Payariq davlat oʻrmon xoʻjaligi faoliyatini tashkil etish hamda oʻrmon fondi yerlarini kengaytirish chora-tadbirlari toʻgʻrisida (344-son)
30.06.2026
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Oʻzbekiston Respublikasida oʻrmon xoʻjaligi tizimini 2030-yilgacha rivojlantirish konsepsiyasini tasdiqlash toʻgʻrisida” 2020-yil 6-oktabrdagi PQ-4850-son qarori ijrosini taʼminlash, shuningdek, oʻrmonlar hududlarini kengaytirish, ulardan samarali foydalanish va choʻllanishga qarshi kurashish maqsadida Vazirlar Mahkamasi qaror qiladi:
1. Ekologiya va iqlim oʻzgarishi milliy qoʻmitasi, Qishloq xoʻjaligi vazirligi, Jizzax, Qashqadaryo, Samarqand va Sirdaryo viloyatlari hokimliklarining quyidagi takliflari maʼqullansin:
davlat muassasasi shaklidagi Payariq davlat oʻrmon xoʻjaligini tashkil etish;
Jizzax, Qashqadaryo, Samarqand va Sirdaryo viloyatlaridagi oʻrmon hududlari va oʻrmon bilan qoplangan maydonlarni kengaytirish.
2. Quyidagilar:
Payariq davlat oʻrmon xoʻjaligiga doimiy foydalanish huquqi asosida beriladigan yer uchastkalari roʻyxati 1-ilovaga muvofiq;
Jizzax, Qashqadaryo, Samarqand va Sirdaryo viloyatlaridagi davlat oʻrmon xoʻjaliklariga doimiy foydalanish huquqi asosida beriladigan yer uchastkalari roʻyxati 2-ilovaga muvofiq tasdiqlansin.
3. Jizzax, Qashqadaryo, Samarqand va Sirdaryo viloyatlari hokimliklari Qishloq xoʻjaligi vazirligi, Ekologiya va iqlim oʻzgarishi milliy qoʻmitasi, Urbanizatsiya va uy-joy bozorini barqaror rivojlantirish milliy qoʻmitasi huzuridagi Kadastr agentligi bilan birgalikda ikki oy muddatda ushbu qarorga 1 va 2-ilovalarga muvofiq qishloq xoʻjaligiga moʻljallangan yerlarni oʻrmon fondi yerlari toifasiga oʻtkazish toʻgʻrisida Qishloq xoʻjaligiga moʻljallangan va oʻrmon fondi yerlarining yer fondi toifalarini oʻzgartirish masalalarini koʻrib chiqish boʻyicha Hukumat komissiyasiga taklif kiritilishini hamda yer uchastkalari doimiy foydalanish huquqi asosida ajratilishini taʼminlasin.
4. Urbanizatsiya va uy-joy bozorini barqaror rivojlantirish milliy qoʻmitasi huzuridagi Kadastr agentligi ushbu qarorga 1 va 2-ilovalarga muvofiq yer uchastkalarining yer fondi toifalari belgilangan tartibda oʻzgartirilgach, bir oy muddatda Yer resurslarining holati toʻgʻrisidagi milliy hisobotga tegishli oʻzgartirishlar kiritsin.
5. Belgilansinki, Payariq davlat oʻrmon xoʻjaligi faoliyatini tashkil qilish bilan bogʻliq xarajatlar Samarqand viloyati mahalliy budjeti, budjetdan tashqari mablagʻlar hamda qonunchilik hujjatlarida taqiqlanmagan boshqa manbalar hisobidan moliyalashtiriladi.
6. Ekologiya va iqlim oʻzgarishi milliy qoʻmitasi bir oy muddatda Payariq davlat oʻrmon xoʻjaligining tuzilmasi va shtatlar jadvalini belgilangan tartibda tasdiqlash hamda uni yuqori malakali mutaxassislar bilan toʻldirish choralarini koʻrsin.
7. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov zimmasiga hamda Ekologiya va iqlim oʻzgarishi milliy qoʻmitasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 30-iyun,
344-son
Vazirlar Mahkamasining 2026-yil 30-iyundagi 344-son qaroriga 1-ILOVA
Payariq davlat oʻrmon xoʻjaligiga doimiy foydalanish huquqi asosida beriladigan yer uchastkalari
ROʻYXATI
Vazirlar Mahkamasining 2026-yil 30-iyundagi 344-son qaroriga 2-ILOVA
Jizzax, Qashqadaryo, Samarqand va Sirdaryo viloyatlaridagi davlat oʻrmon xoʻjaliklariga doimiy foydalanish huquqi asosida beriladigan yer uchastkalari
ROʻYXATI