan muddatidan oldin ozod etish uchun asoslar jumlasiga uning majburiyatlarni jiddiy buzishi, aʼzolikni davom ettirishga mos kelmaydigan xatti-harakatlar sodir etishi, qasddan huquqqa xilof harakat qilishi, qoʻpol ehtiyotsizlikka yoʻl qoʻyishi, konfidensiallik yoki manfaatlar toʻqnashuviga oid talablarni jiddiy buzishi, jinoyat sodir etganlik uchun sudlanganlik haqidagi hukmning qonuniy kuchga kirishi, mustaqil aʼzo uchun belgilangan mustaqillik maqomini yoʻqotishi, oʻz funksiyalarini uzoq muddat davomida bajara olmasligi yoki uning Moliya markazi manfaatlarini koʻzlab faoliyat yuritishiga jiddiy toʻsqinlik qiladigan boshqa holatlar kiradi.

41. Kengash aʼzosining vakolatlari, agar aʼzo qayta tayinlanmagan boʻlsa, tayinlash muddati tugaganda, raisga yozma ravishda isteʼfo arizasi taqdim etilganda, asoslar boʻlganda Oʻzbekiston Respublikasi Prezidenti tomonidan lavozimdan ozod etilganda, vafot etganda yoki qoʻllaniladigan qonunchilikda belgilangan tartibda muomalaga layoqatsiz, bedarak yoʻqolgan yoki vafot etgan deb eʼlon qilinganda ham tugatiladi.

42. Boshqaruvchining Oʻzbekiston Respublikasi Prezidenti farmoniga asosan lavozimidan ozod etilishi, agar farmonda boshqacha qoida nazarda tutilmagan boʻlsa, uning Kengash aʼzosi sifatidagi vakolatlari ham bir vaqtning oʻzida tugatilishiga olib keladi.

43. Agar qolgan aʼzolar soni belgilangan eng kam miqdordan kam boʻlmasa, Kengashning ayrim aʼzolari vakolatlarining tugatilishi Kengash faoliyatini toʻxtatishga olib kelmaydi. Aʼzolar soni besh nafardan kamayganda, yangi aʼzolarni tayinlash choralari kechiktirilmasdan amalga oshiriladi.

44. Aʼzolar soni besh nafardan kamaygan hollarda yangi aʼzolar tayinlangunga qadar Kengash muhim ahamiyatga ega Moliya markazi qarorlarini qabul qilmaydi, bundan Moliya markazi manfaatlari, ishchanlik obroʻsi, faoliyatining barqarorligi, bozor yaxlitligi yoki huquqiy aniqlikni taʼminlash uchun kechiktirib boʻlmaydigan qaror qabul qilish zarur boʻlgan hollar mustasno.

7-bob. Moliya markazining boshqaruvchisi — Bosh kotib

45. Boshqaruvchi Kengashning Bosh kotibi sifatida faoliyat yuritadigan Kengash aʼzosi hisoblanadi. Boshqaruvchi Oʻzbekiston Respublikasi Prezidentining farmoni bilan lavozimga tayinlanadi va lavozimidan ozod etiladi.

46. Boshqaruvchi Kengash majlislarini tayyorlashni tashkil etadi, kun tartibi loyihalarini shakllantiradi, ish hujjatlari oʻz vaqtida yuborilishini taʼminlaydi, rais qatnashmagan majlislarga raislik qiladi, Kengash qarorlari, buyruqlari va koʻrsatmalari ijrosini muvofiqlashtiradi hamda ijro boʻyicha Kengashga hisobot beradi.

47. Boshqaruvchi Moliya markazining strategiyasi, umumiy siyosatlari, rejalari, tashkiliy tuzilmasi loyihasi va ijro hisobotlarini Kengash tasdigʻiga kiritadi, bunday hujjatlar boshqa vakolatli organ tomonidan kiritiladigan hollar bundan mustasno.

