Xavfli chiqindilarni boshqarish samaradorligini oshirish chora-tadbirlari toʻgʻrisida (PQ-289-son)

03.08.2026

Oʻzbekiston Respublikasi Prezidentining

qarori

2030-yilgacha boʻlgan davrda Oʻzbekiston Respublikasining Atrof-muhitni muhofaza qilish konsepsiyasida nazarda tutilgan ustuvor vazifalarni izchil amalga oshirish, togʻ-kon, metallurgiya va kimyo sanoati, neft-gaz va elektr energetika sohalari hamda boshqa ishlab chiqarish korxonalarida hosil boʻlayotgan radioaktiv va kimyoviy xavfli chiqindilarni boshqarish samaradorligini oshirish maqsadida qaror qilaman:

I. Asosiy maqsadlar va ustuvor yoʻnalishlar

1. Quyidagilar mazkur qarorning asosiy maqsadlari va ustuvor yoʻnalishlari etib belgilansin:

(a) togʻ-kon, metallurgiya va kimyo sanoati, neft-gaz va elektr energetika sohalari va boshqa ishlab chiqarish korxonalarida hosil boʻlayotgan radioaktiv chiqindilar hamda Chiqindilarning tasnif katalogiga muvofiq I — IV xavflilik sinfiga mansub kimyoviy xavfli chiqindilarni (keyingi oʻrinlarda — xavfli chiqindilar) qayta ishlash darajasini 20 foizga yetkazish;

(b) qayta ishlash imkoni boʻlmagan xavfli chiqindilarni xavfsiz va minimal hajmda joylashtirish mexanizmlarini amaliyotga toʻliq tatbiq etish;

(v) maxsus inshootlar va ochiq maydonlarda saqlanayotgan (joylashtirilgan) xavfli chiqindilarning atrof-muhitga salbiy taʼsirini kamaytirish;

(g) xavfli chiqindilarning hosil boʻlish manbalari, ularning hajmi, tarkibi va joylashtirish joylari boʻyicha tasniflangan davlat hisobini yuritish;

(d) xavfli chiqindilar hajmi va ularning xavfli xususiyatlarini kamaytirish (ishlab chiqarishda foydalaniladigan xavfli moddalarni xavfsizlariga almashtirish va texnologiyalarni modernizatsiya qilish);

(j) xavfli chiqindilarning tashilishi, saqlanishi va joylashtirilishi ustidan davlat nazoratini taʼminlash, ularning noqonuniy muomalasining oldini olish;

(z) hosil boʻlgan xavfli chiqindilar bilan bogʻliq ishlarni amalga oshirishda ekologik va xavfsizlik talablariga rioya etish hamda ushbu ishlarni belgilangan tartibda moliyalashtirish.

II. Xavfli chiqindilarni boshqarish samaradorligini oshirish

2. 2027-yil 1-yanvardan boshlab xavfli chiqindilarni hosil qiluvchi tashkilotlar (xavfli chiqindilarning egalari boʻlgan yuridik shaxslar):

(a) ekologik ekspertiza xulosasiga muvofiq xavfli chiqindilarni boshqarish boʻyicha yillik rejalarni (keyingi oʻrinlarda — yillik rejalar) ishlab chiqadi hamda Chiqindilarni boshqarish va sirkulyar iqtisodiyotni rivojlantirish agentligining hududiy boshqarmalari bilan kelishadi;

(b) yillik rejalarda quyidagi koʻrsatkichlarni nazarda tutadi:

(i) xavfli chiqindilar hosil boʻlish hajmini kamaytirish;

(ii) xavfli chiqindilarni qayta ishlash ulushini oshirish, ularni xavfsiz joylashtirish;

(iii) xavfli chiqindilarni qayta ishlash, zararsizlantirish, utilizatsiya qilish yoki koʻmishga tegishli vakolat, infratuzilma hamda ekologik ekspertizaning ijobiy xulosasiga ega boʻlgan ixtisoslashgan tashkilotlarga (keyingi oʻrinlarda — ixtisoslashgan tashkilotlar) qayta ishlash yoki koʻmish uchun topshirish;

(v) xavfli chiqindilarni qayta ishlash boʻyicha zamonaviy muhandislik yechimlari va texnologiyalarni texnik-iqtisodiy jihatdan asoslangan holda bosqichma-bosqich joriy etadi.

