Yangi zamonaviy suzish havzalarini (basseyn) qurish va ishga tushirish bilan bogʻliq xarajatlarni qoplash boʻyicha davlat xizmatini koʻrsatishning maʼmuriy reglamentini tasdiqlash toʻgʻrisida (29-son)

27.01.2026

Oʻzbekiston Respublikasi Vazirlar Mahkamasining

QARORI

Oʻzbekiston Respublikasi Prezidentining “2025-2026-yillarda sayyohlar oqimini keskin koʻpaytirish va turistik xizmatlar koʻlamini jadal kengaytirish orqali turizmning iqtisodiyotdagi oʻrni va ahamiyatini oshirish chora-tadbirlari toʻgʻrisida” 2025-yil 15-maydagi PF-87-son Farmoni ijrosini taʼminlash, shuningdek, mamlakatimiz iqlimidan kelib chiqib, turistlarning ehtiyojlarini qanoatlantirish maqsadida Vazirlar Mahkamasi qaror qiladi:

1. Quyidagilarni nazarda tutuvchi Yangi zamonaviy suzish havzalarini (basseyn) qurish va ishga tushirish bilan bogʻliq xarajatlarni qoplash boʻyicha davlat xizmatini koʻrsatishning maʼmuriy reglamenti ilovaga muvofiq tasdiqlansin:

tadbirkorlik subyektlariga qoʻyiladigan talablar;

xarajatlarni qoplash uchun ariza berish tartibi hamda taqdim etiladigan hujjatlar;

arizani koʻrib chiqish va qaror qabul qilish tartibi;

ajratiladigan mablagʻlarni tadbirkorlik subyektlariga oʻtkazish tartibi.

2. Oʻzbekiston Respublikasi Turizm qoʻmitasi Raqamli texnologiyalar vazirligi bilan birgalikda oʻn besh kun muddatda ushbu qaror bilan tasdiqlangan Reglamentga muvofiq davlat xizmati Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali joriy etilishini taʼminlasin.

3. Oʻzbekiston Respublikasi Adliya vazirligi davlat organlari va boshqa tashkilotlar tomonidan davlat xizmatlarini koʻrsatishning belgilangan tartibiga rioya etilishi boʻyicha ularning faoliyati yuzasidan, shu jumladan, YIDXP orqali doimiy nazorat oʻrnatsin.

4. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 27-yanvar,

29-son

Vazirlar Mahkamasining 2026-yil 27-yanvardagi 29-son qaroriga ILOVA

Yangi zamonaviy suzish havzalarini (basseyn) qurish va ishga tushirish bilan bogʻliq xarajatlarni qoplash boʻyicha davlat xizmatini koʻrsatishning

MAʼMURIY REGLAMENTI

1-bob. Umumiy qoidalar

1. Ushbu Maʼmuriy reglament yangi zamonaviy suzish havzalarini (basseyn) (keyingi oʻrinlarda — suzish havzasi) qurish (mavjud suzish havzalarini rekonstruksiya qilish bundan mustasno) va ishga tushirish bilan bogʻliq xarajatlarni Oʻzbekiston Respublikasi Turizm qoʻmitasi (keyingi oʻrinlarda — Qoʻmita) huzuridagi budjetdan tashqari Turizmni qoʻllab-quvvatlash jamgʻarmasi (keyingi oʻrinlarda — Jamgʻarma) mablagʻlari hisobidan qoplash tartibini belgilaydi.

2. Xarajatlarni qoplash uchun mablagʻlar Davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali Qoʻmita tomonidan ajratiladi.

3. Ushbu Maʼmuriy reglamentda quyidagi asosiy tushunchalar qoʻllanadi:

joylashtirish vositalari — mehmonxonalar, turistik bazalar va majmualar, dam olish uylari va zonalari, pansionatlar, kempinglar, motellar, mehmon uylari, sanatoriylar hamda mehmonxona xizmatlari (joylashtirish boʻyicha xizmatlar) koʻrsatiladigan boshqa obyektlar, shuningdek, joylashtirish vositasi sifatida tunash uchun jihozlangan yerusti transporti;

yirik savdo majmuasi — maydoni 5 ming kvadrat metrdan katta boʻlgan savdo majmualari, shu jumladan, ular egallagan yer uchastkalari;

suzish havzasi — joylashtirish vositalari, yirik savdo majmualari yoki umumiy ovqatlanish shoxobchalari hududida tadbirkorlik subyektlari tomonidan 2026-yil 1-fevraldan — 2028-yil 1-yanvarga qadar qurib ishga tushiriladigan, maydoni 50 — 100 kvadrat metr, chuqurligi 1,3 metrdan boshlanadigan, suvni filtrlash, isitish va dezinfeksiya qilish tizimlari bilan jihozlangan, yopiq (ichki) yoki ochiq (tashqi) sunʼiy suzish havzasi, binoning tashqi va ichki fasad qismlarini, shuningdek, hududini dekorativ jihozlashga qaratilgan suv havzalari va favvoralar bundan mustasno;

