Saraton kasalliklarining oldini olish, erta aniqlash va davolash chora-tadbirlarini takomillashtirish toʻgʻrisida (PQ-238-son)

24.06.2026

OʻZBEKISTON RESPUBLIKASI PREZIDENTINING

QARORI

[Koʻchirma]

Respublikada saraton kasalliklarini erta aniqlash, tashxislash va davolash tizimini xalqaro standartlar asosida takomillashtirish, aholiga koʻrsatiladigan onkologik tibbiy xizmatlar sifati va samaradorligini oshirish, soha mutaxassislarining bilim va koʻnikmalarini rivojlantirish hamda tibbiyot muassasalarining moddiy-texnika bazasini mustahkamlash maqsadida qaror qilaman:

I. Maqsadlar

1. Quyidagilar saraton kasalliklariga qarshi kurashishning asosiy maqsadlari etib belgilansin:

(a) aholini eng koʻp uchraydigan (bachadon boʻyni, koʻkrak bezi, yoʻgʻon ichak, oshqozon, prostata bezi va oʻpka) saraton kasalliklari boʻyicha maqsadli tibbiy tekshiruvlar bilan qamrab olish koʻrsatkichini kamida 60 foizga yetkazish;

(b) aholi oʻrtasida eng koʻp uchraydigan saraton kasalliklarini birinchi-ikkinchi bosqichlarda aniqlash darajasini 30 foizdan 40 foizgacha oshirish;

(v) aholi oʻrtasida eng koʻp uchraydigan saraton kasalliklarini uchinchi-toʻrtinchi bosqichlarda aniqlash darajasini 65 foizdan 55 foizga kamaytirish;

(g) eng koʻp uchraydigan saraton kasalliklariga chalingan bemorlar orasida 5 yillik umr koʻrish davomiyligi koʻrsatkichini 35 foizdan kamida 45 foizga oshirish;

(d) har 100 ming nafar aholi oʻrtasida eng koʻp uchraydigan saraton kasalliklari tufayli oʻlimlarni 5,1 koʻrsatkichdan 3,7 ga qisqartirish;

(j) saraton kasalliklariga chalingan barcha bemorlarni zamonaviy texnologiyalar yordamida tashxislash va davolash bilan toʻliq qamrab olish.

II. Saratonga qarshi kurashish milliy dasturi

2. 2027-yil 1-yanvardan boshlab Jahon sogʻliqni saqlash tashkiloti va xalqaro ekspertlar ishtirokida ishlab chiqilgan Saratonga qarshi kurashish milliy dasturi (keyingi oʻrinlarda — Dastur) asosida aholi oʻrtasida oshqozon, yoʻgʻon ichak (kolorektal), oʻpka va prostata bezi saratoni kasalliklarini erta aniqlash va ularning oldini olish chora-tadbirlari 1-ilovaga muvofiq hududlarda bosqichma-bosqich amalga oshirilsin.

3. Quyidagilar Dasturning ustuvor vazifalari etib belgilansin:

(a) aholining saraton kasalliklari xavf omillari, dastlabki belgilari va oldini olish usullari toʻgʻrisidagi xabardorligini oshirish;

(b) saraton kasalliklarining oldini olish, erta aniqlash, tashxislash va davolash tizimini quyidagilar orqali takomillashtirish:

(i) birlamchi tibbiy-sanitariya yordami muassasalari tibbiyot xodimlarining onkologik hushyorligini oshirish, saraton kasalliklarining dastlabki belgilarini aniqlash va bemorlarni yoʻnaltirish boʻyicha malakasini mustahkamlash;

(ii) xalqaro tavsiyalarga muvofiq klinik qoʻllanmalarni qabul qilish, onkologiya yoʻnalishida multidissiplinar jamoaviy yondashuv (“Multidisciplinary Tumor Board”) tamoyilini joriy etish;

(iii) aholi oʻrtasida eng koʻp uchraydigan saraton kasalliklari boʻyicha erta tashxislash dasturlarini ishlab chiqish va bosqichma-bosqich joriy etish, shuningdek, tezkor tashxislash yoʻnalishlarini (“Rapid Diagnostic Pathway”) tatbiq etish;

(v) quyidagilar hisobiga koʻrsatilayotgan tibbiy yordam sifatini oshirish va oʻlim holatlarini kamaytirish:

(i) nur terapiyasi xizmatini modernizatsiya qilish, jumladan, kobalt qurilmalarini zamonaviy chiziqli tezlatkichlarga bosqichma-bosqich almashtirish va yuqori dozali braxiterapiya imkoniyatlarini kengaytirish;

(ii) Respublika ixtisoslashtirilgan onkologiya va radiologiya ilmiy-amaliy tibbiyot markazi (keyingi oʻrinlarda — Markaz) va uning hududiy filiallari diagnostik infratuzilmasini mustahkamlash, jumladan, patomorfologiya laboratoriyalarini modernizatsiya qilish va hududlararo molekulyar-genetik diagnostika markazlarini tashkil etish;

(iii) Jahon sogʻliqni saqlash tashkiloti tavsiyalariga muvofiq oʻsmaga qarshi dori vositalarini uch guruhli tasniflash tizimini joriy etish hamda birinchi guruh (zaruriy) dori vositalari bilan uzluksiz taʼminlashni davlat tomonidan kafolatlash;

(iv) onkologiya sohasida tibbiyot kadrlarini tayyorlash, qayta tayyorlash hamda malakasini oshirish, oʻquv jarayonida simulyatsion texnologiyalarni kengaytirish hamda ilmiy faoliyatni takomillashtirish.

4. Belgilansinki, aholi oʻrtasida eng koʻp uchraydigan saraton kasalliklarini erta aniqlashning yangi dasturlari doirasida:

(a) xalqaro klinik qoʻllanmalar, standart operatsion muolajalar, bemorlar marshrutlari hamda savolnomalar oʻtkazish amaliyotga joriy etiladi;

(b) birlamchi tibbiy-sanitariya yordami muassasalari hamda hududlardagi markaziy laboratoriyalar oshqozon, kolorektal hamda prostata bezi saratonini erta aniqlash uchun test toʻplamlari, reaktiv, reagentlar va sarflov materiallari bilan taʼminlanadi.

III. Onkologiya xizmatini tashkil etish va boshqarish

5. Shunday tartib oʻrnatilsinki, unga muvofiq 2027-yil 1-yanvardan boshlab bemorlar soni, bir bemorga talab etiladigan kunlik miqdor, davolash kursining davomiyligi, mavjud zaxira hamda demografik holatni inobatga olgan holda saratonoldi va saraton kasalliklariga chalingan bemorlarni tashxislash va davolash uchun zarur boʻlgan dori va sarflov vositalari, reaktiv va reagentlar hamda tibbiy jihozlar BMTning taraqqiyot dasturi bilan hamkorlikda xarid qilinadi hamda hududlarga yetkazib beriladi. Bunda Oʻzbekiston Respublikasi Prezidentining 2024-yil 22-noyabrdagi PQ-402-son qarori bilan tasdiqlangan 2025 — 2030-yillarda bachadon boʻyni va koʻkrak bezi saratonini nazorat qilish dasturi doirasida reaktiv va reagentlarni boshqa xalqaro tashkilotlar bilan hamkorlikda xarid qilinishi mumkin.

