Oʻzbekiston Respublikasi Bank muassasalarini ichki ishlar organlari huzuridagi qoʻriqlash militsiya boʻlinmalari tomonidan qoʻriqlash toʻgʻrisida yoʻriqnomani tasdiqlash haqida (629-son)

11.02.1999

Oʻzbekiston Respublikasi ichki ishlar vazirligi oʻzbekiston respublikasi markaziy banki

buyruq

[Oʻzbekiston Respublikasi Adliya vazirligi tomonidan 1999-yil 11-fevralda 629-son bilan davlat roʻyxatidan oʻtkazilgan]

1. Ilova qilinayotgan “Oʻzbekiston Respublikasi bank muassasalarini Ichki ishlar idoralari huzuridagi qoʻriqlash militsiya boʻlinmalari tomonidan qoʻriqlash toʻgʻrisida” Yoʻriqnoma tasdiqlansin va 1999-yil 1-fevraldan amalda qoʻllansin.

2. Oʻzbekiston Respublikasi Ichki ishlar vazirligi va Oʻzbekiston Respublikasi Markaziy bankining 1996-yil 22-avgustdagi № 215/126-sonli buyrugʻi oʻz kuchini yoʻqotgan deb topilsin.

Oʻzbekiston Respublikasi Ichki ishlar vaziri Z. ALMATOV

Toshkent sh.,

1999-yil 26-yanvar,

19/436-son

Oʻzbekiston Respublikasi Markaziy banki raisi F. MULLAJONOV

Toshkent sh.,

1999-yil 26-yanvar,

19/436-son

Oʻzbekiston Respublikasi Ichki ishlar vazirligi va Oʻzbekiston Respublikasi Markaziy banki 1999-yil 26-yanvardagi 19/436-sonli qoʻshma buyrugʻi bilan “TASDIQLANGAN”

Oʻzbekiston Respublikasi bank muassasalarini Ichki ishlar organlari huzuridagi qoʻriqlash militsiya boʻlinmalari tomonidan qoʻriqlash toʻgʻrisida

YOʻRIQNOMA

1. Umumiy qoidalar

Mazkur Yoʻriqnoma “Oʻzbekiston Respublikasining Markaziy banki toʻgʻrisida”gi, “Banklar va bank faoliyati toʻgʻrisida”gi qonunlar asosida ishlab chiqilgan.

1.1. Bank muassasalari Ichki ishlar idoralari huzuridagi militsiya qoʻriqlash boʻlinmalari tomonidan bank muassasalarini qoʻriqlash toʻgʻrisidagi tuzilgan shartnomalar asosida qoʻriqlanadi. Ushbu shartnomalar Oʻzbekiston Respublikasi Ichki ishlari vazirligi va tegishli banklar tomonidan hamda ularning topshiriqlariga koʻra Qoraqalpogʻiston Respublikasi Ichki ishlar vazirligi, Toshkent shahar va viloyatlar Ichki ishlar boshqarmalari hamda respublika banklari, viloyatlar va shahar bank boshqarmalari bilan tuziladi.

1.2. Bank muassasalarining xizmat binolari va pul saqlash omborlarining* texnik holati, qoʻriqlash, yongʻindan ogohlantirish va tashvish-xabargoh vositalari bilan jihozlanishi Oʻzbekiston Respublikasi markaziy banki va Oʻzbekiston Respublikasi Ichki ishlar vazirligi bilan kelishilgan meʼyoriy hujjatlari talabiga muvofiq bank rahbarlari tomonidan taʼminlanadi.

* Pul saqlash omborlari deganda bu erda va keyingi oʻrinlarda bank muassasalarining pullar va boshqa boyliklar saqlanadigan omborlari va alohida seyflari tushuniladi.

1.3. Militsiya boʻlinmalarining bank muassasalarini* qoʻriqlashga doir faoliyati Oʻzbekiston Respublikasi Ichki ishlar vazirligining buyruqlari, koʻrsatmalari va ushbu yoʻriqnoma bilan amalga oshiriladi.

* Keyingi oʻrinlarda bank muassasalarini qoʻriqlaydigan militsiya boʻlinmalari “militsiya boʻlinmalari” deb nomlanadi.

Ushbu boʻlinmalarning shaxsiy tarkibi qoʻriqlanayotgan obyektlar* joylashgan hududda xizmat koʻrsatuvchi ichki ishlar idoralariga operativ tartibda boʻysunadilar. Ulardan obyektlarni qoʻriqlash bilan bogʻliq boʻlmagan ishlarda foydalanish man etiladi.

* Bu erda va keyingi oʻrinlarda obyektlar deganda qoʻriqlanayotgan bank muassasalari tushuniladi.

1.4. Militsiya boʻlinmalarining asosiy vazifalari pul mablagʻlari, boyliklar va mol-mulkni ishonchli ravishda qoʻriqlash, oʻz vaqtida jinoyatlar va jamoat tartibi buzilishining oldini olish va ularga chek qoʻyish, shuningdek, obyektlarda belgilangan ruxsatnoma tartibini amalga oshirishdan iborat.

1.5. Bank muassasalariga kirish tartibi Oʻzbekiston Respublikasi Markaziy banki koʻrsatmalariga muvofiq holda amalga oshiriladi. Ayrim bank muassasalariga kirish tartibi xususiyatlari ularning rahbarlari tomonidan belgilanadi hamda shahar va tumanlar Ichki ishlar idoralari* boshliqlari bilan kelishiladi hamda bank muassasalari boʻyicha chiqarilgan buyruqlar bilan eʼlon qilinadi.

* Keyingi oʻrinlarda shahar, tuman ichki ishlar idoralari “ichki ishlar idoralari” deb nomlanadi.

1.6. Qoʻriqlanayotgan obyektlarda militsiya boʻlinmalarini xizmat xonalari, mebel va aloqa vositalari bilan bank muassasalari bepul taʼminlaydilar.

1.7. Militsiya xodimlari tomonidan qoʻriqlanayotgan obyektlarda qoʻriqlash-yongʻindan ogohlantirish va tashvish-xabargoh vositalarini ishlatish va texnik xizmat koʻrsatishni Oʻzbekiston respublikasi Ichki ishlar vazirligi meʼyoriy hujjatlarini talablariga muvofiq qoʻriqlash boʻlinmalari tomonidan amalga oshiriladi.

1.8. Ichki ishlar idoralari, qoʻriqlash boʻlinmalari va bank muassasalari rahbarlari har chorakda bino va xonalarning texnik holati, ularga oʻrnatilgan aloqa vositalari, qoʻriqlash-yongʻindan ogohlantirish va tashvish-xabargoh vositalarining sozligi, tekshirilayotgan obyektni qoʻriqlash boʻyicha militsiya xodimlari xizmatini tashkil etish, shuningdek, bank muassasalarini Ichki ishlar idoralari huzuridagi militsiya qoʻriqlash boʻlinmalari tomonidan qoʻriqlashga doir shartnomada belgilangan majburiyatlarning bajarilishini birgalikda tekshiradilar.

