Oʻzbekiston harbiy sanʼati tarixi davlat muzeyini tashkil etish toʻgʻrisida (280-son)

03.06.2026

Oʻzbekiston Respublikasi Vazirlar Mahkamasining

qarori

Oʻzbekiston xalqining uch ming yildan ziyod davlatchilik tarixining ajralmas qismi boʻlgan harbiy tarix, buyuk sarkardalarning yuksak harbiy mahorati, milliy Qurolli Kuchlarimizning barpo etilishi va rivojlanish bosqichlari, shuningdek, Yangi Oʻzbekistonda harbiy sohada amalga oshirilayotgan tarixiy oʻzgarishlarni xalqimiz, ayniqsa, oʻsib kelayotgan avlod va dunyo jamoatchiligiga tanitish va targʻib etish maqsadida Vazirlar Mahkamasi qaror qiladi:

1. Oʻzbekiston Respublikasi Mudofaa vazirligi, Madaniyat vazirligi, Madaniy meros agentligi va Fanlar akademiyasi Tarix institutining Oʻzbekiston Respublikasi Qurolli Kuchlari davlat muzeyini Oʻzbekiston harbiy sanʼati tarixi davlat muzeyi (keyingi oʻrinlarda — muzey) etib qayta tashkil etish toʻgʻrisidagi taklifiga rozilik berilsin.

2. Oʻzbekiston harbiy sanʼati tarixi davlat muzeyini tashkil etish konsepti va tematik-ekspozitsion rejasini ishlab chiqish boʻyicha ishchi guruh tarkibi 1-ilovaga muvofiq tasdiqlansin.

3. Oʻzbekiston Respublikasi Mudofaa vazirligi:

a) Oʻzbekiston Respublikasi Madaniyat vazirligi, Madaniy meros agentligi, Fanlar akademiyasi Tarix instituti va Oʻzbekiston Badiiy akademiyasi bilan birgalikda:

muzey ekspozitsiyalarini yuksak gʻoyaviy-badiiy saviyada yaratish uchun eng isteʼdodli va mahoratli ijodkorlar hamda mutaxassislarni jalb etsin;

muzeyning umumiy koʻrinishi va meʼmoriy tuzilishi milliy uslub hamda anʼanalarga mos boʻlishini, ekspozitsiyalar jahondagi ilgʻor tajribalarni oʻzida mujassam etishini taʼminlasin;

muzey ekspozitsiyalari va kompozitsiyalarini taʼsirchan, interaktiv usullar, innovatsion texnologiyalar va sunʼiy intellekt imkoniyatlaridan keng foydalangan holda yaratsin;

muzey eksponatlari orqali mamlakatimiz harbiy tarixi va merosini haqqoniy yoritishga, harbiy xizmatning jozibadorligini hamda yoshlarning harbiy kasbga qiziqishini oshirishga, ularni vatanparvarlik ruhida tarbiyalashga alohida ahamiyat qaratsin;

muzeyda aholining mamlakatimiz harbiy sanʼati tarixi va milliy armiyamizning bugungi kuch-qudrati va salohiyati bilan yaqindan tanishishi, ilmiy izlanishlar olib borishi, koʻrgazmalar, ommaviy-madaniy tadbirlar hamda ijodiy uchrashuvlar oʻtkazishi uchun barcha sharoitlar yaratsin;

b) Oʻzbekiston Respublikasi Fanlar akademiyasi Tarix instituti va Madaniy meros agentligi bilan birgalikda bir oy muddatda Oʻzbekiston harbiy sanʼati tarixi davlat muzeyini tashkil etish konsepti va tematik-ekspozitsion rejasini ishlab chiqish boʻyicha ishchi guruh tomonidan ishlab chiqilgan muzeyni tashkil etish konsepti va tarixiy xronologik tartibdagi tematik-ekspozitsion rejasini tasdiqlasin;

v) Oʻzbekiston Respublikasi Madaniy meros agentligi bilan birgalikda muzey fondida saqlanayotgan eksponatlarni Milliy muzey fondining Davlat katalogiga kiritish ishlarini amalga oshirsin.

