Bozorlar va savdo komplekslarida raqamlashtirish ishlarini samarali tashkil etish hamda maishiy korrupsiyaning oldini olishga doir chora-tadbirlar toʻgʻrisida (358-son)
02.07.2026
OʻZBEKISTON RESPUBLIKASI VAZIRLAR MAHKAMASINING
QARORI
Bozorlar va savdo komplekslari, transport vositalarini saqlash joylarini raqamlashtirish, axborot tizimlarining yagona kompleksini joriy etish, aholi va tadbirkorlar uchun qulay imkoniyatlar yaratish, infratuzilmani yanada rivojlantirish, savdo faoliyatini tashkil etishda raqobat muhitini rivojlantirish va shaffoflikni taʼminlash, korrupsiya omillari va xufiyona aylanmalarga barham berish maqsadida Vazirlar Mahkamasi qaror qiladi:
1. Korrupsiyaga qarshi kurashish boʻyicha milliy kengashning 2025-yil 5-martda oʻtkazilgan kengaytirilgan yigʻilishida belgilangan topshiriqlar ijrosini taʼminlash doirasida quyidagilar:
Qoraqalpogʻiston Respublikasi, viloyatlar va Toshkent shahrida joylashgan bozorlar va savdo komplekslarini raqamlashtirish chora-tadbirlarini amalga oshirish belgilangani;
Vazirlar Mahkamasining “Yirik bozorlarda jamoat tartibini saqlash va yongʻin xavfsizligini taʼminlash tizimini takomillashtirish chora-tadbirlari toʻgʻrisida” 2024-yil 27-noyabrdagi 791-son qarorida yirik bozorlarda jamoat tartibini saqlash va yongʻin xavfsizligini taʼminlash hamda favqulodda vaziyatlarning oldini olish va ularni bartaraf etishga qaratilgan chora-tadbirlar nazarda tutilgani;
respublikadagi 300 dan ortiq bozorlar va savdo komplekslarida tajriba-sinov tariqasida korrupsiya va xufiyona aylanmalarning oldini olishga, savdo tushumlari ortishiga xizmat qiluvchi raqamlashtirish ishlari amalga oshirilgani;
Vazirlar Mahkamasining “Vazirlar Mahkamasining “Qonun hujjatlari buzilganligi uchun ushlangan transport vositalarini toʻxtash joylariga olib kelish, joylashtirish va saqlash tartibini takomillashtirish toʻgʻrisida” 2011-yil 25-maydagi 149-son qaroriga oʻzgartirish va qoʻshimchalar kiritish haqida” 2023-yil 11-avgustdagi 358-son qarori bilan qonunchilik hujjatlari buzilgani uchun vakolatli davlat organlari tomonidan ushlangan transport vositalarini toʻxtash joylariga olib kelish, joylashtirish, saqlash, hisobini yuritish va olib chiqib ketish tartibga solingani maʼlumot uchun qabul qilinsin.
2. Quyidagilar:
Raqamlashtirish choralari koʻriladigan bozorlar va savdo komplekslari roʻyxati 1-ilovaga muvofiq;
Bozorlar va savdo komplekslarini raqamlashtirish sxemasi 2-ilovaga muvofiq;
Bozorlar va savdo komplekslarini raqamlashtirish hamda ularning infratuzilmasini yaxshilashning ustuvor yoʻnalishlari 3-ilovaga muvofiq tasdiqlansin.
3. Soliq qoʻmitasi Raqamli texnologiyalar vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda 2026-yil 1-oktabrga qadar “Soliq” axborot tizimlari kompleksi tarkibida quyidagilarni nazarda tutuvchi “E-bozor” yagona raqamli bozor platformasini (keyingi oʻrinlarda — “E-bozor” platformasi) sinov tarzida, 2027-yil 1-martga qadar toʻliq amaliyotga joriy etsin:
bozorlar va savdo komplekslari pasporti, manzili, boʻsh savdo shoxobchalari va savdo oʻrinlari ochiq eʼlon qilib borilishi;
aholini bozorlar va savdo komplekslari faoliyatiga oid maʼlumotlar bilan tanishtirish, bozor maʼmuriyatiga elektron murojaat yoʻllash va javob olish imkoniyatlari.