Tekshiruv natijalari toʻgʻrisida ikki nusxada dalolatnoma (1-ilova) tuziladi. Dalolatnomaning bir nusxasi qoʻriqlash boʻlinmalarida, ikkinchisi esa obyektda saqlanadi. Oldingi tekshiruv dalolatnomasida qayd etilgan taklif va kamchiliklar bajarilmasligi hollari toʻgʻrisida Qoraqalpogʻiston Respublikasi IIV, Toshkent shahri IIBB, viloyatlar IIB va banklar yoki bank boshqarmalari rahbarlariga axborot beriladi.

1.9. Ichki ishlar idoralari huzuridagi militsiya qoʻriqlash boʻlinmalari tomonidan bank muassasalarini qoʻriqlashni tashkil etish masalalarida jinoyatlar va jamoat tartibini buzilishini oldini olish va ularga barham berish tegishli Ichki ishlar organlarining boshliqlari zimmasiga yuklanadi.

1.10. Bank rahbarlari boyliklarni saqlash shart-sharoitlari va joylarining oʻzgarishi, bank binosi va xonalarining taʼmirlanishi, ularning qayta jihozlanishi toʻgʻrisida kamida 10 kun oldin, hamda ish tartibini oʻzgarishi, boshqa chora-tadbirlarning oʻtkazilishi natijasida postlarning joylashishini oʻzgartirish yoki belgilangan miqdor doirasida qoʻriqlash kuchaytirilishi talab qilinganda Ichki ishlar organlari huzuridagi qoʻriqlash boʻlimi, boshqarmasi, ular mavjud boʻlmagan joyda esa Ichki ishlar idoralariga kamida 1 kun oldin yozma tartibda maʼlum qiladilar.

2. Obyektlarni qoʻriqlashga qabul qilish tartibi

2.1. Qoraqalpogʻiston Respublikasi bank muassasalari, viloyat va shahar bank boshqarmalari tegishli ravishda Qoraqalpogʻiston Respublikasi IIV, Toshkent shahar IIBB, viloyatlar IIBlariga militsiya xodimlari tomonidan qoʻriqlashga topshirish moʻljallangan obyektlarning roʻyxatini kelishish uchun taqdim etadilar.

2.2. Koʻrsatilgan roʻyxatga muvofiq bir oylik muddat ichida Oʻzbekiston Respublikasi IIV huzuridagi “Qoʻriqlash” birlashmasi, Qoraqalpogʻiston Respublikasi IIV, Toshkent shahri IIBB, viloyatlar IIB huzuridagi qoʻriqlash boshqarma va boʻlimlari, tegishli bank boshqaruvi, Ichki ishlar idoralari, qoʻriqlash boʻlinmasi, bank muassasasi rahbarlari, “Davyongʻinnazorat” vakillaridan iborat boʻlgan idoralararo tuzilgan komissiyalar obyektlarini tekshiradi.

2.3. Idoralararo tuzilgan komissiya Oʻzmarkazbank va Oʻzbekiston Respublikasi Ichki ishlar vazirligi buyruq va meʼyoriy hujjatlari talablariga muvofiq obyektni qoʻriqlashga qabul qilishning maqsadga muvofiqligi, obyektni qoʻriqlashni tashkil etish tizimi va jihozlanishi, postlarning soni, ularni yopish uchun shaxsiy tarkibning zarur miqdori va qoʻriqlash-yongʻindan ogohlantirish hamda uskunalarning shartli birliklari sonidan kelib chiqqan holda tashvishgoh vositalariga xizmat koʻrsatuvchi elektr ustalarining kerakli sonini belgilaydi.

2.4. Ish natijalari boʻyicha idoralararo tuzilgan komissiya obyektini tekshirish dalolatnomasini (2-ilova) tuzadi. Ushbu dalolatnoma Qoraqalpogʻiston Respublikasi IIV, Toshkent shahar IIBB, viloyatlar IIBlariga va tegishli bank boshqaruvlari rahbariyati tomonidan tasdiqlanadi. Obyektlarni tekshirish vaqtida yuzaga kelgan kelishmovchiliklar tekshiruv dalolatnomalarini tasdiqlagan shaxslar tomonidan koʻrib chiqiladi.

2.5. Oʻzbekiston Respublikasi banklari (Qoraqalpogʻiston Respublikasi), viloyatlar va shahar boshqarmalari tasdiqlangan tekshiruv dalolatnomalari asosida militsiya xodimlari tomonidan qoʻriqlashga topshirish uchun obyektlar roʻyxatini yuqori turuvchi banklarga joʻnatadilar. Ushbu roʻyxatda obyektlarning tayyor boʻlish muddatlari va idoralararo tuzilgan komissiyalar tomonidan belgilangan militsiya xodimlarining zarur boʻlgan miqdori koʻrsatiladi.

Qoraqalpogʻiston Respublikasi IIV, Toshkent shahar IIBB, viloyatlar IIBlari Oʻzbekiston Respublikasi IIV huzuridagi “Qoʻriqlash” birlashmasiga roʻyxatda koʻrsatilgan obyektlarni qoʻriqlash boʻyicha militsiya xodimlari shtatlari loyihalarini joʻnatadilar. Koʻrsatilgan materiallar yangidan ochilayotgan bank muassasalari boʻyicha ular faoliyat koʻrsatishidan kamida olti oy oldin taqdim etiladi.

2.6.Obyektlarni qoʻriqlashni tashkil qilish va qoʻriqlash toʻgʻrisidagi shartnomalarni tuzish, tekshiruv dalolatnomalarida koʻzda tutilgan takliflarni bajarish sharti bilan Oʻzbekiston Respublikasi IIV buyrugʻi asosida militsiya xodimlari shtatlari tasdiqlanganidan soʻng uch oydan kechikmagan holda amalga oshiriladi.

2.7. Obyektlarda militsiya xodimlari tomonidan qoʻriqlashni tashkil etish (bekor qilish) toʻgʻrisidagi dalolatnoma (3-ilova) tuziladi. Bunda dalolatnomaning bir nusxasi bankning hisobga olish varagʻi bilan birgalikda 10 kun muddat ichida Oʻzbekiston Respublikasi IIV huzuridagi “Qoʻriqlash” birlashmasiga, ikkinchisi esa tegishli banklar boshqaruvlariga joʻnatiladi.

3. Obyektlarni qoʻriqlash boʻyicha xizmatlarni tashkil etish

3.1. Obyektlarni qoʻriqlashga doir xizmatlar Oʻzbekiston Respublikasi qonunchiligiga, Oʻzbekiston Respublikasi Ichki ishlar vazirligining boshqa meʼyoriy hujjatlari va ushbu yoʻriqnoma talablariga muvofiq holda tashkil etiladi.

3.2. Obyektlarni qoʻriqlash xizmatini oʻtash uchun ichki ishlar idoralarida kamida ikki yil xizmat qilgan, yaxshi tayyorgarlikka ega, intizomli va ijobiy tomondan tavsiflangan xodimlar tanlab olinadi.

Ichki ishlar idoralari, qoʻriqlash boʻlinmalari boʻlmagan yoki ularning tarkibida militsiya safidagi boʻlinmalari mavjud boʻlmagan aholi punktlarida istisno tariqasida Qoraqalpogʻiston Respublikasi Ichki ishlar vazirligi, Toshkent shahar IIBB, viloyatlar IIBlarining ruxsati bilan ushbu obyektlarni qoʻriqlash uchun Ichki ishlar idoralarida kam ish stajiga ega boʻlgan lekin boshlangʻich tayyorgarlikdan oʻtgan militsiya xodimlari tayinlanishi mumkin.