6. Ushbu qaror bilan belgilangan maqsad va ustuvor vazifalarga erishish uchun quyidagilar:

(a) Saratonga qarshi kurashish milliy dasturi 2-ilovaga muvofiq;

(b) Saratonga qarshi kurashish milliy dasturini amalga oshirish yuzasidan kompleks chora-tadbirlar rejasi 3-ilovaga muvofiq;

(v) Saratonga qarshi kurashish milliy dasturini amalga oshirishning maqsadli koʻrsatkichlari 4-ilovaga muvofiq;

(g) Saratonga qarshi kurashish milliy dasturini amalga oshirish uchun respublika onkologiya muassasalarini zarur tibbiy jihozlar bilan taʼminlashning manzilli taqsimoti 5-ilovaga muvofiq tasdiqlansin.

7. Belgilab qoʻyilsinki, 2027-yil 1-yanvardan boshlab Davlat budjeti mablagʻlari hisobidan qoplanadigan tibbiy yordamning kafolatlangan hajmlari doirasida saraton kasalliklariga chalingan bemorlarga tibbiy yordam koʻrsatishda quyidagi xizmatlar xarajatlari Davlat tibbiy sugʻurtasi jamgʻarmasi tomonidan qoplanadi:

(a) saraton kasalliklarini erta aniqlash va ularning oldini olishda oʻtkaziladigan laborator va instrumental diagnostik tekshiruvlar;

(b) saraton kasalliklarini tashxislash va ularning bosqichini aniqlash. Bunda molekulyar-genetik tashxis usullarining roʻyxati Sogʻliqni saqlash vazirligi tomonidan tasdiqlanadi, ularni qoplash qiymatini belgilash va toʻlovlarni amalga oshirish tartibi Iqtisodiyot va moliya vazirligi bilan kelishiladi;

(v) jarrohlik amaliyotlari;

(g) medikamentoz (birinchi guruhdagi (bazaviy) oʻsmaga qarshi, gormonal hamda qoʻllab-quvvatlovchi terapiyada qoʻllanadigan dori vositalari) va nur terapiyasi;

(d) palliativ yordam;

(j) reabilitatsiya va dispanser kuzatuvi boʻyicha xizmatlar.

8. Oʻzbekiston Respublikasi Prezidentining 2024-yil 22-noyabrdagi PQ-402-son qaroriga asosan tashkil etilgan Saraton kasalligi nazorati sohasidagi loyihalarning amalga oshirilishini muvofiqlashtiruvchi kengashning (keyingi oʻrinlarda — Kengash) qoʻshimcha vazifalari etib quyidagilar belgilansin:

(a) saraton kasalliklarini nazorat qilishga qaratilgan loyihalarni (keyingi oʻrinlarda — loyihalar) muvofiqlashtirish;

(b) onkologiya sohasining amaldagi holatini tahlil qilish, sohani rivojlantirish yoʻnalishlari va eng muhim samaradorlik koʻrsatkichlarini (KPI) belgilash hamda loyihalarni amalga oshirish boʻyicha “yoʻl xaritalari”ni tasdiqlash;

(v) loyihalar ishtirokchilari faoliyatini muvofiqlashtirish, ularni barcha bosqichlarda qoʻllab-quvvatlash ishlarini tashkil etish;

(g) loyihalarni moliyalashtirish, infratuzilma va tartibga solish bilan bogʻliq muammolarni hal etish, tizimli masalalar yuzasidan qonunchilikni takomillashtirish boʻyicha takliflar ishlab chiqish;

(d) onkologiya sohasida amalga oshirilayotgan ishlar samaradorligini tahlil qilish maqsadida choraklik yigʻilishlar oʻtkazib borish;

(j) Dasturning amalga oshirilishi va maqsadli koʻrsatkichlarga erishilishi yuzasidan har yili tahliliy hisobotlarni jamoatchilikka eʼlon qilib borish;

(z) Kengash tomonidan tasdiqlanadigan roʻyxatga muvofiq Markazda foydalanish uchun:

(i) Oʻzbekiston Respublikasida ishlab chiqarilmaydigan xorijda tibbiyot amaliyotida qoʻllashga ruxsat berilgan, shu jumladan, muvofiqlik deklaratsiyasiga ega boʻlgan eng yangi onkologik, gematologik, immunologik, ogʻriq qoldiruvchi dori vositalari, hamroh va qoʻllab-quvvatlovchi terapiya preparatlari, tibbiy jihozlarni (keyingi oʻrinlarda — farmatsevtika mahsulotlarini) tan olish tartibida davlat roʻyxatidan oʻtkazish;

(ii) farmatsevtika mahsulotlarini ayrim koʻrsatkichlari boʻyicha sifat nazorati hamda identifikatsiya orqali oʻrnatilgan tartibda sertifikatlash sharti bilan respublikaga olib kirish.

9. Davlat tibbiy sugʻurtasi jamgʻarmasi huzurida yuridik shaxs maqomiga ega boʻlmagan Noinfeksion kasalliklarga qarshi kurashish jamgʻarmasi (keyingi oʻrinlarda — Jamgʻarma) tashkil etilsin.

10. Belgilansinki, Jamgʻarma mablagʻlari:

(a) 2027-yil 1-yanvardan boshlab quyidagi manbalar hisobidan shakllantiriladi:

(i) tarkibida shakar yoki boshqa shirinlashtiruvchi yoki xushboʻylashtiruvchi moddalar mavjud boʻlgan gazlangan va gazlanmagan ichimliklar, tarkibida kartoshka yoki uning taʼmini beruvchi qoʻshimchalar boʻlgan mahsulotlar (chipslar), tamaki, alkogol va pivo mahsulotlari hamda energetik va tetiklashtiruvchi ichimliklarga belgilangan aksiz soligʻidan tushumlarning 50 foizi;

(ii) xalqaro moliya institutlari, xorijiy hukumat moliya tashkilotlari va boshqa tashkilotlarning grantlari, ixtiyoriy yordam hamda texnik koʻmak mablagʻlari;

(iii) jismoniy va yuridik shaxslarning homiylik xayriyalari;

(iv) Jamgʻarmaning vaqtincha boʻsh mablagʻlarini tijorat banklarining depozitlariga va boshqa moliyaviy vositalarga joylashtirishdan tushgan daromadlarning 50 foizi;

(v) qonunchilik hujjatlarida taqiqlanmagan boshqa manbalar;

(b) quyidagi maqsadlar uchun sarflanadi:

(i) saraton va orfan kasalliklariga chalingan bemorlarni oʻz vaqtida tashxislash, davolash va reabilitatsiya qilish, ularga respublikada hamda xorijiy davlatlarda tibbiy yordam koʻrsatish, ijtimoiy va moliyaviy yordam berish, ularni davolashda zarur dori vositalari va tibbiy jihozlar bilan bepul taʼminlash;

(ii) tibbiyot muassasalarini dori va sarflov vositalari, reaktiv va reagentlar hamda tibbiy jihozlar bilan taʼminlash, moddiy-texnika bazasini mustahkamlash;

(iii) saraton va orfan kasalliklarini davolash bilan shugʻullanuvchi tibbiyot muassasalarining tashkiliy, ilmiy, taʼlim va davolash faoliyatiga yetakchi xorijiy tibbiyot va ilmiy-tadqiqot muassasalaridan ekspertlarni jalb qilish;

(iv) saraton va orfan kasalliklariga chalingan bemorlarga oʻz vaqtida hamda sifatli yordam koʻrsatishga qaratilgan boshqa chora-tadbirlarni moliyalashtirish;

(v) Iqtisodiyot va moliya vazirligi huzuridagi Gʻaznachilik xizmati qoʻmitasida ochilgan maxsus shaxsiy gʻazna hisobvaragʻida jamlanadi;

(g) Kengash qarori asosida sarflanadi.

11. Iqtisodiyot va moliya vazirligi Sogʻliqni saqlash vazirligi bilan birgalikda ehtiyojga koʻra Jamgʻarmaga qoʻshimcha manbalarni shakllantirish boʻyicha takliflarni Oʻzbekiston Respublikasi Prezidenti Administratsiyasiga kiritib borsin.

