“Yevroosiyo” Oʻzbekiston - Rossiya aksionerlik korporatsiyasining faoliyatini tashkil etish masalalari toʻgʻrisida (161-son)

25.03.1994

Oʻzbekiston Respublikasi Vazirlar Mahkamasining

qarori

Mavjud ishlab chiqarish imkoniyatlaridan hamda xom ashyo resurslaridan toʻlaroq foydalanish, oʻzaro manfaatli iqtisodiy hamkorlikni kengaytirish, Oʻzbekiston Respublikasi va Rossiya Federatsiyasi korxonalarining toʻgʻridan-toʻgʻri xoʻjalik aloqalarini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasining bir qator korxonalari, birlashmalari, uyushmalari va konsernlarining Rossiya Federatsiyasining xoʻjalik tuzilmalari bilan birgalikda ilova*ga muvofiq tarkibda “Yevroosiyo” Oʻzbekiston—Rossiya aksionerlik korporatsiyasini tashkil etish haqidagi tashabbusi maʼqullansin.

* Ilova rus tilidagi matnda beriladi.

Konsern faoliyatining asosiy yoʻnalishlaridan biri quyidagilar hisoblanishiga rozilik berilsin:

aksionerlik korxonalarini xom ashyo va moddiy-texnika resurslari bilan ustuvor tartibda taʼminlash, sarmoyalarning muomalada boʻlishini jadallashtirish asosida ishlab chiqarish quvvatlaridan samarali foydalanish maqsadida xoʻjalik aloqalarini tashkil etish;

tovar konyunkturasini oʻrganish va mavjud boʻsh quvvatlar bilan qoʻshimcha ravishda mahsulotlar ishlab chiqarishni tashkil etish;

Oʻzbekiston Respublikasida, Rossiya Federatsiyasida va chet elda sanoatga, qishloq xoʻjaligiga, qurilishga, transportga va faoliyatning noishlab chiqarish sohalariga investitsiyalarni jalb qilishni amalga oshirish.

Taʼsis yigʻilishi bilan korporatsiya tuzilmasi tasdiqlanganligi, uning rahbar organlari saylanganligi hamda ustav fondi tashkil etilganligi, unda aksiyalarning 60 foizi yuridik shaxslarniki, 40 foizi — jismoniy shaxslarniki ekanligi, aksiyalar Oʻzbekiston Respublikasi va Rossiya Federatsiyasi oʻrtasida 50 foizdan taqsimlanganligi maʼlumot uchun qabul qilinsin.

Belgilab qoʻyilsinki, korporatsiyaning respublika hududidagi faoliyati “Oʻzbekiston Respublikasida xoʻjalik jamiyatlari va shirkatlari toʻgʻrisida”, “Oʻzbekiston Respublikasida xorijiy investitsiyalar toʻgʻrisida”gi qonunlarga va amaldagi boshqa normativ hujjatlarga muvofiq amalga oshiriladi.

2. Oʻzbekiston Respublikasi Moliya vazirligi, Adliya vazirligi “Yevroosiyo” korporatsiyasini davlat roʻyxatidan oʻtkazishni belgilangan tartibda amalga oshirsinlar.

3. Oʻzbekiston Respublikasi Markaziy bankiga belgilangan tartibda hisob-kitob, valyuta va boshqa schyotlar ochishda “Yevroosiyo” korporatsiyasiga yordam koʻrsatish tavsiya qilinsin.

4. Oʻzbekiston Respublikasi Tashqi iqtisodiy aloqalar vazirligi “Yevroosiyo” korporatsiyasini amaldagi qonun hujjatlariga muvofiq tashqi iqtisodiy faoliyatning qatnashchisi sifatida roʻyxatga olsin.

5. Oʻzbekiston Respublikasi Aloqa vazirligi “Yevroosiyo” korporatsiyasini hukumat telefoni va teleks aloqasi bilan taʼminlasin.

6. Oʻrta Osiyo Temir yoʻl boshqarmasi, “Oʻzbekiston havo yoʻllari” milliy aviakompaniyasi, “Oʻzavtotrans” davlat korporatsiyasi “Yevroosiyo” korporatsiyasining transport xizmatlari koʻrsatish toʻgʻrisidagi buyurtmanomalari bajarilishini taʼminlasinlar.

7. Oʻzbekiston Respublikasi Tashqi iqtisodiy aloqalar vazirligi, Davlat soliq qoʻmitasi va ularning hududiy boʻlinmalari “Yevroosiyo” korporatsiyasiga eksport-import operatsiyalari bilan bogʻliq hujjatlarning belgilangan tartibda, oʻz vaqtida rasmiylashtirilishiga koʻmaklashsinlar.

8. Oʻzbekiston Respublikasi Davlat mulki qoʻmitasi:

Gogol koʻchasi, 102-uydagi binoni “Yevroosiyo” korporatsiyasiga ijaraga bersin, binoni qayta taʼmirlash korporatsiya mablagʻlari hisobidan amalga oshirilsin;

Toshkent davlat-aksionerlik qurilish korporatsiyasi bilan birgalikda “Yevroosiyo” korporatsiyasiga bazalarni ijaraga berish masalasini koʻrib chiqsin.

9. Mazkur qarorning bajarilishini nazorat qilish Vazirlar Mahkamasining tegishli majmuilariga yuklansin.

Oʻzbekiston Respublikasi Bosh vaziri A. MUTALOV

Toshkent sh.,

1994-yil 25-mart,

161-son