Muvofiqlikni baholash organlarini akkreditatsiyadan oʻtkazishni takomillashtirish va davlat xizmatini koʻrsatishning maʼmuriy reglamentini tasdiqlash haqida (349-son)

30.06.2026

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Davlat xizmatlarini koʻrsatish tizimini takomillashtirish hamda sohada byurokratik tartibotlarni tubdan qisqartirishga doir qoʻshimcha chora-tadbirlar toʻgʻrisida” 2025-yil 8-sentabrdagi PF-157-son hamda “Texnik jihatdan tartibga solish sohasidagi islohotlarni ilgʻor xalqaro amaliyot asosida jadallashtirish chora-tadbirlari toʻgʻrisida” 2026-yil 16-fevraldagi PF-25-son farmonlari ijrosini taʼminlash maqsadida Vazirlar Mahkamasi qaror qiladi:

1. Quyidagilarni nazarda tutuvchi Muvofiqlikni baholash organlarini akkreditatsiyadan oʻtkazish boʻyicha davlat xizmatini koʻrsatishning maʼmuriy reglamenti (keyingi oʻrinlarda — Reglament) 1-ilovaga muvofiq tasdiqlansin:

akkreditatsiya talablari va shartlari;

akkreditatsiyadan oʻtkazishni, shu jumladan, Davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) yoxud “e-akkreditatsiya” axborot tizimi orqali tashkil etish;

akkreditatsiya, takroriy akkreditatsiya, akkreditatsiya sohasini kengaytirish, qisqartirish va davriy baholash;

akkreditatsiya toʻgʻrisidagi guvohnomaning amal qilishini tasdiqlash, toʻxtatish (tiklash) va tugatish tartibi.

2. Vazirlar Mahkamasi huzuridagi “Oʻzbekiston akkreditatsiya markazi” davlat muassasasi Adliya vazirligi hamda Raqamli texnologiyalar vazirligi bilan birgalikda 2026-yil 1-sentabrdan boshlab ushbu qaror bilan tasdiqlangan Reglamentga muvofiq davlat xizmati Davlat xizmatlari markazlari, YIDXP yoxud “e-akkreditatsiya” axborot tizimi orqali koʻrsatilishini taʼminlasin.

3. Oʻzbekiston Respublikasi Adliya vazirligi davlat organlari va boshqa tashkilotlar tomonidan ushbu qarorga muvofiq davlat xizmati koʻrsatilishining belgilangan tartibiga rioya etilishi ustidan doimiy nazorat oʻrnatsin.

4. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 30-iyun,

349-son

Vazirlar Mahkamasining 2026-yil 30-iyundagi 349-son qaroriga 1-ILOVA

Muvofiqlikni baholash organlarini akkreditatsiyadan oʻtkazish boʻyicha davlat xizmatini koʻrsatishning

MAʼMURIY REGLAMENTI

1-bob. Umumiy qoidalar

1. Ushbu Maʼmuriy reglament (keyingi oʻrinlarda — Reglament) Oʻzbekiston Respublikasi Vazirlar Mahkamasi huzuridagi “Oʻzbekiston akkreditatsiya markazi” davlat muassasasining (keyingi oʻrinlarda — Markaz) muvofiqlikni baholash organlari faoliyatini akkreditatsiyadan oʻtkazish va davriy baholash tartibini belgilaydi.

2. Ushbu Reglamentda quyidagi asosiy tushunchalardan foydalaniladi:

akkreditatsiya — muvofiqlikni baholash organlarining muayyan faoliyat sohasida muvofiqlikni baholashga doir ishlarni bajarishga vakolatliligini akkreditatsiya organi tomonidan rasman tasdiqlash;

akkreditatsiya belgisi — akkreditatsiyadan oʻtkazilgan subyektlarning akkreditatsiya maqomini koʻrsatish maqsadida ular qoʻllashi uchun moʻljallangan Markaz tomonidan beriladigan belgi;

akkreditatsiya boʻyicha baholovchi — muvofiqlikni baholash organini baholash uchun akkreditatsiya organi tomonidan tayinlangan, mazkur faoliyatni mustaqil ravishda yoki baholash guruhi tarkibida amalga oshiradigan jismoniy shaxs;

akkreditatsiya boʻyicha texnik ekspert — akkreditatsiya organi tomonidan tayinlangan, akkreditatsiya boʻyicha baholovchi rahbarligida ishlaydigan, baholanayotgan akkreditatsiya sohasida maxsus bilimlarga yoki koʻnikmalarga ega boʻlgan va mustaqil baholashni amalga oshirmaydigan jismoniy shaxs;

akkreditatsiya komissiyasi — Markaz huzurida tashkil etiladigan komissiya boʻlib, akkreditatsiya talablari va shartlariga oid ishlar natijalarini koʻrib chiqish hamda ushbu Reglamentda nazarda tutilgan tegishli qarorlarni qabul qilish uning asosiy vazifasi hisoblanadi;

akkreditatsiyadan oʻtkazilgan subyekt — milliy akkreditatsiya tizimida akkreditatsiyadan oʻtkazilgan muvofiqlikni baholash organi va metrologiya xizmati;

akkreditatsiya sohasi — faoliyatning muayyan sohasi boʻlib, unda akkreditatsiya uchun akkreditatsiya obyektining yoxud akkreditatsiyadan oʻtkazilgan subyektning vakolatliligi tasdiqlanadi yoki tasdiqlangan boʻladi;

akkreditatsiya toʻgʻrisidagi guvohnoma — akkreditatsiyadan oʻtkazilgan subyektning akkreditatsiyaning belgilangan sohasidagi ishlarni bajarishga vakolatliligini tasdiqlovchi hujjat;

akkreditatsiya uchun ariza beruvchi (keyingi oʻrinlarda — akkreditatsiya obyekti) — akkreditatsiya uchun ariza bergan muvofiqlikni baholash organi;

apellyatsiya komissiyasi — akkreditatsiya organining akkreditatsiyadan oʻtkazish, akkreditatsiyadan oʻtkazishni rad etish, akkreditatsiyaning amal qilishini toʻxtatib turish yoki tugatish, akkreditatsiya sohasini kengaytirish va qisqartirishga doir qarorlari boʻyicha apellyatsiyalarni koʻrib chiqish hamda qarorlar qabul qilish maqsadida akkreditatsiya organi huzurida tuziladigan komissiya;

baholash guruhi rahbari — zimmasiga baholash jarayoniga rahbarlik qilish uchun umumiy masʼuliyat yuklangan va Markaz tomonidan vakolat berilgan baholovchi;

baholash — akkreditatsiyaning aniq bir sohasi uchun normativ-huquqiy hujjatlar, shuningdek, standartlar va akkreditatsiya tartib-taomillarini belgilovchi hujjatlar asosida akkreditatsiya obyekti yoki akkreditatsiyadan oʻtkazilgan subyekt vakolatli ekanini aniqlash maqsadida Markaz tomonidan amalga oshiriladigan jarayon;

davriy baholash — akkreditatsiyadan oʻtkazilgan subyekt faoliyatining akkreditatsiya davrida belgilangan talablarga muvofiqligini akkreditatsiya davrida qayta baholash tartib-taomili;

Milliy akkreditatsiya tizimi reyestri — akkreditatsiyadan oʻtkazilgan subyektlar, shuningdek, akkreditatsiya toʻgʻrisidagi guvohnomalarning joriy maqomi haqidagi rasmiy axborot bazasi;

muvofiqlikni baholash organi — muvofiqlikni baholashga oid faoliyatni amalga oshiruvchi yuridik shaxs;

“e-akkreditatsiya” axborot tizimi (keyingi oʻrinlarda — axborot tizimi) — muvofiqlikni baholash organlarini akkreditatsiya jarayonlari amalga oshiriladigan axborot tizimi.

