“Boj olinmaydigan savdo doʻkoni” bojxona rejimi toʻgʻrisidagi nizomni tasdiqlash haqida (1317-son)
27.02.2004
Oʻzbekiston Respublikasi Davlat bojxona qoʻmitasining
Qarori
[Oʻzbekiston Respublikasi Adliya vazirligi tomonidan 2004-yil 27-fevralda 1317-son bilan davlat roʻyxatidan oʻtkazildi]
Oʻzbekiston Respublikasi Bojxona kodeksining 29-moddasi va Oʻzbekiston Respublikasi Vazirlar Mahkamasining 2003-yil 20-noyabrdagi “Bojxona ombori, erkin ombor va boj olinmaydigan savdo doʻkoni faoliyatini litsenziyalash toʻgʻrisidagi nizomlarni tasdiqlash haqida”gi 523-sonli qaroriga asosan Oʻzbekiston Respublikasi Davlat bojxona qoʻmitasi qaror qiladi:
1. “Boj olinmaydigan savdo doʻkoni” bojxona rejimi toʻgʻrisidagi nizom ilovaga muvofiq tasdiqlansin.
2. Mazkur qaror Oʻzbekiston Respublikasi Adliya vazirligida davlat roʻyxatiga olinganidan soʻng oʻn kun muddat oʻtgach kuchga kiritilsin.
3. Ushbu qaror kuchga kirishi bilan “Boj olinmaydigan savdo doʻkoni” bojxona rejimi toʻgʻrisidagi nizom oʻz kuchini yoʻqotgan deb hisoblansin (1997-y., 10-may, roʻyxat raqami 719-son).
4. Mazkur qarorning ijrosini nazorat qilish rais oʻrinbosari S. Nasirov zimmasiga yuklansin.
Davlat bojxona qoʻmitasi raisi B. PARPIYEV
Toshkent sh.,
2004-yil 20-yanvar,
01-02/12-4-son
Davlat bojxona qoʻmitasining 2004-yil 20-yanvardagi 01-02/12-4-sonli qarori bilan TASDIQLANGAN
Boj olinmaydigan savdo doʻkoni bojxona rejimi toʻgʻrisidagi
NIZOM
Ushbu Nizom Oʻzbekiston Respublikasi Bojxona kodeksining 29-moddasi va Oʻzbekiston Respublikasi Vazirlar Mahkamasining 2003-yil 20-noyabrdagi “Bojxona ombori, erkin ombor va boj olinmaydigan savdo doʻkoni faoliyatini litsenziyalash toʻgʻrisidagi nizomlarni tasdiqlash haqida”gi 523-sonli qaroriga muvofiq ishlab chiqilgan.
I. Umumiy qoidalar
1. Boj olinmaydigan savdo doʻkoni shunday rejimki, bunda tovarlar bojxona hududining bojxona organlari, Oʻzbekiston Respublikasi Bojxona kodeksiga muvofiq belgilangan joylarda boj, soliqlar va iqtisodiy siyosat choralari qoʻllanmasdan bojxona nazorati ostida turadi hamda sotuvga chiqariladi.
2. Boj olinmaydigan savdo doʻkoni rejimiga bojxona hududiga olib kirish hamda undan olib chiqish va Oʻzbekiston Respublikasi hududida sotilishi taqiqlangan tovarlar joylashtirilishi mumkin emas.
3. Oʻzbekiston Respublikasi hududida sotilishi cheklangan tovarlar qonun hujjatlarida belgilangan tartibda boj olinmaydigan savdo doʻkoni rejimida sotilishi mumkin.
