Loyihaoldi va xarid hujjatlarini kompleks ekspertiza qilish tizimining samaradorligini oshirish chora-tadbirlari toʻgʻrisida (PQ-104-son)

13.03.2026

OʻZBEKISTON RESPUBLIKASI PREZIDENTINING

QARORI

[Koʻchirma]

Yirik ishlab chiqarish va ijtimoiy soha obyektlarini ishga tushirishni jadallashtirish, investitsiyaviy va infratuzilmaviy loyihalarni amalga oshirish jarayonida korrupsiyaga qarshi kurashish tizimini yanada takomillashtirish hamda loyihaoldi va xarid hujjatlarini sifatli tayyorlash va ularni kompleks ekspertizadan oʻtkazish jarayonida zamonaviy talab va mexanizmlarni joriy qilish maqsadida qaror qilaman:

I. Maqsadlar

1. Quyidagilar ushbu qarorning asosiy maqsadlari etib belgilansin:

(a) loyihaoldi va xarid hujjatlarini kompleks ekspertiza qilish faoliyatini transformatsiya qilish hamda raqamlashtirish orqali inson omili, manfaatlar toʻqnashuvi va qogʻozbozlikni kamaytirish;

(b) loyihaoldi hujjatlarni ishlab chiqish sifatini oshirish, professional loyiha tashkilotlari sonini koʻpaytirish;

(v) loyihaoldi va xarid hujjatlarining qiymatini bozor konyunkturasi asosida maqbullashtirish hisobiga budjet mablagʻlarini oʻrtacha 15 — 20 foizga tejash;

(g) loyihaoldi va xarid hujjatlarini kompleks ekspertizadan oʻtkazish muddatlarini maqbullashtirish hamda koʻrib chiqishning umumiy davomiyligini 25 — 30 foizga qisqartirish.

II. Loyihaoldi va xarid hujjatlarini kompleks ekspertiza qilish sohasidagi vakolatli organ faoliyatini transformatsiya qilish

2. Iqtisodiyot va moliya vazirligi hamda Sanoat kooperatsiyasi va davlat xaridlari agentligining:

(a) “Loyihalar va import kontraktlarini kompleks ekspertiza qilish markazi” DMni “Loyihalar va xaridlar samaradorligini oshirish markazi” DM (keyingi oʻrinlarda — Markaz) etib qayta tashkil etish;

(b) Markaz faoliyatini loyihaoldi va xarid hujjatlarini ishlab chiqish bosqichidayoq sifatli tayyorlashda, investitsiyaviy va infratuzilmaviy loyihalarni amalga oshirishda “yordamchi-maslahatchi” tamoyili asosida ishlash tizimiga oʻtkazish toʻgʻrisidagi takliflariga rozilik berilsin.

3. Vazirlar Mahkamasining Loyihaoldi va xarid hujjatlariga doir muammoli masalalarni hal etish boʻyicha respublika komissiyasi (keyingi oʻrinlarda — Komissiya)ni 1-ilovaga muvofiq tarkibda tashkil etish toʻgʻrisidagi taklifi maʼqullansin.

4. Komissiyaga (A. Aripov) quyidagi vazifalar yuklatilsin:

(a) Markazga 2026-yil 1-martga qadar taqdim etilgan va kompleks ekspertizadan oʻtkazilayotgan loyihaoldi va xarid hujjatlarining koʻrib chiqilishini jadallashtirish choralarini koʻrish;

(b) loyihalardagi munozarali holatlar boʻyicha Markaz va buyurtmachi oʻrtasida maqbul yechimlarni topishga koʻmaklashish;

(v) Markaz faoliyatini tahlil qilib, loyihaoldi va xarid hujjatlarini kompleks ekspertizadan oʻtkazish masalalarida vazirlik, idora va tarmoq rahbarlari faoliyatiga baho berish.