IV. Tibbiyot xodimlarining bilim va koʻnikmalarini oshirish

12. Sogʻliqni saqlash vazirligi:

(a) tibbiy taʼlim muassasalari bilan birgalikda oila salomatligi boʻyicha maxsus oʻquv dasturi doirasida tibbiyot brigadalari xodimlari aholi oʻrtasida eng koʻp uchraydigan saraton kasalliklarini erta bosqichlarda aniqlash yuzasidan maqsadli tibbiy tekshiruvlardan oʻtkazish boʻyicha malaka oshirishlarini;

(b) “Oʻzbekistonda saraton kasalliklarini erta aniqlash milliy dasturi” (National Early Detection Program for Cancer in Uzbekistan) grant loyihasi doirasida Garvard universiteti afillangan klinikalari (Harvard University Affiliated Hospitals Dana Farber Cancer Institute) ekspertlarini jalb qilgan holda:

(i) tuman (shahar) markaziy shifoxonalari shifokor-endoskopistlari gastroskopiya va kolonoskopiyani oʻtkazish boʻyicha;

(ii) soha mutaxassislari koʻkrak bezi, bachadon boʻyni, oshqozon va prostata bezi saratoni kasalliklarini erta bosqichlarda aniqlash boʻyicha oʻqitilishini taʼminlasin.

13. Belgilansinki, Oʻzbekiston Respublikasi Prezidentining 2025-yil 19-maydagi “2025 — 2030-yillarda bolalar saratoniga qarshi kurashish boʻyicha Oʻzbekiston Respublikasi milliy strategiyasini amalga oshirish chora-tadbirlari toʻgʻrisida”gi PQ-186-son qaroriga muvofiq tashkil etilgan Bolalar saratoni boʻyicha xalqaro akademik xab Dastur doirasida onkologiya sohasida ilm-fanni rivojlantirishning ilmiy bazasi sifatida faoliyat yuritadi.

V. Raqamlashtirish

14. Raqamli texnologiyalar vazirligi va Sogʻliqni saqlash vazirligi:

(a) uch oy muddatda aholi oʻrtasida saraton kasalliklarini erta aniqlash hamda saraton kasalliklariga chalingan bemorlarni tashxislash, davolash, dispanser kuzatuviga olish hamda yoʻnaltirish jarayonlarini oʻz ichiga olgan bemorlar raqamli marshrutini joriy qilish boʻyicha texnik topshiriq ishlab chiqib, tasdiqlasin;

(b) 2026-yil yakuniga qadar “Cancer-registr” axborot tizimini saraton kasalliklarini hisobga olish boʻyicha xalqaro standartlarga muvofiq takomillashtirsin, shuningdek, sunʼiy intellekt texnologiyalari asosida qaror qabul qilishni qoʻllab-quvvatlovchi zamonaviy raqamli vositalarni joriy etsin;

(v) 2027-yil yakuniga qadar “Elektron sogʻliqni saqlash” axborot tizimida saraton kasalliklariga chalingan bemorlarni roʻyxatga olish, tashxislash, davolash, dispanser kuzatuvi hamda yoʻnaltirish jarayonlarini qamrab olgan bemorlarning raqamlashtirilgan marshrutini alohida modul sifatida ishlab chiqsin va amaliyotga joriy etsin.

VI. Qarorda belgilangan tadbirlarni moliyalashtirish

15. Iqtisodiyot va moliya vazirligi Dasturda nazarda tutilgan chora-tadbirlarni amalga oshirish uchun Sogʻliqni saqlash vazirligiga 2027-yilda qoʻshimcha 1,7 trillion soʻm mablagʻ ajratilishini taʼminlasin. Bunda Dasturda nazarda tutilgan chora-tadbirlarni amalga oshirish bilan bogʻliq xarajatlar 2028-yildan boshlab har yili Davlat budjeti parametrlarida nazarda tutiladi va narxlar oʻzgarishiga qarab indeksatsiya qilib boriladi.

16. Belgilab qoʻyilsinki, Dastur doirasida saraton kasalliklarini erta bosqichlarda aniqlash va ularning oldini olish yuzasidan ishlab chiqilgan oʻquv dasturlari asosida tibbiyot xodimlarining malakasini oshirish bilan bogʻliq xarajatlar, shu jumladan, xorijiy ekspertlarni jalb qilish xarajatlari Tibbiyotni rivojlantirish davlat maqsadli jamgʻarmasi hamda Davlat budjetidan Sogʻliqni saqlash vazirligiga ajratilgan mablagʻlar hisobidan moliyalashtiriladi.

VII. Qaror ijrosini tashkil etish, taʼminlash va nazorat

17. Sogʻliqni saqlash vazirligi:

(a) ikki oy muddatda:

(i) Dasturni Jahon sogʻliqni saqlash tashkilotining tavsiyalari asosida xalqaro standartlarga muvofiq shaklda tasdiqlasin hamda vazirlikning rasmiy veb-saytiga joylashtirsin;

(ii) oʻsmaga qarshi dori vositalari taʼminoti va logistikasini muvofiqlashtirish boʻyicha texnik guruhni tashkil etsin;

(b) uch oy muddatda quyidagilarni nazarda tutuvchi saratonni erta aniqlash boʻyicha aholini tibbiy koʻriklardan oʻtishga jalb qilish chora-tadbirlari dasturini tasdiqlasin:

(i) ommaviy axborot vositalari va ijtimoiy tarmoqlarda saraton kasalliklarining xavf omillari, erta alomatlari va tibbiy koʻriklarning ahamiyati toʻgʻrisida targʻibot ishlarini tizimli tashkil etish;

(ii) maqsadli yosh guruhlariga kiruvchi fuqarolarni tibbiy koʻriklarga chaqirish (SMS xabarnomalar, mobil ilova, sunʼiy intellekt vositalari va boshqalar);

(iii) tibbiyot brigadalari xodimlari va mahalla faollarini jalb qilgan holda aholi, ayniqsa, olis va chekka hududlarda istiqomat qiluvchi fuqarolar oʻrtasida tushuntirish ishlarini olib borish;

(iv) har yili 4-fevral — Butunjahon saratonga qarshi kurashish kuni munosabati bilan saraton kasalliklarining oldini olish va erta bosqichlarda aniqlash boʻyicha aholining savodxonligini oshirishga qaratilgan ommaviy tadbirlar oʻtkazish;

(v) 2026-yil yakuniga qadar:

(i) Iqtisodiyot va moliya vazirligi bilan birgalikda saraton kasalliklariga chalingan bemorlarga tibbiy yordam koʻrsatishda Davlat budjeti mablagʻlari hisobidan qoplanadigan tibbiy yordamning kafolatlangan hajmlarini tasdiqlasin;

(ii) target va immunoterapiya, shuningdek, Jahon sogʻliqni saqlash tashkiloti tomonidan qayta malakalangan biosimilyarlar klinik qoʻllanmalarga bosqichma-bosqich kiritilishini taʼminlasin;

(iii) Jahon sogʻliqni saqlash tashkiloti tavsiyalariga muvofiq uch bosqichli ustuvorlik tasnifi asosida oʻsmaga qarshi dori vositalari roʻyxatini ishlab chiqsin va tasdiqlasin;

(iv) xalqaro standartlar asosida onkologiya sohasida standartlashtirish hujjatlari, shu jumladan, saraton kasalliklariga chalingan bemorlarga tibbiy yordam koʻrsatish tartibi, klinik qoʻllanmalar, bemorlarning klinik marshrutlari hamda standart operatsion muolajalarni ishlab chiqsin va tasdiqlasin;

(g) 2027-yil yakuniga qadar dori va sarflov vositalarining zaxirasini raqamli prognoz qilish va boshqarishni, hududlar kesimida eng maqbul tarzda taqsimot qilishni hamda oʻsmaga qarshi dori vositalari koʻp yillik shartnomalar asosida xarid qilinishini yoʻlga qoʻysin;

(d) Iqtisodiyot va moliya vazirligi bilan birgalikda Dasturni amalga oshirish natijalari, shuningdek, xalqaro standartlar va ilgʻor xorijiy tajriba asosida saraton kasalliklariga chalingan bemorlarga tibbiy yordam koʻrsatishda Davlat budjetidan qoplanadigan tibbiy yordamning kafolatlangan hajmlari kamida har uch yilda bir marotaba qayta koʻrib chiqilishini taʼminlasin.