4. Boj olinmaydigan savdo doʻkoni rejimiga joylashtirilgan tovarlar boj olinmaydigan maxsus savdo doʻkonlarida sotiladi.
41. Boj olinmaydigan savdo doʻkoni ikki turga boʻlinadi:
a) Oʻzbekiston Respublikasi Davlat chegarasini kesib oʻtadigan jismoniy shaxslar uchun boj olinmaydigan savdo doʻkoni — Oʻzbekiston Respublikasining bojxona hududiga kirib kelayotgan va Oʻzbekiston Respublikasi bojxona hududi doirasidan chiqib ketayotgan jismoniy shaxslar tomonidan Oʻzbekiston Respublikasi bojxona hududiga olib kelingan xorijiy tovarlarni yoki Oʻzbekiston Respublikasi hududidan chiqadigan tovarlarni erkin almashtiriladigan valyutada sotish, shu jumladan joyning oʻzida isteʼmol qilish uchun chakana sotish uchun moʻljallangan;
b) Oʻzbekiston Respublikasi Tashqi ishlar vazirligida akkreditatsiya qilingan xorijiy shaxslar uchun boj olinmaydigan savdo doʻkoni — xorijiy davlatlarning diplomatik vakolatxonalari va konsullik muassasalariga, xalqaro tashkilotlar va ularga tenglashtirilgan ushbu tashkilotlarning vakolatxonalariga, xorijiy xodimlariga, shuningdek ular bilan birga yashaydigan va Oʻzbekiston Respublikasi fuqarolari hisoblanmaydigan, Oʻzbekiston Respublikasi Tashqi ishlar vazirligida belgilangan tartibda akkreditatsiya qilingan ularning oila aʼzolariga Oʻzbekiston Respublikasi bojxona hududiga olib kelingan xorijiy tovarlarni shaxsiy foydalanish uchun erkin almashtiriladigan valyutaga sotishga moʻljallangan.
5. Oʻzbekiston Respublikasi Davlat chegarasini kesib oʻtadigan jismoniy shaxslar uchun boj olinmaydigan savdo doʻkonlari yoʻlovchilarning xalqaro yoʻnalishlari uchun ochilgan aeroportlarda, portlarda, jismoniy shaxslar chegarani kesib oʻtishlari uchun moʻljallangan Oʻzbekiston Respublikasining davlat chegaralari orqali oʻtkazish punktlarida taʼsis etilishi mumkin.
Oʻzbekiston Respublikasi Tashqi ishlar vazirligida akkreditatsiya qilingan xorijiy shaxslar uchun boj olinmaydigan savdo doʻkonlari Toshkent shahrida va davlat bojxona xizmati organlari tomonidan belgilanadigan joylarda ochilishi va faoliyat koʻrsatishi mumkin.
6. Boj olinmaydigan savdo doʻkoni hududi (savdo zallari, yordamchi binolar va ombor) bojxona nazorati zonasi hisoblanadi.
7. Agar bojxona toʻlovlari toʻlanishi lozim boʻlsa, ularning toʻlanishi uchun javobgarlik boj olinmaydigan savdo doʻkonining egasi zimmasiga tushadi.
II. Boj olinmaydigan savdo doʻkoniga tovarlarning kelib tushishi va tovarlarni boj olinmaydigan savdo doʻkoni bojxona rejimida joylashtirish
8. Boj olinmaydigan savdo doʻkoni bojxona rejimida joylashtirilgan tovarlarni bojxona rasmiylashtiruvidan oʻtkazish joyi boj olinmaydigan savdo doʻkoni joylashgan bojxona organining faoliyat hududida boʻlishi mumkin.
9. Tovarlar boj olinmaydigan savdo doʻkoni omboriga bojxona organining vakolatli mansabdor shaxsi ishtirokida yoki uning xabardorligi ostida joylashtiriladi.
10. Tovarlarni boj olinmaydigan savdo doʻkoni bojxona rejimiga joylashtirish 1-ilovaga muvofiq bojxona yuk deklaratsiyasini toʻldirish orqali amalga oshiriladi.
11. Bojxona yuk deklaratsiyasi bilan bir vaqtda yuk va tovar ishlab chiqarish hujjatlari (yukxatlar, konosamentlar, spetsifikatsiyalar, fakturalar) taqdim etiladi.
12. Sertifikatlanishi lozim boʻlgan tovarlarni boj olinmaydigan savdo doʻkoni bojxona rejimida joylashtirganda, ularni Oʻzbekiston Respublikasining bojxona hududiga olib kirganda tegishli sertifikatni taqdim etish talab qilinadi.
13. Tovarlarni boj olinmaydigan savdo doʻkoni bojxona rejimida joylashtirganda bojxona rasmiylashtiruvlari uchun bojxona yigʻimlari belgilangan tartibda undiriladi.
