Baliqchilik tarmogʻini rivojlantirishga oid qoʻshimcha chora-tadbirlar toʻgʻrisida (PF-122-son)

02.07.2026

Oʻzbekiston Respublikasi Prezidentining

Farmoni

[Koʻchirma]

Suv resurslari cheklangan sharoitda baliqchilik tarmogʻini yanada rivojlantirish, yagona boshqaruv tizimini joriy etish, baliq mahsulotlari turlarini koʻpaytirish, intensiv texnologiyalarni keng tatbiq etish orqali baliq yetishtirish hajmini oshirish maqsadida qaror qilaman:

I. Maqsadlar

1. Quyidagilar mazkur Farmonning asosiy maqsadlari etib belgilansin:

(a) baliqchilik tarmogʻida yagona davlat boshqaruvi tizimini joriy qilish;

(b) 2026-2027-yillarda hududlardagi mavjud sunʼiy suv havzalarini intensiv usulda baliq yetishtirishga ixtisoslashtirish orqali baliq mahsulotlari yetishtirish hajmini 500 ming tonnaga yetkazish;

(v) 2027-yildan boshlab respublikaning togʻoldi hududlarida sovuq suv baliqchiligini rivojlantirib, baliq yetishtirish quvvatlarini yiliga 20 ming tonnaga yetkazish;

(g) baliqchilik tarmogʻini rivojlantirishda suv obyektlarini shaffof ijaraga berish mexanizmlarini keng joriy etish;

(d) baliqchilik tarmogʻida ishlab chiqarish, hisob-kitob va monitoring jarayonlarini toʻliq raqamlashtirish orqali boshqaruv tizimini hamda tarmoq shaffofligini taʼminlash;

(j) 2026-2027-yillarni respublikada baliqchilik tarmogʻini jadal rivojlantirish, ozuqa bazasini mustahkamlash va baliq yetishtirish hajmini keskin oshirish, baliqchilik subyektlarini davlat tomonidan tizimli qoʻllab-quvvatlashning ustuvor davri deb belgilash;

(z) har yili baliqchilik va akvakultura yoʻnalishida qoʻshimcha 100 nafar kadr tayyorlash hamda xalqaro tashkilotlar bilan samarali hamkorlik aloqalarini kengaytirish.

II. Baliqchilik tarmogʻida davlat boshqaruvini takomillashtirish

2. Suv xoʻjaligi vazirligi, Qishloq xoʻjaligi vazirligi, Iqtisodiyot va moliya vazirligining Suv xoʻjaligi vazirligi huzurida davlat muassasasi shaklida Baliqchilikni rivojlantirish markazi (keyingi oʻrinlarda — Markaz) hamda uning hududiy boʻlinmalarini tashkil etish toʻgʻrisidagi takliflariga rozilik berilsin.

3. Baliqchilikni rivojlantirish markazining asosiy vazifalari va faoliyatining ustuvor yoʻnalishlari 1-ilovaga muvofiq tasdiqlansin.

4. Suv xoʻjaligi vazirligi Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda ikki oy muddatda doimiy foydalanish huquqi asosida ajratilgan suv fondi yerlarida baliq yetishtirish uchun respublikadagi barcha suv omborlari, kollektor-drenaj tarmoqlari va tabiiy suv obyektlarini Markazga bepul ijaraga bersin.

5. Quyidagilar:

(a) Qoraqalpogʻiston Respublikasi va viloyatlarda 2026-2027-yillarda baliq yetishtirishning maqsadli koʻrsatkichlari va biriktirilgan masʼullar roʻyxati 2-ilovaga muvofiq;

(b) Baliqchilik tarmogʻini yanada rivojlantirish hamda tabiiy va sunʼiy suv havzalaridan foydalanish samaradorligini oshirish boʻyicha “yoʻl xaritasi” 3-ilovaga muvofiq;

(v) Baliqchilikni rivojlantirish markazining tashkiliy tuzilmasi 4-ilovaga muvofiq tasdiqlansin.