3.3. Obyektlarni qoʻriqlashga doir militsiya naryadlari Ichki ishlar idoralari, qoʻriqlash boʻlimlari (boʻlinmalari) boshliqlariga, militsiyaning safdagi boʻlinmalari komandirlari va ularning oʻrinbosarlariga, Ichki ishlar idoralarining tezkor navbatchilari va ularning yordamchilariga boʻysunadilar.

3.4. Obyektlarni qoʻriqlash boʻyicha xizmatni oʻtash vaqtida militsiya xodimlari maxsus kiyingan, tabel quroli — toʻponcha 16 ta jangovor oʻqi bilan, zarur hollarda esa — avtomatlar bilan qurollangan boʻlishlari shart. Quroldan eng soʻnggi chora sifatida, Oʻzbekiston Respublikasi qonunchiligida belgilangan holatlar va tartibda foydalanishga yoʻl qoʻyiladi.

3.5. Militsiya naryadlari xizmatni boshlashdan oldin ular bilan yoʻriqnoma boʻyicha mashgʻulot oʻtkazadi. Unda ichki ishlar idorasi boshligʻi yoki uning oʻrinbosarlari, Qoraqalpogʻiston Respublikasi IIV, Toshkent shahar IIBB, viloyatlar IIBlarining rahbar tarkibi hamda Oʻzbekiston Respublikasi IIV huzuridagi “Qoʻriqlash” birlashmasi, boshqarmalar, boʻlimlar, qoʻriqlash boʻlimlarining rahbar tarkiblari ishtirok etadilar. Ichki ishlar idoralarining inspektorlar tarkibi oʻz ish faoliyati yoʻnalishlari boʻyicha naryadlarga yoʻriqnoma berishda ishtirok etadilar.

3.6. Xizmatni oʻtash davomiyligi militsiya patrul-post xizmati Nizomi, Oʻzbekiston Respublikasi IIVning boshqa tegishli buyruq va koʻrsatmalariga muvofiq belgilanadi.

Qoʻriqlash xizmatini davomiyligi militsiya patrul-post xizmati Nizomidagi qoʻriqlash hisobi boʻyicha tashkil etilganda militsiya xodimlari bir smenada 8—12 soat xizmatni oʻtaydilar.

3.7. Naryadlarning almashtirilishi militsiya boʻlinmasi sardori, uning yordamchisi yoki Ichki ishlar idoralarining boshligʻi tomonidan tayinlangan militsiya rahbar tarkibidagi boshqa shaxs ishtirokida parol asosida bajariladi. Yangi va eski parol yoʻriqnoma oʻtkazish vaqtida xat bilan maʼlum qilinadi. Parol Ichki ishlar idoralari rahbariyati tomonidan har bir smena uchun belgilanadi.

3.8. Militsiya naryadlarining obyektlarni qoʻriqlashga doir xizmatini nazorat qilish militsiya patrul-post xizmati Nizomi talablariga muvofiq holda har kuni amalga oshiriladi.

Nizomda koʻrsatilgan shaxslardan tashqari Oʻzbekiston Respublikasi IIV huzuridagi “Qoʻriqlash” birlashmasi, qoʻriqlash boshqarma, boʻlim, boʻlimlarining rahbar va inspektorlar tarkibi tekshirishga jalb qilinadi.

3.9. Obyektlar qoʻriqlanishini tekshirishni amalga oshirish paytida ushbu Yoʻriqnomaning 3.7-bandiga muvofiq holda belgilanadigan parol majburiy tartibda qoʻllaniladi.

Agarda soqchilar ularni tanisa, hududiy Ichki ishlar idoralari, qoʻriqlash boʻlinmalari, naryadlarni, tayinlagan militsiya boʻlinmalarining sardorlari va ularning oʻrinbosarlari tekshirishga parolni aytmasdan qoʻyiladi.

3.10. Tekshiruvni oʻtkazish vaqtida quyidagi shaxslar obyektda “tashvish” xavfdan ogohlantirish signalini eʼlon qilish huquqiga egadir:

3.10.1.Oʻzbekiston Respublikasi Ichki ishlar vaziri va uning oʻrinbosarlari, Qoraqalpogʻiston Respublikasi Ichki ishlar vaziri va uning oʻrinbosarlari, Toshkent shahar Ichki ishlar bosh boshqarmasi, viloyatlar Ichki ishlar boshqarmalari boshliqlari va ularning oʻrinbosarlari.

3.10.2.Oʻzbekiston Respublikasi IIV, Qoraqalpogʻiston Respublikasi IIV, Toshkent shahar IIBB, viloyatlar IIB Tashkiliy-nozirlik boshqarmalarining rahbar va inspektorlar tarkibi.

3.10.3. Oʻzbekiston Respublikasi IIV huzuridagi “Qoʻriqlash” birlashmasi, Qoraqalpogʻiston Respublikasi IIV, Toshkent shahar IIBB, viloyatlar IIBlari huzuridagi qoʻriqlash boshqarmalar, boʻlimlarning rahbar va nozirlik tarkibi.

3.10.4.Ichki ishlar idoralari, qoʻriqlash boʻlinmalari boshliqlari va ularning oʻrinbosarlari.

3.11. Oʻzbekiston Respublikasidagi tegishli bank Boshqaruvlarining raislari, ularning oʻrinbosarlari, Qoraqalpogʻiston Respublikasi, Toshkent shahar, viloyat bank boshqarmalari boshliqlari, Emissiya-kassa operatsiyalari departamenti direktori, uning oʻrinbosari, signalizatsiya boʻyicha bosh muhandis, kassa ishini tashkil etishni nazorat qiluvchi emissiya-kassa (kassa) operatsiyalari boshqarmalari boshliqlari, banklarning bosh taftishchilari, bank muassasalari boshqaruvchilari quyidagi huquqlarga egadirlar:

3.11.1. Ichki ishlar idoralari, qoʻriqlash boʻlimi (boʻlinmasi) boshligʻi yoki uning oʻrinbosarlari ishtirokida obyektlarni qoʻriqlovchi militsiya naryadlari xizmatini sifatli oʻtashini tekshirish.

3.11.2. Ichki ishlar idoralari, qoʻriqlash boʻlimi (boʻlinmasi) boshliqlari yoki ularning oʻrinbosarlari ishtirokida qoʻriqlanayotgan obyektda “tashvish” xavfdan ogohlantirish signalini eʼlon qilish.

3.11.3. Militsiya mansabdor shaxslaridan obyektni qoʻriqlash bilan bogʻliq boʻlgan hodisalar toʻgʻrisidagi axborotni talab qilib olish.

3.11.4. Postlarning belgilab qoʻyilgan miqdori doirasida obyektlarning alohida xonalarini qoʻriqlashni vaqtincha kuchaytirish toʻgʻrisida koʻrsatma berish.

3.12. Taftishchilar va banklarning boshqa xodimlari taftish oʻtkazish jarayonida pul omborlarini qoʻriqlash uchun topshirish va qoʻriqchidan qabul qilib olish qoidalariga rioya qilinishini, shuningdek, qoʻriqlash-yongʻindan ogohlantirish va tashvish-xabargohi vositalarining sozligini tekshirish huquqiga egadirlar.

