“Yangi Oʻzbekiston yoshlari-2030” strategiyasini 2026-2027-yillarda amalga oshirish hamda yoshlar bandligini taʼminlash boʻyicha qoʻshimcha chora-tadbirlar toʻgʻrisida (PQ-148-son)

20.04.2026

Oʻzbekiston Respublikasi Prezidentining

qarori

Joriy yilning 24-fevral kuni oʻtkazilgan Oʻzbekiston Respublikasi Prezidentining yoshlar bilan ochiq muloqoti doirasida belgilangan hamda Oʻzbekiston Respublikasi Prezidentining 2026-yil 20-apreldagi PF-66-son Farmoni bilan tasdiqlangan “Yangi Oʻzbekiston yoshlari — 2030” strategiyasida qayd etilgan asosiy vazifalar ijrosini tashkil etish, shuningdek, yoshlar bandligini taʼminlash va ularning mehnat bozoriga kirib kelishiga koʻmaklashish boʻyicha qoʻshimcha shart-sharoitlar yaratish maqsadida qaror qilaman:

I. Maqsadlar

1. Quyidagilar ushbu qarorning asosiy maqsadlari etib belgilansin:

(a) 20 ming nafar yoshlarning tadbirkorlik koʻnikmalarini shakllantirishga koʻmaklashish;

(b) har yili 20 ming nafar yoshlarni zamonaviy kasblarga oʻqitishga koʻmaklashish.

II. “Yangi Oʻzbekiston yoshlari — 2030” strategiyasini 2026-2027-yillarda amalga oshirish

2. “Yangi Oʻzbekiston yoshlari — 2030” strategiyasida belgilangan vazifalarni 2026-2027-yillarda amalga oshirish boʻyicha chora-tadbirlar dasturi ilovaga muvofiq tasdiqlansin.

III. Yoshlar tadbirkorligini qoʻllab-quvvatlash

3. Yoshlar ishlari agentligi, Savdo-sanoat palatasi, Oliy taʼlim, fan va innovatsiyalar vazirligi hamda Oʻzbekiston fermerlari kengashining quyidagi takliflari maʼqullansin:

(a) 2030-yilga qadar 20 ming nafar yoshlarni tadbirkorlikka oʻqitishga moʻljallangan Yoshlar ishlari agentligining “Yangi avlod tadbirkorlari” dasturini ishga tushirish, unga koʻra:

(i) mahalliy va xorijiy ekspertlar (konsultantlar) hamda xususiy sektor bilan shartnoma asosida hamkorlik qilinadi, “Yangi avlod tadbirkorlari” dasturi doirasida oʻqitish uchun yoshlar saralab olinadi;

(ii) “Yangi avlod tadbirkorlari” dasturi doirasida biznes loyihasini ishlab chiqish, sotuvga chiqish va bozorni kengaytirish kabi yoʻnalishlarni qamrab oluvchi tadbirkorlik asoslari boʻyicha bilimlar berib boriladi;

(iii) yoshlar loyihalariga mentorlik va konsultativ xizmatlar koʻrsatiladi;

(iv) loyiha yakunida yoshlarning bilimlari sinovdan oʻtkazilib, ijobiy oʻzlashtirish koʻrsatkichlariga erishgan eng yaxshi 1 ming nafar yoshlarga Yoshlar ishlari agentligining sertifikati beriladi;

(v) sertifikatga ega boʻlgan yoshlarga Yoshlar tadbirkorligini rivojlantirish davlat maqsadli jamgʻarmasi (keyingi oʻrinlarda — Jamgʻarma)ga Davlat budjetidan ajratilgan mablagʻlar doirasida bazaviy hisoblash miqdorining (keyingi oʻrinlarda — BHM) 500 baravarigacha miqdorda Markaziy bank asosiy stavkasining 50 foizi miqdoridagi foiz stavkasida 6 oylik imtiyozli davr bilan 3 yilgacha muddatga ssuda ajratiladi;

(b) Jamgʻarmadan moliyaviy koʻmak olgan yosh tadbirkorlar faoliyatidagi muammolari va masalalarini hal qilishga koʻmaklashuvchi Yoshlar biznes maslahatchilari guruhini shakllantirish;

(v) 2026-yil 1-avgustdan boshlab tuman fermerlari kengashlari huzuridagi Fermer xoʻjaliklarida buxgalteriya hisobi va hisobotini yuritish markazlari tomonidan boshligʻi yoshlar boʻlgan yangi tashkil etilgan fermer xoʻjaliklariga aʼzolik badallari toʻlanganligi hamda paxta va gʻalla yetishtirishidan qatʼi nazar 2 yil davomida bepul xizmat koʻrsatish.