14. Boj olinmaydigan savdo doʻkoni bojxona rejimiga maʼlum qilinmagan tovarlarni saqlash va sotish uchun boj olinmaydigan savdo doʻkonining savdo zallari, yordamchi binolari va omboridan foydalanishga yoʻl qoʻyilmaydi.
III. Boj olinmaydigan savdo doʻkonida tovarlarni sotish
15. Oʻzbekiston Respublikasi Davlat chegarasini kesib oʻtadigan jismoniy shaxslar uchun boj olinmaydigan savdo doʻkonlarida tovarlarni sotish faqat xaridorning shaxsini tasdiqlaydigan hujjat taqdim etilgandan keyin amalga oshiriladi. Bunda fiskal xotiraga ega boʻlgan nazorat-kassa mashinalari Davlat reyestriga kiritilgan fiskal xotirali nazorat-kassa mashinasining tovar sotilganligini tasdiqlaydigan chekida quyidagi maʼlumotlar boʻlishi kerak:
kassa cheki raqami;
reysning raqami va xaridorning samolyotdagi joyi raqami;
xarid qilingan vaqt va sana;
sotiladigan tovarning nomi, narxi va miqdori;
sotuvchi tomonidan olingan xorijiy valyuta summasi;
nazorat-kassa mashinasining zavod raqami;
fiskal rejim belgisi;
boj olinmaydigan savdo doʻkonining nomi;
soliq toʻlovchi — boj olinmaydigan savdo doʻkoni egasining identifikatsiya raqami.
Oʻzbekiston Respublikasi Tashqi ishlar vazirligida akkreditatsiya qilingan xorijiy jismoniy shaxslar uchun boj olinmaydigan savdo doʻkonida tovarlarni sotish faqat Oʻzbekiston Respublikasi Tashqi ishlar vazirligida belgilangan tartibda berilgan akkreditatsiya kartochkasi taqdim etilganidan keyin amalga oshiriladi. Bunda fiskal xotiraga ega boʻlgan nazorat-kassa mashinalari Davlat reyestriga kiritilgan fiskal xotirali nazorat-kassa mashinasining tovar sotilganligini tasdiqlaydigan chekida quyidagi maʼlumotlar boʻlishi kerak:
kassa cheki raqami;
boj olinmaydigan savdo doʻkoni egasi — nomi va pochta manzili;
Oʻzbekiston Respublikasi Tashqi ishlar vazirligida berilgan akkreditatsiya kartochkasining toifasi, raqami, xodimning yoki uning oila aʼzosining familiyasi, ismi va otasining ismi, lavozimi, kartochka kim tomonidan berilganligi va uning amal qilish muddati koʻrsatilishi kerak;
xarid qilingan vaqt va sana;
tovarning nomi, miqdori, bittasining qiymati, umumiy qiymati;
nazorat-kassa mashinasining zavod raqami;
fiskal rejim belgisi;
soliq toʻlovchi — boj olinmaydigan savdo doʻkoni egasining identifikatsiya raqami.
151. Xorijiy davlatlarning diplomatik vakolatxonalari va konsullik muassasalari, xalqaro tashkilotlarning vakolatxonalari va ularga tenglashtirilgan vakolatxonalar boj olinmaydigan savdo doʻkonlaridan ushbu Nizomga 2-ilovaga muvofiq shakl boʻyicha ikki nusxada tuziladigan buyurtmanomalar asosida Oʻzbekiston Respublikasi Tashqi ishlar vazirligida akkreditatsiya qilingan xorijiy shaxslar uchun tovarlarni sotib olishlari mumkin.
Buyurtmanomaning bir nusxasi boj olinmaydigan savdo doʻkonida saqlanadi, ikkinchi nusxasi xaridorga qaytariladi.
Buyurtmanomada quyidagi maʼlumotlar boʻlishi kerak:
xorijiy davlatning diplomatik vakolatxonasi yoki konsullik muassasasining, xalqaro tashkilot vakolatxonasining va unga tenglashtirilgan vakolatxonaning nomi;
xorijiy davlatning diplomatik vakolatxonasi yoki konsullik muassasasining, xalqaro tashkilot vakolatxonasi va unga tenglashtirilgan vakolatxonaning xaridni amalga oshirish vakolati berilgan shaxsining familiyasi, ismi, otasining ismi, toifasi, shuningdek akkreditatsiya kartochkasi raqami;
tovarning nomi, miqdori, bittasining qiymati, umumiy qiymati;
buyurtmanoma tuzilgan sana;
xorijiy davlatning diplomatik vakolatxonasi yoki konsullik muassasasi, xalqaro tashkilot vakolatxonasi va unga tenglashtirilgan vakolatxona boshligʻining familiyasi, ismi, otasining ismi, imzosi;
tovarlarni sotib olish maqsadi.
