Mahalla boshqaruvini samarali tashkil etishga oid qoʻshimcha chora-tadbirlar toʻgʻrisida (PF-116-son)

24.06.2026

Oʻzbekiston Respublikasi Prezidentining

Farmoni

2026-yil — “Mahallani rivojlantirish va jamiyatni yuksaltirish yili” deb eʼlon qilinishi munosabati bilan mahalla instituti yanada mustaqil va xalqchil tuzilmaga, jamoatchilik boshqaruvi va nazoratining tayanch boʻgʻiniga aylanishiga koʻmaklashish, uning jamiyatdagi nufuzi va rolini kuchaytirish, shuningdek, faoliyatini raqamlashtirish maqsadida qaror qilaman:

I. Maqsadlar

1. Quyidagilar ushbu Farmonning asosiy maqsadlari etib belgilansin:

(a) “Mahallani rivojlantirish va jamiyatni yuksaltirish yili”da mahalla institutining jamiyatdagi rolini yanada oshirish hamda “mahalla yettiligi” faoliyatini samarali tashkil etish;

(b) hududlarni ijtimoiy-iqtisodiy rivojlantirish, mahallalarni ishsizlik, kambagʻallik, jinoyatchilik va oilaviy ajrimdan xoli hududga aylantirish;

(v) mahallalar faoliyatini moliyaviy qoʻllab-quvvatlash imkoniyatlarini oshirish;

(g) mahalla bilan davlat organlari va jamoat tashkilotlarining uzviy hamkorligini taʼminlash;

(d) mahallalarda aholi muammolarini oʻz vaqtida aniqlash va hal etishning mahalla — tuman (shahar) — viloyat — respublika tizimini takomillashtirish orqali “mahalla yettiligi”, mahalliy davlat hokimiyati organlari, vazirlik va idoralarning masʼuliyatini yanada oshirish.

II. Mahalla boshqaruvini samarali tashkil etish

2. Quyidagilar:

(a) “Mahalla yettiligi” aʼzolarining asosiy va hamkorlikdagi vazifalari 1-ilovaga muvofiq;

(b) Mahalla faoliyatini qoʻllab-quvvatlash tizimini yanada takomillashtirish boʻyicha “yoʻl xaritasi” 2-ilovaga muvofiq tasdiqlansin.

3. Mahalla faoliyatini rivojlantirish boʻyicha respublika komissiyasi 3-ilovaga muvofiq tarkibda tashkil etilsin va uning asosiy vazifalari etib quyidagilar belgilansin:

(a) “mahalla yettiligi” aʼzolari faoliyatini samarali tashkil etish, ularga oʻz vazifalarini lozim darajada amalga oshirishi uchun uslubiy koʻmaklashish;

(b) mahallalarda aholi muammolari bilan mahalla — tuman (shahar) — viloyat — respublika tamoyili asosida ishlash samaradorligini oshirish;

(v) mahallalarda aholi muammolarini hal qilish yuzasidan idoralararo hamkorlikni taʼminlash.

4. 2026-yil 1-iyuldan boshlab “mahalla yettiligi” faoliyatini samarali tashkil etishning quyidagi tartibi joriy etilsin:

(a) Oʻzbekiston mahallalari uyushmasining (keyingi oʻrinlarda — Uyushma) Qoraqalpogʻiston Respublikasi, viloyatlar va Toshkent shahar boshqarmalari hamda tuman (shahar) boʻlimlariga mahallalardagi muammolarni tizimli tahlil qilish, masʼul idoralar oʻrtasida oʻzaro hamkorlik yoʻnalishlarini ishlab chiqish, shuningdek, hududiy dasturlarni tayyorlash hamda ijrosini nazorat qilishda ishtirok etish huquqi beriladi;

(b) mahallabay ishlashga masʼul boʻlgan mazkur Farmonga 3-ilovada keltirilgan vazirlik va idoralarda amaldagi shtat birliklari doirasida:

(i) vazirlik va idora rahbarining bir nafar oʻrinbosari Uyushma bilan oʻzaro hamkorlikda ishlash uchun masʼul etib belgilanadi;

(ii) ish hajmidan kelib chiqib, mahallabay ishlash boʻyicha masʼul tarkibiy boʻlinma tashkil etiladi yoki masʼul xodim belgilanadi hamda ularning Uyushma bilan samarali hamkorlik tizimi yoʻlga qoʻyiladi.

5. Belgilansinki, mahallada yashovchi birinchi marotaba ijtimoiy xavfi katta boʻlmagan yoki uncha ogʻir boʻlmagan jinoyat sodir etgan fuqarolarga ularning oilaviy sharoitidan kelib chiqib, fuqarolar yigʻini kengashining kollegial qarori asosida shaxsga nisbatan yengillik berish toʻgʻrisida qilingan murojaat sud-tergov organlari tomonidan qanoatlantirilgan hollarda:

(a) “mahalla yettiligi” kafillikka olingan shaxsni qayta tarbiyalash, zarur hollarda, kasbga oʻrgatish, bandligini taʼminlash, taʼlimga yoʻnaltirishga masʼul boʻladi;

(b) kafillikka olingan shaxs 3 yil davomida jinoyat va huquqbuzarlik sodir etmasa, “mahalla yettiligi”ning shaxsni tarbiyalashda faollik koʻrsatgan aʼzosini Mahallaning ijtimoiy-iqtisodiy muammolarini hal etish jamgʻarmasi mablagʻlari hisobidan qoʻshimcha ragʻbatlantirish choralari koʻriladi.

6. Uyushmaning tuman (shahar) boʻlimi boshliqlariga “mahalla yettiligi” faoliyatiga aralashganlik, ularni xizmat vazifalari bilan bogʻliq boʻlmagan ishlarga jalb etganlik uchun tuman (shahar) hokimlariga taqdimnomalar kiritish vakolati berilsin.

III. Mahallalar faoliyatini raqamlashtirish va moliyaviy jihatdan qoʻllab-quvvatlash

7. Oʻzbekiston mahallalari uyushmasi, Adliya vazirligi va Raqamli texnologiyalar vazirligi 2026-yil 1-noyabrga qadar “mahalla yettiligi” faoliyatiga masʼul vazirlik va idoralar bilan birgalikda “Raqamli mahalla” elektron platformasi (keyingi oʻrinlarda — Platforma)da quyidagi imkoniyatlarni yaratsin:

(a) 4-ilovada koʻrsatilgan vazirlik va idoralarning tegishli axborot tizimlarini Platforma bilan oʻzaro integratsiya qilish;

(b) sunʼiy intellekt yordamida Platformaga kiritilgan murojaatlar hamda aholi tomonidan koʻtarilgan muammolarni saralash, ijrochilarga taqsimlash va belgilangan tartibda ijrosini nazorat qilish;

(v) mahallalarni infratuzilma, tadbirkorlik, kambagʻallik, ishsizlik, jinoyatchilik, nizoli oilalar, aholi murojaatlari koʻrsatkichlari asosida “qizil”, “sariq”, “yashil” toifalarga ajratish hamda yuzaga kelgan muammolarning bartaraf etilganligi holatini monitoring qilish;

(g) mahalla raisi tomonidan “mahalla yettiligi” aʼzolariga haq toʻlash uchun toʻldiriladigan hujjat (tabel)ni shakllantirish hamda ular faoliyatini KPI asosida baholashni yoʻlga qoʻyish.

