Dehqon xoʻjaliklari aʼzolarini ijtimoiy sugʻurtalash va ularning ijtimoiy taʼminoti toʻgʻrisidagi nizomni tasdiqlash haqida (289-son)

09.07.1998

Oʻzbekiston Respublikasi Vazirlar Mahkamasining

qarori

Dehqon xoʻjaliklarida mashgʻul boʻlgan fuqarolarning davlat ijtimoiy sugʻurtasiga boʻlgan konstitutsiyaviy huquqini roʻyobga chiqarish va ularning ijtimoiy himoya qilinishini taʼminlash maqsadida Vazirlar Mahkamasi qaror qiladi:

1. Dehqon xoʻjaliklari aʼzolarini ijtimoiy sugʻurtalash va ularning ijtimoiy taʼminoti toʻgʻrisidagi nizom ilovaga muvofiq tasdiqlansin.

Ushbu Nizom 1998-yil 15-iyuldan boshlab amalga kiritilsin.

2. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi ijtimoiy taʼminot vazirligi va mehnat vazirligi Dehqon va fermer xoʻjaliklari uyushmasi bilan birgalikda koʻrsatib oʻtilgan Nizomni Dehqon xoʻjaliklarida mashgʻul boʻlgan barcha fuqarolarga yetkazsinlar va uning amalga oshirilishini taʼminlasinlar.

3. Oʻzbekiston Respublikasi Ijtimoiy taʼminot vazirligi va Mehnat vazirligi Dehqon va fermer xoʻjaliklari uyushmasi bilan birgalikda ommaviy axborot vositalari orqali Dehqon xoʻjaliklarida mashgʻul boʻlgan fuqarolarni ijtimoiy sugʻurta qilish tamoyillari va mexanizmi toʻgʻrisida faol tushuntirish ishlari olib borsinlar.

4. Mazkur qarorning bajarilishini nazorat qilish Oʻzbekiston Respublikasi bosh vazirining oʻrinbosari B. S. Hamidov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 9-iyul,

289-son

Vazirlar Mahkamasining 1998-yil 9-iyuldagi 289-son qarori bilan TASDIQLANGAN

Dehqon xoʻjaliklari aʼzolarini ijtimoiy sugʻurtalash va ularning ijtimoiy taʼminoti toʻgʻrisida

NIZOM

Mazkur Nizom Vazirlar Mahkamasining “1998 — 2000-yillardagi davrda qishloq xoʻjaligidagi iqtisodiy islohotlarni chuqurlashtirish Dasturini amalga oshirish chora-tadbirlari toʻgʻrisida” 1998-yil 19-martdagi 120-son qarorini bajarish yuzasidan, dehqon xoʻjaligi aʼzolarining davlat ijtimoiy sugʻurtasi va ijtimoiy muhofazaga boʻlgan konstitutsiyaviy huquqlari roʻyobga chiqarilishini taʼminlash maqsadida ishlab chiqilgan.

Dehqon xoʻjaligi aʼzolarini ijtimoiy muhofaza qilish Oʻzbekiston Respublikasining Mehnat kodeksiga, “Dehqon xoʻjaligi toʻgʻrisida”, “Fuqarolarning davlat pensiya taʼminoti toʻgʻrisida”, “Aholini ish bilan taʼminlash toʻgʻrisida”gi Oʻzbekiston Respublikasining qonunlariga, mazkur Nizomga va boshqa meʼyoriy hujjatlarga muvofiq taʼminlanadi.

Mazkur Nizom Dehqon xoʻjaliklari aʼzolariga beriladigan ijtimoiy kafolatlar shartlari va turlarini tartibga soladi, ular tomonidan daromadlardan Pensiya jamgʻarmasiga sugʻurta badallari toʻlash tartibini, shuningdek, mehnat stajini hisoblab chiqarish va mehnat daftarchalarini yuritish tartibini belgilab beradi.

