Raqamli markirovkalangan tovarlarning harakatini kuzatib borish tizimini takomillashtirishga qaratilgan qoʻshimcha chora-tadbirlar toʻgʻrisida (56-son)

11.02.2026

Oʻzbekiston Respublikasi Vazirlar Mahkamasining

qarori

Tovarlarning harakati ustidan davlat nazorati samaradorligini oshirish, yashirin iqtisodiyotni yanada qisqartirish hamda mahsulotlarning noqonuniy aylanmasiga yoʻl qoʻymaslik, shuningdek, tovarlarni raqamli identifikatsiya qilish sohasida xalqaro hamkorlikni yanada rivojlantirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Majburiy raqamli markirovkalash tizimi samaradorligini oshirishga qaratilgan qoʻshimcha chora-tadbirlar toʻgʻrisida” 2025-yil 23-maydagi PQ-190-son qaroriga muvofiq quyidagilar:

xavfni tahlil qilish tizimida majburiy raqamli markirovkalash qoidalarini buzish holatlari soliq xavfi darajasini yuqori deb baholash uchun asos boʻlishi;

majburiy raqamli markirovkalanadigan mahsulotlarni realizatsiya qilishda markirovka kodi biriktirilmagan elektron hisobvaraq-fakturani rasmiylashtirishga yoʻl qoʻyilmasligi;

markirovka kodi kiritilgandan soʻng onlayi nazorat-kassa texnikasining kassa cheki shakllantirilishi;

avval foydalanilgan markirovka kodlari kiritilganda, onlayn nazorat-kassa texnikasining kassa cheki shakllanishiga yoʻl qoʻyilmasligi maʼlumot uchun qabul qilinsin.

2. Oʻzbekiston Respublikasi Soliq qoʻmitasining (keyingi oʻrinlarda — Soliq qoʻmitasi) 2026-yil 1-iyundan boshlab Oʻzbekiston Respublikasi va hamkor davlatlar oʻrtasida suv hamda salqin ichimliklarga nisbatan raqamli markirovka kodlarini oʻzaro tan olishni joriy etish toʻgʻrisidagi taklifi maʼqullansin.

3. Belgilansinki, Soliq qoʻmitasi hamkor davlatlarning raqamli markirovka kodlarini Oʻzbekiston Respublikasi hududida tan olish boʻyicha vakolatli organ hisoblanadi.

4. Soliq qoʻmitasi:

2026-yil 1-aprelga qadar raqamli markirovka kodlari maʼlumotlari boʻyicha axborot almashishga qoʻyiladigan talablarni belgilasin hamda ularning xavfsizligini taʼminlasin. Bunda ushbu talablar raqamli markirovka kodlarini oʻzaro tan olish va tovarlarning harakatini kuzatib borishda ishtirok etuvchi barcha davlat organlari va tashkilotlari uchun majburiy hisoblanadi;

bir oy muddatda Oʻzbekiston Respublikasi hududida oʻzaro tan olingan xorijiy davlatlarning raqamli markirovka kodlarini elektron hisobvaraq-faktura hamda onlayn nazorat-kassa texnikasining kassa cheklarida aks ettirish imkoniyatini yaratsin;

har yili 15-yanvarga qadar raqamli markirovkani oʻzaro tan olish borasida amalga oshirilayotgan ishlar jarayoni va uning natijalari toʻgʻrisida Vazirlar Mahkamasiga hisobot taqdim etib borsin.

5. Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi:

Oʻzbekiston Respublikasi bojxona chegarasi orqali olib oʻtiladigan majburiy raqamli markirovkalanishi lozim boʻlgan tovarlarda raqamli markirovka kodlari mavjudligi nazorat qilinishini;

tovarlarning noqonuniy aylanishining oldini olish maqsadida hamkor davlatlarning bojxona organlari bilan maʼlumot almashish yoʻlga qoʻyilishini taʼminlansin.

6. Shunday tartib oʻrnatilsinki, unga muvofiq:

“Asl belgisi” mahsulotlarni markirovkalash va kuzatib borish milliy axborot tizimi operatori raqamli markirovka maʼlumotlarini qabul qilish, qayta ishlash, saqlash va himoya qilishni taʼminlaydi;

Oʻzbekiston Respublikasi hududida shakllantiriladigan va muomalada boʻladigan raqamli markirovka maʼlumotlari Oʻzbekiston Respublikasi hududida joylashgan data-markazlar doirasida saqlanishi va qayta ishlanishi shart;

tovarlarning raqamli markirovkasi toʻgʻrisidagi maʼlumotlar xorijiy davlat organlari va boshqa tashkilotlarga xalqaro shartnomalar asosida hamda axborot xavfsizligi talablariga rioya etilgan holda uzatiladi;

Oʻzbekiston Respublikasi hududida majburiy raqamli markirovkalanishi lozim boʻlgan tovarlarni erkin muomalaga chiqarishga faqat “Asl belgisi” mahsulotlarni markirovkalash va kuzatib borish milliy axborot tizimida ularga tatbiq etilgan raqamli identifikatsiya vositalarining haqiqiyligi tasdiqlangandan soʻng yoʻl qoʻyiladi.

7. Manfaatdor vazirlik va idoralar tomonidan ushbu qarorni amalga oshirish doirasida Oʻzbekiston Respublikasining xalqaro majburiyatlarini bajarish maqsadida hamkor davlatlarning vakolatli organlari bilan oʻzaro hamkorlikni taʼminlansin.

8. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda Soliq qoʻmitasi raisi F.J. Pulatov zimmasiga yuklansin.

Oʻzbekiston Respublikasi Vazirlar Mahkamasi. Bosh vazir A. ARIPOV

Toshkent sh.,

2026-yil 11-fevral,

56-son