8. Belgilansinki, Platformaga kiritilgan muammolarning hal etilishi holati:

(a) har oyda kamida bir marotaba tuman (shahar) hokimlari raisligida tuman (shahar) mahallani qoʻllab-quvvatlash kengashlarida;

(b) har chorakda kamida bir marotaba Qoraqalpogʻiston Respublikasi Joʻqorgʻi Kengesi Raisi, viloyatlar va Toshkent shahar hokimlari raisligida hududiy mahallani qoʻllab-quvvatlash kengashlarida;

(v) har yarim yilda kamida bir marotaba Oʻzbekiston Respublikasi Bosh vaziri raisligida Respublika mahallani qoʻllab-quvvatlash kengashida mutasaddi vazirlik va idoralar, tashkilotlar rahbarlari hamda mahalliy hokimliklar ishtirokida tanqidiy muhokama qilib boriladi.

9. Uyushmaning Mahallalar faoliyatini ragʻbatlantirish jamgʻarmasiga Oʻzbekiston Respublikasi respublika budjetidan 2026-yildan boshlab har yili 200 milliard soʻm mablagʻ ajratilsin va ushbu mablagʻlar 5-ilovaga muvofiq tasdiqlangan yoʻnalishlarga sarflansin.

10. Mahallaning ijtimoiy-iqtisodiy muammolarini hal etish jamgʻarmasi:

(a) mablagʻlarini shakllantirishning qoʻshimcha manbalari etib quyidagilar belgilansin:

(i) 2026-yil 1-iyuldan mahalla hududida sanitariya qoidalarini buzganlik va noqonuniy qurilish uchun undirilgan jarimalarning 10 foizi;

(ii) 2027-yil 1-yanvardan jismoniy shaxslardan olinadigan mol-mulk va yer soligʻi boʻyicha undirilgan mablagʻlarning (noturar joylar boʻyicha undiriladigan mol-mulk va yer soligʻi bundan mustasno) 15 foizi;

(iii) mahalladagi hududi 5 ming metr kvadratgacha boʻlgan davlat koʻchmas mulk obyektlarini hokim yordamchisining onlayn buyurtmanomasiga asosan toʻgʻridan-toʻgʻri elektron onlayn auksion savdolari orqali sotishdan tushadigan mablagʻlar, baholash va sotish xarajatlari chegirilgan holda;

(b) mablagʻlarini sarflash boʻyicha qoʻshimcha yoʻnalishlar 6-ilovaga muvofiq tasdiqlansin;

(v) mablagʻlarining 10 foizi “ogʻir” toifadagi hamda ijtimoiy-iqtisodiy rivojlanishda ortda qolayotgan mahallalarni rivojlantirish uchun Uyushmaning Mahallalar faoliyatini ragʻbatlantirish jamgʻarmasiga oʻtkazib borilsin.

11. Belgilansinki, 2026-yil 1-iyuldan:

(a) mahalla binolarining boʻsh turgan xonalari “E-auksion” elektron savdo platformasida elektron onlayn auksion orqali ijaraga beriladi;

(b) binolarni ijaraga berishdan tushgan mablagʻlar mahallalar infratuzilmasini yaxshilash va rivojlantirishga yoʻnaltiriladi.

12. Shunday tartib oʻrnatilsinki, unga koʻra Oʻzbekiston Respublikasi Prezidentining 2020-yil 18-fevraldagi PQ-4602-son qarori talablari asosida oʻz xizmat binolariga ega boʻlmagan hamda “mahalla yettiligi” aʼzolari uchun yetarli xonalar mavjud boʻlmagan mahallalarga (zarur hollarda yer maydoni ajratib) davlat-xususiy sheriklik shartlari asosida zamonaviy mahalla markazlari binolarini barpo etishda Uyushmaning tegishli tuman (shahar) boʻlimi davlat sherigi hisoblanadi.

13. Oʻzbekiston Respublikasi Prezidentining ayrim hujjatlariga 7-ilovaga muvofiq oʻzgartirish va qoʻshimchalar kiritilsin.

14. Oʻzbekiston Respublikasi Prezidentining ayrim hujjatlari 8-ilovaga muvofiq oʻz kuchini yoʻqotgan deb hisoblansin.

IV. Farmon ijrosini tashkil etish, taʼminlash va nazorat

15. Ushbu Farmonning ijrosini samarali tashkil qilishga masʼul va shaxsan javobgar etib Bosh vazir oʻrinbosari J.A. Qoʻchqorov va Oʻzbekiston mahallalari uyushmasi raisi K.K. Kuranbayev belgilansin.

16. Farmon ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 24-iyun,

PF-116-son

Oʻzbekiston Respublikasi Prezidentining 2026-yil 24-iyundagi PF-116-son Farmoniga 1-ILOVA

“Mahalla yettiligi” aʼzolarining asosiy va hamkorlikdagi vazifalari

1-boʻlim. “Mahalla yettiligi” aʼzolarining asosiy vazifalari

I. Mahalla raisi uchun tavsiya etiladigan asosiy vazifalar

1. Mahallada faoliyat yurituvchi hokim yordamchisi, xotin-qizlar faoli, yoshlar yetakchisi, profilaktika va soliq inspektorlari, ijtimoiy xodim faoliyatiga umumiy rahbarlik qiladi, ularning imkoniyatlaridan samarali foydalangan holda mahallani har tomonlama rivojlantiradi.

2. “Mahalla yettiligi” tomonidan mamlakatimizda amalga oshirilayotgan islohotlarni va yangiliklarni oilalarga yetkazish choralarini koʻradi.

3. Aholining huquqiy ongi, maʼnaviyati va dunyoqarashini oshirishga qaratilgan targʻibot tadbirlarni tashkil etadi.

4. Har oyda ommaviy hasharlar uyushtiradi, koʻchalar, xonadonlar, qabristonlar, ziyoratgohlar, koʻp qavatli uylar, yoʻlakchalar, ariq (zovur)lar va ijtimoiy obyektlarning tozaligi va obodligini taʼminlaydi.

5. Aholining jamiyat va mahalla hayotida faol ishtirokini taʼminlaydi.

6. Fuqarolar yigʻini kengashida har oyda davlat organlari va tashkilotlari rahbarlarining amalga oshirilgan ishlar boʻyicha axboroti eshitilishini tashkil qiladi hamda muammolarning bartaraf etilishi ustidan jamoatchilik nazoratini oʻrnatadi.

