Ishlab chiqariladigan tabiiy gazga aksiz soligʻini toʻlash tartibi toʻgʻrisidagi nizomga oʻzgartirishlar kiritish haqida (2310-4-son)
02.06.2026
Oʻzbekiston Respublikasi Iqtisodiyot va moliya vazirligi Oʻzbekiston Respublikasi Soliq qoʻmitasining
Qarori
[Oʻzbekiston Respublikasi Adliya vazirligi tomonidan 2026-yil 2-iyunda roʻyxatdan oʻtkazildi, roʻyxat raqami 2310-4]
Oʻzbekiston Respublikasining “Normativ-huquqiy hujjatlar toʻgʻrisida”gi Qonuni, Oʻzbekiston Respublikasi Prezidentining 2022-yil 15-iyundagi PQ-280-son “Tabiiy gaz bozorini isloh qilishning qoʻshimcha chora-tadbirlari toʻgʻrisida”gi qaroriga muvofiq Oʻzbekiston Respublikasi Iqtisodiyot va moliya vazirligi va Soliq qoʻmitasi qaror qiladi:
1. Oʻzbekiston Respublikasi Moliya vazirligi va Davlat soliq qoʻmitasining 2011-yil 12-dekabrdagi 79, 2011-37-son qarori (roʻyxat raqami 2310, 2012-yil 9-yanvar) (Oʻzbekiston Respublikasi qonun hujjatlari toʻplami, 2012-y., 2-son, 20-modda) bilan tasdiqlangan Ishlab chiqariladigan tabiiy gazga aksiz soligʻini toʻlash tartibi toʻgʻrisidagi nizomga ilovaga muvofiq oʻzgartirishlar kiritilsin.
2. Mazkur qaror Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil hamda Oʻzbekiston Savdo-sanoat palatasi bilan kelishilgan.
3. Mazkur qaror rasmiy eʼlon qilingan kundan eʼtiboran kuchga kiradi.
Iqtisodiyot va moliya vaziri J. KUCHKAROV
Toshkent sh.,
2026-yil 13-may,
364-son
Soliq qoʻmitasi raisi F. PULATOV
Toshkent sh.,
2026-yil 28-aprel,
2026-08-son
Kelishildi:
Savdo-sanoat palatasi raisi D. VAXABOV
2026-yil 27-mart
Tadbirkorlik subyektlarining huquqlari va qonuniy manfaatlarini himoya qilish boʻyicha vakil A. BURIYEV
2026-yil 17-mart
Oʻzbekiston Respublikasi Iqtisodiyot va moliya vazirligining 2026-yil 13-maydagi 364-son va Soliq qoʻmitasining 2026-yil 28-apreldagi 2026-08-son qaroriga ILOVA
Ishlab chiqariladigan tabiiy gazga aksiz soligʻini toʻlash tartibi toʻgʻrisidagi nizomga kiritilayotgan oʻzgartirishlar
1. Muqaddima quyidagi tahrirda bayon etilsin:
“Mazkur Nizom Oʻzbekiston Respublikasida ishlab chiqariladigan tabiiy gazga aksiz soligʻini hisoblab chiqarish va toʻlash tartibini belgilaydi.”.
2. 1-bandning toʻrtinchi xatboshisi quyidagi tahrirda bayon etilsin:
“gaz bilan taʼminlovchi tashkilot — gazning pirovard isteʼmolchilarga yetkazib berilishi, uzatilishi va taqsimlanishini taʼminlovchi tashkilot.”.
3. 2-bandning ikkinchi va uchinchi xatboshilari chiqarib tashlansin.
4. IV boʻlim oʻz kuchini yoʻqotgan deb topilsin.