Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurolni va uning oʻq-dorilarini topshirganlik uchun taqdirlash tartibini takomillashtirish toʻgʻrisida (367-son)

07.07.2026

Oʻzbekiston Respublikasi Vazirlar Mahkamasining

qarori

Oʻzbekiston Respublikasining “Qurol toʻgʻrisida”gi Qonuniga muvofiq mamlakatimizda qurol va uning oʻq-dorilari noqonuniy muomalasining oldini olish, ularni ixtiyoriy ravishda topshirgan shaxslarni taqdirlash tizimini yanada takomillashtirish maqsadida Vazirlar Mahkamasi qaror qiladi:

1. Quyidagilarni nazarda tutuvchi Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurolni va uning oʻq-dorilarini topshirganlik uchun taqdirlash tartibi toʻgʻrisidagi nizom 1-ilovaga muvofiq tasdiqlansin:

roʻyxatga olinmagan qurol, uning oʻq-dorilarini, oʻqotar qurolning asosiy qismlarini hududiy ichki ishlar organlari yoki profilaktika (katta) inspektoriga, portlovchi materiallar va portlatish qurilmalarini ushbu ashyolarni zararsizlantirish hamda yoʻq qilish boʻyicha mutaxassisni jalb etgan holda topshirish va qabul qilib olish tartibi;

ixtiyoriy topshirilgan va roʻyxatga olinmagan qurol hamda uning oʻq-dorilarining texnik yaroqliligini toifalash, ular asosida oʻz ixtiyori bilan topshirgan shaxslarga beriladigan pul mukofoti miqdorini belgilash va taqdirlash, shuningdek, oʻqotar qurolni va uning oʻq-dorilarini oʻz ixtiyori bilan topshirgan shaxslarga ularni belgilangan tartibda olish boʻyicha imtiyozli huquq berish tartibi;

roʻyxatga olinmagan qurol, uning oʻq-dorilarini va oʻqotar qurolning asosiy qismlarini ichki ishlar organlariga oʻz ixtiyori bilan topshirishga oid hujjatlarni koʻrib chiqish va rasmiylashtirish, ichki ishlar organlari tomonidan qabul qilib olingan bu turdagi ashyolarga tegishli maʼlumotlarni kriminalistika hamda axborot-qidiruv tizimlari orqali tekshirish tartibi;

portlovchi materiallarni va portlatish qurilmalarini oʻz ixtiyori bilan topshirish boʻyicha materiallarni rasmiylashtirish, ularni ixtisoslashtirilgan omborxonalarga joylashtirish yoki yoʻq qilish tartibi.

2. Belgilab qoʻyilsinki, roʻyxatga olinmagan qurol va uning oʻq-dorilarini ichki ishlar organlariga oʻz ixtiyori bilan topshirgan shaxslar Vazirlar Mahkamasining 2022-yil 22-fevraldagi 86-son qarori bilan tasdiqlangan Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari toʻgʻrisidagi yagona nizomga 46 va 47-ilovalarning 6-pozitsiyalari asosida qurol muomalasi sohasida ruxsatnoma berish haqidagi ariza koʻrib chiqilgani, uning amal qilish muddati uzaytirilgani, ruxsatnoma qayta rasmiylashtirilgani va unga oʻzgartirishlar kiritilgani uchun undirilib, Oʻzbekiston Respublikasi Ichki ishlar vazirligining budjetdan tashqari hisobvaragʻiga kelib tushadigan mablagʻlar hisobidan taqdirlanadi.

3. Oʻzbekiston Respublikasi Ichki ishlar vazirligi:

roʻyxatga olinmagan qurol va uning oʻq-dorilarini ichki ishlar organlariga oʻz ixtiyori bilan topshirgan shaxslarni taqdirlab borish uchun zarur boʻlgan mablagʻlarning oʻz vaqtida ajratilishi hamda ularni topshirgan shaxslarga toʻliq toʻlanishini qatʼiy nazoratga olsin;

tuman (shahar) ichki ishlar organlarining navbatchilik qismlarida jismoniy va yuridik shaxslar tomonidan topshiriladigan roʻyxatga olinmagan qurol va uning oʻq-dorilarini, oʻqotar qurolning asosiy qismlarini qabul qilish, ishonchli tarzda saqlash va hisobotini yuritishga oid shart-sharoitlarni oʻrganib chiqib, zaruratga koʻra, roʻyxatga olinmagan qurol va uning oʻq-dorilari saqlanadigan xonalarni kengaytirish va qoʻshimcha jihozlash choralarini koʻrsin;

tuman (shahar) ichki ishlar organlarining nazorat-oʻtkazish punktlarida roʻyxatga olinmagan qurol va uning oʻq-dorilarini topshirish uchun kelgan shaxslardan ularni olib qolish va navbatchilik qismiga olib kirilgunga qadar saqlab turish uchun sharoit yaratsin.

4. Oʻzbekiston Respublikasi Ichki ishlar vazirligi manfaatdor vazirlik va idoralar bilan birgalikda:

ikki oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin;

ushbu qarorning mazmun-mohiyati va ahamiyati ommaviy axborot vositalarida keng yoritilishini taʼminlasin.

5. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

6. Ushbu qarorning bajarilishini nazorat qilish Oʻzbekiston Respublikasi ichki ishlar vaziri A.A. Tashpulatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 7-iyul,

367-son

Vazirlar Mahkamasining 2026-yil 7-iyuldagi 367-son qaroriga 1-ILOVA

Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurolni va uning oʻq-dorilarini topshirganlik uchun taqdirlash tartibi toʻgʻrisida

NIZOM

1-bob. Umumiy qoidalar

1. Ushbu Nizom roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi moddalarni, portlatish vositalarini va portlatish qurilmalarini ichki ishlar organlariga oʻz ixtiyori bilan topshirish hamda qurolni va uning oʻq-dorilarini topshirganlik uchun taqdirlash tartibini belgilaydi.

Oʻq-dorilarni topshirganlik uchun taqdirlash tartibi faqat oʻqotar qurolning oʻq-dorilariga nisbatan tatbiq etiladi.

2. Ushbu Nizomda quyidagi asosiy tushunchalardan foydalaniladi:

markaziy texnik komissiya — Oʻzbekiston Respublikasi Ichki ishlar vazirligi Moliya va moddiy-texnika taʼminoti departamentining xoʻjalik boshqarmasida saqlanayotgan olib qoʻyilgan, ixtiyoriy ravishda topshirilgan va topilgan qurol-yarogʻlarning qabul qilinishini, texnik holati aniqlanishini, yoʻq qilinishini hamda tasarruf etilishini tashkillashtirish boʻyicha sohaviy xizmatlarning masʼul xodimlaridan tuziladigan texnik komissiya;

mintaqaviy texnik komissiya — Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari Moliya va moddiy-texnika taʼminoti boshqarmalarining xoʻjalik boshqarmalarida (boʻlimlarida) saqlanayotgan olib qoʻyilgan, ixtiyoriy ravishda topshirilgan va topilgan qurol-yarogʻlarning qabul qilinishini, texnik holati aniqlanishini, yoʻq qilinishini hamda tasarruf etilishini tashkillashtirish boʻyicha sohaviy xizmatlarning masʼul xodimlaridan tuziladigan texnik komissiya;

patron — oʻqotar quroldan otishga moʻljallangan, gilza yordamida oʻt oldirish moslamasi vositasini, porox zaryadi va otiladigan aslahalarni birlashtiruvchi oʻq-dori;

pnevmatik qurol — siqilgan, suyultirilgan yoki qotirilgan gazsimon moddaning quvvati hisobidan yoʻnaltirilgan holda harakatga keladigan aslaha bilan nishonni masofadan turib urish uchun moʻljallangan qurol;

portlatish vositalari — portlovchi modda zaryadi portlashini qoʻzgʻatuvchi (taʼminlovchi) vosita (detonator, zapal, alanga oʻtkazuvchi shnur va boshqalar);

portlatish qurilmalari — portlovchi moddalar bilan toʻldirilgan va portlatish uchun moʻljallangan yigʻilgan holdagi qurilmalar;

portlovchi materiallar — oʻz xususiyatlariga koʻra portlashi, portlovchi taʼsirga ega boʻlgan va yongʻinga olib kelishi mumkin boʻlgan portlovchi moddalar, portlatish vositalari, shuningdek, tarkibida pirotexnika taʼsirini yaratish uchun moʻljallangan portlovchi moddalar va portlatish vositalari boʻlgan qurilmalar;