3.13. Banklarning mansabdor shaxslari qoʻriqlash masalalari yuzasidan ushbu yoʻriqnomaning 3.11-bandida koʻrsatilgan barcha kamchiliklarni tekshiruv paytida faqat ularga hamrohlik qiluvchi militsiya rahbar tarkibidagi shaxsga bildirishlari mumkin.

3.14. 4-ilovadagi roʻyxatga muvofiq xizmat hujjatlari obyektni qoʻriqlash postida (militsiya xonasida) boʻlishi va unga begona shaxslarning kirishi man etilishi shart.

Pul saqlash omborlari, maxsus qismlar, boshqaruvchilarning xonalarini muhrlash uchun qoʻllaniladigan muhr izlarining namunalari kalit bilan qulflanadigan stol qutisida yoki seyfda saqlanishi shart.

4. Aloqa, qoʻriqlash-yongʻindan saqlash va tashvishgoh vositalaridan foydalanish, ularni ishlatish va texnik xizmat koʻrsatishni tashkil etish

4.1. Oʻzbekiston Respublikasi Markaziy bankining amaldagi meʼyoriy hujjatlariga muvofiq bank muassasalarida qoʻriqlash-yongʻindan ogohlantirish, tashvish-xabargohi va aloqa vositalari yordamida ularning qoʻriqlanishini kuchaytirish boʻyicha chora-tadbirlar amalga oshiriladi.

4.2. Qoʻriqlash-yongʻindan ogohlantirish va tashvish xabargohi vositalarni loyiha-montaj tashkilotidan foydalanishga qabul qilish dalolatnomasi asosida rasmiylashtiriladi (5-ilova).

4.3. Obyektlarda va Ichki ishlar idoralarining navbatchi qismlariga oʻrnatilgan va foydalanishga qabul qilingan qoʻriqlash-yongʻindan ogohlantirish va tashvish-xabargohi vositalariga texnik xizmat koʻrsatish qoʻriqlash boʻlim boshligʻining buyrugʻi bilan muhandislari va elektr montyorlariga biriktiriladi.

4.4. Obyektdagi qoʻriqlash-yongʻindan ogohlantirish va tashvish-xabargoxi vositalarini montaj bajarish sxemasiga muvofiq ishga yaroqli holini doimo taʼminlash shu obyektga biriktirilgan muhandis va elektrik zimmalariga yuklatiladi.

4.5. Qoʻriqlash boʻlimi va boʻlinmalarining boshliqlari boyliklarni saqlash uchun masʼul boʻlgan bank muassasalarining xodimlari bilan ularni qoʻriqlash-yongʻindan ogohlantirish qurilmalaridan foydalanish qoidalari, ularning sozligini tekshirishning oddiy usullari, xonalarni qoʻriqlashga topshirish va uni bekor qilish tartibini oʻrgatish boʻyicha yoʻriqnoma berish va mashgʻulotlar oʻtkazishni tashkil qiladi. Ularning natijalari bank boshqaruvchisida saqlanadigan maxsus daftarga yoziladi.

4.6. Qoʻriqlash-yongʻindan ogohlantirish va tashvish-xabargohi vositalarining nosozligi aniqlangan holda bank muassasasining rahbari ushbu vositalarni joriy taʼmirlashni oʻz vaqtida amalga oshirish uchun bu toʻgʻrida ichki ishlar idoralarining navbatchi qismi va qoʻriqlash boʻlimi (boʻlinma)ga zudlik bilan xabar beradi.

4.7. Apparatlar oʻrnatilgan joyda ularni joriy yoki qayta tiklashga doir taʼmirlashni amalga oshirish imkoni boʻlmagan holda u olib qoʻyiladi va bank muassasalarining 5 foizli almashtirish fondi* vaqtinchalik yoki doimiy ravishda bir turdagi apparatiga almashtiriladi.

* 5 foizli almashtirish fondi Oʻzbekiston Respublikasining IIV tomonidan 1992-yil 9-mart 110-sonli buyrugʻining 6.13-bandi talabiga muvofiq amalga oshiriladi.

4.8. Bank muassasalari va Ichki ishlar idoralari navbatchi qismlari (markazlashgan qoʻriqlash punktlari) oʻrtasidagi telefon aloqa liniyalari ishdan chiqqan holda bank muassasalari rahbarlariga ichki ishlar idoralari tomonidan ularni zudlik bilan qayta tiklashga doir chora-tadbirlar amalga oshiriladi.

4.9. Bank muassasalarining rahbarlari qoʻriqlash-yongʻindan ogohlantirish, tashvish-xabargohi vositalaridan toʻgʻri foydalanish (ishlatish) va obyektni qoʻriqlashga topshirish tartibiga rioya qilinishi uchun javobgardirlar.

4.10. Pul omborlari va qoʻriqlash uchun topshirilgan obyektning boshqa xonalaridagi qoʻriqlash-yongʻindan ogohlantirish, tashvish-xabargohi vositalari, shuningdek, soqchi va ichki ishlar idoralari navbatchi qismida oʻrnatilgan texnik vositalarni uzib qoʻyish man etiladi.

Ichki ishlar idoralarining navbatchi qismiga obyektdan chiqarilgan tashvish-xabargohi qurilmasini taʼmirlash vaqtida uzib qoʻyish faqat Ichki ishlar idoralari va bank muassasasi rahbariyati bilan oldindan kelishgan holdagina amalga oshirilishi mumkin.

4.11. Qoʻriqlash-yongʻindan ogohlantirish va tashvish-xabargohi vositalariga xizmat koʻrsatuvchi Qoʻriqlash boʻlimi xodimlariga obyektga kirish uchun doimiy ruxsatnomalar berish va ularning faoliyatini nazorat qilish Ichki ishlar idoralari rahbarlarining yozma iltimosnomalari asosida bank muassasalari tomonidan amalga oshiriladi. Qoʻriqlash vositalarini tekshirish va taʼmirlash maqsadida kassaga kirish uchun har safar alohida bir martalik ruxsatnoma beriladi. Bunda boyliklarning butligi uchun javobgar boʻlgan bank muassasasining mansabdor shaxslari ishtirokida pul omboriga kirishga ruxsat etiladi.

5. Boʻlinma sardorining (naryad boʻyicha boshliq) majburiyatlari

5.1. Boʻlinma sardori Ichki ishlar idoralari, Qoʻriqlash boʻlimi (boʻlinmasi) boshligʻi, militsiya boʻlinmasining sardori va ularning oʻrinbosarlari hamda Ichki ishlar idoralari boʻyicha operativ navbatchiga boʻysunadi.

5.2. Boʻlinma sardori militsiya patrul-post xizmati Nizomi talablariga muvofiq oʻz ishini tashkil etadi.

Bundan tashqari u quyidagi vazifalarni oʻz zimmasiga oladi:

5.2.1. Soqchilarning xizmat vazifalarini, obyektning oʻziga xos qoʻriqlash xususiyatlarini va uni mudofaa qilish rejasi boʻyicha harakat qilish tartibini bilish.

