Maktabgacha taʼlim va tarbiya tizimini yanada takomillashtirish chora-tadbirlari toʻgʻrisida (PF-19-son)

05.02.2026

OʻZBEKISTON RESPUBLIKASI PREZIDENTINING

FARMONI

Maktabgacha taʼlim va tarbiya tizimini ilgʻor xorijiy tajribalar asosida takomillashtirish, innovatsion maktabgacha taʼlim tashkilotlari tarmogʻini tashkil etish, nodavlat maktabgacha taʼlim tashkilotlari faoliyatini qoʻllab-quvvatlash, pedagog kadrlar salohiyatini oshirish, shuningdek, bolalarni oʻyinga yoʻnaltirilgan taʼlim asosida milliy gʻurur va Vatanga muhabbat ruhida tarbiyalash maqsadida qaror qilaman:

I. Maqsadlar

1. Quyidagilar maktabgacha taʼlim va tarbiya tizimini takomillashtirishning asosiy maqsadlari etib belgilansin:

(a) maktabgacha yoshdagi bolalarning intellektual, maʼnaviy-axloqiy, ijodiy, jismoniy va har tomonlama yetuk shaxs boʻlib rivojlanishi uchun zarur shart-sharoitlar yaratish;

(b) taʼlim-tarbiya jarayonini ilgʻor tajribalarga muvofiq innovatsion texnologiyalar asosida tashkil etish;

(v) sohaga xususiy sektorni keng jalb qilishni yanada qoʻllab-quvvatlash va nodavlat maktabgacha taʼlim tashkilotlari tarmogʻini kengaytirish uchun qoʻshimcha ragʻbatlantirish mexanizmlarini joriy etish.

II. Maktabgacha taʼlim va tarbiya tizimini takomillashtirish

2. Maktabgacha va maktab taʼlimi vazirligining:

(a) bir yillik maktabga tayyorlov guruhlarining taʼlim dasturini majburiy umumiy oʻrta taʼlimning dastlabki bosqichi sifatida kiritish;

(b) maktabgacha taʼlim tizimida bolalarni tarbiyalash, rivojlantirish va ularga taʼlim berishni ijobiy munosabatlar orqali amalga oshirish maqsadida oʻyinga asoslangan taʼlimni joriy etish;

(v) maktabgacha taʼlim va tarbiya tizimini yangi sifat bosqichiga olib chiqishga qaratilgan va Bolalarni rivojlantirish innovatsion markazini oʻz ichiga olgan “Yangi avlod” maktabgacha taʼlim tashkilotlari tarmogʻini tashkil etish toʻgʻrisidagi takliflari maʼqullansin.

3. Belgilansinki:

(a) bir yillik maktabga tayyorlov guruhlarining taʼlim dasturlari maktabgacha taʼlim tashkilotlari, umumiy oʻrta taʼlim maktablari va boshqa ijtimoiy soha obyektlarida toʻliq yoki qisqa muddatli guruhlarda amalga oshiriladi;

(b) maktabgacha va umumiy oʻrta taʼlim xizmatlarini koʻrsatuvchi nodavlat taʼlim tashkilotlariga bir yillik maktabga tayyorlov guruhlarini tashkil etishga ruxsat beriladi;

(v) 2027/2028 oʻquv yilidan boshlab:

(i) maktabga tayyorlov guruhlarida taʼlim jarayonlari oliy maʼlumotli pedagoglar, shuningdek, oliy taʼlim tashkilotlarining bitiruvchi bosqich talabalari tomonidan olib boriladi;

(ii) maktabga tayyorlov guruhlarida taʼlim-tarbiya olgan bolalarga bir yillik maktabga tayyorlovdan oʻtganlik toʻgʻrisida davlat namunasidagi elektron sertifikat beriladi hamda ushbu maʼlumotlar umumiy oʻrta taʼlim toʻgʻrisidagi shahodatnomada qayd etiladi.

4. Maktabgacha va maktab taʼlimi vazirligi 2027/2028 oʻquv yiliga qadar bir yillik maktabga tayyorlov guruhlarining taʼlim dasturi majburiy umumiy oʻrta taʼlimning dastlabki bosqichi sifatida kiritilishini inobatga olgan holda uning qayta koʻrib chiqilishini taʼminlasin.

