Umumtaʼlim maktablarida oʻqitiladigan “Kelajak soati” mashgʻulotlari oʻquv dasturini takomillashtirishda davlat organlari va tashkilotlarining ishtirokini taʼminlash chora-tadbirlari toʻgʻrisida (KQ-368-V-son)

06.07.2026

Oʻzbekiston Respublikasi Oliy Majlisi Senati Kengashining

qarori

Umumtaʼlim maktablarida oʻqitiladigan “Kelajak soati” mashgʻulotlarini mazmunan boyitish, oʻquvchilarda XXI asr koʻnikmalari, hayotiy kompetensiyalar, huquqiy, maʼnaviy, moliyaviy, ekologik va raqamli madaniyatni shakllantirish, mazkur jarayonda davlat organlari va tashkilotlarining oʻzaro hamkorligini kuchaytirish maqsadida “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 16-moddasiga muvofiq Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi Maktabgacha va maktab taʼlimi vazirligi hamda mutasaddi vazirlik va idoralarning “Kelajak soati” mashgʻulotlari oʻquv dasturini davlat organlari va tashkilotlari ishtirokida takomillashtirish boʻyicha taklifi qoʻllab-quvvatlansin.

2. Umumtaʼlim maktablarida oʻqitiladigan “Kelajak soati” mashgʻulotlari oʻquv dasturini takomillashtirish boʻyicha amaliy chora-tadbirlar dasturi (keyingi oʻrinlarda — Dastur) 1-ilovaga muvofiq tasdiqlansin.

3. “Kelajak soati” mashgʻulotlari oʻquv dasturini takomillashtirish ishlarini muvofiqlashtirish boʻyicha ishchi guruh (keyingi oʻrinlarda — Ishchi guruh) 2-ilovaga muvofiq tarkibda tuzilsin.

Belgilansinki, Oʻzbekiston Respublikasi Maktabgacha va maktab taʼlimi vazirligi Ishchi guruhning ishchi organi (keyingi oʻrinlarda — Ishchi organ) hisoblanadi.

4. “Kelajak soati” mashgʻulotlari oʻquv dasturini takomillashtirish quyidagilar asosida amalga oshiriladi:

kasbga yoʻnaltirish;

huquqiy, moliyaviy va raqamli savodxonlikni oshirish;

sogʻlom turmush tarzi, ekologik madaniyat va fuqarolik masʼuliyatini rivojlantirish;

maʼnaviy-axloqiy tarbiyani kuchaytirish;

axborot xavfsizligi yoʻnalishlarida davlat organlari va tashkilotlari bilan tizimli hamkorlik.

5. Ishchi guruh (O. Mamatkarimov):

Dasturda belgilangan vazifalarning toʻliq va sifatli ijro etilishini taʼminlasin;

Dasturda nazarda tutilgan vazifalar yuzasidan masʼul vazirlik va idoralarning oʻzaro hamkorligini muvofiqlashtirsin;

Dastur ijrosini taʼminlashda yuzaga keladigan muammo hamda toʻsiqlarni bartaraf etish boʻyicha aniq takliflarni masʼul davlat organlari va tashkilotlariga kiritib borsin;

Maktabgacha va maktab taʼlimi vazirligi bilan birga Ishchi guruhning faoliyat yuritishi uchun Respublika taʼlim markazida zarur shart-sharoitlar yaratilishini taʼminlasin.

6. Masʼul vazirlik va idoralar 2026-yil 30-iyulga qadar:

Dastur bilan oʻziga biriktirilgan yoʻnalishlar boʻyicha tezislarni maktabgacha taʼlim yoshidagi bolalar (3 — 7 yosh) va umumtaʼlim maktablarining 1 — 4, 5 — 8 hamda 9 — 11-sinflar oʻquvchilarining yosh, psixofiziologik va kognitiv xususiyatlarini inobatga olgan holda ishlab chiqsin;

maktabgacha taʼlim yoshidagi bolalar va oʻquvchilar uchun talab etiladigan yoʻnalishlar boʻyicha videodarslar, taqdimotlar, alohida keyslar, interaktiv mashgʻulotlar, qoʻshimcha raqamli kontentlar tayyorlasin va Ishchi guruhga (E. Karimovaga) taqdim etsin.

7. Ishchi guruh rahbari oʻrinbosari E. Karimova taqdim qilingan tezislar va materiallar asosida 2026-yil 1-avgustga qadar takomillashtirilgan “Kelajak soati” mashgʻuloti oʻquv-metodik majmualarini, pedagoglar uchun oʻquv-metodik qoʻllanmalarni, shuningdek, ota-onalar va mahalla faollari uchun axborot materiallarini, jumladan, raqamli kontentlarni Ishchi guruh muhokamasiga kiritsin.

8. Ushbu Qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

9. Mazkur Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2026-yil 6-iyul,

KQ-368-V-son

Oʻzbekiston Respublikasi Oliy Majlisi Senati Kengashining 2026-yil 6-iyuldagi KQ-368-V-sonli qaroriga 1-ILOVA

Umumtaʼlim maktablarida oʻqitiladigan “Kelajak soati” mashgʻulotlari oʻquv dasturini takomillashtirish boʻyicha amaliy chora-tadbirlar

DASTURI

Izoh: “Kelajak soati” mashgʻulotlari bogʻcha bolalari (3 — 7 yosh), 1 — 4-sinflar, 5 — 8-sinflar va 9 — 11-sinflar uchun alohida oʻquv dastur va ssenariylar asosida tayyorlanadi.

Vazirlik va idoralar tomonidan tegishli mavzularga doir qisqa tezislar va raqamli kontentlarni tayyorlashda mazkur yosh xususiyatlarni inobatga olinishi maqsadga muvofiq.

Vazirlik va idoralar oʻz tashabbuslaridan kelib chiqqan holda jadvalning “Talab etiladigan yoʻnalishlar” va “Amalga oshiriladigan ishlar” qismlariga toʻldirishlar kiritishi mumkin.

Oʻzbekiston Respublikasi Oliy Majlisi Senati Kengashining 2026-yil 6-iyuldagi KQ-368-V-sonli qaroriga 2-ILOVA

“Kelajak soati” mashgʻulotlari oʻquv dasturini takomillashtirish ishlarini muvofiqlashtirish boʻyicha ishchi guruh

TARKIBI

Izoh: Ishchi guruh aʼzolari boshqa ishga oʻtgan taqdirda ularning oʻrniga lavozimlariga yangi tayinlangan yoki zimmasiga tegishli funksiyalarni bajarish yuklatilgan shaxslar kiritiladi.