I. Umumiy qoidalar

1. Dehqon xoʻjaligi aʼzolari ixtiyoriylik asosida Oʻzbekiston Respublikasi Ijtimoiy taʼminot vazirligi huzuridagi Pensiya jamgʻarmasiga sugʻurta badallari toʻlagan taqdirda:

dehqon xoʻjaligida ishlagan davrlarini pensiya (yoshga doir pensiya, nogironlik pensiyasi, boquvchisini yoʻqotganlik pensiyasi) tayinlash uchun mehnat stajiga kiritish;

pensiya toʻgʻrisidagi qonun hujjatlariga muvofiq koʻrsatib oʻtilgan pensiyalar miqdorini belgilashda dehqon xoʻjaligida ishlab olgan daromadlarini hisobga olish;

qonun hujjatlarida belgilangan tartibda davlat ijtimoiy sugʻurtasi boʻyicha nafaqalar olish, shu jumladan vaqtincha mehnatga layoqatsizlik nafaqasi, homiladorlik va tugʻruq boʻyicha nafaqa, bola tugʻilgandagi nafaqa hamda dafn marosimi uchun nafaqa olish huquqiga ega boʻladilar.

2. Dehqon xoʻjaligi aʼzolarining pensiya olishga boʻlgan huquqi ular pensiya yoshiga toʻlganda yoki qonun hujjatlarida nazarda tutilgan boshqa hollarda boshlanadi.

Ijtimoiy sugʻurta boʻyicha nafaqalar, agar ushbu nafaqalarni olish huquqi dehqon xoʻjaligi aʼzolari tomonidan Pensiya jamgʻarmasiga sugʻurta badallari toʻlash davridan boshlangan boʻlsa beriladi.

3. Pensiya jamgʻarmasiga sugʻurta badallari toʻlamayotgan dehqon xoʻjaligi aʼzolarining dehqon xoʻjaligida ishlagan davri pensiya tayinlashda mehnat stajiga kiritilmaydi hamda dehqon xoʻjaligida ishlagan davrida ularga ijtimoiy sugʻurta boʻyicha nafaqa toʻlanmaydi.

4. Dehqon xoʻjaliklarini Pensiya jamgʻarmasida roʻyxatdan oʻtkazish, ular tomonidan ijtimoiy sugʻurta boʻyicha badallar toʻlash, pensiya va ijtimoiy sugʻurta boʻyicha pensiya va nafaqalar tayinlash va toʻlash tartibi yuridik shaxs sifatida tashkil etilgan dehqon xoʻjaliklari uchun ham, yuridik shaxs boʻlmasdan tashkil etilgan dehqon xoʻjaliklari uchun ham bir xildir.

II. Dehqon xoʻjaliklari aʼzolarini Pensiya jamgʻarmasi boʻlimida roʻyxatdan oʻtkazish

5. Dehqon xoʻjaligi aʼzolari ularning shaxsiy arizalari asosida dehqon xoʻjaligi joylashgan joyidagi Pensiya jamgʻarmasining tuman (shahar) boʻlimida sugʻurtachi (sugʻurta badallari toʻlovchi shaxs) sifatida roʻyxatdan oʻtkazilishi kerak.

Belgilangan namunadagi arizada dehqon xoʻjaligi aʼzosining familiyasi, ismi va otasining ismi, uning toʻliq manzili, dehqon xoʻjaligini yuritish uchun foydalaniladigan yer uchastkasining maydoni, ariza berish paytidagi mehnat staji, Xalq banki boʻlimidagi foizsiz shaxsiy schyotining nomeri, shuningdek ariza beruvchining xohishiga koʻra, uning faoliyatiga tegishli boshqa maʼlumotlar koʻrsatiladi (1-ilova).

Pensiya jamgʻarmasi boʻlimida roʻyxatdan oʻtkazish chogʻida sugʻurtachi pasporti va mehnat daftarchasini (agar mavjud boʻlsa) koʻrsatishi kerak.

6. Pensiya jamgʻarmasi boʻlimi tomonidan dehqon xoʻjaligining har bir aʼzosiga roʻyxatdan oʻtkazish nomeri hamda Pensiya jamgʻarmasiga sugʻurta badallarini toʻlash muddatlari va tartibi toʻgʻrisida yozma bildirishnoma beriladi (2-ilova), Pensiya jamgʻarmasining tuman (shahar) boʻlimida saqlanadigan Sugʻurta badallari toʻlanishini hisobga olish daftari yuritiladi (3-ilova).

7. Roʻyxatdan oʻtkazishdan oldin dehqon xoʻjaligi aʼzosi kelgusida ijtimoiy sugʻurta boʻyicha oʻziga toʻlanadigan nafaqani oʻtkazish uchun Xalq banki boʻlimida mustaqil ravishda foizsiz shaxsiy schyot ochishi kerak.