5. Belgilab qoʻyilsinki, “Yangi avlod” maktabgacha taʼlim tashkilotlari:

(a) 2026 — 2028-yillarda Qoraqalpogʻiston Respublikasi, viloyatlar markazlari va Toshkent shahrida bittadan tashkil etiladi;

(b) davlat maktabgacha taʼlim tashkiloti sifatida faoliyat olib boradi hamda ilgʻor xorijiy tajribalar asosida oʻyinga asoslangan taʼlim va tarbiya jarayonlarini amalga oshiradi;

(v) rahbar va pedagog xodimlari, jismoniy tarbiya yoʻriqchisi, musiqa rahbarlari, psixolog, tarbiyachi yordamchilarining tarif stavkasiga nisbatan 20 foiz miqdorida Davlat budjetidan har oylik qoʻshimcha ustama joriy etiladi. Bunda maʼmuriy-boshqaruv va pedagog xodimlar lavozimiga qabul qilish oliy maʼlumotli, yuqori salohiyatli nomzodlar orasidan tanlov asosida amalga oshiriladi;

(g) Bolalarni rivojlantirish innovatsion markazlarida:

(i) bolalarning yoshi va rivojlanish bosqichlariga mos ravishda ijod va sanʼat, fan va matematika, jismoniy faollik va sarguzasht, til va tasavvur hamda robototexnika va ilk algoritmlash yoʻnalishlarida tematik oʻyingohlar tashkil etiladi;

(ii) simulyatsion vaziyatlar orqali bolalarda kasblarga qiziqish uygʻotish, ekologik madaniyatni shakllantirish kabi yoʻnalishlar boʻyicha taʼlim-tarbiya jarayoni amalga oshiriladi;

(iii) sohaviy oliygoh, malaka oshirish va ilmiy-tadqiqot muassasalari bilan birgalikda ilgʻor pedagogik texnologiyalarni ishlab chiqish yuzasidan tadqiqotlar olib boriladi, ularning natijalarini pedagoglar va ota-onalar oʻrtasida ommalashtirish boʻyicha choralar koʻriladi.

6. Belgilansinki, “Yangi avlod” maktabgacha taʼlim tashkilotiga qoʻshimcha ravishda Davlat budjeti mablagʻlari hisobidan quyidagi lavozimlar kiritiladi:

(a) har bir “Yangi avlod” maktabgacha taʼlim tashkilotiga 1 ta shtat birligidan Bolalarni rivojlantirish innovatsion markazi faoliyatini muvofiqlashtirish boʻyicha direktor oʻrinbosari;

(b) har bir tematik oʻyingoh uchun 1 ta shtat birligidan iborat tarbiyachi-yoʻriqchi.

7. Qurilish va uy-joy kommunal xoʻjaligi vazirligi Maktabgacha va maktab taʼlimi vazirligi bilan kelishgan holda 2026-yil 1-iyulga qadar quyidagilarni ishlab chiqsin:

(a) 120 oʻringa moʻljallangan “Yangi avlod” maktabgacha taʼlim tashkilotining namunaviy loyihalarini;

(b) maktabgacha taʼlim tashkiloti va umumiy oʻrta taʼlim tashkiloti bir hududda joylashishini nazarda tutuvchi namunaviy loyihani.

8. Belgilansinki, 2026/2027 oʻquv yilidan boshlab:

(a) pedagogika oliy taʼlim tashkilotlarida maktabgacha va boshlangʻich taʼlim yoʻnalishi boʻyicha bakalavrlarni tayyorlash xalqaro ilgʻor tajribalarga mos ravishda takomillashtirilgan taʼlim dasturlari asosida amalga oshiriladi;

(b) Maktabgacha va maktab taʼlimi vazirligi hamda Oliy taʼlim, fan va innovatsiyalar vazirligi tomonidan davlat va nodavlat maktabgacha taʼlim tashkilotlarida faoliyat yuritayotgan oʻrta maxsus maʼlumotli pedagog kadrlar uchun tegishli oliy taʼlim tashkilotlarida dual taʼlim shaklida (bir kun pedagogika oliy taʼlim tashkilotida, besh kun maktabgacha taʼlim tashkilotida) maktabgacha taʼlim yoʻnalishida toʻlov-shartnoma asosida bakalavrlar tayyorlash yoʻlga qoʻyiladi. Bunda taʼlim jarayonlarini tashkil etishda talabalarning maktabgacha taʼlim tashkilotlaridagi amaliy faoliyatini metodik taʼminlash, muvofiqlashtirish va baholash mexanizmlari joriy etiladi;

(v) yangi tashkil etilgan davlat maktabgacha taʼlim tashkilotlariga, birinchi navbatda, oliy maʼlumotli tarbiyachilar ishga qabul qilinadi. Bunda belgilangan tartibda tasdiqlanadigan nizomga muvofiq tarbiyachilar tanlov asosida saralab olinadi.