portlovchi moddalar — porox, dinamit, trotil, nitroglitserin, ammonit va kislorodli havo yetishmagan vaziyatda portlash xususiyatiga ega boʻlgan kimyoviy moddalar va aralashmalar;

signal beruvchi qurol — tuzilishi jihatidan faqat yorugʻlik, tutunli yoki tovushli signallar berish uchun moʻljallangan qurol;

silliq stvolli oʻqotar qurol — stvol kanali silliq boʻlgan oʻqotar qurol;

sovuq qurol — shikast yetkaziladigan obyekt bilan bevosita toʻqnashish chogida odamning jismoniy kuchi yordamida nishonni urish uchun moʻljallangan qurol;

soyli stvolli oʻqotar qurol — stvol kanalida otilgan oʻqqa aylanma harakat beruvchi spiralsimon oʻyiqlarga (ariqchalarga) ega boʻlgan oʻqotar qurol;

tigʻli sovuq qurol — ov pichoqlari, ov xanjarchalari va xanjarlar, rapiralar, shpagalar va qilichlar;

uloqtirish quroli — nishonni aslaha bilan masofadan turib urish uchun moʻljallangan, odamning jismoniy kuchi yoki mexanik qurilma yordamida yoʻnaltirilgan holda harakatga keladigan qurol;

oʻzini oʻzi himoya qilish quroli — gazli qurol (koʻzdan yosh oqizadigan yoki achishtiradigan moddalarni qoʻllash orqali jonli nishonga vaqtincha shikast yetkazish uchun moʻljallangan qurol), elektroshok qurilmalari, uchqun chiqargichlar va shikast yetkazuvchi taʼsiri elektr energiyasidan foydalanishga asoslangan boshqa qurilmalar;

oʻq-dorilar — qurolning jonli nishonni yoki boshqa nishonni urish uchun moʻljallangan hamda tarkibida portlovchi, poroxli, uloqtiruvchi, pirotexnika yoki urib chiqaradigan moddalar yoxud ularning birikmasi mavjud boʻlgan qurol-yarogʻ ashyolari va uloqtiriladigan aslahasi;

oʻqotar qurol — porox yoki boshqa modda quvvati hisobidan yoʻnaltirilgan holda harakatga keluvchi aslaha bilan nishonni masofadan turib mexanik urish uchun moʻljallangan qurol;

oʻqotar qurolning asosiy qismlari — stvol, zatvor, oʻqdon (baraban), ramka, stvol qutisi;

qurol — tuzilishiga koʻra jonli nishonni yoki boshqa nishonni urish, signallar berish uchun moʻljallangan qurilmalar va ashyolar. Tuzilishi jihatidan qurolga oʻxshash boʻlgan xoʻjalik-maishiy va ishlab chiqarish maqsadidagi buyumlar sifatida sertifikatlangan buyumlar, tuzilishi jihatidan qurolga oʻxshash boʻlgan sport aslahalari bundan mustasno.

3. Oʻzbekiston Respublikasi Jinoyat kodeksining 248-moddasiga muvofiq oʻqotar qurolni va uning oʻq-dorilarini, oʻqotar qurolning asosiy qismlarini, portlovchi moddalarni, portlatish vositalarini va portlatish qurilmalarini oʻz ixtiyori bilan topshirgan shaxslar qonunchilik hujjatlarida belgilangan javobgarlikdan ozod qilinadi.

Oʻzbekiston Respublikasi Maʼmuriy javobgarlik toʻgʻrisidagi kodeksining 2201-moddasiga muvofiq pnevmatik, signal beruvchi, tigʻli sovuq qurolni, uloqtirish qurolini va oʻzini oʻzi himoya qilish qurolini oʻz ixtiyori bilan topshirgan shaxslar maʼmuriy javobgarlikdan ozod qilinadi.

4. Jismoniy shaxs yoki yuridik shaxsning rahbari roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini oʻz ixtiyori bilan topshirish toʻgʻrisida qarorga kelsa va uning oʻzi ushbu ashyolarni topshirish haqida ichki ishlar organlariga yozma yoki ogʻzaki ravishda murojaat qilsa, mazkur shaxs ashyolarni oʻz ixtiyori bilan topshirgan hisoblanadi.

5. Jismoniy shaxs yoki yuridik shaxsning rahbari jinoyat-protsessual qonunchiligiga muvofiq tintuv yoki maʼmuriy huquqbuzarlik toʻgʻrisidagi ishni yuritish jarayonida, shuningdek, litsenziya va ruxsat berish xususiyatiga ega hujjatlarning talab va shartlariga rioya qilinishini tekshirish davomida roʻyxatga olinmagan qurol va uning oʻq-dorilari, oʻqotar qurolning asosiy qismlari, portlovchi materiallar va portlatish qurilmalari borligi haqida dalillar keltirilishi natijasida ularni topshirish toʻgʻrisidagi qarorga kelsa, mazkur shaxs ushbu ashyolarni oʻz ixtiyori bilan topshirgan hisoblanmaydi.

6. Jismoniy shaxs yoki yuridik shaxsning rahbari roʻyxatga olinmagan qurolni va uning oʻq-dorilarini oʻz ixtiyori bilan topshirgani uchun pul mukofoti bilan taqdirlanishi yoki oʻzi topshirgan oʻqotar qurolni va uning patronlarini imtiyozli (birinchi navbatda) olish huquqiga ega boʻlishi mumkin.

7. Qurolni va uning oʻq-dorilarini, oʻqotar qurolning asosiy qismlarini ichki ishlar organlariga oʻz ixtiyori bilan topshirish hamda qurolni va uning oʻq-dorilarini topshirganlik uchun taqdirlash ushbu Nizomga 1-ilovaga muvofiq sxema boʻyicha amalga oshiriladi.

2-bob. Qurolni va uning oʻq-dorilarini, oʻqotar qurolning asosiy qismlarini oʻz ixtiyori bilan topshirish, ularni ichki ishlar organlari tomonidan qabul qilib olish hamda qurolni va uning oʻq-dorilarini oʻz ixtiyori bilan topshirganlik uchun taqdirlash

1-§. Ariza beruvchi tomonidan qurolni va uning oʻq-dorilarini, oʻqotar qurolning asosiy qismlarini bevosita ichki ishlar organiga topshirish hamda ularni ichki ishlar organlari tomonidan qabul qilib olish

8. Qurolni va uning oʻq-dorilarini, oʻqotar qurolning asosiy qismlarini oʻz ixtiyori bilan topshirishga istak bildirgan jismoniy shaxs yoki yuridik shaxsning rahbari yoxud ularning nomidan ish yuritish vakolatiga ega boʻlgan shaxslar (keyingi oʻrinlarda — ariza beruvchi) yozma yoki ogʻzaki ravishda ariza bilan bevosita, telefon orqali, elektron vositalardan foydalangan holda, oʻzining yashash (turar) joyi boʻyicha ichki ishlar organiga murojaat qiladi.

Ariza ushbu Nizomga 2 va 3-ilovalarda keltirilgan namunaviy shakllarga muvofiq rasmiylashtiriladi.

Bunda ariza beruvchi arizada faqat amalda mavjud va oʻziga maʼlum boʻlgan ishonchli maʼlumotlarni koʻrsatishi shart.

9. Ariza beruvchi qurolni va uning oʻq-dorilarini, oʻqotar qurolning asosiy qismlarini oʻz ixtiyori bilan topshirish toʻgʻrisida ogʻzaki murojaat qilganda, ariza tegishliligi boʻyicha ichki ishlar organining tezkor navbatchisi tomonidan rasmiylashtiriladi.

10. Ariza beruvchi tomonidan topshirilayotgan qurol qismlarga boʻlaklangan (agar texnik imkoniyati boʻlsa), patronlari olingan, shuningdek, qurol va uning oʻq-dorilari, oʻqotar qurolning asosiy qismlari begona shaxslarning koʻrish imkoniyatini istisno etadigan oʻramga joylashtirilgan boʻlishi lozim.

Ariza beruvchi ichki ishlar organi nazorat-oʻtkazish punktida xizmatni oʻtayotgan xodimga qurol va uning oʻq-dorilari, oʻqotar qurolning asosiy qismlari joylashtirilgan oʻramni qoldiradi hamda mazkur oʻram ichki ishlar organi xodimi kuzatuvida navbatchilik qismiga olib kiriladi.

Nazorat-oʻtkazish punktida qoldirilgan qurol va uning oʻq-dorilari, oʻqotar qurolning asosiy qismlari navbatchilik qismiga tezkor navbatchining yordamchisi tomonidan olib kiriladi.