3. Belgilansinki:

(a) xavfli chiqindilarni (tarkibida qimmatbaho, rangli, noyob, qora metallar va sanoat uchun muhim minerallar mavjud boʻlgan chiqindilar bundan mustasno) hosil qiluvchi tashkilotlarning (xavfli chiqindilarning egalari boʻlgan yuridik shaxslar) xavfli chiqindilar bilan bogʻliq investitsiya loyihalari Chiqindilarni boshqarish va sirkulyar iqtisodiyotni rivojlantirish agentligi (keyingi oʻrinlarda — Agentlik) bilan birgalikda amalga oshiriladi, bunda Agentlik davlat ishtirokchisi hisoblanadi;

(b) Agentlik huzurida davlat muassasasi shaklida Agentlikning budjetdan tashqari mablagʻlari va qonunchilikda taqiqlanmagan boshqa manbalar hisobidan moliyalashtiriladigan Xavfli chiqindilarni boshqarish direksiyasi (keyingi oʻrinlarda — Direksiya) tashkil etiladi;

(v) Fanlar akademiyasining Yadro fizikasi instituti huzuridagi Respublika radioaktiv chiqindilarni saqlash markazi mavjud shtat birliklari va moddiy-texnika bazasi bilan, amaldagi vazifalari, huquq va majburiyatlarini saqlab qolgan holda Agentlik tizimiga oʻtkaziladi;

(g) Yevropa tiklanish va taraqqiyot banki granti doirasida uran konlarida rekultivatsiya ishlarini amalga oshiruvchi Loyihani boshqarish guruhining respublika budjetidan moliyalashtiriladigan shtat birliklari hamda xarid qilingan asosiy vositalar va jihozlar Direksiyaga oʻtkaziladi;

(d) Yevropa tiklanish va taraqqiyot banki granti doirasida uran konlarida rekultivatsiya ishlarini amalga oshiruvchi Loyihani boshqarish guruhining vazifalari Direksiya tomonidan amalga oshiriladi;

(j) Respublika radioaktiv chiqindilarni saqlash markazi va Loyihani boshqarish guruhining amalda budjet mablagʻlari hisobidan saqlanayotgan hamda Agentlik va Direksiyaga oʻtkazilayotgan shtat birliklarini moliyalashtirish tartibi saqlab qolinadi;

(z) Direksiya xodimlariga noqulay mehnat sharoitlari uchun har oylik ish haqiga nisbatan 40 foiz ustama toʻlanadi.

4. Xavfli chiqindilarni boshqarish direksiyasining asosiy vazifalari 1-ilovaga muvofiq tasdiqlansin.

5. Shunday tartib oʻrnatilsinki, unga koʻra:

(a) 2026-yil 1-oktabrdan boshlab xavfli chiqindilarni hosil qiluvchi tashkilotlar statistika hisobotlarini yil yakuniga koʻra shakllantirib boradi;

(b) shakllantirilgan statistika hisobotlari Agentlikning hududiy boshqarmalariga taqdim etib boriladi;

(v) tadbirkorlik subyektlari tomonidan xavfli chiqindilarning hajmi hamda ularning keyingi harakati toʻgʻrisidagi maʼlumotlar belgilangan tartibda Yagona hisobotlar tizimi orqali kiritiladi;

(g) xavfli chiqindilarni hosil qiluvchi tashkilotlar chorak yakuni boʻyicha keyingi oyning 20-sanasiga qadar yillik rejalarda nazarda tutilgan hosil boʻlgan xavfli chiqindilarning hajmi hamda ularning keyingi harakati toʻgʻrisidagi maʼlumotlarni belgilangan shaklda Agentlik axborot tizimiga kiritib boradi;

(d) yillik rejalarda nazarda tutilgan koʻrsatkichlarning bajarilishi ustidan nazorat Ekologiya va iqlim oʻzgarishi milliy qoʻmitasining Davlat ekologik nazorat inspeksiyasi (Ekopolitsiya) tomonidan amalga oshiriladi.