7. Har oyda kamida bir marotaba mahallada hal etilmagan muammolarni tuman (shahar) hokimiga kiritadi.

8. Aholi bilan muloqotlar, ommaviy axborot vositalari va ijtimoiy tarmoqlar orqali chiqishlarda amalga oshirilgan ishlar toʻgʻrisida axborot beradi.

9. Har chorakda tuman (shahar) xalq deputatlari kengashida amalga oshirilgan ishlar toʻgʻrisida hisobot beradi.

10. Mahallani kambagʻallik, ishsizlik, jinoyat, ajrim, tazyiq va zoʻravonlik, giyohvandlikdan xoli hududga aylantirish hamda mahalla infratuzilmasini yaxshilashga “mahalla yettiligi” hamda mutasaddi tashkilot va idoralar xodimlari hamda kuch-vositalarini safarbar etadi.

11. Har haftada kamida bir marotaba mahalla servis kompaniyalari va koʻp kvartirali uylarni boshqaruvchi tashkilot, boshqaruvchi yoki shirkatlar faoliyatini oʻrganadi, nazorat qiladi.

12. Har haftada bir marotaba “mahalla yettiligi”, mahalla bankiri, sogʻliqni saqlash va taʼlim muassasasi rahbarlari, koʻp kvartirali uylarni boshqaruvchi tashkilot, boshqaruvchi yoki shirkat boshqaruvi raisining hisobotini eshitadi.

13. Uyma-uy yurish orqali, oʻtkazilgan suhbatlar, kelib tushgan murojaatlar natijasida aniqlangan muammolarni, aholining taklif va shikoyatlarini koʻrib chiqadi, “mahalla yettiligi” hamda tegishli tashkilotlarni jalb qilgan holda hal etish chorasini koʻradi.

14. Toʻy, oilaviy tantana, maʼraka va marosimlarni isrofgarchiliksiz ixcham oʻtkazish choralarini koʻradi.

15. Mahalladagi vaziyat va talabdan kelib chiqib, har oyda ehtiyojmand oilalarning xonadonida tashabbuskor qoʻni-qoʻshnilarni jalb etgan holda taʼmirlash ishlarini tashkil etadi.

16. “Yashil makon” doirasida bahor va kuz mavsumida koʻchalar, xonadonlarga mevali, manzarali daraxt va buta koʻchatlari ekishni va parvarishlashni, mahalla bogʻlarini tashkil qilishni taʼminlaydi.

17. Aholini ommaviy sportga jalb qiladi hamda “salomatlik yoʻlaklari”ni barpo qilish orqali jismoniy faolligini oshirishni taʼminlaydi.

18. Kambagʻal oilalar, nogironligi boʻlgan shaxslar, yolgʻiz keksalar va boshqa ehtiyojmand aholiga ajratilayotgan budjet mablagʻlari va boshqa mablagʻlarni maqsadli va manzilli yoʻnaltirish choralarini koʻradi.

19. Aholining kommunal xizmatlar, elektr, suv, gaz taʼminoti bilan bogʻliq muammolarini tashkilotlar va idoralar bilan birgalikda hal qiladi.

20. Mahalla infratuzilmasini rivojlantirish boʻyicha yillik dasturlarni ishlab chiqadi.

21. Oilaviy poliklinikalar tomonidan aholiga sifatli tibbiy xizmat koʻrsatilishini tashkil qiladi.

22. Har haftada bir marotaba taʼlim muassasalarida oʻquvchilarning davomati va xulq-atvorini oʻrganadi, maktab — ota-ona — mahalla hamkorligini samarali tashkil qiladi.

23. Tazyiq va zoʻravonlik, erta nikoh, erta tugʻuruq holatlarining oldini olish hamda nizoli oilalarni yarashtirish boʻyicha manzilli chora-tadbirlarni amalga oshiradi.

24. Aholiga ekologik madaniyatni targʻib qiladi, atrof-muhitni ifloslantiruvchi omillarga qarshi profilaktik ishlarni olib boradi.

25. Giyohvandlik, odam savdosi, majburiy mehnat, kiberxavfsizlikka oid jinoyatlarning oldini olishga qaratilgan targʻibot tadbirlarini tashkil qiladi.

26. Mahallada volontyorlik faoliyatini tashkil etish va rivojlantirish boʻyicha umumiy muvofiqlashtirish ishlarini amalga oshiradi.

II. Hokim yordamchisining asosiy vazifalari

1. Mahalladagi ijtimoiy-iqtisodiy holatni xonadonbay oʻrganib, mahallalarda mavjud zaxira va imkoniyatlarni har tomonlama tahlil qiladi, mahallani iqtisodiy rivojlantirish biznes rejasini ishlab chiqadi va mahalla kengashi yigʻilishida tasdiqlab, unda nazarda tutilgan maqsadli koʻrsatkichlarga erishish boʻyicha tegishli chora-tadbirlarni amalga oshiradi.

2. Mahalladagi korxonalarda boʻsh ish oʻrinlarini aniqlab, ishsiz va kambagʻal oila aʼzolari bandligini taʼminlash choralarini koʻradi.

3. Doimiy daromad manbaiga ega boʻlmagan ishsiz aholini kasb-hunar va tadbirkorlikka oʻqitish choralarini koʻradi.

4. Tashqi mehnat migratsiyasidan qaytgan fuqarolarning bandligini taʼminlash choralarini koʻradi.

5. Mahallada tadbirkorlikni rivojlantirish, aholining tadbirkorlik tashabbuslarini qoʻllab-quvvatlash maqsadida kredit, ssuda va subsidiyalar ajratilishida koʻmaklashadi. Ajratilgan resurslar samaradorligini monitoring qiladi hamda ajratilgan kreditlarning oʻz vaqtida qaytarilishiga koʻmaklashadi.

6. Ijara huquqi asosida aholiga ajratilgan yer maydonlarida “Bir kontur — bir mahsulot” tamoyili asosida ekin ekilishini tashkil etishga koʻmaklashadi hamda ekilgan ekinlar va yetishtirilgan mahsulotlar (yiliga 3-marta: asosiy, takroriy va toʻqsonbosti) hisobini yuritadi.

7. Mahalladagi aholi tomorqalarida “Bir mahalla — bir mahsulot” tamoyili asosida daromadli ekinlar ekishga koʻmaklashadi hamda ekilgan ekinlar va yetishtirilgan mahsulotlar (yiliga 3-marta: asosiy, takroriy va toʻqsonbosti) hisobini yuritadi.

8. Kichik ishlab chiqarish va xizmat koʻrsatish boʻyicha mikroloyihalar manzilli dasturini shakllantiradi va loyihalarni amalga oshirishga toʻsiq boʻlayotgan muammolarni hal etishga koʻmaklashadi.

9. Tadbirkorlarga mahallalarda ishlab chiqarilgan mahsulot yoki xizmatlar bozorini (shu jumladan, elektron savdo platformalari orqali) topish jarayonlarida koʻmaklashadi.