III. Dehqon xoʻjaligi aʼzolari tomonidan Pensiya jamgʻarmasiga sugʻurta badallarining toʻlanishi

8. Dehqon xoʻjaligi aʼzolari oʻzidagi mavjud imkoniyatlardan va pensiya bilan taʼminlanish va ijtimoiy sugʻurta boʻyicha nafaqaning oʻzi istaydigan miqdoridan kelib chiqib Pensiya jamgʻarmasiga sugʻurta badallari miqdorini mustaqil ravishda belgilaydilar, biroq u badallarning mazkur Nizom bilan belgilangan eng kam miqdoridan kam boʻlmasligi kerak.

Tayinlanadigan pensiya, shuningdek ijtimoiy sugʻurta boʻyicha nafaqa (bola tugʻilganda beriladigan nafaqa va dafn marosimi uchun nafaqa bundan mustasno) miqdoriga hamda stajiga bogʻliq boʻladi.

Toʻliq mehnat staji (“Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 7-moddasiga muvofiq erkaklar uchun 25 yil, ayollar uchun 20 yil) sharoitida yoshga doir eng kam miqdordagi pensiya olish uchun Pensiya jamgʻarmasiga oyiga toʻlanadigan sugʻurta badallarining oʻrtacha miqdori Oʻzbekiston Respublikasida belgilangan eng kam oylik ish haqidan kam boʻlmasligi zarur.

9. Pensiya jamgʻarmasiga toʻlanadigan sugʻurta badallarining eng kam miqdori har bir oy uchun Oʻzbekiston Respublikasida belgilangan eng kam oylik ish haqidan kam boʻlmasligi kerak.

10. Pensiya jamgʻarmasiga sugʻurta badallari yilning har choragidan keyingi oyning 8-kunidan kechikmay toʻlanadi.

11. Sugʻurta badallari naqdinasiz hisob-kitob yoʻli bilan yoxud naqd pul bilan Xalq banki boʻlimi orqali dehqon xoʻjaligi joylashgan joyidagi Pensiya jamgʻarmasi tuman (shahar) boʻlimi schyotiga toʻlanadi. Sugʻurta badallari naqdinasiz hisob-kitob boʻyicha toʻlagan taqdirda sugʻurta badali toʻlaganligi haqidagi toʻlov hujjatida koʻrsatilgan sana sugʻurta badali toʻlagan kun hisoblanadi. Sugʻurta badali toʻlaganligi haqidagi toʻlov hujjatlari sugʻurtachida sugʻurta badallari tushumini va Sugʻurta badallari toʻlanishini hisobga olish daftaridagi tegishli yozuvlarni solishtirish vaqtigacha saqlanishi kerak.

12. Toʻlangan sugʻurta badallari qaytarilmaydi.

IV. Sugʻurta badallari toʻlanishini hisobga olish

13. Dehqon xoʻjaligi aʼzolari tomonidan sugʻurta badallari toʻlanishining hisobi Sugʻurta badallari toʻlashni hisobga olish daftarida toʻlangan sugʻurta badallari sanasi va miqdori toʻgʻrisidagi yozuvlar qayd etiladi. Sugʻurta badallari toʻlashni hisobga olish daftari dehqon xoʻjaligi aʼzosi tomonidan sugʻurta badallari toʻlaganligini va uning miqdorini tasdiqlovchi asosiy hujjat hisoblanadi.

14. Pensiya jamgʻarmasining tuman boʻlimlari tomonidan dehqon xoʻjaligi aʼzolaridan tushadigan sugʻurta badallari tushumi boʻyicha yilning har choragida yakunlar chiqariladi hamda, toʻlamaganlik yoki muddati oʻtkazib yuborilgan toʻlovlar aniqlangan taqdirda, sugʻurtachilarga ularning qarzi miqdorlari haqida ushbu qarz hosil boʻlgan davr koʻrsatilgan holda bildirishnoma yuboriladi.

15. Sugʻurtachining birinchi talabiga koʻra, biroq bir yilda kamida bir marta Pensiya jamgʻarmasiga dehqon xoʻjaligi aʼzolaridan tushgan toʻlovlarni Sugʻurta badallari toʻlanishini hisobga olish daftaridagi yozuvlar bilan solishtirishga majburdir.