6. Belgilansinki:

(a) barcha foydalanishdan chiqarilgan xavfli chiqindilar (tarkibida qimmatbaho, rangli, noyob, qora metallar va sanoat uchun muhim minerallar mavjud boʻlgan chiqindilar bundan mustasno) saqlanayotgan (joylashtirilgan) maxsus inshootlar va ochiq maydonlar (keyingi oʻrinlarda — maxsus obyektlar) ularni ekologik qayta tiklash uchun zarur boʻlgan mablagʻlar bilan birgalikda bepul asosda Agentlikka oʻtkaziladi. Bunda:

(i) Agentlik tasarrufiga oʻtkazilayotgan maxsus obyektlarni ekologik qayta tiklash (rekultivatsiya qilish) uchun zarur boʻlgan mablagʻlar miqdori maxsus obyektlarni foydalanishdan chiqarayotgan tashkilotlar tomonidan ishlab chiqilgan va tasdiqlangan loyiha-smeta hujjatlarida nazarda tutiladi;

(ii) zarur boʻlgan mablagʻlarni toʻliq va oʻz vaqtida ajratish majburiyatining bajarilishini taʼminlaydigan qonunchilikda nazarda tutilgan kafolat turlaridan biri taqdim etilganda, ushbu mablagʻlar Agentlik bilan kelishilgan reja-jadval asosida ajratilishiga ruxsat beriladi;

(b) tashkiliy-huquqiy shaklidan qatʼi nazar barcha tashkilotlar faoliyati natijasida hosil boʻlgan xavfli chiqindilarni shartnoma asosida faqat ushbu faoliyat turlarini amalga oshirishga ixtisoslashgan tashkilotlarga qayta ishlash, zararsizlantirish, utilizatsiya qilish yoki koʻmish uchun topshiradi;

(v) tashkiliy-huquqiy shaklidan qatʼi nazar barcha tashkilotlarning oʻzlarida tegishli vakolat, infratuzilma va ekologik ekspertizaning ijobiy xulosasi mavjud boʻlgan taqdirda xavfli chiqindilarni oʻzlari qonunchilikka muvofiq qayta ishlashi, zararsizlantirishi, utilizatsiya qilishi yoki koʻmishiga ruxsat beriladi.

III. Tashkiliy-institutsional isloh qilish choralari

7. Quyidagilar Ishlatib boʻlingan yoqilgʻi bilan muomalada boʻlish xavfsizligi toʻgʻrisidagi va radioaktiv chiqindilar bilan muomalada boʻlish xavfsizligi haqidagi Birlashgan Konvensiya hamda “Markaziy Osiyo uchun ekologik qayta tiklash hisobi” doirasida ishlarni amalga oshirishga oid hadli bitim talablariga muvofiq uran merosi obyektlarini ekologik qayta tiklash va ularda barqaror radioekologik holatni taʼminlash uchun masʼul organlar etib belgilansin:

(a) maxsus vakolatli organ (regulator) — Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi;

(b) operator — Ekologiya va iqlim oʻzgarishi milliy qoʻmitasi huzuridagi Chiqindilarni boshqarish va sirkulyar iqtisodiyotni rivojlantirish agentligi.

8. Uran merosi obyektlarini ekologik qayta tiklash va ularda barqaror radioekologik holatni taʼminlash uchun masʼul organlarning asosiy vazifalari 2-ilovaga muvofiq tasdiqlansin.