III. Baliqchilik tarmogʻini qoʻllab-quvvatlash va tashkiliy choralar

6. Suv xoʻjaligi vazirligiga intensiv usulda baliq yetishtiruvchilar va naslchilikka ixtisoslashgan baliqchilik xoʻjaliklarini doimiy, shu jumladan, kuz-qish davrida suv bilan taʼminlash vazifasi yuklansin.

7. Belgilansinki, sunʼiy suv havzalarida baliq yetishtiruvchilar va naslchilikka ixtisoslashgan baliqchilik xoʻjaliklari kafolatlangan suv bilan taʼminlab boriladi. Bunda kafolatlangan suv bilan taʼminlash quyidagi tartibda amalga oshiriladi:

(a) Suv xoʻjaligi vazirligi, Qoraqalpogʻiston Respublikasi Vazirlar Kengashi va viloyat hokimliklari har yili 15-yanvarga qadar sunʼiy suv havzalarida baliq yetishtiruvchilar va naslchilikka ixtisoslashgan baliqchilik xoʻjaliklari toʻgʻrisidagi maʼlumotlarni (suv havzasi maydoni, manzili va boshqalar) Markazga kiritib boradi;

(b) Markaz har yili 30-yanvarga qadar baliq yetishtiruvchilar va naslchilikka ixtisoslashgan baliqchilik xoʻjaliklarining suvga boʻlgan buyurtmanomalari asosida yil davomidagi suvga boʻlgan ehtiyoji boʻyicha maʼlumotlarni oylar va subyektlar kesimida shakllantirgan holda Suv xoʻjaligi vazirligiga taqdim etadi;

(v) Suv xoʻjaligi vazirligi har yili 1-martga qadar shakllantirilgan roʻyxatga asosan suv manbalarini koʻrsatgan holda suv olish limitlarining oyma-oy grafigini tasdiqlaydi. Bunda baliqchilik xoʻjaliklari zimmasiga suv sarfini real vaqt rejimida oʻlchash imkonini beruvchi qurilmalarni oʻrnatish va ularni Suv xoʻjaligi vazirligining axborot tizimi bilan integratsiya qilish vazifasi yuklatiladi.

8. “Oʻzbekbaliqsanoat” uyushmasining Baliqchilikni rivojlantirish jamgʻarmasi negizida Markaz huzurida yuridik shaxs maqomiga ega boʻlmagan Baliqchilikni rivojlantirish va qoʻllab-quvvatlash jamgʻarmasi (keyingi oʻrinlarda — Jamgʻarma) tashkil etilsin.

9. Shunday tartib oʻrnatilsinki, unga koʻra 2027-yil 1-yanvardan boshlab respublikadagi suv omborlari, kollektor-drenaj tarmoqlari va tabiiy suv havzalari baliqchilik xoʻjaliklarini tashkil etish uchun ochiq elektron onlayn auksion savdolar orqali ijaraga beriladi. Bunda:

(a) ijaradan tushgan mablagʻlarning (auksion oʻtkazish bilan bogʻliq xarajatlar chegirilgan holda) 15 foizi tegishli tuman (shahar)lar mahalliy budjetiga va qolgan qismi Jamgʻarmaga yoʻnaltiriladi;

(b) aholini ichimlik suv bilan taʼminlaydigan suv havzalari hamda Suvda suzuvchi qushlarning asosiy yashash manzili boʻlgan xalqaro ahamiyatga ega suvli-botqoq yerlar toʻgʻrisidagi konvensiya (Ramsar konvensiyasi) doirasida muhofaza etiladigan obyektlarda faqat anʼanaviy usulda baliq yetishtirishga yoʻl qoʻyiladi;

(v) mazkur Farmon qabul qilingunga qadar ijaraga berilgan suv obyektlari olib qoʻyilmagan holda qayta roʻyxatga olinishi taʼminlanadi.