III. Nodavlat maktabgacha taʼlim tashkilotlari tarmogʻini kengaytirish

9. Shunday tartib oʻrnatilsinki, unga muvofiq 2026-yil 1-apreldan boshlab maktabgacha taʼlim qamrovi 80 foizdan past boʻlgan tuman (shahar)lardagi (Toshkent shahri bundan mustasno) tadbirkorlik subyektlari uchun quyidagi imtiyozlar joriy etiladi:

(a) maktabgacha taʼlim tashkilotlari va umumiy oʻrta taʼlim tashkilotlarining (koʻp tarmoqli ixtisoslashtirilgan va qoʻshma turdagi maktabgacha taʼlim tashkilotlari, alohida taʼlim ehtiyojlari boʻlgan bolalar uchun ixtisoslashtirilgan maktablar va maktab-internatlar bundan mustasno) boʻsh yer maydonlarida davlat-xususiy sheriklik shartlari asosida quyidagi qoʻshimcha imtiyoz va shartlarda maktabgacha taʼlim tashkilotlarini tashkil etishga ruxsat beriladi:

(i) ijara toʻlovlari 30 yil muddat davomida undirilmaydi va ushbu muddat tugagandan soʻng mazkur maktabgacha taʼlim tashkiloti davlat balansiga topshiriladi;

(ii) har bir bola uchun 9 soatlik ish rejimidagi davlat maktabgacha taʼlim tashkilotlarining bir nafar tarbiyalanuvchisiga sarflanadigan xarajatning 50 foizi miqdorida elektron davomat asosida davlat-xususiy sheriklik bitimi amal qilish muddati davomida subsidiya beriladi. Bunda mazkur imtiyoz Oʻzbekiston Respublikasining “Davlat-xususiy sheriklik toʻgʻrisida”gi Qonuniga muvofiq bolalarni maktabgacha taʼlim bilan qamrab olish darajasi 80 foizdan past boʻlgan tuman (shahar)larda 2024-yildan boshlab tashkil etilayotgan nodavlat maktabgacha taʼlim tashkilotlariga ham tatbiq etiladi;

(iii) har bir bola uchun 9 soatlik ish rejimidagi davlat maktabgacha taʼlim tashkilotlarining bir nafar tarbiyalanuvchisiga sarflanadigan xarajatning 50 foizi miqdori har yili Maktabgacha va maktab taʼlimi vazirligi hamda Iqtisodiyot va moliya vazirligi tomonidan tasdiqlanadi;

(b) ushbu tuman (shahar)lardagi maktabgacha taʼlim tashkilotlari va umumiy oʻrta taʼlim tashkilotlarining boʻsh yer maydonlaridan boshqa joylarda quvvati 150 oʻrindan kam boʻlmagan nodavlat maktabgacha taʼlim tashkilotlarini tashkil etadigan tadbirkorlik subyektlariga:

(i) 7 yilgacha muddatga yillik Markaziy bank asosiy stavkasidan 4 foizlik punkt yuqori stavkada 5 milliard soʻmgacha kredit mablagʻlari maktabgacha taʼlim tashkilotini 18 oygacha boʻlgan muddat ichida qurish sharti bilan beriladi;

(ii) yer uchastkasidan ruxsat etilgan foydalanish turini oʻzgartirmaslik sharti bilan yer uchastkalari belgilangan tartibda auksion orqali ajratiladi. Bunda Qoraqalpogʻiston Respublikasi Vazirlar Kengashi va viloyatlar hokimliklari tomonidan har yili 1-aprelga qadar demografik oʻsish, aholi joylashuvi va zichligini inobatga olgan holda maqbul yer uchastkalari roʻyxati eʼlon qilib boriladi;

(iii) nodavlat maktabgacha taʼlim tashkiloti faoliyati yoʻlga qoʻyilgandan soʻng tarbiyachilarga oylik ish haqi toʻlash xarajatlari davlat maktabgacha taʼlim tashkilotlaridagi tarbiyachilar uchun belgilangan miqdorda uch yil davomida elektron davomat asosida Davlat budjeti mablagʻlari hisobidan qoplab beriladi. Bunda har 30 nafar tarbiyalanuvchi uchun bir shtat birligi miqdorida tarbiyachi hisobga olinadi;

(iv) mazkur bandning “b” kichik bandidagi imtiyozlar davlat-xususiy sheriklik asosida tashkil etiladigan maktabgacha taʼlim tashkilotlariga nisbatan tatbiq etilmaydi.

