Toshkent davlat agrar universiteti faoliyatini takomillashtirishga oid qoʻshimcha chora-tadbirlar toʻgʻrisida (PQ-135-son)

11.04.2026

Oʻzbekiston Respublikasi Prezidentining

qarori

[Koʻchirma]

Agrar soha uchun yuqori malakali va raqobatbardosh mutaxassislar tayyorlash, agrar taʼlim tizimini sifat jihatidan yangi bosqichga olib chiqish, oʻquv jarayoniga ilgʻor taʼlim texnologiyalarini joriy etish, taʼlim sifati va ilmiy salohiyatni oshirish, shuningdek, agrar sohani barqaror rivojlantirish, ilm-fan, taʼlim va ishlab chiqarishni integratsiya qilish maqsadida qaror qilaman:

I. Maqsadlar

1. Quyidagilar 2030-yilga qadar Toshkent davlat agrar universitetini (keyingi oʻrinlarda — Universitet) rivojlantirishning asosiy maqsadli koʻrsatkichlari etib belgilansin:

(a) Universitetning xalqaro nufuzini oshirish hamda xalqaro reyting tashkilotlarining top-500 talik oliy taʼlim tashkilotlari roʻyxatiga kiritishga erishish;

(b) Universitetda taʼlim, boshqaruv va xizmatlar koʻrsatish jarayonlarini sunʼiy intellekt va raqamli texnologiyalar asosida tashkil etish;

(v) ilmiy ishlanmalarni tijoratlashtirishdan olinadigan mablagʻlar hajmini 3 baravarga oshirish;

(g) xalqaro hamkorlikda amalga oshiriladigan ilmiy tadqiqotlar sonini 3 baravarga, qoʻshma taʼlim dasturlari sonini 20 taga oshirish;

(d) xalqaro akkreditatsiyadan oʻtgan taʼlim dasturlari sonini 4 baravarga oshirish;

(j) oʻquv-ilmiy laboratoriyalar sonini 20 foizga oshirish.

II. Agrar taʼlimning uzviyligini taʼminlash

2. Agrar sohadagi taʼlim, ilmiy-tadqiqot muassasalari va ishlab chiqarish korxonalari bilan birgalikdagi faoliyat toʻgʻrisidagi shartnoma asosida 1-ilovaga muvofiq yuridik shaxs maqomiga ega boʻlmagan Agrar taʼlim-ishlab chiqarish kooperatsiyasi (keyingi oʻrinlarda — Agrar taʼlim kooperatsiyasi) tashkil etilsin hamda uning asosiy faoliyat yoʻnalishlari 2-ilovaga muvofiq tasdiqlansin.

3. Belgilansinki:

(a) roʻyxati 3-ilovada keltirilgan umumiy oʻrta taʼlim maktablari (keyingi oʻrinlarda — maktablar) Agrar taʼlim kooperatsiyasining umumiy oʻrta taʼlim muassasalari sifatida faoliyat yuritadi;

(b) 2026/2027 oʻquv yilidan boshlab maktablarning 1 tadan 7 — 11 sinflarida tabiiy fanlar chuqurlashtirilgan holda oʻqitiladi.

4. Qishloq xoʻjaligi vazirligi (I. Abdurahmonov):

(a) Maktabgacha va maktab taʼlim vazirligi (E. Karimova) bilan birgalikda uch oy muddatda maktablarning tabiiy fanlar boʻyicha variativ oʻquv rejasini ishlab chiqsin hamda 2026/2027 oʻquv yilidan boshlab taʼlim jarayonlariga joriy qilsin;

(b) Agrar taʼlim kooperatsiyasi tarkibidagi ilmiy-tadqiqot muassasalarining yuqori turuvchi vazirlik va idoralari bilan birgalikda:

(i) ilmiy-tadqiqot muassasalarining yuqori malakali professor-oʻqituvchi va mutaxassislarini Universitetga biriktirilgan texnikumlar va Universitetning tegishli kafedralariga ilmiy maslahatchi sifatida biriktirsin;

(ii) har yili Universitetga biriktirilgan texnikumlar oʻquvchilari va pedagoglari hamda Universitetning talabalari va pedagoglarini ilmiy-tadqiqot muassasalariga stajirovka va amaliyot oʻtashga jalb qilib borsin;

(v) Agrar taʼlim kooperatsiyasi tarkibidagi taʼlim muassasalarining yuqori sinf oʻquvchilari va talabalarini kasbga yoʻnaltirish maqsadida “dala kunlari”ni tashkil etib, qishloq xoʻjaligi sohasidagi oʻquv-tajriba xoʻjaliklari, ilgʻor oziq-ovqat texnologiyalari va agrotexnologiyalar bilan tanishtirib borishni yoʻlga qoʻysin.

5. Agrar taʼlim kooperatsiyasi faoliyatini boshqarish maqsadida jamoatchilik asosida faoliyat olib boruvchi Agrar taʼlim-ishlab chiqarish kooperatsiyasi faoliyatini muvofiqlashtiruvchi kengash (keyingi oʻrinlarda — Muvofiqlashtiruvchi kengash) tuzilsin hamda uning tarkibi va asosiy vazifalari 4 va 4a-ilovalarga muvofiq tasdiqlansin.

6. Qoraqalpogʻiston Respublikasi va viloyatlarda Universitetning budjetdan tashqari mablagʻlari hisobidan moliyalashtiriladigan yuridik shaxs maqomiga ega boʻlmagan loyiha ofislari (keyingi oʻrinlarda — Loyiha ofislari) tashkil etilsin va Loyiha ofislari:

(a) 5-ilovada keltirilgan obyektlarga bepul foydalanish huquqi asosida joylashtirilsin;

(b) asosiy vazifalari va ular tomonidan amalga oshiriladigan loyihalarning ustuvor yoʻnalishlari 5a va 5b-ilovalarga muvofiq tasdiqlansin.

7. Iqtisodiyot va moliya vazirligi 2026-yilda Oʻzbekiston Respublikasi respublika budjetining erkin qoldiq mablagʻlari hamda har chorak yakunlari boʻyicha aniqlanadigan prognozdan oshirib bajarilgan qismi hisobidan Loyiha ofislari faoliyatini tashkil etish maqsadida Universitetga 17,1 mlrd soʻm ajratsin.