2-bob. Akkreditatsiya talablari va shartlari

3. Quyidagilar akkreditatsiyaning umumiy talab va shartlari hisoblanadi:

akkreditatsiya obyektlari yoki akkreditatsiyadan oʻtkazilgan subyektlarining vakolati va baholashga qoʻyilgan talablarni tartibga soluvchi normativ-huquqiy hujjatlarga, shuningdek, standartlar va akkreditatsiya tartib-taomillarini belgilovchi hujjatlarga majburiy rioya qilish;

akkreditatsiya obyekti yoki akkreditatsiyadan oʻtkazilgan subyektlarning samarali faoliyat koʻrsatish uchun zarur boʻlgan mulk huquqi yoki boshqa ashyoviy huquq asosida (shu jumladan, ijara huquqlari asosida) taalluqli boʻlgan bino va inshootlar, texnik-texnologik hamda apparat-dasturiy vositalarning mavjudligi;

joriy etilgan va amaldagi menejment tizimining mavjudligi hamda akkreditatsiya obyekti yoki akkreditatsiyadan oʻtkazilgan subyekt faoliyatida uning talablariga rioya etish, ularga oʻzgartirishlarni kiritishda amaldagi menejment tizimining yaxlitligini saqlash;

malakasi akkreditatsiya jarayonida Markaz tomonidan baholanadigan va akkreditatsiyaning ariza berilgan sohasida malakali mutaxassislarning shtat birligida mavjudligi, ularning oʻzaro almashinuvchanligini taʼminlash;

akkreditatsiyaning ariza berilgan sohasiga muvofiq hujjatlarning mavjudligi;

akkreditatsiya obyektlari va akkreditatsiyadan oʻtkazilgan subyektlar tomonidan ushbu Reglamentning 18, 31-bandlarda, shuningdek, 9 — 11-boblarida koʻrsatilgan tartiblarga hamda akkreditatsiya sohasidagi xalqaro tashkilotlarning hujjatlarida belgilangan talablarga va mezonlarga rioya qilish.

4. Quyidagilar akkreditatsiya obyekti yoki akkreditatsiyadan oʻtkazilgan subyektni akkreditatsiyadan oʻtkazish va oʻz faoliyatida belgilangan talablarga rioya etishi uchun qoʻshimcha shartlar hisoblanadi:

a) mahsulotlarni sertifikatlash organi sifatida:

akkreditatsiya obyektining ishlab chiqaruvchi, sotuvchi va isteʼmolchilardan mustaqilligi;

baholanayotgan obyektning texnik reglament va standartlarida belgilangan majburiy koʻrsatkichlarning aksariyat qismi aniqlashini taʼminlaydigan, belgilangan tartibda akkreditatsiyadan oʻtkazilgan oʻz sinov laboratoriyasining (markazi) mavjudligi;

baholanayotgan obyekt majburiy koʻrsatkichlarining yetishmayotgan qismi aniqlashini taʼminlovchi akkreditatsiyadan oʻtkazilgan boshqa sinov laboratoriyalari (markazlari) bilan hamkorlik toʻgʻrisidagi bitimlarning mavjudligi;

b) inspeksiya organi sifatida akkreditatsiyaning ariza berilgan sohasida mahsulotning muvofiqligini baholash uchun tegishli texnika vositalari va asbob-uskunalar yoki laboratoriyaning mavjudligi (zarur hollarda);

v) xizmatlar, jarayonlar, menejment tizimlari, xodimlarni sertifikatlash organining baholanayotgan tarafdan mustaqilligi;

g) sinov, kalibrlash va tibbiyot laboratoriyalari (markazlari):

standartlar, sinash va kalibrlash usullari (uslubiyatlari) talablariga muvofiq boʻlgan ishlab chiqarish binolari va atrof-muhit sharoitlarining mavjudligi;

akkreditatsiyaning ariza berilgan sohasiga muvofiq sinovlar oʻtkazilishini va (yoki) oʻlchashlar bajarilishini taʼminlaydigan sinash, oʻlchash vositalari, standart namunalar va sinash asbob-uskunalarining mavjudligi;

akkreditatsiyadan oʻtkazilgan laboratoriyalar sinov bayonnomalarining (ishlab chiqarishdagi laboratoriyalar ichki ehtiyojlari uchun oʻtkazgan sinovlari bundan mustasno) axborot tizimida roʻyxatga olingan holda rasmiylashtirilishi;

laboratoriyalararo solishtirish sinovlari hamda oʻlchash vositalarini kalibrlash natijalari, shuningdek, malaka testlari oʻtkazilgani.

5. Tadbirkorlik subyektlari tomonidan akkreditatsiyadan oʻtkazilgan ikki va undan ortiq muvofiqlikni baholash xizmatlari yoʻlga qoʻyilgan sohada davlat organlari va tashkilotlari sinov laboratoriyalari va sertifikatlash organlarini tashkil etishiga yoʻl qoʻyilmaydi.

6. Akkreditatsiyadan oʻtkazilgan sinov, kalibrlash, tibbiyot laboratoriyalari (markazlari) amaldagi akkreditatsiya sohasiga muvofiq oʻzi qoʻllayotgan sinov va oʻlchash vositalaridan, standart namunalardan va sinash asbob-uskunalaridan foydalanish va (yoki) ularni qoʻllash huquqlarining akkreditatsiyadan oʻtishga talabgor boʻlgan akkreditatsiya obyektlari foydasiga berilishiga yoʻl qoʻyilmaydi, Oʻzbekiston Respublikasi Prezidenti va (yoki) Vazirlar Mahkamasining qarorlarida nazarda tutilgan hollar bundan mustasno.

3-bob. Akkreditatsiyadan oʻtkazish tartibi

7. Akkreditatsiya obyektlarini ushbu Reglamentga 1-ilovada keltirilgan sxemaga muvofiq akkreditatsiyadan oʻtkazish amalga oshiriladi.

Akkreditatsiya obyekti Markaz tomonidan belgilangan shakl boʻyicha Markazga Reglamentning 8-bandida koʻrsatilgan hujjatlar va maʼlumotlarni ilova qilgan holda, Davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) yoxud axborot tizimi orqali ariza (keyingi oʻrinlarda — buyurtma) beradi.

Akkreditatsiya obyekti zarur maʼlumotlarni buyurtmaga kiritgandan soʻng undagi maʼlumotlarning toʻgʻriligini tekshiradi va imzolarni identifikatsiya qilishning tegishli vositalari (elektron imzo, Mobil-ID va boshqalar) bilan tasdiqlaydi.

Akkreditatsiya obyekti YIDXP orqali murojaat etgan taqdirda, soʻrovnomani elektron raqamli imzo bilan tasdiqlash talab etilmaydi.

Buyurtma axborot tizimlari orqali dam olish va bayram kunlaridan qatʼi nazar, har kuni 24 soat davomida akkreditatsiya obyekti tomonidan yuborilishi mumkin.

Bunda buyurtma ish vaqtidan keyin yoki dam olish va bayram kunlari Markazga kelib tushganda, navbatdagi ish kuni buyurtmaning Markazga tushgan va u tomonidan qabul qilingan kun hisoblanadi.

8. Akkreditatsiya obyekti buyurtmaga quyidagi hujjatlar va maʼlumotlarni ilova qiladi:

akkreditatsiya sohasi loyihasi;

akkreditatsiya obyektlarining vakolati va baholash talablarini tartibga soluvchi normativ-huquqiy hujjatlar, standartlar va akkreditatsiya tartib-taomillarini belgilovchi hujjatlarga rioya qilingani yuzasidan oʻzini-oʻzi baholash anketasi (chek-list);

sifat boʻyicha qoʻllanma va menejmenti tizimi tartib-tamoyil hujjatlari;

mahsulot, xizmatlar, jarayonlar, menejment tizimlari, xodimlarni sertifikatlash organlari va inspeksiya organi uchun qoʻshimcha ravishda — xodimlar toʻgʻrisidagi maʼlumotlar, sertifikatlash (inspeksiyadan oʻtkazish) tartibi toʻgʻrisidagi hujjat va inspeksiya organi tomonidan qoʻllanadigan (zarur hollarda) texnika vositalari va asbob-uskunalar haqidagi hujjat;

sinov, kalibrlash va tibbiyot laboratoriyalari (markazlari) uchun qoʻshimcha ravishda — laboratoriya, xodimlar va ular tomonidan qoʻllanadigan sinash, oʻlchash vositalari hamda sinov uskunasi toʻgʻrisidagi maʼlumotlar.

9. Akkreditatsiya obyektidan ushbu Reglamentning 8-bandida nazarda tutilmagan hujjatlar va maʼlumotlar taqdim etilishini talab qilishga yoʻl qoʻyilmaydi.