16. Yashash joyini oʻzgartirgan yoki boshqa sabablar bilan dehqon xoʻjaligida shugʻullanishni toʻxtatgan dehqon xoʻjaligi aʼzolarining talabiga koʻra Pensiya jamgʻarmasining tuman (shahar) boʻlimi Pensiya jamgʻarmasi boʻlimi rahbarining imzosi va muhr bilan tasdiqlangan Sugʻurta badallari toʻlanishini hisobga olish daftarini sugʻurtachining qoʻliga beradi.

V. Dehqon xoʻjaligi aʼzolarining mehnat stajini hisoblab chiqarish va mehnat daftarchalarini yuritish tartibi

17. Dehqon xoʻjaligi aʼzolarining mazkur Nizomga binoan Pensiya jamgʻarmasiga sugʻurta badallari toʻlagan davrlari ularning mehnat stajiga qoʻshiladi.

Mehnat daftarchasi dehqon xoʻjaligi aʼzolarining mehnat stajini tasdiqlovchi hujjat hisoblanadi.

18. Yuridik shaxs boʻlmasdan tashkil etilgan dehqon xoʻjaligi aʼzolarining mehnat daftarchalari ular roʻyxatdan oʻtkazilgan joyida Pensiya jamgʻarmasi boʻlimida ular tomonidan sugʻurta badallari toʻlanishining barcha muddatlari mobaynida saqlanadi va yuritiladi.

Dehqon xoʻjaligi aʼzosi Pensiya jamgʻarmasida roʻyxatdan oʻtgan paytgacha mehnat daftarchasiga ega boʻlmagan taqdirda, Pensiya jamgʻarmasi boʻlimi amaldagi meʼyoriy hujjatlarda belgilangan tartibda ushbu shaxs uchun yangi mehnat daftarchasi ochadi.

19. Yuridik shaxs sifatida tashkil etilgan dehqon xoʻjaligi aʼzolarining mehnat daftarchalari, dehqon xoʻjaligining tanlanishiga koʻra, yoxud dehqon xoʻjaligi rahbari tomonidan, yoxud Pensiya jamgʻarmasi tomonidan saqlanadi va yuritiladi.

Yuridik shaxs sifatida tashkil etilgan dehqon xoʻjaligi aʼzosining mehnat daftarchasidagi dehqon xoʻjaligi rahbari tomonidan kiritilgan yozuvlar Pensiya jamgʻarmasi tomonidan tasdiqlanishi kerak.

Dehqon xoʻjaligi ishlash davrlari toʻgʻrisidagi dehqon xoʻjaligi rahbari tomonidan kiritilgan hamda Pensiya jamgʻarmasi tomonidan tasdiqlanmagan yozuvlar haqiqiy deb hisoblanmaydi.

Yuridik shaxs sifatida tashkil etilgan dehqon xoʻjaligining ilgari ishlamagan (mehnat daftarchasi boʻlmagan) aʼzolari uchun mehnat daftarchalari mazkur dehqon xoʻjaligi mablagʻlari hisobiga belgilangan tartibda sotib olinadi.

20. Mehnat daftarchasida fuqaroning dehqon xoʻjaligida ishlaganligi toʻgʻrisidagi quyidagi yozuvlar yoziladi:

“Sana” ustunida — fuqarolar mehnat stajini hisoblay boshlash sanasi fuqarolarning davlat ijtimoiy sugʻurtasi boʻyicha badallar toʻlovchi sifatida roʻyxatdan oʻtgan kundan boshlab yoziladi, u Pensiya jamgʻarmasiga toʻlovlarni toʻlab borgan taqdirda;

shu ustunda dehqon xoʻjaligida ish bilan mashgʻul boʻlingan mehnat stajini hisoblashni toʻxtatish kuni yoziladi. Pensiya jamgʻarmasining tegishli qarorida koʻrsatilgan, davlat sugʻurtasi boʻyicha oxirgi badal toʻlangan kun dehqon xoʻjaligida mashgʻul boʻlingan mehnat staji toʻxtatilgan kun hisoblanadi;

“Ishga qabul qilish, boshqa ishga oʻtkazish va ishdan boʻshatish toʻgʻrisidagi maʼlumotlar” ustuniga — “dehqon xoʻjaligida mashgʻul” deb yoziladi, shuningdek fuqaroning roʻyxatdan oʻtish raqami va fuqaroni sugʻurtachi sifatida roʻyxatdan oʻtkazgach Pensiya jamgʻarmasi boʻlimining nomi koʻrsatiladi.