8. Loyiha ofislari xodimlarining lavozim maoshiga 100 foiz miqdorda ustama haq toʻlash tartibi joriy etilsin. Bunda ustama haqning 50 foizi Loyiha ofislari joylashgan hududning mahalliy budjeti, qolgan 50 foizi esa Universitetga respublika budjetidan maqsadli tarzda ajratiladigan mablagʻlar hisobidan toʻlanadi.

9. Qoraqalpogʻiston Respublikasi Vazirlar Kengashi va viloyatlar hokimliklari Qishloq xoʻjaligi vazirligi va Loyiha ofislari bilan birgalikda:

(a) hududlarda qishloq xoʻjaligi mahsulotlarini yetishtirish va qayta ishlash bilan shugʻullanuvchi tadbirkorlik subyektlari ishtirokida har chorakda kamida bir marotaba ilmiy yondashuv asosida sohadagi muammolar va “oʻsish nuqtalari”ni aniqlash hamda istiqbolli loyihalarni muhokama qilish va ularni amaliyotga tatbiq etishga qaratilgan ilmiy-amaliy uchrashuvlarni tashkil etsin;

(b) hududlarning qishloq xoʻjaligi sohasidagi muammolari yechimiga qaratilgan loyihalarni ishlab chiqsin va hududga biriktirilgan tijorat banklari hamda xususiy sektor koʻmagida soha yoʻnalishidan kelib chiqib, ilmiy-amaliy loyihalarni moliyalashtirish choralarini koʻrsin;

(v) Universitet olimlari va tadqiqotchilarining ilmiy daraja olish uchun tayyorlanadigan dissertatsiya tadqiqotlari hududlardagi muammolardan kelib chiqib amalga oshirilishini tashkillashtirish va ularning natijalarini amaliyotga tatbiq etish choralarini koʻrsin;

(g) hududlarning qishloq xoʻjaligi mahsulotlari brendini yaratish, qoʻshilgan qiymat zanjirini rivojlantirish hamda ilgʻor loyihalarni qoʻllab-quvvatlash va keng targʻib qilish boʻyicha yetakchi tadbirkorlar bilan hamkorlikni yoʻlga qoʻysin.

10. Vazirlar Mahkamasi (J. Xodjayev) Qishloq xoʻjaligi vazirligi, Qoraqalpogʻiston Respublikasi Vazirlar Kengashi Raisi va viloyatlar hokimlari tomonidan Universitet rektori, Loyiha ofislari hamda qishloq xoʻjaligi mahsulotlarini yetishtirish va qayta ishlash bilan shugʻullanuvchi tadbirkorlik subyektlari ishtirokida hududlarda 9-bandda nazarda tutilgan masalalar boʻyicha muntazam ravishda ilmiy-amaliy uchrashuvlarni oʻtkazish reja-grafigini tasdiqlasin.

11. Qishloq xoʻjaligi vazirligi va “Toshkent traktor zavodi” MCHJning Universitet bilan “Toshkent traktor zavodi” MCHJning uzviy hamkorligini taʼminlash, kelgusida sohaga amaliy koʻnikmalarga ega boʻlgan kadrlarni tayyorlash maqsadida Universitetning “Qishloq xoʻjaligini mexanizatsiyalashtirish” va “Agromuhandislik” taʼlim yoʻnalishlari oʻquv jarayonlarini “Toshkent traktor zavodi” MCHJ hududida amalga oshirish haqidagi taklifi maʼqullansin. Bunda:

(a) ushbu taʼlim yoʻnalishlarida “Toshkent traktor zavodi” MCHJ bilan hamkorlikda dual taʼlim dasturi joriy etiladi;

(b) “Toshkent traktor zavodi” MCHJning muhandislaridan biri tegishli fakultet dekani oʻrinbosari sifatida oʻrindoshlik asosida faoliyat yuritadi;

(v) ushbu taʼlim yoʻnalishi talabalari belgilangan tartibda transport va ish haqi bilan taʼminlanadi.

III. Universitetda oʻquv jarayonlarini takomillashtirish

12. Belgilansinki, 2026/2027 oʻquv yilidan boshlab:

(a) agrar oliy taʼlim muassasalarida 6-ilovada roʻyxati keltirilgan taʼlim yoʻnalishlari boʻyicha kadrlar tayyorlash tizimi uch yillik taʼlim dasturlari asosida yoʻlga qoʻyiladi. Bunda oʻquv jarayonlarida nazariy va amaliy mashgʻulotlar ulushi:

(i) 1-kursda — 60 foiz nazariy va 40 foiz amaliy;

(ii) 2-kursda — 50 foiz nazariy va 50 foiz amaliy;

(iii) 3-kursda — 30 foiz nazariy va 70 foiz amaliy boʻlishi nazarda tutiladi;

(b) talabalarning amaliy koʻnikmalarini mustahkamlash maqsadida kadrlar tayyorlash yoʻnalishlari va sohalarning xususiyatidan kelib chiqib, Universitetning yuqori kurslarida oʻqish nazariy taʼlimdan ajralgan holda 4 oy muddatga uzluksiz dual taʼlim (talabalar amaliyoti) asosida quyidagi shakllarda tashkil etiladi:

(i) agronomiya taʼlim yoʻnalishidagi talabalar “Yangi agronom” tizimi asosida kadrlar tayyorlash doirasida sifatli urugʻ va nav, zamonaviy agrotexnologiya yordamida hosildorlikni oshirish, paxta va gʻalla yetishtirishda agrotexnik tadbirlarni oʻtkazish, suv tejovchi texnologiyalarni, qishloq xoʻjaligi texnikalarini boshqarish, dronlardan foydalanishda ishtirok etadi;

(ii) oʻsimliklarni himoya qilish va karantin taʼlim yoʻnalishidagi talabalar ekinlarni kasallik va zararkunandalardan himoya qilish, oʻsimliklarni himoya qiluvchi preparatlar ishlab chiqarish va sotishda, biolaboratoriyalarda va boshqa karantin koʻriklarida ishtirok etadi;