4. Belgilansinki:
bozorlar va savdo komplekslarini raqamlashtirish, ularning infratuzilmasini yaxshilash bilan bogʻliq xarajatlar bozorlar va savdo komplekslari mablagʻlari hamda qonunchilikda taqiqlanmagan boshqa mablagʻlar hisobidan amalga oshiriladi;
axborot tizimlari kiberxavfsizlik hamda davlat organlarining axborot tizimlari bilan integratsiya qilish talablari asosida joriy etiladi;
2026-yil 1-dekabrga qadar “E-bozor” platformasiga bozorlar va savdo komplekslarida amalda joriy etilgan axborot tizimlari hamda Adliya vazirligi, Kadastr agentligi va boshqa manfaatdor idoralarning axborot tizimlari “Elektron hukumat” tizimining idoralararo integratsiyalashuv platformasi orqali integratsiya qilinadi;
“E-bozor” platformasini yaratish hamda davlat organlarining axborot tizimlari bilan integratsiya qilish xarajatlari Soliq qoʻmitasining Moddiy yordam, ijtimoiy himoya, soliq organlarini rivojlantirish va koʻzda tutilmagan xarajatlar maxsus jamgʻarmasi hisobidan amalga oshiriladi.
5. Soliq qoʻmitasi:
Raqamli texnologiyalar vazirligi bilan birgalikda 2026-yil 1-avgustga qadar “E-bozor” platformasi loyiha-texnik hujjatlarining ishlab chiqilishi hamda ekspertizadan oʻtkazilishini taʼminlasin;
“Kiberxavfsizlik markazi” DM bilan birgalikda 2027-yil 1-fevralga qadar “E-bozor” platformasini loyiha-texnik hujjatlarga va kiberxavfsizlik talablariga muvofiqligi boʻyicha ekspertizadan oʻtkazsin.
6. Belgilansinki, Soliq qoʻmitasi “E-bozor” platformasining operatori hisoblanadi.
Bunda operator korrupsiya va yashirin iqtisodiyotning oldini olish maqsadida “E-bozor” platformasini doimiy takomillashtirish choralarini koʻrib boradi.
7. Soliq qoʻmitasi:
har bir bozor va savdo kompleksiga soliq xodimlarini biriktirsin va ularning faoliyati samaradorligini kunlik tahlil qilib borsin;
2026-yil 1-oktabrga qadar bozorlar va savdo komplekslari ixtisoslashuvi, ish tartibi, turgʻun savdo nuqtalari va savdo oʻrinlari soni va joylashuvi, koʻrsatiladigan xizmatlar toʻgʻrisidagi maʼlumotlarni “E-bozor” platformasiga kiritsin;
bozor va savdo kompleksiga biriktirilgan soliq xodimlari “E-bozor” platformasida aks ettirilgan kunlik tushumlar haqqoniyligini joylarda doimiy ravishda monitoring qilib borsin;
bozorlar va savdo komplekslari maʼmuriyati bilan birgalikda bozorlar va savdo komplekslarida joriy etilgan axborot tizimlarini takomillashtirish choralarini koʻrsin;
Markaziy bank bilan birgalikda uch oy muddatda bozorlar hududida va ularga tutash hududlarda joylashgan avtotransport vositalarini vaqtincha saqlash joylarida toʻlovlarni yagona QR kod orqali toʻlash imkoniyatini yaratsin;
Markaziy bank bilan birgalikda ikki oy muddatda qonunchilik hujjatlari talablaridan kelib chiqib, bozorlar va savdo komplekslari hududida faoliyat koʻrsatuvchi tadbirkorlik subyektlarini toʻliq onlayn nazorat-kassa texnikalari bilan taʼminlasin yoki onlayn toʻlovlar uchun QR kodli yorliqlar oʻrnatish choralarini koʻrsin;
bozor va savdo komplekslarining axborot tizimlari hamda avtomototransport vositalarini doimiy va vaqtincha saqlash xizmatlarini koʻrsatuvchi tadbirkorlik subyektlari tomonidan avtomototransport vositalarining erkin kirishini (chiqishini) istisno etuvchi maxsus xotira bilan jihozlangan elektron shlagbaum yoki boshqa qurilmalarning soliq organlari axborot tizimiga integratsiya qilinmagani aniqlanganda, Soliq kodeksiga muvofiq jarima qoʻllanishini taʼminlasin;
Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda ikki oy muddatda bozorlar va savdo komplekslari hududida joylashgan savdo shoxobchalari va savdo nuqtalarini, shuningdek, tadbirkorlik subyektlarini toʻliq xatlovdan oʻtkazish hamda ularning soliq obyekti sifatida hisobga qoʻyilishini taʼminlasin.
8. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari:
2026-yil 1-sentabrga qadar Soliq qoʻmitasi, Raqamli texnologiyalar vazirligi bilan birgalikda 1-ilovada koʻrsatilgan bozorlar va savdo komplekslarini, ularga tutash avtoturargohlarni toʻliq raqamlashtirish hamda “E-bozor” platformasiga integratsiya qilish;
2026-yil 1-oktabrga qadar bozorlar va savdo komplekslaridagi axborot tizimlarini “Kiberxavfsizlik markazi” DM bilan birgalikda kiberxavfsizlik talablariga muvofiqligi boʻyicha ekspertizadan oʻtkazish;
2026-yil 1-avgustga qadar bozorlar va savdo komplekslarining infratuzilmasi, yongʻin xavfsizligi va sanitariya holatini yaxshilash hamda xavfsizlikni taʼminlash texnik vositalarini oʻrnatish;
respublikadagi boshqa bozor va savdo komplekslari, avtoturargohlarni mazkur qaror talablari asosida bosqichma-bosqich raqamlashtirish choralarini koʻrib borsin.
9. Soliq qoʻmitasi, Davlat aktivlarini boshqarish agentligi, Adliya vazirligi va boshqa manfaatdor vazirlik hamda idoralar bilan birgalikda uch oy muddatda ushbu qarorga muvofiq davlat ulushi boʻlgan bozorlar va savdo komplekslari faoliyatiga qoʻyiladigan talablarni inobatga olgan holda, Vazirlar Mahkamasining “Bozorlar va savdo komplekslari faoliyatini tartibga solishga doir qoʻshimcha chora-tadbirlar toʻgʻrisida” 2012-yil 28-avgustdagi 253-son qaroriga oʻzgartirish va qoʻshimchalar kiritishni nazarda tutuvchi normativ-huquqiy hujjat loyihasini Vazirlar Mahkamasiga kiritsin.
10. 2026-yil 1-avgustdan transport vositalarini saqlash joylaridan chiqarib yuborish boʻyicha ruxsatnomani faqat maʼmuriy ishni koʻrib chiquvchi organ (mansabdor shaxs) va ijro organi tomonidan “Jarima maydonchasi” axborot tizimida QR-kod bilan tasdiqlash va elektron tarzda yuborish tartibi joriy etilsin.
11. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirishlar va qoʻshimchalar kiritilsin.
12. Ichki ishlar vazirligi ikki oy muddatda:
Soliq qoʻmitasi va Raqamli texnologiyalar vazirligi bilan birgalikda “Jarima maydonchasi” axborot tizimini soliq organlarining axborot tizimlari bilan “Elektron hukumat” tizimining idoralararo integratsiyalashuv platformasi orqali integratsiya qilsin. Bunda qonunchilik hujjatlari buzilgani uchun ushlangan transport vositalarini saqlash xizmatlarini koʻrsatuvchi yuridik shaxslarning rekvizitlari (nomi, soliq toʻlovchining identifikatsiya raqami, manzili va boshqalar), jarima maydonchasiga joylashtirilgan transport vositalari toʻgʻrisidagi maʼlumotlar (transport markasi, davlat raqami, maydonchaga kiritilgan va chiqarilgan vaqti, undirilgan toʻlov va boshqalar) soliq organlarining axborot tizimida avtomatik ravishda shakllanishi belgilansin;
mazkur qarordan kelib chiqadigan oʻzgartirishlarga muvofiq qonunchilik hujjatlari buzilgani uchun ushlangan transport vositalarini saqlash xizmatlarini koʻrsatuvchi yuridik shaxslar bilan qoʻshimcha shartnomalar tuzish hamda “Jarima maydonchasi” axborot tizimini zarur davlat organlari va tashkilotlarining axborot tizimlari bilan integratsiya qilib, takomillashtirish choralarini koʻrsin.
