SHNQ 2.08.01-24 “Turar joy obyektlarini loyihalash” shaharsozlik normalari va qoidalariga qoʻshimchalar va oʻzgartirishlar kiritish toʻgʻrisida (01/2-13-son)
06.04.2026
Oʻzbekiston Respublikasi Qurilish va uy-joy kommunal xoʻjaligi vazirining
Buyrugʻi
[Oʻzbekiston Respublikasi Adliya vazirligi tomonidan 2026-yil 22-aprelda hisobga olindi, hisob raqami 398]
Oʻzbekiston Respublikasining Shaharsozlik kodeksiga muvofiq buyuraman:
1. SHNQ 2.08.01-24 “Turar joy obyektlarini loyihalash” shaharsozlik normalari va qoidalariga (hisob raqami 293, 2024-yil 25-sentabr) ilovaga muvofiq qoʻshimchalar va oʻzgartirishlar kiritilsin.
2. Mazkur buyruq Oʻzbekiston Respublikasi Favqulodda vaziyatlar vazirligi hamda Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspeksiyasi bilan kelishilgan.
3. Mazkur buyruq rasmiy eʼlon qilingan kundan eʼtiboran kuchga kiradi.
Ushbu buyruqqa ilovaning 13-bandi uchinchi xatboshisi 2027-yil 1-yanvardan eʼtiboran kuchga kiradi.
Vazir SH. XIDOYATOV
Toshkent sh.,
2026-yil 6-aprel,
01/2-13-son
Kelishildi:
Favqulodda vaziyatlar vaziri A. IKRAMOV
2026-yil 31-mart
Qurilish va uy-joy kommunal xoʻjaligi sohasida nazorat qilish inspeksiyasi boshligʻining birinchi oʻrinbosari J. JABBOROV
2026-yil 5-mart
Oʻzbekiston Respublikasi qurilish va uy-joy kommunal xoʻjaligi vazirining 2026-yil 6-apreldagi 01/2-13-son buyrugʻiga ILOVA
SHNQ 2.08.01-24 “Turar joy obyektlarini loyihalash” shaharsozlik normalari va qoidalariga kiritilayotgan qoʻshimchalar va oʻzgartirishlar
1. 1-bandda:
quyidagi mazmundagi oʻttiz ikkinchi va oʻttiz uchinchi xatboshilar bilan toʻldirilsin:
“SHNQ 2.05.07-24 “Avtoturargohlar”;
SHNQ 2.04.13-24 “Qozonxonalar”;”;
oʻttiz ikkinchi — qirq beshinchi xatboshilar tegishli ravishda oʻttiz toʻrtinchi — qirq yettinchi xatboshilar deb hisoblansin.
2. 93-banddagi “SHNQ 2.01.02-04” degan soʻzlar “SHNQ 2.05.07-24” degan soʻzlar bilan almashtirilsin.
3. 6-jadvaldagi “IIIa”, “IVa” va “IIIb” degan soʻzlar tegishli ravishda “III”, “IV” hamda “III” degan soʻzlar bilan almashtirilsin.
4. 165-band oʻz kuchini yoʻqotgan deb topilsin.
5. 171-band quyidagi tahrirda bayon etilsin:
“171. Zinapoya kataklari binoga tutash (yondosh) hududga toʻgʻridan-toʻgʻri chiqishi yoki qoʻshni yoʻlaklardan eshikli toʻsiqlar bilan ajratilgan vestibyul orqali tashqariga chiqish yoʻliga ega boʻlishi kerak.”.
6. 174-band quyidagi tahrirda bayon etilsin:
“174. Yoʻlakda (xolda) derazalar yoki tutun chiqarish klapanlari mavjud boʻlganda, mazkur SHNQning 7-jadvaliga asosan ushbu masofani boshi berk yoʻlak uchun nazarda tutilgan qiymatlar boʻyicha qabul qilishga yoʻl qoʻyiladi.”.
7. 190-band quyidagi tahrirda bayon etilsin:
“190. Balandligi 28 m gacha boʻlgan turar joy obyektlarida qavatdagi kvartiralarning umumiy maydoni 500 m2 dan ortiq seksiyalarda evakuatsiya qilish kamida ikkita oddiy yoki tutun qoplamaydigan zinapoya katagiga chiqish orqali amalga oshirilishi kerak.