(iii) oʻrmonchilik va aholi yashash joylarini koʻkalamzorlashtirish taʼlim yoʻnalishidagi talabalar oʻrmon xoʻjaliklari, milliy bogʻlar va qoʻriqxonalar, landshaft dizayn, dendrologiya va yashil hududlarni loyihalash, parvarishlash hamda manzarali oʻsimliklar assortimentini tanlash va joriy etishda ishtirok etadi;

(iv) agrokimyo va tuproqshunoslik taʼlim yoʻnalishidagi talabalar tuproqlar va ozuqa moddalar tahlili, oziqlantirish rejimlarini ishlab chiqish, oziqlantirish jarayonlarida, agrolaboratoriyalarda, oʻgʻitlar ishlab chiqarish va sotishda ishtirok etadi;

(v) Universitet tomonidan belgilanadigan mos taʼlim yoʻnalishlarining oʻquv dasturlarini qayta koʻrib chiqqan holda:

(i) 1-kurs bitiruvchilariga “A”, “V”, “S” va “D” toifalaridagi qishloq xoʻjaligi, melioratsiya va yoʻl-qurilish texnikalarini boshqarish huquqini beruvchi traktorchi-mashinist guvohnomasi;

(ii) 2-kurs bitiruvchilariga (“A”, “V”, “S” va “D” toifasidagi traktorchi-mashinist guvohnomasi mavjud) “E” va “F” toifalaridagi qishloq xoʻjaligi, melioratsiya va yoʻl-qurilish texnikalarini boshqarish huquqini beruvchi traktorchi-mashinist guvohnomasi belgilangan tartibda beriladi;

(g) mazkur bandning “v” kichik bandida nazarda tutilmagan taʼlim yoʻnalishlarida tahsil olayotgan talabalarga traktorchi-mashinist guvohnomasini olish boʻyicha pulli oʻquv kurslari yoʻlga qoʻyiladi;

(d) Universitet tomonidan belgilanadigan mos taʼlim yoʻnalishlarining 3-kurs talabalari qishloq xoʻjaligi maqsadlari uchun dronlardan foydalanish boʻyicha nazariy va amaliy koʻnikmalarga oʻrgatiladi.

13. Universitet rektoriga:

(a) ilm-fan, sport, madaniyat sohalarida va xalqaro miqyosida oʻtkaziladigan tadbirlarda erishgan alohida yutuqlari uchun doktorantlar, magistrantlar va talabalarni Universitetning budjetdan tashqari mablagʻlari hisobidan ragʻbatlantirib borish;

(b) Universitet hamda Loyiha ofislariga yuklatilgan vazifalar ijrosini taʼminlash maqsadida mahalliy hamda xorijiy ekspert va maslahatchilarni fuqarolik-huquqiy shartnoma asosida jalb etish huquqi berilsin.

14. Qishloq xoʻjaligi vazirligi:

(a) Transport vazirligi bilan birgalikda uch oy muddatda Universitetga uchuvchisiz uchish apparatlarini respublika hududiga olib kirish, saqlash va ulardan ilmiy tadqiqot, amaliyot va mutaxassislarni oʻqitish maqsadlarida foydalanish uchun ruxsat berish toʻgʻrisidagi takliflarni Vazirlar Mahkamasiga kiritsin;

(b) Oʻzbekiston fermerlari kengashi hamda tizimida ilmiy-tadqiqot muassasalari mavjud vazirlik va idoralar bilan birgalikda muntazam ravishda Universitetga amaliy tajribalari bilan talabalarni tanishtirish boʻyicha yuqori hosildorlikka erishgan fermerlar hamda ilmiy-tadqiqot muassasalarining malakali xodimlarini jalb qilib borsin.

IV. Agromuhandislik taʼlimini rivojlantirish

15. Qishloq xoʻjaligi vazirligi Oliy taʼlim, fan va innovatsiyalar vazirligi hamda Toshkent viloyati hokimligi bilan birgalikda faoliyati Universitetning budjetdan tashqari mablagʻlari hisobidan moliyalashtiriladigan yuridik shaxs maqomiga ega boʻlmagan Universitetning Agromuhandislar maktabini tashkil etsin. Bunda:

(a) Agromuhandislar maktabida taʼlim olish uchun Universitetning akademik koʻrsatkichlari yuqori boʻlgan 1-kursni tamomlagan talabalari tanlov asosida saralanadi va amaliyotga yoʻnaltirilgan maxsus taʼlim dasturlari asosida oʻqitiladi;

(b) Agromuhandislar maktabi yoʻnalishiga mos ishlab chiqarish tashkilotlari belgilanib, ularning texnik va texnologik rivojlanishini taʼminlash maqsadida hamkorlikda sunʼiy intellektga asoslangan zamonaviy laboratoriya tashkil etiladi;

(v) Agromuhandislar maktabida ishlab chiqarish tashkilotlari tomonidan taqdim etilgan muammolar portfeli asosida ilmiy-tadqiqot va tajriba-konstruktorlik ishlarini olib borish yoʻlga qoʻyiladi;

(g) Agromuhandislar maktabi qishloq xoʻjaligi tashkilotlariga robototexnika, dron va boshqa qurilmalar yordamida yerlardan samarali foydalanish, tuproq tahlillarini amalga oshirish, ekinlarni parvarishlash, kasallik va zararkunandalarga qarshi kurashish, resurs tejamkor texnologiyalarni joriy etish boʻyicha pulli xizmatlar koʻrsatadi;

(d) Agromuhandislar maktabida amalga oshiriladigan amaliy va innovatsion loyihalarni ishlab chiqarish tashkilotlari va Ilm-fanni moliyalashtirish va innovatsiyalarni qoʻllab-quvvatlash jamgʻarmasi mablagʻlari hisobidan belgilangan tartibda birgalikda moliyalashtirish tizimi joriy etiladi.