10. Belgilab qoʻyilsinki:

(a) maktabgacha taʼlim qamrovi 80 foizdan past boʻlgan tuman (shahar)lar roʻyxati Maktabgacha va maktab taʼlimi vazirligi tomonidan belgilangan tartibda tasdiqlanadi hamda ushbu roʻyxat har moliyaviy yil uchun yangilab boriladi. Bunda roʻyxat Oʻzbekiston Respublikasi Milliy statistika qoʻmitasi tomonidan taqdim etilgan 3 — 7 yoshli bolalarning umumiy soni toʻgʻrisidagi maʼlumotlarga asoslangan holda shakllantiriladi va ushbu maʼlumotlar haqqoniyligiga mazkur qoʻmita javobgar hisoblanadi;

(b) mazkur Farmonning 9-bandi “b” kichik bandi “i” va “iii” xatboshilaridagi imtiyozlar 2026-yil 1-apreldan boshlab respublikaning barcha hududlarida quriladigan yangi koʻp kvartirali uylarning birinchi qavatida maktabgacha taʼlim tashkilotlarini tashkil etadigan tadbirkorlarga ham tatbiq etiladi;

(v) Qoraqalpogʻiston Respublikasi Vazirlar Kengashi Raisi hamda viloyat hokimlari mazkur Farmonning 9-bandi “b” kichik bandi “ii” xatboshisining sifatli ijrosini taʼminlashga shaxsan masʼul va javobgar hisoblanadi.

11. Iqtisodiyot va moliya vazirligi Soliq qoʻmitasi hamda Maktabgacha va maktab taʼlimi vazirligi bilan birgalikda ikki oy muddatda quyidagilar yuzasidan Soliq kodeksiga oʻzgartirish va qoʻshimchalar kiritishni nazarda tutuvchi qonun loyihasini Vazirlar Mahkamasiga kiritsin:

(a) maktabgacha taʼlim qamrovi 80 foizdan past boʻlgan tuman (shahar)lardagi (Toshkent shahri hamda viloyatlar markazlari bundan mustasno) maktabgacha taʼlim tashkilotlari va umumiy oʻrta taʼlim tashkilotlarining boʻsh yer maydonlaridan boshqa joylarda quvvati 150 oʻrindan kam boʻlmagan nodavlat maktabgacha taʼlim tashkilotini tashkil etadigan (davlat-xususiy sheriklik asosida tashkil etiladigan maktabgacha taʼlim tashkilotlari bundan mustasno) tadbirkorlik subyektlariga 2030-yil 1-yanvarga qadar ijtimoiy soliq stavkasini nodavlat maktabgacha taʼlim tashkiloti litsenziya olgandan keyin uch yil davomida:

(i) maktabgacha taʼlim qamrovi 70 — 80 foiz oraligʻida boʻlgan tuman (shahar)lardagi tadbirkorlik subyektlariga — 5 foiz etib;

(ii) maktabgacha taʼlim qamrovi 70 foizdan past boʻlgan tuman (shahar)lardagi tadbirkorlik subyektlariga — 1 foiz etib belgilash;

(iii) bolalarni maktabgacha taʼlim bilan qamrab olish darajasi 80 foizdan past boʻlgan tuman (shahar)larda nodavlat maktabgacha taʼlim tashkilotlarini tashkil etgan tadbirkorlik subyektlarining amalda faoliyat koʻrsatayotgan nodavlat maktabgacha taʼlim tashkilotlari uchun mazkur imtiyozni mos ravishda tatbiq etish;

(b) 2026-yil 1-apreldan boshlab respublikaning barcha hududlarida quriladigan yangi koʻp kvartirali uylarning birinchi qavatida nodavlat maktabgacha taʼlim tashkilotlarini tashkil etadigan (davlat-xususiy sheriklik asosida tashkil etiladigan maktabgacha taʼlim tashkilotlari bundan mustasno) tadbirkorlik subyektlariga 2030-yil 1-yanvarga qadar ijtimoiy soliq stavkasini nodavlat maktabgacha taʼlim tashkiloti litsenziya olgandan keyin uch yil davomida 5 foiz etib belgilash va ushbu imtiyozni faqat koʻp kvartirali uylarning birinchi qavatida tashkil etiladigan maktabgacha taʼlim tashkilotlariga nisbatan qoʻllash.

