Sudning hal qiluv qaroriga asosan nikoh bekor qilinishi boʻyicha hisobot varaqasini toʻldirish toʻgʻrisidagi (961-son)

25.08.2000

Yoʻriqnoma

[Oʻzbekiston Respublikasi Adliya vazirligi tomonidan 2000-yil 25-avgustda 961-son bilan davlat roʻyxatidan oʻtkazilgan]

Ushbu Yoʻriqnoma Oʻzbekiston Respublikasining “Davlat statistikasi toʻgʻrisida”gi 1993-yil 2-sentabrdagi Qonuni va Oʻzbekiston Respublikasi Vazirlar Mahkamasining 1992-yil 12-noyabrdagi 523-sonli Qarori bilan tasdiqlangan, Oʻzbekiston Respublikasi Adliya vazirligi toʻgʻrisidagi Nizomga asosan ishlab chiqilib, yoʻriqnomada adliya va sud idoralari uchun majburiy boʻlgan hisobvaraqasini (ilova № 1) tuzish boʻyicha asosiy qoidalar koʻrsatilgan.

I. Umumiy qoidalar

1. Hisobot varaqalari sudlarning qonuniy kuchga kirgan qarorlari boʻyicha ikki nusxada toʻldirilib, bir nusxasi adliya boshqarmalariga har oyning 5-kuniga, adliya boshqarmalari har oyning 10-kuniga viloyat statistika boshqarmalariga taqdim etadi. Hisobot varaqasining ikkinchi nusxasi esa hisobotvaraqasini tuzgan sudda qoladi va maxsus jildlarda saqlanadi.

2. Sudning hal qiluv qaroriga asosan nikoh bekor qilinishi boʻyicha hisobot varaqasini qonuniy kuchga kirgan hal qiluv qarorlari asosida toʻldiriladi.

3. Hisobot varaqalari yoʻllanma xat bilan taqdim etiladi.

4. Statistik hisobotlarni haqiqiyligi va oʻz vaqtida taqdim qilish uchun tuman (shahar) sudlari raislari, Qoraqalpogʻiston Respublikasi Adliya vaziri, viloyat va shahar adliya boshqarmalari boshliqlari hamda aynan hisobot tuzuvchilar javobgardirlar.

II. Hisobot varaqasini toʻldirish tartibi

1. Nikoh bekor qilingunga qadar familiyasi ustuniga nikoh sud tomonidan bekor qilingunga qadar erkak yoki ayolning shaxsini belgilovchi hujjatda (pasport) qayd etilgan familiyasi toʻliq aniq va xatosiz yoziladi.

2. Sudning hal qiluv qarori bilan er-xotin oʻrtasida tuzilgan nikoh bekor qilinganda tomonlar familiyasini oʻzgartirilgan taqdirda “nikoh bekor qilingandan keyin” qatorida ushbu oʻzgartirilgan familiyasi aks ettiriladi.

3. “Ismi” qatoriga shaxsni belgilovchi hujjatda (pasport) qayd etilgan ismi jinsiga qarab “erkak”, “ayol” ustunlarida aks etiladi.

4. Shaxsini belgilovchi hujjatda (pasport) qayd qilinishiga qarab shaxsning tugʻilgan yili, oyi, kuni jinsiga qarab “erkak”, “ayol” ustunlarining “tugʻilgan vaqti” qatorida toʻliq va aniq aks etiladi.

5. “Yoshi” qatoriga sudning nikohini bekor qilish toʻgʻrisida hal qiluvchi qarori qonuniy kuchga kirgan kunigacha boʻlgan tomonlarning yoshi koʻrsatiladi.

6. Erkak yoki ayolning millati ularni shaxsini belgilovchi hujjat yaʼni pasportda qayd etilganiga qarab yoziladi.

7. Nikohi sud tomonidan bekor qilingan erkak yoki ayolni doimiy yashash joyi shaxsini belgilovchi hujjat (pasport) boʻyicha roʻyxatda turgan manzilgohi va shu manzilgohda sudning hal qiluv qarori qonuniy kuchga kirgan kunga qadar qaysi yildan boshlab doimiy yashab kelgani aks etiladi.

Masalan:

Shahar (qishloq) — Juma

Tuman — Pastdargʻom

Viloyat (oʻlka, respublika) — Samarqand

Muqimiy koʻchasi 32 uy 55 xona

1965-yildan doimiy yashaydi

8. Nikohi sud tomonidan bekor qilinayotgan erkak va ayolning maʼlumoti qanaqa boʻlsa “erkak”, “ayol” ustunlarida qayd etilgan maʼlumotlarning taalluqligiga qarab tagiga chiziladi.

Masalan:

9. Agarda nikohi bekor qilinayotgan erkak yoki ayolning birontasi muqaddam ham nikohda boʻlgan taqdirda “Nikohda boʻlgan” qatorida “erkak” va “ayol” ustunlaridagi birinchi-1 yoki takroran-2 yozuvining taalluqlisi boʻyicha tagiga chiziladi.

10. Sudning hal qiluv qaroriga koʻra bekor qilinayotgan nikoh qachon va qaysi yozuv bilan FXDYo idoralari orqali tuzilganligi toʻgʻrisidagi maʼlumot “Nikohni qayd etish” guvohnomasi boʻyicha 9 qatorda aks ettiriladi.

11. Nikohlari bekor qilinayotgan er-xotin oʻrtasida 18 yoshgacha boʻlgan jami bolalar soni hisobot varaqasining 10-qatorida oʻz aksini topadi.

12. Hisobot varaqasining toʻgʻri toʻldirilganligini tasdiqlash uchun tuman (shahar) sudining raisi va devonxona mudiri ismi va familiyasi yozilib, imzolanadi hamda sud muhri bilan tasdiqlanadi.

ILOVA № 1

(Oʻzbekiston Respublikasi vazirliklari, davlat qoʻmitalari va idoralarining meʼyoriy hujjatlari axborotnomasi, 2000-y., 16-son)