13. Mazkur qarorning 11-bandi qaror rasmiy eʼlon qilingan kundan eʼtiboran uch oy oʻtgach kuchga kiradi.
14. Ichki ishlar vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari manfaatdor vazirliklar va idoralar bilan birgalikda ushbu qarorning mazmun mohiyati va ahamiyatini bozor va savdo komplekslari maʼmuriyatining vakillari hamda tadbirkorlik subyektlari oʻrtasida keng tushuntirilishini tashkil etsin.
15. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 2-iyul,
358-son
Vazirlar Mahkamasining 2026-yil 2-iyuldagi 358-son qaroriga 1-ILOVA
Raqamlashtirish choralari koʻriladigan bozorlar va savdo komplekslari
ROʻYXATI
Izoh. Soliq qoʻmitasi tomonidan Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari takliflariga asosan raqamlashtiriladigan bozorlar va savdo komplekslari roʻyxatiga qoʻshimchalar kiritilishi mumkin.
Vazirlar Mahkamasining 2026-yil 2-iyuldagi 358-son qaroriga 2-ILOVA
Bozorlar va savdo komplekslarini raqamlashtirish
SXEMASI
Vazirlar Mahkamasining 2026-yil 2-iyuldagi 358-son qaroriga 3-ILOVA
Bozorlar va savdo komplekslarini raqamlashtirish hamda ularning infratuzilmasini yaxshilashning
USTUVOR YOʻNALISHLARI
zamonaviy axborot texnologiyalari va sunʼiy intellektga asoslangan maxsus axborot tizimini ishga tushirish, unda onlayn masofaviy monitoring qilish imkoniyatlarini yaratish;
bir martalik yigʻimlar, ijara toʻlovlari va koʻrsatilgan xizmatlar uchun toʻlovlarni shaffof elektron tizim orqali amalga oshirish tartibini joriy etish;
savdo shoxobchalari va savdo oʻrinlari joylashuvi toʻgʻrisidagi maʼlumotlarni raqamli dasturga kiritish, boʻsh savdo rastalarini ijaraga olish boʻyicha elektron shartnoma tuzish, ularni onlayn masofaviy monitoring qilish imkoniyatlarini yaratish;
avtoturargoh va hojatxona mavjudligini taʼminlash hamda ularda hisoblash va toʻlov qabul qilishning avtomatlashtirilgan tizimini yoʻlga qoʻyish;
bozor va unga tutash hududlardagi noqonuniy qurilmalarni belgilangan tartibda bartaraf etish, bozor infratuzilmasini yaxshilash maqsadida taʼmirlash va rekonstruksiya ishlarini amalga oshirish;
kommunal xizmat koʻrsatish tizimini taʼmirlash va rekonstruksiya qilish orqali samarali tashkil etish, doʻkonlarga zamonaviy energiya taʼminoti uskunalari (quyosh paneli) va alohida elektr hisoblagichlar oʻrnatish;
sanitariya va yongʻin xavfsizligi talablariga rioya etilishini taʼminlash, obodonlashtirish va koʻkalamzorlashtirish ishlarini samarali tashkil etish;
xavfsizlikni taʼminlash uchun videokuzatuv, tashvish va yongʻin signalizatsiyalarini, bankomat hamda tejamkor texnologiyalar asosida yoritish chiroqlari oʻrnatish.
