Startaplarni qoʻllab-quvvatlashning kompleks ekotizimini joriy etish chora-tadbirlari toʻgʻrisida (PQ-59-son)

11.02.2026

Oʻzbekiston Respublikasi Prezidentining

qarori

Oʻzbekiston Respublikasi Prezidentining tadbirkorlar bilan V ochiq muloqotida belgilangan vazifalar ijrosini taʼminlash, shuningdek, startap loyihalarni gʻoyadan boshlab masshtablashtirishgacha boʻlgan barcha bosqichlarda institutsional, moliyaviy va infratuzilmaviy qoʻllab-quvvatlash maqsadida qaror qilaman:

I. Maqsadlar

1. Quyidagilar 2030-yilga qadar startap ekotizimini rivojlantirishning maqsadli koʻrsatkichlari etib belgilansin:

(a) startap loyihalar sonini 5 mingtaga hamda jalb qilingan venchur investitsiyalar hajmini 2 milliard AQSH dollariga yetkazish;

(b) 500 ta startap loyihani qiymati 1 million AQSH dollaridan yuqori, 100 ta startap loyihani qiymati 10 million AQSH dollaridan yuqori hamda 25 ta startap loyihani qiymati 100 million AQSH dollaridan yuqori boʻlgan kompaniyalarga aylantirish;

(v) startap loyihalar ishga tushishi natijasida 20 mingdan ortiq yangi ish oʻrinlarini yaratish;

(g) yoshlarning 2 mingta startap gʻoyalarini tijoratlashtirish, kamida 400 ta startap loyihasini xalqaro bozorlarga olib chiqish.

2. Startap gʻoyani shakllantirish, loyihani ishlab chiqish, ishga tushirish hamda masshtablashtirishni oʻz ichiga qamrab oluvchi toʻrt bosqichli startap ekotizimi joriy etilsin.

II. Startap gʻoyalarni shakllantirish bosqichi

3. 2026/2027 oʻquv yilidan boshlab bosqichma-bosqich oʻrta maxsus va kasbiy taʼlim tashkilotlari oʻquvchilari hamda umumiy oʻrta taʼlim tashkilotlarining 9 — 11-sinf oʻquvchilari uchun har oyda kamida ikki marotaba startap gʻoyalarni yaratishga oʻrgatuvchi “Mohirlik va biznes soati” tadbirlari oʻtkazilishi yoʻlga qoʻyilsin. Bunda:

(a) oʻquvchilar oʻrtasida “Eng yaxshi startap gʻoyasi” tanlovi oʻtkaziladi, tuman darajasidagi gʻoliblarga 5 million soʻmgacha, viloyat darajasida — 10 million soʻmgacha miqdorda mukofot beriladi, ularning loyihalariga Yoshlar ishlari agentligi va IT-park hamrohlik qiladi;

(b) loyihalar har chorakda oʻquvchilarning ota-onalari, biznes va ilmiy hamjamiyat vakillariga taqdimot qilinadi;

(v) marketpleyslar bilan hamkorlik oʻrnatib, taʼlim tashkilotlarida yaratilgan mahsulotlarni sotish yoʻlga qoʻyiladi.

4. 2026-yil 1-apreldan boshlab muammo va masalalarni kraudsorsing asosida hal qilishning quyidagi tizimi joriy etilsin:

(a) davlat organlari, tashkilotlari va davlat ishtirokidagi korxonalar oʻz sohasidagi yechim talab qilayotgan muammo va masalalar boʻyicha:

(i) kraudsorsing elektron platformasida eʼlon joylashtirib, tanlov tashkil qiladi;

(ii) har oyda startap tashabbuskorlari bilan uchrashuvlar (“Startap kuni”) oʻtkazadi;

(b) masalalar yechimi yuzasidan samarali deb topilgan takliflar boʻyicha loyihani amalga oshirish uchun xarid jarayonlari kraudsorsing elektron platformasida oʻrnatilgan tartibda amalga oshiriladi.

5. Belgilansinki, 2026-yildan boshlab har yili startap loyihaga aylantirish salohiyati yuqori boʻlgan gʻoyalarni aniqlash boʻyicha “Eng innovatsion gʻoya” respublika tanlovi oʻtkaziladi. Bunda:

(a) tanlov davlat oliy taʼlim tashkilotlarida oʻtkaziladi va gʻoliblarga oliy taʼlim tashkilotlarining budjetdan tashqari mablagʻlari hisobidan 100 million soʻm grant beriladi;

(b) respublika bosqichi 10 ta yoʻnalish boʻyicha oʻtkaziladi, mukofot jamgʻarmasi Ilm-fanni moliyalashtirish va innovatsiyalarni qoʻllab-quvvatlash jamgʻarmasidan 10 milliard soʻm etib belgilanadi.