“Qaysi hujjatga asosan yozilgan” ustuniga — mehnat stajining boshlanishi haqidagi yozuv yozilganda — “ Pensiya jamgʻarmasining dehqon xoʻjaligi aʼzolarining sugʻurtachi sifatida roʻyxatdan oʻtkazilganligi toʻgʻrisidagi bildirishnomasi asosida” deb va — mehnat stajining toʻxtatilishi haqidagi yozuv yozilganda — “Pensiya jamgʻarmasining dehqon xoʻjaligi aʼzosining mehnat stajini toʻxtatish toʻgʻrisidagi qarori asosida” deb yoziladi; mazkur yozuvlar tegishli hujjatlarning sanasi va tartib raqami qoʻrsatilgan holda yoziladi.

21. Pensiya va davlat ijtimoiy sugʻurtasi boʻyicha nafaqalar belgilash uchun mehnat stajini hisoblab chiqarishda, agar dehqon xoʻjaligi aʼzosi ushbu yilda kamida 9 oy mobaynida badallar toʻlagan boʻlsa, mehnat stajiga toʻliq yil qoʻshiladi.

Stajni hisoblashda hisobga olinadigan, dehqon xoʻjaligi aʼzolariga sugʻurta badallarini toʻlamaslik huquqi berilgan oylar (bir yil uch oy) berilgan ariza asosida Pensiya jamgʻarmasining tuman (shahar) boʻlimining qarori bilan rasmiylashtiriladi. Ushbu oylar mazkur Nizom 22-bandining amal qilishi tatbiq etilmaydi.

Boshqa hollarda staj sugʻurta badallari toʻlangan oylar soniga mutanosib ravishda hisobga olinadi.

22. Dehqon xoʻjaligi aʼzosi tomonidan Pensiya jamgʻarmasi mazkur Nizomning 10-bandiga muvofiq belgilangan muddatdan soʻng bir oy mobaynida sugʻurta badallari toʻlanmagan taqdirda Pensiya jamgʻarmasining tuman (shahar) boʻlimi:

dehqon xoʻjaligi aʼzosining mehnat daftarchasiga ish stajini toʻxtatilganligi toʻgʻrisida yozib qoʻyadi — yuridik shaxs boʻlmasdan tashkil etilgan dehqon xoʻjaliklari aʼzolari uchun;

dehqon xoʻjaligi rahbarini davlat ijtimoiy sugʻurtasi olish huquqi toʻxtatilganligi haqida xabardor qiladi hamda dehqon xoʻjaligi aʼzosining mehnat daftarchasiga dehqon xoʻjaligida mehnat staji toʻxtatilganligi toʻgʻrisida yozuv kiritish toʻgʻrisida talabnoma kiritadi — yuridik shaxs sifatida tashkil etilgan dehqon xoʻjaligi aʼzolari uchun.

Tegishli yozuv kiritilgan mehnat daftarchasi dehqon xoʻjaligi aʼzosi qoʻliga beriladi.

Agar fuqaro mehnat daftarchasiga uning mehnat staji toʻxtatilganligi toʻgʻrisida tegishli yozuv yozilgandan keyin bir oy mobaynida sugʻurta badallari boʻyicha oʻzining sugʻurta badallarini toʻlamagan butun davri uchun qarzlarini toʻlasa, u holda mehnat stajini toʻxtatish toʻgʻrisidagi yozuv bekor qilinadi.

VI. Pensiya va nafaqalarni tayinlash va toʻlash

23. Pensiyalar (yoshga doir, nogironlik pensiyasi, boquvchisini yoʻqotganlik pensiyasi) fuqarolarning arizasiga asosan “Fuqarolarning davlat pensiya taʼminoti toʻgʻrisida”gi Qonunga muvofiq tuman (shahar) ijtimoiy taʼminot boʻlimi tomonidan tayinlanadi.

Ijtimoiy sugʻurta boʻyicha nafaqalar (vaqtincha mehnatga layoqatsizlik, homiladorlik va tugʻruq boʻyicha, bola tugʻilganda, dafn etish uchun nafaqa) dehqon xoʻjaligi aʼzosini roʻyxatdan oʻtkazgan Pensiya jamgʻarmasining tuman (shahar) boʻlimi tomonidan Davlat ijtimoiy sugʻurtasi boʻyicha nafaqalar tayinlash va toʻlash tartibi toʻgʻrisidagi nizomga muvofiq tayinlanadi.