4. Muzeyning mavjud binosini rekonstruksiya qilish, hududini obodonlashtirish va jihozlash ishlarini amalga oshirish doirasida:

Oʻzbekiston Respublikasi Mudofaa vazirligi “Yagona buyurtmachi xizmati” — buyurtmachi etib;

rejalashtirilgan loyihalashtirish va qurilish-montaj ishlari boʻyicha bosh loyiha va bosh pudrat tashkilotlari davlat xaridlari toʻgʻrisidagi qonunchilikda belgilangan tartibda aniqlanishi;

loyiha-qidiruv va qurilish-montaj ishlari Oʻzbekiston Respublikasi Mudofaa vazirligining budjetdan tashqari mablagʻlari, Safarbarlik chaqiruv rezervi mablagʻlari va qonunchilik hujjatlarida taqiqlanmagan boshqa manbalar hisobidan moliyalashtirilishi;

qurilish-montaj ishlari boʻyicha muzey qiymati loyiha-smeta hujjatlari ishlab chiqilib, ijobiy ekspertiza xulosalari olingandan soʻng belgilansin.

5. Muzey boʻyicha belgilangan tartibda:

Oʻzbekiston Respublikasi Qurilish va uy-joy kommunal xoʻjaligi vazirligi loyiha-smeta hujjatlarini ishlab chiqishda shaharsozlik toʻgʻrisidagi qonunchilik hujjatlari, shaharsozlik normalari va qoidalari, texnik jihatdan tartibga solish sohasidagi normativ hujjatlar talablariga rioya etilishi va ekspertizadan oʻtkazilishini taʼminlasin;

Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspeksiyasi qurilish-montaj ishlarida tasdiqlangan loyiha hujjatlari talablariga rioya etilishi yuzasidan davlat nazoratini oʻrnatsin.

6. Belgilab qoʻyilsinki:

Oʻzbekiston Respublikasi Madaniy meros agentligi muzey eksponatlarini saqlash tartib-qoidalariga rioya etilishini nazorat qilib boradi;

muzeyning maʼmuriy-boshqaruv xodimlari, shuningdek, ijodiy xodimlar va mutaxassislar mehnatiga haq toʻlash shartlariga koʻra Vazirlar Mahkamasining 2018-yil 19-iyundagi 458-son qarori bilan tasdiqlangan davlat muzeylarining mos keluvchi xodimlariga tenglashtiriladi;

muzey binosini saqlash, jihozlash hamda uning faoliyatini taʼminlash bilan bogʻliq xarajatlar Mudofaa vazirligiga ushbu maqsadlar uchun har yili ajratiladigan Davlat budjeti mablagʻlari doirasida, Mudofaa vazirligining budjetdan tashqari mablagʻlari, muzey tomonidan pulli xizmatlar koʻrsatishdan tushadigan mablagʻlar va qonunchilik hujjatlarida taqiqlanmagan boshqa manbalar hisobidan amalga oshiriladi.

7. Oʻzbekiston Respublikasi Madaniy meros agentligi Fanlar akademiyasi Tarix instituti bilan birgalikda muzey faoliyatini samarali tashkil etish boʻyicha ilmiy-uslubiy va amaliy yordam koʻrsatsin.

8. Oʻzbekiston Respublikasi Tashqi ishlar vazirligi:

Mudofaa vazirligi bilan birgalikda muzey ekspozitsiyasini boyitish maqsadida xorijiy mamlakatlarda saqlanayotgan Oʻzbekiston harbiy tarixiga oid eksponatlar va hujjatlarni yoki ularning fotosurati va nusxalarini Oʻzbekistonga olib kelish choralarini koʻrsin;

muzeyga xorijiy davlatlar muzeylari va xalqaro tashkilotlar bilan ilmiy hamkorlikni oʻrnatish va rivojlantirishda amaliy yordam koʻrsatsin.