6. Eng yaxshi gʻoyalar (ideatonlar) va IT yechimlar (xakatonlar) tanlovlari gʻoliblariga quyidagilarni taqdim etishga ruxsat etilsin:

(a) davlat venchur jamgʻarmalari tomonidan — boshlangʻich darajadagi startap loyihalarga inkubatsiya yoki akseleratsiya dasturlarida ishtirok etish sharti bilan 20 ming AQSH dollari ekvivalentigacha miqdorda mablagʻlarni konvertatsiyalanadigan (keyinchalik startap ustav kapitalidagi ulushga aylantirilishi mumkin boʻlgan) qarz sifatida;

(b) raqamli texnologiyalar sohasidagi startap loyihalarga — “Raqamli startaplar” dasturi doirasida 10 ming AQSH dollari ekvivalentigacha mablagʻlarni grant sifatida.

III. Startap loyihani ishlab chiqish bosqichi

7. 2027-yildan boshlab quyidagilarda laboratoriya va uskuna (3D-printer), raqamli infratuzilma, ekspertlar, kovorking zonalari, yuridik xizmatlar, test poligonlari va moliyalashtirish instrumentlariga ega tadqiqot va ishlanma markazlari (R&D center) tashkil qilinsin:

(a) Oliy taʼlim, fan va innovatsiyalar vazirligi hamda Innovatsion rivojlanish agentligi tomonidan — bosqichma-bosqich yoshlar texnoparklarida va oliy taʼlim tashkilotlarida;

(b) Raqamli texnologiyalar vazirligi tomonidan — Nurafshon shahrida.

8. Belgilab qoʻyilsinki, sinovdan oʻtkazish uchun saralab olingan yiliga 10 tagacha istiqbolli loyihalarga namunaviy model (MVP) yaratish xarajatlarining 50 foizigacha qismi, biroq, 50 ming AQSH dollaridan oshmagan miqdordagi mablagʻlarni qoplab berish uchun quyidagilar hisobidan “R&D” vaucher taqdim etiladi:

(a) Yoshlar texnoparklarida va oliy taʼlim tashkilotlarida — Yoshlar tadbirkorligini rivojlantirish davlat maqsadli jamgʻarmasi;

(b) Raqamli texnologiyalar vazirligida — “Raqamli startaplar” dasturi doirasidagi mablagʻlar.

9. Oliy taʼlim, fan va innovatsiyalar vazirligi hamda oliy taʼlim tashkilotlarining 2026-yil 1-sentabrdan boshlab 1-ilovaga muvofiq oliy taʼlim tashkilotlarida “Oliygohlar — startaplar generatori” dasturini amalga oshirish toʻgʻrisidagi taklifi maʼqullansin. Bunda:

(a) oliy taʼlim tashkilotlarida IT-park va venchur jamgʻarmalar bilan hamkorlikda talabalar akseleratorlari joriy etiladi;

(b) talabalar uchun nufuzli xalqaro akseleratorlar va universitetlar bilan stajirovka va almashinuv dasturlari yoʻlga qoʻyiladi;

(v) oliy taʼlim tashkilotlariga talabalar va ilmiy xodimlarning istiqbolli startap loyihalariga inkubatsiya markazlari va talabalar akseleratorlari orqali har bir loyihaga 20 ming AQSH dollarigacha ekvivalentda oʻz mablagʻlarini investitsiya qilish huquqi beriladi;

(g) talabalar akseleratorlarida “startap menejer” va “startap treker” lavozimlari koʻzda tutiladi.