16. Boj olinmaydigan savdo doʻkonida tovarlar erkin muomaladagi valyutada naqd pulga yoki bank plastik va kredit kartochkalari yoki xorijiy valyutadagi bank oʻtkazmalari boʻyicha sotiladi.
17. Quyidagilar boj olinmaydigan savdo doʻkoni bojxona rejimida sotilishiga yoʻl qoʻyilmaydi:
a) Oʻzbekiston Respublikasining bojxona hududiga olib kelish va undan olib chiqish taqiqlangan tovarlar, shu jumladan olib chiqilishiga litsenziya talab etiladigan tovarlar, rangli va qora metallardan tayyorlangan yuksak darajada qayta ishlangan tayyor buyumlar bundan mustasno;
v) chakana sotish uchun oʻralgan dori-darmon vositalari (shu jumladan, provitaminlar, vitaminlar, gormonlar va antibiotiklar), agar ular vrachning retseptisiz (tayinlashuvisiz) sotilishi mumkin boʻlmasa;
g) davlat asillik tamgʻasiga ega boʻlmagan qimmatbaho metallar va toshlardan yasalgan buyumlar;
d) Oʻzbekiston Respublikasi hududida aylanishi va sotilishi taqiqlangan tovarlar;
e) boshqa davlat organlarining nazoratidan oʻtishi kerak boʻlgan tovarlar, ushbu organlarning ruxsatnomasi mavjud boʻlmagan taqdirda;
yo) jismoniy shaxslarning shaxsiy foydalanishi yoki isteʼmol qilishi uchun moʻljallanmagan tovarlar;
j) vazni ogʻir tovarlar (20 kilogrammdan ortiq ogʻirlikda) va oʻlchami katta tovarlar (uzunligi, kengligi va balandligi oʻlchamlari jami 200 santimetrdan ortiq boʻlganda).
Oʻzbekiston Respublikasi Davlat chegarasini kesib oʻtmaydigan jismoniy shaxslarga va Oʻzbekiston Respublikasi Tashqi ishlar vazirligida akkreditatsiya qilinmagan xorijiy shaxslarga boj olinmaydigan savdo doʻkonlarida tovarlar sotishga (sotib olishga) ruxsat berilmaydi.
18. Boj olinmaydigan savdo doʻkonida namunalar boʻyicha, oldindan buyurtma berish orqali (Oʻzbekiston Respublikasi Tashqi ishlar vazirligida akkreditatsiya qilingan xorijiy shaxslar uchun boj olinmaydigan savdo doʻkonlaridan tashqari), uyga olib borib berish bilan, toʻlov muddatini uzaytirish bilan, shuningdek, qoʻshimcha xizmatlarni koʻrsatish bilan sotishga yoʻl qoʻyilmaydi (sotishdan oldingi tayyorgarlik, qadoqlashdan, namoyish qilishdan, qayta oʻrab berishdan va shunga oʻxshash ishlardan tashqari).
19. Tovarlarni boj olinmaydigan savdo doʻkonining yordamchi binolaridan va omboridan sotishga yoʻl qoʻyilmaydi.
20. Boj olinmaydigan savdo doʻkoni bojxona rejimida joylashtirilgan tovarlar bilan ularning saqlanishini taʼminlash uchun zarur operatsiyalarni, shuningdek, tovarlarni sotishga tayyorlash boʻyicha operatsiyalarni (oʻramlarni ochish, idishlardan boʻshatib olish va h.k.) amalga oshirishi mumkin.
21. Tovarlar saqlanishini taʼminlash operatsiyalari boj olinmaydigan savdo doʻkonining omborida, tovarlarni sotishga tayyorlash operatsiyalari esa boj olinmaydigan savdo doʻkonining ombori yoki yordamchi binolarida amalga oshiriladi. Mazkur operatsiyalar bojxona nazorati ostida amalga oshiriladi.
