Chastota spektridan foydalanish, teleradiodasturlarni shakllantirish va tarqatish hamda maʼlumotlar uzatish samaradorligini oshirish yuzasidan qoʻshimcha chora-tadbirlar toʻgʻrisida (293-son)

10.07.1998

Oʻzbekiston Respublikasi Vazirlar Mahkamasining

qarori

“Ommaviy axborot vositalari toʻgʻrisida” va “Axborot olish kafolatlari va erkinligi toʻgʻrisida”gi Oʻzbekiston Respublikasi qonunlariga muvofiq, shuningdek, televideniye va radio dasturlarini shakllantirish va tarqatish sohasidagi faoliyatni samarali muvofiqlashtirishni taʼminlash, radiochastota spektri, maʼlumotlar uzatish tarmoqlari va tizimlaridan oqilona foydalanishni, axborot xizmatlari isteʼmolchilarining huquqlari himoya qilinishini taʼminlash maqsadida Vazirlar Mahkamasi qaror qiladi:

1. Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasi 1-ilovaga* muvofiq tarkibda tashkil etilsin.

* 1-ilova berilmaydi.

2. Quyidagilar Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasining asosiy vazifalari va faoliyat yoʻnalishlari etib belgilansin:

davlat boshqaruvi organlari hamda, mulkchilik shakllaridan qatʼi nazar, xoʻjalik yurituvchi subyektlarning, shu jumladan, xorijiy xoʻjalik yurituvchi subyektlarning televideniye va radio dasturlarini shakllantirish va tarqatish, telekommunikatsiyalar tarmoqlaridan foydalangan holda maʼlumotlar uzatish va televideniye va radioeshittirish radiochastota spektridan oqilona foydalanish boʻyicha faoliyatlarini muvofiqlashtirish;

teleradioeshittirish va telekommunikatsiyalar xizmatlari isteʼmolchilarining huquq va manfaatlari himoya qilinishini taʼminlash;

xoʻjalik yurituvchi subyektlarning, shu jumladan, xorijiy xoʻjalik yurituvchi subyektlarning ular tomonidan elektr aloqasining, axborotlarga ishlov berish va maʼlumotlarni uzatish tarmoqlariga oid qismini, shu jumladan, “Internet” tarmoqlarini, loyihalash, qurish va ulardan foydalanish, shuningdek, televideniye va radioeshittirishlarni tarqatish faoliyati bilan shugʻullanish huquqini litsenziyalash;

teleradioeshittirish va telekommunikatsiyalar tarmoqlaridan foydalangan holda maʼlumotlar uzatishga maxsus ruxsatnomalar (litsenziyalar)ni rasmiylashtirish ishlarini tashkil etish;

televideniye va radioeshittirish radiochastotalari hamda efir vaqtidan bexatar va oqilona foydalanish, maʼlumotlar uzatish tarmoqlari va tizimlarini rivojlantirish chora-tadbirlarini belgilash;

Oʻzbekiston Respublikasi hududida xorijiy televideniye va radioeshittirishlarni tarqatish shartlarini, mamlakatimiz teleradioeshittirishlarini boshqa davlat hududida tarqatish, Oʻzbekiston axborot tarmogʻining jahon tarmoqlariga integratsiyalashuvi tartibi va shartlarini belgilash;

idoralararo normativ hujjatlar ishlab chiqilishini, kelishib olinishini va tasdiqlanishini, shuningdek, qonun hujjatlari loyihalari tayyorlanishini va Oʻzbekiston Respublikasi Vazirlar Mahkamasiga kiritilishini tashkil etish;

televideniye va radioeshittirish radiochastotalaridan toʻgʻri va oqilona foydalanilishi ustidan nazoratni tashkil etish, teleradioeshittirish va axborotlar uzatish texnika vositalaridan foydalanishda qonunchilik bilan taqiqlangan axborotlarni tarqatish uchun suiisteʼmolliklar qilinishini bartaraf etish sharoitlarini yaratish.

teleradioeshittirishlar sohasida radiochastotalarni taqsimlash va faoliyatni amalga oshirish huquqiga yakka tartibdagi litsenziyalar berishni tashkil etish hamda tanlovlar oʻtkazish.