18. Iqtisodiyot va moliya vazirligi ikki oy muddatda mazkur qarorning 10-bandi “a” kichik bandining ikkinchi xatboshisida nazarda tutilgan tushumlarni Jamgʻarmaga avtomatik ravishda oʻtkazish imkoniyatini yaratsin.

19. Strategik rivojlanish va islohotlar agentligi Dastur amalga oshirilishi boʻyicha monitoring olib borsin hamda uning samaradorligi yuzasidan Kengashga takliflar kiritib borsin.

20. Raqamli texnologiyalar vazirligi har yili Dasturda nazarda tutilgan chora-tadbirlarni amalga oshirish bilan bogʻliq jarayonlar boshlanishidan avval fuqarolarni xabardor qilish maqsadida maxsus bepul SMS xabarnomalar yuborilishini taʼminlasin.

21. Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga 6-ilovaga muvofiq oʻzgartirish va qoʻshimchalar kiritilsin.

22. Mazkur qarorning ijrosini samarali tashkil qilishga masʼul va shaxsan javobgar etib sogʻliqni saqlash vaziri E.E. Adilov, Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari belgilansin.

23. Qaror ijrosini muhokama qilib borish, ijro uchun masʼul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 24-iyun,

PQ-238-son

Oʻzbekiston Respublikasi Prezidentining 2026-yil 24-iyundagi PQ-238-son qaroriga 1-ILOVA

Saratonga qarshi kurashish milliy dasturini hududlar kesimida amalga oshirish muddatlari

Izoh: Sogʻliqni saqlash vazirligi tomonidan Iqtisodiyot va moliya vazirligi bilan kelishgan holda mazkur muddatlarga oʻzgartirish kiritilishi mumkin.

Oʻzbekiston Respublikasi Prezidentining 2026-yil 24-iyundagi PQ-238-son qaroriga 2-ILOVA

Saratonga qarshi kurashish milliy

DASTURI

Saratonga qarshi kurashish milliy dasturi (keyingi oʻrinlarda — Dastur) Jahon sogʻliqni saqlash tashkiloti (JSST), Xalqaro saratonni oʻrganish agentligi (IARC), Yevropa tibbiy onkologiya jamiyati (ESMO) tavsiyalari va xalqaro ekspertlar ishtirokida ishlab chiqilgan boʻlib, aholi salomatligini muhofaza qilish, saraton kasalliklari profilaktikasini jadallashtirish, xavfli oʻsmalarni barvaqt aniqlash va oʻlim darajasini kamaytirish maqsadida tayyorlangan.

1. Dastur 2027-yil 1-yanvardan boshlab dastlab Samarqand viloyatida, 2028-yildan esa bosqichma-bosqich boshqa hududlarda amalga oshiriladi.

2. Dastur doirasida saraton kasalliklarini barvaqt aniqlash boʻyicha quyidagi tadbirlar amalga oshiriladi:

(a) bachadon boʻyni va koʻkrak bezi saratonini erta aniqlash tadbirlari Oʻzbekiston Respublikasi Prezidentining 2024-yil 22-noyabrdagi “Ayollar orasida onkologik kasalliklarni nazorat qilish tizimini takomillashtirish chora-tadbirlari toʻgʻrisida”gi PQ-402-son qarori bilan belgilangan tartib va shartlar asosida amalga oshiriladi;

(b) yoʻgʻon ichak (kolorektal), oshqozon, prostata bezi va oʻpka saratonini erta aniqlash boʻyicha tibbiyot brigadalari xodimlari tomonidan xalqaro tavsiyalar asosida aholini maqsadli tekshiruvlardan oʻtkazish tizimi yoʻlga qoʻyiladi;

(v) oshqozon saratonini erta aniqlash va oldini olish (50 — 75 yoshdagi erkak va ayollar) boʻyicha:

(i) birinchi bosqichda — savolnoma oʻtkazish natijasida oilaviy shifokor tomonidan aniqlangan xavf guruhiga mansub aholi oʻrtasida H. pylorini aniqlash ureaz testi oʻtkaziladi;

(ii) ikkinchi bosqichda — H. pylori boʻyicha musbat natija olingan taqdirda, ezofagogastroduodenoskopiya (EGDS) oʻtkaziladi, atrofiyasiz H. pylori-musbat bemorlarda eradikatsion terapiya tayinlanadi va ikki yildan soʻng EGDS takroran oʻtkaziladi;

(iii) uchinchi bosqichda — shubhali uchastkalardan biopsiya olinadi va yuqori darajali displaziya yoki oshqozon saratonining dastlabki bosqichi aniqlanganda bemor onkologiya xizmatlarini koʻrsatuvchi muassasaga yoʻnaltiriladi;

(g) kolorektal saratonni erta aniqlash (50 — 75 yoshdagi erkak va ayollar) boʻyicha:

(i) birinchi bosqichda — savolnoma oʻtkazish natijasida oilaviy shifokor tomonidan aniqlangan xavf guruhiga mansub aholi oʻrtasida har ikki yilda bir marotaba najasda yashirin qonni aniqlashning immunokimyoviy testi (FIT-test) oʻtkaziladi;

(ii) ikkinchi bosqichda — FIT-testi natijasi musbat boʻlganda kolonoskopiya oʻtkaziladi;

(iii) uchinchi bosqichda — saratonoldi va (yoki) oʻsma aniqlangan taqdirda, polipektomiya va biopsiya amalga oshiriladi hamda xavfli oʻsmaga shubha boʻlganda bemor onkologiya xizmatlarini koʻrsatuvchi muassasaga yoʻnaltiriladi;

(d) oʻpka saratonini erta aniqlash (50 — 75 yoshdagi erkak va ayollar) boʻyicha:

(i) birinchi bosqichda — oilaviy shifokor tomonidan savolnoma oʻtkaziladi;

(ii) ikkinchi bosqichda — yuqori xavf guruhidagi shaxslarga yiliga bir marta koʻkrak qafasi aʼzolarining kompyuter tomografiyasi oʻtkaziladi hamda tekshiruv yakuni boʻyicha Lung-RADS shkalasiga muvofiq xulosa tuziladi;

(iii) uchinchi bosqichda — Lung-RADS shkalasi boʻyicha saratonoldi va (yoki) xavfli oʻsmaga shubha boʻlganda bemor onkologiya xizmatlarini koʻrsatuvchi muassasaga yoʻnaltiriladi;

(j) prostata bezi saratonini erta aniqlash (45 — 80 yoshdagi erkaklar) boʻyicha:

(i) birinchi bosqichda — umumiy prostata-spetsifik antigen (PSA) miqdori aniqlanadi;

(ii) ikkinchi bosqichda — prostata-spetsifik antigen miqdori yuqori boʻlganda bemor onkologiya xizmatlarini koʻrsatuvchi muassasaga yoʻnaltiriladi;

(iii) uchinchi bosqichda — shubhali zonalarda UTT-biopsiya oʻtkaziladi va prostata bezi saratoni morfologik tasdiqlanganda bemorga tasdiqlangan klinik qoʻllanmalarga muvofiq davolash choralari koʻriladi.