48. Boshqaruvchi Moliya markazi organlari faoliyatini muvofiqlashtirishda, shuningdek, Oʻzbekiston Respublikasi davlat organlari bilan Moliya markazi organlari oʻrtasidagi hamkorlikni tashkil etishda ishtirok etadi. Boshqaruvchi Oʻzbekiston Respublikasi hududida va undan tashqaridagi davlat organlari, xalqaro tashkilotlar, tartibga soluvchi organlar, moliya markazlari, investorlar, taraqqiyot institutlari va boshqa tashkilotlar bilan munosabatlarda Moliya markazi nomidan vakillik qiladi.

49. Boshqaruvchi Moliyaviy xizmatlar boshqarmasi ijrochi direktorini lavozimga tayinlash, qayta tayinlash, vakolatlarini toʻxtatib turish yoki lavozimdan ozod etish boʻyicha Moliyaviy xizmatlar boshqarmasi kengashiga asoslantirilgan tavsiyalar kiritadi. Boshqaruvchi Moliyaviy xizmatlar boshqarmasi kengashi birinchi marta shakllangunga qadar yoki uning majlisi oʻtkazilgunga qadar Moliyaviy xizmatlar boshqarmasi ijrochi direktorini 12 oydan koʻp boʻlmagan muddatga lavozimga tayinlaydi.

50. Boshqaruvchi Moliyaviy xizmatlar boshqarmasi ijrochi direktorining oʻrinbosarlarini lavozimiga tayinlash, qayta tayinlash, vakolatlarini toʻxtatib turish yoki tugatish yuzasidan qarorlar qabul qiladi.

51. Boshqaruvchi Moliya markazi maʼmuriyatining ijrochi direktorini lavozimga tayinlaydi, qayta tayinlaydi va lavozimidan ozod qiladi.

52. Boshqaruvchi zarur hollarda Moliya markazi organlari bilan kelishgan holda, Moliya markazi manfaatlaridan kelib chiqib, Kengash tomonidan belgilangan vakolatlar doirasida uchinchi shaxslar bilan shartnomalar, bitimlar va oʻzaro anglashuv memorandumlarini tuzishga haqli.

53. Boshqaruvchi qoʻmitalar va ishchi guruhlar tuzish, ekspertlar va mutaxassislarni jalb etish, Moliya markazi organlari hamda tegishli davlat organlaridan axborot, muvofiqlashtirish va maʼmuriy koʻmak soʻrash, shuningdek, Kengashning tegishli qarorlari bilan oʻziga yuklatilgan boshqa vazifalarni bajarishga haqli.

54. Boshqaruvchi oʻz funksiyalarini bajarishi uchun zarur tashkiliy, maslahat va texnik koʻmakdan foydalanadi, bunday koʻmak Moliya markazi maʼmuriyati tomonidan, tegishli hollarda esa Moliya markazining boshqa organlari tomonidan koʻrsatiladi.

8-bob. Kengash aʼzolarining huquqlari, majburiyatlari va odob-axloq qoidalari

55. Kengash aʼzosi majlislarda ovoz berish huquqi bilan ishtirok etish, kun tartibiga masalalar kiritishni taklif qilish, koʻrib chiqish uchun taqdim etilgan ish hujjatlarini olish, Moliya markazining organlaridan qoʻshimcha maʼlumot, tushuntirishlar va ekspert baholarini soʻrash, bayonnomada qayd etiladigan yoki unga ilova qilinadigan alohida fikr bildirish hamda mazkur Nizom va Moliya markazi qarorlarida nazarda tutilgan boshqa huquqlarni amalga oshirishi mumkin.

56. Kengash aʼzosi oʻz vazifalarini vijdonan, oqillik, kasbiy mahorat va masʼuliyat bilan bajarishi, faqat Moliya markazi manfaatlari va uning maqsadlariga erishishni koʻzlashi, Kengash ishida shaxsan (masofaviy) va muntazam ishtirok etishi, majlislarga puxta tayyorgarlik koʻrishi, Konstitutsiyaviy Qonun, ushbu Nizom, Moliya markazi qarorlari va qoʻllaniladigan odob-axloq kodeksi talablariga rioya qilishi, konfidensial axborotni saqlashi hamda Moliya markazining ishchanlik obroʻsiga salbiy taʼsir koʻrsatishi mumkin boʻlgan xatti-harakatlardan tiyilishi shart.