9. Oʻzbekiston Respublikasi Mudofaa vazirligi uch oy muddatda:

a) muzeyning yangi tashkiliy-shtat tuzilmasi hamda Oʻzbekiston harbiy sanʼati tarixi davlat muzeyi toʻgʻrisidagi nizomni belgilangan tartibda tasdiqlasin;

b) Raqamli texnologiyalar vazirligi va Madaniyat vazirligi bilan birgalikda:

muzeyni belgilangan tartibda telekommunikatsiya va yuqori tezlikdagi Internet tarmogʻiga ulanishini taʼminlasin;

muzeyga kirish chiptalarining onlayn savdosini tashkil etsin;

muzey eksponatlarini yuqori sifatli 3D skanerlash va fotogrammetriya orqali raqamli nusxalarga aylantirish, barcha eksponatlar boʻyicha yagona elektron reyestrni yaratish va muzey ichki maʼlumotlar bazasi bilan integratsiya qilish choralarini koʻrsin;

sunʼiy intellekt asosida muzey eksponatlari haqida avtomatik izoh, multiplikatsiyali taqdimot oʻtkazish va individual tarjima qilish boʻyicha intellektual audiogid, xorijiy tillarda onlayn gid, muzeyga elektron sayohat platformalari, 360° virtual turlar, raqamli arxivlar, onlayn ekskursiya va koʻrgazmalar oʻtkazish tizimini joriy etsin;

muzeyda sensorli panellar, multimedia installyatsiyalari, AR/VR texnologiyalari asosida jozibador muzey ekspozitsiyalarini, golografik namoyishlar, raqamli maketlar va interaktiv tajriba zonalarini tashkil etsin;

harbiy texnika, tarixiy voqealar va maxsus operatsiyalarni virtual muhitda simulyatsiya qilish imkoniyatini yaratsin;

muzeyning zamonaviy saytini yaratsin hamda unda muzey faoliyati bilan bogʻliq maʼlumotlar berib borilishini yoʻlga qoʻysin;

v) Oʻzbekiston Respublikasi Turizm qoʻmitasi bilan birgalikda muzeyni turizm yoʻnalishlari roʻyxatiga kiritsin hamda unga ichki va tashqi sayyohlarni keng jalb etish choralarini koʻrsin;

g) Oʻzbekiston Respublikasi Oliy taʼlim, fan va innovatsiyalar vazirligi hamda Maktabgacha va maktab taʼlimi vazirligi bilan birgalikda muzeyga taʼlim muassasalari talabalari, oʻquvchi-yoshlarning muntazam tashriflarini tashkil etsin.

10. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirishlar kiritilsin.

11. Ushbu qarorning bajarilishini nazorat qilish Oʻzbekiston Respublikasi mudofaa vaziri Sh.G. Xalmuxamedov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 3-iyun,

280-son

Vazirlar Mahkamasining 2026-yil 3-iyundagi 280-son qaroriga 1-ILOVA

Oʻzbekiston harbiy sanʼati tarixi davlat muzeyini tashkil etish konsepti va tematik-ekspozitsion rejasini ishlab chiqish boʻyicha ishchi guruh tarkibi

Izoh:

1. Ishchi guruh aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli vazifalarni bajarish yuklangan shaxslar kiritiladi.

2. Ishchi guruhi rahbari zaruratga koʻra ishchi guruhi tarkibiga boshqa mutaxassislarni jalb qilishi mumkin.

Vazirlar Mahkamasining 2026-yil 3-iyundagi 280-son qaroriga 2-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirishlar

1. Vazirlar Mahkamasining “Oʻzbekiston Respublikasi Qurolli Kuchlar muzeyi faoliyatini yanada takomillashtirishga doir qoʻshimcha chora-tadbirlar toʻgʻrisida” 2010-yil 25-martdagi 54-son qarorining 2, 3, 6, 7, 8, 9-bandlari va ilovasi oʻz kuchini yoʻqotgan deb topilsin.