9. Belgilansinki, quyidagi mablagʻlarning hisobi Agentlikning alohida budjetdan tashqari shaxsiy gʻazna hisob raqamida yuritiladi:

(a) Direksiyaning xavfli chiqindilar bilan bogʻliq ishlarni amalga oshirish boʻyicha xoʻjalik faoliyatidan tushadigan sof daromadning 50 foizi;

(b) Agentlikka foydalanishdan chiqarilgan maxsus obyektni topshirayotgan tashkilotlar tomonidan ekologik qayta tiklash uchun ajratiladigan mablagʻlar.

10. Belgilab qoʻyilsinki, mazkur qarorning 9-bandida nazarda tutilgan mablagʻlar:

(a) xavfli chiqindilar joylashtirilgan maxsus obyektlarni ekologik qayta tiklash va ularni barqaror saqlash;

(b) xavfli chiqindilarning uzoq muddatli monitoringini amalga oshirish;

(v) xavfli chiqindilardan samarali foydalanish hamda xavfli chiqindilar joylashgan hududlardagi aholining sanitariya-epidemiologik osoyishtaligini taʼminlash;

(g) xavfli chiqindilarni qayta ishlash, zararsizlantirish, utilizatsiya qilish yoki koʻmish bilan bogʻliq boshqa chora-tadbirlarni moliyalashtirishga yoʻnaltiriladi.

11. Quyidagilar ikki oy muddatda foydalanishdan chiqarilgan maxsus obyektlarni xatlovdan oʻtkazib, Agentlik tasarrufiga oʻtkaziladigan obyektlar roʻyxati va ulardagi chiqindilar pasportlarini Ekologiya va iqlim oʻzgarishi milliy qoʻmitasiga kiritsin:

(a) Togʻ-kon sanoati va geologiya vazirligi — faoliyati tugatilgan uran konlari (uran merosi obyektlari) hamda foydalanishdan chiqarilgan konchilik faoliyatining xavfli chiqindilarini saqlash obyektlari boʻyicha;

(b) Energetika vazirligi va “Oʻzkimyosanoat” AJ — tizim tashkilotlaridagi foydalanishdan chiqarilgan maxsus obyektlar boʻyicha;

(v) Sanoat, radiatsiya va yadro xavfsizligi qoʻmitasi, Togʻ-kon sanoati va geologiya vazirligi, Sogʻliqni saqlash vazirligi — barcha uran merosi obyektlari boʻyicha;

(g) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari — tegishli hududdagi boshqa tashkilotlarning foydalanishdan chiqarilgan maxsus obyektlari boʻyicha.

12. Belgilansinki:

(a) mazkur qarorning 11-bandiga asosan taqdim etilgan roʻyxatlarga muvofiq maxsus obyektlar (yer uchastkalari) va ulardagi xavfli chiqindilar, ekologik qayta tiklash uchun rejalashtirilgan mablagʻlari bilan birgalikda belgilangan tartibda bepul asosda Agentlik tasarrufiga oʻtkaziladi;

(b) Agentlik tasarrufidagi sobiq uran konlari (uran merosi obyektlari) va xavfli sanoat chiqindilarini saqlash obyektlari joylashgan yer uchastkalari soliq solinmaydigan yer uchastkalari toifasiga kiradi.

13. Ekologiya va iqlim oʻzgarishi milliy qoʻmitasi uran merosi obyektlari Agentlik tomonidan toʻliq qabul qilib olingandan soʻng bir oy muddatda Sogʻliqni saqlash vazirligi va Gidrometeorologiya xizmati agentligi bilan birgalikda ularda uzoq muddatli monitoring oʻtkazish dasturini ishlab chiqib, Sanoat, radiatsiya va yadro xavfsizligi qoʻmitasi bilan kelishgan holda tasdiqlasin. Bunda:

(a) uran merosi obyektlari va ularning sanitariya muhofaza zonasida radioekologik monitoring oʻtkazishga — Direksiya;

(b) uran merosi obyektlari bilan bogʻliq suv obyektlarining radioaktiv ifloslanish darajasining davriy laboratoriya tahlillarini oʻtkazishga — Gidrometeorologiya xizmati agentligi;

(v) uran merosi obyektlariga yaqin joylashgan aholi yashash joylarida radiatsiyaviy kuzatuv oʻtkazishga — Sanitariya-epidemiologik osoyishtalik va jamoat salomatligi qoʻmitasi masʼul etib belgilanadi.