Ariza beruvchi tomonidan oʻz ixtiyori bilan topshirilayotgan qurol va uning oʻq-dorilari, oʻqotar qurolning asosiy qismlari ariza beruvchi ishtirokida tezkor navbatchi tomonidan qabul qilib olinadi.

Agar ikki va undan koʻp ariza beruvchi bir vaqtning oʻzida qurolni va uning oʻq-dorilarini, oʻqotar qurolning asosiy qismlarini topshirishga kelgan boʻlsa, ular hamda ular tomonidan topshirilayotgan qurol va uning oʻq-dorilari, oʻqotar qurolning asosiy qismlari navbatchilik qismiga birma-bir olib kiriladi.

Bunda qolgan ariza beruvchilar qurol va uning oʻq-dorilari, oʻqotar qurolning asosiy qismlari joylashtirilgan oʻramlarini nazorat-oʻtkazish punktiga topshirgan holda oʻz navbatlarini kutadilar.

11. Qurolni va uning oʻq-dorilarini, oʻqotar qurolning asosiy qismlarini qabul qilishda hududiy ichki ishlar organining tezkor navbatchisi ularni topshirayotgan ariza beruvchi ishtirokida ushbu Nizomga 5-ilovaga muvofiq oʻz ixtiyori bilan topshirilgan ashyolarni koʻzdan kechirish hamda qabul qilib olish dalolatnomasini tuzish orqali qabul qilinayotgan qurolning soni, turi (sistemasi), rusumi, modeli, kalibri va mavjud oʻziga xos individual rekvizitlari (seriyasi, raqami va ishlab chiqarilgan yili), patronlar soni, turi va kalibrining, oʻqotar qurolning asosiy qismlarining ularni topshirish haqidagi arizada koʻrsatilgan yozuvlarga mosligini tekshiradi.

Tekshiruv davomida topshirilayotgan ashyolarning rekvizitlari bilan ularni topshirish haqidagi arizada koʻrsatilgan yozuvlar oʻrtasida tafovutlar aniqlanganda (yoki arizada koʻrsatilmagan rekvizitlarga aniqlik kiritilganda), oʻz ixtiyori bilan topshirilgan ashyolarni koʻzdan kechirish hamda qabul qilib olish dalolatnomasining “Xulosa va takliflar” qismida kiritilgan oʻzgartirish va qoʻshimchalar haqida tegishli izohlar qayd etiladi.

Tekshiruv yakuni boʻyicha qabul qilib olingan qurol va uning oʻq-dorilari, oʻqotar qurolning asosiy qismlari fotosuratga yoki videotasvirga tushiriladi va materiallarga qoʻshib qoʻyiladi.

Qurolning turini (sistemasini), rusumini, modelini, kalibrini, oʻziga xos individual rekvizitlarini, patronlarning turi va kalibrini, shuningdek, oʻqotar qurolning asosiy qismlari tegishliligini aniqlashda qiyinchiliklar yuzaga kelganda, ularni koʻzdan kechirish uchun hududiy ichki ishlar organining ekspert-kriminalist xodimi jalb etiladi.

12. Ixtiyoriy topshirilgan qurol va uning oʻq-dorilari, oʻqotar qurol asosiy qismlarining hisobini yuritish maqsadida hududiy ichki ishlar organining tezkor navbatchisi tomonidan ushbu Nizomga 6-ilovaga muvofiq har bir qurol (turi, rusumi, kalibri, seriyasi, ishlab chiqarilgan yili), patronlar (ishlab chiqarilgan yili, zavodi va partiyasi, qurol turi va kalibri boʻyicha — aniqlik kiritilgan boʻlsa), shuningdek, oʻqotar qurolning asosiy qismlari koʻrsatilgan holda uch nusxada kvitansiya rasmiylashtiriladi hamda ushbu Nizomga 7-ilovaga muvofiq ichki ishlar organi navbatchilik qismida yuritiladigan “Ichki ishlar organlariga topshirilgan qurol, uning oʻq-dorilari va oʻqotar qurolning asosiy qismlarini qayd etish” jurnaliga (keyingi oʻrinlarda — maxsus jurnal) tegishli yozuvlar qayd qilinadi.

Kvitansiyaning bir nusxasi qurolni va uning oʻq-dorilarini, oʻqotar qurolning asosiy qismlarini topshirayotgan ariza beruvchiga maxsus jurnalga imzo qoʻydirilgan holda topshiriladi, ikkinchi nusxasi qurol va uning oʻq-dorilari, oʻqotar qurolning asosiy qismlari bilan birga saqlanadi, uchinchi nusxasi nazorat uchun hududiy ichki ishlar organining navbatchilik qismida qoldiriladi.

13. Agarda qabul qilinayotgan qurolning individual raqami mavjud boʻlmasa yoki raqami oʻchirilgan boʻlsa, unga Hodisalar toʻgʻrisidagi xabarlarni qayd etish kitobida materiallar qayd etilgan vaqtincha tartib raqam beriladi. Qurolga berilgan vaqtincha tartib raqam kvitansiyaga kiritiladi.

14. Kvitansiya toʻldirilgandan keyin hududiy ichki ishlar organining tezkor navbatchisi qurolni va uning oʻq-dorilarini, oʻqotar qurolning asosiy qismlarini bu turdagi qurol-yarogʻlarni vaqtincha saqlash uchun ichki ishlar organining qurolxonasida ajratilgan alohida maxsus temir seyf (shkaf)larga joylashtiradi.

15. Oʻz ixtiyori bilan topshirilgan qurolga va uning oʻq-dorilariga, oʻqotar qurolning asosiy qismlariga oid materiallar yuzasidan tezkor navbatchi tomonidan navbatchilik davomida hududiy ichki ishlar organining boshligʻiga axborot beriladi hamda materiallar tegishli hududiy ichki ishlar organining Jamoat xavfsizligi xizmati jamoat tartibini saqlash boʻlimi (boʻlinmasi, guruhi) nazorat-litsenziyalash faoliyati boʻlinmasi (yoki ushbu vazifalar yuklangan) xodimiga (keyingi oʻrinlarda — masʼul xodim) belgilangan tartibda topshiriladi.

2-§. Ariza beruvchi tomonidan qurolni va uning oʻq-dorilarini, oʻqotar qurolning asosiy qismlarini profilaktika (katta) inspektoriga topshirish hamda ularni ichki ishlar organlari tomonidan qabul qilib olish

16. Olis va borish qiyin boʻlgan aholi punktlarida yashovchi (joylashgan), shuningdek, keksaligi, sogʻligʻi, oilaviy sharoiti va oʻzga holatlar sababli qurolni va uning oʻq-dorilarini, oʻqotar qurolning asosiy qismlarini bevosita hududiy ichki ishlar organiga topshirish imkoniyatiga ega boʻlmagan shaxslar ushbu ashyolarni yozma yoki ogʻzaki ravishda ariza bilan bevosita, telefon orqali, elektron vositalardan foydalangan holda yoki oʻz yashash (turar) joyidagi profilaktika (katta) inspektorini chaqirtirgan holda topshirishi mumkin.

Bunda profilaktika (katta) inspektori topshirilayotgan qurolni va uning oʻq-dorilarini, oʻqotar qurolning asosiy qismlarini fotosuratga yoki videotasvirga tushiradi. Qabul qilib olingan arizaning nusxasini ushbu ashyolarni topshirgan shaxsga qoldiradi.

17. Qurolni va uning oʻq-dorilarini, oʻqotar qurolning asosiy qismlarini qabul qilib olgan profilaktika (katta) inspektori ushbu Nizomga 4-ilovaga muvofiq bildirgi asosida hududiy ichki ishlar organining tezkor navbatchisiga qurolni va uning oʻq-dorilarini, oʻqotar qurolning asosiy qismlarini topshiradi, bildirgiga ularni topshirgan shaxsning arizasi ilova qilinadi.

Bunda hududiy ichki ishlar organining tezkor navbatchisi tomonidan ushbu Nizomning 11-bandida qayd etilgan, oʻz ixtiyori bilan topshirilgan ashyolarni koʻzdan kechirish hamda qabul qilib olish dalolatnomasi ularni qabul qilib olgan profilaktika (katta) inspektori ishtirokida tuziladi.