Akkreditatsiya obyekti oʻz ixtiyoriga koʻra akkreditatsiya obyektiga aloqador qoʻshimcha hujjatlar va maʼlumotlarni taqdim qilishi mumkin.

10. Buyurtma tahlili natijasida buyurtma bilan birga taqdim etilgan hujjatlar va maʼlumotlarda notoʻgʻri, yolgʻon yoki qalbaki maʼlumotlar koʻrsatilganda yoki Reglamentning 8-bandida belgilangan barcha zarur hujjatlar va maʼlumotlar taqdim etilmagan taqdirda, bir ish kunidan kechikmay akkreditatsiya obyektiga hujjatlar puxta ishlab chiqish uchun qaytariladi.

Agar buyurtmaning tahlili natijasida akkreditatsiya obyektini baholashga jalb etilishi mumkin boʻlgan tegishli baholovchi va texnik ekspertlar boshqa akkreditatsiya obyektlarini baholash jarayonlariga jalb etilgan boʻlsa, Markaz bu haqida akkreditatsiya obyektida dastlabki baholash jarayonlarini amalga oshirish muddatlari toʻgʻrisida yozma xabar berib, unda tomonlarga qulay boʻlgan muddat taklif etilishi lozim. Bunda taklif etiladigan muddat uch oydan oshmasligi talab etiladi.

Buyurtmaning tahlili natijasi ijobiy boʻlganda, shuningdek, ushbu bandning ikkinchi xatboshisida keltirilgan hollarda dastlabki baholash jarayonlarini amalga oshirish muddatlari kelishib olinganidan soʻng, ikki ish kunidan kechikmay hujjatlar ekspertizasi boʻyicha shartnoma tayyorlanadi va akkreditatsiya obyektiga yuboriladi.

Akkreditatsiya obyekti davlat xizmatidan foydalanishdan bosh tortish huquqiga ega. Akkreditatsiya obyekti davlat xizmatidan foydalanishdan bosh tortganda, uning buyurtmasi koʻrilmasdan qoldiriladi.

11. Hujjatlarni ekspertizadan oʻtkazish uchun toʻlov toʻlangach, uch ish kuni davomida Markaz tomonidan malakasi baholangan va roʻyxatga olingan baholovchilar hamda texnik ekspertlardan iborat baholash guruhi shakllantiriladi.

12. Baholash guruhi tarkibi akkreditatsiya obyektining asoslangan takliflarini inobatga olgan holda, u bilan kelishib olinganidan soʻng taqdim etilgan akkreditatsiya obyekti hujjatlari ekspertizadan oʻtkaziladi. Ekspertizadan oʻtkazish muddati oʻn besh ish kunidan oshmasligi kerak.

Taqdim etilgan hujjatlarni ekspertizadan oʻtkazish natijasida akkreditatsiya talablari va shartlariga nomuvofiqliklar aniqlansa, Markaz joyning oʻzida baholashni davom ettirmaslik yuzasidan qaror qabul qiladi. Bunda qabul qilingan qaror natijalari va ularning asoslari akkreditatsiya obyektiga yozma ravishda xabar qilinadi.

13. Akkreditatsiya obyekti aniqlangan kamchiliklar toʻgʻrisida xabar qabul qilgandan soʻng toʻrt oydan oshmaydigan muddatda ularni bartaraf etish choralarini koʻradi.

Belgilangan muddatda kamchiliklar bartaraf etilmasa, akkreditatsiyadan oʻtkazishga berilgan buyurtma bekor qilinadi.

Akkreditatsiya obyekti aniqlangan kamchiliklar toʻgʻrisida xabarni qabul qilgandan soʻng keyingi akkreditatsiya jarayonini amalga oshirishni rad etish huquqiga ega va bu haqida Markazni yozma ravishda xabardor qiladi.

Ekspertiza natijalari ijobiy boʻlganda, Markaz tomonidan joyning oʻzida baholash uchun shartnoma tayyorlanadi va akkreditatsiya obyektiga yuboriladi.

14. Joyning oʻzida baholashni oʻtkazish uchun shartnomaga muvofiq, toʻlov toʻlangach, baholash guruhi tomonidan baholanishi kerak boʻlgan faoliyat turlari, baholash ishlari bajariladigan joylar, baholash sanasi, baholash guruhi tarkibi va uning vazifalarini qamrab oluvchi baholash rejasi ishlab chiqiladi hamda akkreditatsiya obyekti yoki akkreditatsiyadan oʻtkazilgan subyekt bilan kelishib olinadi.

15. Akkreditatsiya obyektining yoki akkreditatsiyadan oʻtkazilgan subyektning akkreditatsiya talablari va shartlariga muvofiqligini hamda akkreditatsiya obyekti soʻralgan funksiyalarni bajara olish qobiliyatini baholash baholash guruhining asosiy vazifalari hisoblanadi.

16. Akkreditatsiya obyektini yoki akkreditatsiyadan oʻtkazilgan subyektni joyning oʻzida baholash muddatlari ularning faoliyati xususiyatlarini, shuningdek, ularni ixtisoslashtirilgan (laboratoriya, tashxis, metrologiya, metodologik, ishlab chiqarish va texnologik) baholash zaruratini hisobga olgan holda Markaz tomonidan aniqlanadi. Bunda akkreditatsiya obyektini baholash muddati oʻn ish kunidan oshmasligi kerak.

17. Baholash ishlari tasdiqlangan rejaga muvofiq oʻtkaziladi. Baholash rejasini Markaz rahbari yoki u tomonidan vakolat berilgan shaxs tasdiqlaydi.

18. Baholash guruhi akkreditatsiya obyektining yoki akkreditatsiyadan oʻtkazilgan subyektining akkreditatsiya sohasiga kiritilgan har bir soʻralgan faoliyat yoʻnalishini baholaydi.

Akkreditatsiya obyekti yoki akkreditatsiyadan oʻtkazilgan subyekt joyning oʻzida baholash ishlari uchun shart-sharoitlar, shu jumladan, baholash guruhiga zarur maʼlumot, yozuvlar va hujjatlardan (shu jumladan, ichki audit natijalaridan) foydalanish, binolarga kirish hamda xodimlar malakasini baholash imkoniyatini yaratadi.

Xodimlar malakasi ularning shaxsiy kartalarini oʻrgangan holda soʻralgan sohadagi malakasi, tayyorgarligi, maʼlumotini, muvofiqlikni baholash boʻyicha koʻnikmalarini namoyish qilishini kuzatish va suhbatdan oʻtkazish orqali baholanadi.

Baholash guruhi laboratoriyalararo solishtirma sinovlar natijalarini hamda oʻlchash vositalarini kalibrlash natijalari, shuningdek, soʻralgan sohalarda malaka testlari oʻtkazilishini talab qilishga haqlidir.

Tarkibiga akkreditatsiyadan oʻtkazilgan subyekt kiradigan yuridik shaxsda sertifikatlangan menejment tizimining mavjudligi akkreditatsiya obyekti uchun bu boradagi akkrreditatsiya talablari va shartlari bajarilganining tasdigʻi boʻla olmaydi.

19. Joyning oʻzida baholash ishlarini bajarish uchun shart-sharoit yaratib berilmagan holatda, baholash guruhi rahbari Markazga tegishli bildirgi taqdim etishi shart, Markaz uning asosida baholash ishlarini bir oydan oshmaydigan muddatga toʻxtatib turish toʻgʻrisida qaror qabul qiladi.

Akkreditatsiya obyekti koʻrsatilgan muddatda joyning oʻzida baholash ishlari uchun shart-sharoit yaratib bermasa, akkreditatsiyadan oʻtkazishga berilgan buyurtma bekor qilinadi.

20. Baholash yakunlari boʻyicha baholash guruhining baholash davomida aniqlangan nomuvofiqliklarni (ular mavjud boʻlganda) oʻz ichiga olgan hisoboti (keyingi oʻrinlarda — hisobot) tuziladi.

Hisobot baholash guruhi aʼzolari tomonidan imzolanadi va akkreditatsiya obyektining yoki akkreditatsiyadan oʻtkazilgan subyektning vakolatli vakiliga tanishish uchun taqdim etiladi. Bunda akkreditatsiya obyektining yoki akkreditatsiyadan oʻtkazilgan subyektning vakolatli vakili oʻzining alohida fikrini (zarurat boʻlganda) yozma ravishda ifodalashi mumkin.