4. Yoshlar tadbirkorligini qoʻllab-quvvatlash maqsadida 2026-yil 1-iyuldan boshlab Jamgʻarma tomonidan budjetdan ajratilgan mablagʻlar doirasida yoshlar tashkil etgan tadbirkorlik subyektlarini muhandislik-kommunikatsiya tarmoqlariga (elektr energiyasi, ichimlik suvi va oqova suv tarmogʻi) ulash bilan bogʻliq davlat xizmatlari xarajatlarining koʻpi bilan BHMning 10 baravarigacha boʻlgan qismini qoplab berish tartibi joriy etilsin.

IV. Yoshlarning mehnat bozoriga kirib kelishini ragʻbatlantirish

5. Belgilansinki, 2026-yil 1-iyuldan boshlab yoshlarni davlat xizmatiga qabul qilish jarayonlarida yagona yondashuvni taʼminlash boʻyicha quyidagi tartiblar joriy etiladi:

(a) suhbat bosqichida beriladigan savollar (topshiriqlar) davlat organining rasmiy veb-saytida kamida bir oy oldin eʼlon qilinadi, bir oy oldin eʼlon qilinmagan savollarni nomzodlarga berish taqiqlanadi, bundan yangi tashkil etilgan davlat organlari mustasno;

(b) ichki tanlovlar oʻtkazilmaydigan hamda tanlovlarni oʻtkazishda nomzodlarga nisbatan umumiy yoki maxsus ish stajiga oid talablar belgilanmaydigan lavozimlar roʻyxati hamda tanlovlarni oʻtkazishda nomzodlarga nisbatan koʻpi bilan 2 yil umumiy yoki maxsus ish stajiga oid talablar qoʻyiladigan lavozimlar roʻyxati belgilanadi.

6. Oliy taʼlim, fan va innovatsiyalar vazirligi, Kambagʻallikni qisqartirish va bandlik vazirligi hamda Yoshlar ishlari agentligining ishsiz yoshlarni mehnat bozorida talab yuqori boʻlgan zamonaviy kasblarga oʻqitish, ularni qayta tayyorlash va malakasini oshirish tizimini takomillashtirish toʻgʻrisidagi quyidagi takliflari maʼqullansin:

(a) mehnat bozorida talab yuqori boʻlgan hamda zamonaviy kasblar reyestrini (keyingi oʻrinlarda — Reyestr) shakllantirish;

(b) Reyestrga kiritilgan kasblarga oʻqigan yoshlarning kasbiy koʻnikmalarini baholash — milliy sertifikatsiyalash tizimini joriy etish;

(v) zamonaviy kasblar boʻyicha milliy sertifikat olgan quyidagi toifadagi yoshlarning xarajatlarini “Yoshlar daftari” jamgʻarmasi mablagʻlari hisobidan qoplab berish tizimini yoʻlga qoʻyish:

(i) Ijtimoiy reyestrga kiritilgan davlat taʼminotidagi oilalar va kambagʻal oilalarning farzandlariga oʻqish va imtihon xarajatlari;

(ii) “kambagʻallik chegarasidagi oila” toifasiga kiritilgan oilalarning farzandlariga imtihon topshirish xarajatlari.

Kambagʻallikni qisqartirish va bandlik vazirligi, Oliy taʼlim, fan va innovatsiyalar vazirligi Yoshlar ishlari agentligi bilan birgalikda uch oy muddatda ushbu banddan kelib chiqib, tegishli qonunchilik hujjatlariga oʻzgartirish va qoʻshimchalar kiritish boʻyicha normativ-huquqiy hujjat loyihasini Vazirlar Mahkamasiga kiritsin.