10. Suv xoʻjaligi vazirligi Raqamli texnologiyalar vazirligi, Qishloq xoʻjaligi vazirligi, Soliq qoʻmitasi hamda Kadastr agentligi bilan birgalikda 2027-yil 1-mayga qadar:

(a) baliqchilik xoʻjaliklarida suv resurslaridan foydalanish, baliq yetishtirish hajmi, ozuqa sarfi va qoʻllanayotgan texnologiyalar toʻgʻrisidagi maʼlumotlarni yagona tizimda yuritish hamda ijaraga beriladigan suv obyektlari hisobini yuritish boʻyicha “e-baliq” elektron platformasini joriy etsin;

(b) mazkur elektron platformani davlat organlari va tashkilotlarining boshqa axborot tizimlari bilan integratsiya qilish choralarini koʻrsin.

11. Suv xoʻjaligi vazirligi, Qishloq xoʻjaligi vazirligi hamda Iqtisodiyot va moliya vazirligining 2026-yil 1-avgustdan 2030-yil 1-avgustga qadar baliqchilik xoʻjaliklariga Agrar sohada toʻlovlar agentligi tomonidan Davlat budjeti mablagʻlari hisobidan quyidagi moliyaviy qoʻllab-quvvatlash choralarini koʻrsatish toʻgʻrisidagi takliflariga rozilik berilsin:

(a) sunʼiy suv havzalarida intensiv usulda baliq yetishtiruvchi baliqchilik xoʻjaliklari tomonidan oʻz xoʻjaliklarini muqobil energiya manbalari bilan taʼminlash maqsadida:

(i) quyosh panellarini xarid qilish va oʻrnatish uchun tijorat banklari tomonidan milliy valyutada ajratilgan kreditlar boʻyicha foiz xarajatlarining 14 foizlik punktidan yuqori, biroq 10 foizlik punktidan oshmagan qismi;

(ii) 50 kilovattgacha quvvatga ega quyosh panellarini oʻrnatish bilan bogʻliq xarajatlarning 25 foizi, biroq har bir kilovattga 1 million soʻmdan oshmagan miqdorda subsidiya sifatida qoplab beriladi;

(b) muqobil energiya manbalari qurilmalari bilan jihozlangan zamonaviy aeratorlar xarid qilish xarajatlarining 50 foizi, biroq 5 million soʻmdan koʻp boʻlmagan miqdorda bir martalik subsidiya ajratiladi. Bunda subsidiya mablagʻlari intensiv usulda gektaridan 10 tonnadan yuqori hosil olgan tadbirkorlik subyektlarga taqdim etiladi;

(v) 1 dona naslli ona baliqni import qilish bilan bogʻliq xarajatning 50 foizgacha boʻlgan, biroq 5 million soʻmdan oshmagan qismiga subsidiya ajratiladi;

(g) yopiq suv aylanma tizimi texnologiyasini oʻrnatib, baliqchilik mahsulotlarini yetishtirishni yoʻlga qoʻyganda ushbu texnologiya umumiy xarajatining 10 foizi, biroq 5 milliard soʻmdan koʻp boʻlmagan miqdorda bir martalik kompensatsiya ajratiladi;

(d) intensiv usulda baliq yetishtirishda qoʻllanadigan balanslashgan omuxta yem ishlab chiqarish boʻyicha yillik quvvati 20 ming tonnadan kam boʻlmagan yangi ishga tushiriladigan loyihalar doirasida texnika va asbob-uskunalarni sotib olish bilan bogʻliq xarajatlarning 20 foizi, biroq 2 milliard soʻmdan koʻp boʻlmagan qismi qoplab beriladi;

(j) xorijdan jalb qilingan malakali ixtiolog va baliq kasalliklari mutaxassislarining ish haqi xarajatlarining 50 foizi, biroq bir nafar mutaxassis uchun bir oyda 1 000 AQSH dollari ekvivalentidan oshmagan qismi qoplab beriladi.