18. Tekshiruv yakuni boʻyicha oʻz ixtiyori bilan topshirilgan qurol va uning oʻq-dorilari, oʻqotar qurolning asosiy qismlari profilaktika (katta) inspektori tomonidan ushbu ashyolarni qabul qilishda olingan fotosuratlar yoki videotasvir bilan birga hududiy ichki ishlar organining tezkor navbatchisi tomonidan ushbu Nizomning 12 — 15-bandlarida belgilangan tartibda qabul qilib olinadi hamda hududiy ichki ishlar organining boshligʻiga axborot berilgan holda materiallar masʼul xodimga belgilangan tartibda topshiriladi.

Bunda ushbu Nizomning 12-bandida koʻrsatilgan kvitansiyaning birinchi nusxasi bir sutka mobaynida ariza beruvchiga taqdim etish uchun profilaktika (katta) inspektoriga beriladi.

19. Profilaktika (katta) inspektori orqali topshirilgan qurolni, uning oʻq-dorilarini va oʻqotar qurolning asosiy qismlarini koʻzdan kechirish jarayonida ularni topshirish haqidagi arizada koʻrsatilgan yozuvlar bilan nomuvofiqliklar aniqlangan taqdirda, qayd etilgan qurol, uning oʻq-dorilari va oʻqotar qurolning asosiy qismlari hududiy ichki ishlar organining ekspert-kriminalist xodimi jalb etilgan holda, profilaktika (katta) inspektori tomonidan ushbu ashyolarni qabul qilishda olingan fotosuratlar yoki videotasvir bilan solishtiriladi.

Solishtirish natijalari boʻyicha fotosuratlarda yoki videotasvirda qayd etilgan qurol, uning oʻq-dorilari va oʻqotar qurolning asosiy qismlari bilan topshirilayotgan qurolning turini (sistemasini), modelini, kalibrini, oʻziga xos individual rekvizitlarini (misol uchun, “8” raqamini “0” yoki “G” harfini “S” harfi bilan adashtirish kabilar), patronlarning kalibrini, shuningdek, oʻqotar qurolning asosiy qismlari tegishliligini aniqlashga doir yozuvlar oʻrtasidagi tafovutlar aniqlanganda, koʻzdan kechirish hamda qabul qilib olish dalolatnomasining nusxasi bir sutka mobaynida ushbu ashyolarni topshirgan shaxsga taqdim etish uchun profilaktika (katta) inspektoriga beriladi.

Solishtirish natijalari boʻyicha fotosuratlarda yoki videotasvirda qayd etilgan qurol, uning oʻq-dorilari va oʻqotar qurolning asosiy qismlari bilan topshirilayotgan qurolning rusumi (silliq stvolli, soyli stvolli, pnevmatika), seriyasi va raqamlari, soni, patronlarning turi (silliq stvolli oʻqotar qurol yoki soyli stvolli qurol uchun) yoki soni oʻrtasida tafovutlar aniqlanganida, ichki ishlar organining tezkor navbatchisi koʻzdan kechirish hamda qabul qilib olish dalolatnomasini va boshqa materiallarni (ariza, profilaktika (katta) inspektorining bildirgisi) hamda ushbu Nizomning 12-bandida koʻrsatilgan kvitansiyaning birinchi nusxasini ilova qilgan holda, bildirgi bilan holat boʻyicha ichki ishlar organi boshligʻiga yoki uning vazifasini bajaruvchi shaxsga axborot beradi.

20. Ushbu bildirgi asosida ichki ishlar organi boshligi (uning vazifasini bajaruvchi shaxs) tomonidan holat boʻyicha belgilangan tartibda tekshiruv oʻtkazilishi tayinlanadi.

Tekshiruv oʻtkazilishini ushbu Nizomning 15-bandida koʻrsatilgan masʼul xodim zimmasiga yuklash taqiqlanadi.

21. Tezkor navbatchi tomonidan tekshiruv tayinlangan qurol va uning oʻq-dorilari, oʻqotar qurolning asosiy qismlari boʻyicha toʻldirilgan kvitansiyaning birinchi nusxasi tekshiruv materiallariga qoʻshib qoʻyilgani haqidagi maʼlumot maxsus jurnalning “izoh” ustuniga qayd qilinadi.

22. Holat boʻyicha tekshiruvni oʻtkazuvchi xodim tomonidan tegishli materiallar olingan vaqtdan boshlab bir sutka ichida ushbu qurolni va uning oʻq-dorilarini, oʻqotar qurolning asosiy qismlarini topshirgan shaxsga tegishli xabarnoma yuboriladi.

Tekshiruv ishlari yakuni boʻyicha tegishli qurol va uning oʻq-dorilari, oʻqotar qurolning asosiy qismlari boʻyicha barcha materiallar masʼul xodimga belgilangan tartibda topshiriladi.

23. Ichki ishlar organlariga oʻz ixtiyori bilan topshirilgan qurol va uning oʻq-dorilari hamda oʻqotar qurolning asosiy qismlari boʻyicha materiallarni rasmiylashtirish, ularning hisobini yuritish va ularni saqlash tartibi Oʻzbekiston Respublikasi ichki ishlar vaziri tomonidan belgilanadi.

3-§. Oʻz ixtiyori bilan topshirilgan qurol va uning oʻq-dorilari, oʻqotar qurolning asosiy qismlari boʻyicha hujjatlarni koʻrib chiqish

24. Masʼul xodim tomonidan qurolni va uning oʻq-dorilarini, oʻqotar qurolning asosiy qismlarini oʻz ixtiyori bilan topshirishga doir hujjatlar kelib tushgan kundan boshlab ikki ish kuni ichida quyidagi soʻrovnomalar yuboriladi:

hududiy ichki ishlar organining tergov boʻlinmasiga — Oʻzbekiston Respublikasi Jinoyat-protsessual kodeksining 329 va 330-moddalarida nazarda tutilgan tartibda tekshiruv ishlarini amalga oshirish uchun oʻqotar qurolni va uning oʻq-dorilarini, oʻqotar qurolning asosiy qismlarini oʻz ixtiyori bilan topshirishga doir hujjatlarning nusxalari ilova etilgan holda;

hududiy ichki ishlar organining ekspert-kriminalistika boʻlinmasiga — qurol va uning oʻq-dorilari, oʻqotar qurol asosiy qismlarining texnik holatini aniqlash, kriminalistik hisobdan tekshirish hamda ballistik ekspertiza oʻtkazish uchun oʻz ixtiyori bilan topshirilgan qurol va uning oʻq-dorilari, oʻqotar qurolning asosiy qismlari ilova etilgan holda;

Oʻzbekiston Respublikasi Ichki ishlar vazirligining Raqamli texnologiyalar va huquqiy statistika departamenti Huquqiy statistika bosh markaziga (uning hududiy boʻlinmalariga) — qurol, oʻqotar qurolning asosiy qismlarini fuqaroviy va xizmat qurollarining, yoʻqotilgan va aniqlangan qurollarning markazlashgan axborot tizimlaridan tekshiruvdan oʻtkazish uchun;

hududiy ichki ishlar organining huquqbuzarliklar profilaktikasi boʻlinmasiga — Oʻzbekiston Respublikasining Maʼmuriy javobgarlik toʻgʻrisidagi kodeksining 2201-moddasi uchinchi qismiga muvofiq oʻz ixtiyori bilan qurolni topshirgan shaxsni maʼmuriy javobgarlikdan ozod qilish yuzasidan tegishli materiallarni tayyorlash va sudga chiqarish (pnevmatik, signal beruvchi, tigʻli sovuq, uloqtirish qurolini va oʻzini oʻzi himoya qilish qurolini oʻz ixtiyori bilan topshirishga doir hujjatlarning nusxalari ilova etilgan holda), shuningdek, jismoniy shaxsning yashash (turar) joyi boʻyicha qurolni va uning oʻq-dorilarini saqlashga shart-sharoitlar mavjudligini hamda uning qurolga egalik qilishiga monelik qiladigan asoslar mavjud emasligi yuzasidan tekshiruv ishlarini oʻtkazish uchun (oʻqotar qurolni va uning oʻq-dorilarini topshirgan jismoniy shaxsning arizasida ularni imtiyozli (ustuvor tarzda) olish huquqini berish koʻrsatilganda).

Soʻrovnoma hududiy ichki ishlar organi boshligʻi tomonidan imzolanadi.

