Oziq-ovqat xavfsizligini taʼminlash boʻyicha respublika komissiyasi toʻgʻrisidagi nizomni tasdiqlash haqida (123-son)

30.03.2026

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Qishloq xoʻjaligi sohasiga zamonaviy texnologiyalarni joriy etishni yanada jadallashtirish orqali samaradorlikni oshirish chora-tadbirlari toʻgʻrisida” 2025-yil 12-avgustdagi PF-130-son Farmoni ijrosini taʼminlash, shuningdek, qishloq xoʻjaligi va oziq-ovqat sohasida olib borilayotgan islohotlarni samarali tashkil etish, aholini oziq-ovqat mahsulotlari bilan kafolatli taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Qishloq xoʻjaligi sohasiga zamonaviy texnologiyalarni joriy etishni yanada jadallashtirish orqali samaradorlikni oshirish chora-tadbirlari toʻgʻrisida” 2025-yil 12-avgustdagi PF-130-son Farmoniga muvofiq Oziq-ovqat xavfsizligini taʼminlash boʻyicha respublika komissiyasi (keyingi oʻrinlarda — Respublika komissiyasi) tashkil etilgani va uning tarkibi tasdiqlangani maʼlumot uchun qabul qilinsin.

2. Quyidagilarni nazarda tutuvchi Oziq-ovqat xavfsizligini taʼminlash boʻyicha respublika komissiyasi faoliyatini tashkil etish toʻgʻrisidagi nizom ilovaga muvofiq tasdiqlansin:

Respublika komissiyasining asosiy vazifalari va funksiyalari hamda huquqlari va majburiyatlari;

Respublika komissiyasi faoliyatini tashkil etish, qarorlar qabul qilish va ularning bajarilishini taʼminlash tartibi.

3. Respublika komissiyasining ishchi organi etib Oʻzbekiston Respublikasi Qishloq xoʻjaligi vazirligi belgilansin.

Respublika komissiyasi ishchi organi quyidagi takliflarni Respublika komissiyasiga kiritib borsin:

ichki va tashqi bozor konyunkturasini chuqur oʻrganish va tahlil qilish asosida mamlakatimizda oziq-ovqat mahsulotlarini ishlab chiqarish hajmlari, jumladan, import oʻrnini bosuvchi mahalliy mahsulot turlarini koʻpaytirish;

respublika aholisini ijtimoiy ahamiyatga ega boʻlgan asosiy turdagi oziq-ovqat mahsulotlari bilan uzluksiz taʼminlashning istiqbollarini belgilash;

oziq-ovqat xavfsizligini taʼminlashning samarali mexanizmlarini joriy qilish.

4. Respublika komissiyasi ijtimoiy ahamiyatga ega boʻlgan oziq-ovqat mahsulotlari narxlarining barqarorligini taʼminlash, oziq-ovqat balansidagi importga bogʻlangan yoki yetishmovchilik xavfi mavjud boʻlgan mahsulotlarni yetishtirishni koʻpaytirish boʻyicha takliflarni har chorakda Oʻzbekiston Respublikasi Prezidenti Administratsiyasiga kiritib borsin.

5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 30-mart,

123-son

Vazirlar Mahkamasining 2026-yil 30-martdagi 123-son qaroriga ILOVA

Oziq-ovqat xavfsizligini taʼminlash boʻyicha respublika komissiyasi faoliyatini tashkil etish toʻgʻrisida

NIZOM

1-bob. Umumiy qoidalar

1. Ushbu Nizom Oziq-ovqat xavfsizligini taʼminlash boʻyicha respublika komissiyasining (keyingi oʻrinlarda — Respublika komissiyasi) maqomi, asosiy vazifalari va funksiyalari, huquq va majburiyatlarini hamda faoliyatini tashkil etish tartibini belgilaydi.

2. Respublika komissiyasi ijtimoiy ahamiyatga ega boʻlgan oziq-ovqat mahsulotlari narxlarining barqarorligini taʼminlash, oziq-ovqat balansidagi importga bogʻlangan yoki yetishmovchilik xavfi mavjud boʻlgan mahsulotlarni yetishtirishni koʻpaytirish, ruxsat etilgan foydalanish turlariga asosan yer uchastkalarida ekin joylashtirish ulushlariga (foizlar) hududlar ixtisosligidan kelib chiqib oʻzgartirish boʻyicha takliflarni ishlab chiquvchi hamda aholini oziq-ovqat mahsulotlari bilan uzluksiz taʼminlashning istiqbollarini belgilovchi idoralararo kollegial organ hisoblanadi.