24. “Davlat pensiya taʼminoti toʻgʻrisida”gi Qonunning 32-moddasiga muvofiq pensiya miqdorini hamda vaqtincha mehnatga layoqatsizlik boʻyicha nafaqa va homiladorlik va tugʻruq boʻyicha nafaqa miqdorini hisoblab chiqarishda hisobga olinadigan oylik daromad miqdori ijtimoiy sugʻurta boʻyicha toʻlangan oylik badallari summasini 30 ga boʻlish va olingan natijani 100 ga koʻpaytirish yoʻli bilan hisoblab chiqariladi.

Oylik badal miqdorini aniqlash uchun ushbu oyni oʻz ichiga oluvchi choraklik badallar summasi uchga boʻlinadi.

Yillik daromad miqdori kalendar yilda olingan oylik daromadlarini qoʻshish yoʻli bilan aniqlanadi.

25. Pensiya tayinlashda mehnat staji mazkur Nizomning V boʻlimiga muvofiq mehnat daftarchasiga yozilgan yozuvlar asosida tuman (shahar) ijtimoiy taʼminot boʻlimi tomonidan aniqlanadi.

Vaqtincha mehnatga layoqatsizlik, homiladorlik va tugʻruq boʻyicha nafaqa tayinlashda mehnat staji Pensiya jamgʻarmasining tuman (shahar) boʻlimi tomonidan:

dehqon xoʻjaligi aʼzosi Pensiya jamgʻarmasida roʻyxatdan oʻtish paytigacha boʻlgan staj — mehnat daftarchasidagi;

dehqon xoʻjaligida mashgʻul boʻlgan davrdagi staj — (Pensiya jamgʻarmasida sugʻurta badallari toʻlovchi sifatida roʻyxatdan oʻtkazilgandan keyin) sugʻurta badallari toʻlanishini hisobga olish daftaridagi yozuvlar asosida aniqlanadi.

26. Vaqtincha mehnatga layoqatsizlik, homiladorlik va tugʻruq boʻyicha nafaqalarni hisoblab chiqarish uchun oʻtgan yilda Pensiya jamgʻarmasiga toʻlangan badallar summasi asosida aniqlanadigan daromad olinadi.

Oʻtgan yilda toʻlangan badallar boʻlmaganda dehqon xoʻjaligi aʼzosiga eng kam oylik ish haqidan kelib chiqib, keyinchalik yil yakunlari boʻyicha qayta hisoblangan holda, davlat ijtimoiy sugʻurtasi boʻyicha nafaqa belgilanadi.

27. Dehqon xoʻjaligi aʼzosi sugʻurtachi sifatida Pensiya jamgʻarmasida roʻyxatdan oʻtkazilgan davrda pensiya ishlovchi pensionyerlar uchun belgilangan miqdorlarda toʻlanadi.

28. Pensiyalar pensionerning xohishiga koʻra pensionerning turar joyidagi pochta aloqa boʻlimlari yoki Xalq banki boʻlimlari orqali ijtimoiy taʼminot organlari tomonidan toʻlanadi.

Ijtimoiy sugʻurta boʻyicha nafaqalar Pensiya jamgʻarmasining tuman (shahar) boʻlimi tomonidan nafaqa summasini dehqon xoʻjaliklarida mashgʻul boʻlgan fuqarolarning foizsiz shaxsiy schyotiga oʻtkazish yoʻli bilan Xalq banki boʻlimlari orqali toʻlanadi.

Dehqon xoʻjaliklari aʼzolarini ijtimoiy sugʻurtalash va ularning ijtimoiy taʼminoti toʻgʻrisidagi nizomga 1-ILOVA

Dehqon xoʻjaliklari aʼzolarini ijtimoiy sugʻurtalash va ularning ijtimoiy taʼminoti toʻgʻrisidagi nizomga 2-ILOVA

Pensiya jamgʻarmasiga sugʻurta badallarini toʻlash muddatlari va tartibi toʻgʻrisida

sugʻurta bildirishnoma

Dehqon xoʻjaliklari aʼzolarini ijtimoiy sugʻurtalash va ularning ijtimoiy taʼminoti toʻgʻrisidagi nizomga 3-ILOVA