14. Agentlik:

(a) bir oy muddatda Direksiyaning tuzilmasi va nizomini ishlab chiqib, tasdiqlasin hamda Direksiyaning davlat roʻyxatidan oʻtkazilishini taʼminlasin;

(b) ikki oy muddatda Direksiyani tegishli faoliyat yoʻnalishi boʻyicha amaliy tajribaga ega boʻlgan malakali kadrlar bilan jamlash, shuningdek, zarur moddiy-texnika bazasini shakllantirish uchun maxsus va yengil avtotransport vositalari, mebel, tashkiliy texnika va boshqa asosiy vositalar bilan taʼminlash choralarini koʻrsin;

(v) Direksiya faoliyatining moliyaviy taʼminotini belgilangan tartibda amalga oshirib borsin.

15. Davlat aktivlarini boshqarish agentligi Toshkent shahar hokimligi bilan birgalikda bir oy muddatda Agentlik va Direksiyani Toshkent shahridagi davlat mulki boʻlgan boʻsh turgan maʼmuriy binoga operativ boshqarish huquqi asosida bepul joylashtirsin.

16. Ekologiya va iqlim oʻzgarishi milliy qoʻmitasi 2027-yil 1-yanvarga qadar manfaatdor vazirlik va idoralar hamda tashkilotlar oʻrtasida xavfli chiqindilar boʻyicha axborot almashish va ular monitoringini amalga oshirishga qaratilgan axborot tizimini ishlab chiqsin. Bunda:

(a) Agentlik axborot tizimini yaratish va joriy etishda buyurtmachi hisoblanadi hamda uni yaratish va keyinchalik moliyaviy qoʻllab-quvvatlash Agentlikning budjetdan tashqari mablagʻlari hisobidan amalga oshiriladi;

(b) axborot tizimida xavfli chiqindilarning raqamli pasporti hamda I — III xavflilik sinfiga mansub chiqindilarning har bir tonnasini hosil boʻlish obyektidan boshlab utilizatsiya qilish joyigacha real vaqt rejimida monitoring qilib borish imkoniyati yaratiladi;

(v) axborot tizimi Idoralararo integratsiyalashuv platformasi orqali manfaatdor vazirlik, idora va boshqa tashkilotlarning axborot platformalari hamda Yagona hisobotlar tizimiga integratsiya qilinib, “push” xabarnoma berish tizimidagi maʼlumotlar avtomatik yangilab boriladi.

IV. Qaror ijrosini tashkil etish, taʼminlash va nazorat

17. Ekologiya va iqlim oʻzgarishi milliy qoʻmitasi manfaatdor vazirlik va idoralar bilan birgalikda uch oy muddatda:

(a) ushbu qarorning 12-bandi “b” kichik bandidan kelib chiqib Soliq kodeksiga oʻzgartirish va qoʻshimchalar kiritishni nazarda tutuvchi qonun loyihasini;

(b) qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflarni Vazirlar Mahkamasiga kiritsin.

18. Mazkur qaror ijrosini samarali tashkil qilishga masʼul va shaxsan javobgar etib Bosh vazir oʻrinbosari A.J. Ramatov, togʻ-kon sanoati va geologiya vaziri B.F. Islamov hamda Chiqindilarni boshqarish va sirkulyar iqtisodiyotni rivojlantirish agentligi direktori Sh.Sh. Hasanov belgilansin.