5. Quyidagi hujjatlarni Markazda kompleks ekspertizadan oʻtkazish amaliyoti bekor qilinsin:

(a) 2026-yil 1-apreldan — loyihaoldi hujjatlarni ishlab chiqish uchun texnik topshiriqlar. Bunda ular Markazning elektron axborot platformasi (keyingi oʻrinlarda — Platforma)da joylashtiriladigan namunaviy shakldan foydalangan holda ishlab chiqiladi;

(b) 2026-yil 15-apreldan — qiymati 15 million AQSH dollari ekvivalentidan kam boʻlgan quyidagi loyihalarning loyihaoldi hujjatlari:

(i) budjet tizimi budjetlari, davlat maqsadli jamgʻarmalari, belgilangan tartibda tashkil etilgan boshqa jamgʻarmalar, Tiklanish va taraqqiyot jamgʻarmasi mablagʻlari hisobidan moliyalashtiriladigan;

(ii) korporativ buyurtmachilar tomonidan amalga oshirilayotgan;

(v) xususiy tadbirkorlik subyektlari tomonidan strategik foydali qazilmalarni qazib olish va (yoki) qayta ishlashni koʻzda tutuvchi loyihalarning loyihaoldi hujjatlari (bundan mahsulotni taqsimlash toʻgʻrisidagi bitimlarga muvofiq amalga oshirilayotgan loyihalar mustasno). Bunda ushbu loyihalarning loyihaoldi hujjatlari Togʻ-kon sanoati va geologiya vazirligi huzuridagi Yer qaʼridan foydalanish markazida ekspertizadan oʻtkaziladi;

(g) binolar, inshootlar va muhandislik kommunikatsiyalarini kapital qurish va taʼmirlash boʻyicha qiymati bazaviy hisoblash miqdorining yigirma besh ming baravarigacha boʻlgan tovarlar (ishlar, xizmatlar)ning davlat xaridlariga doir tender hujjatlari va texnik topshiriqlar. Bunda ushbu hujjatlarni ekspertizadan oʻtkazish “Shaharsozlik hujjatlarini ekspertiza qilish respublika markazi” DM yoki uning hududiy boshqarmalari tomonidan amalga oshiriladi;

(d) 2026-yil 1-sentabrdan bojxona toʻlovlari boʻyicha imtiyozlar qoʻllagan holda import qilinadigan tovarlar roʻyxati. Bunda mazkur funksiya “Oʻzbekekspertiza” AJga oʻtkaziladi.

6. Belgilansinki:

(a) ushbu qarorning 5-bandi bilan loyihaoldi va xarid hujjatlari Markazda ekspertizadan oʻtkazish amaliyoti bekor qilinayotgan loyihalarni amalga oshirishning maqsadga muvofiqligi va samaradorligi yuzasidan shaxsiy javobgarlik tegishli vazirlik, idora va tashkilotning birinchi rahbariga yuklatiladi hamda har chorakda kuzatuv kengashlari (mavjud boʻlganda) tomonidan muhokama qilinadi;

(b) tarmoq ilmiy-texnik kengashlarining loyihaoldi va xarid hujjatlari boʻyicha qarorlari (xulosalari) tegishli vazirlik, idora va tashkilotning birinchi rahbari tomonidan tasdiqlanishi shart.

7. Sanoat kooperatsiyasi va davlat xaridlari agentligi Iqtisodiyot va moliya vazirligi bilan birgalikda uch oy muddatda loyihaoldi va xarid hujjatlarini xalqaro akkreditatsiyadan oʻtgan konsalting hamda auditorlik tashkilotlari tomonidan ekspertizadan oʻtkazish hamda ularning xulosalarini tan olish yuzasidan takliflarni Vazirlar Mahkamasiga kiritsin.

III. Kompleks ekspertiza jarayonining samaradorligini oshirish boʻyicha yangi instrumentlar

8. 2026-yil 1-sentabrdan boshlab Markazda loyihaoldi hujjatlarni kompleks ekspertiza qilishning quyidagi yangi tartib-taomillari joriy etilsin:

(a) yirik va mega loyihalarning hamda ekspertizadan ijobiy xulosa olgan loyihalarga oʻxshash loyihalarning loyihaoldi hujjatlarini ishlab chiqish jarayonida ularning tayyor boʻlimlarini parallel ekspertizadan oʻtkazish amaliyoti;

(b) taqdim etilgan loyiha ilgari Markazda ekspertizadan oʻtgan loyiha bilan oʻxshash boʻlsa, Markazning taklifi asosida uning loyihaoldi hujjatini tezlashtirilgan ekspertizadan oʻtkazish tartibi.