3. Mazkur Dastur doirasida bemorlarni yoʻnaltirishning quyidagi meʼyoriy muddatlari belgilanadi:

(a) birinchi bosqich natijasiga koʻra ikkinchi bosqichga yoʻnaltirish — 14 kundan kechiktirmay;

(b) uchinchi bosqich — tasdiqlovchi diagnostika tugallanishi — patologiya aniqlangan kundan eʼtiboran 30 kundan kechiktirmay;

(v) xavfli oʻsmaga shubha boʻlganda onkologiya xizmatlarini koʻrsatuvchi muassasada dastlabki tekshiruv — 10 kundan kechiktirmay;

(g) morfologik verifikatsiyadan soʻng oʻsmaga qarshi davolashni boshlash — 30 kundan kechiktirmay.

4. Quyidagi tibbiyot xodimlari xalqaro ekspertlarni jalb etgan holda bosqichma-bosqich oʻqitiladi:

(a) tibbiyot brigadalari xodimlari — mazkur dasturning 2-bandida nazarda tutilgan 4 ta nozologiya boʻyicha xavf omillarini baholash, bemorlarni stratifikatsiyalash va dastlabki skrining testlarini oʻtkazish boʻyicha;

(b) shifokor-endoskopistlar — EGDS va kolonoskopiya, Sidney protokoli asosida biopsiya va polipektomiyani amalga oshirish boʻyicha;

(v) shifokor-rentgenologlar (MSKT-shifokorlari) — oʻpka saratonini aniqlash (Lung-RADS-tizimi) va prostata bezi saratonini aniqlash (PI-RADS-tizimi) boʻyicha;

(g) shifokor-onkolog va patomorfologlar — tekshiruv natijalarini verifikatsiya qilish, xavf guruhini aniqlash va bemorlarni klinik qoʻllanmalar asosida yoʻnaltirish boʻyicha.

5. Dastur doirasida saraton kasalliklarini erta bosqichlarda aniqlash, tashxislash va davolash jarayonlari quyidagi tartibda amalga oshiriladi:

(a) tibbiyot brigadalari xodimlari saraton kasalliklarini erta bosqichlarda aniqlash yuzasidan bemorni maqsadli tibbiy tekshiruvlardan oʻtkazadi hamda yoʻllanma asosida tegishli tor soha mutaxassisiga yoʻnaltiradi;

(b) bemorda saratonoldi va saraton kasalligi tasdiqlanguniga qadar tashxislash va davolash tadbirlari tegishincha shifokor-urolog, shifokor-endoskopist, shifokor-gastroenterolog (abdominal jarroh), shifokor-koloproktolog va shifokor-pulmonolog (torakal jarroh) tomonidan oʻtkaziladi;

(v) bemorda saraton kasalligi tasdiqlanganda medikamentoz davolash tadbirlari (kimyo, nur, target va immun terapiya hamda qoʻllab-quvvatlovchi terapiya) shifokor-onkologlar tomonidan oʻtkaziladi.

6. Dastur doirasida dastlabki bosqichlarda bachadon boʻyni, koʻkrak bezi, yoʻgʻon ichak, oshqozon, prostata bezi va oʻpka saratoni kasalliklariga chalingan bemorlarni tashxislash va davolashda Yevropa tibbiy onkologiya jamiyati (ESMO) klinik tavsiyalari asosida ishlab chiqilgan klinik qoʻllanmalar joriy etiladi, keyinchalik erishilgan natijalar va mavjud imkoniyatlardan kelib chiqib, Sogʻliqni saqlash vazirligining taklifiga koʻra Saraton kasalligi nazorati sohasidagi loyihalarning amalga oshirilishini muvofiqlashtiruvchi kengash qarori asosida boshqa saraton kasalliklari turlari ham bosqichma-bosqich qamrab olinadi.

7. Sogʻliqni saqlash vaziriga saraton kasalliklariga qarshi kurashish boʻyicha amalga oshirilayotgan tadbirlar natijalari asosida Dasturga oʻzgartirish va qoʻshimchalar kiritish huquqi beriladi.

Oʻzbekiston Respublikasi Prezidentining 2026-yil 24-iyundagi PQ-238-son qaroriga 3-ILOVA

Saratonga qarshi kurashish milliy dasturini amalga oshirish yuzasidan

KOMPLEKS CHORA-TADBIRLAR REJASI

Oʻzbekiston Respublikasi Prezidentining 2026-yil 24-iyundagi PQ-238-son qaroriga 4-ILOVA

Saratonga qarshi kurashish milliy dasturini amalga oshirishning

MAQSADLI KOʻRSATKICHLARI

Oʻzbekiston Respublikasi Prezidentining 2026-yil 24-iyundagi PQ-238-son qaroriga 5-ILOVA

Saratonga qarshi kurashish milliy dasturini amalga oshirish uchun respublika onkologiya muassasalarini zarur tibbiy jihozlar bilan taʼminlashning

MANZILLI TAQSIMOTI

Izoh:

* Sogʻliqni saqlash vazirligiga loyiha doirasida taqsimlanmagan mablagʻlarni ehtiyojdan kelib chiqib qayta taqsimlash vakolati beriladi.

** Milliy dasturni amalga oshirish jarayonida, zaruratga koʻra, Sogʻliqni saqlash vazirligi tomonidan roʻyxatga oʻzgartirishlar kiritilishi mumkin.

*** Avtomatik trepanlar uchun ignalar hududlarda saraton kasalliklari tarqalishini hisobga olgan holda taqsimlanadi.

Oʻzbekiston Respublikasi Prezidentining 2026-yil 24-iyundagi PQ-238-son qaroriga 6-ILOVA

Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2021-yil 1-iyuldagi “N.I. Pirogov nomidagi Rossiya milliy tadqiqot tibbiyot universitetining Toshkent shahridagi filiali faoliyatini tashkil etish toʻgʻrisida”gi PQ-5169-son qarorida:

(a) 3-bandning toʻrtinchi xatboshisi “2022/2023 oʻquv yilidan” soʻzlari “2028/2029 oʻquv yilidan” soʻzlari bilan almashtirilsin;

(b) 4-ilovada:

(i) 3-pozitsiyada “Amalga oshirish muddatlari” ustunidagi “2022/2023 oʻquv yili” va “Doimiy ravishda” soʻzlari tegishlicha “2028/2029 oʻquv yili” va “2027-yil yakuniga qadar” soʻzlari bilan almashtirilsin;

(ii) 5-pozitsiyada “Amalga oshirish muddatlari” ustunidagi “2022/2023 oʻquv yili” soʻzlari “2028/2029 oʻquv yili” soʻzlari bilan almashtirilsin;

(iii) 8-pozitsiyada “Amalga oshirish muddatlari” ustunidagi “2022/2023 oʻquv yili” soʻzlari “2028/2029 oʻquv yili” soʻzlari bilan almashtirilsin;

(iv) 9-pozitsiyada “Amalga oshirish muddatlari” ustunidagi “2022/2023 oʻquv yilidan boshlab” soʻzlari “2028/2029 oʻquv yilidan boshlab” soʻzlari bilan almashtirilsin;

(v) 11-pozitsiyada “Amalga oshirish muddatlari” ustunidagi “2022-yil 1-dekabr”, “2022-2023-yillar davomida belgilangan muddatlarda” va “Muntazam ravishda” soʻzlari tegishlicha “2027-yil 1-dekabr”, “2027-2028-yillar davomida belgilangan muddatlarda” va “2027-yil yakuniga qadar” soʻzlari bilan almashtirilsin;

(vi) 12-pozitsiyada “Amalga oshirish muddatlari” ustunidagi tegishli kelishikdagi “2022/2023 oʻquv yili” soʻzlari tegishli kelishikdagi “2027/2028 oʻquv yili” soʻzlari bilan almashtirilsin;

(vii) 17-pozitsiyada “Amalga oshirish muddatlari” ustunidagi “2022-yil yakuniga qadar” soʻzlari “2027-yil yakuniga qadar” soʻzlari bilan almashtirilsin;

(viii) 18-pozitsiyada “Amalga oshirish muddatlari” ustunidagi “2022/2023 oʻquv yili” soʻzlari “2028/2029 oʻquv yili” soʻzlari bilan almashtirilsin.