5.2.2. Har oyda militsiya xodimlarning ish jadvalini tuzib chiqishi va barcha postlarni oʻz vaqtida qoʻyilishini taʼminlash. Zarurat tugʻilganda obyektni qoʻriqlash xizmatini bevosita oʻz zimmasiga olish.

5.2.3. Soqchilarni almashtirish, ularning tabel quroli bilan muomala qilishlari, uni oʻqlash va oʻqdonni boʻshatish qoidalariga amal qilishlari, militsiya xonasi va qoʻriqlash postida tegishli tartib saqlab turilishi ustidan nazoratni amalga oshirish.

5.2.4. Aloqa, qoʻriqlash-yongʻindan ogohlantirish va tashvish-xabargohi vositalarini sozligi, yongʻinga qarshi inventar mavjudligi va soqchilar tomonidan belgilangan ruxsatnoma tartibi amalga oshirilishi ustidan nazorat qilib borish.

5.2.5. Ichki ishlar idoralari boʻyicha operativ navbatchiga oʻzining obyektga kelganligini, uni qoʻriqlanishining ahvoli, naryadlarni almashtirilishi va aniqlangan kamchiliklar toʻgʻrisida maʼlum qilish.

U shuningdek, obyektda ruxsatnoma tartibini buzilganligi, qoʻriqlash-yongʻindan ogohlantirish va tashvish-xabargohi, aloqa vositalarining nosozligi, texnik holatidagi kamchiliklar toʻgʻrisida obyektning boshliqlariga axborot berish va ularni bartaraf qilish boʻyicha chora-tadbirlarni koʻrish.

5.2.6. Operatsion vaqtda obyektda boʻlish va jamoat tartibini taʼminlash boʻyicha naryadga yordam koʻrsatish.

5.2.7. Obyekt yoki soqchiga hujum qilingan holda Ichki ishlar idoralari navbatchi qismiga zudlik bilan “tashvish” signalini berishi, hujumni daf qilish va jinoyatchilarni ushlash boʻyicha chora-tadbirlarni koʻrishi. Ushlangan shaxslarni chaqirilgan militsiya naryadi kuzatuvi ostida Ichki ishlar idorasining navbatchi qismiga joʻnatish.

5.2.8. Toʻsatdan kasal boʻlib qolgan holda oʻzining bevosita boshligʻiga yoki Ichki ishlar idoralari boʻyicha tezkor navbatchiga maʼlum qilishi va oʻz majburiyatlarini soqchi militsionerlardan birining zimmasiga yuklashi.

5.2.9. Soqchi kasal boʻlib qolganda bevosita boshligʻiga yoki Ichki ishlar idoralari boʻyicha tezkor navbatchiga maʼlum qilishi va kasal kishining almashtirilishini taʼminlash.

5.3. Boʻlinma komandiriga quyidagilar man etiladi:

5.3.1. Qoʻriqlanayotgan obyektning hududidan oʻzboshimchalik bilan chiqib ketish.

5.3.2. Ushbu Yoʻriqnomaning 3.10.—3.12. bandlarida koʻrsatib oʻtilgan shaxslardan tashqari biron-bir kishini militsiya xonasiga qoʻyishi, xususiy muloqotlarni olib borish yoki boshqa usul bilan xizmat vazifalarini bajarishdan chalgʻish, belgilanmagan vaqtda uxlash.

5.3.3. Qoʻriqlanayotgan obyektga hamda soqchilarning hayotiga xavf solayotgan favqulodda holatlardan tashqari postlarning joylashishi bilan koʻzda tutilgan naryadlarning almashish tartibini oʻzgartirish, ularning sonini kamaytirish va soqchilarni koʻchirish.

6. Soqchilarning vazifalari

6.1. Soqchi bevosita boʻlinma sardoriga (naryad boshligʻiga) boʻysunadi va xizmatni oʻtash vaqtida ichki ishlar idoralari boʻyicha navbatchiga operativ tartibda boʻysunadi.

6.2. Soqchi xizmatni militsiya patrul-post xizmati Nizomi talablari, qoʻriqlanayotgan obyekt va unga oʻrnatilgan qoʻriqlash-yongʻindan xabar berish, tashvish-xabargohi texnik vositalari bilan jihozlanishi xususiyatlarini hisobga olgan holda ishlab chiqilgan oʻziga xos* majburiyatlarning talablariga muvofiq oʻtaydi.

* Alohida majburiyatlar bank muassasalari rahbarlari bilan kelishilgan holda ichki ishlar organlari boshliqlari tomonidan tasdiqlanadi.

Bundan tashqari uning zimmasiga quyidagi vazifalar yuklanadi:

6.2.1. Oʻz xizmat vazifalarini, obyektlarni qoʻriqlash xizmati tartibi va uning oʻziga xos xususiyatlarini qatʼiy bilish. Qoʻriqlash-yongʻindan ogohlantirish va tashvish-xabargohi, aloqa vositalari va yongʻinga qarshi inventardan foydalana bilish.

6.2.2. Postni qabul qilishda aloqa vositalari sozligini va yongʻinga qarshi inventarning mavjudligini tekshirib koʻrish. Qoʻriqlash-yongʻindan xabar berish texnik vositalarga oʻrnatilgan yorugʻlik va tovush indikatorlarining holatini koʻzdan kechirib, ushbu signalizatsiya vositalarining sozligini tekshirib koʻrish. U nosoz boʻlgan holda esa daftarga (8-ilova) yozib qoʻyish va bu haqda ichki ishlar idoralari boʻyicha tezkor navbatchiga hamda oʻz rahbariyatiga maʼlum qilish.

Naryadni almashtirayotgan shaxs va oʻrin almashayotgan militsioner ishtirokida barcha xonalarni, shuningdek, xizmat hujjatlarini roʻyxatga muvofiq qabul qilib olish. Almashtirilayotgan militsiya xodimidan pul omborlarini qabul qilib olishda eshiklar, qulflar, ip va muhrlar shuningdek, ushbu ip oʻtkaziladigan maxsus teshikchalarning butligini tekshirib koʻrish. Muhrlangan pul omborlaridagi muhrlarni mavjud muhr izlari namunalari bilan qiyoslab koʻrish.

Post va pul omborining qabul qilib olinishi toʻgʻrisida postni qabul qilish-topshirish va bank muassasasini qoʻriqlash boʻyicha xizmatni oʻtashni (6-ilova) tekshirish hisobini yuritish daftariga imzo qoʻyish va qabul qilganligi haqida Ichki ishlar idoralari navbatchilik qismiga maʼlum qilish. Bir paytning oʻzida xavfdan ogohlantirish signalizatsiyasining ishga layoqatliligini tekshirib koʻrish.

6.2.3. Pul omborlarining eshiklari, qulflari, ip va muhrlarining nosozligi, shuningdek, pul omborlariga bostirib kirishga urinish holatlari aniqlanganda bu haqida ichki ishlar idoralari boʻyicha tezkor navbatchiga, markazlashgan qoʻriqlash punkti navbatchisiga va bevosita boshligʻiga darhol maʼlum qilish hamda boyliklarning butligi uchun javobgar boʻlgan shaxslarni chaqirtirish. Har bir ushbu holatda xonalar va omborxonalar ochilishiga qadar dalolatnoma tuziladi va bu dalolatnoma obyekt boyliklarning butligi uchun javobgar boʻlgan barcha mansabdor shaxslar va soqchi tomonidan imzolanadi.

