Monopoliyaga qarshi siyosatni takomillashtirish markazini tashkil etish toʻgʻrisida monopoliyaga qarshi siyosatni takomillashtirish markazini tashkil etish toʻgʻrisida (331-son)

29.07.2003

Oʻzbekiston Respublikasi Vazirlar Mahkamasining

qarori

Raqobat, tabiiy monopoliyalar, bankrotlik, isteʼmolchilarning huquqlarini himoya qilish va reklama toʻgʻrisidagi qonunchilik sohasidagi tadqiqotlarning amaliy yoʻnaltirilganligini kuchaytirish va normativ-huquqiy bazani rivojlantirish, mutaxassislarning raqobat muhitini rivojlantirishning xalqaro amaliyoti sohasidagi bilim darajasini oshirish, monopoliyaga qarshi siyosat sohasida kadrlarni tayyorlash va qayta tayyorlashning zamonaviy tizimini yaratish maqsadida Vazirlar Mahkamasi qaror qiladi:

1. OʻzbyuroKES, Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasining TASIS dasturining “Oʻzbekiston Respublikasida davlat boshqaruvini takomillashtirish va davlat xizmatini isloh qilishga koʻmaklashish” EDUZ—9802-son loyihasi ofisi negizida Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi huzurida Monopoliyaga qarshi siyosatni takomillashtirish markazini tashkil etish toʻgʻrisidagi taklifi qabul qilinsin.

2. Quyidagilar Markazning asosiy vazifalari etib belgilansin:

respublika iqtisodiyoti tarmoqlarini monopoliyadan chiqarish jarayonlarini, shuningdek rivojlangan mamlakatlarda monopoliyaga qarshi tartibga solish amaliyotini tahlil qilish;

raqobat sohasida qonun hujjatlarini takomillashtirish hamda tovar va moliya bozorlarida raqobatni shakllantirish boʻyicha takliflar ishlab chiqish;

iqtisodiyotning monopol tarmoqlarini boshqarish tizimi tarkibini oʻzgartirish jarayonlarini oʻrganish va rivojlangan mamlakatlar tajribasini hisobga olgan holda ularni takomillashtirish boʻyicha takliflar tayyorlash;

iqtisodiyotda sogʻlom raqobat muhitini shakllantirish boʻyicha takliflar ishlab chiqish;

iqtisodiyot tarmoqlarini isloh qilish dasturlarining amalga oshirilishi yuzasidan monitoring tadqiqotlarini olib borish;

tovar va moliya bozorlarida raqobatni rivojlantirish sohasida loyihalarni amalga oshirish uchun xalqaro moliya tashkilotlari va boshqa donor tashkilotlar grantlarini jalb qilish;

respublika aholisini va xalqaro jamoatchilikni respublika iqtisodiyotida amalga oshirilayotgan islohotlar, iqtisodiyot tarmoqlarida monopoliyadan chiqarish jarayonlari toʻgʻrisida ommaviy axborot vositalari va Internet tarmogʻi orqali keng xabardor qilish;

respublika monopoliyaga qarshi kurash organlari kadrlari malakasini oshirish hamda sud boshqaruvchilarini tayyorlash va ularni qayta tayyorlash boʻyicha metodik qoʻllanmalar ishlab chiqish va kurslar tashkil etish.

3. Belgilab qoʻyilsinki, Markaz notijorat tashkiloti shaklida tashkil etiladi, unga belgilangan tartibda TASIS dasturining “Oʻzbekiston Respublikasida davlat boshqaruvini takomillashtirish va davlat xizmatini isloh qilishga koʻmaklashish” EDUZ—9802-son loyihasining barcha texnik va ofis asbob-uskunalari beriladi.

4. Markazning shtatdagi xodimlarining cheklangan soni 8 nafardan (xizmat koʻrsatuvchi xodimlardan tashqari) iborat boʻlgan tashkiliy tuzilmasi va Monopoliyaga qarshi siyosatni takomillashtirish markazi toʻgʻrisidagi Nizom 1 va 2-ilovalarga muvofiq tasdiqlansin.

5. Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi bir oy muddatda Markaz faoliyatini tashkil etish yuzasidan zarur chora-tadbirlar koʻrsin.