9. Shunday tartib oʻrnatilsinki, unga muvofiq:

(a) mavjud obyektlarda jismonan va maʼnan eskirgan mashinalar, uskunalar va texnologik liniyalarni yangilash boʻyicha loyihaoldi hujjatlarning kompleks ekspertizasi soddalashtirilgan tartibda amalga oshiriladi. Bunda faqat texnik-texnologik, arxitektura-qurilish (zarur hollarda) yechimlari va moliyaviy-iqtisodiy koʻrsatkichlar hamda tovar (ish, xizmat)lar narxlari asoslanganligi oʻrganiladi;

(b) yangi quriladigan yirik va mega loyihalar boʻyicha loyihaoldi hujjatlarni kompleks ekspertizadan oʻtkazishda Markaz tomonidan loyihaning xususiyatlarini hisobga olgan holda “benchmarking” usulini qoʻllash amaliyoti kiritiladi;

(v) loyihaoldi va xarid hujjatlarini kompleks ekspertizadan oʻtkazishda nafaqat tovar (ish, xizmat)larning boshlangʻich narxi, balki ularning umumiy egalik qilish qiymati (TCO), shu jumladan, energiya samaradorligi, ekspluatatsiya va utilizatsiya xarajatlari ham inobatga olinadi;

(g) Markaz tomonidan bildirilgan eʼtiroz va kamchiliklarni bartaraf etish asosida qayta ishlangan loyihaoldi hujjatlar uchun takroran toʻlov undirish amaliyoti bekor qilinadi va yangi asoslar boʻyicha eʼtirozlar bildirishga yoʻl qoʻyilmaydi.

IV. Markaz faoliyatini raqamlashtirish

10. Belgilansinki, 2026-yil 1-sentabrdan boshlab:

(a) Platformada:

(i) har bir loyihaoldi va xarid hujjatini ekspertiza qilish jarayonining jamoatchilik uchun ochiq boʻlgan onlayn monitoringi yoʻlga qoʻyiladi (qonunchilik hujjatlarida nazarda tutilgan hollar bundan mustasno);

(ii) kompleks ekspertizaning ijobiy xulosasi olingan loyihalar doirasida xarid jarayonlari tasdiqlangan asosiy texnik-iqtisodiy parametrlarga mosligi yuzasidan monitoring qilinadi va mavjud maʼlumotlarni “Yagona investitsiya platformasi” axborot tizimiga integratsiya qilgan holda avtomatik tarzda uzatish imkoniyati yaratiladi;

(iii) kompleks ekspertiza natijasida ijobiy xulosa berilgan loyihaoldi va xarid hujjatlari hamda Markaz tahlillari asosida tovar (ish, xizmat)larning narxlari, texnik koʻrsatkichlari va boshqa tavsiflarni oʻz ichiga olgan, doimiy ravishda (6 oydan oshmagan muddatda) yangilab boriladigan maʼlumotlar bazasi yuritiladi;

(b) kompleks ekspertiza natijalari boʻyicha berilgan ijobiy xulosalar Gʻaznachilik xizmati qoʻmitasi, Bojxona qoʻmitasi va boshqa davlat organlariga “Elektron hukumat” tizimi idoralararo integratsiyalashuv platformasidan foydalangan holda avtomatik tarzda yuboriladi.

11. 2026-yil 1-sentabrgacha mazkur qarorga 2-ilovada nazarda tutilgan davlat tashkilotlarining axborot tizimlari Platformaga integratsiya qilinsin.

V. Loyihaoldi hujjatlarni ishlab chiqishning samarali tizimini joriy qilish

12. 2026-yil 1-sentabrdan boshlab:

(a) Markaz tomonidan Loyihaoldi hujjatlarni ishlab chiquvchi loyiha institutlari va tashkilotlarining reytingi (keyingi oʻrinlarda — Reyting)ni yuritish amaliyoti yoʻlga qoʻyilsin. Bunda:

(i) faoliyati davomida tarmoqlar kesimida ishlab chiqilgan loyihaoldi hujjatlarning kompleks ekspertizasi natijalaridan kelib chiqib, loyiha institutlari va tashkilotlari “yuqori”, “oʻrta” va “past” ishonchlilik darajalariga ajratiladi;

(ii) Reyting Platformada joylashtirilib, doimiy ravishda yangilab boriladi;

(b) oʻrta, yirik va mega loyihalarning loyihaoldi hujjatlarini ishlab chiqish uchun loyiha institutlari va tashkilotlarini tanlashda faqat “eng arzon narx” mezonidan voz kechib, “sifat, tajriba va narx” mezoni majburiy hisoblanadi;

(v) loyiha tashkilotlari va tashabbuskor (buyurtmachilar)ga nisbatan ragʻbatlantirish choralari joriy etiladi.