22. Boj olinmaydigan savdo doʻkonida sotiladigan tovarlar bojxona organi bilan kelishib olingan maxsus markirovkaga ega boʻlishi va chakana sotish uchun oldindan qadoqlangan boʻlishi kerak.
23. Bojxona organi boj olinmaydigan savdo doʻkonidan sotib olingan tovarlarning haqiqatda olib oʻtilishi ustidan nazoratni amalga oshiradi.
24. Oʻzbekiston Respublikasi Davlat chegarasini kesib oʻtadigan jismoniy shaxslar, shuningdek Oʻzbekiston Respublikasi Tashqi ishlar vazirligida akkreditatsiya qilingan xorijiy shaxslarning boj olinmaydigan savdo doʻkonidan sotib olgan tovarlarni almashtirish va ayirboshlash Oʻzbekiston Respublikasining qonun hujjatlarida belgilangan tartibda amalga oshiriladi.
Bunda, agar yangi tovar Oʻzbekiston Respublikasidan tashqariga olib chiqib ketilmayotgan boʻlsa, bunday tovar import boji va soliqlarga tortiladi, ularni undirish esa bojxona organlari zimmasiga yuklatiladi, Oʻzbekiston tovarlari bundan mustasno.
Tovarlarni bojsiz olib kirishning normasi hamda aksiz soligʻi va qoʻshilgan qiymat soligʻi solinmaydigan tovarlarni olib kirish normasi jismoniy shaxs tomonidan Oʻzbekiston Respublikasi tashqarisidan olib kiriladigan va uning tomonidan Oʻzbekiston Respublikasi bojxona hududiga kirishda boj olinmaydigan savdo doʻkonlaridan sotib olingan tovarlarning jamiga nisbatan qoʻllaniladi.
Oʻzbekiston Respublikasi Tashqi ishlar vazirligida akkreditatsiya qilingan xorijiy jismoniy shaxslarga, shuningdek xorijiy davlatlarning diplomatik vakolatxonalari va konsullik muassasalariga, xalqaro tashkilotlarning vakolatxonalariga va ularga tenglashtirilgan vakolatxonalarga Oʻzbekiston Respublikasi Tashqi ishlar vazirligida akkreditatsiya qilingan xorijiy shaxslar uchun boj olinmaydigan savdo doʻkonlaridan aksiz toʻlanadigan tovarlarni mazkur Nizomning 3 va 4-ilovalarida koʻrsatib oʻtilgan miqdorlarda xarid qilishga ruxsat beriladi.
25. Boj olinmaydigan savdo doʻkoni bojxona rejimida joylashtirilgan tovarlarni bunday tovarlarni sotib olish huquqiga ega boʻlmagan shaxslarga sotish yoki boshqacha tarzda begonalashtirishda yoxud ana shunday tovarlardan ularning bojxona rejimiga muvofiq boʻlmagan holda foydalanganda, shuningdek, tovarlar yoʻqolganda yoki yetishmaganda boj olinmaydigan savdo doʻkonining egasi erkin muomalaga chiqarish yoki eksport bojxona rejimiga koʻra toʻlanishi lozim boʻladigan bojxona toʻlovlarini toʻlashi kerak, lekin tovarlar falokatlar yoki yengib boʻlmas kuchlarning xatti-harakatlari oqibatida yoʻq boʻlib ketgan, qaytarib boʻlmaydigan darajada yoʻqolgan yoxud kamomad tabiiy ishdan chiqish natijasida yuz bergan yoki tashish va saqlashning normal sharoitida kamayib ketgan hollar bundan mustasno.
IV. Boj olinmaydigan savdo doʻkoni bojxona rejimiga joylashtirilgan tovarlar hisobi
26. Boj olinmaydigan savdo doʻkoni bojxona rejimidagi tovarlar doʻkon egasi va bojxona organi tomonidan albatta hisobga olinishi kerak.