3. Respublika komissiyasining tarkibi Oʻzbekiston Respublikasi Prezidenti tomonidan tasdiqlanadi.

4. Respublika komissiyasi oʻz faoliyati davomida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, boshqa qonunchilik hujjatlariga, shuningdek, ushbu Nizomga amal qiladi.

5. Respublika komissiyasining qarorlari uning majlisi bayonnomasi bilan rasmiylashtiriladi.

Respublika komissiyasi majlisi bayonnomasiga uning aʼzolari tomonidan viza qoʻyiladi hamda majlis bayonnomasi kotib tomonidan imzolanadi va komissiya raisi tomonidan tasdiqlanadi.

2-bob. Respublika komissiyasining asosiy vazifalari va funksiyalari

6. Quyidagilar Respublika komissiyasining asosiy vazifalari hisoblanadi:

ijtimoiy ahamiyatga ega boʻlgan oziq-ovqat mahsulotlari narxlarining barqarorligini taʼminlash, oziq-ovqat balansidagi importga bogʻlangan yoki yetishmovchilik xavfi mavjud boʻlgan mahsulotlarni yetishtirishni koʻpaytirish choralarini koʻrish;

ruxsat etilgan foydalanish turlariga asosan yer uchastkalarida ekin joylashtirish ulushlariga (foizlar) hududlar ixtisosligidan kelib chiqib oʻzgartirish kiritish;

oziq-ovqat xavfsizligini taʼminlashga qaratilgan strategiyalarni ishlab chiqish va uning samarali amalga oshirilishini taʼminlash;

kelgusi yil uchun shakllantirilgan oziq-ovqat mahsulotlari balansining prognozlari va Qishloq xoʻjaligi vazirligi huzuridagi “Raqamli qishloq xoʻjaligi” yagona integratsiyalashuv platformasida (keyingi oʻrinlarda — Agroportal) ekinlarni turlari boʻyicha joylashtirish yuzasidan maʼlumotlar tahlili natijalarini koʻrib borish;

oziq-ovqat mahsulotlari turlariga boʻlgan talabdan va narxlar konyunkturasidan kelib chiqqan holda mahsulotlarning doimiy intervensiyasini yoʻlga qoʻyish va mavsumiy zaxira qilishda bozor tamoyiliga asoslangan narxlarni barqarorlashtirish mexanizmlarini takomillashtirish boʻyicha tavsiyalar ishlab chiqish.

Respublika komissiyasiga qonunchilik hujjatlariga muvofiq boshqa vazifalar ham yuklanishi mumkin.

7. Respublika komissiyasi oʻziga yuklangan asosiy vazifalarni bajarish uchun quyidagi funksiyalarni amalga oshiradi:

yer uchastkasidan ruxsat etilgan foydalanish turlariga muvofiq yer maydonlarida ekinlarning joylashtirish ulushlariga hududlar ixtisosligidan kelib chiqqan holda, muayyan tuman boʻyicha oʻzgartirishlar kiritish haqida qaror qabul qiladi;

har yili 1-oktabrga qadar kelgusi yil uchun shakllantirilgan oziq-ovqat mahsulotlari balansining prognozlari va Agroportalda ekinlarni turlari boʻyicha joylashtirish yuzasidan maʼlumotlar shakllantirilishini tashkil etadi;

ekinlarni turlari boʻyicha joylashtirish yuzasidan maʼlumotlarni tahlil qilish orqali ekinlar turlarining oziq-ovqat xavfsizligini taʼminlashdagi ulushini baholaydi;

ekinlarni turlari boʻyicha joylashtirish rejasi bilan oziq-ovqat mahsulotlari balansidagi ehtiyoj oʻrtasidagi muvofiqlikni aniqlaydi, agar nomuvofiqliklar aniqlansa, tezkor choralar koʻrish yuzasidan takliflar ishlab chiqadi;

oziq-ovqat xavfsizligini taʼminlash boʻyicha tegishli choralar koʻrish yuzasidan Oʻzbekiston Respublikasi Prezidenti Administratsiyasiga va Vazirlar Mahkamasiga takliflar kiritadi;

oziq-ovqat xavfsizligini taʼminlashda aniqlangan kamchiliklarni bartaraf qilish boʻyicha mutasaddi respublika va mahalliy ijro etuvchi hokimiyat organlariga koʻmaklashadi;

respublikada oziq-ovqat xavfsizligini taʼminlashga qaratilgan normativ-huquqiy hujjatlarni takomillashtirish boʻyicha takliflar ishlab chiqadi.

Respublika komissiyasi oʻziga yuklangan vazifalarga va qonunchilik hujjatlariga muvofiq boshqa funksiyalarni ham bajarishi mumkin.