19. Qaror ijrosini muhokama qilib borish, ijro uchun masʼul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidentining ekologiya masalalari boʻyicha maslahatchisi — Ekologiya va iqlim oʻzgarishi milliy qoʻmitasi raisi A.A. Abduxakimov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 3-avgust,

PQ-289-son

Oʻzbekiston Respublikasi Prezidentining 2026-yil 3-avgustdagi PQ-289-son qaroriga 1-ILOVA

Xavfli chiqindilarni boshqarish direksiyasining

ASOSIY VAZIFALARI

Xavfli chiqindilarni boshqarish direksiyasining asosiy vazifalari quyidagilardan iborat:

(a) xavfli chiqindilar hosil qiluvchi korxona va tashkilotlarning ushbu chiqindilarni boshqarish boʻyicha faoliyatini muvofiqlashtirish;

(b) xavfli chiqindilar harakati hamda ular bilan bogʻliq ishlarni amalga oshiruvchi tashkilotlar boʻyicha tezkor elektron reyestr (maʼlumotlar bazasi)ni yuritish;

(v) xalqaro moliya tashkilotlarining grantlari, shuningdek, xorijiy va mahalliy investorlar mablagʻlarini jalb etgan holda zamonaviy, ekologik xavfsiz texnologiyalarni joriy etish orqali xavfli chiqindilarni utilizatsiya qilishni tashkil etish;

(g) qayta ishlash texnik jihatdan imkoni boʻlmagan yoki iqtisodiy samarasiz boʻlgan xavfli chiqindilarni, shuningdek, ularning qayta ishlash jarayonida hosil boʻladigan qoldiqlarini belgilangan tartibda koʻmishni tashkil etish;

(d) Ekologiya va iqlim oʻzgarishi milliy qoʻmitasi huzuridagi Chiqindilarni boshqarish va sirkulyar iqtisodiyotni rivojlantirish agentligining operator sifatidagi vazifalarini bajarish;

(j) tasarrufidagi maxsus obyektlarda barqaror ekologik, sanoat va radiatsiyaviy xavfsiz holatni taʼminlash chora-tadbirlarini rejalashtirish va amalga oshirilishini muvofiqlashtirish;

(z) xavfli chiqindilar bilan bogʻliq ishlarda qoʻllaniladigan texnik yechimlar va tashkiliy tadbirlar boʻyicha metodik tavsiyalar ishlab chiqish, ularni joriy etishda tashkilotlarga koʻmaklashish hamda vakolatli organlarga takliflar kiritish;

(i) aholi va xodimlar oʻrtasida xavfli chiqindilar bilan xavfsiz muomala qilish masalalari boʻyicha tushuntirish va targʻibot ishlarini amalga oshirish;

(k) xavfli chiqindilarni utilizatsiya qilish va joylashtirish infratuzilmasini rivojlantirishga qaratilgan investitsiya loyihalarini ishlab chiqish va amalga oshirishda ishtirok etish;

(l) xavfli chiqindilar bilan bogʻliq ilmiy-tadqiqot hamda laboratoriya tahlillarini amalga oshirish va tegishli ekspert xulosalarini tayyorlash;

(m) moddiy-texnika va kadrlar resurslaridan samarali foydalanish hamda unga yuklangan vazifalarni bajarish maqsadida xoʻjalik hisobidagi (budjetdan tashqari) faoliyatni amalga oshirish;

(n) xoʻjalik faoliyatidan tushadigan mablagʻlar hisobidan tuzilmasida boʻlinma va laboratoriyalar tashkil etish.