VI. Qaror ijrosini tashkil etish, taʼminlash va nazorat

13. Loyihaoldi va xarid hujjatlarini kompleks ekspertiza qilish tizimining samaradorligini oshirish boʻyicha chora-tadbirlar rejasi 3-ilovaga muvofiq tasdiqlansin.

14. Sanoat kooperatsiyasi va davlat xaridlari agentligi Markaz bilan birgalikda:

(a) har bir loyihaoldi va xarid hujjatlari boʻyicha mavjud kamchiliklarni aniqlash va ularni bartaraf etishni doimiy monitoring qilib borsin;

(b) har oyning 5-sanasiga qadar loyihaoldi va xarid hujjatlarining joriy holati, kechikish sabablari va ikki oy ichida qayta kiritilmagan hujjatlar hamda bunga yoʻl qoʻygan tashkilotlar (loyihachi va buyurtmachi) toʻgʻrisidagi axborotni Vazirlar Mahkamasiga kiritib borsin.

15. Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga 4-ilovaga muvofiq oʻzgartirish va qoʻshimchalar kiritilsin.

16. Sanoat kooperatsiyasi va davlat xaridlari agentligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

17. Mazkur qaror ijrosini samarali tashkil etishga masʼul va shaxsiy javobgar etib Sanoat kooperatsiyasi va davlat xaridlari agentligi direktori B.X. Xaydarov belgilansin.

18. Qaror ijrosini nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidenti maslahatchisi O.A. Xakimov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 13-mart,

PQ-104-son

Oʻzbekiston Respublikasi Prezidentining 2026-yil 13-martdagi PQ-104-son qaroriga 1-ILOVA

Loyihaoldi va xarid hujjatlariga doir muammoli masalalarni hal etish boʻyicha respublika komissiyasi

TARKIBI

Izoh: Respublika komissiyasi aʼzolari boshqa ishga oʻtgan taqdirda, uning tarkibiga ushbu lavozimga yangidan tayinlangan yoki zimmasiga tegishli funksiyalarni bajarish yuklangan shaxslar kiritiladi.

Oʻzbekiston Respublikasi Prezidentining 2026-yil 13-martdagi PQ-104-son qaroriga 2-ILOVA

“Loyihalar va xaridlar samaradorligini oshirish markazi” DMning elektron axborot platformasiga integratsiya qilinadigan vazirlik va idoralarning axborot tizimlari

ROʻYXATI

1. Sanoat kooperatsiyasi va davlat xaridlari agentligining yagona elektron platformasi hamda davlat xaridlari maxsus axborot portali

2. Ekologiya va iqlim oʻzgarishi milliy qoʻmitasi maʼlumotlar bazasi

3. Milliy statistika qoʻmitasining sanoat mahsulotlari koʻrsatkichlari boʻyicha maʼlumotlar bazasi

4. Qurilish va uy-joy kommunal xoʻjaligi vazirligining “Qurilish resurslari milliy klassifikatori” elektron platformasi

5. Adliya vazirligining Tadbirkorlik subyektlarini davlat roʻyxatidan oʻtkazish va hisobga qoʻyishning avtomatlashtirilgan tizimi

6. Investitsiyalar, sanoat va savdo vazirligining “Yagona investitsiya platformasi” axborot tizimi

7. Soliq qoʻmitasining maʼlumotlar bazasi

8. Bojxona qoʻmitasining import qilinadigan tovarlar maʼlumotlar bazasi

9. Davlat xaridlari elektron tizimi operatorlari

Izohlar:

1. Vazirliklar, idoralar va boshqa tashkilotlar Platformaga “Elektron hukumat” tizimi idoralararo integratsiyalashuv platformasi orqali belgilangan tartibda ulanadi.