talabgor — pudrat shartnomasi asosida joylashtirish vositalari, yirik savdo majmualari va umumiy ovqatlanish shoxobchalari hududida suzish havzasini qurish va ishga tushirish xarajatlarini qoplab berish boʻyicha ariza topshirgan, belgilangan tartibda joylashtirish vositasi, yirik savdo majmuasi va umumiy ovqatlanish shoxobchasi sifatida davlat roʻyxatidan oʻtgan hamda tadbirkorlik faoliyatini amalga oshirayotgan yuridik yoki jismoniy shaxs;

xarajatlarni qoplash — talabgorga suzish havzasini qurish va ishga tushirish uchun sarflangan xarajatlarni Jamgʻarma hisobidan qoplash.

4. Ushbu Maʼmuriy reglamentga muvofiq talabgorlar tomonidan taqdim etilgan dastlabki 100 ta suzish havzasini qurish va ishga tushirish bilan bogʻliq xarajatlar qoplab beriladi.

Bunda mablagʻlar 2026-yil 1-fevraldan boshlab 2028-yil 1-yanvarga qadar suzish havzalarini tashkil etish xarajatlarining 50 foizigacha, lekin 100 million soʻmdan oshmagan qismi uchun ajratiladi.

5. Talabgor xarajatlarni qoplash uchun ariza taqdim etish vaqtida quyidagi talablarga javob berishi lozim:

Oʻzbekiston Respublikasining Soliq kodeksida nazarda tutilgan soliq va yigʻimlar boʻyicha qarzdorligi boʻlmasligi;

qayta tashkil etish yoki tugatish jarayonida boʻlmasligi;

faoliyati qonunchilik hujjatlarida belgilangan tartibda vaqtincha toʻxtatilgan boʻlmasligi;

sud qarori asosida toʻlovga qobiliyatsiz deb eʼlon qilingan boʻlmasligi.

6. Xarajatlar bitta talabgorga bitta suzish havzasi uchun bir marta qoplab beriladi.

7. Xarajatlarni qoplash uchun mablagʻlar ushbu Maʼmuriy reglamentga 1-ilovaga muvofiq sxema boʻyicha ajratiladi.

2-bob. Ariza taqdim etish va uni koʻrib chiqish tartibi

8. Talabgor xarajatlarni qoplash uchun Davlat xizmatlari markaziga yoki YIDXP orqali Qoʻmitaga ushbu Maʼmuriy reglamentga 2-ilovaga muvofiq shaklda ariza bilan murojaat qiladi.

Arizaga quyidagi hujjatlar ilova qilinadi:

suzish havzasining loyiha hujjatlari nusxasi;

suzish havzasini qurish va ishga tushirish uchun tuzilgan pudrat shartnomasi nusxasi;

shartnomaga asosan toʻlov amalga oshirilganini tasdiqlovchi elektron hujjat (hisobvaraq-faktura, kassa yoki terminal apparati cheklari, bank toʻlov hujjatlari va boshqalar) nusxalari.

9. Arizaga talabgor toʻgʻrisida maʼlumotlar kiritilgandan soʻng talabgor uni imzolarni identifikatsiya qilishning tegishli vositalari (ERI, daktiloskopiya, elektron raqamli imzo, Mobil-ID va boshqalar) bilan tasdiqlaydi.

Talabgor arizani YIDXP orqali toʻldirganda, undan elektron raqamli imzo talab etilmaydi.

10. Qoʻmita tomonidan ariza kelib tushgan kundan boshlab oʻn ish kunida uning ushbu Maʼmuriy reglamentda belgilangan talablarga mosligi joyiga chiqqan holda oʻrganib chiqiladi hamda dalolatnoma rasmiylashtiriladi.

11. Qoʻmita talabgorning arizasini oʻrganish davrida quyidagi hujjatlarni masʼul davlat organlari va tashkilotlardan mustaqil ravishda, shu jumladan, “Elektron hukumat” tizimining idoralararo integratsiyalashuv platformasi orqali real vaqt rejimida tekshirib oladi:

talabgorning nomi, joylashgan joyi (pochta manzili), uning roʻyxatdan oʻtish raqami, sanasi, guvohnoma bergan davlat organi nomi, STIR yoki JSHSHIR, uning tijorat banki rekvizitlari va hisobvaragʻini;

joylashtirish vositasiga berilgan muvofiqlik sertifikatini;

ushbu Maʼmuriy reglamentning 5-bandida nazarda tutilgan talablarga mos kelishini.