3. Idoralararo muvofiqlashtirish komissiyasiga:

xoʻjalik yurituvchi subyektlarning, shu jumladan, xorijiy xoʻjalik yurituvchi subyektlarning ular tomonidan elektr aloqasining, axborotlarga ishlov berish va maʼlumotlarni uzatish tarmoqlariga oid qismini, shu jumladan, “Internet” tarmoqlarini, loyihalash, qurish va ulardan foydalanish, shuningdek, televideniye va radioeshittirishlarni tarqatish faoliyati bilan shugʻullanish huquqini beruvchi maxsus ruxsatnoma (litsenziya)lar berish va ularning amal qilishini toʻxtatish toʻgʻrisida qarorlar qabul qilish;

Oʻzbekiston Respublikasi hududida xorijiy ommaviy axborot vositalarining teleradiomahsulotlarini tarqatish huquqini berish yoxud rad etish (bekor qilish) toʻgʻrisida qarorlar qabul qilish;

davlat boshqaruvi organlaridan, tashkilotlar va korxonalardan Komissiya vakolatlariga kiruvchi masalalar boʻyicha axborotlar olish;

qonunchilikka muvofiq televideniye va radioeshittirishlarini tarqatish boʻyicha cheklashlar belgilash huquqi berilsin;

Idoralararo muvofiqlashtirish komissiyasining oʻz vakolatlari doirasida qabul qilgan qarorlari davlat boshqaruvi organlari va, mulkchilik shakllaridan qatʼi nazar, xoʻjalik yurituvchi subyektlar, shu jumladan, xorijiy xoʻjalik yurituvchi subyektlar tomonidan bajarilishi majburiy hisoblanadi.

4. Idoralararo muvofiqlashtirish komissiyasi toʻgʻrisidagi nizom 2-ilovaga muvofiq tasdiqlansin.

5. Idoralararo muvofiqlashtirish komissiyasining joriy ishlarini taʼminlash uchun uning huzurida Oʻzbekiston Respublikasi Vazirlar Mahkamasi, Axborot va ommaviy kommunikatsiyalar agentligi, Oʻzbekiston Respublikasi Raqamli texnologiyalar vazirligi, Oʻzbekiston Respublikasi Telekommunikatsiyalarni tartibga solish agentligi, Oʻzbekiston MTRK mutaxassislaridan iborat 5 kishilik doimiy ishlovchi ishchi guruh tashkil etilsin.

Ishchi guruhning shtatlar jadvali 3-ilovaga muvofiq tasdiqlansin.

Oʻzbekiston Respublikasi Vazirlar Mahkamasining Ijtimoiy kompleksi, Kommunikatsiyalar kompleksi, Davlat matbuot qoʻmitasi, Oʻzbekiston pochta va telekommunikatsiyalar agentligi, “Oʻzteleradio” kompaniyasi” bir hafta muddatda, tasdiqlangan shtatlar jadvali doirasida, guruh faoliyat koʻrsatayotgan davrda uning xarajatlarini taʼminlagan holda, ishchi guruhni yuqori malakali mutaxassislar bilan butlasinlar.

Oʻzbekiston Respublikasi Prezidenti Apparati Ishlar Boshqarmasi ishchi guruhni Vazirlar Mahkamasi binosiga joylashtirsin, zarur aloqa vositalari bilan taʼminlasin.

6. Belgilansinki, Idoralararo muvofiqlashtirish komissiyasi qarori asosida:

Oʻzbekiston Respublikasi Telekommunikatsiyalarni tartibga solish agentligi belgilangan tartibda xoʻjalik yurituvchi subyektlarning, shu jumladan, xorijiy xoʻjalik yurituvchi subyektlarning ular tomonidan telekommunikatsiyalarning axborotlarga ishlov berish va maʼlumotlarni uzatish tarmoqlariga oid qismini, shu jumladan, “Internet” tarmoqlarini, loyihalashtirish, qurish, ulardan foydalanish va ularning xizmatlarini koʻrsatish, shuningdek, televideniye va radioeshittirish faoliyati bilan shugʻullanish huquqini beruvchi litsenziyalarni beradi va ularning amal qilishini toʻxtatadi.

Axborot va ommaviy kommunikatsiyalar agentligi — qonunchilikda belgilangan tartibda teleradiodasturlarni ommaviy axborot vositalari sifatida davlat roʻyxatidan oʻtkazadi va ularni Yagona davlat reyestriga kiritadi;

Oʻzbekiston matbuot va axborot agentligi va Oʻzbekiston MTRK teleradiodasturlarni tayyorlashda va shakllantirishda Oʻzbekiston Respublikasining amaldagi qonunchiligiga rioya qilinishi ustidan nazoratni amalga oshiradilar;

Davlat aloqa inspeksiyasi, Oʻzbekiston Respublikasi Davlat bojxona qoʻmitasi, Davlat soliq qoʻmitasi Oʻzbekiston Respublikasi hududida radioelektron vositalarni va yuqori chastotali qurilmalarni sotib olish (berish), loyihalashtirish, qurish (oʻrnatish), foydalanish, sotish va ularni chet ellardan olib kelish tartibiga rioya qilinishi ustidan nazoratni amalga oshiradilar.

