Oʻquv yurtlari kutubxonalari va ommaviy kutubxonalarni Oʻzbekiston Respublikasi Konstitutsiyasining yangi nashri bilan taʼminlash toʻgʻrisida (342-son)

05.08.2003

Oʻzbekiston Respublikasi Vazirlar Mahkamasining

qarori

Respublika yoshlarining huquqiy bilimi va madaniyatini oshirish, Oʻzbekiston Respublikasi Konstitutsiyasining norma va qoidalarini mamlakatimiz fuqarolari tomonidan chuqur oʻrganish uchun zarur shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston matbuot va axborot agentligi (R. Shogʻulomov) ikkinchi chaqiriq Oʻzbekiston Respublikasi Oliy Majlisi XI sessiyasida Asosiy qonunga kiritilgan tuzatishlar va qoʻshimchalarni hisobga olgan holda Oʻzbekiston Respublikasi Konstitutsiyasi matnini 250,0 ming nusxada (200,0 ming nusxa — oʻzbek tilida, 50,0 ming nusxa — rus tilida) nashr etsin.

2. Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi oʻquv yurtlari kutubxonalari, Madaniyat ishlari vazirligi va Oʻzbekiston Kasaba uyushmalari Federatsiyasi Kengashining ommaviy kutubxonalari Oʻzbekiston Respublikasi Konstitutsiyasining yangi nashri nusxalari bilan ilovaga* muvofiq bepul taʼminlansin.

* Ilova berilmaydi.

Oʻzbekiston Respublikasi Moliya vazirligi (M. Nurmurodov) Oʻzbekiston Respublikasi Konstitutsiyasining koʻrsatib oʻtilgan kutubxonalarga tekin berish uchun moʻljallangan yangi nashrini bosib chiqarish uchun Oʻzbekiston matbuot va axborot agentligiga Oʻzbekiston Respublikasi Vazirlar Mahkamasining rezerv fondidan 8698842 soʻm miqdorida mablagʻ ajratsin.

3. Oʻzbekiston Respublikasi Xalq taʼlimi vazirligi (R. Joʻrayev), Oliy va oʻrta maxsus taʼlim vazirligi (S. Gʻulomov), Madaniyat ishlari vazirligi (B. Qurbonov) hamda Kasaba uyushmalari Federatsiyasi Kengashi (D. Jahongirova) mazkur qarorda koʻrsatib oʻtilgan kutubxonalarga Oʻzbekiston Respublikasi Konstitutsiyasining yangi nashri belgilangan nusxalarda oʻz vaqtida berilishini taʼminlasinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S. Karomatov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 5-avgust,

342-son