8. Respublika komissiyasi oʻziga yuklangan vazifalarni bajarishda respublika va mahalliy ijro etuvchi hokimiyat organlari hamda boshqa tashkilotlar bilan oʻzaro hamkorlik qiladi.

3-bob. Respublika komissiyasining huquqlari va majburiyatlari

9. Respublika komissiyasi oʻziga yuklangan vazifa va funksiyalarni amalga oshirishda quyidagi huquqlarga ega:

oziq-ovqat xavfsizligi boʻyicha mutasaddi davlat organlari va tashkilotlari faoliyatini muvofiqlashtirish;

oziq-ovqat xavfsizligi toʻgʻrisidagi takliflarni puxta ishlab chiqish uchun respublika va mahalliy ijro etuvchi hokimiyat organlari hamda boshqa tashkilotlar mutaxassislarini, shuningdek, tegishli faoliyat sohalarida maxsus bilimlarga ega boʻlgan boshqa shaxslarni jalb etish;

respublika va mahalliy ijro etuvchi hokimiyat organlari hamda boshqa tashkilotlardan oziq-ovqat xavfsizligi boʻyicha maʼlumotlarni belgilangan tartibda soʻrash va olish;

yer uchastkasidan ruxsat etilgan foydalanish turiga muvofiq yer maydonlarida ekinlarning joylashtirish ulushlariga hududlar ixtisosligidan kelib chiqqan holda oʻzgartirishlar kiritish;

oʻz vakolatiga kiruvchi masalalar boʻyicha respublika va mahalliy ijro etuvchi hokimiyat organlari rahbarlarining hisobotlarini eshitish;

oziq-ovqat xavfsizligini taʼminlash borasidagi vazifa va topshiriqlar ijrosini taʼminlashda sustkashlikka va masʼuliyatsizlikka yoʻl qoʻygan davlat organlari va tashkilotlari rahbarlariga nisbatan tegishli choralar koʻrish boʻyicha takliflar kiritish.

Respublika komissiyasi qonunchilik hujjatlariga muvofiq boshqa huquqlarga ham ega boʻlishi mumkin.

10. Respublika komissiyasi:

oziq-ovqat mahsulotlari tanqisligi yuzaga kelganda oziq-ovqat xavfsizligini taʼminlash boʻyicha tezkor chora-tadbirlarni koʻrishi;

oziq-ovqat xavfsizligi boʻyicha dasturlar amalga oshirilishini tashkil etishi va nazorat qilishi;

oʻziga yuklangan boshqa vazifalar va funksiyalarning samarali bajarilishini taʼminlashi shart.

Respublika komissiyasi qonunchilik hujjatlariga muvofiq boshqa majburiyatlarga ham ega boʻlishi mumkin.

4-bob. Respublika komissiyasi faoliyatini tashkil etish va qarorlarni qabul qilish tartibi

11. Oʻzbekiston Respublikasi Qishloq xoʻjaligi vazirligi Respublika komissiyasining ishchi organi (keyingi oʻrinlarda — ishchi organi) hisoblanadi.

12. Respublika komissiyasi raisi:

Respublika komissiyasi faoliyatiga umumiy rahbarlik qiladi hamda majlislarida raislik qiladi;

Respublika komissiyasi aʼzolarining vazifalarini belgilaydi va ularga yuklangan vazifalarning bajarilishini muvofiqlashtiradi;

Respublika komissiyasi majlislari kun tartibini va chaqirilishini belgilash boʻyicha qaror qabul qiladi;

Respublika komissiyasi tomonidan qabul qilingan qarorlarning bajarilishi yuzasidan doimiy nazoratni tashkil etadi, har chorakda muhokamasini oʻtkazib boradi;

zarurat koʻra Respublika komissiyasi ishida ishtirok etish uchun uning tarkibiga kirmaydigan mansabdor shaxslar va boshqa shaxslarni taklif qiladi.

Respublika komissiyasi raisi oʻz vakolatlari doirasida boshqa vazifalarni ham bajarishi mumkin.

13. Respublika komissiyasi aʼzolari:

Respublika komissiyasi majlislarida koʻrib chiqiladigan masalalarni muhokama qilishda va hal etishda ishtirok etadi;

Respublika komissiyasiga ijtimoiy ahamiyatga ega boʻlgan oziq-ovqat mahsulotlari narxlarining barqarorligini taʼminlash, oziq-ovqat balansidagi importga bogʻlangan yoki yetishmovchilik xavfi mavjud boʻlgan mahsulotlarni ishlab chiqarishni koʻpaytirish toʻgʻrisida takliflar kiritadi;

Respublika komissiyasi muhokama qiladigan masalalar boʻyicha xulosalarni Respublika komissiyasi raisiga taqdim etadi;

Respublika komissiyasi aʼzolari oʻz faoliyatini jamoatchilik asosida amalga oshiradi va tegishli davr mobaynida asosiy ish joyidagi ular uchun qonunchilik hujjatlarida belgilangan barcha shart-sharoitlar saqlab qolinadi.