57. Kengash aʼzosi manfaatlar toʻqnashuviga yoʻl qoʻymasligi shart. Aʼzo tegishli masala koʻrib chiqilishidan oldin Kengash koʻrib chiqishi uchun kiritilgan masala boʻyicha oʻzining har qanday bevosita yoki bilvosita shaxsiy, moliyaviy yoki kasbiy manfaati mavjudligi haqida Kengashga maʼlum qilishi shart.

58. Manfaatlar toʻqnashuvi mavjud boʻlgan Kengash aʼzosi tegishli masalani muhokama qilishda va u boʻyicha ovoz berishda ishtirok etmaydi. Biroq Kengash oshkor etilgan holatni koʻrib chiqib, manfaatlar toʻqnashuvini ahamiyatsiz deb topsa yoki u qarorning xolis qabul qilinishiga taʼsir koʻrsatmaydi deb hisoblasa, bunday aʼzoning muhokama va ovoz berishda ishtirok etishiga ruxsat berishi mumkin. Manfaatlar toʻqnashuvi toʻgʻrisidagi maʼlumot va Kengashning bu haqidagi qarori bayonnomada qayd etiladi.

59. Kengash oʻz aʼzolari va qoʻmitalari aʼzolari, shuningdek, Moliya markazi organlari xodimlari uchun odob-axloq kodeksini, shuningdek, manfaatlar toʻqnashuvini tartibga soluvchi batafsil qoidalarni qabul qiladi.

60. Kengashning har bir aʼzosi konfidensial deb belgilangan yoki oʻz funksiyalarini bajarishi munosabati bilan unga oshkor etilgan yoxud u tomonidan olingan barcha axborotni sir saqlashi shart. Bunday axborot uchinchi shaxslarga, shu jumladan, davlat organlari va ijro etuvchi hokimiyat organlariga oshkor etilmaydi, bundan oshkor qilish qoʻllaniladigan qonunchilik bilan ruxsat etilgan yoki talab qilingan, Toshkent xalqaro tijorat sudining qarori bilan belgilangan, maʼlumot tegishli boʻlgan shaxsning yozma roziligi mavjud boʻlgan yoki tasdiqlangan hamkorlik mexanizmlariga muvofiq vakolatli mahalliy yoki xorijiy organlar bilan hamkorlik qilish maqsadida amalga oshiriladigan hollar yoxud jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish, sanksiyalarga rioya etish, moliyaviy barqarorlik, soliq maʼmuriyatchiligi uchun, jinoyat ishlari boʻyicha tergov yoki boshqa ommaviy-huquqiy funksiyalarni amalga oshirish maqsadlari uchun zarur boʻlgan hollar mustasno.

61. Konfidensiallik majburiyati lavozim tugatilgandan keyin ham saqlanib qoladi. Konfidensiallikni har qanday buzish tegishli javobgarlikka sabab boʻladi.

62. Kengash aʼzolari oʻz majburiyatlarini bajarish va vakolatlarini amalga oshirish bilan bogʻliq holda vijdonan sodir etilgan har qanday harakat yoki harakatsizlik uchun uchinchi shaxslar oldida javobgar boʻlmaydi. Bunday daxlsizlik qasddan qilingan nojoʻya xatti-harakat yoki qoʻpol ehtiyotsizlikka nisbatan qoʻllanilmaydi, ushbu hollar Toshkent xalqaro tijorat sudi tomonidan Moliya markazining qarorlariga muvofiq koʻrib chiqiladi.

9-bob. Kengash majlislari

63. Kengash oʻz vakolatlarini majlislarda, mazkur Nizomda ruxsat etilgan hollarda esa yozma tartibda amalga oshiradi.

64. Kengash majlislari zaruratga koʻra, biroq yiliga kamida ikki marta oʻtkaziladi. Majlislar rais tomonidan oʻz tashabbusiga koʻra, Bosh kotibning taklifiga koʻra, Kengash aʼzolarining kamida uchdan bir qismi yozma talabiga koʻra yoki Kengash vakolatiga kiradigan masala boʻyicha Moliya markazi organining asoslantirilgan talabiga koʻra chaqiriladi.