16. Qishloq xoʻjaligi vazirligi, Qoraqalpogʻiston Respublikasi Vazirlar Kengashi va viloyatlar hokimliklari:

(a) Agromuhandislar maktabi hamda yirik ishlab chiqarish tashkilotlari bilan quyidagi yoʻnalishlarda samarali hamkorlikni yoʻlga qoʻysin:

(i) ishlab chiqarish tashkilotlari muammolari asosida qoʻshma ilmiy loyihalarni amalga oshirish va moliyalashtirish;

(ii) iqtidorli talabalar va yosh olimlarni qoʻllab-quvvatlash, shu jumladan, ular tomonidan olib borilayotgan ilmiy izlanishlarni moliyalashtirish;

(iii) zamonaviy oʻquv va ilmiy laboratoriyalar tashkil etish;

(b) mazkur qarorning 12-bandi “b” kichik bandida nazarda tutilgan dual taʼlim asosida 4 oy muddatga uzluksiz amaliyotni oʻtaydigan talabalarni yashash joyi va sharoiti bilan taʼminlasin.

V. Talabalarning amaliy koʻnikmalarini oshirish

17. Yoshlar ishlari agentligi, Iqtisodiyot va moliya vazirligi, Qishloq xoʻjaligi vazirligining quyidagi takliflari maʼqullansin:

(a) Universitet huzurida yuridik shaxs maqomiga ega boʻlmagan Yangi agronomlarni tayyorlash jamgʻarmasini (keyingi oʻrinlarda —Jamgʻarma) tashkil etish;

(b) yoshlar tomonidan qishloq xoʻjaligi mahsulotlarini yetishtirishdan sotishgacha boʻlgan zanjirni moliyalashtirish maqsadida Yoshlar tadbirkorligini rivojlantirish davlat maqsadli jamgʻarmasi mablagʻlari hisobidan 4 mlrd soʻm ajratish hamda Oʻzbekiston yosh fermerlar kengashi tomonidan “Yosh fermerlar savdo maktabi” loyihasini amalga oshirish. Bunda mazkur loyiha doirasida:

(i) Agromuhandislar maktabi va “kelajak fermerlari” eksperimental jamoalari tomonidan yangi agrotexnologiyalar yordamida serdaromad ekinlar ekib, katta daromad topayotgan yoshlar tajribasi ommalashtiriladi;

(ii) qishloq xoʻjaligi yer maydonlari ajratilgan yoshlarga yetishtirgan mahsulotini qadoqlash, brending, ichki hamda tashqi bozorlarda sotish, onlayn savdo platformalarida ishlash oʻrgatiladi.

18. Yoshlar ishlari agentligi bir oy muddatda Yoshlar tadbirkorligini rivojlantirish davlat maqsadli jamgʻarmasi mablagʻlari hisobidan 6 mlrd soʻm miqdoridagi mablagʻlar Jamgʻarmani shakllantirish uchun ajratilishini taʼminlasin.

19. Universitet talabalarini agrar sohada amaliy bilimlarga ega boʻlgan mutaxassis sifatida tayyorlash maqsadida 2026/2027 oʻquv yilidan boshlab “kelajak fermerlari” tashabbusi joriy etilsin. Bunda:

(a) Toshkent viloyati hududidan unumdorligi past, oʻzlashtirilmagan yerlardan 200 gektar qishloq xoʻjaligiga moʻljallangan yer uchastkalari ijara huquqi asosida Universitetga oʻquv-ilmiy tajriba xoʻjaligini tashkil etish uchun ajratiladi;

(b) Universitetning tegishli taʼlim yoʻnalishlarining 5 nafar 2-kurs talabalaridan iborat boʻlgan “kelajak fermerlari” eksperimental jamoalari tashkil etiladi;

(v) “kelajak fermerlari” eksperimental jamoalariga 10 sotixdan yer uchastkalari talabalar Universitetni bitirguniga qadar biriktirib beriladi;

(g) yer uchastkalari “kelajak fermerlari” eksperimental jamoalari tomonidan oʻzlashtiriladi hamda ushbu yer uchastkalarida ular tomonidan erkin tanlanadigan qishloq xoʻjaligi mahsulotlari yetishtiriladi. Bunda yer uchastkalarini oʻzlashtirish bilan bogʻliq barcha tadbirlar uchun Jamgʻarma mablagʻlari hisobidan har yili bir yil muddatga bazaviy hisoblash miqdorining 10 baravari miqdorida foizsiz ssuda ajratiladi;

(d) yer uchastkalarida yetishtirilgan qishloq xoʻjaligi mahsulotlarini realizatsiya qilishdan olingan daromadlar “kelajak fermerlari” eksperimental jamoalarida qoladi. Bunda ushbu daromadlar dehqon xoʻjaligida mahsulot yetishtirishdan olingan daromadlar deb eʼtirof etiladi hamda jismoniy shaxslardan olinadigan daromad soligʻiga tortilmaydi;

(j) “kelajak fermerlari” eksperimental jamoalari tomonidan amalga oshiriladigan tadbirlarga uslubiy rahbarlik qilish maqsadida Universitet professor-oʻqituvchilari ilmiy rahbar sifatida biriktiriladi;

(z) “kelajak fermerlari” eksperimental jamoalaridagi talabalarni kursdan kursga oʻtkazish hamda Universitetni bitirganidan soʻng oliy maʼlumot toʻgʻrisidagi hujjat — diplom berishda ularning amaliy natijalariga alohida eʼtibor qaratiladi.

20. Universitetga ajratilgan va “kelajak fermerlari” eksperimental jamoalari tomonidan oʻzlashtirilgan yer uchastkalari ularni oʻzlashtirgan talabalar Universitetni bitirganlaridan soʻng Toshkent viloyati hokimligi zaxirasiga qaytariladi hamda ular elektron onlayn auksion savdolarida sotiladi. Bunda yer uchastkalarini sotishdan tushadigan mablagʻlarning 100 foizi Universitetga oʻtkazib beriladi.

VI. Universitet tomonidan agroxizmatlar koʻrsatishni rivojlantirish.

21. Qishloq xoʻjaligi vazirligi va Iqtisodiyot va moliya vazirligining Universitet tuzilmasida konsalting xizmatlari hamda tadbirkorlik subyektlari va fuqarolarga zamonaviy agroxizmatlar koʻrsatish bilan shugʻullanuvchi Agroxizmatlar departamentini (keyingi oʻrinlarda — departament) tashkil etish va departament tomonidan 7-ilovaga muvofiq agroxizmatlar koʻrsatish haqidagi takliflari maʼqullansin.