12. Suv xoʻjaligi vazirligi, Qishloq xoʻjaligi vazirligi, Iqtisodiyot va moliya vazirligi hamda Markaziy bankning baliq mahsulotlarini yetishtirish va qayta ishlash hajmini oshirish, naslli baliq yetishtiruvchi tadbirkorlik subyektlari uchun moliyaviy imkoniyatlarni kengaytirish boʻyicha quyidagi takliflari maʼqullansin:

(a) 2026-yil 1-avgustdan 2030-yil 31-avgustga qadar “Tadbirkorlikni rivojlantirish kompaniyasi” aksiyadorlik jamiyati tomonidan Kredit foiz xarajatlarini kompensatsiya qilish jamgʻarmasi hisobidan baliqchilik sohasidagi tadbirkorlik subyektlariga barqarorlik reytingidagi toifasidan qatʼiy nazar:

(i) Markaziy bank asosiy stavkasining (keyingi oʻrinlarda — asosiy stavka) ikki barobaridan oshmagan miqdorda milliy valyutada ajratiladigan kreditlarning asosiy stavkadan 4 foiz banddan yuqori, biroq 10 foiz bandgacha boʻlgan qismini qoplab berish;

(ii) xorijiy valyutada ajratiladigan kreditlarning 8 foiz banddan yuqori, biroq 4 foiz bandgacha boʻlgan qismini qoplab berish;

(iii) milliy va xorijiy valyutadagi kreditlarning 50 foizigacha, biroq 10 milliard soʻm ekvivalentidan oshmagan qismiga kafillik taqdim etish;

(b) tijorat banklari tomonidan xalqaro moliya institutlaridan jalb qilingan mablagʻlar hisobidan baliqchilik korxonalarini aylanma mablagʻlar bilan taʼminlash uchun yillik 18 foiz stavkada garov taʼminoti asosida 9 oygacha imtiyozli davr bilan 24 oygacha muddatga milliy valyutada imtiyozli kreditlar ajratish;

(v) Oʻzbekiston Respublikasi Prezidentining 2026-yil 12-maydagi “Chorvachilik tarmogʻi va yaylov xoʻjaligini zamonaviy boshqaruv tizimi va yangicha yondashuvlar asosida rivojlantirish chora-tadbirlari toʻgʻrisida”gi PQ-179-son qarorining 9-bandi “a” va “v” kichik bandlarida nazarda tutilgan chorvachilik tarmogʻi uchun imtiyozli shartlarda kreditlar ajratish tartibini baliqchilik loyihalari, shu jumladan, naslli baliqlarni yetishtirish loyihalarini moliyalashtirishga nisbatan ham tatbiq etish.

13. Iqtisodiyot va moliya vazirligi:

(a) Qishloq xoʻjaligi vazirligi hamda Markazning hisob-kitoblariga asosan mazkur Farmonning 11-bandida nazarda tutilgan moliyaviy qoʻllab-quvvatlash choralarini:

(i) joriy yilda moliyalashtirish uchun Oʻzbekiston Respublikasi respublika budjetining 2026-yil II choragi yakuni boʻyicha daromadlar prognozining orttirib bajariladigan qismidan Agrar sohada toʻlovlar agentligiga 100 milliard soʻmgacha mablagʻ ajratsin;

(ii) kelgusi yillarda moliyalashtirish uchun talab etiladigan mablagʻlar Davlat budjeti parametrlarida nazarda tutilishini taʼminlasin;

(b) mazkur Farmonning 12-bandi “v” kichik bandida nazarda tutilgan shartlarda baliqchilik tarmogʻiga ajratiladigan imtiyozli kreditlarni moliyalashtirish uchun Qishloq xoʻjaligini davlat tomonidan qoʻllab-quvvatlash jamgʻarmasining hisob-kitoblariga asosan hamda zaruratga koʻra joriy yil yakuniga qadar qoʻshimcha 1 trillion soʻmgacha mablagʻ ajratsin. Bunda mazkur jamgʻarmaning kelgusi yillar balansini shakllantirishda zarur mablagʻlar inobatga olinsin.

