Sud binolari, sud protsesslari va ular ishtirokchilarining xavfsizligini taʼminlash tartibi toʻgʻrisidagi yoʻriqnomaga oʻzgartirishlar kiritish haqida (2981-5-son)
19.08.2026
Oʻzbekiston Respublikasi Oliy sudi Oʻzbekiston Respublikasi Ichki ishlar vazirligi Oʻzbekiston Respublikasi Milliy gvardiyasining
Qarori
[Oʻzbekiston Respublikasi Adliya vazirligi tomonidan 2026-yil 19-avgustda roʻyxatdan oʻtkazildi, roʻyxat raqami 2981-5]
Oʻzbekiston Respublikasi Prezidentining 2025-yil 28-noyabrdagi PQ-360-son “Ichki ishlar organlarining qoʻriqlash sohasidagi faoliyatini samarali tashkil etish chora-tadbirlari toʻgʻrisida”gi qaroriga muvofiq Oʻzbekiston Respublikasi Oliy sudi, Ichki ishlar vazirligi hamda Milliy gvardiyasi qaror qiladi:
1. Oʻzbekiston Respublikasi Oliy sudi va Ichki ishlar vazirligining 2018-yil 23-fevraldagi 11-87, 20-son qarori (roʻyxat raqami 2981, 2018-yil 15-mart) (Qonun hujjatlari maʼlumotlari milliy bazasi, 16.03.2018-y., 10/18/2981/0900-son) bilan tasdiqlangan Sud binolari, sud protsesslari va ular ishtirokchilarining xavfsizligini taʼminlash tartibi toʻgʻrisidagi yoʻriqnomaga ilovaga muvofiq oʻzgartirishlar kiritilsin.
2. Mazkur qaror rasmiy eʼlon qilingan kundan eʼtiboran kuchga kiradi.
Oliy sud raisi R. MAXMUDOVA
Toshkent sh.,
2026-yil 29 iyul,
08/261-26-son
Ichki ishlar vaziri A. TOSHPULATOV
Toshkent sh.,
2026-yil 7 avgust,
QQ-5-son
Milliy gvardiya qoʻmondoni B. TASHMATOV
Toshkent sh.,
2026-yil 10 iyul,
24-son
Oʻzbekiston Respublikasi Oliy sudining 2026-yil 29-iyuldagi 08/261-26-son, Oʻzbekiston Respublikasi Ichki ishlar vazirligining 2026-yil 7-avgustdagi QQ-5-son, Oʻzbekiston Respublikasi Milliy gvardiyasining 2026-yil 10-iyuldagi 24-son qaroriga ILOVA
Sud binolari, sud protsesslari va ular ishtirokchilarining xavfsizligini taʼminlash tartibi toʻgʻrisidagi yoʻriqnomaga kiritilayotgan oʻzgartirishlar
1. Muqaddima quyidagi tahrirda bayon etilsin:
“Ushbu Yoʻriqnoma sud binolari, sud protsesslari va ular ishtirokchilari hamda yaqin qarindoshlarining xavfsizligini taʼminlash tartibini belgilaydi.”.
2. 1-bandda:
birinchi xatboshidagi “Oʻzbekiston Respublikasi Milliy gvardiyasi qoʻriqlash xizmati” degan soʻzlar “tuman va shahar ichki ishlar organlari huzuridagi qoʻriqlash xizmatlari (boʻlinmalari) (bundan buyon matnda qoʻriqlash xizmati deb yuritiladi)” degan soʻzlar bilan almashtirilsin;
ikkinchi xatboshidagi “ichki ishlar organlari” degan soʻzlar “ichki ishlar organlarining sohaviy xizmatlari” degan soʻzlar bilan almashtirilsin.
3. 7-banddagi “Oʻzbekiston Respublikasi Milliy gvardiyasining hududiy Qoʻriqlash boshqarmalari” degan soʻzlar “Qoraqalpogʻiston Respublikasi, viloyatlar va Toshkent shahri ichki ishlar organlari huzuridagi qoʻriqlash xizmatlari (bundan buyon matnda hududiy qoʻriqlash xizmati deb yuritiladi)” degan soʻzlar bilan almashtirilsin.
4. 71-band quyidagi tahrirda bayon etilsin:
“71. Sud binolari, sud protsesslari va ularning ishtirokchilarini xavfsizligini taʼminlash maqsadida har 6 oyda kamida bir marotaba hududiy qoʻriqlash xizmati hamda Departamentning masʼul xodimlari ishtirokida sud binolarining Oʻzbekiston Respublikasi Oliy sudi va Ichki ishlar vazirligining kelishuvida nazarda tutilgan muhandislik-texnik vositalar bilan jihozlanganligi hamda ularning mustahkamligi oʻrganib chiqiladi.
Bunda sud binolarini qoʻriqlash boʻyicha tuzilgan shartnoma talablarida koʻrsatilgan qoʻriqlash xizmati xodimlariga xizmat oʻtashlari uchun yaratilgan shart-sharoitlar ham tekshiriladi.
Oʻrganish natijasi boʻyicha dalolatnoma rasmiylashtiriladi. Oʻrganish davomida kamchiliklar aniqlangan hollarda dalolatnomada ushbu kamchiliklarni bartaraf etishning aniq muddatlari koʻrsatilishi shart.”.
5. 9-banddagi “Oʻzbekiston Respublikasi Milliy gvardiyasining hududiy Qoʻriqlash boshqarmasining hududiy boʻlinmalari” degan soʻzlar “Qoʻriqlash xizmati” degan soʻzlar bilan almashtirilsin;
6. 302-bandda:
birinchi xatboshidagi “Oliy sudi, Ichki ishlar vazirligi va Milliy gvardiyasi” degan soʻzlar “Oliy sudi va Ichki ishlar vazirligi” degan soʻzlar bilan almashtirilsin;
ikkinchi xatboshidagi “Oliy sudi, Ichki ishlar vazirligi va Milliy gvardiyasining” degan soʻzlar “Oliy sudi va Ichki ishlar vazirligining” degan soʻzlar bilan almashtirilsin.