25. Ushbu Nizomning 24-bandida koʻrsatilgan boʻlinmalar tomonidan tegishli tekshiruv tadbirlari qonunchilik hujjatlarida belgilangan muddatda oʻtkazilib, natijalari boʻyicha masʼul xodimga quyidagilar taqdim etiladi:

tergov boʻlinmasi tomonidan — Oʻzbekiston Respublikasi Jinoyat kodeksining 248-moddasiga muvofiq jinoyat ishini qoʻzgʻatish yoki uni qoʻzgʻatishni rad etish toʻgʻrisida qabul qilingan qaror;

ekspert-kriminalistika boʻlinmasi tomonidan — oʻtkazilgan ballistik ekspertiza natijalari boʻyicha qurol va uning oʻq-dorilarining, oʻqotar qurol asosiy qismlarining texnik holati, foydalanishga yaroqliligi, haqiqiy soni, turi, rusumi, kalibri, seriyasi, raqami va ishlab chiqarilgan yili toʻgʻrisidagi xulosa, shuningdek, soyli stvolli oʻqotar qurol boʻyicha Davlat oʻq-gilzotekasi tekshirish natijalari boʻyicha maʼlumotnoma (oʻz ixtiyori bilan topshirilgan qurol va uning oʻq-dorilari bilan birga);

Oʻzbekiston Respublikasi Ichki ishlar vazirligining Raqamli texnologiyalar va huquqiy statistika departamenti Huquqiy statistika bosh markazi (uning hududiy boʻlinmalari) tomonidan — qurolni, oʻqotar qurolning asosiy qismlarini fuqaroviy va xizmat qurollarining, yoʻqotilgan va aniqlangan qurollarning markazlashgan axborot tizimlaridan dastlabki tekshiruvdan oʻtkazish natijalari boʻyicha maʼlumotnoma;

huquqbuzarliklar profilaktikasi boʻlinmasi tomonidan — qurolni oʻz ixtiyori bilan topshirgan shaxs maʼmuriy javobgarlikdan ozod qilingani toʻgʻrisida sudning qarori, shundan kelib chiqib, jismoniy shaxsning yashash (turar) joyi boʻyicha qurolni saqlashga shart-sharoitlar mavjudligi (mavjud emasligi) hamda uning qurolga egalik qilish uchun monelik qiladigan asoslar mavjud emasligi (mavjudligi) yuzasidan xulosa (oʻqotar qurolni va uning oʻq-dorilarini topshirgan shaxsning arizasida uni imtiyozli (birinchi navbatda) olish huquqini berish koʻrsatilganda).

Oʻzbekiston Respublikasi Ichki ishlar vazirligining Raqamli texnologiyalar va huquqiy statistika departamenti Huquqiy statistika bosh markazi (uning hududiy boʻlinmalari) oʻz ixtiyori bilan topshirilgan qurol yoʻqotilgan qurol sifatida respublika qidiruvida yoki xalqaro hamkorlik shartnomalariga muvofiq davlatlararo qidiruvda boʻlgan hollarda, aniqlangan qurolning aynan yoʻqotilganini aniqlash maqsadida tegishli tadbirlar oʻtkazadi.

Ekspert-kriminalistika boʻlinmasi qurolning, oʻqotar qurol asosiy qismlarining tamgʻali (markirovka) belgilari olib tashlangan yoki ular koʻrinmaydigan hollarda, tamgʻali (markirovka) belgilarini aniqlash boʻyicha qoʻshimcha kriminalistika tadqiqotini oʻtkazadi. Kriminalistika tadqiqoti qurolning tamgʻali (markirovka) belgilari qoʻyilgan qismlarga shikast yetkazmaydigan yoki shikast yetkazuvchi (destruktiv) usullar bilan oʻtkaziladi.

26. Masʼul xodim yuborilgan soʻrovnomalar boʻyicha ushbu Nizomning 24-bandida koʻrsatilgan boʻlinmalardan tegishli hujjatlarni olgan kundan boshlab bir ish kuni ichida toʻplangan materiallarni umumlashtiradi hamda tegishli xulosa loyihasini tayyorlaydi, ariza beruvchi tomonidan qurolni va uning oʻq-dorilarini oʻz ixtiyori bilan topshirish haqidagi arizani barcha toʻplangan hujjatlar bilan birga koʻrib chiqish, ariza beruvchini pul mukofoti bilan taqdirlash yoxud unga oʻqotar qurol va uning oʻq-dorilarini imtiyozli olish huquqini berish yuzasidan qaror qabul qilish uchun mintaqaviy texnik komissiyaga yuboradi.

4-§. Arizani koʻrib chiqish hamda ariza beruvchini taqdirlash yoki taqdirlashni rad etish boʻyicha qaror qabul qilish

27. Ariza beruvchi tomonidan qurolni va uning oʻq-dorilarini oʻz ixtiyori bilan topshirish boʻyicha yozilgan arizani koʻrib chiqish va pul mukofoti bilan taqdirlash yoki taqdirlashni rad etish yoxud unga oʻqotar qurolni va uning oʻq-dorilarini imtiyozli olish huquqini berish yoki berishni rad etish toʻgʻrisida mintaqaviy texnik komissiya tomonidan qaror qabul qilinadi.

Bunda oʻqotar qurolning oʻq-dorilarini imtiyozli olish huquqi tegishli oʻqotar qurolning oʻq-dorilari turi va kalibriga mos oʻqotar qurolga egalik qilishga doir ruxsatnoma asosida beriladi.

Mintaqaviy texnik komissiya tarkibiga Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalarining moliya va moddiy-texnika taʼminlash boshqarmalarining moliya-iqtisodiyot boʻlimi xodimi qoʻshimcha ravishda jalb etiladi.

28. Mintaqaviy texnik komissiya qurolni va uning oʻq-dorilarini oʻz ixtiyori bilan topshirishga doir hujjatlarni olgan kundan boshlab besh ish kuni ichida:

a) taqdim etilgan hujjatlarni oʻz yigʻilishida koʻrib chiqadi, qurolni va uning oʻq-dorilarini oʻz ixtiyori bilan topshirgan ariza beruvchini pul mukofoti bilan taqdirlash yoki taqdirlashni rad etish yoxud unga oʻqotar qurolni va uning oʻq-dorilarini imtiyozli olish huquqini berish yoki berishni rad etish haqidagi qarorni ushbu Nizomning 38 va 43-bandlarida belgilangan asoslarga muvofiq qabul qiladi.

Qaror mintaqaviy texnik komissiya raisi va uning aʼzolari tomonidan imzolanadi. Taqdirlash mintaqaviy texnik komissiyaning qarori asosida uch kun muddat ichida Qoraqalpogʻiston Respublikasi ichki ishlar vaziri, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari boshliqlarining qabul qilinadigan buyrugʻiga asosan amalga oshiriladi;

b) tekshiruv natijalariga koʻra oʻz ixtiyori bilan topshirilgan quroldan foydalanilgan holda jinoyat sodir etilgani yoki ushbu qurol va uning oʻq-dorilari, oʻqotar qurolning asosiy qismlari oʻgʻirlangani bilan bogʻliq jinoyatlarga aloqadorligi, shuningdek, koʻrsatilgan ashyolar maʼmuriy huquqbuzarlikni sodir etish quroli boʻlgani sababli jinoyat ishini qoʻzgʻatish yoki maʼmuriy huquqbuzarlik toʻgʻrisidagi ishni yuritish yuzasidan qaror qabul qilinganda, toʻplangan hujjatlarni Oʻzbekiston Respublikasi Jinoyat-protsessual kodeksiga yoki Maʼmuriy javobgarlik toʻgʻrisidagi kodeksiga muvofiq koʻrib chiqish uchun hududiyligi boʻyicha ichki ishlar organiga yuboradi;

v) tekshiruv natijalariga koʻra oʻz ixtiyori bilan topshirilgan qurol, oʻqotar qurolning asosiy qismlari Oʻzbekiston Respublikasi Ichki ishlar vazirligining Raqamli texnologiyalar va huquqiy statistika departamenti Huquqiy statistika bosh markazining (uning hududiy boʻlinmalarining) yoʻqotilgan va aniqlangan qurollarning markazlashgan hisobiga aniqlangan qurol sifatida hisobga qoʻyilishini taʼminlaydi.

29. Tergov boʻlinmasi tomonidan jinoyat ishini qoʻzgʻatish toʻgʻrisida qaror qabul qilinganda, shuningdek, huquqbuzarliklar profilaktikasi boʻlinmasi tomonidan maʼmuriy huquqbuzarlik toʻgʻrisidagi ishni yuritishni boshlash haqida qaror qabul qilinganda, jinoyat ishi yoki maʼmuriy huquqbuzarlik toʻgʻrisidagi ishni koʻrib chiqish yakunlangani boʻyicha bir ish kuni ichida oʻz ixtiyori bilan topshirilgan qurol va uning oʻq-dorilarini belgilangan tartibda realizatsiya qilish uchun Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari moliya va moddiy-texnika taʼminoti boshqarmalarining xoʻjalik boshqarmalariga (boʻlimlariga) topshiriladi.