12. Quyidagilar:

(a) Maktabgacha taʼlim sifati va samaradorligini oshirish boʻyicha chora-tadbirlar dasturi 1-ilovaga muvofiq;

(b) 2026 — 2028-yillarda “Yangi avlod” maktabgacha taʼlim tashkilotlarini qurish dasturi 2-ilovaga muvofiq;

(v) Hududiy pedagogik mahorat markazlari balansidagi sobiq pedagogika kollejlari negizida tashkil etiladigan va qoʻshimcha oʻrin yaratiladigan taʼlim tashkilotlari roʻyxati 3-ilovaga muvofiq tasdiqlansin.

13. Qoraqalpogʻiston Respublikasi Vazirlar Kengashi va viloyatlar hokimliklari Maktabgacha va maktab taʼlimi vazirligi bilan birgalikda 2026/2027 oʻquv yilidan boshlab mazkur Farmonga 3-ilovada belgilangan umumiy oʻrta taʼlim maktabi, ixtisoslashtirilgan maktab va davlat maktabgacha taʼlim tashkilotlari faoliyatini yoʻlga qoʻysin.

14. Shunday tartib oʻrnatilsinki, unga muvofiq:

(a) 2027-yildan boshlab Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturlari doirasida:

(i) maktabgacha taʼlim qamrovini oshirish maqsadida har yili 5 ming oʻrindan kam boʻlmagan qoʻshimcha quvvat yaratish nazarda tutiladi;

(ii) “Yangi avlod” maktabgacha taʼlim tashkilotlari binolarini qurish, jihozlash va hududlarini obodonlashtirish ishlari nazarda tutiladi;

(b) mazkur Farmonda belgilangan tadbirlar xarajatlari 2026-yilda Maktabgacha va maktab taʼlimi vazirligiga ajratilgan budjet mablagʻlari doirasida amalga oshiriladi, 2027-yildan boshlab Davlat budjeti parametrlarida nazarda tutiladi.

15. Belgilansinki, 2030-yilga qadar maktabgacha taʼlim sohasida qoʻshimcha quvvatlarni yaratish, shu jumladan, nodavlat maktabgacha taʼlim tashkilotlarini qoʻllab-quvvatlash maqsadida davlat-xususiy sheriklik asosida imtiyozli kredit resurslari va subsidiyalar ajratish uchun budjet mablagʻlari hisobidan 200 million AQSH dollarigacha boʻlgan ekvivalentdagi mablagʻlar yoʻnaltiriladi.

16. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari 2026-yildan boshlab mahalliy budjet mablagʻlari doirasida maktabgacha taʼlim tashkilotlarining yordamchi binolarini (yozgi ayvoncha, oshxona, hojatxona va atrofini oʻrash) qurish, rekonstruksiya qilish va taʼmirlash boʻyicha har yillik hududiy dastur ishlab chiqib tasdiqlasin hamda ijrosini taʼminlasin.

IV. Farmon ijrosini tashkil etish, taʼminlash va nazorat

17. Maktabgacha va maktab taʼlimi vazirligi hamda Iqtisodiyot va moliya vazirligi 2026-yildan boshlab har yili 1-dekabrga qadar mazkur Farmonda nazarda tutilgan moliyaviy qoʻllab-quvvatlash boʻyicha amalga oshirilgan ishlar samaradorligi yuzasidan oʻrganishlar oʻtkazib, Vazirlar Mahkamasiga tegishli takliflar kiritib borsin.

18. Quyidagilar:

(a) Iqtisodiyot va moliya vazirligi 2026 — 2030-yillarda nodavlat maktabgacha taʼlim tashkilotlari faoliyatini yoʻlga qoʻyish uchun Markaziy bankning asosiy stavkasidan toʻrt foizlik punkt yuqori stavkada kreditlar ajratish uchun zarur mablagʻlarni tijorat banklariga amaldagi normativ-huquqiy hujjatlarda belgilangan tartibda ajratib borish choralarini koʻrsin;

(b) Maktabgacha va maktab taʼlimi vazirligi Iqtisodiyot va moliya vazirligi bilan birgalikda uch oy muddatda ushbu Farmonning 9-bandida nazarda tutilgan imtiyozlarni taqdim etish boʻyicha normativ-huquqiy hujjat loyihasini Vazirlar Mahkamasiga kiritsin.