10. 2026-yildan boshlab har yili yoshlarning eng yaxshi biznes va startap loyihalarini aniqlash va ragʻbatlantirish boʻyicha “Yosh tadbirkorlar” chempionati oʻtkazilishi yoʻlga qoʻyilsin hamda uning natijalari boʻyicha quyidagilar belgilansin:

(a) 100 tagacha biznes va startap loyihalarning har biriga Yoshlar tadbirkorligini rivojlantirish davlat maqsadli jamgʻarmasi va “Yoshlar ventures” venchur jamgʻarmasi mablagʻlari hisobidan 1 milliard soʻmgacha investitsiya kiritiladi;

(b) Yoshlar tadbirkorligini rivojlantirish davlat maqsadli jamgʻarmasiga ajratilgan mablagʻlar doirasida startap va biznes loyihalarni brendga aylantirish uchun moliyaviy va marketing xizmatlari boʻyicha ekspertlarning bazaviy hisoblash miqdorining 100 baravarigacha miqdorda xarajatlari toʻlab beriladi;

(v) Yoshlar tadbirkorligini rivojlantirish davlat maqsadli jamgʻarmasi kengashi chempionat gʻoliblarini davlat mukofotlari, “Faol tadbirkor” va “Oʻzbekiston belgisi” koʻkrak nishonlariga tavsiya etish uchun vakolatli organlarga takliflar kiritadi.

IV. Startap loyihani ishga tushirish bosqichi

11. Belgilansinki, 2026-yil 1-apreldan boshlab “Raqamli startaplar” dasturida ishtirok etuvchi startap loyihalarga IT-park rezidenti maqomi beriladi hamda ularga qonunchilikda belgilangan eksportning minimal koʻrsatkichlari talabisiz tegishli imtiyoz va preferensiyalardan foydalanishga ruxsat beriladi.

12. 2026-yil 1-apreldan boshlab Startap ekotizimining yagona elektron platformasi (keyingi oʻrinlarda — Platforma)da roʻyxatdan oʻtgan startap ekotizimi ishtirokchilariga:

(a) 1-ilovaga muvofiq masʼul tashkilotlar tomonidan tegishli sohalarga oid startap loyihalar boʻyicha quyidagi xarajatlar qoplab berilsin:

(i) tegishli yoʻnalishlardagi oʻquv kurslarida oʻqish va sertifikat olish hamda nufuzli akseleratsiya va inkubatsiya dasturlarida ishtirok etish bilan bogʻliq xarajatlarning 50 foizigacha boʻlgan, biroq 20 ming AQSH dollari ekvivalentidan oshmagan miqdorda;

(ii) patentlash hamda intellektual faoliyat natijalari va savdo belgilarini roʻyxatdan oʻtkazish;

(b) Yoshlar tadbirkorligini rivojlantirish davlat maqsadli jamgʻarmasi hisobidan yoshlar startap loyihalari boʻyicha quyidagilar ajratilsin:

(i) startap studiyalar, inkubatsiya va akseleratsiya markazlarini tashkil etish uchun yiliga 20 tagacha loyihaga 1 yil imtiyozli davr bilan 5 yilgacha muddatga 5 milliard soʻmgacha foizsiz qarz (ssuda);

(ii) mahalliy inkubatsiya yoki akseleratsiya dasturlarida ishtirok etish bilan bogʻliq badal toʻlovlari uchun oyma-oy ajratiladigan va umumiy miqdori bazaviy hisoblash miqdorining 100 baravaridan oshmagan grant.

13. 2026-yil 1-apreldan boshlab hududlarda bevosita Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari rahbarligida Startaplar klubi tashkil etilsin va ularga startap tashabbuskorlari bilan har oy uchrashish, davlat organlari bilan yuzaga kelgan masalalari boʻyicha amaliy koʻmak koʻrsatish hamda ushbu hududdagi yirik tadbirkorlik subyektlarini startap loyihalarga biriktirish vazifalari yuklanadi.

14. 2026-yildan boshlab har yili “Startap ekspo” koʻrgazmasi oʻtkazilishi yoʻlga qoʻyilsin va uning doirasida:

(a) tadbirlarni Savdo-sanoat palatasi, Iqtisodiyot va moliya vazirligi, Raqamli texnologiyalar vazirligi, Markaziy bank, Yoshlar ishlari agentligi, Innovatsion rivojlanish agentligi tashkil qilsin;

(b) startap loyihalar tashabbuskorlarining gʻoyalari va mahsulotlari investorlar, venchur jamgʻarmalar, yirik korxonalar, davlat idoralari va oliy taʼlim tashkilotlariga taqdimot qilinsin.

15. Platformadagi muvaffaqiyatli startaplar reyestriga kiritilgan loyihalar bilan budjet buyurtmachilari oʻrtasida davlat xaridlari doirasida tuziladigan shartnomalarda oldindan toʻlov miqdori 500 million soʻmgacha boʻlgan xaridlar boʻyicha 50 foiz, 500 million soʻmdan yuqori boʻlgan xaridlar boʻyicha 30 foiz etib belgilansin.