Hisobot ikki nusxada tuziladi, uning bir nusxasi akkreditatsiya obyektining yoki akkreditatsiyadan oʻtkazilgan subyektning vakolatli vakiliga beriladi.

21. Baholash guruhi ijobiy hisobot rasmiylashtirgan taqdirda (nomuvofiqlik mavjud boʻlmaganda), uch ish kuni mobaynida hisobotni Akkreditatsiya komissiyasining tegishli qarorini qabul qilish uchun Markazga taqdim etadi.

22. Baholash vaqtida nomuvofiqliklar aniqlansa, akkreditatsiya obyekti nomuvofiqliklarni bartaraf etishga doir harakatlar rejasini ishlab chiqadi va Markazga taqdim etadi. Bunda nomuvofiqliklarni bartaraf etish muddati baholash boʻyicha hisobot rasmiylashtirilgan sanadan boshlab toʻrt oydan oshmasligi kerak.

23. Akkreditatsiya obyekti tomonidan harakatlar rejasini bajarish toʻgʻrisidagi maʼlumotlar va nomuvofiqliklar bartaraf etilganligini tasdiqlovchi hujjatlar belgilangan muddatda taqdim etilmasa, baholash guruhi rahbari hisobotni ilova qilgan holda, akkreditatsiya boʻyicha ishlarni tugatish toʻgʻrisida Markazga bildirgi taqdim etishi shart.

24. Markaz harakatlar rejasini bajarish toʻgʻrisidagi maʼlumot va nomuvofiqliklar bartaraf etilganini tasdiqlovchi hujjatlarni qabul qilgan sanadan boshlab oʻn ish kuni mobaynida baholash ishlarini bajargan baholash guruhi tomonidan akkreditatsiya obyekti yoki akkreditatsiyadan oʻtkazilgan subyektda nomuvofiqliklar amalda bartaraf etilgan holatini zarur boʻlsa, joyning oʻziga borgan holda oʻrganishni taʼminlaydi.

Taqdim etilgan maʼlumot va tasdiqlovchi hujjatlar nomuvofiqliklarni bartaraf etish uchun yetarli boʻlmasa, Markaz nomuvofiqliklarni bartaraf etishga berilgan muddat doirasida qoʻshimcha maʼlumot soʻrashga haqli.

25. Baholash guruhi nomuvofiqliklarning amalda bartaraf etilgan holatini oʻrganish natijalari boʻyicha yakuniy hisobotni rasmiylashtiradi va uch ishi kuni mobaynida Markazga taqdim etadi.

26. Markaz hisobotni qabul qilgan sanadan boshlab besh ish kuni mobaynida akkreditatsiya komissiyasi majlisida uning koʻrib chiqilishini taʼminlaydi. Akkreditatsiya komissiyasi tarkibi Markaz direktorining buyrugʻi bilan tasdiqlanadi.

27. Quyidagilar akkreditatsiyani rad etish toʻgʻrisida qaror qabul qilish uchun asos hisoblanadi:

akkreditatsiyadan oʻtkazish tartibida belgilangan barcha zarur hujjatlar va maʼlumotlar taqdim etilmaganda;

akkreditatsiya obyekti tomonidan koʻrsatilgan maʼlumotlarda notoʻgʻri maʼlumot mavjudligi;

akkreditatsiya obyektining akkreditatsiya natijalariga koʻra ariza berilgan akkreditatsiya sohasidagi muvofiqlikni baholash ishlarini bajarishga vakolatliligi tasdiqlanmagan taqdirda;

aniqlangan nomuvofiqliklarni belgilangan muddatlarda bartaraf etmaslik.

Akkreditatsiyani rad etish toʻgʻrisida boshqa asoslar, shu jumladan, maqsadga muvofiqsizlik sabablari boʻyicha qaror qabul qilishga yoʻl qoʻyilmaydi.

Mazkur bandning uchinchi xatboshisiga muvofiq akkreditatsiya obyekti tomonidan taqdim etilgan haqiqiy holatlar toʻgʻrisidagi hujjatlar va maʼlumotlar aksi isbotlanmaguniga qadar ishonchli hisoblanadi.

Markazda taqdim etilgan hujjatlar va maʼlumotlar haqiqiyligiga shubha paydo boʻlgan taqdirda, akkreditatsiya obyektidan qoʻshimcha maʼlumotlarni talab etmagan holda, Markaz ularning ishonchliligini mustaqil ravishda va oʻz hisobidan tekshirish uchun choralar koʻradi.

28. Akkreditatsiya komissiyasi tomonidan ijobiy qaror qabul qilinsa, Markaz va akkreditatsiya obyekti oʻrtasida akkreditatsiyadan keyingi shartnoma tuziladi.

Akkreditatsiyadan keyingi shartnomada quyidagilar aks ettiriladi:

Markaz va akkreditatsiyadan oʻtkazilgan subyekt oʻrtasidagi oʻzaro munosabatlar, shu jumladan, guvohlik baholash, muvofiqlikni baholash ishlari yakunlangandan keyingi ularning natijadorligini oʻrganish va ogohlantirishsiz tashrif orqali baholab borish, muvofiqlikni baholash ishlarining bajarilishi yuzasidan oʻz faoliyati toʻgʻrisida axborot taqdim etish shartlari hamda tomonlarning huquqlari, majburiyatlari va javobgarligi;

akkreditatsiya belgisini qoʻllash shartlari va Milliy akkreditatsiya tizimi reyestri raqamidan foydalanish;

akkreditatsiya qilingan subyektni davriy baholashni amalga oshirish shartlari.

29. Markaz oʻzining rasmiy veb-saytida Milliy akkreditatsiya tizimi reyestri (keyingi oʻrinlarda — reyestr), shuningdek, baholovchilar va texnik ekspertlar roʻyxatini yuritadi.

Reyestr Markaz tomonidan shakllantiriladi va yuritiladi.

Reyestr tanishish uchun ochiq hisoblanadi.

Reyestrni shakllantirish va yuritish tartibi Markaz tomonidan belgilanadi.

30. Markaz va akkreditatsiya qilingan subyekt oʻrtasida akkreditatsiyadan keyingi shartnoma imzolangandan soʻng, akkreditatsiya toʻgʻrisidagi guvohnoma QR-kod (matrik shtrixli kod) qoʻyilgan holda elektron shaklda shakllantirilib, besh yil muddatga beriladi hamda akkreditatsiyadan oʻtkazilgan subyektning YIDXP yoxud axborot tizimidagi shaxsiy kabinetiga yuboriladi.

Akkreditatsiya toʻgʻrisidagi guvohnoma reyestrda davlat tilida yuritiladi va tanishish uchun ochiq hisoblanadi.

Akkreditatsiya toʻgʻrisidagi guvohnoma akkreditatsiyadan oʻtkazilgan subyektning yozma soʻroviga asosan ingliz yoki rus tiliga tarjima qilingan holda qogʻoz shaklida asliga toʻgʻriligini tasdiqlovchi muhr bosilib taqdim etilishi mumkin.

31. Akkreditatsiyadan oʻtkazilgan subyektlar oʻzining faqat akkreditatsiya sohasi tatbiq etiladigan muvofiqlikni baholash ishlariga nisbatan akkreditatsiyadan oʻtkazilganligi toʻgʻrisida akkreditatsiya belgisini va (yoki) Milliy akkreditatsiya tizimi reyestrida roʻyxatdan oʻtkazilgan raqamiga havola (keyingi oʻrinlarda — matnli havola) toʻgʻri va haqqoniy qoʻllanishiga hamda oʻtkazilgan muvofiqlikni baholash ishlari ishonchliligiga javobgardir.

32. Akkreditatsiya komissiyasi salbiy qaror qabul qilganda, Markaz akkreditatsiyani rad etish toʻgʻrisidagi qaror qabul qilingan sanadan boshlab uch ish kuni mobaynida akkreditatsiya obyektiga yoki akkreditatsiyadan oʻtkazilgan subyektga YIDXP yoxud axborot tizimi orqali bu toʻgʻrisida xabarnoma yuboradi.

Buyurtma Davlat xizmatlari markazi orqali berilganda rad etish toʻgʻrisidagi qaror haqidagi xabarnoma akkreditatsiya obyekti yoki akkreditatsiyadan oʻtkazilgan subyektning elektron pochta manziliga yuboradi.