7. Belgilansinki, Oʻzbekiston Respublikasi hududida mulkchilik shakllaridan qatʼi nazar, barcha xoʻjalik yurituvchi subyektlar, shu jumladan, xorijiy xoʻjalik yurituvchi subyektlar elektr aloqasini, shu jumladan, axborotlarga ishlov berish va maʼlumotlarni uzatish tarmoqlarini loyihalashtirish, qurish va ulardan foydalanish, shuningdek, televideniye va radioeshittirishlarni tarqatish faoliyatini faqat Idoralararo muvofiqlashtirish komissiyasi qarori asosida beriladigan maxsus ruxsatnomalar (litsenziyalar) asosida amalga oshiradilar.

Idoralararo muvofiqlashtirish komissiyasi televideniye va radio dasturlarini yaratish, shakllantirish va tarqatish (translyatsiya, retranslyatsiya qilish), telekommunikatsiyalar tarmoqlaridan foydalangan holda maʼlumotlar uzatish bilan shugʻullanuvchi barcha xoʻjalik yurituvchi subyektlarni, shu jumladan, xorijiy xoʻjalik yurituvchi subyektlarni joriy yilning 1-oktabrigacha qayta roʻyxatdan oʻtkazsin. Belgilangan muddatda qayta roʻyxatdan oʻtmagan xoʻjalik yurituvchi subyektlar amaldagi qonun hujjatlariga muvofiq televideniye va radioeshittirish faoliyati bilan shugʻullanish huquqidan mahrum boʻladilar va tugatiladilar.

2001-yil 1-yanvardan boshlab teleradiodasturlarni tarqatish (translyatsiya, retranslyatsiya qilish) va maʼlumotlarni uzatish uchun litsenziyalar besh yil muddatga beriladi.

8. Belgilansinki, yuridik va jismoniy shaxslar foydalanishida boʻlgan radioelektron vositalar va yuqori chastotali qurilmalar 1999-yil 1-yanvargacha Oʻzbekiston pochta va telekommunikatsiyalar agentligida roʻyxatdan (qayta roʻyxatdan) oʻtkazilishi kerak.

Koʻrsatib oʻtilgan muddatda roʻyxatdan (qayta roʻyxatdan) oʻtkazilmagan taqdirda radioelektron vositalar va yuqori chastotali qurilmalardan foydalanish noqonuniy hisoblanadi hamda ushbu vositalar va qurilmalar egalariga nisbatan amaldagi qonun hujjatlariga muvofiq maʼmuriy taʼsir choralari koʻriladi.

9. Quyidagilar:

Davlat roʻyxatidan oʻtkazish (qayta roʻyxatdan oʻtkazish), teleradiodasturlarni shakllantirish va tarqatish hamda maʼlumotlar uzatish bilan shugʻullanish faoliyatiga litsenziyalar berish uchun hujjatlarni qabul qilish va rasmiylashtirish tartibi 4-ilovaga muvofiq;

10. Idoralararo muvofiqlashtirish komissiyasi raisi (L. Axmetov) bir oy muddatda Komissiyaning ish rejasi, doimiy ishlovchi ishchi guruh toʻgʻrisida nizom ishlab chiqilishini tashkil etsin va tasdiqlasin, Vazirlar Mahkamasiga amaldagi qonun hujjatlariga oʻzgartirish va qoʻshimchalar kiritish, shu jumladan aloqa sohasidagi normativ hujjatlar, davlat, tarmoq standartlari va koʻrsatilayotgan xizmatlar sifati talablarini buzganlik uchun jazo choralari qoʻllash yuzasidan takliflar kiritsin.

11. Kommunikatsiyalar kompleksi (L. Axmetov) ikki oy muddatda Oliy Majlisga kiritish uchun “Radiochastota spektri toʻgʻrisida” Oʻzbekiston Respublikasi Qonuni loyihasini tayyorlasin.

12. Oʻzbekiston Respublikasi Hukumatining 9-ilovaga muvofiq ayrim qarorlari oʻz kuchini yoʻqotgan deb hisoblansin va ayrimlariga oʻzgartirish hamda qoʻshimchalar kiritilsin.

13. Oʻzbekiston Respublikasi Adliya vazirligi amaldagi qonun hujjatlariga Vazirlar Mahkamasining mazkur qarorlaridan kelib chiqadigan oʻzgartirish va qoʻshimchalar kiritish toʻgʻrisida bir oy muddatda takliflar kiritsin.

14. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari L. A. Axmetov va A. A. Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 10-iyul,

293-son

Vazirlar Mahkamasining 1998-yil 10-iyuldagi 293-son qaroriga 2-ILOVA

Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasi toʻgʻrisida

NIZOM

I. Umumiy qoidalar

1. Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasi (keyingi oʻrinlarda Idoralararo muvofiqlashtirish komissiyasi deyiladi) davlat boshqaruv organlarining, mulkchilik shakllardan qatʼi nazar, xoʻjalik yurituvchi subyektlarning, shu jumladan, xorijiy xoʻjalik yurituvchi subyektlarning axborotlarni shakllantirish va tarqatish hamda telekommunikatsiyalar vositalaridan foydalangan holda maʼlumotlarni uzatish, televideniye va radioeshittirish radiochastotalaridan bexatar va oqilona foydalanish, teleradioeshittirish va telekommunikatsiyalar xizmatlaridan foydalanuvchilar huquqlari himoya qilinishini taʼminlash faoliyatini muvofiqlashtiruvchi organ hisoblanadi.

2. Idoralararo muvofiqlashtirish komissiyasi oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisi qarorlariga va boshqa hujjatlariga, Oʻzbekiston Respublikasi Prezidentining farmonlari va farmoyishlariga, Vazirlar Mahkamasining qarorlari va farmoyishlariga, xalqaro bitimlar va shartnomalarga hamda ushbu Nizomga amal qiladi. Komissiya oʻz faoliyati toʻgʻrisida Oʻzbekiston Respublikasi Vazirlar Mahkamasiga hisobot beradi.

3. Idoralararo muvofiqlashtirish komissiyasi oʻz faoliyatini jamoatchilik asosida amalga oshiradi.

4. Idoralararo muvofiqlashtirish komissiyasining shaxsiy tarkibi Vazirlar Mahkamasi tomonidan tasdiqlanadi.

Oʻzbekiston Respublikasi Bosh vazirining oʻrinbosari komissiya raisi hisoblanadi.

5. Idoralararo muvofiqlashtirish komissiyasining joriy faoliyatini amalga oshirish uchun uning huzurida 5 kishidan iborat doimiy ishlaydigan ishchi guruh tashkil etiladi.

Ishchi guruh rahbari Vazirlar Mahkamasi tomonidan tayinlanadi va komissiyaning masʼul kotibi hisoblanadi.

Ishchi guruh xarajatlari Oʻzbekiston Respublikasi Vazirlar Mahkamasi, Axborot va ommaviy kommunikatsiyalar agentligi, Oʻzbekiston Respublikasi Raqamli texnologiyalar vazirligi hamda Oʻzbekiston MTRK mablagʻlari hisobiga shtatlar jadvali va joriy xarajatlar boʻyicha teng ulushlar doirasida amalga oshiriladi.

II. Komissiyaning vazifalari

6. Quyidagilar Idoralararo muvofiqlashtirish komissiyasining asosiy vazifalari va faoliyati yoʻnalishlari hisoblanadi:

davlat boshqaruvi organlarining va, mulkchilik shakllaridan qatʼi nazar, xoʻjalik yurituvchi subyektlarning, shu jumladan xorijiy xoʻjalik yurituvchi subyektlarning televideniye va radio dasturlarini shakllantirish hamda tarqatish va telekommunikatsiyalar vositalaridan foydalangan holda maʼlumotlarni uzatish, televideniye va radioeshittirish radiochastota spektridan bexatar va oqilona foydalanish boʻyicha faoliyatini muvofiqlashtirish;

teleradioeshittirish va telekommunikatsiyalar xizmatlari isteʼmolchilari huquq, va manfaatlarining himoya qilinishini taʼminlash;

xoʻjalik yurituvchi subyektlarning, shu jumladan, xorijiy xoʻjalik yurituvchi subyektlarning ular tomonidan elektr aloqasining, axborotlarga ishlov berish va maʼlumotlarni uzatish tarmoqlariga oid qismini, shu jumladan, “Internet” tarmoqlarini, loyihalash, qurish va ulardan foydalanish, shuningdek, televideniye va radioeshittirishlarni tarqatish faoliyati bilan shugʻullanish huquqini litsenziyalash;

teleradioeshittirish va telekommunikatsiyalar tarmoqlaridan foydalangan holda maʼlumotlar uzatishga maxsus ruxsatnomalar (litsenziyalar)ni rasmiylashtirish ishlarini tashkil etish;

televideniye va radioeshittirish radiochastotalari hamda efir vaqtidan bexatar va oqilona foydalanish, maʼlumotlar uzatish tarmoqlari va tizimlarini rivojlantirish chora-tadbirlarini belgilash;