6. Xalqaro va boshqa donor tashkilotlar grantlari mablagʻlari hamda amaldagi qonun hujjatlariga zid boʻlmagan boshqa manbalar Markazni moliyalashtirish manbalari hisoblanishi maʼlumot uchun qabul qilinsin.

7. Markaz Oʻzbekiston Respublikasi Davlat statistika qoʻmitasi, Moliya vazirligi, Markaziy banki, Davlat soliq qoʻmitasi, Mehnat va aholini ijtimoiy muhofaza qilish vazirligi, Tashqi iqtisodiy aloqalar, investitsiyalar va savdo vazirligi, Davlat mulki qoʻmitasi, boshqa vazirliklar va idoralarning statistika axboroti byulletenlari majburiy tartibda yuboriladigan roʻyxatga kiritilsin.

8. Toshkent shahar hokimligi Markazni Toshkent shahri, Mustaqillik maydoni, 5-uydagi maʼmuriy binoning 10-qavatiga (TASIS dasturining EDUZ—9802-son loyihasi ofisi egallab turgan xonalar) joylashtirsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 29-iyul,

331-son

Vazirlar Mahkamasining 2003-yil 29-iyuldagi 331-son qaroriga 1-ILOVA

Monopoliyaga qarshi siyosatni takomillashtirish markazining tashkiliy

tuzilmasi

Vazirlar Mahkamasining 2003-yil 29-iyuldagi 331-son qaroriga 2-ILOVA

Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi huzuridagi Monopoliyaga qarshi siyosatni takomillashtirish markazi toʻgʻrisida

NIZOM

I. Umumiy qoidalar

1. Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi huzuridagi Monopoliyaga qarshi siyosatni takomillashtirish markazi (keyingi oʻrinlarda Markaz deb ataladi) raqobat, tabiiy monopoliyalar, bankrotlik, isteʼmolchilarning huquqlarini himoya qilish va reklama toʻgʻrisidagi qonunchilik sohasidagi tadqiqotlarning amaliy yoʻnaltirilganligini kuchaytirish va normativ-huquqiy bazani rivojlantirish, mutaxassislarning raqobat muhitini rivojlantirishning xalqaro amaliyoti sohasidagi bilim darajasini oshirish, monopoliyaga qarshi siyosat sohasida kadrlarni tayyorlash va qayta tayyorlashning zamonaviy tizimini yaratish maqsadida tashkil etilgan.

2. Markaz mustaqil notijorat yuridik shaxs hisoblanadi, alohida mulkka, mustaqil balansga, banklarda hisob raqamlariga, valyuta va boshqa hisob raqamlariga, dumaloq muhrga, firma blankasi, shtamp, logotip, uning faoliyati uchun zarur boʻlgan boshqa rekvizitlar va belgilarga ega boʻladi.

3. Markaz oʻzining faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi qarorlari va buyruqlari hamda mazkur Nizomga amal qiladi.

4. Markaz quyidagi toʻliq va qisqa nomlarga ega:

toʻliq nomi — Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi huzuridagi Monopoliyaga qarshi siyosatni takomillashtirish markazi;

qisqa nomi — Monopoliyaga qarshi siyosatni takomillashtirish markazi.

Markazning yuridik manzili: Oʻzbekiston Respublikasi, 100011, Toshkent shahri, Navoiy koʻchasi, 18 “A”.

II. Markazning asosiy vazifalari va funksiyalari

5. Quyidagilar Markaz asosiy vazifalari va faoliyati yoʻnalishlari hisoblanadi:

respublika iqtisodiyoti tarmoqlarida raqobatni rivojlantirish jarayonlarini, shuningdek xorijiy mamlakatlardagi monopoliyaga qarshi tartibga solish va raqobat siyosati amaliyotini tahlil qilish;

raqobat, tabiiy monopoliyalar, bankrotlik, isteʼmolchilarning huquqlarini himoya qilish va reklama toʻgʻrisidagi qonun hujjatlarini takomillashtirish boʻyicha takliflar ishlab chiqish;