33. Akkreditatsiya obyekti yoki akkreditatsiyadan oʻtkazilgan subyekt akkreditatsiya komissiyasining akkreditatsiyadan oʻtkazishni rad etish toʻgʻrisidagi qarori ustidan Markaz huzuridagi apellyatsiya komissiyasiga yoki sud tartibida shikoyat qilish huquqiga ega.

34. Akkreditatsiyadan oʻtkazilgan subyekt akkreditatsiya toʻgʻrisidagi guvohnomaning amal qilish muddati tugashidan kamida toʻrt oy oldin takroriy akkreditatsiyaga buyurtma taqdim etishi kerak.

Agar akkreditatsiyadan oʻtkazilgan subyekt vakolatini baholashga qoʻyiladigan talablarni tartibga soluvchi standartlar yangi qabul qilinsa, akkreditatsiyadan oʻtkazilgan subyektda oʻtkazilgan baholashning ijobiy natijasi bilan akkreditatsiya toʻgʻrisidagi guvohnoma amaldagi akkreditatsiya muddatiga qayta rasmiylashtiriladi.

35. Ushbu Reglamentning 34-bandiga asosan takroriy akkreditatsiya basharti akkreditatsiyadan oʻtkazilgan subyekt akkreditatsiyaning amal qilish muddati tugashidan kamida toʻrt oy oldin ariza bergan boʻlsa, ushbu subyektning avvalgi faoliyati natijalari hisobga olingan holda, mazkur Reglamentning 3-bobida belgilangan tartibda oʻtkaziladi.

Bunda tegishli xalqaro standart talablari boʻyicha avval baholangan amaldagi menejment tizimiga va akkreditatsiya sohasiga oʻzgartirishlar kiritmaganligi yuzasidan maʼlumotlar taqdim etilganda, takroriy akkreditatsiyadan oʻtkazish mazkur Reglamentning 8-bandida nazarda tutilgan hujjatlarni ekspertizadan oʻtkazmasdan, joyining oʻzida baholash ishlari amalga oshiriladi.

Agar takroriy akkreditatsiya oʻtkazish natijasida akkreditatsiyadan oʻtkazilgan subyektda akkreditatsiya talablari va shartlariga nomuvofiqlik aniqlansa, uning akkreditatsiya toʻgʻrisidagi guvohnomasining amal qilishi ushbu Reglamentning 48-bandida belgilangan muddatga, biroq akkreditatsiya toʻgʻrisidagi guvohnomani amal qilish muddatini inobatga olgan holda toʻxtatilishi lozim.

4-bob. Akkreditatsiya sohasini kengaytirish va qisqartirish

36. Akkreditatsiya sohasini kengaytirish ishlari akkreditatsiyadan oʻtkazilgan subyekt arizasi boʻyicha ushbu Reglamentning 7 — 26, 32 — 33-bandlarida nazarda tutilgan tartibda amalga oshiriladi.

37. Akkreditatsiyadan oʻtkazilgan subyektning akkreditatsiya sohasi akkreditatsiya komissiyasining qarori bilan quyidagilar asosida qisqartiriladi:

akkreditatsiyadan oʻtkazilgan subyektning akkreditatsiya sohasini qisqartirish toʻgʻrisidagi arizasiga koʻra;

akkreditatsiyadan oʻtkazilgan subyekt faoliyatini davriy baholash natijalariga koʻra;

guvohlik baholashga yoki muvofiqlikni baholash boʻyicha koʻnikmalarni namoyish qilishni kuzatishga sharoit yaratilmaganda (sharoit yaratilmagan soha yoʻnalishiga nisbatan).

38. Akkreditatsiya sohasi qisqartirilsa, Markaz tomonidan akkreditatsiyadan oʻtkazilgan subyektning akkreditatsiya sohasiga tegishli oʻzgartirishlar kiritiladi.

5-bob. Davriy baholash

39. Davriy baholash ishlari akkreditatsiyadan keyingi shartnoma asosida ushbu Reglamentga 2-ilovada keltirilgan sxemaga muvofiq joyning oʻziga borib amalga oshiriladi.

Birinchi davriy baholash ishlari akkreditatsiya sanasidan keyin oʻn ikki oydan kechikmay oʻtkaziladi. Keyingi davriy baholash ishlari har chorak uchun oldindan Markaz rahbari tomonidan tasdiqlanadigan davriy baholash reja-jadvaliga muvofiq davriy, biroq avvalgi davriy baholash ishlari oʻtkazilgan vaqtdan boshlab yigirma toʻrt oydan kechikmay (mahsulotni sertifikatlash organlari uchun oʻn ikki oydan kechikmay) oʻtkaziladi.

40. Yigirma toʻrt oy davriylik muddati quyidagi shartlar bajarilsa belgilanadi:

avvalgi davriy baholash natijalariga koʻra akkreditatsiya toʻgʻrisidagi guvohnoma amal qilishi toʻxtatilmagan boʻlsa;

akkreditatsiyadan oʻtkazilgan qilingan subyekt faoliyati boʻyicha shikoyatlar boʻlmagan boʻlsa;

akkreditatsiyadan oʻtkazilgan subyekt faoliyati boʻyicha oʻtkazilgan monitoring ijobiy natijalar bergan boʻlsa.

41. Akkreditatsiya qilingan subyekt faoliyati boʻyicha rejadan tashqari davriy baholash akkreditatsiya talablari va shartlari, shu jumladan, akkreditatsiya belgisidan foydalanish buzilganligi toʻgʻrisida hujjatlar bilan tasdiqlangan yozma murojaat Markazga tushganda, akkreditatsiyadan oʻtkazilgan subyektdan haq undirilmagan va baholash rejasi kelishilmagan holda bajariladi.

42. Davriy baholash ishlarini bajarish ushbu Reglamentning 14 — 18, 20-bandlariga muvofiq tartibda bajariladi.

Davriy baholash davomida Markaz akkreditatsiyadan oʻtkazilgan subyektlar tomonidan akkreditatsiya belgisini va (yoki) matnli havolalarni qoʻllashning toʻgʻriligini ham oʻrganadi. Akkreditatsiyadan oʻtkazilgan subyektlar tomonidan akkreditatsiya belgisini qoʻllash qoidalari Markaz tomonidan ISO/IEC 17011 xalqaro standarti talablariga muvofiq belgilanadi.

43. Baholash guruhi uch ish kuni mobaynida Markazga bajarilgan davriy baholash ishlari toʻgʻrisida hisobot taqdim etishi kerak.

44. Markaz davriy baholash ishlari toʻgʻrisidagi hisobotni qabul qilgandan keyin besh ish kuni mobaynida uning akkreditatsiya komissiyasi majlisida koʻrib chiqilishini taʼminlaydi.

Akkreditatsiya komissiyasi:

akkreditatsiya toʻgʻrisidagi guvohnomaning amal qilishini tasdiqlash;

akkreditatsiya toʻgʻrisidagi guvohnomaning amal qilishini toʻxtatib turish;

akkreditatsiya toʻgʻrisidagi guvohnomaning amal qilishini tugatish;

akkreditatsiya sohasini qisqartirish (oxirgi baholash ishlari davomida aniqlangan nomuvofiqliklar takroran aniqlanganda, nomuvofiqliklarga takroran yoʻl qoʻyilgan soha akkreditatsiya sohasidan chiqariladi);

komissiya aʼzolarining katta qismi baholash guruhi hisobotiga qoʻshilmagan taqdirda, akkreditatsiyadan oʻtkazilgan subyektning akkreditatsiya talablari va shartlariga muvofiqligini haq olmasdan qoʻshimcha baholash toʻgʻrisida qaror qabul qiladi.

Akkreditatsiya komissiyasining qarori u qabul qilingandan keyin akkreditatsiyadan oʻtkazilgan subyektga bir ish kunidan kechikmay yetkaziladi.

45. Akkreditatsiya toʻgʻrisidagi guvohnomaning amal qilishini toʻxtatib turish (tiklash) yoki tugatish ushbu Reglamentning 6-7-boblarida belgilangan tartibda amalga oshiriladi.

46. Akkreditatsiya komissiyasining akkreditatsiya toʻgʻrisidagi guvohnomaning amal qilishini toʻxtatib turish yoki tugatish haqidagi qarori yuzasidan Markaz huzuridagi apellyatsiya komissiyasiga yoki sud tartibida shikoyat qilish mumkin.