Qavatdagi kvartiralarning umumiy maydoni 500 m² dan 550 m² gacha boʻlganda, obyekt toʻliq manzilli yongʻin signalizatsiyasi tizimi bilan jihozlanganda hamda barcha kvartiralarda mazkur SHNQning 188-bandiga muvofiq ochiq (oynalanmagan) balkon yoki lodjiya boʻlsa, oddiy zinapoya katagiga chiqishga yoʻl qoʻyiladi.”.
8. 194-banddagi “198-bandi” degan soʻzlar “188-bandi” degan soʻzlar bilan almashtirilsin.
9. 196-band quyidagi tahrirda bayon etilsin:
“196. Balandligi 28 m dan baland boʻlgan binolarda qavatdagi kvartiralar umumiy maydoni 500 m2 dan ortiq boʻlganda evakuatsiya chiqish yoʻli SHNQ 2.01.02-04ga asosan kamida ikkita tutun qoplamaydigan zina katagi orqali boʻlishi kerak.
Qavatdagi kvartiralarning umumiy maydoni 500 m2 dan 550 m2 gacha boʻlganda, kvartiralar avtomatik yongʻin oʻchirish qurilmasi bilan jihozlanganda hamda SHNQning 188-bandi talablariga muvofiq ochiq (oynalanmagan) balkon yoki lodjiya nazarda tutilgan boʻlsa, evakuatsiya chiqish uchun bitta tutun qoplamaydigan N1 turdagi zina katagini loyihalashga yoʻl qoʻyiladi.”.
10. 199-band quyidagi tahrirda bayon etilsin:
“199. Balandligi 28 m gacha boʻlgan turar joy obyektlarida oshxonalar va kvartira ichki yoʻlaklari yongʻin signalizatsiyasi tizimi bilan jihozlanishi lozim. Balandligi 28 m dan 50 m gacha boʻlgan turar joy obyektlarida esa kvartiralarning barcha xonalari, shuningdek qavat xollari va yoʻlaklari manzilli yongʻin signalizatsiyasi tizimi bilan jihozlanishi kerak.
Bunda qavat xollari va yoʻlaklarida oʻrnatilgan yongʻin xabarlagichlari kvartiralarga bogʻliq boʻlmagan alohida shleyflarga ulanishi lozim.”.
11. 202-bandning ikkinchi xatboshisi quyidagi tahrirda bayon etilsin:
“Qozonxonalarni SHNQ 2.04.13-24 ga muvofiq tomga oʻrnatilishiga yoʻl qoʻyiladi.”.
12. 251-banddan uchinchi xatboshi chiqarib tashlansin.
13. Quyidagi mazmundagi 2511-band bilan toʻldirilsin:
“2511. Turar joy obyektlarida elektr energiyasi hisoblagichlari Oʻzbekiston Respublikasi Vazirlar Mahkamasining 2024-yil 31-maydagi 319-son qarori bilan tasdiqlangan Elektr energiyasidan foydalanish qoidalariga muvofiq oʻrnatilishi lozim.
Yangi qurilayotgan koʻp qavatli uy-joylarning loyihalarida ichimlik suvi va issiq suv sarfi hisoblagichlarini uy-joylarning kirish qismida hamda xonadonlarda oʻrnatish nazarda tutilishi lozim.”.
14. 319-band quyidagi tahrirda bayon etilsin:
“319. Turar joy obyektlarida oʻrnatilgan liftlar, qoʻriqlash hamda yongʻin avtomatikasi tizimlaridan (avtomatik yongʻin signalizatsiyasi va avtomatik yongʻin oʻchirish qurilmalari) keladigan signallar optik tolali kabel aloqa liniyalari orqali koʻp kvartirali uylarni boshqarish organlarining dispetcherlik xizmatiga parallel ravishda uzatilishi lozim.
Bunda avtomatik yongʻin signalizatsiyasi yoki yongʻin oʻchirish tizimi ishga tushganda, signal qoʻshimcha ravishda eng yaqin yongʻin-qutqaruv qismining dispetcherlik xizmatiga ham parallel ravishda uzatilishi taʼminlanishi kerak.”.