2. Tashkilotlar oʻrtasida oʻzaro maʼlumot almashish xizmatlari bepul amalga oshiriladi.

Oʻzbekiston Respublikasi Prezidentining 2026-yil 13-martdagi PQ-104-son qaroriga 3-ILOVA

Loyihaoldi va xarid hujjatlarini kompleks ekspertiza qilish tizimining samaradorligini oshirish boʻyicha

CHORA-TADBIRLAR REJASI

Oʻzbekiston Respublikasi Prezidentining 2026-yil 13-martdagi PQ-104-son qaroriga 4-ILOVA

Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2018-yil 31-maydagi “Imtiyozlar va preferensiyalar berish tartibini tubdan takomillashtirish chora-tadbirlari toʻgʻrisida”gi PQ-3756-son qarorining 2-bandida:

(a) oltinchi xatboshidagi “Oʻzbekiston Respublikasi Iqtisodiyot va sanoat vazirligi huzuridagi “Loyihalar va import kontraktlarini kompleks ekspertiza qilish markazi” davlat unitar korxonasiga” soʻzlari “Sanoat kooperatsiyasi va davlat xaridlari agentligi huzuridagi “Oʻzbekekspertiza” aksiyadorlik jamiyatiga” soʻzlari bilan almashtirilsin;

(b) yettinchi xatboshidagi “Oʻzbekiston Respublikasi Iqtisodiyot va sanoat vazirligi huzuridagi “Loyihalar va import kontraktlarini kompleks ekspertiza qilish markazi” davlat unitar korxonasining” soʻzlari “Sanoat kooperatsiyasi va davlat xaridlari agentligi huzuridagi “Oʻzbekekspertiza” aksiyadorlik jamiyatining” soʻzlari bilan almashtirilsin.

2. Oʻzbekiston Respublikasi Prezidentining 2022-yil 25-iyuldagi “Investitsiyaviy va infratuzilmaviy loyihalarning loyihaoldi, davlat xaridiga doir tender boʻyicha xarid qilish hujjatlari va texnik topshiriqlar hamda shartnomalarni ekspertizadan oʻtkazish tartibini yanada takomillashtirish chora-tadbirlari toʻgʻrisida”gi PQ-332-son qarorida:

(a) 2-bandda:

(i) birinchi xatboshidagi “Iqtisodiyot va moliya vazirligi huzuridagi “Loyihalar va import kontraktlarini kompleks ekspertiza qilish markazi” DUK” soʻzlari “Loyihalar va xaridlar samaradorligini oshirish markazi” DM” soʻzlari bilan almashtirilsin;

(ii) “a” kichik bandning ikkinchi xatboshisi quyidagi tahrirda bayon etilsin:

“investitsiyaviy va infratuzilmaviy loyihalarning loyihaoldi hujjatlarini”;

(b) 3-bandda:

(i) “a” kichik bandda:

“100 baravaridan” soʻzlari “200 baravaridan” soʻzlari bilan almashtirilsin;

quyidagi mazmundagi jumla bilan toʻldirilsin:

“Bunda Oʻzbekiston Respublikasi budjet tizimi budjetlari hamda Tiklanish va taraqqiyot jamgʻarmasi mablagʻlari hisobiga amalga oshiriladigan tovarlar (ishlar, xizmatlar)ning davlat xaridlariga doir tender boʻyicha xarid hujjatlarini kompleks ekspertizadan oʻtkazganlik uchun ushbu kichik bandda belgilangan summaning 10 foizi miqdorida haq undiriladi”;

(ii) “b” kichik banddagi “50 ming” soʻzlari “100 ming” soʻzlari bilan almashtirilsin;

(iii) “d” kichik band chiqarib tashlansin;

(v) 1-ilovada:

(i) 2-band quyidagi tahrirda bayon etilsin:

“2. Ushbu Nizom quyidagi loyihalar boʻyicha ishlab chiqiladigan hujjatlarga tatbiq etiladi:

a) qiymati 15 million AQSH dollari ekvivalentiga teng va undan yuqori boʻlgan quyidagi loyihalar:

budjet tizimi budjetlari, davlat maqsadli jamgʻarmalari, belgilangan tartibda tashkil etilgan boshqa jamgʻarmalar, Tiklanish va taraqqiyot jamgʻarmasi mablagʻlari hisobidan moliyalashtiriladigan loyihalar. Bunda qiymati bazaviy hisoblash miqdorining 50 ming baravaridan kam boʻlgan loyihalar boʻyicha ishchi loyiha ishlab chiqiladi va ularni ekspertizadan oʻtkazish “Shaharsozlik hujjatlarini ekspertiza qilish respublika markazi” DM yoki uning hududiy boshqarmalari tomonidan amalga oshirilishi lozim;