Oʻzbekiston Respublikasi hududida xorijiy televideniye va radioeshittirishlarni tarqatish shartlarini, mamlakatimiz teleradioeshittirishlarini boshqa davlat hududida tarqatish, Oʻzbekiston axborot tarmogʻining jahon tarmoqlariga integratsiyalashuvi tartibi va shartlarini belgilash;

idoralararo normativ hujjatlar ishlab chiqilishi, kelishib olinishi va tasdiqlanishini, shuningdek, qonun hujjatlari loyihalari tayyorlanishini va Oʻzbekiston Respublikasi Vazirlar Mahkamasiga kiritilishini tashkil etish;

televideniye va radioeshittirish radiochastotalaridan toʻgʻri va oqilona foydalanilishi ustidan nazoratni tashkil etish, teleradioeshittirish, axborotlar uzatish texnika vositalaridan foydalanishda qonunchilik bilan taqiqlangan axborotlarni tarqatish uchun suiisteʼmollar qilinishini bartaraf etish sharoitlarini yaratish.

teleradioeshittirishlar sohasida radiochastotalarni taqsimlash va faoliyatni amalga oshirish huquqiga yakka tartibdagi litsenziyalar berishni tashkil etish hamda tanlovlar oʻtkazish.

III. Komissiyaning funksiyalari

7. Idoralararo muvofiqlashtirish komissiyasi oʻz zimmasiga yuklangan vazifalarga muvofiq:

xoʻjalik yurituvchi subyektlarning, shu jumladan, xorijiy xoʻjalik yurituvchi subyektlarning ularning televideniye va radioeshittirish dasturlarini shakllantirish va tarqatish, telekommunikatsiyalar vositalaridan foydalangan holda maʼlumotlarni uzatish sohasidagi faoliyatini tashkil qilish masalalari boʻyicha, televideniye va radioeshittirish radiochastota spektridan bexatar va oqilona foydalanilishini taʼminlash boʻyicha tegishli davlat boshqaruv organlari bilan oʻzaro hamkorligini muvofiqlashtiradi.

teleradioeshittirish va maʼlumotlarni uzatish sohasidagi faoliyatni litsenziyalash boʻyicha asosiy talablar va normativ hujjatlarni ishlab chiqishni va tasdiqlashni tashkil qiladi.

tegishli davlat organlari xulosalari asosida, elektr aloqasining, axborotlarga ishlov berish va maʼlumotlarni uzatish tarmoqlariga oid qismini, shu jumladan, “Internet” tarmoqlarini loyihalash, qurish va ulardan foydalanish, shuningdek, televideniye va radioeshittirishlarni tarqatishga litsenziyalar berish, ularni bekor qilish, va ularning amal qilishini toʻxtatish toʻgʻrisida qarorlar chiqaradi.

teleradiodasturlarni tarqatishni, maʼlumotlarni uzatish tarmoqlari va tizimlarini takomillashtirish va rivojlantirish, shu jumladan, ularni jahon axborot tizimlariga integratsiyalash davlat dasturlarini ekspertizadan oʻtkazish va kelishib olishni tashkil qiladi.

litsenziya bitimlari shartlariga va elektron ommaviy axborot vositalarini davlat roʻyxatidan oʻtkazish tartibiga rioya qilinishi ustidan nazoratni tashkil etadi;

elektr aloqasi tarmoqlari va vositalari, radioeshittirish va televideniye faoliyat koʻrsatishining axborot bexatarligini taʼminlash talablarini belgilaydi.

Raqamli texnologiyalarni rivojlantirish jamgʻarmasi hamda Ommaviy axborot vositalarini rivojlantirish va qoʻllab-quvvatlash ijtimoiy-siyosiy jamgʻarmasining teleradiodasturlarni shakllantirish va tarqatish hamda maʼlumotlarni uzatish masalalari boʻyicha faoliyatini muvofiqlashtiradi.

xorijiy davlatlar va kompaniyalarning telekoʻrsatuvlari va radioeshittirishlarini Oʻzbekiston Respublikasi hududida tarqatish imkoniyatini va maqsadga muvofiqligini aniqlaydi, hukumatlararo bitimlar va xalqaro shartnomalar tuzish boʻyicha takliflar kiritadi.

Oʻzbekiston televideniye va radioeshittirishlarini tarqatish hamda axborot tizimlarini jahon axborot tarmoqlariga integratsiyalash masalalari boʻyicha xorijiy davlatlarning vakolatli organlari bilan muzokaralarda qatnashadi.