22. Tadbirkorlik subyektlari hamda fuqarolarga konsalting xizmatlari va zamonaviy agroxizmatlar koʻrsatishda departament:

(a) Universitet olimlari tomonidan yaratilgan ilmiy va innovatsion ishlanmalar natijalarini ishlab chiqarishga joriy etishda (tijoratlashtirishga) koʻmaklashadi;

(b) Universitetning tegishli taʼlim yoʻnalishlarida tahsil olayotgan talabalarini mehnat shartnomasi asosida ishga oladi yoki fuqarolik-huquqiy shartnomalar asosida jalb qiladi;

(v) fermer va dehqon xoʻjaliklari, tomorqa yer egalariga agroxizmatlar koʻrsatish sifatini oshirish maqsadida koll-markaz va raqamli agroxizmatlar platformasini tashkil etadi;

(g) zamonaviy mobil laboratoriyalar faoliyatini yoʻlga qoʻyadi;

(d) Agrosanoatni rivojlantirish agentligi hamda “Uzagrostar xolding” kompaniyasi bilan qishloq xoʻjaligi sohasida loyihalarni amalga oshirishda hamkorlik oʻrnatadi.

VII. Agrar oliy taʼlim muassasalarida innovatsiya va startap ekotizimini muvofiqlashtirish

23. Agrar sohada yoshlarning yangi gʻoya va innovatsion tashabbuslarini qoʻllab-quvvatlash, oliy va kasbiy taʼlim tashkilotlari yoshlari uchun startap ekotizimini shakllantirish maqsadida belgilansinki:

(a) 2026/2027 oʻquv yili yakuniga qadar Universitetning tadqiqot va ishlanmalar markazini (R&D center) oʻz ichiga olgan agroinnovatsiya xabi faoliyati “Biznesni rivojlantirish banki” ATB bilan hamkorlikda tashkil etiladi;

(b) agrar va ishlab chiqarish sohalaridagi innovatsion texnologiyalar va ilmiy ishlanmalarni amaliyotga joriy etish maqsadida Universitetning oʻquv-ilmiy tajriba xoʻjaligi negizida agroinnovatsiyalarni qoʻllab-quvvatlashga qaratilgan agrotexnopark tashkil etiladi. Bunda agrotexnoparkning moddiy-texnika bazasini shakllantirish uchun zarur boʻlgan texnika va jihozlarni xarid qilish Davlat budjeti mablagʻlari hisobidan amalga oshiriladi.

24. Qishloq xoʻjaligi vazirligi:

(a) Toshkent viloyati hokimligi bilan birgalikda:

(i) ikki oy muddatda mazkur qarorning 19-bandida nazarda tutilgan maqsadlar uchun Toshkent viloyatining unumdorligi past boʻlgan 200 gektar qishloq xoʻjaligiga moʻljallangan yer uchastkalarini ijara huquqi asosida Universitetga ajratish yuzasidan Vazirlar Mahkamasiga taklif kiritsin;

(ii) “kelajak fermerlari” eksperimental jamoalari tashabbusini doimiy ravishda amalga oshirish maqsadida Universitet ehtiyojidan kelib chiqqan holda qoʻshimcha oʻzlashtirilmagan yer uchastkalarini ajratish boʻyicha takliflarni kiritib borsin;

(b) Qoraqalpogʻiston Respublikasi Vazirlar Kengashi va viloyat hokimliklari bilan birgalikda Loyiha ofislariga yuklatilgan vazifalarni amalga oshirish uchun tajriba xoʻjaliklarini tashkil etish maqsadida hududlar zaxirasida turgan 20 gektargacha boʻlgan yer uchastkalarini ijara huquqi asosida Universitetga ajratish yuzasidan Vazirlar Mahkamasiga taklif kiritsin.

25. Qishloq xoʻjaligi vazirligi, Iqtisodiyot va moliya vazirligi, Davlat aktivlarini boshqarish agentligining Universitet foydalanishida boʻlgan Qibray tumani “Oybek” MFY Yuksalish koʻchasida joylashgan 1,2 gektar yer maydonida davlat-xususiy sheriklik asosida “in vitro” sharoitida mevali va manzarali daraxtlar payvandtaglari va koʻchatlarini yetishtirish uchun zamonaviy laboratoriya, issiqxona va koʻchatxonalar tashkil etish toʻgʻrisidagi taklifi maʼqullansin.

26. 2026-2027-yillarda Toshkent davlat agrar universiteti faoliyatini xalqaro talablar asosida yanada takomillashtirish boʻyicha “yoʻl xaritasi” 8-ilovaga muvofiq tasdiqlansin.

VIII. Taʼlim dasturlarini xalqaro taʼlim standartlariga muvofiqlashtirish

27. Qishloq xoʻjaligi vazirligi:

(a) Oliy taʼlim, fan va innovatsiyalar vazirligi bilan birgalikda ikki oy muddatda xorijiy hamda mahalliy ekspertlarni jalb qilgan holda Universitetda 9-ilovaga muvofiq asosiy vazifalarni amalga oshiradigan yuridik shaxs maqomisiz Transformatsiya markazini tashkil etsin;

(b) Investitsiyalar, sanoat va savdo vazirligi bilan birgalikda 2030-yilga qadar Universitetni nufuzli xalqaro reyting tashkilotlarining top-500 talik oliy taʼlim tashkilotlari roʻyxatiga kiritish bilan bogʻliq tadbirlarni amalga oshirish uchun xalqaro grant mablagʻlarini jalb etish choralarini koʻrsin.

28. Toshkent davlat agrar universitetining taʼlim va boshqaruv jarayonlarini raqamlashtirish hamda sunʼiy intellekt texnologiyalarini joriy etish boʻyicha chora-tadbirlar rejasi 10-ilovaga muvofiq tasdiqlansin.