iqtisodiyot tarmoqlarini boshqarish tizimini tarkibiy oʻzgartirish jarayonlarini oʻrganish hamda xorijiy mamlakatlar tajribasini oʻrgangan holda ularni takomillashtirish boʻyicha taklif tayyorlash;

iqtisodiyotda sogʻlom raqobat muhitini shakllantirish boʻyicha takliflar ishlab chiqish;

tabiiy monopoliyalar va bazaviy tarmoqlar sohasida bozor qayta oʻzgartirish jarayonlarini tadqiq etish;

monopoliyadan chiqarish, raqobatni rivojlantirish tarmoq va hududiy dasturlari loyihalari boʻyicha takliflar ishlab chiqish;

respublika aholisini va xalqaro jamoatchilikni respublika iqtisodiyoti tarmoqlarida monopoliyadan chiqarish jarayonlari toʻgʻrisida ommaviy axborot vositalari va Internet tarmogʻi orqali keng xabardor qilish;

respublika monopoliyaga qarshi organlari va sud boshqaruvchilari kadrlari malakasini oshirish, tayyorlash va ularni qayta tayyorlash boʻyicha metodik qoʻllanmalar ishlab chiqish va kurslar tashkil etish;

raqobatni rivojlantirish, tabiiy monopoliyalar sohasini tartibga solish, isteʼmolchilar huquqlarini himoya qilish va reklama bozorini tartibga solish, tarkibiy oʻzgartirish va moliyaviy sogʻlomlashtirish, shuningdek bankrotlik masalalarini taʼminlashning huquqiy va institutsional asoslarini takomillashtirish sohasidagi loyihalarni amalga oshirish uchun xalqaro moliya tashkilotlari va boshqa tashkilotlarning grantlarini jalb etish.

6. Markaz asosiy vazifalar va faoliyat yoʻnalishlariga muvofiq:

monopoliyaga qarshi siyosatni, bankrotlik, isteʼmolchilar huquqlarini himoya qilish va reklama toʻgʻrisidagi qonun hujjatlarini oʻrganish va takomillashtirish sohasida ilmiy-tadqiqot ishlarini bajaradi;

normativ-huquqiy hujjatlar loyihalarini tayyorlaydi va ekspertizadan oʻtkazadi;

xalqaro tashkilotlarni jalb etgan holda, seminarlar, konferensiyalar, simpoziumlar va boshqa tadbirlarni tashkil etadi va oʻtkazadi;

yuridik va jismoniy shaxslar oʻrtasida anketa va boshqa ijtimoiy soʻrovlar tashkil etadi va oʻtkazadi;

Monopoliyadan chiqarish va raqobatni rivojlantirish davlat qoʻmitasi, ilmiy-tadqiqot institutlari, vazirliklar, idoralar, respublika tashkilotlari va muassasalari bilan birgalikda prognoz hujjatlarni hamda maqsadli dasturlarni ishlab chiqishda qatnashadi;

respublika va xorijiy mamlakatlar ilmiy-tadqiqot tashkilotlari bilan ilmiy hamkorlik qiladi, respublika va xalqaro loyihalarda ishtirok etadi;

malaka oshirish kurslarini, shu jumladan davlat monopoliyaga qarshi organi xodimlari uchun malaka oshirish kurslarini oʻtkazadi, shuningdek sud boshqaruvchilarini tayyorlash kurslarini tashkil etadi;

davlat organlari va boshqa chet tashkilotlar buyurtmalari boʻyicha tahliliy obzorlar va tadqiqotlar oʻtkazadi;

Monopoliyadan chiqarish va raqobatni rivojlantirish qoʻmitasi uchun uning faoliyatini takomillashtirish boʻyicha tavsiyanomalar tayyorlaydi.

