Qalbakilashtirilgan dori vositalarini Oʻzbekiston Respublikasi bojxona hududiga kiritilishini oldini olish toʻgʻrisida (962-son)

25.08.2000

buyruq

[Oʻzbekiston Respublikasi Adliya vazirligi tomonidan 2000-yil 25-avgustda 962-son bilan davlat roʻyxatidan oʻtkazilgan]

Keyingi vaqtlarda qator yevropa va amerika firmalarining dori preparatlari Hindistonning turli “ishlab chiqaruvchilari” tomonidan qalbakilashtirish hollari kuzatilmoqda. Lineks, Trixopol, Tinidazol, Suprastin, Biseptol, Lazeks, Serebrolizin, Sumamed va boshqalar shular jumlasidandir va ular Oʻzbekiston Respublikasi bojxona hududiga “xususiy tadbirkorlar” tomonidan kiritilishi mumkin. Qalbakilashtirilgan dori vositalari oʻzlarining mikrobiologik tomonidan oʻta ifloslanganligi, ayrim hollarda esa taʼsir etuvchi moddalarining umuman yoʻqligi bilan haqiqiylaridan farqlanadi. Yuqoridagilarga asosan, Oʻzbekiston Respublikasi “Dori vositalari va farmatsevtika faoliyati toʻgʻrisida”gi Qonunning 3, 5, 14-moddalarini, shuningdek, Oʻzbekiston Respublikasi Prezidentining 1998-yil 25-dekabrdagi “Isteʼmol buyumlarining ayrim turlarini olib kelish va olib chiqib ketishni tartibga solishga doir qoʻshimcha chora-tadbirlar toʻgʻrisida”gi PF-2160-sonli farmonini bajara borib, Respublikaga olib kirilayotgan dori vositalari va tibbiy texnika ustidan nazoratni kuchaytirish va ichki bozorni jismoniy va yuridik shaxslar tomonidan olib kelinayotgan sifatsiz dori preparatlaridan saqlash maqsadida buyuramiz:

1. Qoraqalpogʻiston Respublikasi, viloyatlar, Toshkent shahar, Bojxona boshqarmalari va “Toshkent-Aero” Ixtisoslashgan bojxona kompleksi boshliqlariga:

1.1. Oʻzbekiston Respublikasi hududiga jismoniy va yuridik shaxslar tomonidan Hindistonda rasman ishlab chiqarilmaydigan dori vositalarini olib kirish faqat Dori vositalari va tibbiy texnika sifatini nazorat qilish Bosh boshqarmasi laboratoriyalari tahlili asosida ruxsat berilsin.

1.2. Hindiston firmalari tomonidan ishlab chiqarilgan dori vositalarining bojxona rasmiylashtiriluvi qatʼiyan “Oʻzbekiston Respublikasida qayd etilgan va tibbiyot amaliyotida qoʻllashga ruxsat etilgan dori vositalari roʻyxati”ga asosan amalga oshirilsin (roʻyxat ilova qilinadi).

1.3. “Roʻyxatda” keltirilmagan dori vositalarining bojxona rasmiylashtiruvi Oʻzbekiston Respublikasi Sogʻliqni saqlash vazirligi Dori vositalari va tibbiy texnika sifatini nazorat qilish Bosh boshqarmasi tomonidan berilgan ruxsatnomaga asosan amalga oshirilsin.

2. Oʻzbekiston Respublikasi Sogʻliqni saqlash vazirligining Dori vositalari va tibbiy texnika sifatini nazorat qilish Bosh boshqarmasi boshligʻi (A.N. Yunusxoʻjayev)ga:

2.1 Oʻzbekiston Respublikasida yangi qayd etilgan va tibbiyot amaliyotida qoʻllashga ruxsat etilgan Hindiston ishlab chiqaruvchi firmalarining dori vositalari toʻgʻrisidagi qoʻshimcha roʻyxatlari muntazam ravishda Davlat Bojxona qoʻmitasiga taqdim etilishi taʼminlansin.

2.2 Hindistondan olib kelingan dori vositalarining sifat nazoratini zudlik bilan amalga oshirish choralari koʻrilsin va olingan natijalar Davlat Bojxona Qoʻmitasiga taqdim etilsin.

3. Oʻzbekiston Respublikasi Sogʻliqni saqlash vazirligining Dori vositalari va tibbiy texnika sifatini nazorat qilish Bosh boshqarmasi boshligʻi (A.N.Yunusxoʻjayev)ga va Bojxona Ekspertizasi Markazi boshligʻi (M.A.Rahimjonov)ga qalbakilashtirilgan va nostandart preparatlar aniqlangan hollarda, ishlatishga yaroqsiz dori vositalari va tibbiyot buyumlarini belgilangan tartibda yoʻq qilish boʻyicha laboratoriya xizmati va farmnazorat boʻyicha, mutaxassislar qatnashuvlarini taʼminlash vazifasi topshirilsin.

5. Ushbu buyruqning bajarilish nazorati Sogʻliqni saqlash vaziri birinchi muovini D.A.Asadov va Oʻzbekiston Respublikasi Davlat Bojxona Qoʻmitasi raisi muovini Sh.Sh.Shoraxmedovlarga yuklatilsin.

Oʻzbekiston Respublikasi Davlat bojxona qoʻmitasi raisi S. A. ORIPOV

Oʻzbekiston Respublikasi Sogʻliqni saqlash vaziri F. G. NAZIROV

Ilova

Hindiston firmalari tomonidan ishlab chiqarilgan “Oʻzbekiston Respublikasida qayd etilgan va tibbiyot amaliyotida qoʻllashga ruxsat etilgan dori vositalari roʻyxati”

(Oʻzbekiston Respublikasi vazirliklari, davlat qoʻmitalari va idoralarining meʼyoriy hujjatlari axborotnomasi, 2000-y., 16-son)