6.2.4. Pul omborxonalarini qoʻriqlashga qabul qilish paytida ularni muhrlashda ishtirok etish. Muhrlangan omborlarni qoʻriqlash uchun qabul qilishda avval muhr izlarini namunalar bilan solishtirib koʻrgan holda 04082161-shakldagi daftarga imzo qoʻyish.

6.2.5. Pul omborxonalarini qoʻriqchidan qabul qilib olish obyektning boyliklarni butligi uchun javobgar boʻlgan mansabdor shaxslarning 04082161-shakldagi daftarga imzo qoʻyish orqali amalga oshirish.

6.2.6. Pul omborlarini qoʻriqchidan qabul qilib olishda quyidagi hollarda ularga kirish ruxsat berilmaydi:

agarda obyektning boyliklarini saqlash uchun javobgar boʻlgan mansabdor shaxslar tegishli guvohnomalarisiz (ruxsatnomalar) boʻlsalar;

agarda shaxsni tasdiqlovchi guvohnomada (ruxsatnoma) koʻrsatilgan shaxsning oʻrniga boshqasi kelsa;

shaxsni tasdiqlovchi guvohnoma (ruxsatnoma) notoʻgʻri rasmiylashtirilganda yoki u mavjud namunalarga mos kelmaganda.

6.2.7. Obyektni xushyorlik bilan, vijdonan qoʻriqlash, barcha shaxslarning kirishi va chiqishini nazorat qilish, binoga kirish va undan chiqish, boyliklarni olib chiqish huquqini beruvchi ruxsatnomalarni tekshirish, ruxsatnomaning amal qilish muddati, muhr va ruxsatnomani bergan shaxsning imzosi mavjudligiga hamda ularning postdagi namunalariga mosligiga alohida eʼtibor berish shart.

Vaqtinchalik va bir marotabalik ruxsatnomalarni tekshirish paytida ularni koʻrsatgan shaxsning ruxsatnomasi va pasportidagi (shaxsni tasdiqlovchi boshqa hujjat) familiyasi, ismi va otasining ismi bilan qiyoslash.

6.2.8. Bir marotabalik ruxsatnoma bilan kirish paytida nazorat talonini yirtib olish, chiqishda esa — ruxsatnomani olib qolish. Boyliklarni pul omborlaridan yuklab joʻnatish, boshqa xonalardan boyliklar, materiallar, predmetlarni tashish (olib chiqish) paytida olib chiqilayotgan joylarni qatʼiy hisobga olish, moddiy ruxsatnomada koʻrsatilgan miqdorga ularning muvofiqligini tekshirish, moddiy ruxsatnomalarni imzolashga vakolatli boʻlgan shaxslarning imzolarini ularning soqchilarga taqdim etilgan imzo namunalari bilan qiyoslash. Bir marotabalik va moddiy ruxsatnomalarni ularni hisobga olish daftarida (7-ilova) qayd qilish va ish kuni oxirida tilxat ostida koʻrsatilgan ruxsatnomalarni bergan shaxslarga, smena vaqtida esa postni qabul qilib oluvchi militsionerga topshirish.

6.2.9. Bank muassasalarida bank operatsiyalarini amalga oshirish vaqtida jamoat tartibini taʼminlash, keluvchilarni nazorat qilish. Shubhali shaxslar paydo boʻlgan vaqtda bu toʻgʻrida Ichki ishlar idoralari boʻyicha tezkor navbatchiga (naryad boshligʻi) maʼlum qilish va ularni qoʻlga olish yuzasidan chora-tadbirlarni amalga oshirish.

6.2.10. Kichik sigʻimdagi jamlagichga ulangan alohida xonalarni texnik signalizatsiya vositalari yordamida qoʻriqlash uchun qabul qilib olish va topshirish. Signalizatsiya vositalari holatini tekshirish va ularni ishlab ketishini qayd qilish daftarida (8-ilova) ushbu vositalarning nosozligini va kelib tushayotgan “tashvishli” signallarining hisobini yuritish.

6.2.11. Tashvishgoh signalizatsiyasi ishga tushgan paytda ehtiyotkorlik choralariga rioya qilgan holda “tashvish” signalining kelib tushish sababini aniqlash va pul omborlarini kuzatishni kuchaytirish hamda sharoitdan kelib chiqib ish tutish. Ichki ishlar idoralaridan naryad yetib kelganda parol boʻyicha uni bank muassasiga oʻtkazib yuborish, sharoit toʻgʻrisida naryad boshligʻiga axborot berish va uning koʻrsatmalariga muvofiq ish yuritish.

6.2.12. Har 1.5 soatda Ichki ishlar idoralari boʻyicha tezkor navbatchi va boʻlinma sardoriga (naryad boshligʻi) xizmatni oʻtash natijalari va obyektdagi sharoit toʻgʻrisida axborot berib turish.

6.3. Soqchiga quyidagilar man etiladi:

6.3.1. Hayoti xavf ostida boʻlgan taqdirda ham post almashtirilgunga yoki topshirilgunga qadar uni tashlab ketish. Toʻsatdan kasal boʻlib qolgan taqdirda ichki ishlar idoralari boʻyicha tezkor navbatchiga va boʻlinma sardoriga (naryad boshligʻiga) maʼlum qilish hamda oʻrindoshi kelgunga qadar xizmat joyini tashlab ketish.

6.3.2. Bank operatsiyalarini bajarish uchun belgilangan vaqtda mijozlar ruxsatnomasiz kirib-chiqadi, boshqa vaqtda obyektga kirish huquqiga ega boʻlmagan yoki belgilanmagan vaqtda kelgan shaxslar, shuningdek bank xodimlarining qarindosh-urugʻlari, tanishlari va xizmatda boʻlmagan militsiya xodimlarini obyektga kiritish.

6.3.3. Uyquga ketish yoki boshqa yoʻl bilan xizmatni oʻtashdan chalgʻish, biron-bir kishiga topshirish uchun boshqa kishidan biron bir buyumni olish.

6.3.4. Bevosita boshliqlarni istisno etgan holda biron bir kishiga tabel qurolini topshirish yoki koʻrsatish, shuningdek, nihoyatda zarur boʻlmagan holda toʻpponchani gʻilofidan chiqarish va oʻqni oʻqdonga joylashtirish.

7. Obyektni mudofaa qilishni tashkil etish

7.1. Bosqinchilik hujumi, yongʻin, tabiiy ofatlar va boshqa favqulodda hodisalarni bartaraf etish boʻyicha ichki ishlar idoralari oʻzlari xizmat koʻrsatayotgan hududda joylashgan bank muassasalarini mudofaa qilish rejalarini ishlab chiqadilar. Militsiya naryadlari va bank muassasalari xodimlarining oʻzaro hamkorligiga oid rejalar ularning rahbarlari bilan kelishib olinadi.

Banklarni mudofaa qilish rejalari ichki ishlar idoralarining navbatchi qismlarida, soqchilarning bank muassasalarini va ushbu muassasalarning xodimlarini qoʻriqlash boʻyicha harakat tartiblari bank muassasalarini mudofaa qilish rejalaridan koʻchirmalar olinib, soqchilar va bank muassasalari rahbarlarining alohida yigʻma jildlarida saqlanadi.

