Tijorat banklarida korporativ boshqaruv toʻgʻrisidagi nizomga qoʻshimcha va oʻzgartirishlar kiritish haqida (3254-1-son)

18.07.2026

OʻZBEKISTON RESPUBLIKASI MARKAZIY BANKI BOSHQARUVINING

QARORI

[Oʻzbekiston Respublikasi Adliya vazirligi tomonidan 2026-yil 18-iyulda roʻyxatdan oʻtkazildi, roʻyxat raqami 3254-1]

Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Banklar va bank faoliyati toʻgʻrisida”gi hamda 2026-yil 27-martdagi OʻRQ-1126-son “Oʻzbekiston Respublikasining ayrim qonun hujjatlariga Oʻzbekistonda islomiy bank faoliyatini joriy etishga qaratilgan qoʻshimcha va oʻzgartirishlar kiritish toʻgʻrisida”gi qonunlariga muvofiq Oʻzbekiston Respublikasi Markaziy banki boshqaruvi qaror qiladi:

1. Oʻzbekiston Respublikasi Markaziy banki boshqaruvining 2020-yil 25-maydagi 12/8-son qarori (roʻyxat raqami 3254, 2020-yil 30-iyun) (Qonun hujjatlari maʼlumotlari milliy bazasi, 30.06.2020-y., 10/20/3254/1045-son) bilan tasdiqlangan Tijorat banklarida korporativ boshqaruv toʻgʻrisidagi nizomga ilovaga muvofiq qoʻshimcha va oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Rais T. ISHMETOV

Toshkent sh.,

2026-yil 8-iyul,

19/8-son

Oʻzbekiston Respublikasi Markaziy banki boshqaruvining 2026-yil 8-iyuldagi 19/8-son qaroriga ILOVA

Tijorat banklarida korporativ boshqaruv toʻgʻrisidagi nizomga kiritilayotgan qoʻshimcha va oʻzgartirishlar

1. Muqaddima “mikromoliya banklarida” degan soʻzlardan keyin “, shuningdek islomiy bank faoliyatini amalga oshiruvchi banklar va mikromoliya banklarida” degan soʻzlar bilan toʻldirilsin.

2. 24-bandda:

ikkinchi va beshinchi xatboshilar “kengash va boshqaruv” degan soʻzlardan keyin “, shuningdek bank islomiy moliya kengashining” degan soʻzlar bilan toʻldirilsin;

oltinchi xatboshi quyidagi tahrirda bayon etilsin:

“agarda kengash tomonidan ushbu vazifa yuklatilgan boʻlsa, mukofotlash siyosatida aks ettirilgan mezonlar asosida kengash, boshqaruv va bank islomiy moliya kengashining aʼzolari, shuningdek, muhim ahamiyatga ega xodimlarning yil yakunlari boʻyicha faoliyatini dastlabki baholashdan oʻtkazish, shuningdek, ushbu shaxslarning uzoq muddatli belgilangan maqsad va vazifalarga erishganini tahlil qilish;”.

3. 30-bandning toʻrtinchi xatboshisi “kengash va boshqaruv” degan soʻzlardan keyin “, shuningdek bank islomiy moliya kengashining” degan soʻzlar bilan toʻldirilsin.

4. 31-band “Kengash va boshqaruv” degan soʻzlardan keyin “, shuningdek bank islomiy moliya kengashining” degan soʻzlar bilan toʻldirilsin.

5. 32-bandda:

quyidagi mazmundagi yettinchi xatboshi bilan toʻldirilsin:

“bank islomiy moliya kengashining aʼzolari;”;

yettinchi xatboshi sakkizinchi xatboshi deb hisoblansin.

6. 34-bandning uchinchi xatboshisi “kengash va boshqaruv” degan soʻzlardan keyin “, shuningdek bank islomiy moliya kengashining” degan soʻzlar bilan toʻldirilsin.

7. 35-band quyidagi tahrirda bayon etilsin:

“35. Kengash va boshqaruv, shuningdek bank islomiy moliya kengashining aʼzoligiga hamda muhim ahamiyatga ega xodim lavozimiga tayinlangan (saylangan) shaxsning yaqin qarindoshlarining roʻyxati bankning elektron bazasida shakllantirilishi va elektron baza muntazam yangilanib borilishi kerak.”.

8. 53-bandda:

toʻrtinchi xatboshi quyidagi tahrirda bayon etilsin:

“bankning davlat roʻyxatiga olinganligi, bank faoliyatini amalga oshirish huquqini beruvchi litsenziya va (yoki) islomiy bank faoliyatini amalga oshirish huquqini beruvchi litsenziya toʻgʻrisida maʼlumot (tartib raqami, berilgan sanasi, bank operatsiyalari roʻyxati), shuningdek, faoliyatini toʻxtatib turishi, uni tiklash hamda bank faoliyatini amalga oshirish huquqini beruvchi litsenziyaning va (yoki) islomiy bank faoliyatini amalga oshirish huquqini beruvchi litsenziyaning Oʻzbekiston Respublikasi Markaziy banki tomonidan chaqirib olinishi haqida (agar bunday holatlar yuzaga kelgan boʻlsa);”;

oʻn ikkinchi xatboshi “kengash va boshqaruv” degan soʻzlardan keyin “, shuningdek bank islomiy moliya kengashining” degan soʻzlar bilan toʻldirilsin.