Ixtisoslashgan kengash haqida (260-son)

10.07.1996

Nizom

[Oʻzbekiston Respublikasi Adliya vazirligi tomonidan 1996-yil 10-iyulda 260-son bilan davlat roʻyxatidan oʻtkazilgan]

1-§. IXTISOSLAShGAN KENGASh TUZISh VA UNING IShINI TAShKIL QILISh

1. Ixtisoslashgan kengash, shu jumladan birlashgan ixtisoslashgan kengash (Nizom matnida bundan buyon “kengash” deb yoziladi) oliy malakali ilmiy va ilmiy-pedagog xodimlarni attestatsiyadan oʻtkazish tizimining asosiy boʻgʻini boʻlib, fanning tegishli sohalarida oʻz yutuqlari bilan mashhur boʻlgan, oliy taʼlimdan keyin aspirantura va doktorantura shaklida taʼlim olib boruvchi yetakchi oliy oʻquv yurtlari, ilmiy-tadqiqot muassasalari huzurida mazkur muassasalar boʻysunuvchi vazirliklar, idoralar, fanlar akademiyalarining iltimosnomalariga binoan Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi (keyingi oʻrinlarda OAK deb yuritiladi) tomonidan tuziladi.

Iltimosnomada oliy oʻquv yurtlari, ilmiy-tadqiqot muassasalari huzurida kengash tuzishning zarurligi va uni tashkil etishning maqsadga muvofiqligi asoslab berilishi shart.

Iltimosnomaga kengash tarkibiga kiruvchi aʼzolar toʻgʻrisidagi maʼlumot (2.1 shakl) va uni tashkil etish haqidagi buyruq loyihasi (2.2 shakl) ilova qilinadi.

OAK Rayosati va OAK ekspert kengashlarining aʼzolari kengash tarkibiga kiritilmaydi.

Kengash disserratsiyalarni faqat uchta ixtisoslik yoki fan sohasi boʻyicha himoyaga qabul qilishi mumkin.

2. Fan doktori ilmiy darajasini olish uchun dissertatsiya himoya qilish boʻyicha kengash tarkibiga faqat fan doktorlari kiradi. Istisno tariqasida, kengash ilmiy kotibligiga fan nomzodi ham tayinlanishi mumkin.

Fan doktori ilmiy darajasini olish uchun dissertatsiya himoya qilish boʻyicha kengash fan nomzodligi dissertatsiyasi himoyasini oʻtkazish huquqiga ega.

Fan nomzodi ilmiy darajasini olish uchun dissertatsiya himoya qilish boʻyicha kengash tarkibiga fan doktorlari va fan nomzodlari kiradi, lekin fan doktorlari soni kengash aʼzolarining yarmidan kam boʻlmasligi kerak.

3. Zarur hollarda, yetarlicha asos boʻlgan taqdirda, oliy oʻquv yurtlarida va ilmiy muassasalarda birlashgan ixtisoslashgan kengash tuzish mumkin. Birlashgan ixtisoslashgan kengash rahbariyati va tarkibi, aʼzolari soni hamda ushbu kengashda himoya oʻtkaziladigan ixtisosliklar soni va fan sohalari, tegishli iltimosnomalar eʼtiborga olingan holda, OAK tomonidan tayinlanadi.

4. Kengash tarkibi quyidagi talablarga javob berishi lozim (ushbu band birlashgan ixtisoslashgan kengashga tatbiq etilmaydi):

Fan doktori ilmiy darajasini olish uchun dissertatsiya himoya qilish boʻyicha kengash tarkibida kengash har bir ixtisoslikning tegishli sohasi boʻyicha kamida besh nafar fan doktori boʻlishi, shu jumladan kengash tuzilgan oliy oʻquv yurti yoki ilmiy muassasada ishlaydigan xodimlardan kamida uch nafar fan doktori boʻlishi kerak. Zarur hollarda, istisno tariqasida, tegishli ixtisoslik boʻyicha ikki fan doktori ishlayotgan oliy oʻquv yurti yoki ilmiy-tadqiqot muassasasida ham kengash tuzilishi mumkin.

Fan nomzodi ilmiy darajasini olish uchun dissertatsiya himoya qilish boʻyicha kengash tarkibida har bir ixtisoslikning tegishli sohasi boʻyicha kamida besh nafar mutaxassis, shu jumladan kamida uch nafar fan doktori, ulardan kamida ikki nafari kengash tuzilgan oliy oʻquv yurti yoki ilmiy muassasada ishlaydigan xodim boʻlishi kerak.

Kengash tarkibiga kengash ixtisosliklari muammolariga yaqin mutaxassislar ham kiritilishi mumkin.

Qaysi ixtisoslik boʻyicha dissertatsiyani himoya qilish huquqi berilgan boʻlsa, shu ixtisoslikning har biri boʻyicha kengash tarkibidagi boshqa oliy oʻquv yurti yoki ilmiy muassasalardan taklif etilgan mutaxassislar soni kengash aʼzolarining kamida uchdan bir qismini tashkil etishi kerak.

Mutaxassisni kengash tarkibiga kiritish uchun uning yozma roziligi va oxirgi besh yil ichidagi ilmiy ishlari roʻyxati boʻlishi shart. Odatda, bir mutaxassis asosiy ish joyidagi kengashning undan tashqari boshqa oliy oʻquv yurti yoki ilmiy-tadqiqot muassasasida tuzilgan faqat birgina kengashning aʼzosi boʻlishi mumkin.

Kengash aʼzolarining miqdoriy tarkibi eng kami toʻqqiz nafar va eng koʻpi yigirma bir nafar boʻlishi lozim.

5. Kengash raisi etib kengash ixtisosligi boʻyicha yetakchi mutaxassis-olim odatda, kengash tuzilayotgan oliy oʻquv yurti yoki ilmiy-tadqiqot muassasasi shtatida ishlaydigan fan doktori tayinlanadi.

Kengash ilmiy kotibi etib kengash tuzilayotgan oliy oʻquv yurti yoki ilmiy-tadqiqot muassasasi shtatida ishlaydigan kengash ixtisosligi boʻyicha mutaxassis tayinlanadi.

6. OAK kengash ixtisosliklari roʻyxatini, kengash raisini vazirliklar, idoralar, fanlar akademiyalari, tarmoqlararo ilmiy-texnikaviy majmualar va tarmoqlararo davlat birlashmalarining iltimosiga binoan oʻzgartirishi va almashtirishi mumkin. Kengash tuzilgan oliy oʻquv yurti yoki ilmiy-tadqiqot muassasasi rahbarining yoki ixtisoslashgan kengash raisining iltimosi asosida OAK kengash tarkibiga boshqa juzʼiy oʻzgartirishlar kiritadi. Iltimosnomada taklif etilayotgan barcha oʻzgartirishlar aniq koʻrsatilishi hamda ularning zarurligi asoslab berilishi lozim. Iltimosnomaga yangi kiritilayotgan ixtisosliklar haqida maʼlumot (2.3-shakl) ilova qilinadi.

Dissertatsiyaga talab pasaytirib yuborilgan, himoya qilish tartibi buzilgan yoki tashkilot va muassasa rahbarlari kengashning ishlashi uchun zarur sharoitni taʼminlamagan hollarda OAK kengash faoliyatini toʻxtatib qoʻyishi yoki tugatishi mumkin.

7. Dissertatsiya bajarilgan ixtisoslikning yoki dissertatsiya ixtisosligiga mansub boʻlgan fan sohalarining hammasi boʻyicha himoya oʻtkazishga kengashning huquqi boʻlmasa, doktorlik (nomzodlik) dissertatsiyasining bir martalik himoyasini oʻtkazish uchun kengash tarkibiga unda boʻlmagan ixtisosliklar yoki fan sohalarining har biri boʻyicha hal qiluvchi ovoz huquqi bilan mazkur ixtisosliklarga tegishli fan sohalarining uch (ikki) nafar fan doktori kiritilishi lozim.