12. Qoʻmita arizani oʻrganib chiqib, bir ish kunida xarajatlarni qoplash yoki xarajatlarni qoplashni rad etish toʻgʻrisida (rad etish asoslarini koʻrsatgan holda) qaror qabul qiladi hamda qarorning elektron nusxasini qaror qabul qilingan kundan soʻng bir ish kunida Davlat xizmatlari markazi (oʻzi kelgan holda murojaat qilinganda) yoki YIDXP (elektron tarzda murojaat qilinganda) orqali talabgorga yuboradi.

13. Xarajatlarni qoplash toʻgʻrisidagi qarorda qoplanayotgan summa miqdori, suv havzasining joylashgan joyi (pochta manzili) va uning kadastr raqami, tadbirkorlik subyekti nomi (F.I.O.), STIR (JSHSHIR), uning tijorat bankidagi hisobvaragʻi koʻrsatiladi.

14. Xarajatlarni qoplash quyidagi asoslarga koʻra rad etiladi:

arizada ushbu Maʼmuriy reglamentga 2-ilovada nazarda tutilgan maʼlumotlar toʻliq koʻrsatilmaganda yoki notoʻgʻri maʼlumot taqdim etilganda;

talabgor ushbu Maʼmuriy reglamentda belgilangan talablarga javob bermaganda.

15. Xarajatlarni qoplashni ushbu Maʼmuriy reglamentda koʻrsatilmagan asoslar boʻyicha rad etishga yoʻl qoʻyilmaydi.

16. Talabgor xarajatlarni qoplashni rad etish toʻgʻrisidagi qaror nusxasini olgan kundan boshlab, koʻpi bilan bir oy davomida qarorda koʻrsatib oʻtilgan kamchiliklarni bartaraf etishi hamda ularning bartaraf etilganini tasdiqlovchi hujjatlarni ilova qilgan holda, Qoʻmitaga takroran ariza bilan murojaat qilishi mumkin.

17. Ariza takroran taqdim etilgan kundan boshlab yetti ish kunida qayta koʻrib chiqiladi. Bunda xarajatlarni qoplashni yangi asoslar boʻyicha rad etishga yoʻl qoʻyilmaydi.

18. Ushbu Maʼmuriy reglamentning 16-bandida koʻrsatilgan muddat tugagandan soʻng taqdim etilgan ariza yangi berilgan deb hisoblanadi.

19. Qoʻmita xarajatlarni qoplash toʻgʻrisida qaror qabul qilingan kundan boshlab oʻn ish kuni mobaynida talabgorning xizmat koʻrsatuvchi tijorat bankidagi hisobvaragʻiga mablagʻlarni oʻtkazib beradi.

3-bob. Yakunlovchi qoidalar

20. Jamgʻarma hisobidan mablagʻ ajratilgan tadbirkorlik subyektlari roʻyxati (reyestri) Qoʻmitaning rasmiy veb-saytiga joylashtiriladi.

21. Talabgor Qoʻmitaga taqdim etilgan maʼlumotlar va hujjatlarning toʻgʻriligi uchun masʼul hisoblanadi.

22. Qoʻmita ushbu Maʼmuriy reglament talablariga muvofiq ishlarni tashkil etish, muvofiqlashtirish, monitoring qilish va Jamgʻarma hisobidan ajratilgan mablagʻlarning talabgorga yetkazilishi uchun masʼul hisoblanadi.

23. Talabgor Qoʻmitaning xarajatlarni qoplab berishni rad etish toʻgʻrisidagi qaroridan norozi boʻlgan hollarda qonunchilik hujjatlarida belgilangan tartibda sudga shikoyat qilishi mumkin.

24. Ushbu Maʼmuriy reglament talablari buzilishida aybdor boʻlgan shaxslar qonunchilik hujjatlariga muvofiq javob beradilar.

Yangi zamonaviy suzish havzalarini (basseyn) qurish va ishga tushirish bilan bogʻliq xarajatlarni qoplash boʻyicha davlat xizmatini koʻrsatishning maʼmuriy reglamentiga 1-ILOVA

Yangi zamonaviy suzish havzalarini (basseyn) qurish va ishga tushirish bilan bogʻliq xarajatlarni qoplash

SXEMASI

Yangi zamonaviy suzish havzalarini (basseyn) qurish va ishga tushirish bilan bogʻliq xarajatlarni qoplash boʻyicha davlat xizmatini koʻrsatishning maʼmuriy reglamentiga 2-ILOVA