7.2. Rejalarda quyidagilar koʻzda tutilgan boʻlishi shart:

7.2.1. Obyektga joʻnatilayotgan militsiya naryadlarining shaxsiy tarkibi. Ularning qurollanishi, transport, aloqa, shaxsiy himoya vositalari va maxsus vositalar bilan taʼminlanishi.

7.2.2. Naryadlar harakatlanishining turli xil yoʻnalishlari va eng qisqa muddatlarda obyektga yetib kelishini taʼminlaydigan asosiy hamda zaxiradagi yoʻnalishlari.

7.2.3. Militsiya naryadlari, bank muassasi xodimlari va operatsiyani oʻtkazish zonasiga tushib qolgan shaxslarga qarshi tasodifiy qurol ishlatilishini istisno etadigan tarzda naryadlarni boshqarish, oʻzaro tanib olish signallari hamda boshqa chora-tadbirlarni tashkil etish.

7.2.4. Jinoyatchilar chekinishi (yashirinishi) mumkin boʻlgan yoʻllar, shuningdek, ularni qoʻlga tushirishning eng maqsadga muvofiq joylari.

7.2.5. Hodisa roʻy bergan joyda shaxsiy tarkibni joylashtirish va avtotransportning toʻxtash joylari, har qaysi naryad oldida turgan vazifalar va ularni bajarish tartibi.

7.2.6. Bank muassasasini qoʻriqlash boʻyicha xizmatni oʻtayotgan soqchilarning, shuningdek, ushbu muassasa xodimlarining mudofaa rejasini joriy qilish vaqtidagi harakatlari tartibi.

7.3. Rejalarga quyidagilar ilova qilinadi:

7.3.1. “Tashvishli” signali boʻyicha joʻnatilayotgan naryadlarning kirib kelish yoʻllari va joylashtirilishini koʻrsatgan holda obyektning mazkur joyda joylashish chizmasi.

7.3.2. Obyektning xonalari va qoʻriqlash postlari koʻrsatilgan reja varaqachasi.

7.3.3. Obyektning boyliklari butligi uchun javobgar boʻlgan rahbar xodimlari va mansabdor shaxslarning yashash joyi, uy va xizmat telefonlari koʻrsatilgan roʻyxati.

7.4. Ichki ishlar idoralarining rahbarlari har chorakda kamida bir marotaba obyektga qilingan hujumni daf qilish boʻyicha amaliy koʻnikmalarni shakllantirishga doir oʻquv-mashq mashgʻulotlarini oʻtkazishlari va ularning hisobini olib borishlari shart.

7.5. Ichki ishlar idoralari xodimlari tomonidan bank rahbarlari bilan kelishilgan holda bank xodimlariga jinoyatchilar hujum qilgan taqdirda ularning bajarishlari lozim boʻlgan xatti-harakatlari toʻgʻrisida tegishli mashgʻulotlar oʻtkaziladi.

7.6. Obyektning mudofaa qilinishiga doir asosiy harakatlarning quyidagi tartibi belgilanadi:

7.6.1. Obyektga hujum qilingan vaqtda militsiya naryadi (soqchi), ushbu obyektning xodimlari, tashvishgoh yoki boshqa usul bilan ichki ishlar idoralarining navbatchi qismiga “tashvish” xavfdan ogohlantirish signalini beradi.

Ayni paytda, militsiya naryadi (soqchi) hujumni daf qilish va obyektning qoʻriqlanishini kuchaytirish yuzasidan chora-tadbirlarni amalga oshiradi. Xonalarga kirish va chiqishni toʻxtatib qoʻyadi, uning ichkarisida boʻlgan shaxslardan xatti-harakatlarning toʻxtalishini talab qiladi, pul omborlari va operatsion kassalarni kuzatishni kuchaytiradi. Ichki ishlar boʻlimidan militsiya naryadi yetib kelishi bilan mazkur yoʻriqnomaning 6.2.11-bandida koʻzda tutilgandek harakat qiladi.

Bank muassasasining xodimlari “tashvish” signali boʻyicha barcha kassa operatsiyalarini toʻxtatadilar, barcha boyliklar pul omborlariga solib qulflanadi, ularning kalitlari esa jinoyatchilar foydalanishi istisno etiladigan tarzda saqlanadi.

7.6.2. Ichki ishlar idoralari boʻyicha tezkor navbatchi “tashvish” signalini qabul qilib olgach, zudlik bilan obyektga qurollangan shaxsiy himoya vositalari va maxsus vositalar bilan jihozlangan kamida uch kishidan iborat militsiya naryadini rahbarlar tarkibiga kiruvchi shaxs boshchiligida unga oldindan shartli soʻz parolni maʼlum qilib va obyektning joylashish chizmasi hamda reja-varaqchani topshirib joʻnatishi shart. Ichki ishlar idoralari boʻyicha tezkor navbatchi bilan birga obyektga militsiyaning eng yaqin joydagi patrul-post naryadlari va markazlashtirilgan qoʻriqlash punktining qoʻlga olish guruhi joʻnatiladi. Ular ichki ishlar boʻlimidan yetib kelgan militsiya naryadi boshligʻiga boʻysunadi.

Bank muassasasida yongʻindan ogohlantirish signalizatsiyasi ishlab ketgan holatda koʻrsatilgan obyektga, shuningdek, yongʻindan saqlash naryadi ham joʻnatiladi.

Obyektdan “tashvish” signalini berilishi sabablarini telefon orqali yoki boshqa usul bilan qayta tekshirish man etiladi.

7.6.3. Naryad boshligʻi obyektga yetib kelgach jinoyatchilar chekinishi mumkin boʻlgan yoʻllarni toʻsib qoʻyadi va shaxsiy tarkibni joylashtirilishini tashkil etadi. “Tashvish” signali kelib tushishi sabablarini aniqlash yuzasidan chora-tadbirlarni amalga oshiradi.

7.6.4. Obyektga hujum qilinganligi yoki uning xonalariga begona shaxslar kirib olganligi aniqlangan holatda naryad boshligʻi bu haqida ichki ishlar idoralari boʻyicha operativ navbatchiga axborot beradi va pul mablagʻlari hamda boyliklarning butligini taʼminlash, jinoyatchilarni qurolsizlantirishi va qoʻlga tushirishga doir chora-tadbirlarni amalga oshiradi.

7.6.5. Ichki ishlar idoralari boʻyicha tezkor navbatchi naryad boshligʻidan maʼlumot olib obyektni mudofaa qilish rejasini amalga oshiradi va Oʻzbekiston Respublikasi IIVning tegishli buyruqlari, koʻrsatmalari va yoʻriqnomalariga amal qiladi.

7.6.6. Obyektga oʻrnatilgan va markazlashgan kuzatish pultiga yoki ichki ishlar idoralari navbatchi qismiga ulangan qoʻriqlash – yongʻindan ogohlantirish signalizatsiyasi vositalari ishlab ketishi natijasida “tashvish” eʼlon qilingan va obyektga kirishning tashqi belgilari mavjud boʻlmagan hollarda naryad boshligʻi, soqchi va militsiyaning boshqa xodimlari tashvishgoh vositalarini ishlab ketish sabablarini aniqlash maqsadida obyekt xonalarini batafsil koʻzdan kechirib chiqadi.