korporativ buyurtmachilar tomonidan amalga oshirilayotgan loyihalar;

b) Oʻzbekiston Respublikasi Prezidentining soliqlar va bojxona toʻlovlari boʻyicha imtiyozlar taqdim etishni koʻzda tutadigan alohida qarorlari asosida amalga oshiriladigan loyihalar;

v) moliyalashtirish manbaidan qatʼi nazar, strategik foydali qazilmalarni qazib olish va/yoki qayta ishlashni koʻzda tutuvchi loyihalar (oltin izlovchilar usulida qazib olishdan tashqari), shuningdek, qiymati 10 million AQSH dollari ekvivalentidan ortiq boʻlgan davlat-xususiy sheriklik (DXSH) asosida amalga oshirilayotgan loyihalar. Bunda mahsulotni taqsimlash toʻgʻrisidagi bitimlar (MTTB) va davlat-xususiy sheriklik (DXSH) asosida amalga oshirilayotgan loyihalarning loyihaoldi hujjatlari vakolatli organlarning tarmoq ilmiy-texnik kengashidan tegishli xulosalar olingandan soʻng ular boʻyicha tuzilgan bitim shartlari asosida texnik-texnologik va arxitektura-qurilish yechimlari hamda loyihaning moliyaviy-iqtisodiy samaradorligi va moliyalashtirish manbalarining mavjudligi ekspertiza qilinadi;

g) davlat tashqi qarzi (xalqaro moliya institutlari va xorijiy hukumat moliya tashkilotlari qarz mablagʻlari bundan mustasno) hisobidan moliyalashtiriladigan loyihalarni amalga oshirish doirasida qiymati 5 million AQSH dollari ekvivalentiga teng va undan yuqori boʻlgan loyihalar. Bunda ushbu kichik band davlat tashqi qarzi hisobidan tijorat banklari orqali qayta moliyalashtiriladigan loyihalarga tatbiq etilmaydi”;

(ii) 3-bandda:

quyidagi mazmundagi “v” kichik band bilan toʻldirilsin:

“v) loyihaoldi hujjatlari asosida qabul qilingan Oʻzbekiston Respublikasi Prezidentining farmonlari va qarorlari, Vazirlar Mahkamasining qarorlariga muvofiq, loyihaoldi hujjatlari kompleks ekspertizadan oʻtkazilmaydigan loyihalar”;

“g” kichik band quyidagi tahrirda bayon etilsin:

“g) moliyalashtirish manbaidan qatʼi nazar, xususiy tadbirkorlik subyektlari tomonidan amalga oshirilayotgan (bundan mahsulotni taqsimlash toʻgʻrisidagi bitimlarga muvofiq amalga oshirilayotgan loyihalar mustasno) loyihalar”;

(iii) 4-banddagi “Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” DUK” soʻzlari “Loyihalar va xaridlar samaradorligini oshirish markazi” DM” soʻzlari bilan almashtirilsin;

(iv) 9-banddagi “Markazda ekspertizadan oʻtkazilib” soʻzlari chiqarib tashlansin;

(v) 11-bandning “a” kichik bandi chiqarib tashlansin;

(vi) 12-bandning “a” kichik bandi chiqarib tashlansin;

(vii) 14-bandda:

birinchi xatboshi quyidagi tahrirda bayon etilsin:

“14. Loyihaoldi hujjatlarni kompleks ekspertizadan oʻtkazish quyidagi muddatlarda amalga oshiriladi”;

ikkinchi va uchinchi xatboshilar chiqarib tashlansin;

toʻrtinchi — yettinchi xatboshilar tegishlicha ikkinchi — beshinchi xatboshilar deb hisoblansin;

(viii) 15-band quyidagi tahrirda bayon etilsin:

“15. Kompleks ekspertizadan oʻtkazish muddatini hisoblash xizmatlar haqi toʻlanganligi tasdiqlangan kundan boshlanadi”;

(ix) 17-bandning beshinchi xatboshisidan “texnik topshiriqlar,” soʻzlari chiqarib tashlansin;