30. Mintaqaviy texnik komissiya ariza beruvchini pul mukofoti bilan taqdirlash yoki taqdirlashni rad etish yoxud unga oʻqotar qurolni va uning oʻq-dorilarini imtiyozli olish huquqini berish yoki berishni rad etish toʻgʻrisida qaror qabul qilingan kundan boshlab bir ish kuni ichida uni bu haqida yozma ravishda xabardor qiladi.

Taqdirlashni yoki oʻqotar qurolni va uning oʻq-dorilarini imtiyozli olish huquqini berishni rad etish toʻgʻrisidagi xabarnomada rad etishning aniq sabablari koʻrsatiladi.

31. Mintaqaviy texnik komissiya oʻz ixtiyori bilan topshirilgan oʻqotar qurolni va uning oʻq-dorilarini imtiyozli olish huquqini berish haqidagi qaror qabul qilgan taqdirda, tegishli hujjatlar mintaqaviy texnik komissiya tomonidan qaror qabul qilingan kundan boshlab bir ish kuni ichida tasdiqlash uchun markaziy texnik komissiyaga yuboriladi.

32. Markaziy texnik komissiya oʻqotar qurolni va uning oʻq-dorilarini imtiyozli olishga oid hujjatlarni olgan kundan boshlab besh ish kuni ichida koʻrib chiqadi.

Oʻqotar qurol va uning oʻq-dorilari Oʻzbekiston Respublikasi Ichki ishlar vazirligi Moliya va moddiy-texnika taʼminoti departamentining xoʻjalik boshqarmasida saqlanayotgan olib qoʻyilgan, ixtiyoriy ravishda topshirilgan va topilgan qurol-yarogʻlarning qabul qilinishini, texnik holati aniqlanishini, yoʻq qilinishini hamda tasarruf etilishini nazorat qilish boʻyicha doimiy ishlovchi komissiyaning qarori asosida imtiyozli olinadi.

33. Markaziy texnik komissiya mintaqaviy texnik komissiyaning faoliyatini nazorat qiladi va u tomonidan qabul qilingan qarorlarni oʻzgartirish, taqdirlash bilan bogʻliq nizoli masalalarni koʻrib chiqish huquqiga ega.

34. Oʻzbekiston Respublikasi Ichki ishlar vazirligining Raqamli texnologiyalar va huquqiy statistika departamenti Huquqiy statistika bosh markazi (uning hududiy boʻlinmalari) tomonidan oʻz ixtiyori bilan topshirilgan qurol va uning patronlari yoʻqotilgan qurol sifatida respublika qidiruvi yoki xalqaro hamkorlik shartnomalariga muvofiq davlatlararo qidiruvda yoʻqotilgan qurol va uning patronlari sifatida hisobga olingani aniqlangan hollarda, ularni topshirgan ariza beruvchi ushbu Nizomga 8-ilovada koʻrsatilgan miqdordagi pul mukofoti bilan taqdirlanishi mumkin.

Bunday hollarda ariza beruvchi oʻz ixtiyori bilan topshirilgan fuqaroviy oʻqotar qurolni va uning patronlarini imtiyozli olish huquqidan foydalanmaydi.

5-§. Pul mukofoti bilan taqdirlash

35. Oʻz ixtiyori bilan topshirilgan qurol va uning oʻq-dorilari uchun pul mukofoti ushbu Nizomga 8-ilovadagi miqdorlarda Qoraqalpogʻiston Respublikasi ichki ishlar vazirining, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari boshliqlarining buyruqlari asosida beriladi.

36. Qurolni va uning oʻq-dorilarini oʻz ixtiyori bilan topshirgan ariza beruvchining xohishiga koʻra pul mukofoti uning hisobvaragʻiga pul oʻtkazish orqali Qoraqalpogʻiston Respublikasi ichki ishlar vazirining, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari boshliqlarining taqdirlash toʻgʻrisidagi buyrugʻi eʼlon qilingan kundan boshlab besh ish kuni ichida Moliya va moddiy-texnika taʼminoti boshqarmalarining Moliya-iqtisodiyot boʻlimi tomonidan beriladi.

37. Qurolni va uning oʻq-dorilarini oʻz ixtiyori bilan topshirgan oʻn sakkiz yoshga toʻlgan jismoniy shaxslar pul mukofoti bilan taqdirlanadi.

Oʻn sakkiz yoshga toʻlmagan jismoniy shaxs (qurol va uning oʻq-dorilari topib olinib taqdim etilgan hollarda) pul mukofoti bilan uning qonuniy vakili orqali taqdirlanadi.

Jismoniy shaxs qurolni va uning oʻq-dorilarini oʻz ixtiyori bilan topshirgani uchun pul mukofotini ishonchnoma asosida oʻzining ishonchli vakili orqali olishi mumkin.

Yuridik shaxs pul mukofoti bilan ushbu yuridik shaxsning bank hisobvaragʻiga pul oʻtkazish orqali taqdirlanadi.

38. Quyidagi asoslarga koʻra pul mukofoti bilan taqdirlash rad etiladi:

oʻz ixtiyori bilan topshirilgan qurol va uning oʻq-dorilari ushbu Nizomga 8-ilovadagi oʻz ixtiyori bilan topshirilgan qurol va uning oʻq-dorilari uchun pul mukofoti miqdorlaridagi roʻyxatda koʻrsatilmaganda;

qurolni va uning oʻq-dorilarini oʻz ixtiyori bilan topshirgan ariza beruvchining quroldan foydalangan holda sodir etilgan jinoyatga yoki ushbu qurol va uning oʻq-dorilari oʻgʻirlangani bilan bogʻliq jinoyatga aloqadorligi, shuningdek, koʻrsatilgan ashyolar maʼmuriy huquqbuzarlikni sodir etish quroli boʻlgani aniqlanganda.

6-§. Oʻqotar qurolni va uning oʻq-dorilarini imtiyozli olish

39. Oʻz ixtiyori bilan topshirilgan oʻqotar qurolni va uning oʻq-dorilarini imtiyozli olish ularni oʻz ixtiyori bilan topshirgan ariza beruvchiga oʻqotar qurolni va uning oʻq-dorilarini olish uchun “Qurol toʻgʻrisida”gi Qonunda hamda fuqaroviy qurolni va uning oʻq-dorilarini olish boʻyicha qonunchilik hujjatlarida belgilangan tartib-taomillardan oʻtishda imtiyoz bermaydi.

Oʻqotar qurolni va uning oʻq-dorilarini imtiyozli olish ularni oʻz ixtiyori bilan topshirgan ariza beruvchiga ushbu oʻqotar qurolni va uning oʻq-dorilarini umumiy asoslarda boshqa shaxslardan oldin birinchi navbatda olish huquqini beradi.

40. Oʻz ixtiyori bilan topshirilgan oʻqotar qurolni va uning oʻq-dorilarini imtiyozli olish istagini bildirgan ariza beruvchiga pul mukofoti berilmaydi.

41. Oʻz ixtiyori bilan topshirilgan oʻqotar qurolni va uning oʻq-dorilarini imtiyozli olish:

soyli stvolli oʻqotar ov quroliga va uning oʻq-dorilariga, shu jumladan, aralash oʻqotar qurolga va uning oʻq-dorilariga;

silliq stvolli oʻqotar ov quroliga va uning oʻq-dorilariga, shu jumladan, soyli qismining uzunligi bir yuz qirq millimetrdan oshmaydigan oʻqotar ov quroliga va uning oʻq-dorilariga;

kombinatsiyalangan (soyli stvolli va silliq stvolli) oʻqotar ov quroliga va uning oʻq-dorilariga, shu jumladan, almashtiriladigan va joylashtiriladigan soyli stvolli oʻqotar ov quroliga va uning oʻq-dorilariga;

soyli stvolli oʻqotar sport quroliga va uning oʻq-dorilariga;

silliq stvolli oʻqotar sport quroliga va uning oʻq-dorilariga nisbatan tatbiq etiladi.

42. Ichki ishlar organlari tomonidan oʻz ixtiyori bilan oʻqotar qurolni va uning oʻq-dorilarini topshirgan ariza beruvchiga ushbu ashyolarni imtiyozli olishga doir ruxsatnoma qonunchilik hujjatlarida belgilangan tartibda beriladi.