V. Startap loyihani masshtablashtirish (eksport qilish) bosqichi

16. Soliq va muddati oʻtgan debitor qarzdorligi mavjud boʻlmagan hamda soliq xavfi past boʻlgan Platformadagi muvaffaqiyatli startaplar reyestridagi loyihalarga xorijiy davlatlarda korxonalar tashkil qilish va ularning ustav fondini shakllantirishga (ustav fondida ishtirok etishga) yoki filiallarni aylanma mablagʻlar bilan toʻldirishga alohida qarorlarsiz yiliga 500 ming AQSH dollarigacha mablagʻlarni xorijiy hisob raqamlarga oʻtkazishga ruxsat berilsin.

17. Quyidagilar:

(a) Iqtisodiyot va moliya vazirligi Raqamli texnologiyalar vazirligi, Markaziy bank, Yoshlar ishlari agentligi, Innovatsion rivojlanish agentligi va Savdo-sanoat palatasi bilan birgalikda uch oy muddatda xorijiy davlatlarda startaplarni yoki ularning filialini tashkil qilgan startap loyihalarning roʻyxatini tuzsin va Tashqi ishlar vazirligiga taqdim etsin;

(b) Tashqi ishlar vazirligi manfaatdor vazirlik va idoralar bilan birgalikda 2026-yilda startap loyihalar roʻyxati asosida tegishli davlatlar hududiga kirish uchun viza talablarini yengillashtirish yuzasidan muzokaralarni amalga oshirsin va yakunlari boʻyicha takliflar kiritsin.

VI. Toʻrt bosqichli startap ekotizimining tashkiliy chora-tadbirlari

18. Raqamli texnologiyalar vazirligi ikki oy muddatda IT-park huzurida mazkur qarorga 2-ilovaga muvofiq vazifalarni amalga oshiradigan Moliyaviy konsultatsiya va yuridik yordam xizmatini tashkil qilsin.

19. Belgilansinki:

(a) Moliyaviy konsultatsiya va yuridik yordam xizmati tomonidan xizmatlar startap loyihalarga ular Platformada roʻyxatdan oʻtgan sanadan boshlab 12 oygacha boʻlgan muddatda bepul koʻrsatiladi;

(b) IT-parkka ushbu xizmatlarni koʻrsatish uchun autsorsing tashkilotlarini jalb qilish huquqi beriladi.

20. Startap ekotizimini rivojlantirish boʻyicha muvofiqlashtiruvchi kengash 3-ilovaga muvofiq yangilangan tarkibda tasdiqlansin va unga quyidagi vazifalar yuklansin:

(a) startap ekotizimining amaldagi holatini tahlil qilish, startap ekotizimini rivojlantirishning yoʻnalishlarini, eng muhim samaradorlik koʻrsatkichlarini (KPI), startap ekotizimi ishtirokchilarini qoʻllab-quvvatlash tartiblarini belgilash hamda ularni amalga oshirish boʻyicha “yoʻl xaritalari”ni tasdiqlash;

(b) startap ekotizimi ishtirokchilari faoliyatini muvofiqlashtirish, startaplarni barcha bosqichlarda qoʻllab-quvvatlash ishlarini tashkil etish;

(v) startap loyihani amalga oshirishda moliyalashtirish, infratuzilma va tartibga solish bilan bogʻliq muammolarni hal etish, tizimli masalalar yuzasidan qonunchilikni takomillashtirish boʻyicha takliflar ishlab chiqish;

(g) startap ekotizimida amalga oshirilayotgan ishlar samaradorligini tahlil qilish maqsadida choraklik yigʻilishlar oʻtkazib borish.