Oʻzbekiston Respublikasi Telekommunikatsiyalarni tartibga solish agentligining telekommunikatsiyalar tarmoqlarini loyihalashtirish, qurish, ulardan foydalanish va ularning xizmatlarini koʻrsatishni litsenziyalash masalalari boʻyicha, shuningdek, radiochastotalari boʻyicha Radiochastotalar boʻyicha respublika kengashining teleradioeshittirishlar radiochastotalari spektridan bexatar va oqilona foydalanish masalalari boʻyicha hisobotlarini muntazam ravishda eshitib boradi.

respublikada teleradioeshittirishlarni, maʼlumotlarni uzatish tarmoqlari va tizimlarini takomillashtirish va rivojlantirish boʻyicha tashkiliy-texnikaviy tadbirlarni ishlab chiqadi;

Komissiyaning ish tartibi va rejasini, Komissiya huzuridagi doimiy ishlaydigan ishchi guruh toʻgʻrisidagi nizomni tasdiqlaydi.

teleradioeshittirish sohasida radiochastotalarni taqsimlash va faoliyatni amalga oshirish huquqiga yakka tartibdagi litsenziyalar berishni tashkil etadi hamda tanlovlar oʻtkazadi.

Tegishli davlat organlarining xulosalariga asosan Oʻzbekiston Respublikasi hududida xorijiy ommaviy axborot vositalarining teleradiomahsulotlarini tarqatish huquqini berish masalalari boʻyicha qarorlar qabul qiladi.

IV. Komissiyaning huquqlari

8. Idoralararo muvofiqlashtirish komissiyasi quyidagi huquqlarga egadir:

xoʻjalik yurituvchi subyektlarga, shu jumladan, xorijiy xoʻjalik yurituvchi subyektlarga ular tomonidan elektr aloqasining, axborotlarga ishlov berish va maʼlumotlarni uzatish tarmoqlariga oid qismini, shu jumladan, “Internet” tarmoqlarini loyihalash, qurish, va ulardan foydalanish, shuningdek televideniye va radioeshittirishlarni tarqatish faoliyati bilan shugʻullanish huquqini beruvchi maxsus ruxsatnoma (litsenziya)lar berish va ularning amal qilishini toʻxtatish toʻgʻrisida qarorlar qabul qilish;

Oʻzbekiston Respublikasi hududida xorijiy ommaviy axborot vositalarining teleradiomahsulotlarini tarqatish huquqini berish yoxud rad etish (bekor qilish) toʻgʻrisida qarorlar qabul qilish;

davlat boshqaruvi organlaridan, tashkilotlar va korxonalardan Komissiya vakolatiga kiruvchi masalalar boʻyicha axborotlar olish;

oʻz majlislarida komissiya aʼzolarining hamda vazirliklar va idoralar masʼul vakillarining axborotlarini eshitish, tegishli qarorlar qabul qilish;

qonunchilikka muvofiq televideniye va radioeshittirishlarni tarqatish boʻyicha cheklashlarni belgilash;

Oʻzbekiston Respublikasi Vazirlar Mahkamasiga axborot bexatarligi darajasini taʼminlash va oshirish boʻyicha takliflar kiritish.

Idoralararo muvofiqlashtirish komissiyasining oʻz vakolati doirasida qabul qilgan qarorlarining davlat boshqaruvi organlari va, mulkchilik shakllaridan qatʼi nazar, xoʻjalik yurituvchi subyektlar, shu jumladan, xorijiy xoʻjalik yurituvchi subyektlar tomonidan bajarilishi majburiydir.

V. Komissiyaning davlat boshqaruvi organlari bilan oʻzaro munosabatlari

9. Idoralararo muvofiqlashtirish komissiyasining qarori asosida:

Oʻzbekiston Respublikasi Telekommunikatsiyalarni tartibga solish agentligi belgilangan tartibda xoʻjalik yurituvchi subyektlarning, shu jumladan, xorijiy xoʻjalik yurituvchi subyektlarning ular tomonidan telekommunikatsiyalar, axborotlarga ishlov berish va maʼlumotlarni uzatish tarmoqlariga oid qismini, shuningdek, “Internet” tarmoqlarini loyihalashtirish, qurish, ulardan foydalanish va ularning xizmatlarini koʻrsatish, televideniye va radioeshittirishlarni tarqatish faoliyati bilan shugʻullanish huquqini beruvchi litsenziyalar beradi.