10. Mahallada past quvvatda ishlayotgan va faoliyati toʻxtatilgan korxonalar faoliyatini tiklashga koʻmaklashadi.

11. Mahalladagi boʻsh turgan bino-inshootlar va yer maydonlarini aniqlab, ularni belgilangan tartibda auksion savdolariga chiqarish choralarini koʻradi.

12. Tadbirkorlar tomonidan auksionda sotib olinib, qurilish ishlari boshlanmagan obyektlarni aniqlab, loyiha boshlanishiga koʻmak koʻrsatadi hamda qurilishi yakuniga yetkazilmagan loyihalar boʻyicha monitoring oʻtkazib, ishga tushirishga koʻmaklashadi.

13. Mahalladagi kambagʻal oilalarning har biri uchun individual dastur ishlab chiqadi va ularning daromadini oshirish chora-tadbirlarini belgilaydi.

14. Mahallada yashil energiyaga oʻtish boʻyicha ishlarni tashkil etadi hamda aholi oʻrtasida yashil energiya afzalliklari boʻyicha targʻibot tadbirlarini olib boradi.

III. Xotin-qizlar faolining asosiy vazifalari

1. Xotin-qizlarning huquq va qonuniy manfaatlarini himoya qilish, ularga huquqiy tushunchalar berish va zarur hollarda tegishli tashkilotlarga yoʻnaltirish ishlarini tashkil etadi.

2. Xotin-qizlarning ijtimoiy-siyosiy faolligini oshirish, taʼlim imkoniyatlarini kengaytirishga koʻmaklashadi, ularni maʼnaviy-maʼrifiy tadbirlarga jalb etadi.

3. “Ayollar maslahat kengashi” jamoatchilik tuzilmalari bilan yaqin hamkorlikda “Ayollar daftari”ga kiritilgan xotin-qizlar bilan manzilli ishlarni amalga oshiradi.

4. Xotin-qizlarni kasb va tadbirkorlikka oʻrgatish ishlarini tashkil etadi, ularning tadbirkorlik gʻoyalarini amalga oshirish, ular faoliyatiga kredit, subsidiya va boshqa yordam choralarini jalb qilish boʻyicha mahalladagi hokim yordamchisi bilan hamkorlik qiladi.

5. Oilalardagi ijtimoiy-maʼnaviy muhit sogʻlomligiga taʼsir koʻrsatayotgan omillar, notinch, nizoli hamda ajrim yoqasiga kelib qolgan oilalarni profilaktika qilish, toʻy va boshqa oilaviy marosimlarni ixcham oʻtkazish, milliy qadriyatlarni va urf-odatlarni targʻib qilish, millatlararo doʻstona munosabatlarni yaratish va saqlash choralarini koʻradi.

6. Oilalar va xotin-qizlar daromadlarini oshirishga koʻmaklashadi.

7. Ogʻir ijtimoiy ahvolga tushib qolgan xotin-qizlarga ijtimoiy-huquqiy, psixologik yordam koʻrsatishni tashkil etadi, mehnat migratsiyasidan qaytgan, jazoni ijro etish muassasalaridan ozod etilgan xotin-qizlarga konsultativ yordam berish choralarini koʻradi.

8. Xotin-qizlarni tazyiq va zoʻravonlikdan himoya qilish, ular tomonidan huquqbuzarliklar sodir etilishining oldini olish boʻyicha profilaktik tadbirlarni amalga oshiradi, tazyiq va zoʻravonlikdan jabr koʻrgan xotin-qizlarga belgilangan tartibda yordam koʻrsatilishini tashkil etadi.

9. Yaqin qarindoshlar oʻrtasidagi va erta nikohning oldini olish, oilaviy qadriyatlarni mustahkamlash boʻyicha maqsadli chora-tadbirlarni amalga oshiradi.

10. Sogʻlom turmush tarzini targʻib qilishga koʻmaklashadi, xotin-qizlarni tibbiy koʻriklardan oʻtishga, sport va sogʻlomlashtirish tadbirlariga jalb etadi.

IV. Yoshlar yetakchisining asosiy vazifalari

1. Yoshlarning oʻziga boʻlgan ishonchini oshirish, jamiyat uchun foydali va umummilliy manfaatlarga xizmat qilishga qaratilgan loyihalarni mahalla darajasida amalga oshiradi.

2. Yoshlarning shaxsiy rivojlanishiga, ularning iqtidori va isteʼdodini roʻyobga chiqarishga qaratilgan tadbirlarni tashkil etadi, “Besh tashabbus olimpiadasi”ni yoshlar oʻrtasida keng targʻib qiladi.

3. Mehnat bozoriga kirib kelayotgan yoshlarning tadbirkorlik koʻnikmalari va oʻz taqdiri uchun masʼuliyat hissini kuchaytirish orqali bandligiga koʻmaklashadi.

4. “Yoshlar daftari”ga kiritilgan yoshlarga koʻrsatiladigan yordamning ijtimoiy hamkorlik tamoyiliga asoslanishini taʼminlaydi.

V. Profilaktika inspektorining asosiy vazifalari

1. Biriktirilgan mahalla hududida vakolatli davlat organlari va tashkilotlarning huquqbuzarliklar profilaktikasi boʻyicha faoliyati natijalarini umumlashtirish va yagona axborot-tahlil tizimiga kiritilishini taʼminlaydi.

2. Biriktirilgan mahalla hududidagi kriminogen vaziyatni muntazam ravishda oʻrganib borish, huquqbuzarliklarni aniqlash va ularga barham berish boʻyicha qonunchilikda belgilangan chora-tadbirlarni amalga oshiradi.

3. Biriktirilgan mahalla hududida aholi oʻrtasida huquqbuzarliklarning umumiy, maxsus va viktimologik profilaktikasini amalga oshiradi.

4. Huquqbuzarlik sodir etishga moyil shaxslarni belgilangan tartibda profilaktik hisobga va maʼmuriy nazoratga olish, ular bilan yakka tartibdagi profilaktik chora-tadbirlarni amalga oshirish, ijtimoiy moslashtirish ishlarini individual dastur tuzgan holda tashkil etadi.

5. Yoshlar, ayniqsa, ularning uyushmagan qismi bilan manzilli tarbiyaviy va profilaktik chora-tadbirlarni amalga oshirish orqali ular orasida huquqbuzarliklarning oldini oladi.

6. Voyaga yetmaganlar oʻrtasida nazoratsizlik va huquqbuzarliklar profilaktikasini amalga oshiradi, shu jumladan, voyaga yetmaganlar masalalari boʻyicha inspektor-psixologlarga koʻmaklashadi.

7. Voyaga yetmaganlar va yoshlarni Vatanga muhabbat, milliy va umuminsoniy qadriyatlarga hurmat ruhida tarbiyalashga, terrorizm, ekstremizm, zoʻravonlik va shafqatsizlik gʻoyalaridan himoyalashga yoʻnaltirilgan ishlarni bevosita amalga oshiradi.

