Davlat budjeti mablagʻlari hisobidan imtiyozli toifaga kiruvchi shaxslar davolanadigan kasalliklar roʻyxatiga oʻzgartirish kiritish toʻgʻrisida (3632-2-son)
19.05.2026
OʻZBEKISTON RESPUBLIKASI SOGʻLIQNI SAQLASH VAZIRINING
BUYRUGʻI
[Oʻzbekiston Respublikasi Adliya vazirligi tomonidan 2026-yil 19-mayda roʻyxatdan oʻtkazildi, roʻyxat raqami 3632-2]
Oʻzbekiston Respublikasi Prezidentining 2024-yil 5-sentabrdagi PQ-311-son “Davlat tibbiy sugʻurtasi mexanizmlarini joriy etishga oid chora-tadbirlar toʻgʻrisida”gi qaroriga muvofiq buyuraman:
1. Oʻzbekiston Respublikasi sogʻliqni saqlash vazirining 2025-yil 9-iyundagi 7-son buyrugʻi (roʻyxat raqami 3632, 2025-yil 19-iyun) (Qonunchilik maʼlumotlari milliy bazasi, 24.06.2025-y.,10/25/3632/0535-son) bilan tasdiqlangan Davlat budjeti mablagʻlari hisobidan imtiyozli toifaga kiruvchi shaxslar davolanadigan kasalliklar roʻyxatining matni ilovaga muvofiq tahrirda bayon etilsin.
2. Mazkur buyruq Oʻzbekiston Respublikasi Iqtisodiyot va moliya vazirligi, Raqobatni rivojlantirish va isteʼmolchilar huquqlarini himoya qilish qoʻmitasi hamda Davlat tibbiy sugʻurta jamgʻarmasi bilan kelishilgan.
3. Ushbu buyruq rasmiy eʼlon qilingan kundan eʼtiboran uch oy oʻtgach kuchga kiradi.
Vazir A. XUDAYAROV
Toshkent sh.,
2026-yil 10-aprel,
17-son
Kelishildi:
Iqtisodiyot va moliya vaziri J. KUCHKAROV
2026-yil 7-aprel
Davlat tibbiy sugʻurta jamgʻarmasi ijro etuvchi direktori Z. ERMATOV
2026-yil 27-mart
Raqobatni rivojlantirish va isteʼmolchilar huquqlarini himoya qilish qoʻmitasi raisi H. TURAXUJAYEV
2025-yil 5-dekabr
Oʻzbekiston Respublikasi sogʻliqni saqlash vazirining 2026-yil 10-apreldagi 17-son buyrugʻiga ILOVA
Davlat budjeti mablagʻlari hisobidan imtiyozli toifaga kiruvchi shaxslar davolanadigan kasalliklar
ROʻYXATI
Izoh:
Mazkur Roʻyxat asosida imtiyozli toifadagi shaxslar ulardagi kasallikning ogʻirlik darajasiga koʻra hududiy (Qoraqalpogʻiston Respublikasi, viloyatlar va Toshkent shahar) darajadagi hamda respublika darajasidagi tibbiyot tashkilotlarida, shuningdek Davlat tibbiyot oliy taʼlim tashkilotlarining klinikalari va nodavlat tibbiyot tashkilotlarida davolanadi.
Bunda:
1) “+” belgisi davolash imkoniyati borligini, “-” belgi esa davolash imkoniyati yoʻq ekanligini bildiradi;
2) tuman (shahar) darajasidagi shifoxonalarda ushbu Roʻyxatga kiritilmagan, shuningdek, yetarli moddiy-texnik baza va (yoki) mutaxassislar mavjud boʻlganda, mazkur Roʻyxatga kiritilgan barcha kasalliklarni qabul qilishga yoʻl qoʻyiladi;
3) yetarli moddiy-texnik baza va (yoki) mutaxassislar mavjud boʻlganda, hududiy (Qoraqalpogʻiston Respublikasi, viloyatlar va Toshkent shahar) darajadagi tibbiyot tashkilotlariga mazkur Roʻyxatga kiritilgan barcha kasalliklarni qabul qilishga ruxsat etiladi;
4) hududiy (Qoraqalpogʻiston Respublikasi, viloyatlar va Toshkent shahar) darajadagi tibbiyot tashkilotlarida kasalliklarni davolash uchun yetarli moddiy-texnik baza va (yoki) tegishli mutaxassislar mavjud boʻlmaganda, davolash imkoniyati yoʻq deb koʻrsatilgan (“-” belgili) kasalliklarni davolash boshqa hududdagi tibbiyot tashkilotlari, Davlat tibbiyot oliy taʼlim tashkilotlarining klinikalari yoki respublika darajasidagi tibbiyot tashkilotlarida amalga oshirilishi mumkin;
5) imtiyozli toifaga kiruvchi shaxslar tibbiy xizmat koʻrsatadigan Davlat tibbiy sugʻurtasi jamgʻarmasi bilan shartnomasi mavjud davlat yoki nodavlat tibbiyot tashkilotlarini oʻz xohishiga koʻra erkin tanlash huquqiga ega boʻladi;
6) respublika ixtisoslashtirilgan ilmiy-amaliy tibbiyot markazlari bilan birlashtirilgan filiallarining hududidagi bemorlarga Respublika ixtisoslashtirilgan ilmiy-amaliy tibbiyot markazida kasallikni davolash imkoniyatiga koʻra hudud va respublika darajasida xizmat koʻrsatiladi hamda xarajatlar Davlat tibbiy sugʻurtasi jamgʻarmasi tomonidan qoplab beriladi;
7) nodavlat tibbiyot tashkilotlariga ruxsat etilgan ixtisoslik (yoʻnalish) doirasida mazkur Roʻyxatdagi kasalliklarning barcha darajalarini qabul qilishga ruxsat etiladi.