Bunday hollarda kengash raisi kengash tarkibiga qoʻshimcha aʼzolar kiritish boʻyicha taklif beradi va zarur maʼlumotlarni (2.1-shakl) ilova etib, bir martalik himoya oʻtkazishga ruxsat berish haqida OAKga iltimosnoma yuboradi. Bir martalik himoya oʻtkaziladigan kengash tarkibi OAK Rayosati tomonidan tasdiqlanadi.

Kengash oshkoralik sharoitida ish olib boradi. Oʻz majlislari haqida u ishlab turgan muassasa jamoani muntazam xabardor qilib turadi. Kengash tayyorlangan dissertatsiya himoyasi uchun gʻoyat maqbul sharoit yaratilishiga koʻmaklashishi lozim. Himoya qiluvchiga kengashdagi oʻz dissertatsiyasi himoyasiga oid hamma materiallar bilan tanishish, himoyaga taalluqli barcha masalalar xususida kengash rahbarlaridan malakali yordam olish imkoniyati yaratib berilishi zarur.

8. Kengashning bir majlisida faqat bitta himoya yoki jamoaviy taqriz oʻtkazilishi mumkin, kun davomida esa faqat ikkita majlis oʻtkazilishi mumkin. Kengash himoyalarni sessiya tarzida faqat OAK ruxsati bilan oʻtkazishi mumkin.

9. Dissertatsiya himoyasini oʻtkazish navbatini rejalashtirishda kengash boshqa tashkilotlardan kelib himoya qiluvchilarning dissertatsiyalarini qabul qilib olishni koʻzda tutishi, shuningdek doktorlik dissertatsiyalarining va OAK qoʻshimcha xulosa olish uchun yuborgan dissertatsiyalarning birinchi navbatda koʻrib chiqilishi shart ekanligiga rioya qilishi lozim.

10. Kengash OAK rahbarligida ishlaydi va oʻzi ishlayotgan tashkilotning firma blanki va Davlat gerbi tasvirlangan muhridan foydalanadi. Tashkilot rahbarlari kengash ishiga zarur sharoit yaratib berish uchun masʼuldir.

11. Kengash rahbari kengash faoliyati haqida OAK hamda kengash tuzish toʻgʻrisida iltimos qilgan yuqori tashkilot oldida hisobot beradi.

Taqvim yili tugagach, kengash 10-yanvarga qadar OAKga yil davomida qilingan ishlar haqida hisobot (2.4-shakl) beradi.

2-§. KENGAShDA DISSERTATSIYANI DASTLABKI KOʻRIB ChIQISh

12. Dissertatsiya kafedra, boʻlim va laboratoriya ilmiy seminarlarida, ilmiy-texnik va muammoviy kengashlarda dastlabki ekspertizadan va muhokamadan oʻtgandan soʻng, kengash belgilangan roʻyxatdagi (3.1-shakl) hujjatlar mukammal boʻlganda dissertatsiyani dastlabki koʻrib chiqishga qabul qilib oladi hamda dissertatsiyani yakuniy va mukammal dastlabki ekspertiza qilish uchun kengash qoshidagi ilmiy seminarga yuboradi. Shundan soʻng, kengash aʼzolarining orasidan dissertatsiya ixtisosligi boʻyicha mutaxassislardan tuzilgan komissiyaga dissertatsiya bilan tanishib chiqish va dissertatsiya himoyasini oʻtkazish uchun asos boʻlgan ixtisosliklarga uning qay darajada muvofiq kelishini, muallif eʼlon qilgan ishlarda dissertatsiya materiallari qanchalik toʻliq bayon etilgani haqida kengashga xulosa berishni, shuningdek koʻrib chiqilayotgan mazkur dissertatsiya boʻyicha yetakchi tashkilot, rasmiy opponentlar tayinlashni, zarur hollarda esa kengash tarkibiga qoʻshimcha aʼzolar kiritish haqida takliflar berishni topshiradi.

Kengash dissertatsiyani himoyaga qabul qilib olish haqida qaror qilsa, ushbu komissiya dissertatsiya boʻyicha kengash xulosasining loyihasini taklif etadi, shuningdek mavjud guruhlardan 4.7a va 4.7b-shakllar) tasnifiy belgilarni tanlaydi.

Kengash dissertatsiyani himoyaga qabul qilish haqidagi qaroridan soʻng yetakchi tashkilotni va rasmiy opponentlarni tasdiqlaydi hamda oʻrnatilgan tartibda ushbu himoya haqida OAK veb-saytida eʼlon berish uchun tegishli hujjatlarni OAK ga taqdim etadi.

Kengash tomonidan dissertatsiya himoyaga qabul qilinganidan soʻng dissertatsiyaga va uning avtoreferatiga oʻzgartirishlar kiritish mumkin emas.

Kengashda dissertatsiyani dastlabki koʻrib chiqish muddati himoya qiluvchi hujjat (3.1-shakl) topshirgan kundan boshlab nomzodlik dissertatsiyasi uchun ikki oydan va doktorlik dissertatsiyasi uchun uch oydan oshmasligi kerak.

Etakchi muassasalar roʻyxatini va dissertatsiya dastlabki ekspertizadan oʻtishi shart boʻlgan ilmiy seminarlar roʻyxatini kengash OAKda tasdiqlatib oladi.

13. Kengash raisi himoya toʻgʻrisida OAK veb-saytida eʼlon berilgandan soʻng, qoʻlyozma tariqasida avtoreferatni chop etishga ruxsat beradi va uni tarqatish uchun qoʻshimcha roʻyxat tuzadi hamda himoya kunini tayinlaydi. Himoya toʻgʻrisida OAK veb-saytida eʼlon berilgandan soʻng, himoya uch oy muddat ichida oʻtkazilishi shart.

Kengash majlisining vakolatliligi “Ilmiy darajalar berish tartibi haqidagi Nizom” talablariga muvofiq aniqlanadi.

Kengashning dissertatsiyani himoyaga qabul qilib olish toʻgʻrisidagi qarori, agar uni ochiq ovoz berish tarzida majlisda qatnashayotgan kengash aʼzolarining koʻpchiligi yoqlasa, maqbul deb topiladi.

14. Tayyorlangan dissertatsiya ixtisosliklaridan birontasi kengash ixtisosliklariga toʻgʻri kelmasa yoki dissertatsiya asosiy natijalari toʻliq eʼlon qilinishi hamda dissertantning eʼlon qilingan ilmiy ishlariga qoʻyilgan shartlar haqidagi “Ilmiy darajalar berish tartibi haqidagi Nizom” talablari bajarilmagan taqdirda, kengash dissertatsiyani himoyaga qabul qilmaydi. Bunday hollarda himoya qiluvchiga dissertatsiyaning himoyaga qabul qilinmaganlik sabablari koʻrsatilgan majlis bayonnomasidan koʻchirma va u kengashga topshirgan barcha materiallar qaytarib beriladi.

Dissertatsiya yuzasidan salbiy taqriz va xulosalar berilgan taqdirda, kengash ularning obyektivligi qay darajada asoslanganligini eʼtiborga olgan holda, dissertatsiyani himoyaga qabul qilish toʻgʻrisidagi masalani koʻrib chiqishi mumkin.

15. Himoya oʻtkaziladigan manzilgoh, himoya kuni va soati himoyadan kamida bir oy avval avtoreferatni OAK tasdiqlagan roʻyxat (4.3-shakl) hamda kengash tasdiqlagan qoʻshimcha roʻyxat boʻyicha tarqatish yoʻli bilan maʼlum qilinadi.

