Avtomobil oynasi ishlab chiqarishni tashkil etish toʻgʻrisida (432-son)

08.10.1998

Oʻzbekiston Respublikasi Vazirlar Mahkamasining

qarori

[Koʻchirma]

Avtomobil oynasi ishlab chiqarishni tashkil etish maqsadida Vazirlar Mahkamasi qaror qiladi:

1. “Oʻzavtosanoat” uyushmasining Fargʻona 2-uysozlik kombinati bazasida, loyiha boʻyicha yillik quvvati 200 mingta avtokomplektni tashkil qiladigan va 2001-yilning birinchi choragida foydalanishga topshiriladigan, avtomobil oynasi ishlab chiqarishni tashkil etish toʻgʻrisidagi taklifiga rozilik berilsin.

2. “Oʻzavtosanoat” uyushmasi bilan Italiyaning “Tekint” kompaniyasi oʻrtasida avtomobillarning old tomoni oynasi qalinligi 4 mm boʻlgan tripleks, yon va orqa tomoni oynasi qalinligi 3 dan 4 millimetrgacha boʻlgan toblangan oyna ishlab chiqarish boʻyicha texnologik asbob-uskunalar yetkazib berish yuzasidan qiymati 43,5 mln Germaniya markasi boʻlgan kontrakt imzolanganligi maʼlumot uchun qabul qilinsin.

3. Belgilab qoʻyilsinki, kontraktni mablagʻ bilan taʼminlash:

kontrakt qiymatining 37 mln Germaniya markasi miqdoridagi 85 foizi Italiyaning “SAChE” kompaniyasi sugʻurta qoplamasi ostida Italiyaning “Natsional del Lavoro” banki krediti hisobiga qayta moliyalashtiriladigan Oʻzbekiston Respublikasi Tashqi iqtisodiy faoliyat milliy banki krediti hisobiga;

kontrakt qiymatining 6,5 mln Germaniya markasi miqdoridagi 15 foizi, shuningdek bank komissiyasi hamda “Natsional del Lavoro” bankining jalb etiladigan krediti boʻyicha boshqa xarajatlar “Asaka” banki krediti hisobiga amalga oshiriladi.

5. Ushbu loyihani amalga oshirish uchun jalb etiladigan kreditlarni va ular boʻyicha foizlar 1, 2-ilovalarga* muvofiq “Oʻzavtosanoat” uyushmasining oʻz mablagʻlari hisobiga qoplansin.

* 1 va 2-ilovalar berilmaydi.

6. Avtomobil oynasi ishlab chiqarish boʻyicha yangidan tashkil etiladigan korxonani qurish va rekonstruksiya qilish boʻyicha bosh buyurtmachi etib “Oʻzavtosanoat” uyushmasi, bosh pudratchi etib “Oʻzsanoatxoʻjalikqurilish” korporatsiyasi, bosh loyihachi etib “Oʻzogʻirsanoat” aksiyadorlik jamiyati belgilansin.

7. “Oʻzavtosanoat” uyushmasiga 1999-yil 1-iyulgacha korxonani loyihalashni va ishchi chizmalar boʻyicha qurishni ayni bir paytda amalga oshirishiga istisno tartibida ruxsat etilsin.

8. Oʻzbekiston Respublikasi Tashqi iqtisodiy aloqalar vazirligi avtomobil oynasi ishlab chiqarish boʻyicha texnologik asbob-uskunalar, xomashyo, materiallar va butlovchi buyumlar yetkazib berish yuzasidan kontraktlarni belgilangan tartibda roʻyxatdan oʻtkazsin.

9. Oʻzbekiston Respublikasi Tashqi iqtisodiy faoliyat milliy banki Italiyaning “SAChE” kompaniyasi sugʻurta qoplamasi ostida Italiyaning “Natsional del Lavoro” banki bilan kredit bitimi tuzsin va olingan kreditlarni “Oʻzavtosanoat” uyushmasiga belgilangan tartibda qayta moliyalashtirsin.

10. Oʻzbekiston Respublikasi Moliya vaziri:

Oʻzbekiston Respublikasi Tashqi iqtisodiy faoliyat milliy bankining Italiyaning “Natsional del Lavoro” banki va Italiyaning “SAChE” kompaniyasi oldidagi;

“Oʻzavtosanoat” uyushmasining Oʻzbekiston Respublikasi Tashqi iqtisodiy faoliyat milliy banki va “Asaka” banki oldidagi toʻlov majburiyatlari boʻyicha Oʻzbekiston Respublikasi Hukumati nomidan belgilangan tartibda kafolatlar berishga vakil qilinsin.

11. Oʻzbekiston Respublikasi Adliya vazirligi Oʻzbekiston Respublikasi Hukumati nomidan beriladigan kafolatlar boʻyicha belgilangan tartibda yuridik xulosalar bersin.

12. “Oʻzavtosanoat” uyushmasining avtomobil oynasi ishlab chiqarish boʻyicha tashkil qilinayotgan korxonasiga, “OʻzDEUavto” qoʻshma korxonasi uchun butlovchi buyumlar ishlab chiqaruvchi sifatida, Vazirlar Mahkamasining 1992-yil 5-noyabrdagi 509-son qarorining 8-bandida nazarda tutilgan imtiyozlar tatbiq etilsin.

13. Oʻzbekiston Respublikasi Makroiqtisodiyot va statistika vazirligi avtomobil oynasi ishlab chiqarish boʻyicha loyihani belgilangan tartibda Oʻzbekiston Respublikasining Investitsiya dasturiga kiritsin.

14. Oʻzbekiston Respublikasi Tashqi ishlar vazirligi “Oʻzavtosanoat” uyushmasi buyurtmanomalariga binoan ushbu loyiha doirasida jalb etiladigan xorijiy mutaxassislarga, ularni konsullik yigʻimlaridan ozod qilgan holda, kelish vizalari rasmiylashtirilishini belgilangan tartibda taʼminlasin.

15. Oʻzbekiston Respublikasi Ichki ishlar vazirligi “Oʻzavtosanoat” uyushmasining yangidan tashkil etilayotgan korxonasi buyurtmanomalariga binoan xorijiy mutaxassislarga, ularni davlat bojlari toʻlashdan ozod qilgan holda, vizalar berilishini va muddati uzaytirilishini, turar joyi boʻyicha milliy pasportlari roʻyxatdan oʻtkazilishini va roʻyxatdan oʻtkazilganlik muddati uzaytirilishini belgilangan tartibda taʼminlasin.

16. “Oʻzavtosanoat” uyushmasining yangidan tashkil qilinayotgan korxonasi buyurtmanomalariga binoan kelayotgan xorijiy mutaxassislarga respublika hududida yashash va transportning barcha turlarida yurish haqini Oʻzbekiston Respublikasi fuqarolari uchun nazarda tutilgan tariflar boʻyicha toʻlash huquqi berilsin.

17. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ. T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 8-oktabr,

432-son