29. Belgilab qoʻyilsinki, mazkur qarorning 10-ilovasiga muvofiq amalga oshiriladigan chora-tadbirlar Qishloq xoʻjaligi vazirligi va Universitetning budjetdan tashqari mablagʻlari hamda Qishloq xoʻjaligi vazirligi huzuridagi “Agrosanoatni raqamlashtirish markazi” MCHJning mablagʻlari hisobidan amalga oshiriladi.

30. Universitetning kuzatuv kengashi (I. Abdurahmonov) uch oy muddatda Transformatsiya markazi tomonidan ishlab chiqiladigan Universitetning xalqaro taʼlim standartlariga muvofiqlashtirilgan taʼlim dasturlari va Universitetni nufuzli xalqaro reyting tashkilotlarining top-500 talik oliy taʼlim tashkilotlari roʻyxatiga kiritish strategiyasini tasdiqlasin.

31. Qishloq xoʻjaligi vazirligi:

(a) Oʻzbekiston texnik jihatdan tartibga solish agentligi bilan birgalikda 2026/2027 oʻquv yilida Universitetning Ekofiziologik tadqiqotlar ilmiy laboratoriyasi “ISO/IEC 17025:2017” xalqaro standartiga muvofiq akkreditatsiyadan oʻtkazilishini taʼminlasin;

(b) Investitsiyalar, sanoat va savdo vazirligi bilan birgalikda Universitetning ilmiy laboratoriya xodimlarini oʻqitish, malakasini oshirish, sertifikatlash va laboratoriyani xalqaro akkreditatsiyadan oʻtkazish hamda unda xizmat koʻrsatishni yoʻlga qoʻyish bilan bogʻliq chora-tadbirlarni amalga oshirish uchun xalqaro moliya institutlarining grant mablagʻlarini jalb etsin.

32. Oʻzbekiston Respublikasi Prezidentining ayrim qarorlariga 11-ilovaga muvofiq oʻzgartirishlar kiritilsin.

IX. Qaror ijrosini tashkil qilish, taʼminlash va nazorat

33. Qishloq xoʻjaligi vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

34. Mazkur qarorning ijrosini samarali tashkil qilishga masʼul va shaxsan javobgar etib Bosh vazir oʻrinbosari J.A. Xodjayev hamda qishloq xoʻjaligi vaziri I.Yu. Abdurahmonov belgilansin.

35. Qaror ijrosini nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidenti Administratsiyasi rahbarining taʼlimni isloh qilish boʻyicha oʻrinbosari I.T. Siradjev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 11-aprel,

PQ-135-son

Oʻzbekiston Respublikasi Prezidentining 2026-yil 11-apreldagi PQ-135-son qaroriga 1-ILOVA

Agrar taʼlim-ishlab chiqarish kooperatsiyasi

TUZILMASI

Oʻzbekiston Respublikasi Prezidentining 2026-yil 11-apreldagi PQ-135-son qaroriga 2-ILOVA

Agrar taʼlim-ishlab chiqarish kooperatsiyasining asosiy faoliyat yoʻnalishlari

Quyidagilar Agrar taʼlim-ishlab chiqarish kooperatsiyasining asosiy faoliyat yoʻnalishlari hisoblanadi:

(a) agrar taʼlim, ilm-fan va ishlab chiqarishning oʻzaro integratsiyasini taʼminlash orqali agrar sohada kasbiy va oliy taʼlim yoʻnalishlarining kasbiy standart va malaka talablarini ishlab chiqish;

(b) taʼlim tashkilotlari dasturlarining uzviyligi va uzluksizligini taʼminlash, oʻquv jarayoniga ilgʻor xorijiy tajribani, jumladan zamonaviy taʼlim dasturlari va pedagogik texnologiyalarni tatbiq etish;

(v) taʼlim va ilm-fan oʻrtasida integratsiyani kuchaytirish, oʻquvchi va talabalarni bevosita ishlab chiqarish amaliyotiga keng jalb qilish hamda taʼlim dasturlarining ishlab chiqarish jarayonlari bilan uzviy bogʻliqligini taʼminlash;

(g) umumiy oʻrta, kasbiy va oliy taʼlimning oʻquv dasturlarini ishlab chiqishda takliflar berish, ishlab chiqarishdagi mavjud muammolarni oʻrganish natijalari boʻyicha ishlab chiqarish korxonalariga ilmiy yechimlar topish;

(d) yetakchi xorijiy oliy taʼlim, ilmiy-tadqiqot tashkilotlari va ishlab chiqarish korxonalari bilan hamkorlikda agrar soha va tarmoqlarda fundamental, amaliy va innovatsion loyihalarni amalga oshirish, ilm-fan yutuqlarini ishlab chiqarishga toʻgʻridan-toʻgʻri tatbiq qilish;

(j) yetakchi xorijiy oliy taʼlim tashkilotlari bilan hamkorlikda ularning oʻquv markazlarini, qoʻshma taʼlim dasturlarini, professor-oʻqituvchilarning stajirovkalarini tashkil etish hamda talabalarning akademik almashinuvini yanada kengaytirish;

(z) biriktirilgan kasbiy taʼlim tashkilotlariga taʼlim sifatini oshirish maqsadida oʻquv-uslubiy hamda moddiy-texnik jihatdan yordam koʻrsatish.

Oʻzbekiston Respublikasi Prezidentining 2026-yil 11-apreldagi PQ-135-son qaroriga 3-ILOVA

Agrar taʼlim-ishlab chiqarish kooperatsiyasining umumiy oʻrta taʼlim muassasalari

ROʻYXATI

Oʻzbekiston Respublikasi Prezidentining 2026-yil 11-apreldagi PQ-135-son qaroriga 4-ILOVA

Agrar taʼlim-ishlab chiqarish kooperatsiyasi faoliyatini muvofiqlashtiruvchi kengash

TARKIBI

Izoh: Muvofiqlashtiruvchi kengash aʼzolari boshqa ishga oʻtgan taqdirda, uning tarkibiga ushbu lavozimga yangidan tayinlangan yoki zimmasiga tegishli funksiyalarni bajarish yuklangan shaxslar kiritiladi.