8. Tazyiq va zoʻravonlikdan jabrlangan shaxslarga himoya orderini berish va himoya orderi talablarining ijrosi ustidan nazoratni amalga oshiradi.

9. Maʼmuriy huquqbuzarliklar toʻgʻrisida bayonnomalar tuzish va Oʻzbekiston Respublikasining Maʼmuriy javobgarlik toʻgʻrisidagi kodeksiga muvofiq tegishli maʼmuriy huquqbuzarliklar toʻgʻrisidagi ishlarni koʻrib chiqadi.

10. Jismoniy shaxslarni va yuridik shaxslarning vakillarini qabul qiladi, ularning murojaatlarini belgilangan tartibda koʻrib chiqadi.

11. Vakolatli davlat organlari va tashkilotlar bilan yaqin hamkorlikda biriktirilgan mahalla hududida har bir oilani bevosita joyida oʻrgangan holda fuqarolarning jamoat xavfsizligiga oid va huquqbuzarliklarga sabab boʻlishi mumkin boʻlgan muammolari va noroziliklarini aniqlash, ularni bartaraf etish boʻyicha zarur choralarni koʻradi.

12. Biriktirilgan mahalla hududida pasport rejimi qoidalariga rioya etilishi yuzasidan nazoratni amalga oshiradi.

13. Tajovuzkor ruhiy kasallar, spirtli ichimlikka ruju qoʻyganlar oʻrtasida huquqbuzarliklar profilaktikasini amalga oshirishda davlat sogʻliqni saqlash tizimini boshqarish organlari va sogʻliqni saqlash muassasalariga koʻmaklashadi.

14. Probatsiya nazoratidagilarning xulq-atvorini nazorat qilishda, oʻrnatilgan cheklovlarga rioya etishini tekshirishda, shuningdek, yangi jinoyat sodir etishining oldini olishda probatsiya inspektorlariga koʻmaklashadi.

15. Biriktirilgan mahalla hududida jamoat tartibini saqlashga doir chora-tadbirlarni amalga oshiradi, “Fidokor yoshlar” jamoatchilik patrul guruhlari faoliyatini tashkil etadi, fuqarolarni ularning roziligi bilan huquqbuzarliklar profilaktikasini amalga oshirishda koʻmaklashishga jalb etadi.

16. Davlat organlari, jamoat va boshqa tashkilotlar rahbarlariga huquqbuzarliklarning sodir etilishi sabablari hamda ularga imkon beruvchi shart-sharoitlarni bartaraf qilish hamda mahalladagi mavjud ijtimoiy muammolarni hal etish boʻyicha taqdimnomalar kiritadi.

17. Biriktirilgan mahalla hududida fuqarolar va yuridik shaxslar tomonidan fuqaroviy va xizmat quroli hamda uning oʻq-dorilarini saqlash qoidalariga rioya etilishini nazorat qilishga koʻmaklashadi.

18. Biriktirilgan mahalla hududida taqiqlangan tashkilotlar hamda terrorchilik, ekstremistik va boshqa gʻayriqonuniy va buzgʻunchilik yoʻnalishidagi guruhlar faoliyatiga aloqador shaxslarni aniqlashga koʻmaklashadi.

19. OIV/OITS tarqalishining barvaqt oldini olish, axloqsizlik bilan bogʻliq huquqbuzarliklarga qarshi kurashish hamda fohishaxonalarning saqlanishiga chek qoʻyishga koʻmaklashadi.

20. Doimiy yashash joyini uzoq muddatga tark etgan shaxslarni aniqlaydi va hisobini yuritadi, ularning chet elda boʻlish joylari va muddatlarini aniqlash yuzasidan qarindoshlari bilan muntazam ish olib boradi, uzoq muddat mobaynida chet elda boʻlib qaytgan shaxslar bilan profilaktik ishlarni amalga oshiradi.

21. Jinoyatlarni aniqlash va fosh etish hamda surishtiruv, tergov va sud organlaridan yashirinib yurgan, jazodan boʻyin tovlayotgan, bedarak yoʻqolgan shaxslarni hamda qonunchilik hujjatlarida nazarda tutilgan holatlarda boshqa shaxslarni qidirish, shuningdek, shaxsi nomaʼlum murdalarning shaxsini aniqlash boʻyicha tezkor-qidiruv tadbirlarini amalga oshirishga koʻmaklashadi.

22. Shaxsni majburiy keltirish toʻgʻrisida surishtiruvchi, tergovchi, prokurorning qarori yoki sudning ajrimini belgilangan tartibda ijro etadi.

VI. Ijtimoiy xodimning asosiy vazifalari

1. Ogʻir ahvolga tushib qolgan va ogʻir ahvolga tushib qolish xavfi yuqori boʻlgan shaxslar va oilalarga (keyingi oʻrinlarda — ijtimoiy himoyaga muhtoj aholi) bevosita mahalla darajasida kompleks yondashuv asosida professional ijtimoiy xizmatlar koʻrsatadi.

2. Ijtimoiy himoyaga muhtoj aholining ehtiyojlari va mavjud imkoniyatlarini baholash orqali ularga individual tartibda ijtimoiy xizmatlar va yordamlar koʻrsatish rejalarini (keyingi oʻrinlarda — individual ijtimoiy xizmatlar rejasi) ishlab chiqadi.

3. Individual ijtimoiy xizmatlar rejasiga muvofiq ijtimoiy xizmatlar va yordamlar koʻrsatilishini tashkil qiladi, shuningdek, zarur hollarda, individual ijtimoiy xizmatlar rejasiga tegishli tuzatishlar kiritib boradi.

4. Ichki resurslarni, shu jumladan, ijtimoiy qoʻllab-quvvatlash boʻyicha koʻngillilarni (qarindoshlar, qoʻni-qoʻshnilar, volontyorlar) ijtimoiy xizmat va yordamlar koʻrsatishga jalb qiladi hamda ularning mazkur sohadagi faoliyatini muvofiqlashtiradi.

5. Aholiga davlat tomonidan kafolatlangan ijtimoiy xizmatlar va yordamlar toʻgʻrisida, shuningdek, aholining mazkur xizmatlarni olishga boʻlgan huquqlari boʻyicha tushuntirish beradi.

VII. Soliq inspektorining asosiy vazifalari

1. Soliq toʻlovchilarga soliq xizmatlarini koʻrsatadi.

2. Mahalladagi soliq toʻlovchilarni toʻliq xatlovdan oʻtkazadi.

3. Roʻyxatdan oʻtmagan tadbirkorlik subyektlari faoliyatini qonuniylashtirish choralarini koʻradi.

4. Vaqtincha moliyaviy qiyinchilikka duch kelgan tadbirkorlik subyektlari faoliyatini tiklashga koʻmaklashadi.

5. Soliq toʻlovchilarga soliqlarning iqtisodiy mohiyati va uning ijtimoiy ahamiyati, joriy etilgan imtiyoz va preferensiyalar, soliqqa oid huquqbuzarliklar uchun javobgarlik choralari toʻgʻrisida tushuntiradi hamda soliq toʻlash madaniyatini yuksaltirish boʻyicha tegishli targʻibot ishlarini amalga oshiradi.