3-§. DISSERTATSIYA HIMOYA QILIShDA KENGASh MAJLISINI OʻTKAZISh

16. Dissertatsiya himoyasida kengash majlisi rais, u yoʻqligida esa rais oʻrinbosari rahbarligida oʻtkaziladi.

Kengash raisi (rais oʻrinbosari), ilmiy kotibi oʻzi ilmiy rahbar yoki maslahatchi boʻlgan himoya qiluvchining dissertatsiyasi koʻrib chiqilayotgan kengash majlisida raislik, ilmiy kotiblik vazifasini bajarishi mumkin emas. Agar kengash raisi va uning oʻrinbosari majlisda raislik qila olmasalar, kengash aʼzosi kengash ishlab turgan oliy oʻquv yurti yoki ilmiy muassasa shtatidagi xodim shu majlis uchun kengash raisi etib tayinlanadi. Uning tayinlanishi shu oliy oʻquv yurti yoki ilmiy muassasa rahbarining buyrugʻi bilan rasmiylashtiriladi.

Kengashning ilmiy kotibi yoʻqligida yoki boshqa sababga koʻra uning vazifasini bajarish oliy oʻquv yurti yoki ilmiy muassasa rahbarining buyrugʻi bilan muddatlari (ikki oydan oshmasligi kerak) koʻrsatilib, kengash aʼzolaridan birining zimmasiga yuklatiladi.

Bir vaqtning oʻzida rais ham, rais oʻrinbosari ham, ilmiy kotib ham boʻlmasa, kengash majlisi oʻtkazilmaydi.

17. Kengash majlisini ochish oldidan “Ilmiy darajalar berish tartibi haqidagi Nizom”ga muvofiq ilgari tuzilgan komissiya xulosasining loyihalari kengash aʼzolariga tarqatiladi.

Rais kengash majlisini ochish vaqtida qayd varaqasi (4.4-shakl) asosida kengash aʼzolarini majlisning vakolatliligi haqida xabardor qiladi. Kengash aʼzolarining majlisda bevosita qatnashayotganligi (ularning ixtisosi va ilmiy darajalari koʻrsatilgan holda) majlis stenogrammasida qayd etilishi lozim.

Kengash majlisi ochilgandan keyin rais dissertatsiya himoyasi oʻtkazilishini aytib, dissertatsiya nomini, rasmiy opponentlarning familiyalarini va yetakchi muassasa nomini maʼlum qiladi. Shundan keyin ilmiy kotibga soʻz beriladi, u himoya qiluvchi topshirgan hujjatlarning asosiy mazmuni va ularning belgilangan talablarga nechogʻlik muvofiqligi haqida maʼlumot beradi.

18. Himoya qiluvchi dissertatsiyaning mohiyatini va asosiy jihatlarini bayon etadi, ogʻzaki va yozma savollarga javob beradi. Soʻng ilmiy rahbar yoki maslahatchiga soʻz beriladi, keyin dissertatsiya ishi bajarilgan yoki himoya qiluvchi biriktirilgan oliy oʻquv yurti yoki ilmiy muassasaning xulosasi, yetakchi muassasaning taqrizi, dissertatsiya va avtoreferat xususida kengashga kelgan boshqa taqrizlar oʻqib eshittiriladi.

Dissertatsiya va avtoreferat toʻgʻrisida ijobiy taqrizlar koʻp boʻlsa, ilmiy kotib, kengash aʼzolarining roziligi bilan, ularni oʻqib berish oʻrniga qayd etilgan fikrlarni qisqacha bayon qiladi. Salbiy taqrizlar toʻliq oʻqib eshittiriladi.

19. Taqrizlar oʻqib boʻlingach, ularga javob qaytarish uchun himoya qiluvchiga soʻz beriladi.

20. Shundan keyin rasmiy opponentlar soʻzlaydi. Ulardan har birining nutqidan soʻng himoya qiluvchi javob berish uchun soʻz oladi.

Dissertatsiyaga oid ilmiy munozarada majlisda hozir boʻlganlarning barchasi qatnashish huquqiga ega.

Munozara tugagach, himoya qiluvchiga yakunlovchi soʻz beriladi.

21. Himoya qiluvchining yakunlovchi soʻzidan keyin kengash ushbu Nizomning 4-§ ida belgilab qoʻyilgan tartibga muvofiq ilmiy daraja berish masalasi boʻyicha yashirin ovoz berishga kirishadi. Ovoz berish byulleten (4.5-shakl) vositasida oʻtkaziladi. Majlisda qatnashgan va hal qiluvchi ovozga ega boʻlgan kengash aʼzolarining kamida uchdan ikki qismi yoqlab ovoz bersa, kengash ilmiy daraja berish masalasi yuzasidan ijobiy qaror chiqaradi.

22. Hisob komissiyasining bayonnomasi tasdiqlangandan keyin kengash xulosasining loyihasi muhokama qilinadi. Ilmiy daraja berish masalasida ijobiy qarorga kelinsa, himoya qiluvchi shaxsan erishgan eng muhim ilmiy natijalar, ularning toʻgʻriligi va yangiligiga berilgan baho, nazariyot va amaliyot uchun ahamiyati, dissertatsiya tadqiqotining natijalaridan foydalanish yuzasidan tavsiyalar xulosa loyihasida aks ettiriladi hamda dissertatsiya “Ilmiy darajalar berish tartibi toʻgʻrisidagi Nizom”ning 8 va 9-bandlaridan qay birining talabiga mosligi koʻrsatiladi. Ilmiy daraja berish masalasida salbiy qarorga kelingan taqdirda xulosa qabul qilinmaydi.

Dissertatsiya ishining natijalarini amaliyotga (fan, texnika, sogʻliqni saqlash, iqtisodiyot, ijtimoiy-gumanitar va xalq xoʻjaligining boshqa sohalariga) tatbiqi yuzasidan ilmiy daraja talabgori tomonidan maxsus ishlab chiqilgan tavsiyalar muhokama qilinadi va tasdiqlanadi.

Imkoniyat boʻlganda, ushbu tavsiyalarning qaysi vazirlik, idora va muassasalarda qoʻllanilishi koʻrsatiladi.

Dissertatsiya natijalarining tasnifiy belgilari koʻrsatilgan (4.7a va 4.7b-shakl) xulosa matni ochiq ovoz berish vositasida majlisda qatnashgan kengash aʼzolarining koʻpchilik ovozi bilan qabul qilinadi.

Shu bilan kengash majlisi nihoyasiga yetadi.

23. Himoya qiluvchi oʻzi topshirgan yozma arizasiga muvofiq himoya davomida yashirin ovoz berish boshlangunga qadar dissertatsiyani muhokamadan olish huquqiga ega.

Himoya qiluvchi oʻz dissertatsiyasini muhokama qilmaslikni soʻrab kengashga yozma ariza topshirgan taqdirda, kengash raisi himoya qiluvchiga u topshirgan hujjatlarni qaytarishga koʻrsatma beradi; uning arizasi hamda dissertatsiya bilan avtoreferatning bittadan nusxasi kengashda qoldiriladi. Dissertatsiyani himoya qilish paytida tayyorlangan hujjatlar kengashda qoldiriladi va ular himoya qayta oʻtadigan joyga talabnoma asosida yuborilishi mumkin.

Kengash himoya qiluvchining oʻzga materiallardan muallifi va manbaini koʻrsatmasdan foydalanganligi aniqlansa, ochiq ovoz berish natijasida koʻpchilik ovoz bilan uni takror himoya qilish huquqidan mahrum etgan holda dissertatsiyani muhokamadan olib tashlash haqida qarorga keladi. Bunday hollarda himoya qiluvchining dissertatsiyasini muhokamadan olish haqidagi arizasi qabul etilmaydi. Kengash qarori OAKga dissertatsiya avtoreferati va majlis stenogrammasi bilan birga yuboriladi.