IV. Baliqchilikda naslchilik-seleksiya ishlari va kadrlar tayyorlash

14. Suv xoʻjaligi vazirligi, Qishloq xoʻjaligi vazirligi, Markaz baliq yetishtiruvchi xoʻjaliklar va aholi vakillari uchun xorijiy va mahalliy mutaxassislarni jalb qilgan holda qisqa muddatli oʻquv kurslarini tashkil etsin. Bunda:

(a) Markaz mahalliy oliy taʼlim va ilmiy muassasalar hamda ilgʻor baliq yetishtiruvchilarni jalb qilgan holda elektron onlayn platformani ishga tushiradi;

(b) “Agrobank” ATB Jamgʻarma mablagʻlari hisobidan baliq yetishtiruvchi xoʻjaliklar va aholi vakillari uchun “Suvchilar maktabi”da har chorakda malaka oshirish kurslarini tashkil etadi.

15. Qishloq xoʻjaligi vazirligi, Oliy taʼlim, fan va innovatsiyalar vazirligi Toshkent davlat agrar universiteti va Xitoyning Daliyan universiteti bilan hamkorlikda 2027/2028 oʻquv yilidan boshlab baliqchilik va akvakultura boʻyicha qoʻshma fakultetni tashkil etish yuzasidan takliflarni Vazirlar Mahkamasiga kiritsin. Bunda:

(a) yiliga 50 nafargacha abituriyent talabalikka davlat granti asosida qabul qilinadi;

(b) taʼlim jarayonlari “2+1” shaklida tashkil etiladi va qabul kvotalari har yili oʻrnatilgan tartibda davlat buyurtmasi qabul parametrlari doirasida tasdiqlanadi. Bunda 1 va 2-kurs talabalarining oʻqish xarajatlari Davlat budjeti hisobidan qishloq xoʻjaligi taʼlim yoʻnalishlariga ajratilgan qabul kvotalari doirasidagi vakant oʻrinlar hisobidan moliyalashtiriladi.

V. Markaz faoliyatini tashkil etish

16. Markaz boshqaruv xodimlarining umumiy cheklangan soni 70 nafar, shundan markaziy apparat uchun 29 nafar va hududiy boʻlinmalar uchun 41 nafar etib belgilanadi. Bunda mazkur shtat birliklari Suv xoʻjaligi vazirligining amaldagi boshqaruv shtat birliklari hisobidan shakllantiriladi.

17. Belgilab qoʻyilsinki:

(a) Markaz faoliyati Davlat budjeti mablagʻlari hamda budjetdan tashqari mablagʻlar, shuningdek, qonunchilikda taqiqlanmagan boshqa manbalar hisobidan moliyalashtiriladi;

(b) Markaz Toshkent shahri Bektemir tumani Rohat koʻchasi 13-uy manzilida bepul foydalanish huquqi asosida joylashtiriladi;

(v) Markazga mazkur Farmonda nazarda tutilgan baliqchilik tarmogʻi hamda faoliyati yoʻnalishlaridan tashqari boshqa vazifa va funksiyalarni yuklash taqiqlanadi.

18. Sanoat kooperatsiyasi va davlat xaridlari agentligi Markaz bilan yillik hajmi kamida 20 ming dona boʻlgan qoʻshimcha energiya tejash uskunasi bilan jihozlangan zamonaviy aeratorlar va bir ming dona avtomatik oziqlantirish uskunalari ishlab chiqarishni tashkil qilsin.

19. Oziq-ovqat mahsulotlari xavfsizligi qoʻmitasi Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda uch oy muddatda Oziq-ovqat mahsulotlari xavfsizligi sohasini rivojlantirish jamgʻarmasi mablagʻlari hisobidan hududlarda kamida bittadan baliq kasalliklarini tezkorlik bilan aniqlash imkonini beruvchi zamonaviy mobil laboratoriyalar tashkil etsin.