6. Mahalla hududida joylashgan va soliq inspektoriga biriktirilgan korxonalarda ishlayotgan xodimlarning barchasi soliq hisobotlarida mavjudligini oʻrganadi va qonuniy faoliyat yuritishini nazorat qiladi.

7. Jismoniy shaxslarning egaligidagi yashash uchun moʻljallanmagan koʻchmas mulk obyektlari boshqa shaxslarga ijaraga berilgan holatlarda ijara shartnomasi tuzganligini oʻrganadi, nazorat qiladi va hisoblangan soliqlar undirilishini taʼminlaydi.

8. Jismoniy shaxslarning egaligida boʻlgan koʻchmas mulk va yer uchastkalari boʻyicha har yili 1-martdan kechiktirmay soliq summasi va uni toʻlash muddatlari koʻrsatilgan toʻlov xabarnomalarini tarqatadi.

9. Soliq toʻlovchilar tomonidan yuborilgan murojaatlarni oʻrganadi va qonunda belgilangan tartibda ijrosini taʼminlaydi.

10. Bank aylanmalari bilan soliq toʻlovchi tomonidan topshirilgan hisobot oʻrtasidagi tafovut boʻyicha soliq toʻlovchilardan qayta hisobotlarni talab qilib oladi va budjetga qoʻshimcha manba jalb qiladi.

11. “Mahalla yettiligi” bilan birga aholini oʻzini oʻzi band qilgan shaxs sifatida roʻyxatdan oʻtkazish ishlarini amalga oshiradi.

12. Yakka tartibdagi tadbirkorlar va oʻzini oʻzi band qilgan shaxslar faoliyatini yiriklashtirish choralarini koʻrdi.

13. Belgilangan soliq turlari boʻyicha budjetga tegishli mablagʻlarni undirish va mahalla budjetining daromadini oshirish choralarini koʻradi.

2-boʻlim. “Mahalla yettiligi” aʼzolarining oʻzaro hamkorlikdagi vazifalari

1. Mamlakatda amalga oshirilayotgan islohotlar, qabul qilinayotgan qonunchilik hujjatlarining mazmun-mohiyati va ahamiyatini keng jamoatchilik eʼtiboriga yetkazadi, mahallada qonunchilik hujjatlarining ijrosi taʼminlanishida, aholining ijtimoiy-iqtisodiy holatini oʻrganishda fuqarolar yigʻini kengashiga koʻmaklashadi hamda uning faoliyatida faol ishtirok etadi.

2. Mahallani kambagʻallik, ishsizlik, jinoyat va ajrimdan xoli hududga aylantirish boʻyicha “mahalla yettiligi”ning kuch va vositalarini yagona yondashuv asosida safarbar etadi.

3. Jismoniy shaxslarga “Saxovat va koʻmak”, “Ayollar daftari” va “Yoshlar daftari” jamgʻarmalari, Bandlikka koʻmaklashish davlat jamgʻarmasi orqali ijtimoiy yordam koʻrsatish va subsidiyalar ajratish boʻyicha kollegial qaror qabul qiladi.

4. Ogʻir ahvolga tushib qolgan hamda ijtimoiy himoyaga muhtoj shaxslarning muammolarini bartaraf etish boʻyicha kompleks chora-tadbirlarni amalga oshiradi.

5. Mahallada uyma-uy yurish orqali, oʻtkazilgan suhbatlar, kelib tushgan murojaatlar natijasida aniqlangan muammolarni, aholining taklif va shikoyatlarini koʻrib chiqadi va tegishli tashkilotlar bilan birgalikda aholi muammolarini hal etish chorasini koʻradi.

6. Aniqlangan aholi muammolari hamda ularning hal etilishi haqidagi maʼlumotlarni “Raqamli mahalla” elektron platformasiga kiritib boradi.

7. Mahallada aholining kayfiyatiga salbiy taʼsir qilayotgan tizimli muammolarni bartaraf etish boʻyicha har oyda kamida bir marotaba tuman (shahar) hokimlariga kollegial murojaat kiritib boradi.

8. Davlat organlari va tashkilotlarining faoliyatiga doir masalalar yuzasidan fuqarolarning murojaatlarini koʻrib chiqishda ishtirok etadi, shuningdek, ularni koʻrib chiqish natijalari boʻyicha davlat organlari va tashkilotlariga tegishli takliflar kiritadi.

9. Mahallada volontyorlik faoliyatini tashkil etish va rivojlantirish hamda aholi, ayniqsa, yoshlar va nuroniylarni jalb qilgan holda ijtimoiy loyihalarni ommalashtirish choralarini koʻradi.

Oʻzbekiston Respublikasi Prezidentining 2026-yil 24-iyundagi PF-116-son Farmoniga 2-ILOVA

Mahalla faoliyatini qoʻllab-quvvatlash tizimini yanada takomillashtirish boʻyicha

“YOʻL XARITASI”

Oʻzbekiston Respublikasi Prezidentining 2026-yil 24-iyundagi PF-116-son Farmoniga 3-ILOVA

Mahalla faoliyatini rivojlantirish boʻyicha respublika komissiyasi

TARKIBI

Izoh: Komissiya aʼzolari boshqa ishga oʻtgan taqdirda, uning tarkibiga ushbu lavozimga yangidan tayinlangan yoki zimmasiga tegishli funksiyalarni bajarish yuklangan shaxslar kiritiladi.

Oʻzbekiston Respublikasi Prezidentining 2026-yil 24-iyundagi PF-116-son Farmoniga 4-ILOVA

“Raqamli mahalla” platformasi bilan tegishli axborot tizimlari oʻzaro integratsiya qilinadigan vazirlik va idoralarning

ROʻYXATI

Oʻzbekiston Respublikasi Prezidentining 2026-yil 24-iyundagi PF-116-son Farmoniga 5-ILOVA

Oʻzbekiston Respublikasi respublika budjetidan har yili Oʻzbekiston mahallalari uyushmasining Mahallalar faoliyatini ragʻbatlantirish jamgʻarmasiga ajratiladigan 200 milliard soʻm miqdoridagi mablagʻlarning sarflanish

YOʻNALISHLARI

1. Ijtimoiy reyestrga kiritilgan oilalar aʼzolarining ishlash ishtiyoqini va tashabbuskorligini oshirishga qaratilgan “Farovon hayotga ilk qadam”, “Ishonch” loyihalari va “Maʼrifat orqali kambagʻallikni qisqartirish” dasturini amalga oshirish.

2. Toʻylar, oilaviy tantanalar, maʼraka va marosimlar oʻtkazilishini tartibga solishga qaratilgan tadbirlarni tashkil etish.