24. Kengash doktorlik yoki nomzodlik dissertatsiyasining birinchi hamda ikkinchi nusxasini va himoya qiluvchining attestatsiyasiga oid hujjatlarni (4.1-shakl), shuningdek, dissertatsiya, avtoreferat, attestatsiya hujjatlarining elektron versiyasini himoyadan keyin bir oy muddat ichida OAKga yuboradi.

4-§. YaShIRIN OVOZ BERISh VA HISOB KOMISSIYASINING IShI

25. Hisob komissiyasi (kamida uch kishi) yashirin ovoz berishdan avval ochiq ovozga qoʻyish vositasida kengash majlisida qatnashayotgan va hal qiluvchi ovozga ega boʻlgan aʼzolarning koʻpchilik ovozi bilan saylanadi.

26. Yashirin ovoz berishda kengashning hal qiluvchi ovozga ega aʼzolaridan majlisda hozir boʻlganlarigina qatnashadilar, ularga hisob komissiyasi himoya qiluvchining yakunlovchi soʻzidan keyin tayyorlab qoʻyilgan byulletenlarni (4.5-shakl) tilxat bilan beradi.

Dissertatsiya himoyasiga kechikib kelgan yoki himoya tugamasdan ketib qolgan kengash aʼzolari kvorumni aniqlashda hisobga olinmaydi va yashirin ovoz berishda qatnashmaydi.

Oʻzi aʼzo boʻlgan kengashda dissertatsiya yoqlayotgan himoya qiluvchi oʻz himoyasining yakunlari boʻyicha ovoz berishda ishtirok etmaydi va ushbu majlisdagi kengash aʼzolarining roʻyxatida hisobga olinmaydi.

Ovoz beruvchi “Ovoz berish natijalari” ustunidagi oʻzi keraksiz deb hisoblagan soʻzlarni oʻchiradi va byulletenni muhrlangan qutichaga tashlaydi.

27. Ovoz berish tugagach, hisob komissiyasining aʼzolari qutichani ochib, byulletenlarni sanaydilar va ovoz berish natijalari yuzasidan bayonnoma (4.6-shakl) tuzadilar.

Tarqatilmagan byulletenlarga yashirin ovoz berish boshlanmasidan oldin tegishli belgi qoʻyilib, hisob komissiyasida qoldiriladi va bu haqda bayonnomada qayd qilinadi. Ovoz berishda qatnashgan kengash aʼzolarining fikrini aniqlash imkonini bermaydigan byulletenlar yaroqsiz deb topiladi va bu ham komissiya bayonnomasida qayd qilinadi.

Ovoz berish natijalari yuzasidan bayonnoma rasmiylashtirilgandan keyin hisob komissiyasi barcha byulletenlarni oʻrab muhrlaydi va oʻz bayonnomasiga ilova qiladi.

28. Kengash yashirin ovoz berishda qatnashgan kengash aʼzolarining oddiy koʻpchilik ovozi bilan ochiq ovoz berish vositasida hisob komissiyasining bayonnomasini tasdiqlaydi.

Hisob komissiyasining bayonnomasi tasdiqlanmagan taqdirda dissertatsiya muhokamasi davom ettiriladi yoki boshqa kunga qoldiriladi.

Hisob komissiyasi yangi byulletenlar tayyorlaydi va kengash yana yashirin ovoz berishni amalga oshiradi.

Hisob komissiyasining bayonnomasini tasdiqlamaslik masalasi dissertatsiyani himoya qilish yoki hisob komissiyasining ishlash tartibi buzilganligi aniqlangan taqdirdagina kengash tomonidan koʻrib chiqilishi mumkin.

5-§. QOʻShIMChA XULOSA OLISh UChUN OAK YuBORGAN DISSERTATSIYANI KOʻRIB ChIQIShDA KENGASh MAJLISINI OʻTKAZISh

29. Qoʻshimcha xulosa olish uchun yuborilgan dissertatsiya olingandan keyin u ikki oy muddat mobaynida kengash tomonidan koʻrib chiqiladi. Kengash dissertatsiyani koʻrib chiqishdan avval kengash aʼzolaridan iborat boʻlgan komissiyaga himoya qiluvchining dissertatsiyasi bilan tanishib chiqishni hamda kengashga dissertatsiya yuzasidan xulosa loyihasini taqdim etishni topshiradi.

Kengash majlisiga himoya qiluvchi taklif etiladi, u komissiya xulosasi bilan oldindan tanishtirilgan boʻlishi kerak. Majlisda himoya qiluvchining opponentlari, yetakchi tashkilot vakillari hamda zarur hollarda, kengash taklif qiladigan boshqa shaxslar qatnashishlari mumkin. Kengash aʼzolarining hozir boʻlganliklari (ularning ixtisosliklari koʻrsatilgan holda) majlis stenogrammasida aks etishi lozim.

30. Kengash majlisini ochish paytida rais qayd etish varaqasi (4.4-shakl) asosida kengash aʼzolarini majlisning huquqiyligi haqida xabardor qiladi.

Rais majlisni ochgandan keyin himoya qiluvchining qoʻshimcha xulosa uchun yuborilgan dissertatsiyasi koʻrib chiqilishini eʼlon qiladi, dissertatsiyaning nomini, dissertatsiya himoyasi oʻtgan kengashni, rasmiy opponentlarning familiyasi va yetakchi tashkilotni koʻrsatib oʻtadi.

31. Himoya qiluvchi dissertatsiyaning mohiyatini va asosiy qoidalarini bayon etadi. Shundan keyin himoya qiluvchiga ogʻzaki yoki yozma savollar berilishi mumkin.

32. Dissertatsiya va attestatsiya materiallari bilan tanishib chiqish topshirilgan kengash aʼzolaridan birining soʻzlashi bilan muhokama boshlanadi. Kengash majlisida qatnashayotganlarning hammasi ham muhokamada soʻzlash huquqiga egadir. Muhokama tugagandan soʻng himoya qiluvchiga soʻz beriladi.

33. Muhokama tugagach, kengash ushbu Nizomning 4-§ belgilangan tartibga binoan dissertatsiyaning “Ilmiy darajalar berish toʻgʻrisidagi Nizom”ning 8 yoki 9-bandlari talablariga muvofiqligi xususidagi masala yuzasidan yashirin ovoz berishni oʻtkazadi. Ovoz berish byulleten (4.5-shakl) vositasida oʻtkaziladi. Kengash qarori, agar kengash majlisida hal qiluvchi ovoz bilan qatnashgan aʼzolarining oddiy koʻpchiligi yoqlab ovoz bergan boʻlsa, ijobiy deb hisoblanadi.

34. Hisob komissiyasining bayonnomasi tasdiqlangandan soʻng kengash ochiq ovoz berish vositasida majlisda qatnashgan kengash aʼzolarining oddiy koʻpchilik ovozi bilan qoʻshimcha xulosa matnini qabul qiladi, unda ushbu dissertatsiya “Ilmiy darajalar berish tartibi toʻgʻrisidagi Nizom”ning 8 yoki 9-bandlaridan qay birining talablariga javob berishi yoki javob bermasligi koʻrsatiladi.

Qoʻshimcha xulosa matni tasdiqlangandan keyin himoya qiluvchiga maʼlum qilinadi. Shu bilan kengash majlisi nihoyasiga yetadi.

35. Yashirin ovoz berish natijalari koʻrsatilgan hamda kengash raisi va ilmiy kotibi imzolagan stenogramma va qoʻshimcha xulosaning matni himoya qiluvchining dissertatsiyasi bilan birga uch hafta ichida OAKga yuboriladi.