65. Majlis haqidagi xabarnoma, kun tartibi loyihasi va ish hujjatlari bilan birga, qoida tariqasida, majlis oʻtkazilishidan kamida oʻn kalendar kun oldin aʼzolarga yuboriladi. Shoshilinch hollarda rais barcha aʼzolar xabardor qilinishi va ularga ishtirok etish uchun oqilona imkoniyat berilishi sharti bilan majlisni qisqaroq muddatda chaqirishi mumkin.

66. Majlis kun tartibi majlis ochilishida Kengash aʼzolarining takliflarini inobatga olgan holda majlisga raislik qiluvchi tomonidan tasdiqlanadi. Yuborilgan kun tartibi loyihasiga kiritilmagan masalalar hozir boʻlgan aʼzolar koʻpchiligining roziligi bilan koʻrib chiqilishi mumkin, Moliya markazining muhim ahamiyatga ega qarorlari loyihalari bundan mustasno. Shoshilinch chora koʻrish zarurati boʻlgan hollardan tashqari muhim ahamiyatga ega qaror loyihalari boʻyicha materiallar oldindan yuborilgan boʻlishi kerak.

67. Kengash majlisida Kengash aʼzolari umumiy sonining koʻpchiligi ishtirok etsa, majlis vakolatli hisoblanadi. Aʼzoning uni eshitish, eshitilish va ovoz berish imkonini beradigan videokonferensaloqa yoki boshqa real vaqt rejimidagi aloqa orqali ishtirok etishi majlisda ishtirok etish deb eʼtirof etiladi.

68. Kengash qarorlari majlisda ishtirok etayotgan aʼzolar ovozlarining koʻpchiligi bilan qabul qilinadi. Har bir aʼzo bitta ovozga ega boʻladi. Agar Kengash yashirin ovoz berish toʻgʻrisida qaror qabul qilmasa, ovoz berish jarayoni ochiq tarzda oʻtkaziladi.

69. Majlisda muhokama qilishni talab etmaydigan masalalar boʻyicha Kengash qarori yozma tartibda qabul qilinishi mumkin. Moliya markazining muhim ahamiyatga ega qarori yozma tartibda faqat masalaning shoshilinchligi bunday tartibni talab etgan hollarda yoki barcha aʼzolar yozma tartibda qabul qilinishiga rozi boʻlgan hollarda qabul qilinishi mumkin.

70. Yozma tartibda qaror loyihasi va unga tegishli materiallar ovoz berish muddati koʻrsatilgan holda barcha aʼzolarga yuboriladi, mazkur muddat, yetarlicha asoslantirilgan shoshilinch hollardan tashqari, besh ish kunidan kam boʻlmasligi kerak. Yozma tartibda qabul qilingan qaror, agar uni aʼzolar umumiy sonining uchdan ikki qismi qoʻllab-quvvatlagan boʻlsa, haqiqiy hisoblanadi.

71. Kengashning har bir majlisi boʻyicha bayonnoma yuritiladi. Bayonnomada majlis joyi, sanasi va shakli, hozir boʻlgan aʼzolar, taklif etilgan shaxslar, kun tartibi masalalari, muhokamaning asosiy jihatlari, qabul qilingan qarorlar, ovoz berish natijalari, alohida fikrlar va berilgan topshiriqlar qayd etiladi.

72. Bayonnoma Bosh kotib yoki Kengash tomonidan belgilangan boshqa shaxs tomonidan, Kengash qarori esa rais yoki Bosh kotib tomonidan imzolanadi.

73. Kengash oʻz majlislariga Moliya markazi organlari, davlat organlari, tartibga soluvchi organlar, sudlar, xalqaro tashkilotlar vakillari, investorlar, ekspertlar va muayyan masalani koʻrib chiqish uchun ishtiroki zarur yoki maqsadga muvofiq boʻlgan boshqa shaxslarni taklif qilishi mumkin. Taklif etilgan shaxslar konfidensiallik talablariga rioya etishi shart.