Oʻzbekiston Respublikasi Prezidentining 2026-yil 11-apreldagi PQ-135-son qaroriga 4a-ILOVA

Agrar taʼlim-ishlab chiqarish kooperatsiyasi faoliyatini muvofiqlashtiruvchi kengashning asosiy vazifalari

Quyidagilar Agrar taʼlim-ishlab chiqarish kooperatsiyasi faoliyatini muvofiqlashtiruvchi kengashning asosiy vazifalari hisoblanadi:

(a) Agrar taʼlim kooperatsiyasining ishtirokchilari oʻrtasida oʻzaro aloqalarni taʼminlash;

(b) Agrar taʼlim kooperatsiyasi faoliyati rivojlanishining asosiy yoʻnalishlarini belgilash, uning uzoq va oʻrta muddatli strategik dasturlarini tasdiqlash hamda amalga oshirilishini nazorat qilib borish;

(v) Agrar taʼlim kooperatsiyasi oldiga qoʻyilgan vazifalar ijrosiga erishish holati boʻyicha kooperatsiya ishtirokchilari faoliyatini oʻrganish hamda ularning axborotini eshitish;

(g) Agrar taʼlim kooperatsiyasining moddiy-texnik, oʻquv-uslubiy bazasini mustahkamlash, shu jumladan, uning aʼzolarini zamonaviy axborot-kommunikatsiya vositalari va jihozlari, oʻquv-laboratoriya uskunalari hamda oʻquv-uslubiy adabiyotlar bilan taʼminlashga koʻmaklashish;

(d) Agrar taʼlim kooperatsiyasi faoliyatining jadal rivojlanishini taʼminlash uchun jismoniy va yuridik shaxslarning homiylik xayriyalari, xalqaro tashkilotlarning texnik koʻmak mablagʻlari va grantlari hamda qonunchilik bilan taqiqlanmagan boshqa mablagʻlarni jalb etish.

Oʻzbekiston Respublikasi Prezidentining 2026-yil 11-apreldagi PQ-135-son qaroriga 5-ILOVA

Qoraqalpogʻiston Respublikasi va viloyatlardagi Toshkent davlat agrar universiteti loyiha ofislarining joylashish manzillari

ROʻYXATI

Oʻzbekiston Respublikasi Prezidentining 2026-yil 11-apreldagi PQ-135-son qaroriga 5a-ILOVA

Toshkent davlat agrar universiteti loyiha ofislarining

ASOSIY VAZIFALARI

Quyidagilar Toshkent davlat agrar universiteti loyiha ofislari faoliyatining asosiy vazifalari hisoblanadi:

(a) qishloq xoʻjaligini rivojlantirishda hududlarning mavjud muammolari hamda oʻsish nuqtalarini aniqlash;

(b) mavjud muammolar yechimiga qaratilgan ilmiy, innovatsion va investitsion loyihalarni tegishli ilmiy-tadqiqot va ishlab chiqarish korxonalari bilan hamkorlikda ishlab chiqish;

(v) shakllantirilgan loyihalarni mahalliy davlat hokimiyati organlari bilan moliyalashtirish manbalarini belgilash;

(g) hududlarning tuproq-iqlim sharoitlari va ixtisoslashuviga mos keladigan, Universitet olimlari tomonidan yaratilgan ilmiy va innovatsion ishlanmalar natijalarini ishlab chiqarishga joriy etish;

(d) hududlarda koʻrgazmali dala seminarlarini tashkil etish, qishloq xoʻjaligi mahsulotlarini yetishtirish, qayta ishlash va qadoqlash bilan shugʻullanuvchi tadbirkorlik subyektlari rahbar va xodimlarini qayta tayyorlash, malakasini oshirishni nazarda tutuvchi oʻquv kurslarini tashkil etish, shu jumladan, qishloq xoʻjaligi rivojlangan xorijiy mamlakatlarga stajirovkalarga yuborish;

(j) hududlarda “yangi agronom” taʼlim tizimini joriy etish, ilgʻor xoʻjaliklar va ishlab chiqarish korxonalari bilan birgalikda dual taʼlimni rivojlantirish, talabalarning amaliyotlarini tashkil etishga koʻmaklashish;

(z) resurs tejamkor texnologiyalarni joriy qilish va intensiv usulda mahsulot yetishtirish, qishloq xoʻjaligi mahsulotlarini saqlash, qayta ishlash va qadoqlash bilan bogʻliq istiqbolli loyihalar va takliflarni ishlab chiqish;

(i) qishloq xoʻjaligi va oziq-ovqat sohasiga raqamli texnologiyalar va sunʼiy intellekt yechimlarini joriy etishga qaratilgan takliflarni ishlab chiqish;

(k) jalb etilgan xorijiy ekspertlar va konsultantlar faoliyatini muvofiqlashtirish.

Oʻzbekiston Respublikasi Prezidentining 2026-yil 11-apreldagi PQ-135-son qaroriga 5b-ILOVA

Toshkent davlat agrar universiteti loyiha ofislari tomonidan amalga oshiriladigan loyihalarning

USTUVOR YOʻNALISHLARI

Izoh: qishloq xoʻjaligi vaziriga, zarur hollarda, loyihalarning ustuvor yoʻnalishlariga qoʻshimcha va oʻzgartirishlar kiritish huquqi beriladi.

Oʻzbekiston Respublikasi Prezidentining 2026-yil 11-apreldagi PQ-135-son qaroriga 6-ILOVA

2026/2027 oʻquv yilidan boshlab agrar oliy taʼlim muassasalarida kadrlar tayyorlash tizimi uch yillik taʼlim dasturlari asosida yoʻlga qoʻyiladigan taʼlim yoʻnalishlari

ROʻYXATI

Oʻzbekiston Respublikasi Prezidentining 2026-yil 11-apreldagi PQ-135-son qaroriga 7-ILOVA

Agroxizmatlar departamenti tomonidan koʻrsatiladigan

XIZMATLAR TURLARI

Agroxizmatlar departamenti tomonidan quyidagi xizmatlar koʻrsatiladi:

(a) qishloq xoʻjaligida ishlab chiqarish samaradorligini oshirish maqsadida resurs tejamkor texnologiyalar, sunʼiy intellekt va raqamli yechimlar asosida ilgʻor agrotexnologiyalarni joriy etish;