6-§. ILMIY DARAJALARDAN MAHRUM ETISh MASALALARINI KOʻRIB ChIQIShDA KENGASh MAJLISINI OʻTKAZISh

36. Kengashga “Ilmiy darajalar berish tartibi toʻgʻrisidagi Nizom”ga muvofiq shaxsni ilmiy darajadan mahrum etish masalasini qoʻyish uchun asos boʻladigan materiallar tushgan taqdirda kengash oʻz aʼzolaridan iborat komissiyaga ularning qanchalik asoslanganligini tekshirishni topshiradi. Zarur hollarda, kengash ishlab turgan oliy oʻquv yurti yoki ilmiy muassasa maʼmuriyati orqali tegishli soʻrovlar yuboriladi.

Komissiya tekshirish yakunlari boʻyicha xulosa chiqaradi va kengashda koʻrib chiqish uchun topshiradi.

37. Kengash komissiya tayyorlagan materiallarni bir oy ichida koʻrib chiqishi lozim.

38. Kengash majlisi, odatda, ilmiy darajasidan mahrum etilish masalasi qoʻyilgan shaxsning ishtirokida va u majlisdan kamida 10 kun avval ogohlantirilgan holda oʻtkaziladi.

Mabodo chaqirilgan shaxs uzrli sabablarsiz majlisga kelishdan bosh tortsa yoki uni chaqirishning iloji boʻlmasa, kengash uning ishtirokisiz majlis oʻtkazish haqida qaror qabul qiladi. Mazkur shaxs, uzrli sabablarga koʻra majlisda ishtirok etolmasligini oldindan xabar qiladigan boʻlsa, kengash majlisi boshqa kunga (vaqtga) koʻchiriladi.

39. Kengash raisi majlisni ochish vaqtida kengash aʼzolarini majlisning vakolatliligi toʻgʻrisida (“Ilmiy darajalar berish tartibi toʻgʻrisidagi Nizom”ning 29-bandi) xabardor qiladi hamda ilmiy darajadan mahrum etish haqidagi masala koʻrib chiqilishini eʼlon qiladi. Shundan keyin kengashning komissiya tarkibidagi aʼzosi maʼruza qiladi. Maʼruza tugagach, ilmiy darajasidan mahrum etish masalasi qoʻyilgan shaxsga soʻz beriladi, shundan soʻng kengash majlisida hozir boʻlganlarning hammasi soʻzga chiqish huquqiga egadir.

40. Muhokamadan soʻng kengash ushbu Nizomning 4-§ binoan belgilangan tartibga muvofiq ilmiy darajadan mahrum etish masalasi yuzasidan yopiq ovoz berish oʻtkazadi. Ovoz berish byulleten (4.5-shakl) asosida oʻtkaziladi. Kengashning ilmiy darajadan mahrum etish haqidagi qarori majlisda qatnashayotgan hal qiluvchi ovozga ega kengash aʼzolarining kamida uchdan ikki qismi yoqlab ovoz bergan taqdirda qabul qilingan deb hisoblanadi.

Kengash hisob komissiyasining bayonnomasi tasdiqlangandan keyin yashirin ovoz berish natijalariga asoslangan holda majlisda qatnashgan kengash aʼzolari oddiy koʻpchiligining ochiq ovoz berishi bilan qaror matnini qabul qiladi, unda koʻrib chiqilgan materiallarning mohiyati va natijalari aniq-ravshan taʼriflangan hamda OAKdan ilmiy darajadan mahrum etishni soʻrash uchun yetarli asos bor yoki yoʻqligi xususida xulosa boʻlishi lozim.

41. Yashirin ovoz berish natijalari hamda kengash qarorining matni ilmiy darajadan mahrum etilishi haqida masalasi qoʻyilgan shaxsga maʼlum qilinadi.

42. Agar kengash shaxsni ilmiy darajadan mahrum etishni OAKdan soʻrab qaror qabul qilgan boʻlsa, kengash raisi va ilmiy kotibi imzolagan kengash majlisining stenogrammasi va yashirin ovoz berish natijalari koʻrsatilgan qaror matni uch haftalik muddat ichida OAKga, yuboriladi. Ilmiy darajadan mahrum etish masalasini koʻrib chiqish haqidagi topshiriq kengashga OAK tomonidan berilgan hollarda ham mazkur materiallar OAKga yuboriladi.

7-§. ShIKOYAT ARIZASINI KOʻRIB ChIQISh BOʻYIChA KENGASh MAJLISINI OʻTKAZISh

43. Kengash raisi kengash qarori xususida shikoyat arizasi tushganda uning aʼzolaridan iborat komissiyaga zarur materiallarni oʻrganib chiqishni hamda shikoyat arizasi yuzasidan kengash qarori loyihasini tayyorlashni topshiradi. Agar shikoyat arizasi ilmiy daraja berish masalasi yuzasidan kengashning ijobiy qarori xususida berilgan boʻlsa, kengash raisi bir hafta ichida bu haqda OAKni xabardor qiladi.

Shikoyat arizasi kengashda bir oy muddat mobaynida koʻrib chiqilishi, zarur hollarda rejadan tashqari majlis oʻtkazilishi lozim.

Shikoyat arizasining muallifi (mualliflari), himoya qiluvchi hamda qoʻyilgan masalalarning mohiyatiga, kengash fikricha, bevosita aloqador boʻlgan boshqa shaxslar majlisdan kamida 10 kun oldin xabardor qilinib, kengash majlisiga taklif etiladilar. Shikoyat arizasining muallifi uzrli sabab bilan kelolmasa, kengash majlisi boshqa vaqtga koʻchiriladi. Bordiyu, shikoyat arizasining muallifi uzrli sababsiz kengash majlisiga kelmagan hollarda uning ishtirokisiz majlis oʻtkazilaveradi.

Kengash aʼzolarining (ixtisosliklari koʻrsatilgan tarzda) majlisda hozir boʻlganliklari majlis stenogrammasida aks ettirilishi kerak.

44. Kengash raisi majlisni ochish vaqtida kengash aʼzolariga majlisning vakolatliligini maʼlum qiladi (“Ilmiy darajalar berish tartibi toʻgʻrisidagi Nizom”ning 45-bandi).

Kengash raisi majlis ochilgandan keyin tushgan shikoyat arizasi koʻrib chiqilishini eʼlon qiladi va uni oʻqib eshittirish uchun ilmiy kotibga soʻz beradi. Soʻngra komissiya aʼzosi uning ishi natijalarini hamda shikoyat arizasi yuzasidan kengash xulosasining loyihasini oʻqib eshittiradi.

Shundan keyin kengash majlisida qatnashayotganlarning hammasi chiqib soʻzlashga haqlidirlar.

45. Muhokama tugagandan keyin kengash ochiq ovoz berish vositasida majlisda qatnashayotgan hal qiluvchi ovozga ega kengash aʼzolarining oddiy koʻpchilik ovozi bilan shikoyat arizasi yuzasidan xulosa qabul qiladi.

Kengash raisi va ilmiy kotibi imzolagan stenogramma hamda shikoyat arizasi yuzasidan ovoz berish natijalari keltirilgan xulosa matni koʻrib chiqilgan shikoyat arizasi bilan birga majlisdan keyin 10 kun mobaynida OAKga yuboriladi.

46. Ushbu Nizom boʻyicha barcha tushuntirishlar OAK Rayosati tomonidan belgilangan tartibda beriladi.

2.1- shakl (OʻzR OAKga bir nusxada topshiriladi)

(tashkilot nomi, manzilgoh, telefon, shifrlar, ixtisosliklar va fan sohalarining nomi) ixtisosligi boʻyicha fan doktori (nomzodi) ilmiy darajasini olish uchun dissertatsiya himoya qilish boʻyicha kengash aʼzolari haqidagi

MAʼLUMOT

Izohlar:

1. Roʻyxat boshida kengash raisi, rais oʻrinbosari, ilmiy kotibi (familiyasi, ismi, otasining ismidan keyin qavs ichida bu lavozimlar koʻrsatiladi) haqida maʼlumot beriladi, soʻngra alifbo tartibida aʼzolar haqida maʼlumot keltiriladi.