7. Yoshlar ishlari agentligi 2026-yil 1-oktabrga qadar:

(a) yiliga 20 ming nafar yoshlarni nodavlat qoʻshimcha taʼlim xizmatlari koʻrsatuvchi subyektlar bilan hamkorlikda zamonaviy kasblarga oʻqitish boʻyicha “Kelajak kasblari” dasturini yoʻlga qoʻysin;

(b) Kasbiy taʼlim agentligi bilan birgalikda har bir tuman (shahar)da texnikum va nodavlat qoʻshimcha taʼlim tashkilotlarida kasb-hunar ustaxona-laboratoriyalarini tashkil etsin. Buning uchun kasb-hunar ustaxona-laboratoriyasini tashkil etish istagini bildirgan tashabbuskorga Yoshlar tadbirkorligini rivojlantirish davlat maqsadli jamgʻarmasiga Davlat budjetidan ajratilgan mablagʻlar doirasida BHMning 1 200 baravarigacha miqdorda 6 oylik imtiyozli davr bilan 3 yilgacha muddatga foizsiz ssuda ajratsin.

8. Kasbiy taʼlim tashkilotlarida innovatsiyalarni rivojlantirish hamda texnikum oʻquvchilarini qoʻllab-quvvatlash maqsadida:

(a) 2026-yildan boshlab tijoratlashtirish salohiyati yuqori boʻlgan startap loyihalar asosida yangi mahsulotlar va texnika-texnologiyalarni yaratish uchun davlat texnikumlari huzurida “spin-off” korxonalarini tashkil etishga ruxsat beriladi. Bunda:

(i) korxonalar ustav fondidagi davlat ulushini 5 yil muddat davomida xususiylashtirish man etiladi;

(ii) tegishli muassasalarning boʻsh turgan bino va inshootlaridagi maydonlar 5 yildan ortiq boʻlmagan muddatga ijaraga beriladi;

(iii) mazkur bandning “a” kichik bandi “ii” xatboshisida nazarda tutilgan huquqlardan korxonalarning asosiy faoliyat yoʻnalishidan tashqari boshqa maqsadlarda foydalanish taqiqlanadi;

(b) “spin-off” korxonalariga texnikum oʻquvchilarining startap loyihalarini amalga oshirish uchun Kasbiy taʼlimni rivojlantirish jamgʻarmasi mablagʻlari hisobidan 1 milliard soʻmgacha grant ajratiladi.

9. Kasbiy taʼlim agentligi:

(a) 2026-yil yakuniga qadar Qoraqalpogʻiston Respublikasi, viloyatlar va Toshkent shahrida kamida bittadan texnikumlarda “spin-off” korxonasini namunali qilib ishga tushirsin;

(b) ikki oy muddatda mazkur “spin-off” korxonalari tizimini yoʻlga qoʻyish boʻyicha tegishli normativ-huquqiy hujjat loyihasini Vazirlar Mahkamasiga kiritsin.

V. Qaror ijrosini tashkil etish, taʼminlash va nazorat

10. Yoshlar ishlari agentligi uch oy muddatda manfaatdor vazirlik va idoralar bilan birgalikda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

11. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari, masʼul vazirliklar, idoralar va boshqa tashkilotlar rahbarlariga Strategiyada belgilangan vazifalarni 2026-2027-yillarda amalga oshirish boʻyicha chora-tadbirlar dasturida nazarda tutilgan tadbirlarni oʻz vaqtida, sifatli va toʻliq bajarish yuzasidan shaxsan javobgarlik yuklatilsin.

12. Oʻzbekiston Milliy axborot agentligi va Oʻzbekiston Milliy teleradiokompaniyasiga ushbu qaror doirasida amalga oshiriladigan ishlarni keng yoritib borish tavsiya qilinsin.

13. Mazkur qarorning ijrosini nazorat qilish va ijro uchun masʼul tashkilotlar faoliyatini muvofiqlashtirish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 20-aprel,

PQ-148-son

Oʻzbekiston Respublikasi Prezidentining 2026-yil 20-apreldagi PQ-148-son qaroriga ILOVA

“Yangi Oʻzbekiston yoshlari — 2030” strategiyasida belgilangan vazifalarni 2026-2027-yillarda amalga oshirish boʻyicha chora-tadbirlar

DASTURI