6-bob. Akkreditatsiya toʻgʻrisidagi guvohnomaning amal qilishini toʻxtatib turish (tiklash)

47. Akkreditatsiya toʻgʻrisidagi guvohnomaning amal qilishi Markaz tomonidan akkreditatsiya komissiyasi qaroriga koʻra quyidagi hollarda toʻxtatib turilishi mumkin:

akkreditatsiyadan oʻtkazilgan subyekt akkreditatsiya toʻgʻrisidagi guvohnomaning amal qilishini aniq sabablarini koʻrsatgan holda bir kalendar yil ichida bir marotaba toʻxtatib turish haqidagi ariza bilan murojaat qilganida (davriy baholash reja-jadvaliga kiritilgan holatlar bundan mustasno);

akkreditatsiya talablari va shartlari buzilishi aniqlanganda;

akkreditatsiyadan oʻtkazilgan subyekt tomonidan akkreditatsiyadan keyingi shartnoma qoidalariga rioya etilmaganda.

48. Akkreditatsiya toʻgʻrisidagi guvohnomaning amal qilishi toʻrt oydan oshmaydigan muddatda toʻxtatib turiladi.

Akkreditatsiya toʻgʻrisidagi guvohnomaning amal qilishini toʻxtatib turish toʻgʻrisidagi maʼlumot qaror qabul qilingan kundan boshlab bir ish kunidan kechikmay, reyestrda qayd etiladi va akkreditatsiya qilingan subyektga yozma ravishda xabar yuboriladi.

Akkreditatsiya toʻgʻrisidagi guvohnomaning amal qilishi akkreditatsiya komissiyasining qabul qilgan qarori toʻgʻrisida maʼlumot reyestrda qayd etilgan sanadan boshlab toʻxtatib turiladi.

Akkreditatsiya qilingan subyekt akkreditatsiya toʻgʻrisidagi guvohnomaning amal qilishi tiklangunga qadar akkreditatsiya belgisi va (yoki) matnli havolani qoʻllashi taqiqlanadi.

49. Akkreditatsiya toʻgʻrisidagi guvohnoma ushbu Reglament 47-bandining:

a) ikkinchi xatboshisiga muvofiq toʻxtatilganda, akkreditatsiyadan oʻtkazilgan subyekt guvohnoma amal qilishini tiklash uchun uning amal qilishi toʻxtatib turilishiga sabab boʻlgan holatlarni bartaraf etilgani yuzasidan tasdiqlovchi hujjatlarni ilova qilgan holda, Markazga yozma murojaat qilishi va uni oʻrganib chiqish uchun shart-sharoit yaratib berishi lozim.

Markaz taqdim etilgan hujjatlar asosida guvohnomaning toʻxtatib turilishiga sabab boʻlgan holatlarni zarur boʻlsa, joyning oʻzga borgan holda oʻrganadi va uning natijalari boʻyicha akkreditatsiya toʻgʻrisidagi guvohnomani amal qilishini akkreditatsiya komissiyasi qaroriga koʻra tiklaydi.

Agar oʻrganish natijalariga koʻra akkreditatsiyadan oʻtkazilgan subyekt tomonidan akkreditatsiya talablari va shartlariga rioya qilmaslik holatlari aniqlansa yoki oʻrganish uchun shart-sharoit yaratib berilmasa, Markaz akkreditatsiya komissiyasi qaroriga koʻra akkreditatsiya toʻgʻrisidagi guvohnomaning amal qilishini tiklashni rad etadi hamda ularni bartaraf etish uchun ushbu Reglamentning 48-bandi birinchi xatboshisida koʻrsatilgan muddatni beradi. Bunda akkreditatsiyadan oʻtkazilgan subyekt mazkur bandning b) kichik bandida belgilangan tartibga koʻra tegishli choralar koʻradi;

b) uchinchi va toʻrtinchi xatboshlarga muvofiq toʻxtatilganda, akkreditatsiyadan oʻtkazilgan subyekt nomuvofiqliklarni bartaraf etish boʻyicha harakatlar rejasini ishlab chiqadi va Markazga taqdim etadi.

Mazkur bandning a) va b) kichik bandlariga koʻra, akkreditatsiya toʻgʻrisidagi guvohnomaning amal qilishi toʻxtatib turilishiga sabab boʻlgan holatlarni bartaraf etish muddati akkreditatsiya komissiyasining qaroriga asosan Markaz tomonidan belgilangan muddatdan oshmasligi kerak.

50. Akkreditatsiyadan oʻtkazilgan subyekt tomonidan harakatlar rejasini bajarish haqidagi maʼlumot va nomuvofiqliklar bartaraf etilganini tasdiqlovchi hujjatlar belgilangan muddatda taqdim etilmasa, baholash guruhi rahbari Markazga akkreditatsiya toʻgʻrisidagi guvohnomaning amal qilishini tugatish kerakligi xususida bildirgi taqdim etadi.

51. Nomuvofiqliklarning bartaraf etilgan holatlari ushbu Reglamentning 24-25-bandlariga muvofiq oʻrganiladi.

52. Markaz baholash guruhi tomonidan yakuniy hisobot taqdim etilgandan soʻng besh ish kuni mobaynida tegishli qaror qabul qilish uchun akkreditatsiya komissiyasining majlisida uning koʻrib chiqilishini taʼminlaydi.

53. Akkreditatsiya komissiyasining qarori u qabul qilingan kundan eʼtiboran uch ish kundan kechikmay, Markaz tomonidan akkreditatsiyadan oʻtkazilgan subyektga yetkaziladi.

54. Akkreditatsiya toʻgʻrisidagi guvohnomaning amal qilishini toʻxtatib turish va tiklash haqidagi maʼlumotlar reyestrda qayd etilishi lozim.

7-bob. Akkreditatsiya toʻgʻrisidagi guvohnomaning amal qilishini tugatish

55. Akkreditatsiya toʻgʻrisidagi guvohnomaning amal qilishi quyidagi hollarda tugatilishi mumkin:

akkreditatsiyadan oʻtkazilgan subyekt akkreditatsiya toʻgʻrisidagi guvohnomaning amal qilishini tugatish haqida ariza bilan murojaat qilsa (baholash jarayonida yoki baholash guruhining hisoboti rasmiylashtirilgandan soʻng ariza taqdim etish holatlari bundan mustasno);

yuridik shaxs (akkreditatsiyadan oʻtkazilgan subyekt) tugatilsa;

akkreditatsiyadan oʻtkazilgan subyekt tomonidan guvohnoma amal qilishining toʻxtatib turilishiga sabab boʻlgan holatlar Markaz tomonidan belgilangan muddatda bartaraf etilmasa;

akkreditatsiya sohasi buzilsa;

guvohnoma soxta hujjatlar va maʼlumotlardan foydalangan holda olingani aniqlangan boʻlsa;

ushbu Reglamentning 48-bandiga asosan akkreditatsiya toʻgʻrisidagi guvohnomaning amal qilishi toʻxtatilgan davrda, akkreditatsiya belgisi va (yoki) matnli havola qoʻllanganlik holatlari aniqlanganda.

56. Akkreditatsiya toʻgʻrisidagi guvohnomaning amal qilishi akkreditatsiya komissiyasining qaroriga koʻra Markaz tomonidan tugatiladi.

Akkreditatsiya toʻgʻrisidagi guvohnomaning amal qilishini tugatish toʻgʻrisidagi maʼlumot qaror qabul qilingan kundan boshlab bir ish kunidan kechikmay reyestrda qayd etiladi va akkreditatsiyadan oʻtkazilgan subyektga yozma ravishda xabar yuboriladi.

Akkreditatsiya toʻgʻrisidagi guvohnomasining amal qilishi akkreditatsiya komissiyasining qabul qilingan qarori haqidagi maʼlumot reyestrda qayd etilgan sanadan boshlab tugatiladi.

Ushbu Reglament 55-bandning toʻrtinchi — yettinchi xatboshilariga muvofiq akkreditatsiya toʻgʻrisidagi guvohnomaning amal qilishi tugatilganda, shuningdek, 44-bandning oltinchi xatboshisiga asosan akkreditatsiya sohasi qisqartirilganda akkreditatsiya uchun takroriy ariza bu haqida tegishli qaror qabul qilingan sanadan kamida olti oydan keyin beriladi.