2. 5- va 7-ustunlarda Oʻzbekiston Respublikasi Fan va texnika davlat qoʻmitasi qarori bilan tasdiqlangan ilmiy xodimlar ixtisosliklarining amal qilib turgan nomenklaturasi boʻyicha ixtisoslik shifri koʻrsatiladi.

3. 8-ustunda kengash aʼzolarining oxirgi besh yil ichidagi ilmiy asarlaridan 3-5 ta bibliografik namunalar keltiriladiki, bular uning 7-ustunida koʻrsatilgan ixtisoslik boʻyicha malakasidan dalolat beradi.

4. Chiziqlar va satr osti izohlari mashinkada bosilmaydi.

2.2 - shakl (OʻzR OAKga bir nusxada topshiriladi)

Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi

BUYRUQ

Izohlar:

1. Chiziqlar va satr osti izohlari mashinkada bosilmaydi.

2. Buyruq raqami va chiqqan kuni, kengash shifri OʻzR OAKda qoʻyiladi. Buyruq soʻnggi varagʻining orqa tomonida qayerlarga yuborilishi koʻrsatiladi.

2.3 - shakl (OʻzROAKga bir nusxada topshiriladi)

Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi

BUYRUQ

Izohlar:

1. Chiziqlar va satr osti izohlari mashinkada bosilmaydi.

2. Buyruq raqami va chiqqan sanasi OʻzR OAKda qoʻyiladi. Buyruq soʻnggi varagʻining orqa tomonida qayerlarga yuborilishi koʻrsatiladi.

2.4 - shakl

Kengashning 19___ yildagi ishi haqida

HISOBOT

Hisobotda quyidagi maʼlumotlar boʻlishi kerak:

1. Oʻtkazilgan majlislar soni.

2. Kengash aʼzolarining majlislarda qatnashish faolligi.

3. Hisobot yilida kengash koʻrib chiqqan dissertatsiyalarning qisqacha tahlili, bunda quyidagilar alohida koʻrsatiladi:

koʻrib chiqilgan ishlar mavzuining tahlili, mavzularning xalq xoʻjaligini rivojlantirish dasturlariga aloqadorligi va ilmiy-tadqiqot ishlarining istiqbolli yoʻnalishlarini aniqlashga doir takliflar;

koʻrib chiqilgan ishlarning ilmiy natijalaridan xalq xoʻjaligida qay darajada foydalanilayotganligi toʻgʻrisida maʼlumot.

4. Fan doktori ilmiy darajasini olish uchun topshirilgan va koʻrib chiqilgan dissertatsiyalar haqida maʼlumot.

5. Fan nomzodi ilmiy darajasini olish uchun topshirilgan va koʻrib chiqilgan dissertatsiyalar haqidagi maʼlumot.

6. Ilmiy maʼruza shaklida himoya qilingan dissertatsiyalar soni.

7. Tutash ixtisosliklarda bajarilgan dissertatsiyalar himoyasi toʻgʻrisida maʼlumot.

8. Kengash huzurida tashkil etilgan bir martalik kengashlarda himoya qilingan dissertatsiyalar haqida maʼlumot.

9. Attestatsiya ishlarini takomillashtirish boʻyicha taklif va mulohazalar.

Izohlar:

1. Maʼlumotlar kasr shaklida keltiriladi, uning suratida koʻrib chiqilgan dissertatsiyalar soni mahrajida esa doktoranturada (fan doktori ilmiy darajasini olishga daʼvogar himoyachi uchun) yoki aspiranturada (bitirgan vaqtidan qatʼi nazar fan nomzodi ilmiy darajasini olishga daʼvogar himoyachi uchun) tayyorgarlikdan oʻtgan himoya qiluvchilar dissertatsiyalarining soni koʻrsatiladi.

2. Ixtisosliklar tutash kelgan mavzuda bajarilgan dissertatsiyalar uchun 2- va 3-bandlar jadvalida OʻzR OAK buyrugʻiga binoan kengashga qaysi ixtisosliklar boʻyicha dissertatsiya himoyasini oʻtkazish huquqi berilgan boʻlsa, faqat shu ixtisosliklargina koʻrsatiladi.

3.1 - shakl

Himoya qiluvchi kengashga topshiradigan hujjatlar

roʻyxati

1. Himoya qiluvchining arizasi.

2. Xodimlarni hisobga olish boʻyicha fotosurat yopishtirilgan va ishlaydigan joyi tasdiqlagan shaxsiy varaqa (2 nusxada).

3. Fan nomzodi ilmiy darajasini oluvchi uchun oliy oʻquv yurtini bitirganligi haqidagi diplomning tasdiqlangan nusxasi (1 nusxa) yoki fan doktori ilmiy darajasini oluvchi uchun fan nomzodi diplomining tasdiqlangan nusxasi (1 nusxa).

4. Fan nomzodi ilmiy darajasini oluvchi uchun nomzodlik imtihonlarini topshirganligi haqidagi guvohnoma yoki dotsent (professor) attestatining tasdiqlangan nusxasi (2 nusxa).

5. Respublika kutubxona fondiga, kengash tuzilgan tashkilot kutubxonasiga, opponentlarga va yetakchi muassasaga yuborish uchun zarur miqdordagi nusxalarda avtoreferat va dissertatsiya. Dissertatsiya va avtoreferat hamma nusxalariga dissertatsiyaning birinchi betiga (3.2-shakl) va avtoreferatning muqovasiga (3.3-shakl) himoya qiluvchi imzo chekadi.

6. Dissertatsiya bajarilgan yoki himoya qiluvchi birkitilgan tashkilotning xulosasi, unda dissertatsiya ishining mavzui qayerda va qachon tasdiqlanganligi koʻrsatilishi lozim (1 nusxa).

Xulosa kafedra (laboratoriya, sektor, boʻlim) majlisi bayonnomasidan batafsil koʻchirma shaklida rasmiylashtiriladi, tashkilot rahbari tomonidan tasdiqlanadi va tashkilot gerbli muhri qoʻyilgan boʻladi.

7. Dissertatsiyani himoyaga qabul qilib olayotgan kengash faoliyat koʻrsatib turgan tashkilotning xulosasi (dissertatsiya bajarilgan tashkilot boshqa joyda boʻlgan hollarda).

Xulosa kafedra (laboratoriya, sektor, boʻlim) majlisi bayonnomasidan batafsil koʻchirma shaklida rasmiylashtiriladi, tashkilot rahbari tomonidan tasdiqlanadi va tashkilot gerbli muhri qoʻyilgan boʻladi.

8. Dissertatsiya muhokama qilingan tashkilotlarning xulosalari. Ushbu xulosalar kafedra (laboratoriya, sektor, boʻlim) majlisi bayonnomasidan batafsil koʻchirma shaklida rasmiylashtiriladi, majlis raisi va ilmiy kotibi tomonidan imzolanadi, tashkilot muhri qoʻyiladi.

9. Himoya qiluvchining ilmiy ishlari nusxasi (fan doktori ilmiy darajasini oluvchi uchun asosiy ilmiy ishlari nusxasi).

10. Fan nomzodi ilmiy darajasiga daʼvogarlarning ilmiy rahbari (maslahatchisi) ikkita boʻlgan hollarda unga asosnoma va ilmiy kengashning qaroridan koʻchirma.

11. Himoya qiluvchining ilmiy-pedagoglik, ishlab chiqarish faoliyati baholangan, kengashga topshirish uchun uning asosiy ish joyidan berilgan tashkilotning rahbari imzolagan va berilgan vaqti koʻrsatilib, gerbli muhr bosilgan tavsifnoma (1 nusxa).