20. Markazga oʻzining budjetdan tashqari mablagʻlarini Markaz va uning hududiy boʻlinmalari faoliyatini moddiy-texnik taʼminlash va joriy xarajatlarga, taʼmirlash, rekonstruksiya va qurilish ishlariga, xodimlarni moddiy ragʻbatlantirish, malakasini oshirish, shu jumladan, xorijiy stajirovkalarni tashkil etish, chet davlatlarda oʻtkaziladigan konferensiyalar, seminarlar va boshqa tadbirlarda ishtirok etish, tadqiqot loyihalarini amalga oshirish, shuningdek, Markaz faoliyati bilan bogʻliq boʻlgan boshqa tadbirlarga yoʻnaltirish huquqi berilsin.

21. Qoraqalpogʻiston Respublikasi Vazirlar Kengashi va viloyatlar hokimliklari ikki oy muddatda respublikadagi mavjud suv havzalari Suv xoʻjaligi vazirligiga doimiy foydalanish huquqi asosida ajratilishini taʼminlasin.

22. Suv xoʻjaligi vazirligi Iqtisodiyot va moliya vazirligi bilan birgalikda bir oy muddatda Markaz faoliyatini tashkil etish uchun talab qilinadigan mablagʻlarni 2026-yilda Davlat budjetidan Suv xoʻjaligi vazirligi uchun ajratiladigan mablagʻlar doirasida moliyalashtirish choralarini koʻrsin. Bunda Markaz faoliyatini tashkil qilish maqsadida avtotransport, moddiy-texnika vositalari va boshqa zarur asbob-uskunalar bilan taʼminlash uchun talab etiladigan mablagʻlar ajratilishi inobatga olinsin.

23. Suv xoʻjaligi vazirligi, Ekologiya va iqlim oʻzgarishi milliy qoʻmitasi Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda uch oy muddatda tabiiy koʻllardan foydalanish boʻyicha tartibni ishlab chiqib, Vazirlar Mahkamasiga kiritsin.

VI. Farmon ijrosini tashkil etish, taʼminlash va nazorat

24. Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga 5-ilovaga muvofiq oʻzgartirish va qoʻshimchalar kiritilsin.

25. Suv xoʻjaligi vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

26. Mazkur Farmon ijrosini samarali tashkil qilishga masʼul va shaxsan javobgar etib quyidagilar belgilansin:

(a) Bosh vazir oʻrinbosari J. Xodjayev, suv xoʻjaligi vaziri Sh. Xamrayev — belgilangan topshiriq va vazifalarning oʻz vaqtida bajarilishini taʼminlashga;

(b) suv xoʻjaligi vazirining birinchi oʻrinbosari Z. Ishpulatov, Qoraqalpogʻiston Respublikasi Vazirlar Kengashi Raisining, viloyat hokimlarining qishloq va suv xoʻjaligi masalalari boʻyicha oʻrinbosarlari — suv havzalarida baliqchilikni rivojlantirish uchun sharoit yaratish va bu borada samaradorlikni taʼminlashga;

(v) qishloq xoʻjaligi vaziri oʻrinbosari — Agrar sohada toʻlovlar agentligi direktori A. Qosimov — subsidiya mablagʻlarini ajratish masalalari bilan bogʻliq belgilangan chora-tadbirlarning oʻz vaqtida amalga oshirilishiga;

(g) Suv xoʻjaligi obyektlari xavfsizligini va suvdan foydalanishni nazorat qilish inspeksiyasi boshligʻi R. Raximov — baliq yetishtiruvchilarning suvdan foydalanish qoidalariga rioya etishi ustidan nazorat qilishga;

(d) Bosh prokuror oʻrinbosari Sh. Toʻxtaboyev — Farmonda belgilangan topshiriqlarning oʻz vaqtida va sifatli bajarilishi ustidan doimiy nazorat oʻrnatishga.

27. Farmon ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov hamda Oʻzbekiston Respublikasi Prezidenti Administratsiyasi rahbari oʻrinbosari T.N. Butunbayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 2-iyul,

PF-122-son

Oʻzbekiston Respublikasi Prezidentining 2026-yil 2-iyuldagi PF-122-son Farmoniga 1-ILOVA

Baliqchilikni rivojlantirish markazining asosiy vazifalari va faoliyatining ustuvor yoʻnalishlari

1. Respublikada baliqchilik tarmogʻini barqaror rivojlantirish, uni tartibga solish hamda tarmoqqa oid yagona davlat siyosatini amalga oshirish.