57. Akkreditatsiya toʻgʻrisidagi guvohnomaning amal qilishini tugatish haqidagi maʼlumotlar Reyestrda qayd etilishi lozim.

8-bob. Akkreditatsiya belgisidan foydalanishning monitoringini amalga oshirish

58. Akkreditatsiya belgisidan foydalanish monitoringi akkreditatsiyadan oʻtkazilgan subyektlar tomonidan akkreditatsiya belgisidan va (yoki) matnli havolalardan foydalanish qoidalariga rioya qilishning holatini oʻrganish asosida akkreditatsiyadan keyingi shartnomaga asosan amalga oshiriladi.

Monitoring:

Markaz tomonidan akkreditatsiyadan oʻtkazilgan subyektlardan vaqti-vaqti bilan soʻraladigan akkreditatsiyadan oʻtkazilgan sohada ularning faoliyati toʻgʻrisidagi axborot;

isteʼmolchilarning akkreditatsiyadan oʻtkazilgan subyektlari xizmatlari sifatidan qoniqishi toʻgʻrisidagi soʻrov natijalarini isteʼmolchilar bilan qayta aloqa orqali;

Markazning soʻrovi boʻyicha nazorat organlari tomonidan taqdim etiladigan maʼlumotlarni tahlil qilish orqali amalga oshiriladi.

59. Monitoring natijalari boʻyicha Markaz uch ish kuni mobaynida akkreditatsiyadan oʻtkazilgan subyektlarni ular tomonidan tegishli choralar koʻrish uchun monitoring natijalari toʻgʻrisida xabardor qiladi.

Bunda monitoring natijalari boʻyicha Markaz tomonidan akkreditatsiyadan oʻtkazilgan subyektlarga nisbatan biron-bir chora koʻrilishiga yoʻl qoʻyilmaydi.

Monitoring natijalaridan davriy baholash davomida foydalanilishi mumkin.

9-bob. Markaz xizmatlariga haq toʻlash tartibi

60. Markaz tomonidan akkreditatsiya sohasidagi quyidagi xizmatlar uchun haq undiriladi:

hujjatlar ekspertizasi uchun;

akkreditatsiya obyekti yoki akkreditatsiyadan oʻtkazilgan subyektni baholash uchun (shu jumladan, guvohlik baholash, muvofiqlikni baholash ishlari yakunlangandan keyingi ularning natijadorligini oʻrganish);

tasdiqlangan reja-jadvalga muvofiq akkreditatsiyadan oʻtkazilgan subyektni davriy baholash uchun;

akkreditatsiya sohasini dolzarblashtirish uchun.

Akkreditatsiya obyekti yoki akkreditatsiyadan oʻtkazilgan subyektlar tomonidan akkreditatsiya sohasidagi Markaz xizmatlariga ularning natijalaridan qatʼi nazar haq toʻlanadi.

61. Markaz tomonidan akkreditatsiya sohasidagi quyidagi xizmat turlari boʻyicha haq undirilmaydi:

arizalar tahlili uchun;

oldin berilgan (amaldagi) akkreditatsiya toʻgʻrisidagi guvohnomani qayta rasmiylashtirish;

akkreditatsiya toʻgʻrisidagi guvohnomaning amal qilishini toʻxtatib turish (tiklash) yoki tugatish;

akkreditatsiya sohasini qisqartirish;

akkreditatsiyadan oʻtkazilgan subyekt faoliyatini rejadan tashqari davriy baholashni va ogohlantirishsiz tashrifni amalga oshirish;

ushbu Reglamentning 69-bandi uchinchi va toʻrtinchi xatboshilarida nazarda tutilgan materiallar dolzarblashtirilgani uchun.

62. Ushbu Reglamentda nazarda tutilgan xizmatlar uchun toʻlovlar Markazning sarflangan vaqt va xizmat safarlari xarajatlaridan kelib chiqqan holda belgilanadi.

Sarflangan vaqtni hisoblab chiqish metodikasi Markaz tomonidan belgilanadi va uning rasmiy veb-saytiga joylashtiriladi.

63. Muvofiqlikni baholash organlari tomonidan akkreditatsiya sohasida koʻrsatilgan pulli xizmatlar tushumidan ajratmalar 2 foiz miqdorida belgilanadi hamda toʻliqligicha Markazga oʻtkaziladi.

Ajratma hajmi toʻgʻrisidagi maʼlumotlar Markaz tomonidan masofaviy oʻrganib boriladi hamda ularning haqqoniyligi tasdiqlanmagan holatlar akkreditatsiyadan keyingi shartnoma qoidalariga rioya etilmaslik deb baholanadi.

10-bob. Akkreditatsiya toʻgʻrisidagi guvohnomani qayta rasmiylashtirish

64. Akkreditatsiyadan oʻtkazilgan subyekt qayta tashkil etilsa, uning nomi, yuridik manzili yoki joylashgan joyi (pochta manzili) oʻzgarsa, yigirma ish kuni mobaynida mazkur oʻzgartishlar haqida oldin berilgan (amaldagi) akkreditatsiya toʻgʻrisidagi guvohnomaning asl nusxasini ilova qilib, uni qayta rasmiylashtirish uchun Markazni yozma ravishda xabardor qilishi kerak.

65. Agar akkreditatsiyadan oʻtkazilgan subyekt ilgari akkreditatsiyadan oʻtkazilgan akkreditatsiya obyektining huquqiy vorisi boʻlmasa, hujjatlarni koʻrib chiqish bilan bogʻliq keyingi tartib-taomillar ushbu Reglamentning 3-bobida nazarda tutilgan tartibda oʻtkaziladi.

66. Akkreditatsiyadan oʻtgan mahsulotlar, xizmatlar, menejment tizimlari, xodimlarni sertifikatlash organi va inspeksiya organining nomi yoki joylashgan joyi (pochta manzili) oʻzgarsa, yangi akkreditatsiya toʻgʻrisidagi guvohnoma akkreditatsiya oʻtkazilmay, amaldagi akkreditatsiya muddatiga rasmiylashtiriladi.

67. Akkreditatsiyadan oʻtkazilgandan sinov, kalibrlash va tibbiy laboratoriya (markazi) joylashgan joy oʻzgarsa, xabarnoma kelib tushgandan keyin Markazning buyrugʻi bilan tayinlangan masʼul guruh tomonidan ushbu akkreditatsiyadan oʻtkazilgan subyektlarni baholash maqsadida bir ish kunida ogohlantirishsiz tashrifning ijobiy natijasiga asosan akkreditatsiya toʻgʻrisidagi guvohnoma amaldagi akkreditatsiya muddatiga qayta rasmiylashtiriladi.

68. Yangi akkreditatsiya toʻgʻrisidagi guvohnoma Markaz tomonidan uch ish kuni mobaynida rasmiylashtiriladi.

11-bob. Akkreditatsiyadan oʻtkazilgan subyektning materiallarini dolzarblashtirish

69. Akkreditatsiyadan oʻtkazilgan subyekt materiallari quyidagi hollarda dolzarblashtiriladi:

akkreditatsiyadan oʻtkazilgan subyektning akkreditatsiya sohasida koʻrsatilgan texnik reglament va standartlar oʻrniga yangisi amalga kiritilsa, ularga oʻzgartishlar, qoʻshimchalar kiritilsa (qabul qilinayotgan normativ hujjatda mahsulotlarning yangi turlari, sinash (oʻlchash) usullari koʻrsatilgan hollar bundan mustasno);

sifat boʻyicha qoʻllanmaga va menejment tizimi tartib-tamoyil hujjatlariga oʻzgartirishlar kiritilsa;

akkreditatsiyadan oʻtkazilgan subyekt xodimlarining tarkibi oʻzgarsa.

70. Akkreditatsiya materiallari dolzarblashtirilsa, akkreditatsiyadan oʻtkazilgan subyektlar buning sabablarini koʻrsatgan holda, oʻzgartirishlar kiritilgan hujjatlarni, shuningdek, kiritilayotgan oʻzgartirishlar yuzasidan qiyosiy tahlilni ilova qilib, Markazga ariza taqdim etadi.