74. Kengash qabul qilgan qarorlar haqidagi axborot Moliya markaziga nisbatan qoʻllaniladigan eʼlon qilish majburiyati va shaffoflik talablariga muvofiq ommaga maʼlum qilinadi.

10-bob. Kengash qarorlari va hujjatlari

75. Kengash qarorlar, koʻrsatmalar, buyruqlar, nizomlar, qoidalar, kodekslar, siyosatlar va boshqa majburiy hujjatlar shaklida Moliya markazining qarorlarini, shuningdek, normativ xususiyatga ega boʻlmagan qarorlar, tavsiyalar va ichki tashkiliy hujjatlarni qabul qiladi.

76. Moliya markazining qarorlarini ishlab chiqish, vakolatli organlar bilan kelishish, roʻyxatdan oʻtkazish, kuchga kiritish, eʼlon qilish, oʻzgartirish va bekor qilish tartibi Moliya markazi maʼmuriyati tomonidan taklif etiladigan va Kengash tomonidan tasdiqlanadigan maxsus Moliya markazi qarorlari bilan belgilanadi, bundan Moliyaviy xizmatlar boshqarmasi tomonidan oʻz maxsus vakolati doirasida chiqariladigan Moliya markazining qarorlari hamda Konstitutsiyaviy Qonunning 29-moddasiga muvofiq Toshkent xalqaro tijorat sudining Bosh sudyasi tomonidan chiqariladigan qoidalar, koʻrsatmalar va yoʻriqnomalar mustasno boʻlib, ular Kengash tasdigʻisiz kuchga kiradi.

77. Moliya markazining muhim ahamiyatga ega qarori qabul qilinishidan oldin Kengash jamoatchilik muhokamasi oʻtkazilishi, shuningdek, tartibga solish taʼsirini baholash boʻyicha hisobot tayyorlanishi va eʼlon qilinishini taʼminlaydi. Belgilangan tartibga muvofiq bunday muhokama yoki baholashni oʻtkazish talab etilmagan hollar, shuningdek, shoshilinchlik yoki oʻtish davri mexanizmlari tufayli boshqacha tartib belgilangan hollar bundan mustasno.

78. Kengash tomonidan qabul qilingan Moliya markazining qarorlari rasmiy reyestrda ingliz tilida eʼlon qilinadi. Kengashning rasmiy reyestrda ingliz tilida eʼlon qilinmagan hujjati huquqiy kuchga va yuridik taʼsirga ega boʻlmaydi hamda Moliya markazining shaxslari uchun majburiy hisoblanmaydi.

79. Kengash qarori, agar unda kechroq muddat koʻrsatilmagan boʻlsa, rasmiy reyestrda eʼlon qilingan sanada kuchga kiradi.

80. Kengash tomonidan oʻz vakolatlari doirasida qabul qilingan qarorlar, buyruqlar va koʻrsatmalar ular yoʻnaltirilgan Moliya markazi organlari va Moliya markazining shaxslari uchun majburiydir. Kengash hujjatlari Konstitutsiyaviy Qonunda nazarda tutilgan hollarda va tartibda Toshkent xalqaro tijorat sudi tomonidan qayta koʻrib chiqilishi mumkin.

11-bob. Ishtirokchilarning maslahat qoʻmitasi va boshqa qoʻmitalar

81. Kengash Moliya markazining ishtirokchilari, huquq va moliya sohasidagi mustaqil ekspertlar hamda Kengash munosib deb hisoblaydigan boshqa shaxslardan iborat Ishtirokchilarning maslahat qoʻmitasini tashkil etadi.

82. Ishtirokchilarning maslahat qoʻmitasi Moliya markazining muhim ahamiyatga ega qarorlarining loyihalari qabul qilinishidan oldin ular boʻyicha majburiy boʻlmagan maslahat-xulosalar beradi. Qoʻmitaning tarkibi, vakolat muddati, ish tartibi va uning faoliyatini taʼminlash tartibi Kengash qarori bilan belgilanadi.

83. Kengash Ishtirokchilarning maslahat qoʻmitasi tavsiyalarini lozim darajada koʻrib chiqadi. Kengash bunday tavsiyalardan jiddiy ravishda chetga chiqqan taqdirda, chetga chiqish sabablarini eʼlon qiladi.