19. Oʻzbekiston Respublikasi Prezidentining ayrim hujjatlariga 4-ilovaga muvofiq oʻzgartirish va qoʻshimchalar kiritilsin.

20. Maktabgacha va maktab taʼlimi vazirligi manfaatdor vazirlik va idoralar bilan birgalikda uch oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

21. Mazkur Farmonning ijrosini samarali tashkil qilishga masʼul va shaxsiy javobgar etib maktabgacha va maktab taʼlimi vaziri E.G. Karimova belgilansin.

22. Farmon ijrosini muhokama qilib borish, ijro uchun masʼul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidenti Administratsiyasi rahbarining taʼlimni isloh qilish boʻyicha oʻrinbosari X.U. Umarova zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 5-fevral,

PF-19-son

Oʻzbekiston Respublikasi Prezidentining 2026-yil 5-fevraldagi PF-19-son Farmoniga 1-ILOVA

Maktabgacha taʼlim sifati va samaradorligini oshirish boʻyicha chora-tadbirlar

DASTURI

Oʻzbekiston Respublikasi Prezidentining 2026-yil 5-fevraldagi PF-19-son Farmoniga 2-ILOVA

2026 — 2028-yillarda “Yangi avlod” maktabgacha taʼlim tashkilotlarini qurish

DASTURI

Oʻzbekiston Respublikasi Prezidentining 2026-yil 5-fevraldagi PF-19-son Farmoniga 3-ILOVA

Hududiy pedagogik mahorat markazlari balansidagi sobiq pedagogika kollejlari negizida tashkil etiladigan va qoʻshimcha oʻrin yaratiladigan taʼlim tashkilotlari

ROʻYXATI

Oʻzbekiston Respublikasi Prezidentining 2026-yil 5-fevraldagi PF-19-son Farmoniga 4-ILOVA

Oʻzbekiston Respublikasi Prezidentining ayrim hujjatlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2023-yil 26-maydagi “Maktabgacha va maktab taʼlimi vazirligi hamda uning tizimidagi tashkilotlar faoliyatini samarali tashkil etish chora-tadbirlari toʻgʻrisida”gi PF-79-son Farmoniga 3-ilova “Maktabgacha taʼlim tashkilotlari” blokidan keyin “Yangi avlod” maktabgacha taʼlim tashkilotlari” bloki bilan toʻldirilsin.

2. Oʻzbekiston Respublikasi Prezidentining 2024-yil 30-sentabrdagi “Maktabgacha taʼlim sifati va samaradorligini yanada oshirish boʻyicha qoʻshimcha chora-tadbirlar toʻgʻrisida”gi PF-152-son Farmonining 7-bandida:

(a) birinchi xatboshidagi “tajriba-sinov tariqasida har bir tuman (shahar)dagi bittadan” soʻzlari “ehtiyojdan kelib chiqqan holda” soʻzlari bilan almashtirilsin;

(b) quyidagi mazmundagi ikkinchi xatboshi bilan toʻldirilsin:

“Bunda inklyuziv taʼlim guruhlarini ochish Maktabgacha va maktab taʼlimi vazirligi hamda Oʻzbekiston Respublikasi Prezidenti huzuridagi Ijtimoiy himoya milliy agentligi bilan kelishgan holda amalga oshiriladi”;

(v) ikkinchi xatboshi uchinchi xatboshi deb hisoblansin.

3. Oʻzbekiston Respublikasi Prezidentining 2025-yil 30-yanvardagi “Oʻzbekiston — 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi toʻgʻrisida”gi PF-16-son Farmoniga 15-ilovaning 18-pozitsiyasi “2025” hamda “IV chorak” ustunlaridagi “960 000” raqami “150 000” raqami bilan almashtirilsin.

4. Oʻzbekiston Respublikasi Prezidentining 2025-yil 25-noyabrdagi “Qonunchilikdagi huquqiy boʻshliqlarni bartaraf etish va tartibga solish yukini kamaytirish toʻgʻrisida”gi PF-231-son Farmoniga 5-ilovaning 1-2-pozitsiyalari “Ijro muddati” ustunidagi “2026-yil yanvar” soʻzlari “2026-yil iyun” soʻzlari bilan almashtirilsin.