VII. Moliyaviy resurslar

21. Toʻrt bosqichli startap ekotizimini moliyalashtirish uchun 2026-2027-yillarda jami 160 million AQSH dollari va 130 milliard soʻm miqdoridagi mablagʻlar yoʻnaltirilsin, xususan:

(a) texnologiyalar sohasidagi startap va biznes loyihalar uchun Jahon bankidan jalb qilinadigan 100 million AQSH dollari;

(b) Oʻzbekiston Respublikasi Prezidentining 2025-yil 30-oktabrdagi PQ-320-son qaroriga muvofiq “Fondlar fondi” va “IT Park Ventures” venchur jamgʻarmalariga Tiklanish va taraqqiyot jamgʻarmasidan 2026-2027-yillarda ajratiladigan 50 million AQSH dollari;

(v) Yoshlar tadbirkorligini rivojlantirish davlat maqsadli jamgʻarmasi va “Yoshlar ventures” venchur jamgʻarmasiga ajratiladigan 10 million AQSH dollari ekvivalenti miqdoridagi mablagʻlar;

(g) Innovatsion rivojlanish agentligi tomonidan oʻtkaziladigan tanlov asosida startap loyihalarni qoʻllab-quvvatlash va infratuzilmani rivojlantirish uchun Ilm-fanni moliyalashtirish va innovatsiyalarni qoʻllab-quvvatlash jamgʻarmasiga ajratiladigan mablagʻlar doirasida 30 milliard soʻm;

(d) “UzVC” milliy venchur fondiga Oʻzbekiston Respublikasi respublika budjeti hisobidan 2026-2027-yillarda teng miqdorlarda ajratiladigan 100 milliard soʻm.

VIII. Qaror ijrosini tashkil etish, taʼminlash va nazorat

22. Toʻrt bosqichli startap ekotizimini yoʻlga qoʻyish boʻyicha “yoʻl xaritasi” 4-ilovaga muvofiq tasdiqlansin.

23. Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga 5-ilovaga muvofiq oʻzgartirish va qoʻshimchalar kiritilsin.

24. Iqtisodiyot va moliya vazirligi Raqamli texnologiyalar vazirligi, manfaatdor vazirlik va idoralar bilan birgalikda uch oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

25. Mazkur qarorning ijrosini samarali tashkil qilishga masʼul va shaxsiy javobgar etib Bosh vazir oʻrinbosari J.A. Qoʻchqorov belgilansin.

26. Qaror ijrosini muhokama qilib borish, ijro uchun masʼul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 11-fevral,

PQ-59-son

Oʻzbekiston Respublikasi Prezidentining 2026-yil 11-fevraldagi PQ-59-son qaroriga 1-ILOVA

Startap ekotizimining yoʻnalishlari boʻyicha biriktirilgan masʼul tashkilotlar, oliy taʼlim tashkilotlari hamda banklar roʻyxati

Izoh: Startap ekotizimini rivojlantirish boʻyicha muvofiqlashtiruvchi kengash ushbu roʻyxatga oʻzgartirish va qoʻshimchalar kiritish huquqiga ega.

Oʻzbekiston Respublikasi Prezidentining 2026-yil 11-fevraldagi PQ-59-son qaroriga 2-ILOVA

IT-park huzuridagi Moliyaviy konsultatsiya va yuridik yordam xizmatining asosiy vazifalari

1. Soliq, moliyaviy operatsiyalar va buxgalteriya hisobi, investitsiya va tashqi iqtisodiy faoliyat sohalarida IT kompaniyalar va startap loyihalarni konsultativ qoʻllab-quvvatlash, shuningdek, imtiyozlar va preferensiyalarni qoʻllash masalalarida uslubiy yordam koʻrsatish.

2. IT kompaniyalar va startap loyihalar manfaatlarini huquqiy taʼminlash va himoya qilish, shu jumladan, hujjatlarni huquqiy ekspertizadan oʻtkazish, yuridik maslahatlar berish, intellektual mulk obyektlariga boʻlgan huquqlarni himoya qilish.

3. “Yagona darcha” tamoyili boʻyicha yuridik shaxslarni roʻyxatdan oʻtkazish, bank hisobvaraqlarini ochish, litsenziya va ruxsat beruvchi hujjatlarni olish, shuningdek, davlat xizmatlarini olish boʻyicha xizmatlar koʻrsatish.

Oʻzbekiston Respublikasi Prezidentining 2026-yil 11-fevraldagi PQ-59-son qaroriga 3-ILOVA

Startap ekotizimini rivojlantirish boʻyicha muvofiqlashtiruvchi kengash

TARKIBI

Izoh: Kengash aʼzolari boshqa ishga oʻtganda, uning tarkibiga ushbu lavozimga yangi tayinlangan yoki zimmasiga tegishli vazifalarni bajarish yuklangan shaxslar kiritiladi.

