Jamoat salomatligi va xavfsizligini taʼminlash maqsadida transmilliy narkotahdidlarga qarshi kurashish mavzusidagi xalqaro forum yakunlari boʻyicha chora-tadbirlar rejasini tasdiqlash toʻgʻrisida (473-son)
07.09.2026
Oʻzbekiston Respublikasi Vazirlar Mahkamasining
qarori
Mamlakatimizda aholi salomatligini muhofaza qilish, millat genofondini asrash, giyohvandlik vositalari va psixotrop moddalarning noqonuniy muomalasi bilan bogʻliq uyushgan jinoyatchilik hamda transmilliy narkotahdidlarga qarshi kurashish samaradorligini ilmiy yondashuvlar asosida yanada oshirish maqsadida Vazirlar Mahkamasi qaror qiladi:
1. 2026-yil 20-21-aprel kunlari Samarqand shahrida Jamoat salomatligi va xavfsizligini taʼminlash maqsadida transmilliy narkotahdidlarga qarshi kurashish mavzusidagi xalqaro forum oʻtkazilgani maʼlumot uchun qabul qilinsin.
2. Jamoat salomatligi va xavfsizligini taʼminlash maqsadida transmilliy narkotahdidlarga qarshi kurashish mavzusidagi Samarqand xalqaro forumida ilgari surilgan tashabbuslar hamda Oliy va yuqori darajada oʻtkazilgan uchrashuvlarda erishilgan kelishuvlarni amalga oshirish boʻyicha chora-tadbirlar rejasi (keyingi oʻrinlarda — chora-tadbirlar rejasi) ilovaga muvofiq tasdiqlansin.
3. Chora-tadbirlar rejasida belgilangan vazifalarning oʻz vaqtida va samarali amalga oshirilishini taʼminlash hamda aniq natijalarga erishish yuzasidan masʼuliyat davlat organlari va idoralarining shaxsan birinchi rahbarlari zimmasiga yuklansin.
4. Masʼul davlat organlari va idoralari har oyning yakunida chora-tadbirlar rejasining ijrosi yuzasidan hisobotlarni Narkotiklar va oʻqotar qurollarni nazorat qilish agentligiga kiritib borsin.
5. Belgilansinki, Narkotiklar va oʻqotar qurollarni nazorat qilish agentligi:
chora-tadbirlar rejasida nazarda tutilgan topshiriqlarning izchil, sifatli va oʻz vaqtida amalga oshirilishini doimiy ravishda va qatʼiy nazorat qilib boradi;
har oyning yakunida masʼul davlat organlari va idoralar rahbarlarining chora-tadbirlar rejasida belgilangan ustuvor vazifalarning sohalar kesimida ijrosi yuzasidan hisobotlarini eshitadi, natijadorligi boʻyicha tanqidiy muhokamalar oʻtkazadi;
har chorakda chora-tadbirlar rejasida belgilangan vazifalar ijrosi yuzasidan amalga oshirilgan ishlar va erishilgan aniq natijalar yuzasidan Oʻzbekiston Respublikasi Prezidenti Administratsiyasi va Vazirlar Mahkamasiga axborot kiritib boradi.
6. Ushbu qarorning bajarilishini nazorat qilish Oʻzbekiston Respublikasi Prezidenti Administratsiyasi huzuridagi Narkotiklar va oʻqotar qurollarni nazorat qilish agentligi direktori vazifasini vaqtincha bajaruvchi F. Xasanov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 7-sentabr,
473-son
Vazirlar Mahkamasining 2026-yil 7-sentabrdagi 473-son qaroriga ILOVA
Jamoat salomatligi va xavfsizligini taʼminlash maqsadida transmilliy narkotahdidlarga qarshi kurashish mavzusidagi Samarqand xalqaro forumida ilgari surilgan tashabbuslar hamda Oliy va yuqori darajada oʻtkazilgan uchrashuvlarda erishilgan kelishuvlarni amalga oshirish boʻyicha
CHORA-TADBIRLAR REJASI
(2026-yil 20-21-aprel, Samarqand va Toshkent shaharlari)
Izoh. Chora-tadbirlar rejasida belgilangan vazifalar ijrosi muddatlariga xorij tomoni bilan muzokaralardan kelib chiqib, oʻzgartirish va qoʻshimchalar kiritilishi mumkin.