Soliq solishning soddalashtirilgan tizimiga oʻtgan mikrofirmalar va kichik korxonalarga soliq solish tartibi toʻgʻrisida (159-son)

15.04.1998

Oʻzbekiston Respublikasi Vazirlar Mahkamasining

qarori

Oʻzbekiston Respublikasining Soliq kodeksiga muvofiq Vazirlar Mahkamasi qaror qiladi:

1. Mikrofirmalar va Kichik korxonalar uchun soliq solishning soddalashtirilgan tizimini qoʻllash tartibi ilovaga muvofiq tasdiqlansin.

2. Oʻzbekiston Respublikasi Moliya vazirligi Davlat soliq qoʻmitasi bilan birgalikda:

Mikrofirmalar va Kichik korxonalar uchun soliq solishning soddalashtirilgan tizimini qoʻllash tartibini soliq toʻlovchilarga yetkazsin;

bir oy muddatda normativ hujjatlarni mazkur qarorga muvofiqlashtirsin.

4. Mazkur qarorning bajarilishini nazorat qilish Bosh vazir oʻrinbosari B. S. Hamidov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 15-aprel,

159-son

Vazirlar Mahkamasining 1998-yil 15-apreldagi 159-son qaroriga ILOVA

Mikrofirmalar va kichik korxonalar uchun soliq solishning soddalashtirilgan tizimini qoʻllash tartibi

TARTIBI

1. Umumiy qoidalar

1. Mazkur Tartib Oʻzbekiston Respublikasining Soliq kodeksiga muvofiq ishlab chiqilgan va tadbirkorlik faoliyatini amalga oshiruvchi mikrofirmalar va kichik korxonalar (keyingi oʻrinlarda — korxona deb ataladi) uchun soliq solishning soddalashtirilgan tizimini qoʻllash tartibini belgilaydi, yagona soliq toʻlovi toʻlaydigan mikrofirmalar va kichik korxonalar bundan mustasno.

Mazkur Tartibning amal qilishi shuningdek dasturiy vositalarni ishlab chiqarishga, kompyuter texnikasi va dasturiy vositalarga servis xizmati koʻrsatishga, kompyuter texnikasi va axborot texnologiyalari bilan ishlashga oʻqitish boʻyicha aholiga xizmatlar koʻrsatishga ixtisoslashayotgan mikrofirmalar va kichik korxonalar toifasiga tegishli boʻlmagan tashkilotlarga ham tatbiq etiladi.

2. Mikrofirmalar va kichik korxonalar uchun soliq solishning soddalashtirilgan tizimi Oʻzbekiston Respublikasining Soliq kodeksida nazarda tutilgan amaldagi soliq solish tizimi bilan bir qatorda qoʻllaniladi.

Soliq solish tizimini tanlash huquqi mazkur Tartibga muvofiq ixtiyoriylik asosida mikrofirmalar va kichik korxonalarga beriladi, soliq solishning alohida tartibi belgilangan tadbirkorlik faoliyatining ayrim turlarini amalga oshiruvchi mikrofirmalar va kichik korxonalar bundan mustasno.

3. Soliq solishning soddalashtirilgan tizimi yalpi umumdavlat soliqlarini, shuningdek, davlat hokimiyati mahalliy organlari tomonidan joriy etiladigan mahalliy soliqlar va yigʻimlarni toʻlash oʻrniga yagona soliq toʻlashni nazarda tutadi, quyidagilar bundan mustasnodir:

savdo-sotiq qilish huquqi uchun yigʻim, shu jumladan, ayrim turlardagi tovarlarni sotish huquqini beruvchi litsenziya yigʻimlari;

yuridik shaxslarni roʻyxatdan oʻtkazganlik uchun yigʻim;

avtotransport toʻxtash joyidan foydalanganlik uchun yigʻim.

4. Yagona soliq toʻlovchi boʻlgan korxonalar, sotib olingan tovar qiymatida toʻlangan qoʻshilgan qiymat soligʻi summasini ishlab chiqarish xarajatlari (muomala xarajatlari)ga chiqarib tashlaydilar.