Axborot va ommaviy kommunikatsiyalar agentligi, Qoraqalpogʻiston Respublikasi, viloyatlar va Toshkent shahar axborot va ommaviy kommunikatsiyalar boshqarmalari — qonunchilikda belgilangan tartibda teleradiodasturlarni ommaviy axborot vositalari sifatida davlat roʻyxatidan oʻtkazadi va ularni Yagona davlat reyestriga kiritadi;

10. Idoralararo muvofiqlashtirish komissiyasi:

Oʻzbekiston matbuot va axborot agentligi va Oʻzbekiston MTRK orqali teleradiodasturlarni tayyorlash va shakllantirishda Oʻzbekiston Respublikasi qonunchiligiga rioya qilinishini;

Oʻzbekiston Respublikasi Telekommunikatsiyalarni tartibga solish agentligi orqali teleradiodasturlarni tarqatish boʻyicha faoliyatning hamda maʼlumotlarni uzatishning litsenziya talablari va shartlariga, texnik normativlar va standartlarga muvofiq amalga oshirilishini, radioelektron vositalar va yuqori chastotali qurilmalardan foydalanilishini.

Oʻzbekiston Respublikasi Davlat xavfsizlik xizmatining Maxsus aloqa xizmati orqali axborot bexatarligi taʼminlanishini;

Oʻzbekiston Respublikasi Aloqa, axborotlashtirish va telekommunikatsiya texnologiyalari sohasida nazorat boʻyicha davlat inspeksiyasi, Davlat bojxona qoʻmitasi, Davlat soliq qoʻmitasi orqali radioelektron vositalar va yuqori chastotali qurilmalarni Oʻzbekiston Respublikasi hududida sotib olish (berish), loyihalashtirish, qurish (oʻrnatish), foydalanish, sotish hamda ularni chet ellardan olib kelish tartibini;

teleradiomahsulotlarga mualliflik huquqi va turdosh huquqlarni himoya qilish boʻyicha Oʻzbekiston Respublikasi Adliya vazirligi, “Oʻzbekkino” milliy agentligi;

Oʻzbekiston Respublikasi Investitsiyalar va tashqi savdo vazirligi, Tashqi ishlar vazirligi orqali teleradioeshittirishlarni tarqatish, Oʻzbekiston axborot tizimlarini jahon axborot tarmoqlariga integratsiyalash masalalari boʻyicha hukumatlararo bitimlar va xalqaro shartnomalarning bajarilishini nazorat qiladi.

Vazirlar Mahkamasining 1998-yil 10-iyuldagi 293-son qaroriga 3-ILOVA

Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasi huzuridagi ishchi guruhning

SHTATLAR JADVALI

Vazirlar Mahkamasining 1998-yil 10-iyuldagi 293-son qaroriga 4-ILOVA

Teleradiodasturlarni shakllantirish va tarqatish hamda maʼlumotlar uzatish bilan shugʻullanish faoliyatiga litsenziyalar berish uchun hujjatlarni qabul qilish va rasmiylashtirish

TARTIBI

1. Mazkur Tartib hujjatlarni qabul qilish, ularni ekspertizadan hamda teleradiodasturlarni shakllantirish va tarqatish (translyatsiya, retranslyatsiya qilish) va maʼlumotlarni uzatish bilan shugʻullanish faoliyatiga maxsus ruxsatnomalar (litsenziyalar) berish, shuningdek, ularni bekor qilish va amal qilishini toʻxtatish tartibini belgilaydi.

2. Teleradiodasturlarni shakllantirish va tarqatish (translyatsiya, retranslyatsiya qilish) va maʼlumotlar uzatish bilan shugʻullanish faoliyatiga maxsus ruxsatnomalar (litsenziyalar) berish, shuningdek, ularni bekor qilish va amal qilishini toʻxtatish toʻgʻrisidagi qarorni Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasi ekspert xulosalar yoki davlat boshqaruvi tegishli vakolatli organlari taqdimnomalari asosida qabul qiladi.

3. Mulkchilik shakllaridan qatʼi nazar, xoʻjalik yurituvchi subyektlardan, shu jumladan, xorijiy xoʻjalik yurituvchi subyektlardan litsenziyalar olish uchun hujjatlarni qabul qilish, ularni ekspertizadan oʻtkazishni tashkil etish, Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasi qarorlari loyihalarini tayyorlashni Komissiya huzuridagi doimiy ishlovchi ishchi guruh amalga oshiradi.

4. Faoliyat turiga litsenziya olish uchun xoʻjalik yurituvchi subyekt Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtiruvchi komissiya huzuridagi ishchi guruhga litsenziya olish uchun qonunchilikda belgilangan roʻyxat boʻyicha hujjatlarni topshiradi.

5. Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasi huzuridagi doimiy ishlovchi ishchi guruh hujjatlarning toʻliq paketi mavjud boʻlganda uch kun muddatda uni ekspert xulosa berish uchun Telekommunikatsiyalarni tartibga solish agentligiga va Oʻzbekiston milliy teleradiokompaniyasiga yuboradi.

6. Telekommunikatsiyalarni tartibga solish agentligi va Oʻzbekiston milliy teleradiokompaniyasi ikki hafta muddatda Komissiya huzuridagi ishchi guruhga hujjatlar paketi boʻyicha ekspert xulosa taqdim etadi.

7. Ishchi guruh Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasining navbatdagi yigʻilishiga umumlashtirilgan ekspert xulosa va qaror loyihasini kiritadi.

8. Axborot faoliyati va maʼlumotlar uzatishni takomillashtirish va samaradorligini oshirish boʻyicha idoralararo muvofiqlashtirish komissiyasining qarori ijobiy boʻlganda Oʻzbekiston Respublikasi Telekommunikatsiyalarni tartibga solish agentligi maxsus elektron tizim orqali qonunchilik hujjatlarida belgilangan tartibda faoliyat turiga litsenziya beradi, Axborot va ommaviy kommunikatsiyalar agentligi, Qoraqalpogʻiston Respublikasi, viloyatlar va Toshkent shahar axborot va ommaviy kommunikatsiyalar boshqarmalari qonunchilikda belgilangan tartibda ommaviy axborot vositasini davlat roʻyxatidan oʻtkazadi va uni davlat reyestriga kiritadi.

Guvohnoma va litsenziya yigʻim va davlat boji toʻlanganda beriladi.

Vazirlar Mahkamasining 1998-yil 10-iyuldagi 293-son qaroriga 9-ILOVA

I. Oʻzbekiston Respublikasi Hukumati qarorlariga oʻzgartirishlar va qoʻshimchalar kiritish

2. Vazirlar Mahkamasining “Oʻzbekiston pochta va telekommunikatsiyalar agentligi faoliyatini tashkil etish toʻgʻrisida” 1997-yil 31-iyuldagi 380-son qaroriga 1a, 4 va 4a-ilovalardan Elektrmagnit mosligi markazi” soʻzlari chiqarib tashlansin.

3. Vazirlar Mahkamasining 1997-yil 28-avgustdagi 420-son qarori (Oʻzbekiston Respublikasi QT, 1997 i., 8-son, 30-modda) bilan tasdiqlangan Pochta va telekommunikatsiyalarni rivojlantirishni davlat tomonidan qoʻllab-quvvatlash jamgʻarmasi toʻgʻrisida nizomdagi:

II boʻlimning 4-bandi quyidagi mazmundagi xatboshi bilan toʻldirilsin:

“Mulkchilik shakllari va qaysi idoraga qarashliliklaridan qatʼi nazar, pochta va telekommunikatsiyalar sohasidagi faoliyatni amalga oshiruvchi yuridik shaxslardan normativ hujjatlar, davlat tarmoqlar standartlari talablarini, pochta va telekommunikatsiyalar sohasida koʻrsatilayotgan xizmatlar sifatini buzganlik uchun sanksiyalar shaklida, monopoliyaga qarshi qonunchilikni buzganlik uchun solinadigan iqtisodiy sanksiyalar va jarimalardan boshqa, undiriladigan mablagʻlar”;

III boʻlim 5-bandining uchinchi xatboshi quyidagi mazmundagi xatboshi bilan toʻldirilsin;

“Oʻzbekiston Respublikasi qishloqlari va uzoq aholi yashash joylari telekommunikatsiya infratuzilmasini qayta jihozlash va uni yanada rivojlantirishni maqsadli mablagʻ bilan taʼminlash”.

II. Oʻzbekiston Respublikasi Hukumatining oʻz kuchini yoʻqotgan qarorlari

Vazirlar Mahkamasining 1992-yil 13-avgustdagi 379-son qarori (Oʻzbekiston Respublikasi QT, 1992-y., 8-son, 25-modda);

Vazirlar Mahkamasining 1992-yil 3-sentabrdagi 406-son qarori (Oʻzbekiston Respublikasi QT, 1992-y., 9-son 27-modda)ga ilova;

Vazirlar Mahkamasining 1997-yil 19-fevraldagi 89-son qarori (Oʻzbekiston Respublikasi QT, 1997-y., 2-son, 6-modda)ga ilovaning 5-bandi 6, 7-xatboshilari.