Vazirlar Mahkamasining 2026-yil 2-iyuldagi 358-son qaroriga 4-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining “Qonun hujjatlari buzilganligi uchun ushlangan transport vositalarini toʻxtash joylariga olib kelish, joylashtirish va saqlash tartibini takomillashtirish toʻgʻrisida” 2011-yil 25-maydagi 149-son qarorida:
a) 1-ilovaning 15-bandi quyidagi mazmundagi ikkinchi xatboshi bilan toʻldirilsin:
“Transport vositasini ushlab turish sabablari toʻliq bartaraf etilmasdan turib, ularni chiqarib yuborish yoki ulardan noqonuniy foydalanish holatlarining oldini olish yuzasidan nazorat maxsus avtomatlashtirilgan foto va video qayd etish texnika vositalari yordamida hamda Oʻzbekiston Respublikasi Ichki ishlar vazirligining Yoʻl harakati xavfsizligi xizmati xodimlari tomonidan bevosita joyiga chiqqan holda oʻtkaziladigan oʻrganishlar orqali taʼminlanadi”;
b) 2-ilovada:
11-band quyidagi tahrirda bayon etilsin:
“11. Vakolatli organ oʻz tashabbusi bilan yoki jismoniy va yuridik shaxslarning takliflari asosida tanlovga qoʻyiladigan hududlar roʻyxatini tayyorlaydi, tanlov predmetini va vaqtini tanlov oʻtkazilishidan kamida oʻttiz kun oldin axborot tizimiga kiritadi va bu haqida ommaviy axborot vositalari orqali eʼlon qiladi”;
36-band quyidagi tahrirda bayon etilsin:
“36. Elektron axborot tizimidagi tanlov yakunlari asosida tanlov gʻolibi bilan shartnomalar tuzish hamda ularning talab va shartlariga rioya etilishi ustidan vakolatli organ tomonidan muntazam monitoring yuritiladi”;
37-band quyidagi mazmundagi ikkinchi — beshinchi xatboshilar bilan toʻldirilsin:
“Bunda quyidagi harakatlar (harakatsizliklar) uchun bazaviy hisoblash miqdorining yigirma baravari miqdorida jarima (neustoyka) toʻlash shartnomaning majburiy sharti sifatida nazarda tutiladi hamda ularning bir yil davomida takroran sodir etilishi tuzilgan shartnomani bekor qilish uchun asos hisoblanadi:
ushlangan transport vositalarining hisobini, ularni olib kelish va saqlash boʻyicha koʻrsatilgan xizmatlar sonini va toʻlangan toʻlovlar miqdorini “Jarima maydonchasi” axborot tizimi orqali yuritmaslik;
transport vositasini ushlab turish sabablari toʻliq bartaraf etilmasdan turib, ularni chiqarib yuborish yoki ulardan noqonuniy foydalanish.
Shartnoma shartlari yuzasidan kelib chiqqan nizolar sud tartibida hal etiladi”;
v) 3-ilovada:
5-band quyidagi mazmundagi “a1” kichik band bilan toʻldirilsin:
“a1) toʻxtash joylariga olib kelingan transport vositalarining kirib-chiqishini “Jarima maydonchasi” axborot tizimi orqali nazorat qilish hamda transport vositalarining davlat raqami belgilarini tanib olish imkonini beruvchi kamera va boshqa texnika vositalarining mavjudligi”;
11-band quyidagi mazmundagi ikkinchi xatboshi bilan toʻldirilsin:
“Bunda “Jarima maydonchasi” axborot tizimiga kiritilgan koʻrsatilgan xizmatlar boʻyicha aylanmalar soliq organlari axborot tizimida avtomatik shakllantiriladi”.
2. Vazirlar Mahkamasining 2021-yil 7-yanvardagi 1-son qarori bilan tasdiqlangan Soliq tekshiruvlarini tashkil etish va oʻtkazish tartibi toʻgʻrisidagi nizomning 57-bandi toʻqqizinchi xatboshisi quyidagi tahrirda bayon etilsin:
“soliq inspektorlari tomonidan oʻz xizmat vazifalarini amalga oshirish jarayonida majburiy raqamli markirovkalanishi lozim boʻlgan mahsulotlar boʻyicha qalbaki va kontrafakt holatlar hamda markirovkalash qoidalari buzilgani aniqlanganda, shuningdek, jismoniy shaxslar tomonidan tadbirkorlik faoliyatini davlat roʻyxatidan oʻtmasdan amalga oshirish holatlarini aniqlashda;”.