Oʻzbekiston Respublikasi Prezidentining 2026-yil 11-fevraldagi PQ-59-son qaroriga 4-ILOVA

Toʻrt bosqichli startap ekotizimini yoʻlga qoʻyish boʻyicha

“YOʻL XARITASI”

Oʻzbekiston Respublikasi Prezidentining 2026-yil 11-fevraldagi PQ-59-son qaroriga 5-ILOVA

Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2022-yil 25-iyuldagi “Investitsiyaviy va infratuzilmaviy loyihalarning loyihaoldi, davlat xaridiga doir tender boʻyicha xarid qilish hujjatlari va texnik topshiriqlar hamda shartnomalarni ekspertizadan oʻtkazish tartibini yanada takomillashtirish chora-tadbirlari toʻgʻrisida”gi PQ-332-son qaroriga 1-ilovaning 2-bandi “g” kichik bandi quyidagi tahrirda bayon etilsin:

“g) moliyalashtirish manbaidan qatʼi nazar, strategik foydali qazilmalarni qazib olish va/yoki qayta ishlashni koʻzda tutuvchi loyihalar (oltin izlovchilar usulida qazib olishdan tashqari, hamda ushbu Nizomning 3-bandi “b” kichik bandida koʻrsatilgan loyihalar bundan mustasno), shuningdek, qiymati 10 million AQSH dollari ekvivalentidan ortiq boʻlgan davlat-xususiy sheriklik (DXSH) asosida amalga oshiriladigan loyihalar. Bunda xususiy tadbirkorlik subyektlari tomonidan va mahsulotni taqsimlash toʻgʻrisidagi bitimlar (MTTB), davlat-xususiy sheriklik (DXSH) asosida amalga oshirilayotgan loyihalarning loyihaoldi hujjatlari vakolatli organlarning tarmoq ilmiy-texnik kengashidan tegishli xulosalar olingandan soʻng ular boʻyicha tuzilgan bitim shartlari asosida texnik-texnologik va arxitektura-qurilish yechimlari hamda loyihaning moliyaviy-iqtisodiy samaradorligi va moliyalashtirish manbalarining mavjudligi yuzasidan ekspertiza qilinadi”.

2. Oʻzbekiston Respublikasi Prezidentining 2024-yil 26-fevraldagi “Mamlakatimizda raqamlashtirish sohasidagi xizmatlar eksportini rivojlantirishga doir qoʻshimcha chora-tadbirlar toʻgʻrisida”gi PQ-87-son qarorining 9-bandi “a” kichik bandida:

(a) birinchi xatboshidagi “IT-park vakolatxonasi (filiali) faoliyatini” soʻzlaridan keyin “alohida yuridik shaxs sifatida” soʻzlari bilan toʻldirilsin;

(b) ikkinchi xatboshi quyidagi tahrirda bayon etilsin:

“Bunda IT-park direksiyasiga xorijiy mamlakatlarda alohida yuridik shaxs sifatida tashkil etilgan vakolatxonalar (filiallar) faoliyatini yoʻlga qoʻyish uchun 2027-yil 1-yanvarga qadar har bir vakolatxona (filial)ga yiliga 500 ming AQSH dollari ekvivalentigacha moliyalashtirish uchun mablagʻ yoʻnaltirishga ruxsat berish”.

3. Oʻzbekiston Respublikasi Prezidentining 2024-yil 14-oktabrdagi “Startap loyihalar va venchur moliyalashtirish ekotizimini yanada rivojlantirish chora-tadbirlari toʻgʻrisida”gi PQ-357-son qarorida:

(a) 2-bandning “a” kichik bandi quyidagi tahrirda bayon etilsin:

“a) quyidagi talablarga mos keluvchi startap loyihalar:

faoliyat davomiyligi — 5 yilgacha;

kalendar yilida jami daromadi — 10 milliard soʻmdan oshmagan;

raqamli texnologiyalarga asoslangan, yuqori oʻsish va xorijiy bozorlarga chiqish salohiyati boʻlgan biznes modelga ega;

startap loyihalar ekotizimi platformasida roʻyxatdan oʻtgan”;

(b) 11-band hamda 2-ilova oʻz kuchini yoʻqotgan deb hisoblansin.

