Oʻzbekiston Respublikasi Davlat soliq qoʻmitasining Soliq kollejini tashkil etish toʻgʻrisida (298-son)

14.07.1998

Oʻzbekiston Respublikasi Vazirlar Mahkamasining

qarori

Soliq ishi mutaxassislarini ixtisosli tayyorlash tizimini takomillashtirish hamda Oʻzbekiston Respublikasi davlat soliq xizmatini malakali kadrlar bilan taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Davlat soliq qoʻmitasining Soliq kolledji tashkil etilsin.

Belgilansinki:

kollej oʻrta maxsus, kasb-hunar taʼlimi taʼlim muassasasi hisoblanadi;

kollejda oʻqish davlat grantlari asosida kunduzgi shaklda amalga oshiriladi;

kollejda oʻqish muddati 3 yil va 1 yil soliq xizmati organlarida amaliy ishda sinov. 11 yillik umumiy oʻrta taʼlimga ega boʻlgan abituriyentlar uchun (toʻqqiz yillik umumiy oʻrta taʼlim davlat taʼlim standartlari joriy etilguncha) oʻqish muddati tegishlicha — 2 va 1 yil;

Soliq kollejining maʼmuriy va oʻqituvchilar tarkibiga Davlat soliq qoʻmitasi xodimlari tegishli toifalari uchun xizmatni oʻtash shartlari tatbiq etiladi.

2. Quyidagilar Soliq kollejining asosiy vazifalari etib belgilansin:

Oʻzbekiston Respublikasi davlat soliq xizmatining malakali oʻrta boʻgʻin kadrlariga boʻlgan ehtiyojini qondirish;

taʼlim oluvchilarning kasb-hunar malaka va koʻnikmalarini chuqur rivojlantirish, ular tomonidan iqtisodiy va huquqiy bilimlar, soliq haqidagi qonunlar, soliq xizmati organlarining nazorat funksiyalarini amalga oshirish uslubiyati chuqur oʻzlashtirilishini taʼminlash;

davlat taʼlim standartlari doirasida taʼlim oluvchilarning intellektual rivojlanishini, amaliy faoliyat koʻnikmalari va ijodiy qobiliyatlari shakllanishini taʼminlovchi umumtaʼlim va kasb-hunar dasturlarini amalga oshirish;

Oʻzbekiston soliq xizmatining anʼanalarini mustahkamlash va rivojlantirish, kadrlar tayyorlash va tarbiyalashda xorijiy ijobiy tajribani oʻrganish va oʻzlashtirish;

abituriyentlarning sifatli kontingentini shakllantirish maqsadida umumiy oʻrta taʼlim muassasalari bilan doimiy aloqani taʼminlash;

respublika soliq xizmati xodimlarini oʻqitish va malakasini oshirish tizimini rivojlantirish, davlat soliq xizmati organlari uchun kadrlar tayyorlash sohasida xalqaro hamkorlikni amalga oshirish.

3. Soliq kolleji maʼmuriy va oʻqituvchilar tarkibining shtatlar soni qonun hujjatlariga muvofiq belgilanadi.

4. Oʻzbekiston Respublikasi Davlat soliq qoʻmitasi, Oliy va oʻrta maxsus taʼlim vazirligi, Mudofaa vazirligi, Adliya vazirligi va Moliya vazirligi bilan birgalikda oʻn kun muddatda kollej toʻgʻrisidagi nizomni ishlab chiqsinlar va belgilangan tartibda tasdiqlasinlar.

5. Oʻzbekiston Respublikasi Davlat soliq qoʻmitasi:

1998-yil 1-sentabrdan boshlab kollejda mashgʻulotlar boshlanishini taʼminlasin;

Oʻzbekiston Respublikasi Oliy va oʻrta maxsus taʼlim vazirligi bilan birgalikda 1998-yil 1-sentabrgacha kollejga professor-oʻqituvchilar tarkibini tanlab olish va ularni tayyorlash tizimini ishlab chiqsin;

Davlat test markazi bilan birgalikda test sinovlari natijalari boʻyicha abituriyentlarni belgilangan tartibda 1998/99 oʻquv yilida Oʻzbekiston Respublikasi oʻrta maxsus, kasb-hunar taʼlimi muassasalarida oʻqitish uchun belgilangan davlat grantlari doirasida xolisona, sifatli tanlab olsin;

Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligi bilan birgalikda 1998-yil 1-sentabrgacha Soliq kolleji oʻquv rejalari va dasturlari ishlab chiqilishi va joriy etilishini taʼminlasin, ularni 1998/99 oʻquv yilida tajriba tariqasida sinovdan oʻtkazsin;

darsliklar, oʻquv qoʻllanmalari, didaktik materiallar ishlab chiqish boʻyicha tanlov asosida mualliflar jamoalarini tashkil etsin.

6. Davlat soliq qoʻmitasi Oliy va oʻrta maxsus taʼlim vazirligi bilan birgalikda tajriba sinovi natijalari boʻyicha 1999-yil 1-avgustgacha:

soliq ishi sohasida oʻrta maxsus, kasb-hunar taʼlimi davlat taʼlim standartini ishlab chiqsin va Oʻzbekiston Respublikasi Vazirlar Mahkamasiga tasdiqlash uchun taqdim etsin, bunda:

bitiruvchilarga malaka talablarini belgilashni;

tayyorlash sifatiga hamda taʼlim va kasb-hunar dasturlarni mazmuniga talablarni belgilashni;

oʻquv fanlarini, taʼlim dasturlarini va maxsus dasturlarni shakllantirishni;

kadrlarni sifatli tayyorlash uchun zarur boʻlgan oʻquv soatlari hajmlarini belgilashni nazarda tutsin;

oʻquv rejalari va dasturlariga zarur tuzatishlar kiritsin.

7. Oʻzbekiston Respublikasi Moliya vazirligi 1999-yildan boshlab Soliq kolleji xarajatlariga belgilangan tartibda zarur budjetdan ajratiladigan mablagʻlar ajratishni nazarda tutsin.

1998-yilda kollejning joriy xarajatlari Oʻzbekiston Respublikasi Davlat soliq qoʻmitasining ijtimoiy rivojlantirish va moddiy-texnika taʼminoti jamgʻarmasi mablagʻlari hisobiga amalga oshirilsin.

Belgilansinki, kollej binolari va inshootlari qurilishi, ularni rekonstruksiya qilish va tuzatish koʻrsatib oʻtilgan jamgʻarma mablagʻlari hisobiga amalga oshiriladi.

8. Oʻzbekiston Respublikasi Davlat soliq qoʻmitasi 1998/99 oʻquv yili boshlanishiga qadar kollej binolari va inshootlari tuzatilishini, professor-oʻqituvchilar tarkibi butlanishini, kollej xodimlari va kursantlari uchun zarur moddiy va sanitariya-maishiy shart-sharoitlar yaratilishini taʼminlasin.

9. Soliq kollejini joylashtirish uchun “Oʻzbeksavdo” kompaniyasi “Oʻzbilimsavdo” masʼuliyati cheklangan jamiyatning Toshkent shahar, Akmal Ikromov tumani, Sobir Yusupov koʻchasi, 3-uydagi binosi belgilangan tartibda Oʻzbekiston Respublikasi Davlat soliq qoʻmitasi balansiga berilsin.

Oʻzbekiston Respublikasi Davlat soliq qoʻmitasi, binoni mukammal tuzatish boʻyicha bajarilgan ishlar yuzasidan qarzdorlikni hisobga olgan holda, berilayotgan mol-mulk qiymatini “Oʻzbilimsavdo” jamiyatiga belgilangan tartibda toʻlasin.

10. Oʻzbekiston Respublikasi Adliya vazirligi, Davlat soliq qoʻmitasi, Mudofaa vazirligi bilan birgalikda bir oy muddatda Oʻzbekiston Respublikasining amaldagi qonun hujjatlariga mazkur qarordan kelib chiqib kiritiladigan oʻzgartirishlar toʻgʻrisida takliflar tayyorlasinlar.

11. Mazkur qarorning bajarilishini nazorat qilish oʻzbekiston Respublikasi Bosh vazirining birinchi oʻrinbosari I. Joʻrabekov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 14-iyul,

298-son