84. Kengash oʻz aʼzolari orasidan yoki tashqi ekspertlarni jalb qilgan holda doimiy yoki vaqtinchalik (ad hoc) qoʻmitalar, komissiyalar va ishchi guruhlarni tashkil etishi mumkin.

85. Kengash oʻz qoʻmitalari, komissiyalari va ishchi guruhlarining tarkibi, vakolatlari, hisobdorlik va ish tartibini belgilaydi. Kengash tomonidan qoʻmitalarga muayyan vakolatlar bevosita berilmagan hollarda, ular maslahat beruvchi hamda masalalarni Kengash muhokamasiga tayyorlovchi tuzilmalar sifatida faoliyat yuritadi.

86. Kengash oʻz qoʻmitalari, Ishtirokchilarning maslahat qoʻmitasi va Kengash tomonidan tashkil etilgan har qanday boʻysunuvchi tuzilmalar yoki institutlardan davriy hisobotlarni soʻrashi mumkin.

12-bob. Moliya markazi organlari va davlat organlari bilan oʻzaro hamkorlik

87. Moliya markazining organlari Konstitutsiyaviy Qonunga, Moliya markazining qarorlariga hamda Kengashning muvofiqlashtiruvchi yoki siyosiy koʻrsatmalariga muvofiq oʻzaro hamkorlik qiladi, bunda bunday hamkorlik Moliyaviy xizmatlar boshqarmasi yoki Toshkent xalqaro tijorat sudining funksional mustaqilligiga daxl qilmagan holda amalga oshiriladi.

88. Kengash Moliya markazining maqsadlariga erishish, shuningdek, Moliya markazi organlariga berilgan vakolatlar, vazifalar va funksiyalarni samarali amalga oshirish maqsadida vazirliklar, idoralar, nazorat qiluvchi va tartibga soluvchi organlar, sudlar, davlat hokimiyati organlari hamda Oʻzbekiston Respublikasining boshqa vakolatli organlari bilan oʻzaro hamkorlik qiladi.

89. Kengash Moliya markazining samarali faoliyat yuritishi uchun zarur boʻlgan hamkorlik, axborot almashish, tartibga solish masalalarini muvofiqlashtirish, texnik yordam, maʼmuriy koʻmak, sudlar bilan hamkorlik va oʻzaro munosabatlarning boshqa shakllarini tartibga soluvchi asosiy qoidalarni belgilashi mumkin.

90. Kengash oʻz vakolatlarini amalga oshirishi uchun zarur boʻlgan axborot, muvofiqlashtirish va maʼmuriy koʻmakni, konfidensiallik talablariga rioya etgan holda, tegishli organlardan soʻrashi mumkin.

91. Kengash Moliya markazi va uning organlarining xalqaro hamda idoralararo hamkorligiga oid umumiy ustuvor yoʻnalishlar, minimal talablar, kelishish va tasdiqlash tartiblari, shuningdek, hisobot berish talablarini belgilashi mumkin.

13-bob. Budjet, audit, hisobot va shaffoflik

92. Kengash Moliya markazi organlarining jamlanma yillik budjetini va jamlanma yillik moliyaviy hisobotlarini koʻrib chiqadi, tasdiqlaydi va taqdim etadi, shuningdek, Moliya markazining yillik budjetlari, auditorlik xulosalari va faoliyat hisobotlarini tasdiqlaydi.

93. Kengash tasdiqlangan budjetlar ijrosini nazorat qiladi, budjet ijrosini, belgilangan tartibda resurslarni qayta taqsimlash boʻyicha takliflarni koʻrib chiqadi hamda moliyaviy resurslar samarali, shaffof va Moliya markazining maqsadlariga muvofiq yoʻnalishlarda foydalanilishini taʼminlaydi.

94. Kengash mustaqil auditorlarni tayinlaydi, ularni jalb etish shartlarini belgilaydi, auditorlarning zarur hisob hujjatlari, maʼlumotlar va boshqa hujjatlardan foydalanishini taʼminlaydi, audit natijalarini koʻrib chiqadi hamda aniqlangan kamchiliklarni bartaraf etish yuzasidan masʼul shaxslarga tegishli topshiriqlar beradi.