43. Quyidagi asoslarga koʻra oʻqotar qurolni va uning oʻq-dorilarini imtiyozli olish rad etiladi:

oʻz ixtiyori bilan topshirilgan oʻqotar qurol va uning oʻq-dorilari ushbu Nizomning 41-bandida koʻrsatilmagan boʻlsa;

oʻqotar qurolni va uning oʻq-dorilarini oʻz ixtiyori bilan topshirgan jismoniy shaxsga nisbatan Oʻzbekiston Respublikasining “Qurol toʻgʻrisida”gi Qonuni 13-moddasining oʻninchi qismida koʻrsatilgan sabablar mavjud boʻlganda;

oʻqotar qurolni va uning oʻq-dorilarini oʻz ixtiyori bilan topshirgan ariza beruvchining quroldan foydalangan holda sodir etilgan jinoyatga yoki ushbu qurol va uning oʻq-dorilari oʻgʻirlangani bilan bogʻliq jinoyatga aloqadorligi, shuningdek, koʻrsatilgan ashyolar maʼmuriy huquqbuzarlikni sodir etish quroli boʻlgani aniqlanganda;

oʻqotar qurolni va uning oʻq-dorilarini oʻz ixtiyori bilan topshirgan ariza beruvchi ushbu ashyolarni olish boʻyicha qonunchilik hujjatlarida belgilangan talab va shartlarni bajarmaganda.

44. Oʻz ixtiyori bilan oʻqotar qurolni va uning oʻq-dorilarini topshirgan, ularni imtiyozli olish istagini bildirgan ariza beruvchiga ushbu Nizomning 43-bandida koʻrsatilgan asoslarga koʻra ushbu ashyolarni imtiyozli olish rad etilsa, unga pul mukofoti toʻlanadi, ushbu Nizomning 38-bandida koʻrsatilgan holatlar bundan mustasno.

3-bob. Portlovchi materiallarni va portlatish qurilmalarini topshirish hamda ularni ichki ishlar organlari tomonidan qabul qilib olish

45. Jismoniy va yuridik shaxslarning oʻzlarida saqlanayotgan portlovchi materiallarni va portlatish qurilmalarini bevosita oʻzlari hududiy ichki ishlar organlariga, oʻzga davlat organlariga va tashkilotlarga, shuningdek, profilaktika (katta) inspektorlariga yoki ichki ishlar organlarining boshqa xodimlariga topshirishlariga yoʻl qoʻyilmaydi.

Portlovchi materiallarni va portlatish qurilmalarini oʻz ixtiyori bilan topshirish masalalari boʻyicha murojaat qilinganda, ariza beruvchi tomonidan ular murojaat qilish vaqtida aynan qayerda ekanligi (kvartira, uy, dala hovli, xonadon, inshoot, transport vositasi, hududning aniq bir uchastkasi, boshqa joylar) koʻrsatiladi.

46. Ariza beruvchi tomonidan uning yonida yoxud u koʻrsatgan joyda boʻlgan portlovchi materiallarni va portlatish qurilmalarini oʻz ixtiyori bilan topshirish yuzasidan hududiy ichki ishlar organiga, profilaktika (katta) inspektori yoki ichki ishlar organlarining boshqa xodimlariga murojaat qilinganda, ariza beruvchi murojaat qilgan ichki ishlar organining tezkor navbatchisi yoki boshqa xodimi quyidagilarga majbur:

ariza beruvchiga mutaxassis yetib kelgunga qadar xavfsizlik qoidalariga amal qilinishi, portlovchi materiallar va portlatish qurilmalari bilan biror-bir harakatlar amalga oshirilishiga yoʻl qoʻymasligi yuzasidan yoʻl-yoʻriq berishga;

zudlik bilan ichki ishlar organining boshligʻiga (ariza beruvchi tomonidan tezkor navbatchiga murojaat qilinganda) yoki ichki ishlar organining tezkor navbatchisiga (ariza beruvchi tomonidan profilaktika (katta) inspektori yoki ichki ishlar organining boshqa xodimlariga murojaat qilinganda) axborot berishga.

47. Portlovchi materiallarning va portlatish qurilmalarining xususiyatidan, sonidan va haqiqatda joylashgan joyidan hamda oʻzga holatlardan kelib chiqib, ichki ishlar organi boshligʻining koʻrsatmasi bilan tezkor navbatchi tomonidan belgilangan tartibda ichki ishlar organlarining maxsus rejalari amalga kiritilishi mumkin.

48. Portlovchi materiallar va portlatish qurilmalari mavjudligi toʻgʻrisida murojaat kelib tushganda ichki ishlar organi boshligʻining koʻrsatmasiga asosan tezkor navbatchi tomonidan portlovchi materiallar va portlatish qurilmalarini ushbu predmetlarni zararsizlantirish va yoʻq qilish boʻyicha mutaxassis (keyingi oʻrinlarda — portlatish texnigi) ularni xavfsiz tashish va saqlash imkoni mavjudligini aniqlash uchun yuboriladi.

49. Portlatish texnigi yetib kelgunga qadar portlovchi materiallar va portlatish qurilmalari bilan biror-bir harakatlar amalga oshirilishi taqiqlanadi.

Portlovchi materiallarni va portlatish qurilmalarini portlatish texnigi ishtirokisiz koʻzdan kechirish, tekshirish va qabul qilib olish boʻyicha biror-bir harakatlar amalga oshirilishiga yoʻl qoʻyilmaydi.

50. Portlovchi materiallarni va portlatish qurilmalarini koʻzdan kechirish natijalari boʻyicha portlatish texnigi tomonidan ushbu Nizomga 9-ilovaga muvofiq koʻzdan kechirish dalolatnomasi tuziladi. Dalolatnomada portlovchi materiallarni va portlatish qurilmalarini xavfsiz tashish va (yoki) saqlash imkoni mavjudligi (mavjud emasligi) toʻgʻrisida xulosa qilinadi hamda ular saqlash yoki yoʻq qilish uchun topshirilganiga doir yozuvlar kiritiladi.

Dalolatnoma portlovchi materiallarni va portlatish qurilmalarini oʻz ixtiyori bilan topshirish boʻyicha materiallarga qoʻshib qoʻyiladi.

51. Portlatish texnigi tomonidan tashishga va ixtisoslashtirilgan omborlar sharoitlarida saqlashga xavfsiz deb topilgan portlovchi materiallar va portlatish qurilmalari ichki ishlar organlariga qabul qilinishiga va saqlanishiga yoʻl qoʻyilmaydi, ular portlovchi materiallarni saqlash uchun jihozlangan omborxonalarga (bazalarga, arsenallarga) saqlash yoki ularni maxsus jihozlangan poligonlarida yoʻq qilish uchun topshiriladi.

52. Portlatish texnigi tomonidan xavfsiz tashish va hududiy ichki ishlar organlarida saqlashning imkoni mavjudligi aniqlangan portlovchi materiallar va portlatish qurilmalari portlatish-texnik ekspertizani oʻtkazishga ruxsati boʻlgan ekspertlari va bu turdagi ekspertizani (tadqiqotni) oʻtkazish uchun tegishli sharoitlari mavjud boʻlgan hududiy ichki ishlar organining ekspert-kriminalistika boʻlinmasiga yuboriladi.

Hududiy ichki ishlar organining ekspert-kriminalistika boʻlinmasi ekspertlarida portlatish texnika ekspertizasini oʻtkazishga ruxsati va (yoki) bu turdagi ekspertizani (tadqiqotni) oʻtkazishga tegishli sharoitlar mavjud boʻlmagan taqdirda, portlovchi materiallar va portlatish qurilmalari ekspertiza (tadqiqot) uchun Oʻzbekiston Respublikasi Ichki ishlar vazirligi Ekspert-kriminalistika bosh markazining portlatish texnikasi tadqiqotlari boʻlinmasiga yuboriladi.

Xavfsiz tashilishi va saqlanishi mumkin boʻlgan portlovchi materiallarni va portlatish qurilmalarini oʻz ixtiyori bilan topshirish boʻyicha materiallarni rasmiylashtirish, ichki ishlar organlarining kriminalistika va qidiruv hisoblari orqali tekshirish Oʻzbekiston Respublikasi Ichki ishlar vazirligi tomonidan belgilangan tartibda amalga oshiriladi.

Portlovchi materiallar va portlatish qurilmalari hududiy ichki ishlar organiga qabul qilinishi, hisobi yuritilishi va saqlanishi faqat portlatish-texnik ekspertizaning xulosasida belgilangan hollarda va tartibda amalga oshirilishi mumkin.