5. Oʻzbekiston Respublikasi Prezidentining 2025-yil 24-dekabrdagi “2026 — 2030-yillarga moʻljallangan Bolalarni zoʻravonlikning barcha shakllaridan himoya qilish strategiyasini tasdiqlash toʻgʻrisida”gi PF-256-son Farmonida:

(a) 8-bandning “b” kichik bandi “vazirlik va idoralar” soʻzlaridan keyin “(Ixtisoslashtirilgan taʼlim muassasalari agentligi bundan mustasno)” soʻzlari bilan toʻldirilsin;

(b) 3-ilovada:

(i) 1-boʻlim quyidagi mazmundagi 311, 312 va 651-pozitsiyalar bilan toʻldirilsin:

(ii) 9-boʻlim nomidan “(Ixtisoslashtirilgan taʼlim muassasalari agentligi)” soʻzlari chiqarib tashlansin;

(iii) 200 — 202, 204, 206 — 210, 213 — 225, 227 — 237, 240, 243 — 246, 249, 254, 255, 257-pozitsiyalar chiqarib tashlansin;

(iv) izoh qismida:

2-banddan “, ixtisoslashtirilgan” soʻzi chiqarib tashlansin;

3-band oʻz kuchini yoʻqotgan deb hisoblansin;

6. Oʻzbekiston Respublikasi Prezidentining 2018-yil 5-apreldagi “Maktabgacha taʼlim tizimini yanada ragʻbatlantirish va rivojlantirish chora-tadbirlari toʻgʻrisida”gi PQ-3651-son qaroriga 1-ilovaning 93-bandi quyidagi tahrirda bayon etilsin:

“93. Xususiy sherik mulki negizida tashkil etilgan nodavlat maktabgacha taʼlim tashkilotlarini moddiy taʼminlash shaklidagi davlat-xususiy sheriklik loyihasi xususiy sherik tashabbusi bilan tanlov oʻtkazilmay va taqdim etilgan hujjatlarni oʻrganish asosida u bilan toʻgʻridan-toʻgʻri muzokaralar oʻtkazish orqali amalga oshiriladi.

Davlat-xususiy sheriklik asosidagi maktabgacha taʼlim tashkilotlarining faoliyati, shu jumladan, koʻp kvartirali uy-joylarning noturar qavatlarida va/yoki yuridik yoki jismoniy shaxslarga qarashli noturar binolarni ijaraga olish orqali ham amalga oshirilishi mumkin.

Bunda:

noturar koʻchmas mulk ijara shartnomasi soliq organlarining avtomatlashtirilgan axborot tizimida hisobga qoʻyilgan;

ijaraga olinayotgan obyekt davlat maktabgacha taʼlim tashkilotlari va umumiy oʻrta taʼlim maktabiga tegishli yer maydoni va bino-inshootlarida tashkil etilmagan boʻlishi lozim.

Bitim amal qilish davrida ijara shartnomasi bekor boʻlgan yoki ijara muddati tugagan taqdirda, Davlat budjeti mablagʻlari hisobidan ajratiladigan subsidiya vaqtincha toʻxtatiladi.

Davlat-xususiy sheriklikning mazkur shakli 75 nafardan kam boʻlmagan bola oʻrnini yaratishni nazarda tutuvchi davlat-xususiy sheriklik shartlari asosida amalga oshiriladi”.

7. Oʻzbekiston Respublikasi Prezidentining 2024-yil 30-sentabrdagi “Iqtidorli yoshlar bilan ishlash tizimini yanada takomillashtirish chora-tadbirlari toʻgʻrisida”gi PQ-346-son qarori 7-bandining birinchi xatboshisi quyidagi tahrirda bayon etilsin:

“7. Toshkent shahri, Yunusobod tumani, “Otchopar-1” MFY, Darvozakent koʻchasi, 60-uy manzilidagi bino-inshootlar Markazga operativ boshqaruv huquqi asosida oʻtkazilsin”.

8. Oʻzbekiston Respublikasi Prezidentining 2025-yil 19-sentabrdagi “Toʻqimachilik va tikuv-trikotaj sanoatida islohotlarni jadallashtirish va eksport salohiyatini kengaytirish chora-tadbirlari toʻgʻrisida”gi PQ-290-son qarorining 9-bandidagi “oilaviy” soʻzi “davlat-xususiy sheriklik asosidagi” soʻzlari bilan almashtirilsin.