Oʻzbekiston Respublikasi Prezidentining 2026-yil 3-avgustdagi PQ-289-son qaroriga 2-ILOVA

Uran merosi obyektlarini ekologik qayta tiklash va ularda barqaror radioekologik holatni taʼminlash uchun masʼul organlarning

ASOSIY VAZIFALARI

1. Maxsus vakolatli organ (regulator) — Vazirlar Mahkamasi huzuridagi Sanoat, radiatsiya va yadro xavfsizligi qoʻmitasining asosiy vazifalari:

(a) radioaktiv chiqindilar bilan muomalada boʻlishni tartibga soluvchi milliy qonunchilik, meʼyor va standartlarni ishlab chiqish hamda ularning Xalqaro atom energiyasi agentligi (keyingi oʻrinlarda — AEXA) tavsiyalari va standartlariga muvofiqligini taʼminlash;

(b) radioaktiv chiqindilar, shu jumladan, uran merosi obyektlari bilan bogʻliq atom energiyasidan foydalanish sohasidagi litsenziyalanadigan faoliyat turlarini litsenziyalash hamda litsenziya talablariga rioya etilishini nazorat qilish;

(v) uran merosi obyektlarini rekultivatsiya qilish boʻyicha hujjatlarni koʻrib chiqish va kelishish, ularning bajarilishini nazorat qilish, obyektlar holatini baholash hamda ularni uzoq muddatli monitoring bosqichiga oʻtkazish toʻgʻrisida xulosa berish;

(g) uran merosi obyektlarida radiatsiyaviy xavfsizlik talablari bajarilishini yiliga kamida bir marta qonunchilikka muvofiq oʻrganish;

(d) mamlakat hududidagi sobiq uran konlarini (uran merosi obyektlari va faoliyati tugatilgan uran konlarini) roʻyxatga olish hamda ularning radiatsiyaviy xavfsizligi boʻyicha tasniflangan reyestrini yuritish;

(j) vazirlik va idoralarning radioaktiv chiqindilar bilan muomalada boʻlish obyektlarini ekologik qayta tiklash va ularda barqaror radioekologik holatni taʼminlashga qaratilgan AEXAning texnik hamkorlik milliy loyihalar konsepsiyalarini tayyorlash, AEXA tomonidan koʻrib chiqish va kelishish, shuningdek, ularning amalga oshirilishini muvofiqlashtirish.

2. Operator — Ekologiya va iqlim oʻzgarishi milliy qoʻmitasi huzuridagi Chiqindilarni boshqarish va sirkulyar iqtisodiyotni rivojlantirish agentligining asosiy vazifalari:

(a) uran merosi obyektlarining radiatsiyaviy va ekologik xavfsizlik talablariga muvofiq saqlanishini taʼminlash;

(b) obyektlarning texnik barqarorligini taʼminlash, muhandislik inshootlari, konstruksiyalari va kommunikatsiyalariga xizmat koʻrsatish va taʼmirlash ishlarini amalga oshirish;

(v) maxsus vakolatli organ hamda manfaatdor vazirlik va idoralar bilan birgalikda obyektlar holatini davriy baholash, rekultivatsiya (remediatsiya) ishlari boʻyicha dasturlar va loyiha hujjatlarini ishlab chiqish va belgilangan tartibda amalga oshirish;

(g) maxsus vakolatli organ bilan kelishilgan holda uzoq muddatli monitoring dasturini ishlab chiqish va amalga oshirish hamda belgilangan davriylikda qayta koʻrib chiqish va yangilab borish;

(d) vakolatli tashkilotlar bilan birgalikda obyektlarda radiatsiyaviy monitoringni tashkil etish va oʻz vakolati doirasida oʻlchovlarni amalga oshirish;

(j) obyektlarni xavfsiz saqlashga salbiy taʼsir koʻrsatuvchi omillarni barvaqt aniqlash va tezkor bartaraf etish choralarini koʻrish;

(z) obyektlarda avariyaviy holatlarda harakat qilish rejalarini ishlab chiqish hamda ularni amalga oshirish uchun zarur kuch va vositalarni shakllantirish;

(i) obyektlar holati, amalga oshirilgan ishlar va monitoring natijalari boʻyicha tezkor maʼlumotlar bazasini (reyestr) yuritish hamda davriy hisobotlarni maxsus vakolatli organga taqdim etib borish.