14. Ishchi organ:

a) Respublika komissiyasi faoliyatini tashkil etishda quyidagilarni amalga oshiradi:

Respublika komissiyasi ish rejasi loyihasini tayyorlaydi va navbatdagi majlisga barcha zarur hujjatlarning oʻz vaqtida tayyorlanishini taʼminlaydi, bunda respublika va mahalliy ijro etuvchi hokimiyat organlari, tijorat banklari, boshqa tashkilotlar va Respublika komissiyasi aʼzolaridan zarur maʼlumot va xulosalarni olish huquqiga ega;

Respublika komissiyasi faoliyatini samarali yoʻlga qoʻyishda mutasaddi vazirlik va idoralarning malakali mutaxassislaridan iborat tarkibda ishchi guruh tashkil etadi va uning faoliyatini muvofiqlashtiradi;

Respublika komissiyasi majlisi oʻtkazilishini, jumladan, majlisning kun tartibini, oʻtkaziladigan vaqti va joyini, shuningdek, taklif etiladiganlarning soni va tarkibini Respublika komissiyasi raisi bilan kelishadi;

Respublika komissiyasi aʼzolarini va taklif etilganlarni majlis oʻtkaziladigan sana, vaqti va joyi toʻgʻrisida xabardor qiladi;

Respublika komissiyasi qarorlarining bajarilishi boʻyicha monitoring yuritadi va uning natijalarini Respublika komissiyasi raisiga koʻrib chiqish uchun taqdim etadi;

Respublika komissiyasi majlisi qarorlari bayonnomasini rasmiylashtiradi va tasdiqlangan majlis bayonnomasini Respublika komissiyasi aʼzolariga hamda zaruratga koʻra, boshqa mutasaddi tashkilotlarga yetkazadi;

b) mutasaddi respublika va mahalliy ijro etuvchi hokimiyat organlari hamda boshqa tashkilotlar bilan birgalikda:

ichki va tashqi bozor konyunkturasini chuqur oʻrganish va tahlil qilish asosida mamlakatimizda oziq-ovqat mahsulotlarining ishlab chiqarish hajmlari, jumladan, import oʻrnini bosuvchi mahalliy mahsulot turlarini koʻpaytirish;

respublika aholisini ijtimoiy ahamiyatga ega boʻlgan asosiy turdagi oziq-ovqat mahsulotlari bilan uzluksiz taʼminlashning istiqbollarini belgilash;

oziq-ovqat mahsulotlarini ishlab chiqarish quvvatlarini koʻpaytirish, mahalliy korxonalarga ilgʻor xorijiy amaliyot va standartlarni tatbiq etish hamda ularning faoliyatini qoʻllab-quvvatlashning samarali mexanizmlarini joriy qilish boʻyicha takliflarni tayyorlaydi hamda Respublika komissiyasiga kiritib boradi.

15. Respublika komissiyasi har chorakda amalga oshirilgan ishlar toʻgʻrisida Oʻzbekiston Respublikasi Prezidenti Administratsiyasi va Vazirlar Mahkamasiga axborot taqdim etadi.

16. Respublika komissiyasi oʻz ishini tasdiqlagan rejalar asosida tashkil qiladi va majlislarni, zaruratga koʻra, har ikki oyda kamida bir marotaba oʻtkazadi.

Respublika komissiyasi raisi navbatdan tashqari majlislar chaqirishi mumkin.

17. Respublika komissiyasi majlisi uning raisi, rais boʻlmagan taqdirda, uning oʻrinbosarlari tomonidan olib boriladi.

Respublika komissiyasi majlisi oʻz aʼzolarining kamida uchdan ikki qismi qatnashganda vakolatli hisoblanadi.

18. Respublika komissiyasi majlisida koʻrib chiqiladigan masalalarning mohiyatiga qarab, majlisga respublika va mahalliy ijro etuvchi hokimiyat organlari, xoʻjalik birlashmalari va boshqa tashkilotlarning rahbarlari hamda mutaxassislari taklif etilishi mumkin.

5-bob. Yakunlovchi qoidalar

19. Respublika komissiyasi tomonidan qabul qilingan qarorlar ijrosini taʼminlash respublika va mahalliy ijro etuvchi hokimiyat organlari uchun majburiy hisoblanadi.

20. Respublika komissiyasi qonunchilik hujjatlarida belgilangan tartibda Oʻzbekiston Respublikasi Prezidenti tomonidan tugatiladi yoki qayta tuziladi.