71. Markaz oʻn besh ish kuni mobaynida taqdim etilgan hujjatlarni koʻrib chiqadi va avval tasdiqlangan hujjatlarga tegishli oʻzgartirishlar kiritadi. Ushbu Reglamentning 69-bandi ikkinchi xatboshisiga muvofiq materiallar dolzarblashtirilgan taqdirda, akkreditatsiyadan oʻtkazilgan subyektning akkreditatsiya sohasi yangi tahrirda tasdiqlanadi.

12-bob. Apellyatsiyalarni koʻrib chiqish

72. Akkreditatsiya obyekti yoki akkreditatsiyadan oʻtkazilgan subyekt akkreditatsiya yoki davriy baholash natijalari boʻyicha akkreditatsiya komissiyasining unga nisbatan salbiy qarori chiqarilsa, akkreditatsiya komissiyasining qarori qabul qilingan sanadan boshlab oʻttiz kalendar kuni mobaynida Markazga yozma shaklda apellyatsiya berish huquqiga ega.

73. Apellyatsiya komissiyasi har bir apellyatsiyani koʻrib chiqish uchun zaruratga koʻra shakllantiriladi. Apellyatsiya komissiyasi tarkibi Markaz direktorining buyrugʻi bilan tasdiqlanadi. Apellyatsiya komissiyasi tarkibini shakllantirish va tasdiqlash muddatlari apellyatsiya olingan kundan boshlab uch kundan ortiq boʻlmasligi kerak.

74. Apellyatsiya komissiyasining tarkibi baholovchilar, jalb qilinadigan texnik ekspertlar, shu jumladan, xalqaro ekspertlar orasidan apellyatsiya bergan akkreditatsiya obyektini yoki akkreditatsiyadan oʻtkazilgan subyektni baholashda ishtirok etmagan va akkreditatsiya komissiyasi tarkibida boʻlmagan Markazning kamida uch vakilidan shakllantiriladi.

75. Markaz apellyatsiya bergan akkreditatsiya obyektini yoki akkreditatsiyadan oʻtkazilgan subyektni va baholash ishlarini bajargan guruh rahbarini apellyatsiya koʻrib chiqiladigan sana haqida xabardor qiladi. Apellyatsiya bergan akkreditatsiya obyekti yoki akkreditatsiyadan oʻtkazilgan subyekt vakili va guruh rahbari apellyatsiyani koʻrib chiqishda ishtirok etishlari mumkin.

76. Apellyatsiya komissiyasi berilgan apellyatsiyani koʻrib chiqadi va qabul qilingan qaror toʻgʻrisida akkreditatsiya obyektiga yoki akkreditatsiyadan oʻtkazilgan subyektga yozma ravishda maʼlum qiladi. Apellyatsiyani koʻrib chiqish muddati u berilgan sanadan boshlab oʻn kalendar kundan oshmasligi kerak.

77. Koʻrib chiqilgan apellyatsiya natijalari boʻyicha apellyatsiya komissiyasi quyidagi qarorlardan birini qabul qiladi:

akkreditatsiya komissiyasining qarorini oʻzgarishsiz qoldirish va apellyatsiyani qanoatlantirishni rad etish;

apellyatsiyani qanoatlantirish.

78. Akkreditatsiya komissiyasining qarorini oʻzgarishsiz qoldirish va apellyatsiyani qanoatlantirishni rad etish toʻgʻrisidagi qaror agar:

apellyatsiya ushbu Reglament talablari buzilgan holda taqdim etilgan boʻlsa;

apellyatsiyada keltirilgan sabablar tasdiqlanmasa qabul qilinadi.

79. Apellyatsiyani qanoatlantirish toʻgʻrisida qaror qabul qilinsa, Markaz tomonidan akkreditatsiya toʻgʻrisidagi guvohnomani berish yoki akkreditatsiya toʻgʻrisidagi guvohnomaning amal qilishini tasdiqlash haqida qaror qabul qilinadi.

80. Markaz ikki ish kunidan ortiq boʻlmagan muddatda qabul qilingan qaror toʻgʻrisidagi xabarnomani apellyatsiya bergan akkreditatsiya obyektiga yoki akkreditatsiyadan oʻtkazilgan subyektga yozma shaklda yuboradi.

81. Aynan bir masala boʻyicha apellyatsiyani takroran berishga yoʻl qoʻyilmaydi.

82. Apellyatsiya komissiyasining qarori yuzasidan qonunchilikda belgilangan tartibda sudga shikoyati qilish mumkin.

13-bob. Yakunlovchi qoida

83. Ushbu Reglament talablari buzilishida aybdor boʻlgan shaxslar qonunchilik hujjatlariga muvofiq javob beradilar.

Muvofiqlikni baholash organlarini akkreditatsiyadan oʻtkazish boʻyicha davlat xizmatini koʻrsatishning maʼmuriy reglamentiga 1-ILOVA

Akkreditatsiyani oʻtkazish

SXEMASI

Muvofiqlikni baholash organlarini akkreditatsiyadan oʻtkazish boʻyicha davlat xizmatini koʻrsatishning maʼmuriy reglamentiga 2-ILOVA

Davriy baholash ishlarini bajarish

SXEMASI

Vazirlar Mahkamasining 2026-yil 30-iyundagi 349-son qaroriga 2-ILOVA

Oʻzbekiston Respublikasi Hukumatining oʻz kuchini yoʻqotgan deb hisoblanayotgan ayrim qarorlari

ROʻYXATI

1. Vazirlar Mahkamasining “Muvofiqlikni baholash organlarini akkreditatsiyadan oʻtkazish sohasidagi ishlarni takomillashtirishga doir qoʻshimcha chora-tadbirlar toʻgʻrisida” 2019-yil 24-apreldagi 349-son qarorining 3-bandi ikkinchi xatboshisi hamda qarorga 1-ilova.

2. Vazirlar Mahkamasining “Oʻzbekiston Respublikasi Investitsiyalar va tashqi savdo vazirligi huzuridagi Oʻzbekiston texnik jihatdan tartibga solish agentligi toʻgʻrisidagi va Oʻzbekiston texnik jihatdan tartibga solish agentligining Texnik jihatdan tartibga solish, standartlashtirish, sertifikatlashtirish va metrologiya sohasida davlat nazorati departamenti toʻgʻrisidagi nizomlarni tasdiqlash haqida” 2022-yil 11-martdagi 114-son qaroriga ilovaning 24-bandi “g” kichik bandi.

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasining “Normativ-huquqiy hujjatlar toʻgʻrisida” 2021-yil 20-apreldagi OʻRQ-682-sonli Qonuni)” 2022-yil 4-apreldagi 153-son qaroriga ilovaning 611-bandi.

4. Vazirlar Mahkamasining “Paxta mahsulotlarini sertifikatlash xizmatlarini koʻrsatish sohasiga xususiy sektor keng jalb qilinishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2023-yil 30-maydagi 223-son qaroriga ilovaning 3-bandi.

5. Vazirlar Mahkamasining “Texnik jihatdan tartibga solish sohasidagi davlat boshqaruvi takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2024-yil 1-iyuldagi 371-son qaroriga ilovaning 6-bandi “b” kichik bandi.

6. Vazirlar Mahkamasining “Oʻzbekiston Respublikasining “Muvofiqlikni baholash organlarini akkreditatsiya qilish toʻgʻrisida”gi Qonuni qabul qilinishi munosabati bilan Vazirlar Mahkamasining “Muvofiqlikni baholash organlarini akkreditatsiyadan oʻtkazish sohasidagi ishlarni takomillashtirishga doir qoʻshimcha chora-tadbirlar toʻgʻrisida” 2019-yil 24-apreldagi 349-son qaroriga oʻzgartirish va qoʻshimchalar kiritish haqida” 2024-yil 2-iyuldagi 372-son qaroriga ilovaning 3-bandi.

7. Vazirlar Mahkamasining “Oʻzbekiston Respublikasida mahsulotlarni ishlab chiqarish va xizmatlar koʻrsatishda texnologik jarayonlarni ekologik sertifikatlash tizimini joriy etish toʻgʻrisida” 2025-yil 15-apreldagi 230-son qarorining 7-bandi.

8. Vazirlar Mahkamasining “Muvofiqlikni baholash organlarini akkreditatsiyadan oʻtkazish tartibi toʻgʻrisidagi nizomga oʻzgartirishlar kiritish haqida” 2025-yil 22-iyuldagi 456-son qaroriga ilova.