(x) 20-bandning uchinchi xatboshisi chiqarib tashlansin;

(xi) 21-band quyidagi tahrirda bayon etilsin:

“21. Eʼtirozlar tashabbuskor (buyurtmachi) tomonidan bartaraf etilganda, loyihaoldi hujjatlarni takroriy ekspertizadan oʻtkazish oʻn besh ish kunidan ortiq boʻlmagan muddatda amalga oshiriladi”;

(xii) 22-band quyidagi mazmundagi xatboshi bilan toʻldirilsin:

“Markazning hujjatlar boʻyicha eʼtiroz va takliflari sohaviy normativ-huquqiy hujjatlar, meʼyorlar, talablar, standartlar va boshqa normativ hujjatlarga majburiy tarzda havola qilingan holda shakllantiriladi. Bunda tegishli havolasi boʻlmagan eʼtiroz va takliflar asossiz deb hisoblanadi”;

(xiii) 23-bandning “a” kichik bandi oʻz kuchini yoʻqotgan deb hisoblansin;

(xiv) 24-band quyidagi tahrirda bayon etilsin:

“24. Loyihaoldi hujjatlar Markazning ijobiy xulosasi olingandan soʻng bir yil (365 kalendar kun) davomida tasdiqlanmagan taqdirda, ular ushbu Nizomda belgilangan tartibda kompleks ekspertizadan oʻtkazish uchun yangidan kiritilgan hisoblanadi”;

(xv) 1-ilovaning matni quyidagi tahrirda bayon etilsin:

(xvi) 2-ilova izoh qismining ikkinchi xatboshisi chiqarib tashlansin;

(xvii) 5-ilovadagi “Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” DUK” soʻzlari “Loyihalar va xaridlar samaradorligini oshirish markazi” DM” soʻzlari bilan almashtirilsin;

(g) 2-ilovada:

(i) 1-banddagi “Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” DUKda” soʻzlari “Loyihalar va xaridlar samaradorligini oshirish markazi” DMda” soʻzlari bilan almashtirilsin;

(ii) 4-band quyidagi tahrirda bayon etilsin:

“4. Binolar, inshootlar va muhandislik kommunikatsiyalarini kapital qurish va taʼmirlash boʻyicha qiymati bazaviy hisoblash miqdorining yigirma besh ming baravaridan ortiq tovarlarning (ishlarning, xizmatlarning) davlat xaridini amalga oshirish uchun xarid qilish hujjatlari Markazga texnik topshiriq shaklida loyiha-smeta hujjatlari bilan birgalikda kiritiladi va ulardagi tovarlar (ishlar, xizmatlar) hajmlari va narx parametrlarining asosliligi yuzasidan ekspertizadan oʻtkaziladi”;

(iii) quyidagi mazmundagi 41-band bilan toʻldirilsin:

“41. Tender hujjatlari va texnik topshiriq ishlab chiqilgan holda qabul qilingan Oʻzbekiston Respublikasi Prezidentining farmonlari va qarorlari, Vazirlar Mahkamasining qarorlarida nazarda tutilgan hollarda tender hujjatlari va texnik topshiriq Markazda ekspertizadan oʻtkazilmaydi”;

(iv) 3 va 4-ilovalardagi “Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” DUKga” soʻzlari “Loyihalar va xaridlar samaradorligini oshirish markazi” DMga” soʻzlari bilan almashtirilsin;

(d) 3-ilovada:

(i) 1-banddagi “Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” DUK” soʻzlari “Loyihalar va xaridlar samaradorligini oshirish markazi” DM” soʻzlari bilan almashtirilsin;

(ii) 1-ilovadagi “Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” DUKga” soʻzlari “Loyihalar va xaridlar samaradorligini oshirish markazi” DMga” soʻzlari bilan almashtirilsin.