27. Boj olinmaydigan savdo doʻkonining egasi boj olinmaydigan savdo doʻkoniga joylashtiriladigan tovarlar hisobini hisobga olish daftarini yuritish orqali (shu jumladan, avtomatlashtirilgan tarzda) olib boradi va bojxona organiga ushbu tovarlar harakati toʻgʻrisida har chorakda mazkur Nizomning 5-ilovasiga muvofiq shaklda boj olinmaydigan savdo doʻkonidagi tovarlar harakati boʻyicha hisobot taqdim etadi.
Hisobga olish daftarlari va elektron baza maʼlumotlari kalendar yillari boʻyicha yuritiladi. Bunday daftarlar oldindan tikib qoʻyilgan, raqamlangan, broshyura holiga keltirilgan va boj olinmaydigan savdo doʻkoni faoliyat yuritayotgan hududda bojxona organi boshligʻining yoxud bojxona organi boshligʻi oʻrinbosarining imzosi bilan tasdiqlangan boʻlishi kerak.
Oxirgi yozuv kiritilganidan keyin hisobga olish daftari taqdim qilingan hisobotlar bilan solishtirish uchun bojxona organiga beriladi. Solishtirib boʻlinganidan keyin hisobga olish daftari boj olinmaydigan savdo doʻkonining egasiga qaytariladi va u yerda kamida uch yil saqlanadi. Hisobga olish daftari solishtirib boʻlinganidan keyin unga qoʻshimcha yozuvlar yoki tuzatishlar kiritilishiga yoʻl qoʻyilmaydi.
Hisobga olish daftarining shakli boj olinmaydigan savdo doʻkoni faoliyatini amalga oshirish uchun zarur boʻladigan maʼlumotlar asosida boj olinmaydigan savdo doʻkoni egasi tomonidan belgilanadi. Bunda hisobga olish daftarining shaklida mazkur Nizomning 5-ilovasida keltirilgan Boj olinmaydigan savdo doʻkonidagi tovarlar harakati boʻyicha hisobot shaklida mavjud barcha maʼlumotlar boʻlishi kerak.
28. Bojxona organi bojxona yuk deklaratsiyasidan va avtomatlashtirilgan hisobga olish tizimidan foydalangan holda tovarlarni hisob-kitob qiladi.
29. Bojxona organi boj olinmaydigan savdo doʻkonining savdo zallarida, yordamchi binolarida va omborida turgan tovarlarni inventarizatsiyadan oʻtkazishga haqlidir.
V. Boj olinmaydigan savdo doʻkonining egasi bilan bojxona organi oʻrtasidagi oʻzaro munosabatlar
30. Boj olinmaydigan savdo doʻkoni egasi bojxona organi bilan kelishgan holda boj olinmaydigan savdo doʻkonini ishlatish qoidalarini tasdiqlaydi.
31. Qoidalarda quyidagilar qayd etiladi:
bojxona organining boj olinmaydigan savdo doʻkonining savdo zallarini, yordamchi binolarini va omborini jihozlash;
doʻkonning ish rejimi;
boj olinmaydigan savdo doʻkonida sotiladigan tovarlarni markirovkalash usuli va shakli;
tovarlarni hisobga olish daftarining shakli;
32. Mazkur tadbirlar ushbu Nizomga va Oʻzbekiston Respublikasining qonun hujjatlariga zid boʻlishi mumkin emas.
VI. Yakunlovchi qoidalar
33. Doʻkon egasi sanitariya qoidalariga, omborga joylashtirish normalariga, tovarlarning yonma-yon qoʻyilishi qoidalariga va saqlash rejimiga, davlat standartlarining majburiy talablariga rioya etishi, savdo sohasidagi munosabatlarni tartibga solib turuvchi Oʻzbekiston Respublikasining qonun hujjatlarida belgilangan boshqa talablar va shartlarni bajarilishi uchun javobgardirlar.
Boj olinmaydigan savdo doʻkoni bojxona rejimi toʻgʻrisidagi nizomga 1-ILOVA
“Boj olinmaydigan savdo doʻkoni” bojxona rejimiga joylashtiriladigan tovarlarni deklaratsiyalashda va ushbu rejim faoliyatining nihoyasiga yetkazilishida BYuDni toʻldirish tartibi
I. Boj olinmaydigan savdo doʻkoni bojxona rejimida joylashtiriladigan tovarlarni deklaratsiyalash vaqtida BYuDni toʻldirish tartibi.