2. Oʻzbekiston Respublikasi Prezidentining 2022-yil 1-apreldagi “Samarqand davlat tibbiyot universitetini tashkil etish va sohada kadrlar tayyorlash tizimini yanada takomillashtirish toʻgʻrisida”gi PQ-188-son qarorida:

(a) 7-bandning uchinchi xatboshisi quyidagi mazmundagi uchinchi — beshinchi xatboshlari bilan almashtirilsin:

“Respublika shoshilinch tibbiy yordam ilmiy markazi Samarqand viloyati filiali yangi binoga koʻchirilishi munosabati bilan ushbu filialning boʻshaydigan Samarqand shahar, Maxdumi Aʼzam koʻchasi, 18-uy manzilida joylashgan binosi Universitetga operativ boshqaruv huquqi asosida bepul beriladi. Bunda:

ushbu binoda rekonstruksiya va jihozlash ishlarini olib borish maqsadida bajarilayotgan loyihalash ishlari toʻxtatilib, Universitet tomonidan xalqaro ekspertlarni jalb qilgan holda Respublika shoshilinch tibbiy yordam ilmiy markazi Samarqand viloyati filialining faoliyat koʻrsatmayotgan binosi, Samarqand viloyati bolalar koʻp tarmoqli tibbiyot markazi hamda qurilayotgan bolalar onkogematologiya boʻlimi negizida zamonaviy koʻp tarmoqli klinika konsepsiyasi va loyihasi ishlab chiqiladi;

konsepsiyani ishlab chiqish va loyihalash ishlarini amalga oshirish bilan bogʻlik xarajatlar Universitetning budjetdan tashqari mablagʻlari hisobidan amalga oshiriladi”;

(b) 8-bandda:

(i) ikkinchi xatboshidagi “jihozlash uchun” soʻzlaridan keyin “zarur mablagʻlarni nazarda tutsin” soʻzlari bilan toʻldirilsin;

(ii) uchinchi xatboshi chiqarib tashlansin;

(v) 1-ilovaning 19-pozitsiyasi chiqarib tashlansin.

3. Oʻzbekiston Respublikasi Prezidentining 2023-yil 1-maydagi “Sogʻliqni saqlash tizimini raqamlashtirishga doir qoʻshimcha chora-tadbirlar toʻgʻrisida”gi PQ-140-son qaroriga 3-ilovaning 5-pozitsiyasi chiqarib tashlansin.

4. Oʻzbekiston Respublikasi Prezidentining 2023-yil 24-maydagi “Raqamli xizmatlar qamrovi va sifatini oshirish hamda soha, tarmoq va hududlarni raqamli transformatsiya qilish chora-tadbirlari toʻgʻrisida”gi PQ-162-son qaroriga 1-ilovaning 11, 20, 21, 22 va 24-pozitsiyalari chiqarib tashlansin.

5. Oʻzbekiston Respublikasi Prezidentining 2024-yil 10-yanvardagi “Farmatsevtika tarmogʻini yanada rivojlantirish va investitsiya loyihalarini amalga oshirishni jadallashtirish boʻyicha qoʻshimcha chora-tadbirlar toʻgʻrisida”gi PQ-14-son qarorida 4-bandi toʻrtinchi xatboshi chiqarib tashlansin.

6. Oʻzbekiston Respublikasi Prezidentining 2024-yil 9-fevraldagi “Qashqadaryo viloyatida aholi salomatligini muhofaza qilish hamda sogʻliqni saqlash tizimini yangi bosqichga koʻtarish chora-tadbirlari toʻgʻrisida”gi PQ-67-son qarorida:

a) 2-bandda:

(i) uchinchi xatboshidagi “muvofiq” soʻzidan keyin “tasdiqlansin” soʻzi bilan toʻldirilsin;

(ii) toʻrtinchi xatboshi chiqarib tashlansin.

(b) 1-ilovada:

(i) 1-pozitsiya quyidagi tahrirda bayon etilsin:

(ii) 15-pozitsiyada:

“Amalga oshirish muddatlari” ustunidagi “2024 — 2026-yillar” soʻzlari “2026 — 2028-yillar” soʻzlari bilan almashtirilsin;

“masʼul ijrochilar” ustunidagi “Sogʻliqni saqlash vazirligi (A. Xudayarov)” soʻzlari “Sogʻliqni saqlash vazirligi (E. Adilov)” soʻzlari bilan almashtirilsin;

(b) 3-ilova oʻz kuchini yoʻqotgan deb hisoblansin.

7. Oʻzbekiston Respublikasi Prezidentining 2024-yil 21-maydagi “Onkologik, gematologik va immunologik kasalliklarga chalingan bolalarga tibbiy yordam koʻrsatishni yanada takomillashtirish chora-tadbirlari toʻgʻrisida”gi PQ-183-son qaroriga 4-ilovada:

(a) 9-pozitsiya “Ijro muddati” ustunidagi “2024 — 2026-yillar” soʻzlari “2024 — 2027-yillar” soʻzlari bilan almashtirilsin;

(b) izoh qismi quyidagi mazmundagi ikkinchi xatboshi bilan toʻldirilsin:

“Sogʻliqni saqlash vazirligiga dasturda belgilangan qurilish-montaj ishlarini toʻxtatish, loyihalarga oʻzgartirish kiritish va tibbiyot muassasalarini jihozlash dasturlariga tuzatishlar kiritish huquqi beriladi”.

8. Oʻzbekiston Respublikasi Prezidentining 2024-yil 29-maydagi “Tarkibiy islohotlarni amalga oshirishda ekspertlik koʻmagi samaradorligini taʼminlashga doir qoʻshimcha chora-tadbirlar toʻgʻrisida”gi PQ-198-son qarori 3-bandining oʻn toʻrtinchi xatboshisidagi “Markaziy bankka” soʻzlari “Markaziy bank, tibbiyot muassasalari hamda tibbiyot va farmatsevtika sohasida kadrlar tayyorlovchi taʼlim muassasalariga” soʻzlari bilan almashtirilsin.

9. Oʻzbekiston Respublikasi Prezidentining 2024-yil 30-avgustdagi “Oʻzbekiston Respublikasida 2024 — 2030-yillarda davlat-xususiy sheriklikni rivojlantirish chora-tadbirlari toʻgʻrisida”gi PQ-308-son qarorida:

(a) 1-ilovaning 4-pozitsiyasi chiqarib tashlansin;

(b) 2-ilovada:

(i) 9-pozitsiyaning “Loyiha bitimini imzolash muddati” ustunidagi “2025-yil” soʻzlari “2027-yil” soʻzlari bilan almashtirilsin;

(ii) 12-pozitsiyasi chiqarib tashlansin.