2. Baliqchilik uchun tabiiy va sunʼiy suv havzalarini (suv omborlari, kollektor drenaj tarmoqlari va boshqa suv fondi yerlari) ijaraga berishda barcha uchun teng, shaffof va bozor tamoyillariga asoslangan tartibni joriy qilish, mazkur jarayonlarni nazorat va monitoring qilish.

3. Tarmoqdagi muammolarni ilmiy asosda hal etish, amaliy tadqiqotlar olib borish, tahlil va prognoz qilish orqali baliqchilikni rivojlantirishning samarali modellarini ishlab chiqish.

4. Baliqchilik tarmogʻida yagona ilmiy-texnik, ilmiy-tadqiqot ishlarini rivojlantirish, seleksiya, naslchilik va sifatli chavoqlar yetishtirishni kengaytirish.

5. Baliqchilik tarmogʻini rivojlantirishda xalqaro hamkorlikni kuchaytirish, shuningdek, ichki va tashqi bozorlardagi narxlar monitoringini olib borish.

6. Suv omborlari, kanallar, kollektorlar, zovurlar va melioratsiya obyektlarida baliqchilikni rivojlantirishga qaratilgan investitsiyaviy hamda infratuzilmaviy loyihalarni amalga oshirish jarayonlarini muvofiqlashtirib borish.

7. Tarmoqda intensiv va yarim intensiv zamonaviy akvakultura texnologiyalarini joriy etish, innovatsion yechimlar va boshqaruv tizimlarini toʻliq raqamlashtirish.

8. Baliqlar uchun toʻla qiymatli, yuqori oqsilli ozuqalar ishlab chiqarish uchun yangi ishlab chiqarish quvvatlarini tashkil etish va baliqchilik tarmogʻining ozuqa bazasini mustahkamlash jarayonlarini muvofiqlashtirib borish.

9. Respublikada baliqchilik va akvakultura tarmogʻini barqaror rivojlantirish, uning iqtisodiy samaradorligini oshirish va aholini sifatli baliq mahsulotlari bilan taʼminlash.

10. Suv resurslaridan oqilona foydalanish va suv obyektlarining ekologik holatini yaxshilash.

11. Tarmoqda investitsiyaviy muhitni yaxshilash, mahalliy va xorijiy investitsiyalarni jalb qilish hamda davlat-xususiy sheriklik loyihalarini amalga oshirish.

Oʻzbekiston Respublikasi Prezidentining 2026-yil 2-iyuldagi PF-122-son Farmoniga 2-ILOVA

Qoraqalpogʻiston Respublikasi va viloyatlarda 2026-2027-yillarda baliq yetishtirishning maqsadli koʻrsatkichlari va biriktirilgan masʼullar roʻyxati

Oʻzbekiston Respublikasi Prezidentining 2026-yil 2-iyuldagi PF-122-son Farmoniga 3-ILOVA

Baliqchilik tarmogʻini yanada rivojlantirish hamda tabiiy va sunʼiy suv havzalaridan foydalanish samaradorligini oshirish boʻyicha

“YOʻL XARITASI”

Oʻzbekiston Respublikasi Prezidentining 2026-yil 2-iyuldagi PF-122-son Farmoniga 4-ILOVA

Baliqchilikni rivojlantirish markazining

TASHKILIY TUZILMASI

* Savdo-sanoat palatasi bilan hamkorlikda faoliyat olib boradi.

Oʻzbekiston Respublikasi Prezidentining 2026-yil 2-iyuldagi PF-122-son Farmoniga 5-ILOVA

Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2021-yil 26-fevraldagi “Oʻzbekiston Respublikasi Iqtisodiyot va moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi faoliyatini tubdan takomillashtirish toʻgʻrisida”gi PF-6179-son Farmoniga 2-ilovada:

(a) “Agrar sohani moliyalashtirish boshqarmasi 10” blogi “Agrar sohani moliyalashtirish boshqarmasi 12” blogi bilan almashtirilsin;

(b) izoh qismidagi “32” raqami “34” raqami bilan almashtirilsin.