1. Deklarant tomonidan BYuD asosiy varagʻining quyidagi ustunlari va qoʻshimcha varaqlarning tegishli ustunlari toʻldiriladi:
1, 2, 3, 5, 6, 9, 14, 15, 15a, 16, 18, 19, 20, 21, 22, 23, 24, 25, 28, 29, 30, 31, 32, 33, 34, 35, 37, 38, 41, 42, 44, 46, 47, 54, A,V
3, 5, 6, 14, 15, 15a, 16, 18, 19, 21, 22, 23, 24, 25, 29, 31, 33, 34, 35, 36, 37, 38, 41, 42, 44, 46, 47, 54, A, V ustunlar Oʻzbekiston Respublikasi Davlat bojxona qoʻmitasi tomonidan 1999-yilning 24-sentabrida tasdiqlangan “Bojxona yuk deklaratsiyasini toʻldirish tartibi toʻgʻrisida”gi Yoʻriqnomaning (keyingi oʻrinlarda — Yoʻriqnoma) (1999-yil 3-noyabr, roʻyxat raqami 834-son) uchinchi yoki oltinchi boʻlimlariga muvofiq toʻldiriladi.
1, 2, 9, 28, 30-ustunlarni toʻldirish quyidagi oʻziga xos jihatlarga ega:
1-ustun “Deklaratsiya turi”
Boj olinmaydigan savdo doʻkoni bojxona rejimida joylashtiriladigan tovarlarni deklaratsiyalash ustunining birinchi boʻlinmasi quyidagicha koʻrsatiladi:
Oʻzbekiston Respublikasi bojxona hududiga olib kirilgan va ushbu hududga olib kirilib, biron bir bojxona rejimiga rasmiylashtirilgan (“erkin muomalaga chiqarish” bojxona rejimidan tashqari — IM40) tovarlarga nisbatan;
Oʻzbekiston tovarlariga nisbatan — “EK”.
Ikkinchi boʻlinmasida bojxona rejimining asosiy kodi koʻrsatiladi — “72”.
Ustunning uchinchi boʻlimi toʻldirilmaydi.
2-ustun “Yuk joʻnatuvchi — eksportyor”
Oʻzbekiston Respublikasi bojxona hududiga olib kirilgan va ushbu hududga olib kirilib, biron bir bojxona rejimiga rasmiylashtirilgan tovarlarga nisbatan, Yoʻriqnomaning 3-boʻlimiga muvofiq toʻldiriladi.
Boj olinmaydigan savdo doʻkoni bojxona rejimiga Oʻzbekiston tovarlarini joylashtirishda BYuDda korxonaning, tashkilotning va muassasaning nomi va manzili yoki shaxsning ism-sharifi, xamda jismoniy shaxsning pasportidagi maʼlumotlar koʻrsatiladi. Qolgan maʼlumotlar Yoʻriqnomaning 2-boʻlimiga muvofiq toʻldiriladi.
9-ustun “Moliyaviy boshqarish boʻyicha javobgar shaxs”
Ushbu ustunda BYuDlarni toʻldirish boʻyicha Yoʻriqnomaga muvofiq boj olinmaydigan savdo doʻkoni egasi toʻgʻrisida maʼlumotlar koʻrsatiladi.
28-ustun “Moliyaviy va bank toʻgʻrisidagi maʼlumotlar”
Ushbu ustunda (har bir rekvizitlar yangi qatordan boshlanishi va har birining oldidan tartib boʻyicha raqam qoʻyilishi lozim).
1 — Boj olinmaydigan savdo doʻkoni egasining hisob raqami ochilgan bankning qisqacha nomlanishi va OKPO kodi, soʻmdagi hisob raqami.
2 — Boj olinmaydigan savdo doʻkoni egasining hisob raqami ochilgan bankning qisqacha nomlanishi va OKPO kodi, xorijiy valyutadagi hisob raqami.
30-ustun “Tovarlarni koʻrikdan oʻtkazish joyi”
Ushbu ustunda Boj olinmaydigan savdo doʻkoni faoliyati uchun olingan litsenziya raqami koʻrsatiladi.