2. Vazirlar Mahkamasining 2017-yil 11-dekabrdagi 975-son qarori bilan tasdiqlangan Oʻzbekiston Respublikasi Davlat budjeti hisobidan moliyalashtiriladigan muzeylari, ularning filial va boʻlimlari roʻyxatining “Oʻzbekiston Respublikasining respublika budjetidan moliyalashtiriladigan muzeylar” boʻlimi 7-pozitsiyasidagi “Qurolli Kuchlar tarixi davlat muzeyi” soʻzlari “Oʻzbekiston harbiy sanʼati tarixi davlat muzeyi” soʻzlari bilan almashtirilsin.

3. Vazirlar Mahkamasining “Oʻzbekiston Respublikasi Mudofaa vazirligining Maʼnaviyat va madaniyat departamenti faoliyatini tashkil etish chora-tadbirlari toʻgʻrisida” 2024-yil 24-iyundagi 356-son qarorida:

a) 1-bandning toʻrtinchi xatboshisida “Qurolli Kuchlar davlat muzeyi” soʻzlari “Oʻzbekiston harbiy sanʼati tarixi davlat muzeyi” soʻzlari bilan almashtirilsin;

b) 3-bandning uchinchi va toʻrtinchi xatboshilaridagi “Qurolli Kuchlar davlat muzeyi” soʻzlari “Oʻzbekiston harbiy sanʼati tarixi davlat muzeyi” soʻzlari bilan almashtirilsin;

v) 1-ilovaning 15-pozitsiyasida “Qurolli Kuchlar davlat muzeyi” soʻzlari “Oʻzbekiston harbiy sanʼati tarixi davlat muzeyi” soʻzlari bilan almashtirilsin;

g) 2-ilovada:

6-bandning ikkinchi xatboshisi quyidagi tahrirda bayon etilsin:

“Departament va uning boʻysunuvidagi boʻlinmalar tomonidan tashkil etiladigan teatr va konsert tomosha namoyishlariga, Oʻzbekiston harbiy sanʼati tarixi davlat muzeyiga kirish chiptalarini sotish, shartnoma asosida teatr, konsert-tomosha va boshqa ommaviy-madaniy tadbirlarni tashkil etish hamda boshqa pulli xizmatlar koʻrsatishdan tushgan tushumlar”;

8-band quyidagi tahrirda bayon etilsin:

“8. Departament va uning boʻysunuvidagi boʻlinmalar tomonidan oʻtkaziladigan tadbirlarda ishtirok etish, ular tomonidan tashkil etiladigan teatr va konsert-tomosha namoyishlariga, Oʻzbekiston harbiy sanʼati tarixi davlat muzeyiga kirish uchun chipta narxi, toʻgarak va oʻquv kurslari uchun toʻlovlar, Departament va uning boʻysunuvidagi boʻlinmalarga tegishli hududda jismoniy va yuridik shaxslar tomonidan oʻtkaziladigan tadbirlar, shuningdek, shartnoma asosida teatr, konsert-tomosha va boshqa ommaviy-madaniy tadbirlarni tashkil etish hamda boshqa pulli xizmatlar koʻrsatish uchun tariflar Oʻzbekiston Respublikasida koʻrsatiladigan oʻxshash xizmatlar uchun belgilangan oʻrtacha narxlarni qoʻllagan holda shakllantiriladi.”;

9-bandning “b” kichik bandi quyidagi tahrirda bayon etilsin:

“b) 25 foizdan koʻp boʻlmagan miqdorda — Departament va uning boʻysunuvidagi boʻlinmalarning harbiy xizmatchilari, Qurolli Kuchlar ishchi va xizmatchilarini moddiy ragʻbatlantirish uchun.”;

d) 3-ilovaning 1-bandi chiqarib tashlansin.