Oʻzbekiston Respublikasi Taʼlim muassasalarida ikkinchi taʼlimni olish tartibi toʻgʻrisida (794-son)

06.08.1999

nizom

[Oʻzbekiston Respublikasi Adliya vazirligi tomonidan 1999-yil 6-avgustda 794-son bilan davlat roʻyxatidan oʻtkazilgan]

1. Ushbu Nizom Oʻzbekiston Respublikasining “Taʼlim toʻgʻrisida” va “Kadrlar tayyorlash milliy dasturi toʻgʻrisida”gi qonunlariga muvofiq ishlab chiqilgan va idoraviy tasarruflik va mulkchilik shaklidan qatʼi nazar, barcha oliy va oʻrta maxsus taʼlim muassasalariga tegishlidir.

2. Oʻzbekiston Respublikasining “Taʼlim toʻgʻrisida”gi Qonuniga muvofiq fuqarolar ikkinchi va keyingi oliy maʼlumotni toʻlov-kontrakt (shartnoma) asosida olish huquqiga ega.

3. Ikkinchi oliy maʼlumot quyidagi oliy maʼlumotga ega boʻlgan shaxslarga beriladi:

bakalavriat va diplomli mutaxassis darajasidagilarga — oliy taʼlim muassasalarida bakalavriat yoʻnalishlari boʻyicha;

magistratura darajasidagilarga — oliy taʼlim muassasasida tayyorlanadigan magistratura mutaxassisliklari boʻyicha. Ikkinchi oliy maʼlumot olish mumkin boʻlgan turdosh mutaxassisliklar roʻyxati Oliy va oʻrta maxsus taʼlim vazirligi tomonidan belgilanadi.

Bakalavrlar va diplomli mutaxassislar uchun magistratura taʼlim dasturlari boʻyicha taʼlim olish ikkinchi oliy maʼlumot sifatida qaralmaydi.

4. Ikkinchi oliy maʼlumot olish uchun talabalar qabulini oliy taʼlim muassasasi qabul komissiyasi amalga oshiradi. Ikkinchi oliy taʼlim boʻyicha qabul koʻrsatkichlari taʼlim muassasasi uchun muayyan taʼlim yoʻnalishlari (mutaxassisliklar) boʻyicha oʻrnatilgan qabul rejasidan (muvofiq ravishda bakalavriat va magistratura boʻyicha) ortiq boʻlishi mumkin emas.

Ikkinchi oliy maʼlumot olish boʻyicha kadrlar tayyorlash huquqiga ega oliy taʼlim muassasalari roʻyxati hamda ularning bakalavriat va magistraturasiga qabul koʻrsatkichlari tasarrufida oliy taʼlim muassasalari boʻlgan vazirlik va idoralarning marketing maʼlumotlari asosida Oʻzbekiston Respublikasi taʼlim muassasalariga qabul boʻyicha Davlat komissiyasi tomonidan belgilanadi.

5. Ikkinchi oliy maʼlumot olmoqchi boʻlgan shaxslar taʼlim muassasasining qabul komissiyasiga quyidagi hujjatlarni taqdim etadilar:

oliy taʼlim muassasasi rektori nomiga ariza;

oliy maʼlumot toʻgʻrisida davlat namunasidagi diplom (asl nusxasi) ilovasi bilan Xorijiy davlatlar taʼlim muassasalarining 1992-yil may oyidan keyin berilgan diplomlari oʻrnatilgan tartibda nostrifikatsiyadan oʻtkazilishi lozim;

3 x 4 sm oʻlchamli 6 ta fotosurat;

Pasport va harbiy hujjatlar shaxsan taqdim etiladi.

Ikkinchi oliy maʼlumot olish uchun hujjatlar 20-iyuldan 20-avgustgacha qabul qilinadi.

6. Oliy taʼlim muassasasining qabul komissiyasi kiruvchilarning bilim darajasini baholash maqsadida shakli va mazmuni Oliy va oʻrta maxsus taʼlim vazirligi bilan kelishiladigan sinovlar oʻtkazish huquqiga ega.

7. Oliy taʼlim muassasasi quyidagilarni mustaqil hal qiladi:

hujjatlarni qabul qilishda va ularning haqiqiyligini aniqlashda qabul komissiyasi masʼuliyatini oshirish;

ikkinchi taʼlim olishga kiruvchilarning bilim darajasini, mavjud va ikkinchi taʼlimni olish uchun zarur bilimlar hajmidagi farqlarni aniqlash boʻyicha sinovlar uslubiyotini ishlab chiqish;

kiruvchilar tomonidan oʻquv reja va dasturlardagi farqlarni tartibli topshirish muddatlarini oʻrnatish;

oʻquv dasturlardagi farqlar va kiruvchining tayyorgarlik darajasi hisobga olinib bakalavriatda oʻqish kursini (ikkinchi kursdan past emas) oʻrnatish.

8. Ikkinchi oliy maʼlumot boʻyicha oʻqitish toʻlov-kontrakt (shartnoma) asosida amalga oshiriladi. Toʻlov-kontrakt asosida oʻqish uchun kontraktni tuzish tartibi va shartlari, jumladan toʻlov mablagʻlari va muddatlari “Oʻzbekiston Respublikasi taʼlim muassasalarida oʻqitishning toʻlov-kontrakt shakli va tushgan mablagʻlarni taqsimlash tartibi toʻgʻrisida Nizom”ga muvofiq aniqlanadi.

9. Ikkinchi oliy maʼlumot boʻyicha talabalar safiga qabul taʼlim muassasasining qabul komissiyasi qaroriga asosan rektorning buyrugʻi bilan muvofiq kursda oʻquv mashgʻulotlari boshlanishigacha hamda kontrakt shartlarida belgilangan toʻlov miqdori oʻtkazilgandan keyin chiqariladi.

10. Ikkinchi oliy maʼlumot olgan shaxslarga, davlat attestatsiyasi yakunlari boʻyicha, davlat namunasidagi hujjat (diplom, ilova bilan) beriladi.

11. Ikkinchi taʼlimni berishning ushbu tartib va qoidalari oʻrta maxsus taʼlim muassasalarida ham qoʻllaniladi.

Oʻrta maxsus yoki oliy maʼlumotga ega shaxslar ikkinchi oʻrta maxsus taʼlimni toʻlov-kontrakt (shartnoma) asosida olish huquqiga egadirlar.

12. Ikkinchi oliy yoki oʻrta maxsus maʼlumot olish uchun qabul yuzasidan barcha masalalar boʻyicha shaxsiy masʼuliyat taʼlim muassasasining rektori, direktori) zimmasiga yuklanadi.