12. Himoya qiluvchining (ikkita varaqada) va dissertatsiya himoyasi oʻtadigan kengashning (ikkita varaqada) manzilgohlari koʻrsatilgan, markali toʻrtta pochta varaqasi. Kengash manzilgohi yozilgan varaqa orqa tomonining yuqoridagi burchagida himoya qiluvchining familiyasi, ismi, otasining ismi va olmoqchi boʻlgan ilmiy daraja koʻrsatiladi.

13. Nomzodlik dissertatsiyasi avtoreferati (doktorlik ilmiy darajasi talabgori uchun 2 nusxa).

14. Hammualliflikdagi ilmiy ishlarini doktorlik dissertatsiyasiga toʻla yoki qisman kiritish uchun himoya qiluvchining asosiy hammualliflarining yozma roziligi (2 nusxa).

3.2 - shakl

Dissertatsiyaning birinchi varagʻi

Dissertatsiya bajarilgan tashkilotning nomi

Qoʻlyozma huquqida

Familiyasi, ismi, otasining ismi

Dissertatsiya nomi

Ixtisoslik shifri va nomi

(ilmiy xodimlar ixtisosliklarining roʻyxati boʻyicha beriladi)

________________ fanlari nomzodi (doktori) ilmiy darajasini olish uchun dissertatsiya

Ilmiy rahbar

Shahar — yil

Izoh:

1. Fan doktori ilmiy darajasiga daʼvogarning dissertatsiyasi muqovasida ilmiy maslahatchi yozilmaydi.

3.3 - shakl

Avtoreferat muqovasi

Kengashi dissertatsiyani himoyaga qabul qilib olgan tashkilot nomi

Qoʻlyozma huquqida

Familiyasi, ismi, otasining ismi

Dissertatsiya nomi

Ixtisoslik shifri va nomi

(ilmiy xodimlar, ixtisosliklarining roʻyxati boʻyicha beriladi)

_________________ fanlari nomzodi (doktori) ilmiy darajasini ish uchun dissertatsiya avtoreferati

Shahar — yil

Avtoreferat muqovasining orqa tomoni

Izohlar:

1. Avtoreferatning titul varagʻi boʻlmaydi.

2. Fan doktori ilmiy darajasiga daʼvogarning avtoreferati muqovasida ilmiy maslahatchi yozilmaydi.

3. Chiziqlar va satr osti izohlari mashinkada bosilmaydi.

4.1 - shakl

Ilmiy daraja berish boʻyicha OʻzR OAKga yuboriladigan attestatsiya ishi hujjatlarining

ROʻYXATI

1. Kengash raisi imzolagan tashkilot blankidagi yoʻllanma xat.

2. 4.7a yoxud 4.7b-shakl boʻyicha maʼlumotnoma (2 nusxa).

3. Xodimlar hisobi boʻyicha shaxsiy varaqa fotosurat yopishtirilgan va ish joyidan tasdiqlangan boʻlishi kerak (1 nusxa).

Familiyasi, ismi-sharifining oʻzbekcha (pasport boʻyicha) va inglizcha shaklda yozilgan shakllari, ilmiy daraja daʼvogari imzolagan, ilmiy kotib tasdiqlagan boʻlishi kerak (1 nusxa).

4. Dissertatsiya 2 nusxa va avtoreferat 4 nusxa.

5. Kengash raisi va ilmiy kotib tomonidan imzolangan kengash majlisi stenogrammasi (birinchi nusxa), unda rasmiy opponentlar va yetakchi tashkilotning xulosalari ilova qilinadi, Oʻzbekiston Respublikasi Oliy Attestatsiya komissiyasining buyrugʻi bilan tasdiqlangan kengash aʼzolaridan himoyada ishtirok etganlari, shuningdek uning tarkibiga qoʻshimcha tarzda kiritilgan kengash aʼzolari koʻrsatiladi.

Kengash aʼzolarining qayd varaqasi stenogrammaga ilova qilinadi (4.4-shakl).

6. Fan nomzodi ilmiy darajasini oluvchi uchun nomzodlik imtihonlarini topshirganligi haqidagi guvohnoma (1 nusxa).

7. Dissertatsiyani himoyaga qabul qilib olgan va dissertatsiya bajarilgan tashkilotlarning xulosalari (1 nusxadan). Dissertatsiya muhokama qilingan tashkilotlarning ilmiy seminarlari xulosalari (1 nusxadan).

8. Himoya qiluvchining ilmiy ishlari nusxalari.

9. Fan nomzodi ilmiy darajasiga daʼvogarning ilmiy rahbari (maslahatchisi) ikkita boʻlsa, uning uchun asosnoma va ilmiy kengash qaroridan koʻchirma (1 nusxa).

10. Doktorlik ilmiy darajasiga talabgorning nomzodlik dissertatsiyasi avtoreferati (1 nusxa).

11. Doktorlik ilmiy darajasi talabgori uchun hammualliflikdagi ishlarini dissertatsiyaga kiritish haqida asosiy hammualliflarining roziligi (1 nusxa).

12. 4.9-shakl boʻyicha qaydlov hisob varaqasi (1 nusxa).

13. 4.11-shakl boʻyicha ishdagi hujjatlar roʻyxati (1 nusxa).

Yuqorida aytib oʻtilgan barcha hujjatlar teztikkichga joylanib, Oʻzbekiston Respublikasi OAKga yuboriladi.

Teztikkichning ichki tomoniga xatjild yopishtirilib, unga dissertatsiyaning hisob varaqasi va dissertatsiyaning qaydlov-hisob varaqasi bilan birga daʼvogarning (ikki varaqada) va kengashning manzili (ikki varaqada) koʻrsatilgan markali toʻrtta aloqa varaqasi solib qoʻyiladi.

Varaqaning orqa tomonida kengash manzilgohi, daʼvogarning familiyasi, ismi-sharifi, shuningdek, u talabgor boʻlayotgan ilmiy daraja nomi koʻrsatiladi.

Ovoz berish natijalari boʻyicha salbiy qaror chiqarilgan taqdirda kengash himoya qilingan kundan boshlab bir oy muddat ichida Oʻzbekiston Respublikasi Oliy Attestatsiya komissiyasiga tashkilot blankida yoʻllanma xat joʻnatadi. Xat kengash raisi tomonidan imzolanib, qaytarilgan dissertatsiyaning 4.10-shakl boʻyicha hisob varaqasi hamda avtoreferat, kengash raisi va ilmiy kotibi imzolagan kengash majlisi stenogrammasi unga ilova qilinadi.

4.2 - shakl

Kengashda saqlanadigan ilmiy daraja berish boʻyicha attestatsiya hujjatlarining

ROʻYXATI

Kengashda attestatsiya ishining dublikati saqlanib, unga sanab oʻtilgan hujjatlarning (4.1-shakl) ikkinchi nusxalaridan tashqari, quyidagilar kiradi:

1. 4.6-shakl boʻyicha hisob komissiyasi majlisining bayonnomasi (1 nusxa).

2. Fan nomzodi ilmiy darajasiga daʼvogarlar uchun oliy maʼlumot haqidagi diplomning tasdiqlangan koʻchirma nusxasi yoki fan doktori ilmiy darajasiga daʼvogarlar uchun fan nomzodi diplomining tasdiqlangan koʻchirma nusxasi (1 nusxa).

3. Himoya qiluvchiga oʻz ish joyidan uning ilmiy-pedagoglik, ishlab chiqarish faoliyati baholangan, rahbar tomonidan tasdiqlangan hamda berilgan vaqti koʻrsatilib, gerbli muhr bosilgan tavsifnoma (1 nusxa).