4. Oʻzbekiston Respublikasi Prezidentining 2025-yil 14-fevraldagi “Yoshlar tadbirkorligini hamda ularning bandligini taʼminlashga qaratilgan biznes loyihalarni qoʻllab-quvvatlash tizimini takomillashtirish chora-tadbirlari toʻgʻrisida”gi PQ-60-son qarorida:

(a) 4-band “20 nafar tadbirkordan” soʻzlaridan keyin “va ekspertlardan” soʻzlari bilan toʻldirilsin;

(b) 11-band quyidagi tahrirda bayon etilsin:

“11. Belgilansinki:

a) inkubatsiya yoki akseleratsiya dasturini muvaffaqiyatli yakunlagan yoki startap loyihalarni qoʻllab-quvvatlash uchun oʻtkazilgan nufuzli tanlovlarda gʻolib (sovrindor) boʻlgan yoxud boshqa venchur jamgʻarmalaridan investitsiya jalb qilgan startap loyihalarga quyidagi yoʻnalishlar boʻyicha venchur jamgʻarma tomonidan 5 milliard soʻmgacha investitsiya ajratiladi:

istiqbolda muvaffaqiyatga erishish salohiyati yuqori boʻlgan namunaviy modelni (MVP) ishlab chiqish jarayonidagi startap loyihaga — 500 million soʻmgacha;

Oʻzbekiston bozorida muvaffaqiyatli joriy qilingan startap loyihaga — 2 milliard soʻmgacha;

xorijiy bozorga chiqish imkoniyatiga ega boʻlgan startap loyihaga — 5 milliard soʻmgacha;

b) Jamgʻarma tomonidan quyidagi xarajatlarni qoplash uchun subsidiya ajratiladi:

istiqbolda muvaffaqiyatga erishish salohiyati yuqori boʻlgan startap gʻoyaning namunaviy modelini (MVP) yaratish darajasiga olib chiqish uchun xorijiy va mahalliy ekspertlar, mentorlar va trenerlarni jalb qilish bilan bogʻliq xarajatlarning 50 foizigacha, biroq 100 million soʻmdan oshmagan miqdorda;

startap loyihalar boʻyicha oʻrnatilgan tartibda tasdiqlangan yoʻnalishlardagi oʻquv kurslarida oʻqish va sertifikat olish hamda nufuzli akseleratsiya va inkubatsiya dasturlarida ishtirok etish bilan bogʻliq xarajatlarning 50 foizigacha boʻlgan, biroq 20 ming AQSH dollari ekvivalentidan oshmagan miqdorda;

patentlash hamda intellektual faoliyat natijalari va savdo belgilarini roʻyxatdan oʻtkazish”;

(v) 12-bandning uchinchi xatboshisi “(konsultantlar)ni” soʻzidan keyin “hamda mutaxassislarni” soʻzlari bilan toʻldirilsin;

(g) 1-ilova quyidagi mazmundagi oʻninchi xatboshi bilan toʻldirilsin:

“Oʻzbekistonda faoliyat yuritayotgan kichik va oʻrta tadbirkorlik subyektlarini tizimli rivojlantirish, ularni yirik biznes darajasigacha olib chiqish, milliy brendlarni xalqaro bozorlarga olib chiqish maqsadida “BIZCOMBINATOR” loyihasini amalga oshirish”;

(d) 3-ilovaning matni quyidagi tahrirda bayon etilsin:

“Yoshlar tadbirkorligini hamda ularning bandligini taʼminlashga qaratilgan biznes loyihalarni qoʻllab-quvvatlash instrumentlari

ROʻYXATI

Izoh:

* 1 — 4-bandlardagi instrumentlar boʻyicha ajratilgan kredit mablagʻlari maqsadsiz ishlatilganligi aniqlanganda ushbu mablagʻlarga nisbatan tijoriy foiz stavkalari tatbiq etiladi va tijorat banki tomonidan muddatidan oldin tadbirkorlik subyektidan undirish choralari koʻriladi. Bunda mazkur shartlar kredit shartnomasida nazarda tutiladi va kredit boʻyicha foiz toʻlovlari toʻlanganligi holatidan qatʼi nazar tijoriy foiz stavkalari asosida qayta hisob-kitob qilinadi.

** Tadbirkorlik loyihasi — sanoat, xizmatlar, savdo va umumiy ovqatlanish, turizm, hunarmandchilik, kasanachilik, zargarlik, qishloq xoʻjaligi mahsulotlarini yetishtirish, saqlash hamda qayta ishlash, shuningdek, zamonaviy savdo markazlari hamda ularga tutash hududlarda ishlab chiqarish binolari (angar va sexlar)ni qurish yoʻnalishlarida tadbirkorlik faoliyatini tashkil qilish va kengaytirish (modernizatsiya qilish).