3. Tazyiq va zoʻravonlik hamda giyohvandlikning oldini olish, ekologik madaniyatni targʻib qilishga qaratilgan tadbirlarni tashkil qilish.

4. Sogʻlom turmush tarzini keng targʻib qilish doirasida bolalar va sport maydonchalarini tashkil etish.

5. Oʻz xizmat binosiga ega boʻlmagan mahallalarga xizmat binolarini qurish va jihozlash.

6. Oʻzbekiston mahallalari uyushmasi tizimidagi xodimlarni oʻqitish, xorijiy davlatlarda stajirovka oʻtash va xizmat safarlari hamda boshqa tadbirlarda ishtirok etish xarajatlarini qoplash.

Oʻzbekiston Respublikasi Prezidentining 2026-yil 24-iyundagi PF-116-son Farmoniga 6-ILOVA

Mahallaning ijtimoiy-iqtisodiy muammolarini hal etish jamgʻarmasi mablagʻlarining sarflanishi boʻyicha

QOʻSHIMCHA YOʻNALISHLAR

1. Mahallalar tomonidan milliy qadriyatlarni targʻib qilish, shuningdek, har bir mahallada sogʻlom ijtimoiy-maʼnaviy muhitni barqarorlashtirishga qaratilgan targʻibot tadbirlarini oʻtkazish.

2. Mahalla hududidagi ichki yoʻllarni shagʻallashtirish va u bilan bogʻliq xarajatlarni (yoqilgʻi-moylash materiallari) qoplash.

3. Piyodalar yoʻlakchalarini barpo etish va taʼmirlash.

4. Tungi yoritish chiroqlarini oʻrnatish.

5. Mahalla fuqarolar yigʻini binosini qurish, rekonstruksiya qilish, mukammal va joriy taʼmirlash hamda jihozlash.

6. Mahalla hududida mahalla bogʻlarini tashkil qilish, “Yashil makon” umummilliy loyihasi doirasida meva va manzarali daraxt koʻchatlari, butalar va gul koʻchatlari xarid qilish, ekish va parvarishlash.

7. Mahalla hududini obodonlashtirish, koʻkalamzorlashtirish hamda ommaviy hasharlar oʻtkazish uchun zarur boʻlgan tovar (ish, xizmat)lar xarid qilish.

Oʻzbekiston Respublikasi Prezidentining 2026-yil 24-iyundagi PF-116-son Farmoniga 7-ILOVA

Oʻzbekiston Respublikasi Prezidentining ayrim hujjatlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2022-yil 1-martdagi “Oila va xotin-qizlar bilan ishlash, mahalla va nuroniylarni qoʻllab-quvvatlash tizimini takomillashtirish chora-tadbirlari toʻgʻrisida”gi PF-81-son Farmonining 17-bandi toʻrtinchi xatboshisi quyidagi tahrirda bayon etilsin:

“mahallada faoliyat yurituvchi hokim yordamchisi, xotin-qizlar faoli, yoshlar yetakchisi, profilaktika va soliq inspektorlari, ijtimoiy xodimni ragʻbatlantirish yoki ularga nisbatan egallab turgan lavozimidan ozod etishgacha boʻlgan jazo choralarini qoʻllash boʻyicha mazkur xodimlarning ish beruvchilariga koʻrib chiqilishi majburiy boʻlgan taqdimnomalar kiritish”.

2. Oʻzbekiston Respublikasi Prezidentining 2023-yil 21-dekabrdagi “Mahalla institutining jamiyatdagi rolini tubdan oshirish va uning aholi muammolarini hal etishda birinchi boʻgʻin sifatida ishlashini taʼminlashga qaratilgan chora-tadbirlar toʻgʻrisida”gi PF-209-son Farmonida:

(a) 3-bandning uchinchi xatboshisi quyidagi tahrirda bayon etilsin:

“Uyushma raisi maqomi, tibbiy, transport va maishiy taʼminoti sharoitlari boʻyicha Bosh vazir oʻrinbosariga, Uyushma raisining oʻrinbosarlari vazir oʻrinbosariga tenglashtiriladi”;

(b) 4-band quyidagi tahrirda bayon etilsin:

“4. Mahallaning jamiyat hayotidagi oʻrnini oshirish hamda sohada boshqaruv tizimini takomillashtirish maqsadida mahalla raisi, hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim va soliq inspektori jamoatchilik asosida faoliyat yuritadigan “mahalla yettiligi”ni tashkil qiladi”;

(v) 7-bandning “a” kichik bandida:

(i) ikkinchi xatboshidagi “10” raqami “15” raqami bilan almashtirilsin;

(ii) quyidagi mazmundagi toʻrtinchi xatboshi bilan toʻldirilsin:

“mahalla hududida sanitariya qoidalarini buzganlik va noqonuniy qurilish uchun undirilgan jarimalarning 10 foizi”;

(iii) toʻrtinchi — oltinchi xatboshilar tegishincha beshinchi — yettinchi xatboshilar deb hisoblansin;

(iv) beshinchi xatboshidagi “2 000” raqami “5 000” raqami bilan almashtirilsin.

3. Oʻzbekiston Respublikasi Prezidentining 2020-yil 18-fevraldagi “Oʻzbekiston Respublikasi Mahalla va oilani qoʻllab-quvvatlash vazirligi faoliyatini tashkil etish toʻgʻrisida”gi PQ-4602-son qarorida:

(a) 9-bandning birinchi xatboshisidagi “Iqtisodiyot va sanoat vazirligi, Moliya vazirligi, Qurilish vazirligi” soʻzlari “Iqtisodiyot va moliya vazirligi, Qurilish va uy-joy kommunal xoʻjaligi vazirligi” soʻzlari bilan almashtirilsin;

(b) 10-bandda:

(i) uchinchi xatboshi quyidagi tahrirda bayon etilsin:

“komplekslar binolarini qurish uchun zarur yer uchastkalari tuman (shahar) hokimliklari tomonidan tegishli mahalla fuqarolar yigʻini hududidagi aholi bilan kelishilgan holda Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, Qurilish va uy-joy kommunal xoʻjaligi vazirligi, Oʻzbekiston mahallalari uyushmasi (keyingi oʻrinlarda — Uyushma) maʼqullagandan soʻng tanlab olinadi hamda qonunchilikda belgilangan tartibda ajratiladi”;

(ii) beshinchi xatboshi quyidagi tahrirda bayon etilsin:

“investorning huquq va majburiyatlari, komplekslar binolariga investorning oʻziga tegishli tutash obyektlarda (xonalarda) amalga oshirilishi mumkin boʻlgan faoliyat turlari va yoʻnalishlari, shuningdek, davlat-xususiy sheriklikning boshqa shartlari Uyushma tomonidan ishlab chiqiladigan namunaviy shakllar boʻyicha investor, davlat sherigi hamda tegishli mahalla fuqarolar yigʻini oʻrtasida tuziladigan uch tomonlama kelishuvda aks ettiriladi. Komplekslarni qurish uchun berilgan yer maydonlarida koʻp qavatli uy-joylar qurish taqiqlanadi”;

(v) 11-band quyidagi tahrirda bayon etilsin:

“11. Uyushmaning tuman (shahar) boʻlimlariga komplekslardagi foydalanilmayotgan xonalarni “E-auksion” elektron savdo platformasida elektron onlayn auksion orqali ijaraga berishdan tushayotgan mablagʻlarni Mahallaning ijtimoiy-iqtisodiy muammolarini hal etish jamgʻarmasiga oʻtkazgan holda mahallalar infratuzilmasini yaxshilash va rivojlantirishga yoʻnaltirish uchun sarflash huquqi berilsin”.