95. Kengash har bir moliyaviy yil tugaganidan keyin toʻrt oy ichida yillik shaffoflik hisobotlari va Moliya markazining jamlanma yillik moliyaviy hisoboti rasmiy reyestrda va tegishli rasmiy veb-saytlarda ingliz tilida bepul ommaviy foydalanish uchun eʼlon qilinishini taʼminlaydi.

14-bob. Kengash faoliyatini taʼminlash

96. Kengash faoliyatini tashkiliy, tahliliy, huquqiy, axborot, logistika, moliyaviy va hujjatlar bilan taʼminlash Konstitutsiyaviy Qonun, Moliya markazining qarorlari va Kengash qarorlariga muvofiq Moliya markazi maʼmuriyati tomonidan amalga oshiriladi.

97. Kengash aʼzolariga ular oʻz vazifalarini bajarish bilan bogʻliq xarajatlarining oʻrni qoplab beriladi. Kengash aʼzolariga ularga yuklatilgan vazifalarni bajarganligi uchun Boshqaruvchi va Kengash aʼzosi oʻrtasida tuziladigan kelishuvga muvofiq haq toʻlanishi mumkin.

98. Moliya markazi maʼmuriyati tarkibida Kengash kotibiyati tashkil etilishi mumkin. Kotibiyat majlis hujjatlarini tayyorlaydi, yozuvlarni yuritadi, qarorlar ijrosini monitoring qiladi, hujjatlar aylanishini tashkil etadi, qoʻmitalar faoliyatini qoʻllab-quvvatlaydi hamda Kengash hujjatlarini eʼlon qilish va arxivlashni taʼminlaydi.

99. Moliya markazining organlari, tegishli qarorlarda nazarda tutilgan hollarda esa Oʻzbekiston Respublikasining davlat organlari va tashkilotlari, qoʻllaniladigan konfidensiallik majburiyatlariga rioya etgan holda, Kengashga oʻz vakolatlarini amalga oshirish uchun zarur axborot, muvofiqlashtirish va maʼmuriy koʻmakni taqdim etadi.

100. Kengash hujjatlar bilan ishlash, arxivlar, axborot xavfsizligi, kiberxavfsizlik, ommaviy kommunikatsiyalar, rasmiy muhrlar va blanklardan foydalanish, qarorlarni eʼlon qilish, axborotdan foydalanish va konfidensial axborotni himoya qilish boʻyicha ichki qoidalarni tasdiqlashi mumkin.

15-bob. Yakuniy qoidalar

101. Mazkur Nizomning biror-bir qoidasi Konstitutsiyaviy Qonunga zid boʻlgan taqdirda, Konstitutsiyaviy Qonun qoidalari qoʻllaniladi. Bunda mazkur Nizom Konstitutsiyaviy Qonunga zid boʻlmagan qismida amal qiladi.

Oʻzbekiston Respublikasi Prezidentining 2026-yil 10-sentabrdagi PF-188-son Farmoniga 2-ILOVA

Oʻzbekiston Respublikasi davlat organlari bilan kelishilgan holda qabul qilinadigan Toshkent xalqaro moliya markazi qarorlari

ROʻYXATI

Oʻzbekiston Respublikasi Prezidentining 2026-yil 10-sentabrdagi PF-188-son Farmoniga 3-ILOVA

Toshkent xalqaro moliya markazi faoliyatining dastlabki bosqichida qabul qilinishi lozim boʻlgan markaz qarorlari

ROʻYXATI

Izoh: Mazkur jadvalda keltirilgan qarorlar Moliya markazi faoliyatini dastlabki bosqichda yoʻlga qoʻyish uchun zarur boʻlgan Moliya markazi qarorlari hisoblanadi hamda ular birlashtirilgan holda qabul qilinishi mumkin. Moliya markazi organlari oʻz vakolatlari doirasida boshqa zarur Moliya markazi qarorlarini qabul qilish huquqiga ega.