Boj olinmaydigan savdo doʻkoni” bojxona rejimi toʻgʻrisidagi nizomga 2-ILOVA
Boj olinmaydigan savdo doʻkonlarida tovarlarni sotib olishga
BUYuRTMANOMA
(2-ilova Oʻzbekiston Respublikasi Davlat bojxona qoʻmitasining 2010-yil 22-dekabrdagi 01-02/12-30-sonli qarori (roʻyxat raqami 1317-1, 21.01.2011-y.) bilan kiritilgan — OʻR QHT, 2011-y., 3-son, 31-modda)
“Boj olinmaydigan savdo doʻkoni” bojxona rejimi toʻgʻrisidagi nizomga 3-ILOVA
Xorijiy jismoniy shaxslar tomonidan Oʻzbekiston Respublikasi Tashqi ishlar vazirligida akkreditatsiya qilingan xorijiy shaxslar uchun boj olinmaydigan savdo doʻkonlaridan aksiz toʻlanadigan tovarlarni xarid qilishning cheklangan
NORMALARI*
* Izoh: aksiz toʻlanadigan tovarlarni xarid qilishning cheklangan normalari xorijiy davlatning diplomatik vakolatxonasi va konsullik muassasasi, xalqaro tashkilot va unga tenglashtirilgan tashkilot vakolatxonasining bir xodimiga va u bilan birga yashaydigan, Oʻzbekiston Respublikasi fuqarosi hisoblanmaydigan, uning oilasining voyaga yetgan, Oʻzbekiston Respublikasi Tashqi ishlar vazirligida akkreditatsiya qilingan har bir aʼzosiga 1 (bir) oylik muddatga belgilanadi. Aksiz toʻlanadigan tovarlarni xarid qilishning cheklangan normalaridan foydalanilmaganda yoki toʻliq foydalanilmaganda uning qoldigʻi qoʻshilmaydi va keyingi davrlarga koʻchirilmaydi.
“Boj olinmaydigan savdo doʻkoni” bojxona rejimi toʻgʻrisidagi nizomga 4-ILOVA
Xorijiy davlatlarning diplomatik vakolatxonalari va konsullik muassasalari, xalqaro tashkilotlarning vakolatxonalari va ularga tenglashtirilgan vakolatxonalar tomonidan Oʻzbekiston Respublikasi Tashqi ishlar vazirligida akkreditatsiya qilingan xorijiy shaxslar uchun boj olinmaydigan savdo doʻkonlaridan aksiz toʻlanadigan tovarlarni xarid qilishning cheklangan
NORMALARI*
* Izoh: aksiz toʻlanadigan tovarlarni xarid qilishning cheklangan normalari Oʻzbekiston Respublikasi Tashqi ishlar vazirligida akkreditatsiya qilingan bir xorijiy davlatning diplomatik vakolatxonasi va konsullik muassasasi, xalqaro tashkilot va unga tenglashtirilgan tashkilot vakolatxonasiga 1 (bir) oylik muddatga belgilanadi. Aksiz toʻlanadigan tovarlarni xarid qilishning cheklangan normalaridan foydalanilmaganda yoki toʻliq foydalanilmaganda uning qoldigʻi qoʻshilmaydi va keyingi davrlarga koʻchirilmaydi.
Alohida hollarda, tadbirlar oʻtkazish davrida xorijiy davlatning diplomatik vakolatxonasi va konsullik muassasasi, xalqaro tashkilot va unga tenglashtirilgan tashkilot vakolatxonasining yozma murojaatiga muvofiq Tashqi ishlar vazirligida akkreditatsiya qilingan xorijiy shaxslar uchun boj olinmaydigan savdo doʻkoni joylashgan zonada faoliyat koʻrsatayotgan bojxona organi tovarlarni xarid qilish miqdorini murojaatnomada koʻrsatilgan miqdorgacha koʻpaytirishi mumkin.
“Boj olinmaydigan savdo doʻkoni” bojxona rejimi toʻgʻrisidagi nizomga 5-ILOVA
Boj olinmaydigan savdo doʻkonidagi tovarlar harakati boʻyicha
HISOBOT
(5-ilova Oʻzbekiston Respublikasi Davlat bojxona qoʻmitasining 2012-yil 24-avgustdagi 01-02/12-25-sonli qarori (roʻyxat raqami 1317-3, 27.09.2012-y.) tahririda — OʻR QHT, 2012-y., 39-son, 458-modda)