10. Oʻzbekiston Respublikasi Prezidentining 2024-yil 22-noyabrdagi “Ayollar orasida onkologik kasalliklarni nazorat qilish tizimini takomillashtirish chora-tadbirlari toʻgʻrisida”gi PQ-402-son qarorida:

(a) 4-bandning oltinchi xatboshisi quyidagi tahrirda bayon etilsin:

“Kengashga aholi oʻrtasida eng koʻp uchraydigan (bachadon boʻyni, koʻkrak bezi, yoʻgʻon ichak, oshqozon, prostata bezi va oʻpka) saraton kasalliklarini erta aniqlashda oʻtkaziladigan laborator va instrumental diagnostik tekshiruvlar bilan qamrab olinadigan aholi yoshini moliyalashtirish manbalari asosida mustaqil belgilash vakolati beriladi”;

(b) 5-band quyidagi tahrirda bayon etilsin:

“5. Quyidagilar Kengashning asosiy vazifalari etib belgilansin:

saraton kasalliklarini nazorat qilishga qaratilgan loyihalarni (keyingi oʻrinlarda — loyihalar) muvofiqlashtirish;

loyihalar doirasida faqat sinovdan oʻtgan testlar, farmatsevtika mahsulotlari hamda vaksinalar, dalillarga asoslangan diagnostika va davolash usullari qoʻllanishini nazorat qilish;

Dasturga oid xaridlarni amalga oshirishda, mablagʻlar va tibbiy uskunalarni taqsimlashda, qaror qabul qilishda Kengash aʼzolarida manfaatlar toʻqnashuviga yoʻl qoʻymaslik, jamoat salomatligi etikasiga asoslanib qarorlar qabul qilish;

aholi oʻrtasida eng koʻp uchraydigan (bachadon boʻyni, koʻkrak bezi, yoʻgʻon ichak, oshqozon, prostata bezi va oʻpka) saraton kasalliklarini erta aniqlashda oʻtkaziladigan laborator va instrumental diagnostik tekshiruvlar bilan qamrab olinadigan aholi yoshini sogʻliqni saqlash boʻyicha xalqaro tashkilotlar tavsiyalariga muvofiq qayta koʻrib chiqish hamda aniq moliyalashtirish manbalaridan kelib chiqib belgilash;

onkologiya sohasining amaldagi holatini tahlil qilish, sohani rivojlantirish yoʻnalishlari va eng muhim samaradorlik koʻrsatkichlarini (KPI) belgilash hamda loyihalarni amalga oshirish boʻyicha “yoʻl xaritalari”ni tasdiqlash;

loyihalar ishtirokchilari faoliyatini muvofiqlashtirish, ularni barcha bosqichlarda qoʻllab-quvvatlash ishlarini tashkil etish;

loyihalarni moliyalashtirish, infratuzilma va tartibga solish bilan bogʻliq muammolarni hal etish, tizimli masalalar yuzasidan qonunchilikni takomillashtirish boʻyicha takliflar ishlab chiqish;

onkologiya sohasida amalga oshirilayotgan ishlar samaradorligini tahlil qilish maqsadida choraklik yigʻilishlar oʻtkazib borish;

Dasturning amalga oshirilishi va maqsadli koʻrsatkichlarga erishilishi yuzasidan har yili tahliliy hisobotlarni jamoatchilikka eʼlon qilib borish;

loyihalarning natijasi haqidagi maʼlumotlarni Sogʻliqni saqlash vazirligining rasmiy veb-saytida eʼlon qilib borilishini taʼminlash”;

(v) 2-ilova quyidagi tahrirda bayon etilsin:

“Oʻzbekiston Respublikasi Prezidentining 2024-yil 22-noyabrdagi PQ-402-son qaroriga 2-ILOVA

Saraton kasalligi nazorati sohasidagi loyihalarning amalga oshirilishini muvofiqlashtiruvchi kengash

TARKIBI

Izohlar:

* Kengash aʼzolari boshqa ishga oʻtgan taqdirda, uning tarkibiga ushbu lavozimga yangi tayinlangan yoki tegishli funksiyalarni bajarish zimmasiga yuklangan shaxslar kiritiladi.

** Kengash raisiga zarur hollarda Kengash tarkibiga oʻzgartirish va qoʻshimchalar kiritish vakolati beriladi”.

11. Oʻzbekiston Respublikasi Prezidentining 2024-yil 29-noyabrdagi “Tibbiyot muassasalarini farmatsevtika mahsulotlari va tibbiy jihozlar bilan taʼminlash tizimini takomillashtirish chora-tadbirlari toʻgʻrisida”gi PQ-408-son qarori 2-bandining “g” kichik bandida:

(a) ikkinchi xatboshi chiqarib tashlansin;

(b) uchinchi — beshinchi xatboshilar tegishincha ikkinchi — toʻrtinchi xatboshilar deb hisoblansin;

(v) toʻrtinchi xatboshi quyidagi tahrirda bayon etilsin:

“Ushbu bandda nazarda tutilgan talablar davlat zaxirasidan chiqarilgan, tanqislik roʻyxatiga kiritilgan hamda sogʻliqni saqlash vazirining alohida koʻrsatmasidagi dori vositalarini xarid qilish uchun tatbiq etilmaydi”.

14. Oʻzbekiston Respublikasi Prezidentining 2025-yil 22-apreldagi “Tibbiyot sohasida kadrlar tayyorlash tizimini tubdan takomillashtirish chora-tadbirlari toʻgʻrisida”gi PQ-149-son qarorining 7-bandi oʻz kuchini yoʻqotgan deb hisoblansin.

15. Oʻzbekiston Respublikasi Prezidentining 2025-yil 19-maydagi “2025 — 2030-yillarda bolalar saratoniga qarshi kurashish boʻyicha Oʻzbekiston Respublikasi milliy strategiyasini amalga oshirish chora-tadbirlari toʻgʻrisida”gi PQ-186-son qarorida:

(a) 12-band quyidagi mazmundagi sakkizinchi xatboshi bilan toʻldirilsin:

“Ushbu bandda nazarda tutilgan vazifalarni amalga oshirish uchun Akademik xabga xalqaro taʼlim tashkilotlar, xorijiy va mahalliy ekspertlarni Akademik xabning faoliyatini moliyalashtirish manbalari hisobidan toʻgʻridan-toʻgʻri shartnomalar asosida jalb qilish huquqi beriladi”;

(b) 21-band quyidagi tahrirda bayon etilsin:

“21. Sogʻliqni saqlash vazirligiga Loyiha amalga oshirilishiga va boshqa hududlarda bosqichma-bosqich joriy etilishiga qarab Strategiya parametrlariga, shuningdek, qurilish-montaj ishlarini toʻxtatish, loyihalarga oʻzgartirish kiritish va tibbiyot muassasalarini jihozlash dasturlariga tuzatishlar kiritish huquqi berilsin”;

(v) 1-ilovaning 18 pozitsiyasi “Amalga oshirish mexanizmi” ustuni 2 va 3-bandlaridagi “30 — 80 oʻrinli” soʻzlari “110 oʻringacha” soʻzlari bilan almashtirilsin;

(g) 3-ilova quyidagi tahrirda bayon etilsin:

“Oʻzbekiston Respublikasi Prezidentining 2025-yil 19-maydagi PQ-186-sonli qaroriga 3-ILOVA

Qoraqalpogʻiston Respublikasi va viloyatlar bolalar koʻp tarmoqli tibbiyot markazlari uchun qoʻshimcha binolarni qurish

REJASI

Izohlar:

Qoʻshimcha binolarni qurish 2025 — 2027-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi doirasida sogʻliqni saqlash sohasiga ajratilgan mablagʻlar hisobidan amalga oshiriladi.