2. Oʻzbekiston Respublikasi Prezidentining 2023-yil 25-yanvardagi “Respublika ijro etuvchi hokimiyat organlari faoliyatini samarali yoʻlga qoʻyishga doir birinchi navbatdagi tashkiliy chora-tadbirlar toʻgʻrisida”gi PF-14-son Farmoniga 1-ilovada:

(a) “5. Suv xoʻjaligi vazirligi” boʻlimida “1. Suv xoʻjaligi obyektlarini ekspluatatsiya qilish agentligi” pozitsiyasi quyidagi tahrirda bayon etilsin:

(b) izohlar qismining 5.4-kichik bandi “Suv xoʻjaligida islohotlar markazi,” soʻzlaridan keyin “Baliqchilikni rivojlantirish markazi,” soʻzlari bilan toʻldirilsin.

3. Oʻzbekiston Respublikasi Prezidentining 2024-yil 7-maydagi “Suv xoʻjaligida zamonaviy boshqaruv tizimini joriy qilish va rivojlantirishning ustuvor yoʻnalishlarini belgilash toʻgʻrisida”gi PF-74-son Farmonida:

(a) 3-band “b” kichik bandining beshinchi xatboshisidagi “4-qavatiga joylashtirilsin” soʻzlari “4-qavatiga tekin foydalanish huquqi asosida joylashtirilsin” soʻzlari bilan almashtirilsin;

(b) 5-ilova quyidagi mazmundagi 8 va 8.1-pozitsiyalar bilan toʻldirilsin:

4. Oʻzbekiston Respublikasi Prezidentining 2026-yil 2-apreldagi “Qishloq va suv xoʻjaligi muhandislarini tayyorlash tizimini yanada takomillashtirish chora-tadbirlari toʻgʻrisida”gi PQ-122-son qaroriga 5-ilovada:

(a) 8-pozitsiya quyidagi tahrirda bayon etilsin:

b) 17-pozitsiya quyidagi tahrirda bayon etilsin:

5. Vazirlar Mahkamasining 2024-yil 9-fevraldagi “Oʻzbekiston Respublikasining tabiiy suv havzalarida baliq ovlash qoidalarini tasdiqlash toʻgʻrisida”gi 80-son qarorida:

(a) 3-bandning uchinchi xatboshi quyidagi tahrirda bayon etilsin:

“baliqchilik xoʻjaliklarining sanoat usulida baliq ovlashga ruxsat berilgan toʻrlarini hisobga qoʻyish va identifikatsiya qilish hamda maxsus tamgʻalash uchun bazaviy hisoblash miqdorining 10 foizi miqdorida yigʻim undiriladi;”

(b) ilovada:

35-band quyidagi tahrirda bayon etilsin:

“35. Baliqchilik xoʻjaliklarining sanoat usulida baliq ovlashga ruxsat berilgan toʻrlarini hisobga qoʻyish va identifikatsiya qilish hamda maxsus tamgʻalash uchun bazaviy hisoblash miqdorining 10 foizi miqdorida Ekologiya jamgʻarmasiga yigʻim undiriladi”;

(v) ilovaga 1-ilovaning 1-pozitsiyasi quyidagi tahrirda bayon etilsin:

6. Vazirlar Mahkamasining 2024-yil 4-sentabrdagi “Suv havzalarida motorli (ichki yonuv dvigatelli) va elektromotorli suv transporti vositalaridan foydalanish tartibini yanada takomillashtirish hamda fuqarolar xavfsizligini taʼminlash chora-tadbirlari toʻgʻrisida”gi 540-son 1-bandining “b” kichik bandi quyidagi mazmundagi beshinchi xatboshi bilan toʻldirilsin:

“sanoat usulida baliq ovlovchilarga motorli qayiqlar va kater uchun bazaviy hisoblash miqdorining 1 baravari”.