5. Soliq solishning soddalashtirilgan tizimini qoʻllovchi mikrofirmalar va kichik korxonalar uchun boj, qoʻshilgan qiymat soligʻi va import qilinayotgan tovarlar (ishlar, xizmatlar)ga aksiz soligʻi, davlat boji, litsenziya yigʻimlari toʻlash, davlat maqsadli fondlariga ajratmalar ajratishning amaldagi tartibi saqlab qolinadi.

6. Soliq solishning soddalashtirilgan tizimiga oʻtgan korxona umumiy belgilangan tartibda yoki soddalashtirilgan shaklda hisob-kitob yuritishga haqlidir. Buxgalteriya hisoboti dastlabki hujjatlarining va daromadlar va xarajatlarni hisobga olish daftari yuritishning soddalashtirilgan shakli Oʻzbekiston Respublikasi Moliya vazirligi tomonidan belgilanadi va barcha hudud uchun yagona hisoblanadi.

II. Soliq solishning soddalashtirilgan tizimi subyektlari

1. Soliq solishning soddalashtirilgan tizimining amal qilishi qonunchilik bilan belgilangan mezonlarga muvofiq mikrofirmalar va kichik korxonalar sirasiga kiruvchi yuridik shaxslarga tatbiq etiladi.

2. Soliq solishning soddalashtirilgan tizimi uchun faoliyat turi Oʻzbekiston Respublikasi Davlat statistika qoʻmitasi tomonidan belgilangan kod boʻyicha aniqlanadi.

3. Mikrofirmalar va kichik korxonalar xodimlarining oʻrtacha yillik sonini belgilashda unitar (shuʼba) korxonalarda, filiallarda va vakolatxonalarda ishlaydiganlar soni ham hisobga olinadi.

4. Soliq solishning soddalashtirilgan tizimini qoʻllovchi va nogironlarning jamoat birlashmalari, “Nuroniy” jamgʻarmasi va “Oʻzbekiston chernobilchilari” uyushmasining mulki boʻlgan, ishlovchilar umumiy sonining kamida ellik foizini nogironlar, 1941—1945-yillardagi urush va mehnat fronti faxriylari tashkil etgan mikrofirmalar va kichik korxonalar yagona soliq toʻlashdan ozod etiladi.

Mazkur imtiyoz savdo, vositachilik, taʼminot-sotish va tayyorlov faoliyati bilan shugʻullanuvchi korxonalarga joriy etilmaydi.

5. Faoliyatning bir qancha turini amalga oshiruvchi yagona soliq toʻlovchilar faoliyatning har bir turi boʻyicha soliq solish obyektining alohida hisobini olib borishlari va aniq faoliyat turini soliq solish obyektidan hamda unga muvofiq keluvchi yagona soliq stavkasidan kelib chiqqan holda yagona soliqni hisoblab chiqarishlari kerak.

6. Aksiz soligʻi solinadigan mahsulotlar ishlab chiqaruvchi, shuningdek foydali qazilmalarni qazib oluvchi mikrofirmalar va kichik korxonalar Oʻzbekiston Respublikasi Soliq kodeksida belgilangan tartibda aksiz soligʻini va yer osti boyliklaridan foydalanganlik uchun soliqni toʻlashgan taqdirda yagona soliq toʻlashga oʻtishlari mumkin.

III. Soliq solishning soddalashtirilgan tizimidagi soliq solish obyektlari

1. Quyidagilar yagona soliq solish (soliq solinadigan oborot) obyekti hisoblanadi:

xarid, taʼminot-sotish korxonalari, vositachilik haqi — yalpi daromad shartnomasi boʻyicha xizmatlar koʻrsatuvchi korxonalar va tashkilotlar uchun;

xarid qiluvchi, taʼminot-sotish korxonalari uchun – yalpi daromad;

xalq xoʻjaligining boshqa tarmoqlari korxonalari uchun — yalpi tushum.

2. Yalpi tushum tarkibiga:

mahsulotlar (ishlar, xizmatlar)ni, mol-mulkni sotishdan olingan tushum summalari;

boshqa sotishlardan olingan daromadlar kiradi;

Oʻzi ishlab chiqargan mahsulot (ishlar, xizmatlar)ni erkin almashtiriladigan valyutaga eksport qilishdan olingan tushum summalari yalpi tushum tarkibiga kiritilmaydi. Mazkur qoida savdo-vositachilik faoliyati bilan shugʻullanayotgan yoxud xomashyo tovarlarni paxta tolasi, paxta kalavasi, lint, neft, neft mahsulotlari, rangli va qora metallarni erkin almashtiriladigan valyutaga eksport qilayotgan mikrofirmalar va kichik korxonalarga joriy qilinmaydi

3. Yalpi daromad tarkibiga:

tovarning xarid va sotish qiymati oʻrtasidagi tafovut;

moliyaviy faoliyatdan olingan daromadlar va Oʻzbekiston Respublikasining Soliq kodeksiga muvofiq belgilanadigan boshqa daromadlar kiradi.