Qashqadaryo va Surxondaryo viloyatlarida qurilayotgan onkogematologiya boʻlimlari loyihalari xalqaro standartlar talablariga moslashtiriladi.”

16. Vazirlar Mahkamasining 2025-yil 19-iyundagi “Birlamchi tibbiy-sanitariya yordami muassasalarida Oʻzbekiston Respublikasi Davlat budjeti hisobidan qoplanadigan tibbiy yordamning kafolatlangan hajmlarini tasdiqlash toʻgʻrisida”gi 382-son qaroriga 2-ilovaning “III. Ambulator sharoitda aholi (bemorlar)ga beriladigan dori vositalari” boʻlimi quyidagi mazmundagi 19-kichik boʻlim bilan toʻldirilsin:

18. Vazirlar Mahkamasining 2025-yil 24-noyabrdagi “Dori vositalarini davlat roʻyxatidan oʻtkazish tartibi toʻgʻrisidagi hamda Tibbiy jihozlarni davlat roʻyxatidan oʻtkazish tartibi toʻgʻrisidagi nizomlarni tasdiqlash haqida”gi 738-son qarorida:

(a) 1-ilovada:

(i) 14-bandning “d” kichik bandi uchinchi xatboshisidan “har bir ishlab chiqaruvchining dori moddasi (substansiyasi)dan ishlab chiqarilgan namunalar,” soʻzlari chiqarib tashlansin;

(ii) 18-bandning birinchi xatboshisidagi “Oʻzbekiston Respublikasi Sogʻliqni saqlash vazirligi tomonidan” soʻzlaridan keyin “Iqtisodiyot va moliya vazirligi, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil hamda Savdo-sanoat palatasi bilan kelishilgan holda” soʻzlari bilan toʻldirilsin;

(iii) 22-band “a” kichik bandida:

toʻrtinchi xatboshisi qoʻyidagi tahrirda bayon etilsin:

“Adliya vazirligining “Sanoat mulki muhofazasi portali”dan foydalangan holda intellektual mulk obyektlariga (tovar belgisi va sanoat namunasiga) boʻlgan huquqlarga rioya etilganligini tekshirish va (yoki) oʻrganish”;

beshinchi xatboshisi chiqarib tashlansin;

oltinchi — oʻn beshinchi xatboshilar tegishincha beshinchi — oʻn toʻrtinchi xatboshilar deb hisoblansin;

(iv) 3-ilovada:

1.10-band quyidagi tahrirda bayon etilsin:

“1.10. Ishlab chiqarish hujjatlari:

ishlab chiqarishning barcha bosqichlaridagi ishlab chiqarish maydonchalari (faol modda (substansiya) ishlab chiqarish bosqichi bundan mustasno) uchun Oʻzbekiston Respublikasining “Zarur ishlab chiqarish amaliyoti — GMP” milliy standarti talablariga muvofiqligi toʻgʻrisidagi sertifikat (mavjud boʻlganda);

xorijiy ishlab chiqaruvchilar uchun dori vositasi ishlab chiqarilayotgan obyektga nisbatan tegishli xorijiy davlat(lar)ning vakolatli organi yoki boshqa vakolatli organ (JSST roʻyxatiga kiritilgan (WLA) yoki Global Benchmarking Tool boʻyicha yetuklikning 4-darajasidagi (Maturity Level 4) tartibga soluvchi organlar) tomonidan oʻtkazilgan “Zarur ishlab chiqarish amaliyoti — GMP” inspeksiyasi natijalarini tasdiqlovchi hujjatlar (ishlab chiqarishning barcha bosqichlaridagi ishlab chiqarish maydonchalari uchun, faol modda (substansiya) ishlab chiqarish bosqichi bundan mustasno). Bunda sertifikat bilan birga soʻnggi inspeksiya hisobotining toʻliq nusxasi ham ilova qilinadi. Ushbu hisobotda aniqlangan kamchiliklar, ularni bartaraf etish boʻyicha koʻrilgan chora-tadbirlar (CAPA) hamda qayta koʻrib chiqish natijalari va yakuniy xulosa keltirilgan boʻlishi lozim;

ishlab chiqarishning barcha bosqichlaridagi ishlab chiqarish maydonchalari (faol modda (substansiya) ishlab chiqarish bosqichi bundan mustasno) uchun ular joylashgan davlatlardagi vakolatli organlar tomonidan dori vositalarini ishlab chiqarishga berilgan litsenziya.”;

1.15-band qoʻyidagi tahrirda bayon etilsin:

“1.15. Dori vositalarida qoʻllanilgan intellektual mulk obyektlariga (tovar belgilari va sanoat namunalari) boʻlgan huquqlarni tasdiqlovchi muhofaza hujjati (guvohnoma, patent va ularga ilova) yoki ulardan foydalanish toʻgʻrisidagi shartnoma (mavjud boʻlganda)”;

(b) 2-ilovada:

(i) 13-bandning birinchi xatboshisidagi “Oʻzbekiston Respublikasi Sogʻliqni saqlash vazirligi tomonidan” soʻzlaridan keyin “Iqtisodiyot va moliya vazirligi, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil hamda Savdo-sanoat palatasi bilan kelishilgan holda” soʻzlari bilan toʻldirilsin;

(ii) 16-band uchinchi xatboshisidagi “muvofiqligi yuzasidan” soʻzlaridan keyin “sertifikatlashtirish yoki” soʻzlari bilan toʻldirilsin;

(iii) 17-bandda:

“a” kichik bandda:

uchinchi xatboshisi qoʻyidagi tahrirda bayon etilsin:

“Adliya vazirligining “Sanoat mulki muhofazasi portali”dan foydalangan holda intellektual mulk obyektlariga (tovar belgisi va sanoat namunasiga) boʻlgan huquqlarga rioya etilganligini tekshiriladi va (yoki) oʻrganiladi”;

toʻrtinchi xatboshidan “hamda tibbiy jihozlarda IMOga boʻlgan huquqlarga rioya etilganligi yuzasidan oʻrganish” soʻzlari chiqarib tashlansin;

“d” kichik bandda:

ikkinchi xatboshidan “va belgilangan tartibda sertifikatlashtiriladi” soʻzlari chiqarib tashlansin;

yettinchi xatboshidan “Bunda roʻyxatdan oʻtkazish uchun taqdim etilgan tibbiy jihoz ishlab chiqarilgan davrda ushbu tibbiy jihoz ishlab chiqarish sharoitlarining “ISO: 13485” xalqaro standarti bilan uygʻunlashtirilgan Oʻzbekiston Respublikasining milliy standarti talablariga muvofiqligi yuzasidan inspeksiyasi oʻtkazilgan boʻlishi lozim” jumlasi chiqarib tashlansin;

(iv) 3-ilovada:

8-pozitsiyaning “Hujjatlar” ustuni quyidagi tahrirda bayon etilsin:

“Tibbiy jihozda qoʻllanilgan intellektual mulk obyektlariga (tovar belgilari va sanoat namunalari) boʻlgan huquqlarni tasdiqlovchi muhofaza hujjati (guvohnoma, patent va ularga ilova) yoki ulardan foydalanish toʻgʻrisidagi shartnoma (mavjud boʻlganda)”;

(ii) izoh qismidagi “hujjatlarda ayrim maʼlumotlarni asoslagan holda kiritmasligi” soʻzlari “ayrim talab etiladigan hujjatlar yoki ulardagi maʼlumotlar mavjud boʻlmagan taqdirda, ushbu holatni asoslab beruvchi rasmiy xat (asoslangan tushuntirish xati) orqali taqdim etishi” soʻzlari bilan almashtirilsin.