4. Ilmiy ishlarning daʼvogar tomonidan imzolanib, ish joyidan tasdiqlangan roʻyxati (1 nusxa).

5. Rasmiy opponentlar va ilmiy rahbarning fikr-mulohazalari bayoni (taqriz) (1 nusxa).

6. Dissertatsiya va avtoreferat yuzasidan kelgan taqrizlar (1 nusxada).

7. 4.4-shakl boʻyicha kengash aʼzolarining hozir boʻlish varaqasi (1 nusxa).

8. Yuborilgan kuni koʻrsatilgan hamda avtoreferat joʻnatilgan manzilgohlarning ilmiy kotib imzolagan roʻyxati (1 nusxa).

9. Dissertatsiyani hisobga olish varaqasi (1 nusxa).

4.3 - shakl

Dissertatsiya avtoreferati yuborilishi shart boʻlgan tashkilotlar

roʻyxati

1. Rossiya davlat kutubxonasi (101000, Moskva, Vozdvijenka koʻchasi.2).

2. Rossiya milliy kutubxonasi (101011, Sankt-Peterburg, Sadovaya koʻchasi. 18).

3. Ukraina Respublikasining Davlat Respublika kutubxonasi (252011, Kiyev, Kirov koʻchasi, 1).

4. Belorus Respublikasi Davlat kutubxonasi (220636, Minsk, Krasnoarmeyskaya koʻchasi, 9).

5. Oʻzbekiston Respublikasi Alisher Navoiy nomidagi Davlat kutubxonasi (700000, Toshkent, GSP, Mustaqillik maydoni, 5).

6. Gruziya Respublikasining Davlat respublika kutubxonasi (380007, Tbilisi, Ketsxoveli koʻchasi, 5).

7. Qozogʻiston Respublikasining Davlat kutubxonasi (480021, Almati, Abay shoh koʻchasi, 14).

8. M. F. Oxundov nomidagi Ozarbayjon Respublika kutubxonasi (370601, Boku, Markaz, Hoqoniy koʻchasi, 29).

9. Qirgʻiziston Respublikasining Davlat respublika kutubxonasi (720873, Bishkek, Ogonboyev koʻchasi, 242).

10. Tojikiston Respublikasining Firdavsiy nomidagi Davlat respublika kutubxonasi (734610, Dushanbe, Lenin shoh koʻchasi, 34).

11. A. F. Misnyakov nomidagi Armaniston Davlat Respublika kutubxonasi (375003. Yerevan, Teryan koʻchasi, 72).

12. K. Marks nomidagi Turkmaniston Davlat Respublika kutubxonasi (744000. Ashgabad. Karl Marks maydoni).

13. Toshkent Davlat dorilfununi (700095, Toshkent, Talabalar shaharchasi, 35).

14. Oʻzbekiston Respublikasi Fanlar akademiyasining asosiy kutubxonasi (700170, Toshkent, Moʻminov koʻchasi, 13).

15. Respublika ilmiy-texnika kutubxonasi (700000, Buyuk Turon koʻchasi, 17).

16. Oʻzbekiston Respublikasi OAKi (700000, Toshkent, Gogol koʻchasi, 70).

17. Oʻzbekiston Respublikasi ilmiy-pedagogik kutubxonasi (700003, Toshkent, Olmazor koʻchasi, 174) (pedagogika fanlari uchun).

18. Rossiya Federatsiyasi OAKi (103852, Moskva, Tver koʻchasi, 11)

19. Ukraina OAKi (252001, Kiyev, Kreshchatik koʻchasi, 34).

20. Belorus OAKi (220072, Minsk, Skoreni shoh koʻchasi, 66).

21. Qozogʻiston OAKi (480012, Almati, Amangeldi koʻchasi, 61).

22. Qirgʻiziston OAKi (720039, Bishkek, Erkindik koʻchasi, 2).

23. Ozarbayjon OAKi (370010, Boku, Fikret Amir koʻchasi, 9).

24. Moldova OAKi (277004, Kishinev, Shtefan Chen Mars bulvari, 180).

25. Turkmaniston OAKi (744000, Ashgabat, Gogol koʻchasi, 15).

26. M. V. Lomonosov nomidagi MDU (117234, Moskva. Leninskiye gori, MDU).

4.4 - shakl

Eslatma:

1. “Familiyasi, ismi, otasining ismi” ustuniga kengashning hal qiluvchi ovozga ega hamma aʼzolarining familiyasi, ismi, otasining ismi yoziladi.

2. Chiziqlar va satr osti izohlari mashinkada bosilmaydi.

4.5 - shakl

Byulleten

Izohlar:

1. “Ilmiy darajaga munosib” ustunida ilmiy daraja va fan sohasi ham koʻrsatiladi.

2. Byulletenlarga imzo chekilmaydi. “Ovoz berish natijalari” ustunida keraksizi oʻchirib tashlanadi.

3. Chiziqlar va satr osti izohlari mashinkada bosilmaydi.

4.6 - shakl

Kengash saylagan hisob komissiyasi majlisining____ - sonli

BAYoNNOMASI

Izoh:

Chiziqlar va satr osti izohlari mashinkada bosilmaydi.

4.7 a - shakl

Maʼlumotnoma

Izohlar:

1. Hujjatlar, tartib raqami OʻzR OAKda qoʻyiladn.

2. Agar yashirin ovoz berish bir martadan koʻp oʻtkazilsa, hisob komissiyasi bayonnomasining tasdiqlanmaganligi sabablari koʻrsatiladi.

3. Maʼlumotnomada tarqatilishi cheklangan maʼlumotlar boʻlmasligi lozim.

4. Maʼlumotnoma satrlar oraligʻi 1,5 interval qilib bosilishi kerak, bunda satr osti izohlari mashinkada bosilmaydi (hajmi 5 sahifa boʻlishi tavsiya etiladi).

5. (*) belgisi qoʻyilgan satrlar, zarur boʻlganda, mashinkada bosiladi. 6. OʻzR OAK axborot tizimi uchun dissertatsiyaning tasnifiy belgilari kengash xulosasiga muvofiq belgilar har bir guruhidan keltirilgan roʻyxat boʻyicha bittadan tanlab olinadi (bunda tartib raqamlari va nomlari koʻrsatiladi):

4.7 b - shakl

Maʼlumotnoma

Izohlar:

1. Hujjatning tartib raqami OʻzR OAKda qoʻyiladi.

2. Agar yashirin ovoz berish bir martadan koʻp oʻtkazilsa, hisob komissiyasi bayonnomasi tasdiqlanmaganligining sabablari koʻrsatiladi.

3. Maʼlumotnomada tarqatilishi cheklangan maʼlumotlar boʻlmasligi kerak.

4. Maʼlumotnoma satrlar oraligʻi 1,5 interval qilib bosilishi kerak, bunda satr osti izohlari mashinkada bosilmaydi (hajmi 5 sahifa boʻlishi tavsiya etiladi).

5. (*) belgisi qoʻyiladigan satrlar zarur hollarda bosiladi.

6. OʻzR OAK axborot tizimi uchun dissertatsiyaning tasnifiy belgilari kengash xulosasiga muvofiq belgilarning har bir guruhidan keltirilgan roʻyxat boʻyicha bittadan tanlab olinadi (bunda tartib raqamlari va nomlari koʻrsatiladi):

4.9 - shakl

ROʻYXATDAN OʻTKAZISh-HISOBGA OLISh VARAQASI

Izoh:

“Ish N”, “Boʻlim indeksi”, “Kelgan vaqti” ustunlari OʻzR OAKda toʻldiriladi.

4.10 - shakl

Qaytarilgan dissertatsiyani hisobga olish

varaqasi

Izoh:

Oʻlchami 148x210 mm boʻlgan oq qogʻoz varagʻi mashinkada toʻldiriladi.

4.11 - shakl

Attestatsiya ishida kerak boʻlgan hujjatlar

ROʻYXATI

Izohlar:

Ishga tikilgan hamma hujjatlarning betlari uzluksiz tartibda boʻlishi kerak.