7.6.7. Bunday imkoniyat mavjud boʻlmagan paytda naryad boshligʻi Ichki ishlar idoralari yoki qoʻriqlash boʻlimining (boʻlinmasi) tezkor navbatchisi boyliklarning butligi uchun javobgar boʻlgan mansabdor shaxslar yetib kelishi va tashvishgohning ishlab ketish sabablari aniqlanmagunga qadar almashtirilmaydigan qoʻshimcha postlarni qoʻyish yoʻli bilan obyektning qoʻriqlanishini kuchaytirishga doir chora-tadbirlarni amalga oshiradi.

7.6.8. Yongʻin (tabiiy ofat) sodir boʻlgan holatda soqchi, bank muassasasi xodimlari bu haqida yongʻindan saqlash boʻlimiga, ichki ishlar idoralari boʻyicha tezkor navbatchiga, bank muassasasining rahbariga yoki uning oʻrinbosariga maʼlum qiladi, boyliklar va mol-mulkni qutqarish yuzasidan chora-tadbirlarni amalga oshiradi.

Pul omborxonalarida yongʻin chiqqan holatda boyliklarning butligi uchun javobgar boʻlgan obyektning mansabdor shaxslari yetib kelgunga qadar ularni ochish va muhrlarning butligini buzish man etiladi.

Yoʻriqnomaga 1-ILOVA Maxfiy (toʻldirilgach)

Qoʻriqlash ishlarini tashkil etishni tekshirish

Dalolatnomasi

Tekshiruvda quyidagilar aniqlandi (dalolatnomada koʻrsatiladi):

1. Bankning texnik jihatdan mustahkamligi holati. Xonalar, pul omborlarining qoʻriqlash-yongʻindan saqlash va tashvishgoh vositalari bilan jihozlanganligi, ularning ishga yaroqliligi va texnik xizmat koʻrsatish sifati. (Agarda oxirgi tekshiruvdan soʻng obyektning texnik holati va uning ogohlantirish vositalari bilan jihozlanishida oʻzgarishlar sodir boʻlmagan boʻlsa, avvalgi tekshiruvlar natijalariga asoslanishga ruxsat etiladi).

2. Qoʻriqlash shaxsiy tarkibining jamlanganligi, soqchilarning bankni qoʻriqlash majburiyatlarini bajarish sifati va unda belgilangan ruxsatnoma tartibiga amal qilinishi.

3. Tomonlarning shartnomaga doir majburiyatlarni bajarishlari. Obyektni qoʻriqlashni yaxshilashga doir avvalgi tekshiruvda kiritilgan takliflarning bajarilishi.

4. Binolarning texnik holatini yaxshilash, ularni qoʻriqlash-yongʻindan ogohlantirish va tashvishgoh vositalari bilan jihozlash, xizmatni tashkil etishni takomillashtirish va tomonlarning boshqa majburiyatlarini tegishli tarzda bajarishlariga doir amalga oshirilishi lozim boʻlgan qoʻshimcha chora-tadbirlar.

Yoʻriqnomaga 2-ILOVA Maxfiy (toʻldirilgach)

Eslatma: Dalolatnoma toʻrt nusxada tuziladi, birinchisi Qoraqalpogʻiston Respublikasi Ichki ishlar vazirligi, Toshkent shahar Ichki ishlar bosh boshqarmasi, viloyatlar Ichki ishlar boshqarmalari huzuridagi Qoʻriqlash boshqarma, boʻlimlarida, ikkinchisi tegishli respublika banki yoki bankning viloyat boshqarmasida, uchinchisi qoʻriqlash boʻlinmasida (Ichki ishlar idoralari boʻlmagan joyda), toʻrtinchisi bankda saqlanadi. Dalolatnomani tuzishda komissiya tarkibida Markaziy bankning (viloyat, shahar) EKO boʻlim boshligʻi qatnashmogʻi lozim.

Yoʻriqnomaga Z-ILOVA Maxfiy (toʻldirilgach)

Yoʻriqnomaga 4-ILOVA

Militsiya xonasi yoki bankni qoʻriqlash postida saqlanadigan xizmat hujjatlarining

roʻyxati

1. Postni qabul qilish-topshirish va xizmat ijrosini tekshirish daftari.

2. Soqchilar almashganda qabul qilinishi va topshirilishi lozim boʻlgan xonalar, mulk va xizmat hujjatlari roʻyxati.

3. Bank muassasasini mudofaa qilish rejasidan koʻchirma.

4. Pul omborlarini ochish huquqiga ega boʻlgan shaxslarning tasdiqlangan roʻyxati, ularning imzo namunasi, turar joy manzillari va uy telefon raqamlari.

5. Doimiy, vaqtincha, bir martalik va moddiy ruxsatnomalarni imzolash huquqiga ega boʻlgan shaxslarning imzo namunasi.

6. Haqiqiy imzolar, muhrlar, shuningdek, kun mobaynida ruxsatnomaning amal qilish vaqti va ruxsat etilgan hududni belgilovchi shifr belgilari boʻlgan doimiy, vaqtincha, bir martalik va moddiy ruxsatnomalar namunalari.

7. Bir martalik va moddiy ruxsatnomalar hisobini yuritish daftari.

8. Ogohlantirish vositalarining holatini tekshirish va ularning ishga tushishini roʻyxatga olish daftari.

9. Bank muassasasini mudofaa qilish boʻyicha militsiya xodimlarining xizmat ijrosini tekshirish huquqiga ega boʻlgan ichki ishlar idoralari, qoʻriqlash boʻlimi (boʻlinmasi)ning rahbari va nozirlik tarkibidagi shaxslarining tasdiqlangan roʻyxati.

10. Bankning ish jadvali.

11. Ruxsatnoma tartibi toʻgʻrisidagi yoʻriqnoma.

12. Soqchilarning alohida majburiyatlari.

13. Ichki ishlar idoralarining navbatchi qismi, bank rahbarlari, qoʻriqlash, yongʻindan saqlash xizmatlari, tibbiy yordam, avariya xizmatining telefon raqamlari roʻyxati.

14. Soqchilarning ish jadvali.

Yoʻriqnomaga 5-ILOVA Maxfiy (toʻldirilgach)

Eslatma: Agar bino topshirishga toʻliq tayyor boʻlmasa yoki eʼtirozlar boʻlsa, komissiya ularni qayd etadi va tuzatish muddatini koʻrsatadi. Bu ishlar bajarilgandan soʻng komissiya mazkur dalolatnomani qayta tuzgan holda takroriy ravishda signalizatsiya vositalarini qabul qilib oladi.

Yoʻriqnomaga 6-ILOVA

Eslatma: daftar raqamlangan, tikib qoʻyilgan va muhr bilan tasdiqlangan boʻlishi lozim.

Yoʻriqnomaga 7-ILOVA

Eslatma: daftar raqamlangan, tikib qoʻyilgan va muhr bilan tasdiqlangan boʻlishi lozim.

Yoʻriqnomaga 8-ILOVA

Ogohlantirish vositalari holatini tekshirish va uning ishga tushishini roʻyxatga olish

daftari

Eslatma: daftar raqamlangan, tikib qoʻyilgan va muhr bilan tasdiqlangan boʻlishi lozim.