4. Oʻzbekiston Respublikasi Prezidentining 2023-yil 21-dekabrdagi “Oʻzbekiston mahallalari uyushmasi faoliyatini yoʻlga qoʻyish va mahallalarda boshqaruv tizimini takomillashtirishga oid qoʻshimcha chora-tadbirlar toʻgʻrisida”gi PQ-402-son qarorida:

(a) 2-bandning uchinchi xatboshisi quyidagi tahrirda bayon etilsin:

“Respublika kengashi, Qoraqalpogʻiston Respublikasi, viloyatlar, Toshkent shahri va tuman (shahar) mahallani qoʻllab-quvvatlash kengashlari jamoatchilik asosida faoliyat yuritadi, ishchi organi tegishlicha Uyushma va uning hududiy boʻlimlari hisoblanadi”;

(b) 1-ilovaning matni quyidagi tahrirda bayon etilsin:

“Oʻzbekiston mahallalari uyushmasining

TASHKILIY TUZILMASI

(v) 2-ilovaning matni quyidagi tahrirda bayon etilsin:

“Respublika mahallani qoʻllab-quvvatlash kengashi

TARKIBI

Izoh: Respublika kengashi aʼzolari boshqa ishga oʻtgan taqdirda, uning tarkibiga ushbu lavozimlarga yangidan tayinlangan yoxud zimmasiga tegishli funksiyalarni bajarish yuklangan shaxslar kiritiladi”;

(g) 3-ilovada:

(i) 8-bandda:

ikkinchi xatboshidagi “10” raqami “15” raqami bilan almashtirilsin;

quyidagi mazmundagi toʻrtinchi xatboshi bilan toʻldirilsin:

“mahalla hududida sanitariya qoidalarini buzganlik va noqonuniy qurilish uchun undirilgan jarimalarning 10 foizi”;

toʻrtinchi — oʻninchi xatboshilar tegishlicha beshinchi — oʻn birinchi xatboshilar deb hisoblansin;

oltinchi xatboshidagi “2 000” raqami “5 000” raqami bilan almashtirilsin;

(ii) 11-band quyidagi tahrirda bayon etilsin:

“11. Jamgʻarma mablagʻlari quyidagi yoʻnalishlarga sarflanadi:

mahalla hududidagi ichki yoʻllar, yoritish tizimi, elektr energiyasi hamda tabiiy gaz tarmoqlari, ichimlik va oqava suv tizimini taʼmirlash va tiklash;

mahalla hududidagi ichki yoʻllarni shagʻallashtirish, taʼmirlash va tiklash bilan bogʻliq xarajatlar (yoqilgʻi-moylash materiallari);

piyodalar yoʻlakchalarini barpo etish va taʼmirlash;

tungi yoritish chiroqlarini oʻrnatish;

mahalla fuqarolar yigʻini binosini qurish, rekonstruksiya qilish, mukammal va joriy taʼmirlash hamda jihozlash;

mahalla hududida sport maydoni, nuroniylar choyxonasi, yoshlar markazi, bolalar maydonchasi, kutubxona, madaniyat markazini qurish, mukammal va joriy taʼmirlash hamda ularni tegishlicha inventar, mebel, kompyuter texnikasi va boshqa uskunalar bilan jihozlash;

mahallalar tomonidan milliy qadriyatlarni targʻib qilish, shuningdek, har bir mahallada sogʻlom ijtimoiy-maʼnaviy muhitni barqarorlashtirishga qaratilgan targʻibot tadbirlarini oʻtkazish;

ijtimoiy himoyaga muhtoj va Ijtimoiy reyestrga kiritilgan oilalarga moddiy koʻmaklashish hamda ularning turar joylarini taʼmirlash va jihozlash;

mahalla hududida mahalla bogʻlarini tashkil qilish, “Yashil makon” umummilliy loyihasi doirasida meva va manzarali daraxt koʻchatlari, butalar va gul koʻchatlari xarid qilish, ekish va parvarishlash;

mahalla hududini obodonlashtirish, koʻkalamzorlashtirish hamda ommaviy hasharlar oʻtkazish uchun zarur boʻlgan tovar (ish, xizmat)lar xarid qilish;

zarur hollarda mahallalar faoliyatini joriy taʼminlash (kommunal toʻlovlar, kanselyariya mollari, raqamlashtirish xarajatlari va boshqalar);

Respublika mahallani qoʻllab-quvvatlash kengashining qaroriga asosan Jamgʻarma mablagʻlarining 10 foizini Oʻzbekiston mahallalari uyushmasining Mahallalar faoliyatini ragʻbatlantirish jamgʻarmasiga oʻtkazish”.

Izoh: Ushbu ilovaning:

2-bandi “v” kichik bandining uchinchi xatboshisi hamda 4-bandi “g” kichik bandining toʻrtinchi xatboshisi 2026-yil 1-iyuldan;

2-bandi “v” kichik bandining ikkinchi xatboshisi hamda 4-bandi “g” kichik bandining uchinchi xatboshisi 2027-yil 1-yanvardan kuchga kiradi.

Oʻzbekiston Respublikasi Prezidentining 2026-yil 24-iyundagi PF-116-son Farmoniga 8-ILOVA

Oʻzbekiston Respublikasi Prezidentining oʻz kuchini yoʻqotgan deb eʼtirof etilayotgan ayrim hujjatlari

ROʻYXATI

1. Oʻzbekiston Respublikasi Prezidentining 2023-yil 21-dekabrdagi “Mahalla institutining jamiyatdagi rolini tubdan oshirish va uning aholi muammolarini hal etishda birinchi boʻgʻin sifatida ishlashini taʼminlashga qaratilgan chora-tadbirlar toʻgʻrisida”gi PF-209-son Farmoniga 1 — 4-ilovalar.

2. Oʻzbekiston Respublikasi Prezidentining 2023-yil 21-dekabrdagi “Oʻzbekiston mahallalari uyushmasi faoliyatini yoʻlga qoʻyish va mahallalarda boshqaruv tizimini takomillashtirishga oid qoʻshimcha chora-tadbirlar toʻgʻrisida”gi PQ-402-son qarorining 9-bandi.