(b) “SOIL DOCTOR” — Tuproq diagnostikasi, oʻsimlik va oʻgʻitlar tahlillarini, tuproq unumdorligini oshirish, GIS xizmatini joriy etish hamda oʻsimliklarning hosildorligini oshirishga qaratilgan kompleks xizmatlar;

(v) oʻsimliklar klinikasi xizmatini tashkil etish, bunda oʻsimliklar kasalliklari va zararkunandalarini aniqlash, tashxis qoʻyish hamda uygʻunlashgan himoya tizimini joriy etish;

(g) zamonaviy “aqlli” bogʻlar, tokzorlar, issiqxonalar, tutchilik, koʻchatchilik va gulchilik plantatsiyalarini loyihalashtirish va barpo qilish rejasini tuzish hamda ularni “tayyor holda barpo etish” tamoyili asosida tashabbuskorlarga berish tartibida amalga oshirish;

(d) onlayn agrokonsalting xizmatlarini koʻrsatishni yoʻlga qoʻyish, payvandtag va koʻchatlar yetishtirish, koʻchatlarni ekish va hosildorlikni oshirish boʻyicha “bogʻ taqvimi”ni tuzib berish;

(j) chorva va uy hayvonlarini klinik koʻrikdan oʻtkazish, ularning yuqumli kasalliklari profilaktikasi, kasalliklar tashxisi, mobil va sunʼiy urugʻlantirish va embrion koʻchirish laboratoriyasi, zamonaviy veterinariya diagnostikasi (UTT, rentgen, MRT, KT, MSKT) texnologiyalari asosidagi kompleks xizmatlar;

(z) qishloq xoʻjaligi mahsulotlarini saqlash, quritish, qayta ishlash va qadoqlash, shuningdek, ularning sifati, xavfsizligini taʼminlash kabi boshqa konsalting va zamonaviy xizmatlar.

Oʻzbekiston Respublikasi Prezidentining 2026-yil 11-apreldagi PQ-135-son qaroriga 8-ILOVA

2026-2027-yillarda Toshkent davlat agrar universiteti faoliyatini xalqaro talablar asosida yanada takomillashtirish boʻyicha

“YOʻL XARITASI”

Oʻzbekiston Respublikasi Prezidentining 2026-yil 11-apreldagi PQ-135-son qaroriga 9-ILOVA

Toshkent davlat agrar universiteti Transformatsiya markazining

ASOSIY VAZIFALARI

Transformatsiya markazining asosiy vazifalari quyidagilardan iborat:

(a) Universitetning taʼlim dasturlarini xalqaro taʼlim standartlariga muvofiqlashtirish;

(b) 2030-yilga qadar Universitetni dunyoning eng nufuzli agrar oliy taʼlim tashkilotlari reytingiga kiritish strategiyasini ishlab chiqish va ijrosini tashkil etish;

(v) Universitet taʼlim dasturlarini xalqaro akkreditatsiyadan oʻtkazish;

(g) oʻquv jarayoniga zamonaviy taʼlim va innovatsion texnologiyalarni joriy etish;

(d) Universitet professor-oʻqituvchilarini xorijiy stajirovkalarga yuborishni tashkil etish hamda xorijiy oliy taʼlim va ilmiy-tadqiqot tashkilotlaridan malakali mutaxassislarni taʼlim jarayoniga jalb etish;

(j) Universitetning taʼlim, ilmiy-tadqiqot va axborot-kutubxona faoliyatini hamda boshqaruv jarayonlarini toʻliq raqamlashtirish;

(z) Universitetning tashkiliy-boshqaruv tuzilmasini xalqaro talablar asosida takomillashtirish yuzasidan takliflar ishlab chiqish;

(i) Universitetni rivojlantirishga oid dasturlarni amalga oshirish, monitoring qilish va natijalarini tahlil qilib borish.

Oʻzbekiston Respublikasi Prezidentining 2026-yil 11-apreldagi PQ-135-son qaroriga 10-ILOVA

Toshkent davlat agrar universitetining taʼlim va boshqaruv jarayonlarini raqamlashtirish hamda sunʼiy intellekt texnologiyalarini joriy etish boʻyicha

CHORA-TADBIRLAR REJASI

Oʻzbekiston Respublikasi Prezidentining 2026-yil 11-apreldagi PQ-135-son qaroriga 11-ILOVA

Oʻzbekiston Respublikasi Prezidentining ayrim qarorlariga kiritilayotgan oʻzgartirishlar

1. Oʻzbekiston Respublikasi Prezidentining 2017-yil 11-maydagi “Oʻzbekiston Respublikasi Oʻrmon xoʻjaligi davlat qoʻmitasi faoliyatini tashkil etish toʻgʻrisida”gi PQ-2966-son qarorining 16-bandi quyidagi tahrirda bayon etilsin:

“16. Oʻrmon va yashil hududlarni koʻpaytirish, choʻllanishga qarshi kurashish agentligi Toshkent shahri Mirzo Ulugʻbek tumani Olimlar koʻchasi 62-uy manziliga joylashtirilsin”.

2. Oʻzbekiston Respublikasi Prezidentining 2024-yil 30-dekabrdagi “Qishloq xoʻjaligi maydonlaridagi qoʻshimcha imkoniyatlardan foydalangan holda mahsulot yetishtirishni koʻpaytirishga doir chora-tadbirlar toʻgʻrisida”gi PQ-465-son qarorida:

(a) 6-bandda:

birinchi xatboshidagi “aprelga” soʻzi “mayga” soʻzi bilan almashtirilsin;

ikkinchi xatboshidagi “barcha qishloq xoʻjaligiga moʻljallangan yerlari” soʻzlari “dala chetlari” soʻzlari bilan almashtirilsin;

toʻrtinchi xatboshidagi “oʻn” soʻzi “uch” soʻzi bilan almashtirilsin;

(b) 7-bandning uchinchi va beshinchi xatboshilaridagi “aprelga” soʻzlari “mayga” soʻzlari bilan almashtirilsin;

(v) 8-ilovaning 1 va 2-pozitsiyalari “Chora-tadbirlar” ustunidagi “aprelgacha” soʻzlari “maygacha” soʻzlari bilan almashtirilsin.