53. Portlatish texnigi tomonidan xavfsiz tarzda tashish va saqlashning imkoni yoʻqligi aniqlangan portlovchi materiallar va portlatish qurilmalari hududiy ichki ishlar organlari tomonidan qabul qilinishiga va saqlanishiga yoʻl qoʻyilmaydi hamda ular zarur xavfsizlik choralari koʻrilgan holda Portlovchi qurilmalarni, portlashdan xavfli predmetlarni aniqlash, zararsizlantirish va yoʻq qilish boʻyicha maxsus vazifalarni bajarish tartibi toʻgʻrisidagi yoʻriqnomaga muvofiq yoʻq qilinadi. Yoʻq qilish va yoʻq qilish usuli toʻgʻrisidagi qaror portlatish texnigi tomonidan qabul qilinadi va bu haqida portlovchi materiallar va portlatish qurilmalarini koʻzdan kechirish dalolatnomasida tegishli yozuv qayd qilinadi.

54. Ekspert-kriminalistika boʻlinmasida tekshirilishiga ehtiyoj boʻlmagan, shuningdek, ekspert-kriminalistika boʻlinmasi tomonidan tekshiruvdan oʻtkazilgan hamda ashyoviy dalil deb topilmagan portlovchi materiallar va portlatish qurilmalari oʻn kun muddatda yoʻq qilinadi.

4-bob. Yakunlovchi qoidalar

55. Oʻz ixtiyori bilan topshirilgan hamda jinoyat yoki maʼmuriy huquqbuzarliklar toʻgʻrisidagi ishlar boʻyicha ashyoviy dalil deb eʼtirof etilgan qurol va uning oʻq-dorilarining hisobi yuritilishi va saqlanishi jinoyat-protsessual qonunchilikka muvofiq amalga oshiriladi.

56. Oʻz ixtiyori bilan topshirilgan qurol va uning oʻq-dorilari ichki ishlar organlariga yoki profilaktika (katta) inspektoriga topshirilganidan keyin yaroqsiz holga kelsa yoki yoʻqolsa, ularni topshirgan shaxsga berilishi lozim boʻlgan pul mukofoti miqdori aybdor xodimlardan belgilangan tartibda undiriladi.

57. Oʻz ixtiyori bilan topshirilgan va texnik jihatdan foydalanish uchun yaroqsiz boʻlgan, shuningdek, yasama, qaytadan yasalgan va Oʻzbekiston Respublikasi hududida muomalasi taqiqlangan qurol va uning oʻq-dorilari, oʻqotar qurolning asosiy qismlari Oʻzbekiston Respublikasi Ichki ishlar vazirligi tomonidan belgilangan tartibda yoʻq qilinadi yoki maxsus organlar va harbiy tuzilmalar kolleksiyasiga topshiriladi.

Oʻz ixtiyori bilan topshirilgan qurol va uning oʻq-dorilari, oʻqotar qurolning asosiy qismlari yoʻq qilingani yoki maxsus organlar va harbiy tuzilmalar kolleksiyasiga topshirilgani toʻgʻrisidagi maʼlumot Oʻzbekiston Respublikasi Ichki ishlar vazirligining Raqamli texnologiyalar va huquqiy statistika departamenti Huquqiy statistika bosh markaziga (uning hududiy boʻlinmalariga) yoʻqotilgan va aniqlangan qurollarning markazlashgan hisoblarida aks ettirish uchun yuboriladi.

58. Oʻz ixtiyori bilan topshirilgan va texnik jihatdan foydalanish uchun yaroqli boʻlgan qurol Oʻzbekiston Respublikasi Ichki ishlar vazirligining Raqamli texnologiyalar va huquqiy statistika departamenti Huquqiy statistika bosh markazidagi (uning hududiy boʻlinmalaridagi) yoʻqotilgan va aniqlangan qurollarning markazlashgan axborot-qidiruv tizimlari hisobidan chiqarilgan holda muomalaga qaytariladi.

59. Oʻz ixtiyori bilan topshirilgan texnik jihatdan foydalanish uchun yaroqli boʻlgan qurol va uning oʻq-dorilari ushbu ashyolarni realizatsiya qilish uchun litsenziyaga ega boʻlgan yuridik shaxslar orqali realizatsiya qilinadi.

60. Qurol va uning oʻq-dorilarini realizatsiya qilishdan tushadigan mablagʻlar Oʻzbekiston Respublikasi Davlat budjetiga oʻtkaziladi.

61. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurol va uning oʻq-dorilarini topshirganlik uchun taqdirlash tartibi toʻgʻrisidagi nizomga 1-ILOVA

Qurolni va uning oʻq-dorilarini, oʻqotar qurolning asosiy qismlarini ichki ishlar organlariga oʻz ixtiyori bilan topshirish hamda qurol va uning oʻq-dorilarini topshirganlik uchun taqdirlash

SXEMASI

Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurol va uning oʻq-dorilarini topshirganlik uchun taqdirlash tartibi toʻgʻrisidagi nizomga 2-ILOVA

Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurol va uning oʻq-dorilarini topshirganlik uchun taqdirlash tartibi toʻgʻrisidagi nizomga 3-ILOVA

Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurol va uning oʻq-dorilarini topshirganlik uchun taqdirlash tartibi toʻgʻrisidagi nizomga 4-ILOVA

Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurol va uning oʻq-dorilarini topshirganlik uchun taqdirlash tartibi toʻgʻrisidagi nizomga 5-ILOVA

Oʻz ixtiyori bilan topshirilgan qurol (oʻqotar qurolning asosiy qismlari)ni va (yoki) uning oʻq-dorilarini koʻzdan kechirish hamda qabul qilish

DALOLATNOMASI

Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurol va uning oʻq-dorilarini topshirganlik uchun taqdirlash tartibi toʻgʻrisidagi nizomga 6-ILOVA

Oʻz ixtiyori bilan topshirilgan qurol (oʻqotar qurolning asosiy qismlari) va uning oʻq-dorilari qabul qilib olingani toʻgʻrisida

KVITANSIYA

Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurol va uning oʻq-dorilarini topshirganlik uchun taqdirlash tartibi toʻgʻrisidagi nizomga 7-ILOVA

Ichki ishlar organlariga topshirilgan qurol, uning oʻq-dorilari va oʻqotar qurolning asosiy qismlarini qayd etish jurnali

Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurol va uning oʻq-dorilarini topshirganlik uchun taqdirlash tartibi toʻgʻrisidagi nizomga 8-ILOVA

Oʻz ixtiyori bilan topshirilgan qurol va uning oʻq-dorilari uchun pul mukofoti

MIQDORLARI

Roʻyxatga olinmagan qurolni va uning oʻq-dorilarini, oʻqotar qurolning asosiy qismlarini, portlovchi materiallarni va portlatish qurilmalarini ichki ishlar organlariga oʻz ixtiyori bilan topshirish hamda qurol va uning oʻq-dorilarini topshirganlik uchun taqdirlash tartibi toʻgʻrisidagi nizomga 9-ILOVA

Oʻq-dorilarni, portlovchi materiallar va portlatish qurilmalarini

KUZDAN KECHIRISH DALOLATNOMASI

Vazirlar Mahkamasining 2026-yil 7-iyuldagi 367-son qaroriga 2-ILOVA

Oʻzbekiston Respublikasi Hukumatining oʻz kuchini yoʻqotgan deb hisoblanayotgan qarorlari

ROʻYXATI

1. Vazirlar Mahkamasining “Roʻyxatga olinmagan oʻqotar qurol va uning oʻq-dorilarini, portlovchi materiallar va portlatish qurilmalarini ichki ishlar organlariga oʻz ixtiyori bilan topshirish hamda oʻqotar qurol va uning oʻq-dorilarini topshirganlik uchun taqdirlash tartibi toʻgʻrisidagi nizomni tasdiqlash haqida” 2023-yil 25-iyuldagi 310-son qarori.

2. Vazirlar Mahkamasining “Qurol toʻgʻrisidagi qonunchilik takomillashtirilishi munosabati bilan Vazirlar Mahkamasining “Roʻyxatga olinmagan oʻqotar qurol va uning oʻq-dorilarini, portlovchi materiallar va portlatish qurilmalarini ichki ishlar organlariga oʻz ixtiyori bilan topshirish hamda oʻqotar qurol va uning oʻq-dorilarini topshirganlik uchun taqdirlash tartibi toʻgʻrisidagi nizomni tasdiqlash haqida” 2023-yil 25-iyuldagi 310-son qaroriga oʻzgartirish va qoʻshimchalar kiritish toʻgʻrisida” 2025-yil 25-martdagi 179-son qarori.