3. Oʻzbekiston Respublikasi Prezidentining 2025-yil 31-oktabrdagi “Kon-geologiya sohasida innovatsion texnologiyalarni joriy qilish hamda taʼlim va tadqiqotni rivojlantirishga doir qoʻshimcha chora-tadbirlar toʻgʻrisida”gi PQ-323-son qarorida:

(a) 2-bandning birinchi xatboshisi “McKinsey” soʻzidan keyin “va “IMC Montan” soʻzlari bilan toʻldirilsin;

(b) 3-bandda:

(i) “a” kichik banddagi “Markazga” soʻzi “Kolorado konchilik maktabi va Markazga” soʻzlari bilan almashtirilsin;

(ii) “v” kichik band quyidagi mazmundagi beshinchi va oltinchi xatboshilar bilan toʻldirilsin:

“(iv) tizimdagi rahbarlar va xodimlarning AQSHda Kolorado konchilik maktabining maxsus dasturlari boʻyicha malakasini oshirish yoʻnalishlarida;

(v) taʼlim dasturlari, ilm-fan yoʻnalishlari va laboratoriyalar faoliyatini xalqaro akkreditatsiyadan oʻtkazish yoʻnalishlarida”;

(iii) quyidagi mazmundagi “v1” kichik band bilan toʻldirilsin:

“(v1) Markazga Kolorado konchilik maktabi va xalqaro nufuzga ega tashkilotlar bilan mazkur bandning “v” kichik bandida belgilangan yoʻnalishlarda, shuningdek, Markaz bilan kelishilgan holda Geologiya fanlari universiteti faoliyati doirasida taʼlim, ilmiy va infratuzilmaviy loyihalarni tijoratlashtirish maqsadida Universitet talabalari (bitiruvchilari) ishtirokida tashkil etiladigan startap va spinoff tuzilmalari va Universitet (shu jumladan, uning tizimidagi tashkilotlar) oʻrtasida tender (tanlov) oʻtkazmasdan, toʻgʻridan-toʻgʻri shartnomalar tuzish va amaliy ishlarni boshlashga ruxsat beriladi. Bunda:

(i) startap va spinoff tuzilmalariga Universitet kampusi va uning bino-inshootlaridan bepul foydalangan holda talabalar oʻzini oʻzi band qilishi uchun tijorat faoliyatini yuritishga ruxsat beriladi;

(ii) Markaz tomonidan Kolorado konchilik maktabi bilan kelishilgan holda yoʻnalishlarga koʻra malakali ekspertlar ishga qabul qilinadi”.

6. Vazirlar Mahkamasining 2020-yil 27-noyabrdagi 750-son qarori bilan tasdiqlangan Oʻzbekiston Respublikasi hududiga chetdan olib kirishda bojxona boji va qoʻshilgan qiymat soligʻi toʻlashdan ozod qilinadigan, Oʻzbekiston Respublikasida oʻxshashi ishlab chiqarilmaydigan texnologik asbob-uskunalar roʻyxatiga oʻzgartirish va qoʻshimchalar kiritish tartibi toʻgʻrisidagi nizomda:

(a) 2-bandda:

(i) ikkinchi xatboshidagi “Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” DUKga (keyingi oʻrinlarda — Markaz)” soʻzlari “Sanoat kooperatsiyasi va davlat xaridlari agentligi huzuridagi “Oʻzbekekspertiza” AJ (keyingi oʻrinlarda — “Oʻzbekekspertiza” AJ)” soʻzlari bilan almashtirilsin;

(ii) beshinchi xatboshidagi “Markaz” soʻzi “Oʻzbekekspertiza” AJ” soʻzlari bilan almashtirilsin;

(b) 4, 6, 8 — 16, 18 va 19-bandlardagi tegishli kelishikdagi “Markaz” soʻzi tegishli kelishikdagi “Oʻzbekekspertiza” AJ” soʻzlari bilan almashtirilsin;

(v) 5-band quyidagi tahrirda bayon etilsin:

“5. “Oʻzbekekspertiza” AJ tomonidan ekspertiza oʻtkazganlik uchun bazaviy hisoblash miqdorining toʻrt baravari miqdorida toʻlov undiriladi”;

(g) ilovadagi “Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi huzuridagi “Loyihalar va import kontraktlarini kompleks ekspertiza qilish markazi” DUKga” soʻzlari “Sanoat kooperatsiyasi va davlat xaridlari agentligi huzuridagi “Oʻzbekekspertiza” AJga soʻzlari bilan almashtirilsin.

Izohlar:

a) ushbu ilovaning 1 va 6-bandlari 2026-yil 1-sentabrdan kuchga kiradi;

b) ushbu ilova 2-bandining tegishli qoidalari mazkur qarorning 5-bandida nazarda tutilgan muddatlarga mos ravishda amalga kiritiladi.