III. Markazning huquqlari

7. Markaz oʻziga yuklangan vazifalarni bajarish maqsadida quyidagi huquqlarga ega:

oʻz faoliyatini amalga oshirish uchun xalqaro tashkilotlarning, jamoat va ilmiy jamgʻarmalarning mablagʻlarini, ixtiyoriy badallar va grantlarni jalb etish;

mulkchilik shakllaridan qatʼi nazar, respublika korxonalari va tashkilotlaridan statistik, ilmiy yoki boshqa axborotlar va hujjatlarni belgilangan tartibda olish;

tadqiqotlar va sotsiologik soʻrovlar oʻtkazish hamda ijtimoiy-iqtisodiy tadqiqotlarga kontrakt asosida davlat boshqaruv organlari mutaxassislarini, ilmiy-tadqiqot institutlari va markazlar xodimlarini, shuningdek xorijiy olimlar va mutaxassislarni jalb etish, vaqtinchalik ishchi guruhlar va jamoalarni shakllantirish;

noshirlik faoliyatini amalga oshirish, Markaz ishlari sohasi boʻyicha maʼlumotnomalar, obzorlar va boshqa axborot materiallarini chop etish va ularni tarqatish;

jismoniy va yuridik shaxslarga konsalting xizmatlari koʻrsatish, marketing va sotsiologik tadqiqotlar oʻtkazish;

Markazning mintaqaviy vakolatxonalari va filiallarini tashkil etish;

Markazning vakolatiga kiritilgan, Oʻzbekiston Respublikasi qonun hujjatlariga va ushbu Nizomga zid boʻlmagan boshqa xatti-harakatlarni amalga oshirish.

IV. Markaz faoliyatini tashkil etish

8. Markaz faoliyatiga umumiy rahbarlikni amaldagi qonun hujjatlariga muvofiq Markaz direktori amalga oshiradi, u lavozimga Monopoliyadan chiqarish va raqobatni rivojlantirish qoʻmitasining raisi tomonidan tayinlanadi.

9. Markaz direktori:

Markaz faoliyatiga shtatdagi va shtatda boʻlmagan mutaxassislar kuchi bilan ishlab chiqiladigan hamda Monopoliyadan chiqarish va raqobatni rivojlantirish qoʻmitasi bilan kelishilgan joriy va istiqbolli dasturlar asosida rahbarlikni amalga oshiradi;

Markaz sohasiga muvofiq boʻlgan tashabbuskorlik va izlanish tadqiqotlari mavzusini tasdiqlaydi;

yuridik va jismoniy shaxslar bilan, shu jumladan xorijiy yuridik va jismoniy shaxslar bilan shartnomalar tuzadi;

Monopoliyadan chiqarish va raqobatni rivojlantirish qoʻmitasi bilan kelishgan holda xodimlar belgilangan soni doirasida Markazning tasdiqlangan tuzilmasiga oʻzgartirishlar kiritadi;

amaldagi qonun hujjatlariga muvofiq Markaz faoliyatini taʼminlash boʻyicha boshqa masalalarni hal qiladi.

Markaz direktori maqomiga koʻra Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi bosh boshqarmasi boshligʻiga tenglashtiriladi.

V. Markazning mol-mulki va mablagʻlari

10. Markaz faoliyatini moliyalashtirish xalqaro va boshqa donor tashkilotlar grantlari mablagʻlari hamda amaldagi qonun hujjatlariga zid boʻlmagan boshqa manbalar hisobiga amalga oshiriladi.

11. TASIS dasturining “Oʻzbekiston Respublikasida davlat boshqaruvini takomillashtirish va davlat xizmatini isloh qilishga koʻmaklashish” EDUZ—9802-son loyihasining barcha texnik va ofis asbob-uskunalari, shuningdek shartnoma asosida bajariladigan ishlardan olingan daromadlar hamda Oʻzbekiston Respublikasi qonun hujjatlari bilan taqiqlanmagan boshqa manbalar Markazning mol-mulkini shakllantirish manbalari hisoblanadi.

12. Markazning oʻz faoliyatidan olingan daromadi asosiy fondlarni sotib olishga va aylanma mablagʻlarni toʻldirishga, shuningdek ijtimoiy rivojlantirishga hamda xodimlarni moddiy ragʻbatlantirishga yoʻnaltirilishi mumkin.

VI. Yakuniy qoidalar

13. Markaz belgilangan tartibda buxgalteriya hisobini yuritadi va davlat hisobotini taqdim etadi.

14. Markazni qayta tashkil etish va tugatish qonun hujjatlarida belgilangan tartibda amalga oshiriladi.