*** Jamgʻarma tomonidan uning resurslari hisobidan qarz ajratish 2025-2026-yillarda tajriba-sinov tariqasida amalga oshiriladi hamda uni moliyalashtirish uchun 30 mlrd soʻm yoʻnaltiriladi. Mazkur instrument orqali loyihalarni moliyalashtirish alohida hisob-varaq orqali amalga oshirilib, undan qaytgan mablagʻlar belgilangan tartibga muvofiq yangi loyihalarga ajratiladi”.

5. Vazirlar Mahkamasining 2019-yil 15-iyuldagi 589-son qarori bilan tasdiqlangan Dasturiy mahsulotlar va axborot texnologiyalari texnologik parki faoliyatini tashkil etish tartibi toʻgʻrisidagi nizomda:

(a) 9-bandning “d” kichik bandi oʻz kuchini yoʻqotgan deb hisoblansin;

(b) quyidagi mazmundagi 91-band bilan toʻldirilsin:

“91. “Raqamli startaplar” dasturi ishtirokchisi boʻlgan startap loyihalarga ushbu nizomning 9-bandida belgilangan talablarsiz Texnopark rezidenti maqomi toʻgʻridan-toʻgʻri beriladi”;

(v) 18-bandda:

beshinchi xatboshi quyidagi mazmundagi jumla bilan toʻldirilsin:

“Bunda “Raqamli startaplar” dasturi ishtirokchisi boʻlish orqali rezident boʻlgan startap loyihalarga jami daromadidan oʻtkaziladigan ajratmalar miqdori qatʼiy bir foiz etib belgilanadi”;

oʻn birinchi xatboshi quyidagi tahrirda bayon etilsin:

“axborot texnologiyalari sohasida tashkil etiladigan taʼlim xizmati doirasida xorijiy tillarni oʻqitish xizmatidan tushgan mablagʻlar hajmi axborot texnologiyalari sohasidagi taʼlimdan yillik umumiy daromadning 40 foizidan oshmasligini taʼminlashi shart”;

(g) 21-bandda:

oʻninchi xatboshi quyidagi tahrirda bayon etilsin:

“axborot texnologiyalari sohasida tashkil etiladigan taʼlim xizmati doirasida xorijiy tillarni oʻqitish xizmatidan tushgan mablagʻlar hajmi axborot texnologiyalari sohasidagi taʼlimdan yillik umumiy daromadning 40 foizidan oshganda”;

oʻn birinchi xatboshi quyidagi tahrirda bayon etilsin:

“Raqamli startaplar” dasturi ishtirokchisi maqomi bekor qilinganda;

(d) Nizomga 2-ilovada:

17-band quyidagi tahrirda bayon etilsin:

“17. Axborot texnologiyalari sohasida, shu jumladan, Internet jahon axborot tarmogʻi orqali taʼlim berish hamda axborot texnologiyalari sohasidagi taʼlimdan yillik umumiy daromadning 40 foizidan oshmagan holda axborot texnologiyalari sohasida tashkil etiladigan taʼlim doirasida xorijiy tillarni oʻqitish boʻyicha xizmat koʻrsatish faoliyati”;

quyidagi mazmundagi 24 — 29-bandlar bilan toʻldirilsin:

“24. Internet jahon axborot tarmogʻi orqali axborot xizmatlarini (biznes-jarayonlari autsorsingi) eksport qilish faoliyati doirasida, ushbu xizmatdan yillik umumiy daromadining 40 foizidan oshmagan holda, biznes-jarayonlar autsorsingi yoʻnalishi boʻyicha taʼlim faoliyatini amalga oshirish.

25. Internet jahon axborot tarmogʻi orqali bilim jarayonlari autsorsingi (Knowledge Proccess Outsourcing) xizmatlarini xorijiy davlatlarga eksport qilish.

26. Maʼlumotlarni saqlash va ishlov berish qurilmalari uchun infratuzilmani ijaraga berish (co-location) xizmatini koʻrsatish va maʼlumotlarni qayta ishlash markazi faoliyati.

27. Ilmiy-tadqiqot va tajriba-konstruktorlik faoliyati (R&D).

28. Aerokosmik texnologiyalar faoliyati.

29. “Raqamli startaplar” dasturi ishtirokchisi boʻlgan startap loyihalar”.