IV. Soliq solishning soddalashtirilgan tizimini qoʻllash qoidalari

1. Korxonalarning soliq solishning soddalashtirilgan tizimiga oʻtishlari uchun ular roʻyxatdan oʻtgan joydagi davlat soliq xizmati organiga chorak boshlanishidan kamida bir oy oldin yozma ravishda ariza berishlari zarur. Bunda mazkur Tartibning P boʻlimida nazarda tutilgan shartlarga rioya qilinishi kerak.

2. Soliq solishning soddalashtirilgan tizimiga oʻtishda korxonalarda oʻtgan davr uchun soliq toʻlash boʻyicha oʻsha davrda amalda boʻlgan soliq solish tizimidan kelib chiqqan holdagi majburiyatlar saqlanib qoladi.

3. Korxonani soliq solishning soddalashtirilgan tizimiga oʻtkazish yoki asoslangan holda rad etish toʻgʻrisidagi qaror davlat soliq xizmati organi tomonidan korxona ariza bergan kundan boshlab oʻn kun muddatda chiqariladi.

4. Soddalashtirilgan shaklda hisobni olib borishga qaror qilgan korxona oʻz arizagi qondirilgandan keyin belgilangan shakldagi xoʻjalik operatsiyalarini hisobga olish daftarini roʻyxatdan oʻtkazish uchun uni davlat soliq xizmati organiga taqdim etadi.

5. Davlat soliq xizmati organi xoʻjalik operatsiyalarini hisobga olish daftarining birinchi betida ariza imzolangan sanani belgilab qoʻyadi.

6. Xoʻjalik operatsiyalarini hisobga olish daftariga Oʻzbekiston Respublikasining amaldagi normativ hujjatlari bilan belgilangan tartibda hisobotlar bilan muomala qilish qoidalari tatbiq etiladi.

7. Soliq solishning soddalashtirilgan tizimini qoʻllashni rad etish va navbatdagi kalendar yil boshidan soliq solishning umumiy belgilangan tizimiga qaytish kalendar yil tugashidan kamida 15 kun oldin davlat soliq organiga tegishli ariza berilgan taqdirda amalga oshirilishi mumkin.

8. Soliq xizmatining soliq solishning soddalashtirilgan tizimiga oʻtkazishni rad etish toʻgʻrisidagi qarori ustidan belgilangan tartibda shikoyat qilinishi mumkin.

9. Yagona soliq toʻlashdan soliq solishning avvalgi tizimiga yil davomida oʻtkazilmaydi.

V. Yagona soliqni hisoblab chiqarish tartibi va uni toʻlash muddatlari

1. Yagona soliq soliq solinadigan oborot va tasdiqlangan stavkalardan kelib chiqqan holda soliq toʻlovchilar tomonidan mustaqil ravishda hisoblab chiqariladi.

2. Yagona soliq boʻyicha hisob-kitoblar davlat soliq xizmati organlariga choraklik va yillik buxgalteriya hisobotlarini topshirish uchun belgilangan muddatlarda taqdim etiladi.

3. Yagona soliq budjetga har chorakda oʻsib boruvchi yakun bilan hisob-kitob taqdim etish muddatidan kechiktirilmasdan toʻlanadi.

VI. Toʻlovchilarning javobgarligi

Toʻlovchilar Oʻzbekiston Respublikasining amaldagi qonunchiligiga muvofiq javobgar boʻladilar.

VII. Davlat soliq xizmati organlarining nazorat qilishi

Mazkur Tartibning toʻgʻri qoʻllanilishini nazorat qilish Oʻzbekiston Respublikasining Soliq kodeksi, “Davlat soliq xizmati toʻgʻrisida”gi Oʻzbekiston Respublikasi Qonuni va boshqa qonun hujjatlariga muvofiq amalga oshiriladi.